1. ¿Chuqui yom mi lac mel ti lac pejtelel, i chucoch an i tajol wocolʌch?

 TI JUJUMPʼEJL qʼuin yom mi lac ñaʼtan chuqui mi caj laj cʼux o bajcheʼ ora mi caj lac wʌyel. Iliyi mach wocolic ti ñaʼtʌntel, pero añʌch ñumen wocol tac bʌ, bajcheʼ mi caj laj cʌntan lac bʌ chaʼan cʼocʼ mi la cajñel, chaʼan lac tijicñʌyel, chaʼan jiñi lac familia o chaʼan bajcheʼ mi caj lac chʼujutesan Dios. La com chaʼan jiñi muʼ bʌ lac ñaʼtan lac mel jiñʌch wem bʌ chaʼañonla, miʼ coltan jiñi lac familia i miʼ yʌqʼuen i tijicñʌyel Jehová (Rom. 12:​1, 2).

 2. ¿Chuqui miʼ mejlel i coltañonla chaʼan wen muʼ bʌ lac yajcan lac mel?

² Ti ili estudio mi caj laj qʼuel uxchajp muʼ bʌ mejlel i coltañonla chaʼan wen chuqui mi lac yajcan lac mel: 1) Mi lac wen cʌn jiñi información, 2) mi laj qʼuel chuqui miʼ ñaʼtan Jehová, i 3) mi lac wen tsajin jiñi woli bʌ lac ñaʼtan lac mel. Cheʼ jaʼel, mi caj laj qʼuel chuqui miʼ mejlel i coltañonla chaʼan mi lac ñumen chʼʌmben i sujm jiñi yom bʌ mi lac mel (Pr. 2:11).

AÑɅCH CHUQUI TAC YOM MI LAC ÑAXAN ÑAʼTAN

 3. ¿Chucoch yomʌch mi lac ñaxan wen cʌn jiñi la com bʌ lac mel? Alʌ jumpʼejl ejemplo.

³ Ñaxan bʌ, cheʼ bʌ an chuqui woli (choncol) lac ñaʼtan lac mel an tacʌch chuqui yom bʌ la cujil. Laʼcu lac ñaʼtan juntiquil cʼam bʌ i miʼ majlel ti doctor. ¿Cheʼ jach ba mi caj i waʼ aqʼuentel  tsʼac? Maʼañic. Jiñi doctor yom miʼ ñaxan cʼajtiben bajcheʼ yubil miʼ yubin i miʼ qʼuel chuqui cʼux i chaʼan. Yom ñaxan an i chaʼan jiñi información. Jiñʌch yom bʌ mi lac mel jaʼel cheʼ bʌ an chuqui woli lac ñaʼtan lac mel, ¿chuqui mi caj i coltañonla?

 4. Cheʼ bajcheʼ miʼ yʌl Proverbios 18:​13, ¿chuqui mi caj i coltañet a ñaʼtan yom bʌ maʼ mel? (Qʼuele jaʼel jiñi foto).

⁴ Cheʼ bʌ maʼ mel cʼajtiya tac mi caj i coltañet a ñaʼtan chuqui yom maʼ mel. Laʼcu lac ñaʼtan chaʼan maʼ pʌjyel ti jumpʼejl reunión social, ¿muʼ ba caj a majlel? Mi mach a cʌñʌyic majqui woli (yʌquel) i chajpan o mach a wujilic bajcheʼ miʼ cajel, miʼ mejlel a mel ili cʼajtiya tac: «¿Baqui miʼ cajel i jala? ¿Colem ba miʼ cajel? ¿Majqui an tiʼ wenta? ¿Majqui mi caj i cʼotelob? ¿Chuqui tac mi caj i mejlel? ¿Muʼ ba caj i yʌjqʼuel lembal?». Cheʼ an a chaʼan ili información mi caj i coltañet a ñaʼtan mi mucʼʌch caj a majlel o maʼañic (Pejcan Proverbios 18:13).

 5. ¿Chuqui yambʌ yom maʼ ñaʼtan cheʼ añix a chaʼan jiñi información?

⁵ Cheʼ a wujilix pejtelel jiñi, yom maʼ ñaʼtan jaʼel ili yan tac bʌ: ¿Ixcu mi tsaʼ wubi chaʼan mi caj i cʼotelob mach bʌ xñoptʼañobic? ¿O mi tsaʼ wubi chaʼan mi caj i yʌjqʼuel lembal i maʼañic majqui mi caj i chʼʌm tiʼ wenta i qʼuel chaʼan maʼañic majqui miʼ ñumel ti pʼis? Tajol miʼ mejlel ti ñumel ti pʼis jiñi qʼuiñijel (1 Ped. 4:3). ¿O ixcu mi tsaʼ wubi chaʼan ti jimbʌ qʼuin i yorajlel a tempa bʌ o a subtʼan? Pejtelel  ili mi caj i coltañet chaʼan wen chuqui maʼ yajcan a mel. Wʌle jatet añix a chaʼan jiñi información, i jiñʌch ñaxam bʌ yom maʼ mel. Pero ¿chuqui miʼ ñaʼtan Jehová? (Pr. 2:6).

