1. ¿Bajcheʼ miʼ mejlel la cʌqʼuen i tijicñʌyel Jehová?

 LAʼCU lac ñaʼtan chaʼan an majqui mi la cʌqʼuen i majtan, ¿bajcheʼ yubil mi la cubin cheʼ bʌ mi laj qʼuel chaʼan maʼañic woli (choncol) i cʼʌn, tsaʼix ñajayi i chaʼan o tsaʼ jach i loto? Chʼijyem mi la cubin. Pero cheʼ bʌ mi laj qʼuel chaʼan wolʌch i cʼʌn tijicña mi la cubin. Miʼ pʌs chaʼan mucʼʌch i wen qʼuel ti ñuc jiñi majtan tsaʼ bʌ la cʌqʼue. ¿Chuqui miʼ pʌsbeñonla ili? Jehová tsiʼ yʌcʼʌ i cuxtʌlel i Yalobil chaʼañonla, i tijicña miʼ yubin cheʼ bʌ miʼ qʼuel chaʼan mucʼʌch lac wen qʼuel ti ñuc ili majtañʌl yicʼot jiñi i cʼuxbiya tsaʼ bʌ i pʌsʌ (Juan 3:16; Rom. 5:​7, 8).

 2. ¿Chuqui mi caj laj qʼuel ti ili estudio?

² Pero mi tsaʼ laj cʌyʌ laj qʼuel ti ñuc ili majtañʌl tsaʼ bʌ i yʌqʼueyonla Jehová lajal bajcheʼ mi lac lot baqui maʼañix mi lac taj laj qʼuel i miʼ ñajʌyel lac chaʼan. Chaʼan mach cheʼic mi la cujtel bajcheʼ jiñi, laʼ lac ñaʼtan tiʼ pejtelel ora chuqui an i mele Jehová yicʼot Jesús ti lac tojlel. Jiñʌch muʼ bʌ caj laj qʼuel ti ili estudio, mi caj laj qʼuel bajcheʼ miʼ coltañonla jiñi i cuxtʌlel Jesús ili ora yicʼot bajcheʼ mi caj i coltañonla ti talto bʌ qʼuin. Cheʼ jaʼel, mi caj laj qʼuel bajcheʼ miʼ mejlel lac pʌsben Jehová chaʼan mucʼʌch lac wen qʼuel ti ñuc jiñi i cʼuxbiya i ñumento cheʼ tiʼ yorajlel jiñi Conmemoración.

BAJCHEʼ MIʼ COLTAÑONLA ILI ORA

 3. ¿Bajcheʼ miʼ coltañonla ili ora cheʼ Jesús tsiʼ yʌcʼʌ i cuxtʌlel?

³ Wolix i coltañonla cheʼ tsiʼ yʌcʼʌ i cuxtʌlel Jesús. Jumpʼejl ejemplo, Jehová miʼ cʼʌn jiñi i cuxtʌlel Jesús chaʼan miʼ ñusʌbeñonla lac mul. Mach chaʼañic xicʼbil miʼ mel, miʼ mel come cheʼʌch yom. Jin chaʼan ti jumpʼejl cʼay David tsiʼ yʌlʌ: «Isujm utsʼatet, c Yum, maʼ ñusʌbeñon lojon c mul» (Sal. 86:5; 103:​3, 10-13).

 4. ¿Chaʼan majquiyob tsiʼ yʌcʼʌ i cuxtʌlel Jesús? (Lucas 5:32; 1 Timoteo 1:15).

