1, 2. a) ¿Chuqui tsaʼ cʼoti i cʌn juntiquil hermano? b) ¿Chuqui tsiʼ mele chaʼan miʼ tojʼesan jiñi wocol?

ROBERT, 15 i jabilel tsiʼ chaʼle chʼʌm jaʼ, pero maxto añic tsiʼ wen chʼʌmʌ ti ñuc jiñi i sujmlel. Miʼ yʌl: «Maʼañic tsaʼ c wis mele (chaʼle) mach bʌ weñic, pero cheʼ jach woli (choncol) c toʼol melben i yeʼtel Jehová tsaʼ cubi. Cheʼʌch bajcheʼ lon pʼʌtʌlon yilal tiʼ chaʼan bʌ Dios, mic majlel ti tempa bʌ i mach junsujtel jach mi cochel bajcheʼ precursor auxiliar ti jumpʼejl jab. Pero anto chuqui yom mic mel tsaʼ j qʼuele».

² Jinto cheʼ bʌ tsaʼ ñujpuñi tsiʼ cʌñʌ baqui bʌ i wocol. An i tajol, cheʼ bʌ miʼ chaʼlen alas yicʼot i yijñam, miʼ melbeñob i bʌ cʼajtiya tac chaʼan Biblia. Jiñi i yijñam yujilʌch i jacʼbal tac come wen pʼʌtʌl tiʼ chaʼan bʌ Dios. Pero Robert mach wen yujilic i jacʼbal jiñi cʼajtiya tac i ti bele ora miʼ quisñin i bʌ come maʼañic chuqui yujil miʼ yubin. Jin chaʼan tsiʼ ñaʼta: «Mi joñoñʌch i jol jiñi quijñam tiʼ chaʼan bʌ Dios, an chuqui yom mic mel». I cheʼʌch tsiʼ mele. Miʼ chaʼ al: «Tsaʼ caji c wen pejcan jiñi Biblia, i tsaʼ caji c chʼʌmben isujm». Cheʼ bajcheʼ jiñi, tsaʼ cʼoti i cʌn i sujmlel, pero ñumen ñuc bʌ, jin cheʼ ñumen lʌcʼʌl tsaʼ ajñi yicʼot Jehová.

3. a) ¿Chuqui miʼ cʌntesañonla tsaʼ bʌ ujti tiʼ tojlel Robert? b) ¿Baqui bʌ cʼajtiya tac miʼ cajel lac tsajin?

³ Tsaʼ bʌ ujti tiʼ tojlel Robert cabʌl chuqui ñuc bʌ i cʼʌjñibal miʼ pʌsbeñonla. Tajol cʌmbilʌch lac chaʼan am bʌ ti Biblia, mi lac majlel  ti tempa bʌ tac yicʼot mi lac chaʼlen subtʼan la quicʼot jiñi congregación. Pero ili mach yomic i yʌl chaʼan pʼʌtʌloñʌchla tiʼ chaʼan bʌ Dios. Tajol añʌch lac taja laj colel tiʼ chaʼan bʌ Dios, pero cheʼ mi lac chaʼ wen qʼuel lac bʌ mi caj lac taj laj qʼuel chaʼan anto chuqui yom mi lac weñʼesan (Fil. 3:16). Muʼ bʌ caj i coltañonla chaʼan mi lac bej colel tiʼ chaʼan bʌ Dios jiñʌch cheʼ mi lac chajpan ili uxpʼejl cʼajtiya. Ñaxam bʌ, ¿chuqui mi caj i coltañonla laj qʼuel bajcheʼ añonla tiʼ chaʼan bʌ Dios? I chaʼpʼejlel, ¿chuqui yom mi lac mel chaʼan ñumen lajal lac pensar bajcheʼ i chaʼan Dios? I yuxpʼejlel, ¿bajcheʼ mi caj i coltañonla ti laj cuxtʌlel cheʼ pʼʌtʌlonla tiʼ chaʼan bʌ Dios?