QʼUELE CHUQUI MIʼ ÑAʼTAN JEHOVÁ

 6. Cheʼ bajcheʼ miʼ yʌl Santiago 1:​5, ¿chucoch yomʌch mi laj cʼajtiben i coltaya Jehová?

⁶ Cʼajtiben Jehová chaʼan miʼ coltañet a ñaʼtan mi weñʌch miʼ qʼuel jiñi a wom bʌ a mel. Jehová miʼ yʌcʼ i tʼan chaʼan mi caj i yʌqʼueñonla lac ñaʼtʌbal «tiʼ pejtelel i pusicʼal i maʼañic miʼ sʌclan lac mul» (pejcan Santiago 1:5). Jiñi lac ñaʼtʌbal muʼ bʌ i yʌqʼueñonla miʼ coltañonla chaʼan mi lac ñaʼtan mi weñʌch miʼ qʼuel jiñi la com bʌ lac mel o mach weñic.

 7. ¿Bajcheʼ miʼ mejlel lac ñaʼtan chuqui miʼ ñaʼtan Jehová? Alʌ jumpʼejl ejemplo.

⁷ Laʼcu lac ñaʼtan chaʼan maʼ majlel ti xʌmbal baqui mach a cʌñʌyic i maʼ sajtel, ¿chuqui mi caj a mel? Maʼ cʼajtiben i coltaya juntiquil i cʌñʌyʌch bʌ yaʼ bʌ chumul yaʼi, i yomʌch maʼ wen ñʌchʼtan muʼ bʌ caj i subeñet. Ili miʼ pʌsbeñonla chaʼan cheʼ tsaʼix laj cʼajtibe i coltaya Jehová, yomʌch mi lac wen ñʌchʼtan chuqui miʼ subeñonla. ¿Bajcheʼ? Jiñʌch cheʼ mi laj qʼuel chuqui miʼ yʌl jiñi Biblia yicʼot jiñi principio tac am bʌ i yʌqʼueyonla. Laʼcu lac chaʼ ñaʼtan cheʼ an majqui miʼ pʌyonla ti reunión social. Cheʼ wolito lac ñaʼtan mi mucʼʌch caj lac majlel o maʼañic, yomʌch mi lac wen qʼuel chuqui miʼ yʌl jiñi Biblia chaʼan jiñi qʼuiñijel  tac ñumeñix bʌ ti pʼis, chaʼan majqui yom mi lac ñochtañob yicʼot baqui bʌ ñaxan yom mi la cʌcʼ ti laj cuxtʌlel (Mat. 6:33; Rom. 13:13; 1 Cor. 15:33).

 8. ¿Chuqui miʼ mejlel a mel mi maʼañic woli a taj jiñi información i cʼʌjñibal bʌ a chaʼan? (Qʼuele jaʼel jiñi foto).

⁸ An i tajol wocol mi la cubin chaʼan mi lac taj jiñi información i cʼʌjñibal bʌ lac chaʼan muʼ bʌ i coltañonla lac ñaʼtan chuqui yom mi lac mel. Miʼ mejlel laj cʼajtiben i coltaya juntiquil hermano o juntiquil hermana añix bʌ i ñaʼtʌbal. Pero yomʌch mi lac bajñel mel lac investigación jaʼel. Cabʌl chuqui an i yʌqʼueyonla Jehová, bajcheʼ jiñi Coltʌntel chaʼan estudio yicʼot jiñi libro Texto tac muʼ bʌ i coltañonla ti laj cuxtʌlel. Laʼ laj cʼajtesan: La com lac mel muʼ bʌ i yʌqʼuen i tijicñʌyel Jehová.

 9. ¿Bajcheʼ miʼ mejlel lac ñaʼtan mi weñʌch miʼ qʼuel Jehová jiñi la com bʌ lac mel? (Efesios 5:17).

⁹ ¿Bajcheʼ miʼ mejlel lac ñaʼtan mi weñʌch miʼ qʼuel Jehová jiñi la com bʌ lac mel? Ñaxan yomʌch mi lac wen cʌn, ¿chucoch? Proverbios 9:10 miʼ yʌl: «Jini muʼ bʌ i cʌn jini Chʼujul Bʌ, anix i ñaʼtʌbal». Ili yom i yʌl chaʼan yom mi lac wen cʌn bajcheʼ yilal Jehová, chuqui yom chaʼañonla yicʼot chuqui muʼ bʌ i mulan yicʼot maʼañic bʌ. Jin chaʼan laʼ laj cʼajtiben lac bʌ: «Mij cʌñʌyix Jehová, ¿chuqui yom mic mel?» (Pejcan Efesios 5:17).

