1. ¿Bajcheʼ miʼ coltañonla cheʼ mi laj cʼajtesan ti jujumpʼejl jab cheʼ tsaʼ chʌmi Jesús?

 JIÑI i cuxtʌlel tsaʼ bʌ i yʌcʼʌ Jesús miʼ coltañonla chaʼan mi lac chaʼ sujtel tiʼ yamigo Jehová i mi lac chumtʌl tiʼ pejtelel ora. ¿Mach ba wen tijicñayonla chaʼan iliyi? (2 Cor. 9:15). Jumpʼejlʌch wen ñuc bʌ lac majtan cheʼ Jehová tsiʼ yʌcʼʌ i Yalobil chaʼan miʼ coltañonla. Jin chaʼan, mi lac wen qʼuel ti ñuc tsaʼ bʌ i mele Jehová yicʼot Jesús ti lac tojlel (Rom. 5:8). Junchajp muʼ bʌ caj i coltañonla chaʼan mi lac bej qʼuel ti ñuc jiñʌch cheʼ mi laj cʼajtesan ti jujumpʼejl jab cheʼ tsaʼ chʌmi Jesús (Luc. 22:​19, 20).

 2. ¿Chuqui mi caj laj qʼuel ti ili estudio?

² Ti ili 2025, jiñi Conmemoración miʼ cajel cheʼ ti sábado 12 de abril. Mach la com laj cʌy lac bʌ ti ili wen ñuc bʌ qʼuin. Jin chaʼan, weñʌch cheʼ mi lac locʼsʌben i yorajlel chaʼan mi lac wen ñaʼtan am bʌ i mele Jehová yicʼot Jesús ti lac tojlel cheʼ bʌ muʼto i cajel jiñi Conmemoración yicʼot cheʼ bʌ tsaʼix ñumi. Ti ili estudio mi caj laj qʼuel chuqui miʼ pʌsbeñonla tiʼ tojlel Jehová yicʼot Jesús jiñi i tojol laj coltʌntel. I ti jiñi yambʌ estudio mi caj laj qʼuel bajcheʼ miʼ coltañonla jiñi i cuxtʌlel Jesús i bajcheʼ miʼ mejlel lac pʌs chaʼan mi laj qʼuel ti ñuc.

¿CHUQUI MI LAJ CɅN TIʼ TOJLEL JEHOVÁ CHAʼAN JIÑI I TOJOL LAJ COLTɅNTEL?

 3. ¿Bajcheʼ tsaʼ mejli i coltan i cuxtʌlel juntiquil wiñic yonlel lac piʼʌlob? (Qʼuele jaʼel jiñi foto tac).

³ Jehová tsiʼ choco tilel i Yalobil chaʼan miʼ yʌcʼ i cuxtʌlel come miʼ mulan chaʼan miʼ mejlel chuqui toj (Dt. 32:4). ¿Bajcheʼ la cujil? Laʼcu lac ñaʼtan: Cheʼ bʌ Adán tsiʼ ñusʌbe i tʼan  Jehová, ti lac pejtelel tsaʼ ochiyonla ti mulil i mi lac chʌmel (sajtel) (Rom. 5:12). Jehová tsiʼ yʌcʼʌ i Yalobil chaʼan miʼ locʼsañonla ti jiñi mulil yicʼot chʌmel. Pero ¿jasʌl ba i cuxtʌlel juntiquil chaʼan miʼ coltan yonlel lac piʼʌlob? Jiñi apóstol Pablo tiʼ tsictesa: «Cheʼ bajcheʼ cabʌlob tsaʼ sujtiyob ti xmulil tiʼ caj i ñusatʼan juntiquil wiñic [Adán], cheʼ jaʼel, tiʼ caj tsiʼ jacʼʌ tʼan juntiquil wiñic [Jesús] cabʌlob mi caj i sujtelob ti toj» (Rom. 5:19; 1 Tim. 2:6). Ili yom i yʌl chaʼan mi juntiquil jach wiñic tsiʼ yotsa mulil tiʼ caj i ñusatʼan, jasʌl juntiquil toj bʌ wiñic muʼ bʌ i jacʼben i tʼan Dios chaʼan miʼ coltañonla.