4. ¿Majqui yom miʼ jacʼob jiñi ticʼojel am bʌ ti Efesios 4:23, 24?

⁴ Cheʼ bʌ tsaʼ sujtiyonla tiʼ wiñic Dios, cabʌlʌch chuqui tsaʼ laj qʼuexta. I cheʼʌch woli (yʌquel) lac bej mel anquese chʼʌmbilix lac chaʼan jaʼ. Jiñi Biblia miʼ subeñonla: «Laʼ mejlic laʼ pusicʼal ti tsijib yicʼot laʼ ñaʼtʌbal» (Ef. 4:23, 24). Cheʼ bajcheʼ tsaʼ tsʼijbunti ti griego, jiñi tʼan «laʼ mejlic laʼ pusicʼal ti tsijib» mi yʌcʼ ti ñaʼtʌntel chaʼan cheʼʌch yom mi lac chʌn mel majlel. Ti lac pejtelel añʌch baqui yom mi lac bej qʼuextʌyel majlel come xmulilonla. Jinto añix bʌ ora i cajel i melbeñob i yeʼtel (troñel) Jehová yom miʼ bej cʌntañob i bʌ (Fil. 3:12, 13).

5. ¿Baqui bʌ cʼajtiya tac miʼ mejlel i coltañonla lac ñaʼtan bajcheʼ añonla tiʼ chaʼan bʌ Dios?

⁵ Chaʼan chʌn yaʼan lac pensar tiʼ chaʼan bʌ Dios, yom mi lac wen tsajin lac bʌ ti jumpʼejl lac pusicʼal. Mach yʌlʌlic mi xcolelontola o añix lac jabilel, yom mi lac melben lac bʌ ili cʼajtiya tac: «¿Ñumen lajal ba c pensar bajcheʼ i chaʼan Dios? ¿Ñumen lajal ba c melbal bajcheʼ i chaʼan Cristo? ¿Chuqui miʼ yʌcʼ ti ñaʼtʌntel tic tojlel jiñi c melbal yicʼot bajcheʼ yilalon ti tempa bʌ? Cheʼ bajcheʼ mucʼon ti tʼan, ¿chuqui miʼ yʌcʼ ti ñaʼtʌntel chaʼan mic mulan? Cheʼ bajcheʼ mic chajpan c bʌ, mic xoj c pislel, mic chʼʌl c bʌ yicʼot bajcheʼ mic jacʼ jumpʼejl ticʼojel, ¿bajcheʼ yilalon mij cʌjñel? ¿Chuqui mic mel cheʼ añon ti jumpʼejl wocol? ¿Tsaʼix ba c taja j colel bajcheʼ xñoptʼan, i mach chʌn jiñic jach cujil jiñi ñaxan tac bʌ cʌntesʌntel?» (Ef. 4:13). Cheʼ mi lac wen ñaʼtʌben i jacʼbal ili cʼajtiya tac mi caj i coltañonla lac ñaʼtan bajcheʼ cʼamel woli laj colel majlel tiʼ chaʼan bʌ Dios.