10. ¿Chucoch wen ñuc i cʼʌjñibal lac chaʼan jiñi principio tac am bʌ ti Biblia i mach jiñic jiñi costumbre tac o muʼ bʌ i ñaʼtan jiñi lac piʼʌlob?

¹⁰ An i tajol mi caj la cʌqʼueñob i chʼijyemlel jiñi lac familia o la camigojob chaʼan mi lac mel muʼ bʌ i mulan Jehová. Jumpʼejl ejemplo, an i tajol jiñi tatʌlob mi caj i wersa xicʼob jiñi xchʼoc bʌ i yalobilob chaʼan miʼ ñujpuñel yicʼot juntiquil wen am bʌ i taqʼuin, anquese yujilob chaʼan mach wen pʼʌtʌlic an yicʼot Jehová. Mach yomobic chaʼan ti wiʼil pʼumpʼun miʼ ñusan. Tajol muʼto i ñaʼtañob chaʼan mi caj i coltʌntelob jaʼel. Pero ¿majqui mi caj i coltan jiñi i yixicʼal chaʼan lʌcʼʌl miʼ yajñel yicʼot Jehová? ¿Chuqui miʼ ñaʼtan Jehová chaʼan jiñi? Jiñi i jacʼbal yaʼʌch mi lac taj ti Mateo 6:​33, baqui miʼ yʌl chaʼan ñaxan yom mi lac chʌn sʌclan jiñi i Yumʌntel. Anquese mucʼʌch laj qʼuelob ti ñuc jiñi lac papá lac mamá yicʼot muʼ bʌ i ñaʼtan yambʌ lac piʼʌlob, la com la cʌqʼuen i tijicñʌyel Jehová.

WEN TSAJIN A WOM BɅ A MEL

11. Cheʼ bajcheʼ miʼ yʌl Filipenses 1:​9, 10, ¿bajcheʼ miʼ mejlel lac tsajin jiñi woli bʌ lac ñaʼtan?

¹¹ Cheʼ tsaʼix a taja jiñi principio tac muʼ bʌ i mejlel i coltañet, wen tsajin o wen ñaʼtan jiñi a wom bʌ a mel (pejcan Filipenses 1:​9, 10). Ñopo a chʼʌmben i sujm o a wʌn ñaʼtan chuqui miʼ mejlel ti ujtel mi tsaʼ mele jiñi woli bʌ a ñaʼtan. Ili mi caj i coltañet chaʼan wen chuqui maʼ yajcan a mel. Anquese an qʼuiñil wocolʌch mi la cubin chaʼan mi lac ñaʼtan chuqui yom bʌ mi lac mel.

12, 13. ¿Chuqui mi caj i coltañet a ñaʼtan chuqui ti eʼtel mi caj a chʼʌm?

¹² Ñaʼtancu chaʼan woli a sʌclan a weʼtel (troñel) chaʼan miʼ mejlel a mʌcʼlan a familia, i maʼ taj chaʼpʼejl eʼtel. Cheʼ jiñi maʼ tech a qʼuel chuqui ti eʼtel, bajcheʼ ora maʼ wochel, bajcheʼ ora maʼ loqʼuel, bajcheʼ ñajtel o yan tac bʌ. Cheʼ jaʼel, jiñi Biblia maʼañic baqui miʼ pʌs chaʼan mach weñic jiñi eʼtel tsaʼ bʌ a taja. Tajol an muʼ bʌ a ñumen mulan o ñumen lets maʼ tojtʌl, i jin a wom a chʼʌm. Pero anto chuqui yambʌ yom maʼ ñaʼtan.

¹³ ¿Muʼ ba caj i mʌctañet jiñi eʼtel chaʼan maʼ majlel ti tempa bʌ? ¿Muʼ ba caj i mʌctañet chaʼan maʼ cʌntan a familia yicʼot chaʼan maʼ coltan chaʼan chʌn lʌcʼʌl miʼ yajñel ti Jehová? Ili cʼajtiya jiñʌch muʼ bʌ caj i coltañet a qʼuel baqui bʌ jiñi ñumen ñuc bʌ i cʼʌjñibal, jiñi a familia yicʼot i chʼujutesʌntel Jehová,  i mach jiñic jiñi taqʼuin. Ili mi caj i coltañet chaʼan wen muʼ bʌ a yajcan a mel.