 ⁴ An muʼ bʌ i ñaʼtañob chaʼan mach i wentʌlelic miʼ ñusʌbentelob i mul ti Jehová. Pero tiʼ sujm mi juntiquilic i wentʌlel miʼ ñusʌbentel. Jiñi apóstol Pablo tsiʼ yʌlʌ: «Mach i wentʌlelic mic subentel ti apóstol come tsaʼ j contrajibe i congregación Dios». I miʼ bej al: «Pero apóstolon chaʼan jiñi ñuc bʌ i yutslel Dios» (1 Cor. 15:​9, 10). Mi tsaʼ lac mele mach bʌ weñic i mi lac chaʼ ñaʼtan lac bʌ Jehová miʼ ñusʌbeñonla. ¿Chucoch? Mach chaʼañic i wentʌlel mi lac ñusʌbentel chaʼañʌch miʼ cʼuxbiñonla. Mi tsaʼ lac ñaʼta chaʼan mach i wentʌlelic miʼ ñusʌbeñonla Jehová jiñi lac mul, laʼ laj cʼajtesan chaʼan Jehová maʼañic tsiʼ yʌcʼʌ ti chʌmel (sajtel) jiñi i Yalobil chaʼan jiñi tojoʼ bʌ, tsiʼ yʌcʼʌ chaʼan jiñi xmulilob muʼ bʌ i chaʼ ñaʼtañob i bʌ (pejcan Lucas 5:32; 1 Timoteo 1:15).

 5. ¿Yom ba mi la cʌl chaʼan Jehová yomʌch miʼ ñusʌbeñonla lac mul, chucoch?

⁵ Anquese añix cabʌl jabil woli (yʌquel) lac melben i yeʼtel Jehová, mach yomic mi lac ñaʼtan chaʼan tiʼ caj jiñi Jehová yomʌch miʼ ñusʌbeñonla lac mul. I sujmʌch, miʼ wen qʼuel ti ñuc pejtelel chuqui melbil bʌ lac chaʼan tiʼ tojlel (Heb. 6:10). Pero maʼañic tsiʼ yʌcʼʌ i Yalobil bajcheʼ lac tojol chaʼan pejtelel chuqui jiñi am bʌ lac mele tiʼ tojlel, Jehová tsiʼ yʌcʼʌ i Yalobil bajcheʼ majtañʌl chaʼañonla. Jin chaʼan, mi tsaʼ lac ñaʼta chaʼan Jehová yomʌch miʼ ñusʌbeñonla lac mul come wajalix cajel lac melben i yeʼtel, lajal bajcheʼ woli laj cʌl chaʼan mach i cʼʌjñibalix lac chaʼan cheʼ Jesús tsiʼ yʌcʼʌ i cuxtʌlel (laja yicʼot Gálatas 2:21).

 6. ¿Chucoch tsiʼ chaʼle wersa Pablo chaʼan miʼ melben i yeʼtel Jehová?

⁶ Pablo tsiʼ chaʼle wersa chaʼan miʼ melben i yeʼtel Jehová anquese yujil chaʼan mach jiñic chaʼan mi caj i ñusʌbentel i mul. Cheʼ jiñi, ¿chucoch tsiʼ chaʼle wersa chaʼan miʼ melben i yeʼtel? Come yom i pʌs chaʼan miʼ wen qʼuel ti ñuc jiñi i yutslel Dios (Efes. 3:7). Mi lac bej melben i yeʼtel Jehová come la com lac pʌsben chaʼan mi lac wen qʼuel ti ñuc jiñi i yutslel yicʼot i pʼuntaya.

 7. ¿Baqui bʌ yambʌ i wenlel mi lac taj ili ora cheʼ Jesús tsiʼ yʌcʼʌ i cuxtʌlel? (Romanos 5:1; Santiago 2:23).

⁷ Yambʌ i wenlel muʼ bʌ lac taj cheʼ Jesús tsiʼ yʌcʼʌ i bʌ ti chʌmel jiñʌch cheʼ mi lac mejlel ti sujtel tiʼ yamigo Jehová. a Cheʼ bajcheʼ tsaʼ laj qʼuele ti yambʌ estudio maʼañic majqui lʌcʼʌl an yicʼot Jehová cheʼ bʌ miʼ yilan pañimil (chʼocʼan). Pero come Jesús tsiʼ yʌcʼʌ i cuxtʌlel chaʼañonla mi lac mejlel lac lʌcʼtesan lac bʌ ti Dios i utsʼat mi la cajñel yicʼot (pejcan Romanos 5:1; Santiago 2:23).