6. Chaʼan mi laj qʼuel bajcheʼ añonla tiʼ chaʼan bʌ Dios, ¿chuqui tac yambʌ miʼ mejlel i coltañonla?

⁶ Chaʼan mi laj qʼuel bajcheʼ añonla tiʼ chaʼan bʌ Dios, an i tajol miʼ mejlel i coltañonla yambʌ hermanojob. Jiñi apóstol Pablo tsiʼ yʌlʌ chaʼan juntiquil mach bʌ lajalic i pensar bajcheʼ i chaʼan Dios, maʼañic miʼ ñaʼtan chaʼan jiñi i melbal miʼ tsʼaʼlen Dios. Pero jiñi cheʼ bʌ i pensar bajcheʼ i chaʼan Dios, miʼ chʼʌmben isujm chuqui miʼ ñaʼtan Dios i yujil chaʼan miʼ tsʼaʼlen jiñi melbalʌl i chaʼan bʌ pañimil (mulawil) (1 Co. 2:14-16; 3:1-3). Come jiñi ancianojob lajalobʌch i ñaʼtʌbal bajcheʼ Cristo, ti orajach miʼ taj i qʼuelob cheʼ bʌ an juntiquil mach bʌ lajalic i pensar bajcheʼ i chaʼan Dios. Mi cheʼ mi la cujtel jaʼel, i jiñi ancianojob miʼ ñopob i coltañonla, ¿mucʼʌch ba caj lac jacʼbeñob i ticʼojel? Mi cheʼʌchi, mi lac pʌs chaʼan la comʌch miʼ ñumen tojʼan majlel lac pensar tiʼ chaʼan bʌ Dios (Ec. 7:5, 9).

7. ¿Chucoch mach cojic jach yom mi laj cʌn am bʌ ti Biblia chaʼan xucʼulonla tiʼ chaʼan bʌ Dios?

⁷ Yom mi laj cʼajtesan chaʼan mach jasʌlic yom mi laj cʌn am bʌ ti Biblia chaʼan mi la cʌcʼ lac pensar tiʼ chaʼ an bʌ Dios. Jiñi rey Salomón cabʌl chuqui yujil chaʼan bʌ Jehová. Cheʼ jaʼel, an tʼan tac tsaʼ bʌ i yʌlʌ tsaʼ bʌ tsʼijbunti cʌytʌl ti Biblia. Pero ti wiʼil tsiʼ mele mach bʌ weñic tiʼ tojlel Jehová (1 R. 4:29, 30; 11:4-6). Jin chaʼan, mach cojic jach yom mi laj cʌn am bʌ ti Biblia, yom mi lac bej colel tiʼ chaʼan bʌ Dios (Col. 2:6, 7). ¿Bajcheʼ?

8, 9. a) ¿Chuqui mi caj i coltañonla chaʼan chʌn xucʼul añonla tiʼ chaʼan bʌ Dios? b) ¿Chuqui la com cheʼ mi lac tsajin yicʼot mi lac wen ñaʼtan muʼ bʌ lac pejcan? (Qʼuele jiñi foto am bʌ tiʼ tejchibal).

 ⁸ Pablo tiʼ sube jiñi xñoptʼañob ti ñaxam bʌ siglo chaʼan yom miʼ chaʼleñob wersa chaʼan miʼ tajob i colel bajcheʼ xñoptʼan (He. 6:1). Ili ora yomʌch mi lac mel tsaʼ bʌ i yʌlʌ Pablo. Jin chaʼan, ñuc i cʼʌjñibal cheʼ mi lac tsajin jiñi libro «Chʌn ajñenla tiʼ cʼuxbiya Dios». Ili mi caj i coltañonla laj qʼuel bajcheʼ yom mi laj cʼʌn jiñi principio tac ti laj cuxtʌlel. Mi tsaʼix la cujtesa jiñi libro, miʼ mejlel lac tsajin yambʌ lac jun tac muʼ bʌ caj i coltañonla chaʼan xucʼul miʼ yajñel lac ñopoñel ti Dios (Col. 1:23). Cheʼ jaʼel, yom mi lac mel oración yicʼot mi lac wen ñaʼtan bajcheʼ mi caj lac pʌs ti lac melbal muʼ bʌ laj cʌn.

⁹ Cheʼ mi lac tsajin yicʼot mi lac wen ñaʼtan muʼ bʌ lac pejcan, la com bʌ jiñʌch chaʼan wen miʼ qʼuelonla Jehová yicʼot mi lac jacʼben i tʼan (Sal. 40:8; 119:97). Cheʼ jaʼel, mi laj cʌn lac tʌtsʼ ti lac tojlel muʼ bʌ mejlel i mʌctañonla chaʼan mi lac bej colel tiʼ chaʼan bʌ Dios (Tit. 2:11, 12).

