1, 2. a) ¿Baqui bʌ i wenlel miʼ yʌl cabʌl hermanojob cheʼ mi la cʌcʼ lac pensar tiʼ chaʼan bʌ Jehová? b) ¿Baqui bʌ cʼajtiya tac mi caj laj qʼuelben i jacʼbal?

JUNTIQUIL hermana am bʌ ti Canadá miʼ yʌl: «Coltʌbil bʌ i chaʼañon chaʼan ñumen tijicñayon yicʼot wen jach bajcheʼ mic ñusan ti jujumpʼejl qʼuin jiñʌch cheʼ mi cʌcʼ c pensar tiʼ chaʼan bʌ Jehová». Juntiquil hermano ti Brasil miʼ tsictesan: «Come mic chaʼlen lon wersa chaʼan mi cʌcʼ lon c pensar tiʼ chaʼan bʌ Jehová an lon c taja tijicñʌyel ti jiñi 23 jab lon c ñujpuñel». I juntiquil hermano ti Filipinas miʼ yʌl chaʼan cheʼ yaʼan i pensar tiʼ chaʼan bʌ Jehová, miʼ coltan i yubin i ñʌchʼtʌlel i utsʼat miʼ yajñel yicʼot yambʌ hermanojob.

² Wen tsiquil chaʼan cabʌlʌch i wenlel cheʼ lajal mi lac chaʼlen pensar bajcheʼ Jehová. Tiʼ sujm, luʼ la com lac tajben i wenlel. Jin chaʼan, tajol mi laj cʼajtiben lac bʌ bajcheʼ miʼ mejlel lac ñumen acʼ lac pensar tiʼ chaʼan bʌ Jehová. Jiñʌch muʼ bʌ caj laj qʼuel. Pero yom mi lac ñaxan chʼʌmben isujm chuqui miʼ cʌntesañonla jiñi Biblia chaʼan juntiquil lajal bʌ i pensar bajcheʼ i chaʼan Jehová i miʼ yʌcʼ i bʌ ti tojʼesʌntel ti chʼujul bʌ i yespíritu. Ti ili temaj mi caj laj qʼuelben i jacʼbal uxpʼejl cʼajtiya. Ñaxam bʌ, ¿chuqui yom i yʌl cheʼ  lajal lac pensar bajcheʼ i chaʼan Jehová? I chaʼpʼejlel, ¿baqui bʌ ejemplo tac mi caj i coltañonla chaʼan ñumen lajal lac pensar bajcheʼ i chaʼan Jehová? I yuxpʼejlel, ¿bajcheʼ miʼ coltañonla cheʼ mi lac tajben «i ñaʼtʌbal Cristo»?

3. Cheʼ bajcheʼ miʼ yʌl jiñi Biblia, ¿chucoch mach lajalic juntiquil am bʌ i chaʼan espíritu yicʼot jiñi mach bʌ añic i chaʼan?

³ Jiñi apóstol Pablo tiʼ tsictesa bajcheʼ yilal juntiquil lajal bʌ i pensar bajcheʼ Dios yicʼot juntiquil mach bʌ cheʼiqui, cheʼ bʌ tsiʼ taja ti tʼan juntiquil am bʌ i chaʼan jiñi «Espíritu» yicʼot juntiquil «mach bʌ anic Espíritu yicʼot» (pejcan 1 Corintios 2:14-16). Tsiʼ yʌlʌ chaʼan jiñi «mach bʌ [yicʼotic] Espíritu» maʼañic miʼ chʼʌm «jini chʼoyol bʌ tiʼ yEspíritu Dios, come miʼ yʌl tonto jax. Mach mejlic i chʼʌmben isujm». Pero «am bʌ i chaʼan jini Espíritu» miʼ tsajin chaʼan miʼ «mejlel i laj chʼʌmben isujm» yicʼot an i chaʼan «i ñaʼtʌbal Cristo». Jin chaʼan, Pablo tsiʼ yʌlʌ chaʼan yom an lac chaʼan jiñi espíritu. ¿Chuqui yambʌ qʼuexel ti ili wiñicob xʼixicob (quixtañujob) tsaʼ bʌ i yʌlʌ Pablo?