 8. ¿Chucoch mucʼʌch lac wen qʼuel ti ñuc cheʼ miʼ mejlel lac pejcan Jehová ti oración?

⁸ Junchajp wen utsʼatax bʌ cheʼ Jesús tsiʼ yʌcʼʌ i cuxtʌlel, jiñʌch cheʼ mi lac mejlel lac pejcan Jehová ti oración. Jehová mach cojach miʼ ñʌchʼtan jiñi oración muʼ bʌ i mejlel ti tempa bʌ tac, miʼ ñʌchʼtan jaʼel jiñi oración muʼ bʌ lac mel ti jujuntiquil. I sujmʌch, cheʼ mi lac chaʼlen oración mi la cubin i ñʌchʼtʌlel lac pusicʼal, pero jiñi ñumen ñuc bʌ jiñʌch cheʼ miʼ coltañonla chaʼan mi lac ñumen lʌcʼtesan lac bʌ ti Jehová (Sal. 65:2; Sant. 4:8; 1 Juan 5:14). Jin chaʼan, cheʼ bʌ Jesús wʌʼto an ti pañimil tiʼ pejtelel ora tsiʼ chaʼle oración come yujil chaʼan Jehová miʼ ñʌchʼtan i jiñi tsiʼ colta chaʼan wen lʌcʼʌl miʼ yajñel tiʼ tojlel (Luc. 5:16). Wen utsʼatax cheʼ Jesús tsiʼ yʌcʼʌ i cuxtʌlel chaʼañonla come cheʼ bajcheʼ jiñi mi lac mejlel ti sujtel tiʼ yamigo Jehová i miʼ mejlel lac pejcan ti oración.

 BAJCHEʼ MI CAJ I COLTAÑONLA TI TALTO BɅ QʼUIN

 9. ¿Chuqui ti wenlel mi caj i tajob ti talto bʌ qʼuin jiñi xucʼuloʼ bʌ i wiñicob Jehová?

⁹ ¿Chuqui ti wenlel mi caj i tajob ti talto bʌ qʼuin jiñi xucʼuloʼ bʌ i wiñicob Dios? Jehová mi caj i yʌqʼueñob i cuxtʌlel mach bʌ añic miʼ jilel. Cabʌl lac piʼʌlob maʼañic miʼ ñopob chaʼan mi lac mejlel ti chumtʌl tiʼ pejtelel ora come añix cabʌl jabil woliʼ chʌmelob jiñi lac piʼʌlob. Pero Jehová tsiʼ meleyonla chaʼan mi lac chumtʌl tiʼ pejtelel ora. Tajol jiñi lac piʼʌlob miʼ toj sajtelob i pusicʼal cheʼ miʼ yubiyob chaʼan mi lac mejlel ti chumtʌl tiʼ pejtelel ora, pero miʼ toj sajtel lac pusicʼal jaʼel cheʼ mi laj qʼuel chaʼan Jehová tsiʼ yʌcʼʌ i Yalobil chaʼan i tojol lac mul i cheʼ bajcheʼ jiñi mi lac mejlel ti chumtʌl tiʼ pejtelel ora (Rom. 8:32).

10. ¿Chuqui woliʼ pijtañob jiñi ungidojob yicʼot jiñi yambʌ tiñʌmeʼob?