10. ¿Chuqui miʼ mejlelob i mel jiñi xcolelob chaʼan miʼ ñumen pʼʌtʼañob tiʼ chaʼan bʌ Dios?

¹⁰ Mi xcoleletto, ¿tsaʼix baʼ wen ñaʼta chuqui a wom a mel tiʼ chaʼan bʌ Dios? Juntiquil hermano am bʌ ti Betel muʼ bʌ i yajñel baqui miʼ yujtel tac jumpʼejl bʌ qʼuin colem tempa bʌ, ñʌmʌl i chaʼlen tʼan yicʼot jiñi xcolelob muʼ bʌ caj i chaʼleñob chʼʌmjaʼ. Miʼ cʼajtibeñob chuqui ñaʼtʌbilob i chaʼan. Cabʌlob wen tsiquil bʌ miʼ yʌcʼob ti ñaʼtʌntel chaʼan tsaʼix i wen ñaʼtayob chuqui yomob i mel tiʼ yeʼtel Jehová. An yomoʼ bʌ ochel tiʼ melol i yeʼtel Dios tiʼ pejtelel ora o yomob majlel baqui ñumen yomto xsubtʼañob. Pero jiñi hermano an i tajol miʼ taj xcolelob mach bʌ yujilobic chuqui yom miʼ yʌlob. Come miʼ ñaʼtañob chaʼan mach cʼʌñʌlic miʼ wen chajpañob chuqui yom miʼ melob tiʼ chaʼan bʌ Dios. Jin chaʼan jiñi xcolelob yom miʼ cʼajtibeñob i bʌ: «¿Muʼ ba c majlel ti tempa bʌ yicʼot ti subtʼan chaʼan jach cheʼ yomob jiñi c tatob? ¿O chaʼan ba wen lʌcʼʌl añon quicʼot Jehová?». Tiʼ sujm, mi xcolelontola o añix lac jabilel, ti lac pejtelel yom mi lac wen ñaʼtan chuqui com lac mel tiʼ chaʼan bʌ Dios. Jiñʌch muʼ bʌ caj i coltañonla chaʼan mi lac ñumen pʼʌtʼan tiʼ chaʼan bʌ Dios (Ec. 12:1, 13).

11. a) ¿Chuqui yom mi lac mel chaʼan mi laj colel tiʼ chaʼan bʌ Dios? b) ¿Baqui bʌ ejemplo yaʼ ti Biblia miʼ mejlel lac lajin?

¹¹ Cheʼ tsaʼix lac ñaʼta baqui yom mi lac ñumen weñʼan, yomʌch mi lac mel. Wen ñucʌch i cʼʌjñibal iliyi. Yaʼʌch cʌyʌl laj cuxtʌlel (Ro. 8:6-8). Cheʼ añix laj colel bajcheʼ xñoptʼan, mach yom i yʌl chaʼan tojoñixla. Jehová miʼ coltañonla ti chʼujul bʌ i yespíritu. Pero yomʌch mi lac bej chaʼlen wersa. Añix ora, jiñi hermano John Barr, ochem bʌ ti jiñi Junmojt muʼ bʌ i pʌsob bij, tsiʼ taja ti tʼan muʼ bʌ i yʌl Lucas 13:24, i tsiʼ yʌlʌ chaʼan cabʌl hermanojob miʼ yajlelob come «maʼañic miʼ bej chaʼleñob wersa». Cheʼ yomonla bajcheʼ Jacob, tsiʼ chʌn chaʼle wersa tiʼ tojlel juntiquil ángel jinto tsaʼ aqʼuenti bendición (Gn. 32:26-28). Utsʼatax cheʼ mi lac wen pejcan jiñi Biblia. Pero mach cheʼic jach yom mi laj qʼuel bajcheʼ jumpʼejl novela, tsaʼ jach bʌ tsʼijbunti chaʼan lac ñusaqʼuin. Yom mi lac ñumen sʌclʌben i sujmlel chaʼan mi lac taj ñuc tac bʌ i cʼʌjñibal, i miʼ coltañonla ti bej colel.