4, 5. ¿Bajcheʼ yilal jiñi mach bʌ lajalic i pensar bajcheʼ Dios?

⁴ Laʼ lac ñaxan qʼuel chuqui miʼ ñaʼtan juntiquil mach bʌ lajalic i pensar bajcheʼ i chaʼan Dios. Cojach miʼ bajñel ñaʼtan chuqui yom come jin jach miʼ tsajcan bajcheʼ yilal i melbal (chaʼlebal) jiñi quixtañujob ila ti pañimil (mulawil), i Pablo tsiʼ yʌlʌ ili melbalʌl bajcheʼ «jini espíritu woli bʌ ti eʼtel tiʼ pusicʼal xñusa mandarob» (Ef. 2:2). Ili espíritu miʼ ñijcʌben i pusicʼal jiñi quixtañujob chaʼan jin jach miʼ tsajcañob yicʼot miʼ melob chuqui miʼ mel yambʌlob. Jin tiʼ caj cheʼ cojach miʼ melob chuqui wen bʌ miʼ qʼuelob i maʼañic miʼ chaʼleñob wersa chaʼan miʼ jacʼbeñob i mandar Dios. I tilelʌch cheʼ juntiquil maʼañic bʌ miʼ yʌcʼ i pensar tiʼ chaʼan bʌ Dios cojach miʼ ñaʼtan bajcheʼ yilal mi caj i qʼuejlel yicʼot yom tac bʌ i taj, o miʼ coltan chuqui ñuc bʌ i cʼʌjñibal i chaʼan.

⁵ Jiñi mach bʌ lajalic i pensar bajcheʼ Dios miʼ mel am bʌ tiʼ «tsucul pusicʼal» (Gá. 5:19-21). Yaʼ ti ñaxam bʌ carta tsaʼ bʌ i choco majlel Pablo ti congregación am bʌ ti Corinto, tsiʼ yʌlʌ yan tac bʌ melbalʌl: Miʼ yotsañob i bʌ tiʼ wocol yambʌlob, miʼ ñopob i tʼox quixtañujob, miʼ sujtelob tiʼ contra yambʌlob, miʼ yotsañob ti melobʌjʌl jiñi yambʌlob, maʼañic miʼ qʼuelob ti ñuc jiñi yumʌlob i miʼ wen qʼuelob ti ñuc jiñi weʼel uchʼel. Cheʼ jaʼel, maʼañic miʼ chaʼleñob wersa chaʼan miʼ cʌntañob i bʌ tiʼ melol jiñi mulil (Pr. 7:21, 22). Jiñi xcʌntʼan Judas tsiʼ yʌlʌ chaʼan i yespíritu Jehová maʼañic tiʼ tojlelob (Jud. 18, 19).

6. ¿Bajcheʼ yilal jiñi lajal bʌ i pensar bajcheʼ i chaʼan Dios?

⁶ Juntiquil lajal bʌ i pensar bajcheʼ i chaʼan Dios wen qʼuexelʌch. Miʼ wen chʼʌm ti ñuc bajcheʼ an yicʼot Dios i miʼ ñop i tsajcan (Ef. 5:1). Yom i yʌl chaʼan miʼ chaʼlen wersa i cʌmben i pensar yicʼot chaʼan lajal miʼ ñaʼtan bajcheʼ miʼ ñaʼtan Jehová. Cuxulʌch miʼ qʼuel Dios. Tiʼ pejtelel ora miʼ chʼʌmben ti ñuc i mandar tac (Sal. 119:33; 143:10). Miʼ chaʼlen wersa i pʌs «i yʌcʼbal jini Espíritu» i mach jiñic miʼ mel chuqui yom i «tsucul pusicʼal» (Gá. 5:22, 23).

7. ¿Chuqui miʼ yʌl jiñi Biblia tiʼ tojlel jiñi lajaloʼ bʌ i pensar bajcheʼ i chaʼan Dios?