 4. ¿Chucoch mach tsaʼic jach mejli i yʌl Jehová chaʼan pejtelel i pʼolbal Adán muʼ bʌ i jacʼob tʼan miʼ chumtʌlob tiʼ pejtelel ora?

⁴ Pero ¿wersa ba yom miʼ chʌmel Jesús chaʼan mi laj coltʌntel? ¿Mach ba tsaʼic jach mejli i yʌl Jehová chaʼan pejtelel i pʼolbal Adán muʼ bʌ i jacʼob tʼan miʼ chumtʌlob tiʼ pejtelel ora? Tajol joñonla cheʼʌch mi lac ñaʼtan bajcheʼ jiñi, pero Jehová mach cheʼic miʼ ñaʼtan. Laʼ laj cʼajtesan chaʼan Jehová luʼ toj chuqui miʼ mel. Maʼañic miʼ mejlel i toʼol ñusan jiñi i mul Adán i miʼ mel chaʼan cheʼ bajcheʼ maʼañic chuqui tsaʼ ujti.

 5. ¿Chucoch mucʼʌch i mejlel lac ñop chaʼan Jehová tiʼ pejtelel ora mi caj i mel chuqui toj?

⁵ Laʼcu lac ñaʼtan chaʼan Jehová maʼañic tsiʼ yʌcʼʌ i tojol laj coltʌntel i tsaʼ jach i yʌcʼʌ chaʼan pejtelel i yalobilob Adán miʼ chumtʌlob tiʼ pejtelel ora, ¿chuqui tsaʼ ujti? Tajol an tsaʼ bʌ caji i ñaʼtañob chaʼan mi an chuqui miʼ chaʼ ujtel Jehová maʼañic chuqui mi caj i mel i maʼañic mi caj i tsʼʌctesan i tʼan. Pero mach cheʼic tsaʼ ujti come Jehová luʼ toj chuqui miʼ mel, anquese yomʌch miʼ yʌcʼ i cuxtʌlel jiñi i Yalobil muʼ bʌ i wen cʼuxbin. Jin chaʼan miʼ mejlel lac ñop chaʼan Jehová tiʼ pejtelel ora toj chuqui miʼ mel.

 6. ¿Bajcheʼ miʼ pʌs jiñi i tojol laj coltʌntel chaʼan Jehová mucʼʌch i wen cʼuxbiñonla? (1 Juan 4:​9, 10).

⁶ Jiñi i tojol laj coltʌntel miʼ pʌs chaʼan Jehová toj chuqui miʼ mel. Pero miʼ ñumen pʌs bajcheʼ cʼamel miʼ cʼuxbiñonla (Juan 3:16; pejcan 1 Juan 4:​9, 10). Jehová tsiʼ choco tilel i Yalobil chaʼan miʼ chʌmel ti lac tojlel come yom chaʼan mi lac chumtʌl tiʼ pejtelel ora yicʼot mi la cochel tiʼ familia. Cheʼ bʌ Adán tsiʼ chaʼle mulil, Jehová tsiʼ locʼsa tiʼ familia. Jin chaʼan maʼañic majqui ochem tiʼ familia Jehová cheʼ bʌ miʼ yilan pañimil (chʼocʼan). Pero come Jesús tsiʼ yʌcʼʌ i cuxtʌlel, ti jumpʼejl bʌ qʼuin mi caj lac mejlel ti ochel tiʼ familia Jehová mi mucʼʌch lac ñop tiʼ tojlel yicʼot mi lac jacʼben i tʼan. I wocolix i yʌlʌ jiñi i cuxtʌlel Jesús, ili ora Jehová miʼ mejlel i ñusan lac mul yicʼot mi lac mejlel ti sujtel tiʼ yamigo  yicʼot tiʼ yamigo jiñi hermanojob. ¡Mach ba añic miʼ pʌs ili chaʼan Jehová mucʼʌch i wen cʼuxbiñonla! (Rom. 5:​10, 11).