¹⁰ Anquese yomto mi lac pijtan chaʼan mi lac chumtʌl tiʼ pejtelel ora, Jehová yom chaʼan ili ora muqʼuix lac wʌn ñaʼtan bajcheʼ yilal miʼ cajel. Jiñi ungidojob muʼ bʌ caj i majlelob ti panchan mi caj i chaʼleñob Yumʌntel yicʼot Jesucristo (Apoc. 20:6). I jiñi yambʌ tiñʌmeʼob muʼ bʌ i pijtañob chumtʌl ila ti pañimil mi caj i chumtʌlob ti jumpʼejl Paraíso wen utsʼatax bʌ baqui maʼañix miʼ cajel wocol o cʼuxyajiyel (Apoc. 21:​3, 4). ¿Muʼ baʼ pijtan chumtʌl tiʼ pejtelel ora wʌʼ ti pañimil? Ili mach yomic i yʌl chaʼan jiñi lac majtan mach wen ñuquic cheʼ bajcheʼ jiñi muʼ bʌ caj i majlelob ti panchan. Tiʼ sujm Jehová tsiʼ meleyonla chaʼan ti lac pejtelel mi lac chumtʌl ila ti pañimil. Jin chaʼan pejtelel wʌʼ bʌ mi caj i chumtʌlob ti pañimil mi caj i yubiñob i tijicñʌyel.

11, 12. ¿Baqui tac bʌ bendición la com lac taj yaʼ ti Paraíso? (Qʼuele jaʼel jiñi dibujo).

¹¹ Ñaʼtancu bajcheʼ yilal cheʼ yaʼix añonla ti Paraíso, cheʼ maʼañix cʼamʌjel, chʌmel i maʼañix chuqui mi caj lac pensarin (Is. 25:8; 33:24). Jehová mi caj i yʌqʼueñonla pejtelel chuqui la com. ¿Chuqui maʼ mulan a mel? ¿Muʼ baʼ mulan a ñumen cʌn jiñi añimal tac, maʼ cʌn  chaʼan bʌ música o maʼ mel dibujo? Cheʼ jaʼel miʼ cajel cabʌl eʼtel (troñel), yom xmel ototob, muʼ bʌ i chaʼleñob pacʼ, muʼ bʌ i chajpañob bʌlñʌcʼʌl, yujiloʼ bʌ chaʼan jardinería, miʼ mejlel eʼtijib tac yicʼot yan tac bʌ (Is. 35:1; 65:21). ¡Cabʌl chuqui mi caj i mejlel a mel ti jiñi bʌ ora!

¹² ¡Wen utsʼatax miʼ cajel cheʼ bʌ miʼ tejchel jiñi chʌmeñoʼ bʌ! (Hech. 24:15). Cheʼ jaʼel, mi caj i mejlel lac ñumen cʌn Jehová yicʼot pejtelel chuqui melbil i chaʼan (Sal. 104:24; Is. 11:9). Pero jiñi ñumen wem bʌ jiñʌch cheʼ mi caj i mejlel lac chʼujutesan tiʼ ñʌchʼtʌlel lac pusicʼal come maʼañix mi caj lac chaʼlen mulil. ¿La com ba lac sʌt pejtelel iliyi chaʼan jach mi lac jumucʼ ñusan lac bʌ ti jiñi mulil? (Heb. 11:25). Weñʌch cheʼ mi lac chaʼlen wersa baqui jaxʌl chaʼan mi lac taj pejtelel ili bendición. Cheʼ bʌ yaʼix añonla ti jiñi Paraíso mi caj i tsʼʌctiyel pejtelel woli bʌ lac pijtan ili ora. Pejtelel iliyi mi caj i mejlel lac taj come Jehová tsiʼ wen cʼuxbiyonla i tsiʼ yʌcʼʌ ti chʌmel jiñi i Yalobil.

LAʼ LAC PɅSBEN JEHOVÁ CHAʼAN MUCʼɅCH LAJ QʼUEL TI ÑUC I CʼUXBIYA

13. ¿Bajcheʼ miʼ mejlel lac pʌs chaʼan mucʼʌch laj qʼuel ti ñuc jiñi i cʼuxbiya Jehová? (2 Corintios 6:1).