12, 13. a) ¿Chuqui mi caj i coltañonla chaʼan mi lac taj lac ñaʼtʌbal bajcheʼ i chaʼan Cristo? b) ¿Bajcheʼ miʼ coltañonla tsaʼ bʌ i mele Pedro yicʼot jiñi ticʼojel tsaʼ bʌ i yʌcʼʌ? c) ¿Chuqui yom mi lac mel chaʼan ñumen lajal lac pensar bajcheʼ i chaʼan Dios? (Qʼuele jiñi recuadro « ¿Chuqui miʼ mejlel lac mel chaʼan mi lac bej colel tiʼ chaʼan bʌ Dios?»).

¹² Cheʼ mi lac chaʼlen wersa chaʼan ñumen lajal lac pensar bajcheʼ i chaʼan Dios, jiñi chʼujul bʌ espíritu miʼ coltañonla chaʼan miʼ qʼuextʌyel majlel lac pensar. Cheʼ jiñi, xucʼu xucʼul mi lac taj lac ñaʼtʌbal bajcheʼ i chaʼan Cristo (1 Co. 2:16). Cheʼ jaʼel, jiñi espíritu miʼ coltañonla laj cʌy chuqui tac bajñel la com yicʼot chaʼan mi lac pʌs wen tac bʌ melbalʌl muʼ bʌ i mulan Dios (Gá. 5:16, 22, 23). Mi tsaʼ lac  taja laj qʼuel chaʼan mi lac wen mulan chubʌʼañʌl tac o i chaʼan bʌ ili pañimil, mach yomic mi lac lujbʼan. Laʼ lac chʌn cʼajtiben chʼujul bʌ i yespíritu Jehová, i mi caj i coltañonla la cʌcʼ lac ñaʼtʌbal ti chuqui wen (Lc. 11:13). Laʼ laj cʼajtesan tiʼ tojlel jiñi apóstol Pedro. Mach junsujtel jach tsiʼ pʌsʌ chaʼan mach lajalic i pensar bajcheʼ i chaʼan Dios (Mt. 16:22, 23; Lc. 22:34, 54-62; Gá. 2:11-14). Pero maʼañic tsiʼ cʌyʌ i bʌ. Tiʼ coltaya Dios, cʼunteʼ cʼunteʼ tsaʼ caji ti pensar lajal bajcheʼ Cristo. I cheʼʌch miʼ mejlel lac mel jaʼel.

¹³ Ti wiʼil, Pedro tsiʼ taja ti tʼan wen tac bʌ melbalʌl yom bʌ mi lac taj, bajcheʼ i ticʼol lac bʌ, i cuchol wocol yicʼot jiñi cʼuxbiya (pejcan 2 Pedro 1:5-8). Cheʼ mi lac «chaʼlen wersa» lac taj ili wen tac bʌ melbalʌl miʼ coltañonla lac ñumen acʼ lac pensar tiʼ chaʼan bʌ Dios. Wen cheʼ ti jujumpʼejl qʼuin mi laj cʼajtiben lac bʌ: «¿Baqui yom mic weñʼan wʌle chaʼan ñumen lajal c pensar bajcheʼ i chaʼan Dios?».

14. ¿Bajcheʼ mi caj i coltañonla cheʼ mi la cʌcʼ lac pensar ti Dios?