 7. Cheʼ mi lac ñaʼtan pejtelel tsaʼ bʌ i ñusa Jesús, ¿bajcheʼ miʼ coltañonla lac ñumen chʼʌmben i sujm bajcheʼ cʼamel miʼ cʼuxbiñonla Jehová?

⁷ Miʼ mejlel lac ñumen chʼʌmben i sujm bajcheʼ cʼamel miʼ cʼuxbiñonla Jehová cheʼ bʌ mi lac ñaʼtan chuqui tsiʼ mele chaʼan miʼ yʌcʼ i cuxtʌlel i Yalobil. Satanás miʼ junyaj al chaʼan maʼañic majqui xucʼul mi caj i yajñel ti Dios mi woli (choncol) i ñusan wocol. Pero Jehová tsiʼ yʌcʼʌ chaʼan jiñi i Yalobil miʼ ñusan wocol cheʼ bʌ muʼto caj i tsʌnsʌntel (Job 2:​1-5; 1 Ped. 2:21). Jehová tsaʼʌch i qʼuele cheʼ bʌ tsiʼ wen wajleyob, tsiʼ jatsʼʌyob, i tsiʼ wen ticʼlayob cʼʌlʌl cheʼ tiʼ tsʌnsayob (Mat. 27:​28-31, 39). Cheʼ yomiqui, bajcheʼ jach ora tsaʼ mejli i coltan jiñi i Yalobil. Jumpʼejl ejemplo, tsaʼ mejli i coltan cheʼ bʌ jiñi lac piʼʌlob tsiʼ yʌlʌyob: «Wʌleʼli laʼ i coltan Dios mi yom i coltan» (Mat. 27:​42, 43). Pero cheʼ tsaʼic i mele, maʼañic tsaʼ tojle jiñi lac mul i maʼañic lac pijtaya. Jin chaʼan Jehová tsiʼ yʌcʼʌ chaʼan jiñi i Yalobil miʼ ñusan wocol yicʼot miʼ chʌmel.

 8. ¿Chucoch mi la cʌl chaʼan Jehová cʼuxʌch tsiʼ yubi cheʼ tsaʼ ticʼlʌnti i Yalobil? (Qʼuele jaʼel jiñi foto).

⁸ I sujmʌch, Jehová maʼañic tsiʼ cʼʌñʌ i pʼʌtʌlel chaʼan miʼ coltan i Yalobil chaʼan maʼañic miʼ yilan wocol. Pero iliyi mach yomic i yʌl chaʼan mach cʼuxic tsiʼ yubi. Joñonla melbilonla tiʼ yejtal Dios, i mi cʼux mi la cubin cheʼ bʌ an majqui woli (yʌquel) i ñusan wocol, yom i yʌl chaʼan Jehová cheʼʌch miʼ yubin jaʼel. I jiñi Biblia miʼ yʌl chaʼan ti wajali an lac piʼʌlob tsaʼ bʌ i «techbeyob i chʼijiyemlel i pusicʼal» (Sal. 78:​40, 41). Laʼcu lac ñaʼtan tiʼ tojlel Abrahán yicʼot Isaac. Jehová tiʼ sube chaʼan miʼ yʌcʼ i yalobil bajcheʼ tsʌnsʌbil bʌ majtañʌl (Gn. 22:​9-12; Heb. 11:​17-19). Ñaʼtancu bajcheʼ cʼamel i cʼuxel i pusicʼal tsiʼ yubi cheʼ woliʼ chajpan i bʌ chaʼan miʼ tsʌnsan i yalobil. Ixcu Jehová, ¿bajcheʼ yubil tsiʼ yubi cheʼ tsiʼ qʼuele bajcheʼ woliʼ wen ticʼlʌntel i Yalobil jinto miʼ tsʌnsʌntel? Miʼ mejlel la cʌl chaʼan Jehová wen cʼuxʌch tsiʼ yubi i tsiʼ yʌqʼue i chʼijyemlel (qʼuele jaʼel jiñi video Ejemplos de fe: Abrahán [parte 2] am bʌ ti jw.org).

 9. ¿Chuqui miʼ pʌsbeñonla Romanos 8:​32, 38, 39 chaʼan jiñi i cʼuxbiya Jehová?