¹³ ¿Bajcheʼ mi lac pʌsben Jehová chaʼan mi laj qʼuel ti ñuc jiñi i tojol laj coltʌntel? Jiñʌch cheʼ ñaxan mi laj cʌcʼ i melol i yeʼtel (Mat. 6:33). Cheʼ jaʼel, Jesús tsaʼ chʌmi «chaʼan jiñi cuxuloʼ bʌ mach cuxulobix chaʼan miʼ melob chuqui bajñel yomob, chaʼañix jiñi tsaʼ bʌ chʌmi tiʼ tojlelob i tsaʼ chʼojyesʌnti» (2 Cor. 5:15). Jehová tsiʼ wen pʌsʌ i yutslel yicʼot tsiʼ ñusʌbeyonla lac mul, jin chaʼan cheʼ mi lac chaʼlen wersa chaʼan mi lac melben i yeʼtel mi lac pʌs chaʼan mucʼʌch lac ñaʼtan bajcheʼ cʼamel tsiʼ mele Jehová ti lac tojlel yicʼot chaʼan mi lac wen qʼuel ti ñuc (pejcan 2 Corintios 6:1).

14. ¿Bajcheʼ mi lac pʌs chaʼan mucʼʌch lac ñop muʼ bʌ i subeñonla Jehová?

¹⁴ Yambʌ bajcheʼ mi lac pʌs chaʼan mucʼʌch laj qʼuel ti ñuc i cʼuxbiya Jehová jiñʌch cheʼ mi lac ñop tiʼ tojlel i mi lac jacʼ muʼ bʌ i subeñonla. ¿Bajcheʼ mi lac mel? Cheʼ mi lac chʼʌm decisión tac bajcheʼ baqui jaxʌl mi caj lac chaʼlen clase o chuqui ti eʼtel mi caj lac chʼʌm, yomʌch mi lac ñaʼtan chuqui miʼ ñaʼtan Jehová (1 Cor. 10:31; 2 Cor. 5:7). Cheʼ mi lac mel bajcheʼ iliyi utsʼatax chuqui miʼ yujtel, mi lac ñumen ñop ti Jehová i mi lac ñumen lʌcʼtesan lac bʌ tiʼ tojlel. Cheʼ jaʼel, muʼto lac ñumen ñop chaʼan pejtelel jiñi albil bʌ i chaʼan Jehová mucʼʌch caj i tsʼʌctiyel (Rom. 5:​3-5; Sant. 2:​21, 22).

15. ¿Bajcheʼ mi lac pʌs chaʼan mi laj qʼuel ti ñuc i cʼuxbiya Jehová yicʼot jiñi i tojol laj coltʌntel tiʼ yorajlel jiñi Conmemoración?

¹⁵ Yambʌ bajcheʼ mi lac pʌs chaʼan mi laj qʼuel ti ñuc i cʼuxbiya Jehová yicʼot jiñi i tojol laj coltʌntel tsaʼ bʌ i yʌcʼʌ jiñʌch cheʼ mi lac chaʼlen wersa lac mel baʼ jaxʌl cheʼ tiʼ yorajlel jiñi Conmemoración. Yomʌch mi lac chajpan lac bʌ chaʼan maʼañic mi lac sʌt jiñi qʼuin,  pero cheʼ jaʼel yom mi lac pʌyob yambʌ lac piʼʌlob (1 Tim. 2:4). I cheʼ bʌ mi lac mel yom mi lac tsictesʌbeñob chuqui miʼ mejlel ti jiñi Conmemoración. Miʼ mejlel lac pʌsbeñob jiñi video ¿Chucoch tsaʼ chʌmi Jesús? yicʼot Laʼ laj cʼajtesan i chʌmel Jesús. Jiñi ancianojob yom miʼ chaʼleñob wersa chaʼan miʼ pʌyob jaʼel jiñi inactivojob. ¿Ñaʼtancu bajcheʼ cʼamel jiñi tijicñʌyel yaʼ ti panchan yicʼot ila ti pañimil cheʼ bʌ juntiquil tsaʼ bʌ i ñajtʼesa i bʌ ti Jehová miʼ chaʼ sujtel? (Luc. 15:​4-7). Jin chaʼan, tiʼ qʼuiñilel jiñi Conmemoración laʼ la cʌqʼuen lac bʌ jiñi meta chaʼan mi lac chaʼlen ti saludar pejtelel muʼ bʌ i cʼotelob, pero ñumento jiñi wolito bʌ i tsijib cʼotelob o jiñi añix bʌ ora maʼañic ajñemob ti jumpʼejl Conmemoración. ¡Laʼ lac pʌsbeñob chaʼan tijicñayonla cheʼ mi laj qʼuelob! (Rom. 12:13).