¹⁴ Cheʼ lajal mi lac chaʼlen pensar bajcheʼ Cristo mi caj i coltañonla chaʼan wen mi lac chaʼlen tʼan, chaʼan wen lac melbal ti la queʼtel o ti escuela yicʼot chaʼan mi lac ñaʼtan chuqui yom mi lac mel ti jujumpʼejl qʼuin. Ili mi caj i pʌs chaʼan woli lac chaʼlen wersa lac tsajcan Cristo. Mi mucʼʌch la cʌcʼ lac pensar tiʼ chaʼan bʌ Dios, maʼañic chuqui mi caj i jem bajcheʼ añonla la quicʼot Jehová. Mi an i yilʌntel lac pusicʼal, maʼañic mi caj lac jacʼ. I cheʼ an chuqui yom mi lac yajcan lac mel, mi caj lac melben lac bʌ ili cʼajtiya tac: «¿Baqui bʌ principio tac mi caj i coltañon c yajcan yom bʌ mic mel? Cheʼ jiñic Cristo, ¿chuqui mi caj i mel? Ti jiñi yom bʌ mic yajcan c mel, ¿baqui bʌ mi caj i mulan Jehová?». Yom mi lac ñʌmtesan lac bʌ lac wen ñaʼtan bajcheʼ iliyi. Laʼ laj qʼuel chaʼpʼejl uxpʼejl ejemplo. Ti jujumpʼejl ejemplo, mi caj laj cʌl jumpʼejl principio muʼ bʌ caj i coltañonla lac yajcan chuqui wen.

15, 16. Alʌ ejemplo tac chaʼan bajcheʼ miʼ coltañonla cheʼ lajal mi lac chaʼlen pensar bajcheʼ Cristo: a) Cheʼ mi lac yajcan majqui mi caj i ñujpuñel la quicʼot b) Cheʼ mi lac yajcan la camigojob.

¹⁵ Cheʼ mi lac ñaʼtan majqui mi caj i ñujpuñel la quicʼot. Jiñi principio mi lac taj ti 2 Corintios 6:14, 15 (pejcan). Jiñi tsaʼ bʌ i yʌlʌ Pablo tsiquil miʼ pʌs chaʼan jiñi muʼ bʌ i yʌcʼ i pensar tiʼ chaʼan bʌ Dios, maʼañic mi caj i pʌy juntiquil mach bʌ yaʼic an i pensar jaʼel. ¿Bajcheʼ miʼ mejlel lac jacʼ ili principio cheʼ mi lac yajcan majqui mi caj i ñujpuñel la quicʼot?

¹⁶ Cheʼ mi lac yajcan la camigojob. Laʼ laj qʼuel jiñi principio am bʌ ti 1 Corintios 15:33 (pejcan). Jiñi muʼ bʌ i yʌcʼob i pensar tiʼ chaʼan bʌ Dios maʼañic mi caj i sujtesan tiʼ yamigo jiñi muʼ bʌ i mejlel i yotsañob ti wocol yicʼot Jehová. Laʼ lac ñaʼtan baqui tac miʼ mejlel laj cʼʌn ili principio. Jumpʼejl ejemplo: «¿Bajcheʼ miʼ coltañon c ñaʼtan bajcheʼ yom mij cʼʌn jiñi an tac bʌ ti Internet? ¿Chuqui yom mic mel cheʼ juntiquil mach bʌ j cʌñʌyic miʼ subeñon alas ti Internet?»

17-19. a) ¿Chuqui tac maʼañic mi caj lac mel mi lajalʌch lac pensar bajcheʼ i chaʼan Dios? b) ¿Chuqui mi caj la cʌcʼ ti lac ñaʼtʌbal mi yaʼʌch an lac pensar tiʼ chaʼan bʌ Dios? c) ¿Bajcheʼ miʼ coltañonla cheʼ lajal lac pensar bajcheʼ i chaʼan Dios cheʼ an lac wocol yicʼot yambʌ?