⁹ Maʼañic majqui yambʌ miʼ ñumen cʼuxbiñonla bajcheʼ miʼ cʼuxbiñonla Jehová, mi jiñicto jiñi lac familia o la camigojob (pejcan Romanos 8:​32, 38, 39). Cheʼ jaʼel, Jehová ñumento miʼ cʼuxbiñonla bajcheʼ mi lac bajñel cʼuxbin lac bʌ. Ñaʼtancu iliyi: ¿A wom ba chumtʌl tiʼ pejtelel ora? Jehová ñumen yomto chaʼan maʼ chumtʌl. ¿A wom ba chaʼan maʼ ñusʌbentel a mul? Jehová ñumen yomto  i ñusʌbeñet a mul. Cojach miʼ pijtan chaʼan mi laj qʼuel ti ñuc jiñi i tojol laj coltʌntel. ¿Bajcheʼ mi lac mel? Jiñʌch cheʼ mi lac jacʼben i tʼan yicʼot mi lac ñop tiʼ tojlel. Ili miʼ pʌs chaʼan Jehová mucʼʌch i wen cʼuxbiñonla. Yaʼ ti tsijiʼ bʌ pañimil mi caj lac ñumen cʌn jiñi i cʼuxbiya Jehová (Ec. 3:​11, TNM).

¿CHUQUI MIʼ PɅSBEÑONLA CHEʼ JESÚS TSIʼ YɅCʼɅ I CUXTɅLEL?

10. a) ¿Chuqui tsiʼ wen pensari Jesús cheʼ bʌ muʼto caj i chʌmel? b) ¿Bajcheʼ tsiʼ yʌcʼʌ ti ñuc i cʼabaʼ Jehová? (Qʼuele jaʼel jiñi recuadro « Jesús xucʼul tsaʼ ajñi i tsiʼ yʌcʼʌ ti ñuc i cʼabaʼ Jehová»).

¹⁰ Jesús tsaʼʌch i wen pensari muʼ bʌ i yʌjlel tiʼ tojlel i Tat (Juan 14:31). Jesús tsiʼ wen aqʼue i chʼijyemlel cheʼ bʌ mi caj i tsʌnsʌntel bajcheʼ juntiquil xujchʼ, come jiñi lac piʼʌlob tajol mach weñic chuqui mi caj i yʌlob tiʼ tojlel Jehová. Jin chaʼan tsiʼ yʌlʌ: «C Tat, mi mucʼʌch i mejlel, tʌtsʼʌ tic tojlel ili copa» (Mat. 26:39). Jesús xucʼulʌch tsaʼ ajñi cʼʌlʌl tsaʼ chʌmi, jin chaʼan tsaʼʌch i yʌcʼʌ ti ñuc jiñi i cʼabaʼ Jehová.

11. ¿Bajcheʼ tsiʼ pʌsʌ Jesús chaʼan mucʼʌch i wen cʼuxbin lac piʼʌlob? (Juan 13:1).

¹¹ Cheʼ bʌ Jesús tsiʼ yʌcʼʌ i cuxtʌlel miʼ pʌs chaʼan mucʼʌch i wen pensarin jiñi lac piʼʌlob, ñumento jiñi xcʌntʼañob i chaʼan (Pr. 8:31; pejcan Juan 13:1). Jesús yujil chaʼan mi caj i ñusan wocol i pʼumpʼun jax bajcheʼ mi caj i tsʌnsʌntel. Pero pejtelel tsaʼ bʌ i mele tsaʼʌch i mele ti jumpʼejl i pusicʼal, mach chaʼañic xicʼbil jach. Ti jumpʼejl i pusicʼal tsiʼ chaʼle subtʼan yicʼot cʌntesa, i tsiʼ colta jiñi lac piʼʌlob. Cheʼ jumpʼejl jax qʼuin yom chaʼan miʼ chʌmel, tsiʼ pocbe i yoc jiñi apóstolob i chaʼan, tsiʼ pʼʌtʼesayob yicʼot tsiʼ cʌntesayob (Juan 13:​12-15). I cheʼ bʌ yaʼix chʼijil ti teʼ, tsaʼto i pejca juntiquil xujchʼ yaʼ bʌ chʼijil tiʼ tʼejl i tiʼ sube chaʼan mi caj i yajñel yicʼot ti paraíso. Cheʼ jaʼel tiʼ sube Juan chaʼan miʼ cʌntʌben i mamá  (Luc. 23:​42, 43; Juan 19:​26, 27). Jesús tsiʼ pʌsʌ chaʼan mucʼʌch i wen cʼuxbin jiñi lac piʼʌlob i tsiʼ yʌcʼʌ i cuxtʌlel tiʼ tojlelob.