16. ¿Chucoch weñʌch cheʼ mi lac ñumen chaʼlen subtʼan cheʼ tiʼ yorajlel jiñi Conmemoración?

¹⁶ ¿Muʼ baʼ mejlel a ñumen chaʼlen subtʼan tiʼ yorajlel jiñi Conmemoración? Jiñʌch junchajp bajcheʼ miʼ mejlel a pʌsben Jehová yicʼot Jesús chaʼan maʼ qʼuel ti ñuc tsaʼ bʌ i meleyob ti a tojlel. I cheʼ maʼ ñumen chaʼlen subtʼan mi caj a ñumen qʼuel bajcheʼ miʼ coltañet Jehová yicʼot mi caj a ñumen ñop tiʼ tojlel (1 Cor. 3:9). Cheʼ jaʼel, pejcan jiñi texto tac muʼ bʌ i yajcʌntel chaʼan miʼ pejcʌntel tiʼ yorajlel jiñi Conmemoración muʼ bʌ i tilel yaʼ ti folleto Laʼ lac tsajin jiñi Biblia ti jujumpʼejl qʼuin yicʼot ti lac Jun chaʼan lac tempa bʌ. I muʼto i mejlel a cʼʌn jiñi texto tac chaʼan maʼ chaʼlen estudio.

17. ¿Chuqui muʼ bʌ i tijicñesan Jehová? (Qʼuele jaʼel jiñi recuadro « ¿Bajcheʼ miʼ mejlel lac pʌs chaʼan mi laj qʼuel ti ñuc jiñi i cʼuxbiya Jehová?»).

¹⁷ Pero ¿ixcu mi maʼañic miʼ mejlel a mel pejtelel tsaʼ bʌ laj cʌñʌ ti ili estudio? Mach a pensarin. Jehová maʼañic miʼ lajeʼ muʼ bʌ a mel yicʼot muʼ bʌ i mel yambʌlob. Muʼ bʌ i qʼuel jiñʌch am bʌ ti lac pusicʼal i tijicña miʼ yubin cheʼ mi laj qʼuel ti ñuc jiñi lac majtan tsaʼ bʌ i yʌqʼueyonla: Jiñi i cuxtʌlel i Yalobil (1 S. 16:7; Mar. 12:​41-44).

18. ¿Chucoch mi lac wen qʼuel ti ñuc tsaʼ bʌ i mele Jehová yicʼot Jesús?

¹⁸ Jehová miʼ mejlel i ñusʌbeñonla lac mul, mi lac mejlel ti sujtel tiʼ yamigo yicʼot mi lac mejlel ti chumtʌl tiʼ pejtelel ora, come Jesús tsiʼ yʌcʼʌ i cuxtʌlel bajcheʼ i tojol laj coltʌntel. Jin chaʼan, laʼ lac chʌn pʌs chaʼan mi laj qʼuel ti ñuc jiñi i cʼuxbiya Jehová, come jiñʌch tsaʼ bʌ i ñijca chaʼan miʼ yʌqʼueñonla ili bendición tac (1 Juan 4:19). I laʼ lac pʌs jaʼel chaʼan mucʼʌch lac wen qʼuel ti ñuc cheʼ Jesús tsiʼ yʌcʼʌ i cuxtʌlel come miʼ wen cʼuxbiñonla (Juan 15:13).