¹⁷ Muʼ bʌ i mʌctañonla chaʼan mi laj colel tiʼ  chaʼan bʌ Dios. An jumpʼejl ñuc bʌ ticʼojel ti Hebreos 6:1 (pejcan). Cheʼ bʌ Pablo miʼ yʌl chaʼan mi laj cʌy jiñi «lolom jach bʌ lac melbal», woliʼ taj ti tʼan jiñi maʼañic bʌ miʼ coltañonla la cʌcʼ lac pensar tiʼ chaʼan bʌ Dios. Ili ticʼojel miʼ mejlel i coltañonla lac jacʼ cabʌl cʼajtiya tac muʼ bʌ i mejlel lac melben lac bʌ. Jumpʼejl ejemplo: «¿Muʼ ba caj i coltañon cheʼ mic mel iliyi, o maʼañic i cʼʌjñibal? ¿Yom ba mic jacʼ ili eʼtel chaʼan mic ñumen taj taqʼuin? ¿Chucoch mach yomic mi cotsan c bʌ baʼan jiñi quixtañujob muʼ bʌ i ñopob i tojʼesan ili pañimil?».

¹⁸ Eʼtel tiʼ chaʼan bʌ Dios. Tiʼ cʌntesa Jesús yaʼ ti bujtʌl, wen tsiquil tsiʼ yʌlʌ chuqui yom mi la cʌcʼ ti lac ñaʼtʌbal (Mt. 6:33). Jiñi yaʼ bʌ an i pensar tiʼ chaʼan bʌ Dios ñaxan miʼ yʌcʼ ti ñuc i Yumʌntel Dios. Cheʼ mi laj cʼajtesan ili principio cabʌl chuqui miʼ coltañonla lac ñaʼtan, bajcheʼ: «¿Muʼ ba caj c majlel ti universidad o maʼañic? ¿Muʼ caj c jacʼ jumpʼejl eʼtel tsaʼ bʌ subentiyon?»

¹⁹ Jiñi michʼ. Cheʼ michʼonla la quicʼot yambʌ hermano, miʼ mejlel i coltañonla jiñi ticʼojel tsaʼ bʌ i yʌcʼʌ Pablo tiʼ tojlel jiñi congregación am bʌ ti Roma (Ro. 12:18). Jiñi muʼ bʌ lac tsajcan Cristo mi lac chaʼlen wersa chaʼan ‹ñʌchʼʌl mi la cajñel yicʼot pejtelel wiñicob xʼixicob›. ¿Chuqui mi lac mel cheʼ an wocol la quicʼot yambʌ? ¿Cʌmbilonbala chaʼan mucʼʌch lac ñusʌben i sajtemal yambʌlob, o wocol mi la cubin chaʼan mi lac ñusan? (Stg. 3:18).

20. ¿Chucoch a wom bej colel majlel tiʼ chaʼan bʌ Dios?

²⁰ Ili ejemplo tac, miʼ pʌs chaʼan cheʼ mi lac wen ñaʼtan jiñi principio tac am bʌ ti Biblia miʼ coltañonla lac mel muʼ bʌ i yʌcʼ ti cʌñol chaʼan yaʼʌch an lac pensar tiʼ chaʼan bʌ Dios. I cheʼʌch miʼ mejlel lac taj lac tijicñʌyel. Robert, tsaʼ bʌ la cʌlʌ tiʼ tejchibal, miʼ yʌl: «Tiʼ sujm, lʌcʼʌl tsaʼ ajñiyon quicʼot Jehová, i tsaʼ ñumen weñʼayon bajcheʼ i jol c familia yicʼot tatʌl. Tijicña tsaʼ cubi c bʌ». Cheʼʌch mi caj i yujtel ti lac tojlel jaʼel mi jiñʌch mi la cʌcʼ ti ñuc chaʼan mi lac bej colel majlel tiʼ chaʼan bʌ Dios. Tiʼ sujm, ili ora ñumen tijicña mi lac mejlel ti chumtʌl i ti talto bʌ qʼuin mi caj lac taj jiñi «cuxtʌlel mach bʌ yujilic jilel» (1 Ti. 6:19).