12. ¿Chuqui an i bej mele Jesús ti lac tojlel?

¹² Cristo «junsujtel jach tsaʼ chʌmi tiʼ caj jiñi mulil» i «chaʼañʌch tiʼ pejtelel ora», pero cabʌl chuqui woliʼ bej mel ili ora chaʼan miʼ coltañonla (Rom. 6:10). Ñaʼtancu pejtelel chuqui woliʼ mel bajcheʼ Rey, jiñi ñumen ñuc bʌ sacerdote yicʼot i jol jiñi congregación (1 Cor. 15:25; Efes. 5:23; Heb. 2:17). Cheʼ jaʼel, an tiʼ wenta chaʼan miʼ tempan jiñi ungidojob yicʼot jiñi yonlel wiñicob xʼixicob muʼ bʌ caj i chumtʌlob ila ti pañimil, i mi caj i yujtel i mel cheʼ bʌ tsʼitaʼ jax yom chaʼan miʼ yujtel jiñi ñuc bʌ wocol (Mat. 25:32; Mar. 13:27). a I woliʼ coltan jiñi xucʼul bʌ xʼeʼtel chaʼan miʼ bej aqʼueñonla chuqui i cʼʌjñibal lac chaʼan chaʼan xucʼul mi lac chʌn melben i yeʼtel (troñel) Jehová (Mat. 24:45). I ti jiñi Mil jab cheʼ bʌ wolix ti yumʌntel cabʌl chuqui mi caj i bej mel ti lac tojlel. Cheʼ bajcheʼ mi laj qʼuel, Jehová tsiʼ yʌcʼʌ jiñi i Yalobil chaʼan cabʌl chuqui miʼ bej mel chaʼañonla, mach chaʼañic jach miʼ yʌcʼ i bʌ ti chʌmel.

MACH A WIS CɅY A CɅN

13. ¿Bajcheʼ miʼ mejlel i coltañonla cheʼ mi lac wen ñaʼtan am bʌ i mele Jehová yicʼot Jesús ti lac tojlel?

¹³ Cheʼ mi lac wen ñaʼtan tsaʼ bʌ i mele Jehová yicʼot Jesús miʼ cʼotel laj qʼuel bajcheʼ cʼamel miʼ cʼuxbiñonla. Cheʼ tiʼ yorajlel jiñi Conmemoración pejcan jumpʼejl o chaʼpʼejl Evangelio i sʌclan chuqui miʼ mejlel i coltañet chaʼan maʼ ñumen cʼuxbin Jehová yicʼot Jesús. Jin chaʼan mach ti orajic yom maʼ luʼ pejcan jiñi información. Cheʼ jaʼel, suben yambʌlob jiñi muʼ bʌ a cʌn.

14. Cheʼ bajcheʼ miʼ yʌl Salmo 119:​97, ¿chuqui miʼ mejlel lac mel chaʼan mi lac bej cʌn chaʼan jiñi i tojol laj coltʌntel yicʼot yan tac bʌ? (Qʼuele jaʼel jiñi foto).