14. Chaʼan maʼañic majqui mi la cʌcʼ ti yajlel, ¿bajcheʼ miʼ coltañonla jiñi cʼuxbiya yic’ot cheʼ mi lac wʌn ñaʼtan jiñi la com bʌ lac mel?

¹⁴ Cheʼ mi lac wʌn ñaʼtan bajcheʼ yilal mi caj i qʼuelob yambʌlob jiñi la com bʌ lac mel, tajol miʼ cʼotel lac chʼʌmben i sujm chaʼan mach yomic mi lac mel muʼ bʌ i yʌcʼ ti yajlel yambʌlob (Filip. 1:10). Jumpʼejl ejemplo, jujuntiquil an bajcheʼ mi lac mulan lac lʌp lac pislel o mi lac chʼʌl lac bʌ, pero ¿ixcu mi juntiquil hermano o hermana mach weñic miʼ qʼuel, o jiñi yambʌ lac piʼʌlob leco miʼ qʼuelob? Cheʼ mucʼʌch lac ñaʼtan o mi lac chʼʌmben i sujm iliyi, mi caj i coltañonla chaʼan mi lac chʼʌm ti ñuc muʼ bʌ i ñaʼtan yambʌlob. I jiñi cʼuxbiya mi caj i coltañonla chaʼan mi lac sʌclʌben i wenlel yambʌlob i chaʼan pʼisbil jach bajcheʼ yom mi lac chʼʌl lac bʌ (1 Cor. 10:​23, 24, 32; 1 Tim. 2:​9, 10).  Mi cheʼʌch mi lac mel bajcheʼ iliyi, mi caj lac pʌs chaʼan mi laj qʼuelob ti ñuc yicʼot chaʼan mi laj cʼuxbiñob.

15. Mi an chuqui ñuc bʌ i cʼʌjñibal a wom a mel, ¿chuqui yom maʼ wen ñaʼtan?

¹⁵ Mi an chuqui wen ñuc bʌ i cʼʌjñibal a wom a mel, cheʼ bajcheʼ tsiʼ yʌlʌ Jesús yomʌch maʼ ñaxan wen ñaʼtan (Luc. 14:28). Yom maʼ ñaʼtan jaypʼejl mi caj i jalʼan, jaypʼejl taqʼuin yom, i pejtelel yom bʌ maʼ mel chaʼan maʼ wujtesan. Jin chaʼan weñʌch cheʼ maʼ suben jiñi a familia. ¿Chucoch weñʌch cheʼ maʼ mel iliyi? Miʼ mejlel i coltañetob a qʼuel mi weñʌch bajcheʼ tsaʼ ñaʼta o mi anto bajcheʼ yom melol. Jin chaʼan, cʼajtibeñob chuqui miʼ ñaʼtañob i ñʌchʼtan chuqui miʼ yʌlob. Cheʼ bajcheʼ jiñi wen mi caj i loqʼuel jiñi tsaʼ bʌ a ñaʼta a mel (Pr. 15:22).

MELE CHUQUI WEM BɅ

16. ¿Chuqui tac yom maʼ mel chaʼan wen miʼ loqʼuel jiñi muʼ bʌ a ñaʼtan a mel? (Qʼuele jaʼel jiñi recuadro « Chaʼan wen chuqui maʼ yajcan a mel»).

¹⁶ Mi tsaʼix a mele pejtelel ili tsaʼ bʌ la cʌlʌ, muqʼuix i mejlel a ñaʼtan chuqui mi caj a mel come tsaʼix a ñaʼta pejtelel chuqui yom bʌ a wujil, tsaʼix a qʼuele jiñi principio tac muʼ bʌ caj i coltañet a mel chuqui miʼ mulan Jehová. Wʌle cʼajtiben Jehová chaʼan jiñi muʼ bʌ caj a mel luʼ wen miʼ loqʼuel.

17. ¿Chuqui mi caj i coltañonla chaʼan wen chuqui mi lac yajcan lac mel?

¹⁷ Tajol añix chuqui melbil a chaʼan i luʼ wen tsaʼ loqʼui, pero mach yomic maʼ ñaʼtan chaʼan luʼ a wujilix o chaʼan wen añix a ñaʼtʌbal. Yomʌch maʼ chuc a bʌ ti Jehová come jiñʌch muʼ bʌ i yʌqʼueñonla lac ñaʼtʌbal. Chaʼan mi lac taj jiñi wem bʌ lac ñaʼtʌbal yomʌch mi lac ñaxan wen cʌn, mi lac tsajin yicʼot mi lac wen chʼʌmben i sujm chuqui jiñi la com bʌ lac mel (Pr. 2:​1-5). Cheʼ bajcheʼ ili, Jehová miʼ mejlel i coltañonla chaʼan wen muʼ bʌ lac yajcan lac mel (Sal. 23:​2, 3).