¹⁴ Mi añix cabʌl jab añet tiʼ sujmlel, tajol maʼ cʼajtiben a bʌ mi anto chuqui tsijib miʼ mejlel a cʌn, chaʼan bʌ Jehová, chaʼan jiñi i cʼuxbiya, cheʼ tsiʼ yʌcʼʌ i cuxtʌlel Jesús o yan tac bʌ. Tajol maʼ ñaʼtan chaʼan a wujilix chaʼan bʌ jiñi, pero tiʼ sujm tiʼ pejtelel ora añixto chuqui miʼ mejlel laj cʌn. ¿Chuqui miʼ mejlel i coltañet? Sʌclan información yaʼ ti lac jun tac. Mi tsaʼ taja jumpʼejl texto mach bʌ añic maʼ chʼʌmben i sujm, chaʼlen ti investigar. I cheʼ bʌ miʼ ñumel majlel jiñi qʼuin, wen ñaʼtan tsaʼ bʌ a cʌñʌ tiʼ tojlel Jehová, jiñi i Yalobil yicʼot chaʼan  bajcheʼ cʼamel miʼ cʼuxbiñonla (pejcan Salmo 119:97).

15. ¿Chucoch ñucʌch i cʼʌjñibal mi lac bej sʌclan chuqui ñuc tac bʌ i cʼʌjñibal yaʼ ti Biblia?

¹⁵ Cheʼ bʌ maʼ pejcan jiñi Biblia lajal bajcheʼ woli a sʌclan oro. Jiñi lac piʼʌlob muʼ bʌ i sʌclañob jiñi oro mach ti orajic miʼ waʼ tajob. Tajol muʼto i ñusañob chaʼpʼej uxpʼejl qʼuin chaʼan miʼ sʌclañob, pero miʼ chaʼleñob wersa i sʌclañob jinto miʼ tajob. I anquese cheʼ ya wistʌl muʼ bʌ i tajob, yujilob chaʼan wen lets i tojol. Jiñi muʼ bʌ lac taj yaʼ ti Biblia ñumen letsto bajcheʼ jiñi oro (Sal. 119:127; Pr. 8:10). Jin chaʼan mach a wubin a chʼijyemlel mi an qʼuiñil maʼan chuqui maʼ taj cheʼ maʼ pejcan jiñi Biblia. Mach a cʌy a sʌclan, bej pejcan jiñi Biblia (Sal. 1:2).

16. ¿Bajcheʼ miʼ mejlel lac lajin Jehová yicʼot Jesús?

¹⁶ Cheʼ woliyet ti estudio, ñaʼtan bajcheʼ miʼ mejlel a jacʼ jiñi woli bʌ a cʌn. Jumpʼejl ejemplo, miʼ mejlel a mel chuqui toj cheʼ bajcheʼ Jehová cheʼ junlajal bajcheʼ yilal maʼ qʼuelob jiñi yambʌlob. Miʼ mejlel a lajiben i cʼuxbiya Jesús tiʼ tojlel i Tat yicʼot jiñi lac piʼʌlob cheʼ maʼ cuch jiñi wocol muʼ bʌ a taj tiʼ caj i testigojet Jehová, cheʼ maʼ coltan jiñi hermanojob anquese tajol wocol maʼ wubin yicʼot cheʼ maʼ chaʼlen subtʼan chaʼan jiñi yambʌ lac piʼʌlob miʼ tajob jaʼel jiñi bendición tac muʼ bʌ i yʌcʼ jiñi i cuxtʌlel Jesús.

17. ¿Chuqui mi caj laj qʼuel ti yambʌ estudio?

¹⁷ Cheʼ bʌ mi lac ñumen chʼʌmben i sujm i mi lac ñumen qʼuel ti ñuc jiñi i tojol laj coltʌntel mi caj lac ñumen cʼuxbin Jehová yicʼot i Yalobil. I mi caj i ñumen cʼuxbiñoñobla jaʼel (Juan 14:21; Sant. 4:8). Jin chaʼan, laʼ laj cʼʌn pejtelel am bʌ i yʌqʼueyonla Jehová chaʼan mi lac ñumen cʌn chaʼan jiñi i tojol laj coltʌntel. Ti jiñi yambʌ estudio mi caj laj qʼuel bajcheʼ miʼ coltañonla jiñi i tojol laj coltʌntel i chuqui miʼ mejlel lac mel chaʼan mi lac pʌs chaʼan mi laj qʼuel ti ñuc jiñi i cʼuxbiya Jehová.