⁷ Jesús tsiʼ yʌlʌ chaʼan jiñi lajaloʼ bʌ i pensar bajcheʼ i chaʼan Dios tijicñayob. Ti Lucas 11:28, miʼ yʌl: «Ñumen tijicñayob muʼ bʌ i yubibeñob i tʼan Dios muʼ bʌ i jacʼob». Romanos 8:6 miʼ pʌs jaʼel chucoch ñumen wen cheʼ lajal mi la cʌcʼ lac pensar bajcheʼ i chaʼan Dios. Miʼ yʌl: «Come jini muʼ bʌ i chʌn jacʼ i tsucul pusicʼal miʼ yʌjqʼuel ti chʌmel. Jini muʼ bʌ i chʌn jacʼ jini Espíritu miʼ yʌqʼuentel i cuxtʌlel yicʼot i ñʌchʼtilel i pusicʼal». Cheʼ mi la cʌcʼ lac pensar tiʼ chaʼan bʌ Dios, tijicña mi la cajñel  la quicʼot i mi lac taj lac ñʌchʼtʌlel, cheʼ jaʼel mi caj lac mejlel ti chumtʌl tiʼ pejtelel ora ti talto bʌ qʼuin.

8. ¿Chucoch yom mi lac chaʼlen wersa chaʼan mi lac chʌn acʼ lac pensar tiʼ chaʼan bʌ Dios?

⁸ Ili pañimil baqui chumulonla miʼ mejlel i yʌcʼ ti wocol bajcheʼ añonla la quicʼot Jehová. Yom mi lac chaʼlen wersa laj cʌntan lac pensar come joyolonla ti quixtañujob mach bʌ lajalobic i pensar bajcheʼ i chaʼan Dios. Cheʼ bʌ juntiquil mach lajalix i pensar bajcheʼ i chaʼan Dios, mach chʌn weñix i melbal i muqʼuix i toyben i melbal yicʼot i ñaʼtʌbal ili pañimil. ¿Chuqui mi caj i coltañonla chaʼan maʼañic mi la cujtel bajcheʼ jiñi? Yicʼot ¿bajcheʼ miʼ mejlel lac ñumen acʼ lac pensar tiʼ chaʼan bʌ Dios?

9. a) ¿Chuqui mi caj i coltañonla lac ñumen acʼ lac pensar tiʼ chaʼan bʌ Dios? b) ¿Majqui tiʼ tojlelob mi caj laj cʌn ili ora?

⁹ Cheʼ bajcheʼ jiñi alʌlob miʼ cʌñob chuqui tac wen tiʼ tojlelob i tat, cheʼ mi lac lajiñob jaʼel jiñi pʼʌtʌloʼ bʌ tiʼ chaʼan bʌ Dios miʼ mejlel laj cʌn lac ñumen acʼ lac pensar tiʼ chaʼan bʌ Dios. Cheʼ jaʼel, miʼ mejlel laj cʌn chuqui mach bʌ yomic mi lac mel cheʼ mi laj qʼuel tiʼ tojlel jiñi tsaʼ bʌ i jacʼbeyob i tsucul pusicʼal (1 Co. 3:1-4). Ili chaʼchajp woli (choncol) bʌ la cʌl yaʼʌch mi lac taj yaʼ ti Biblia. Ti ili temaj, mi caj laj qʼuel jiñi wen bʌ ejemplo chaʼan Jacob, María yicʼot Jesús. Cheʼ bajcheʼ jiñi, mi caj laj cʌn lac ñumen acʼ lac pensar tiʼ chaʼan bʌ Dios.

10. ¿Bajcheʼ tsiʼ pʌsʌ Jacob chaʼan tsiʼ yʌcʼʌ i pensar bajcheʼ i chaʼan Dios?

¹⁰ Laʼ lac ñaxan qʼuel tiʼ tojlel Jacob. Wocolʌch tsiʼ ñusa bajcheʼ mi lac ñusan jaʼel ili ora. Jiñi i yʌscun i cʼabaʼ Esaú, mach bʌ lajalic i pensar bajcheʼ i chaʼan Dios, tsiʼ ñopo i tsʌnsan. Cheʼto jaʼel, jiñi i suegro mach junsujtelic jach tsiʼ ñopo i lotin. Pero Jacob chʌn lajal tsiʼ yʌcʼʌ i pensar bajcheʼ i chaʼan Dios anquese joyol ti quixtañujob mach bʌ cheʼobic. Tsiʼ wen ñopo tsaʼ bʌ subenti Abrahán ti Dios, i tsiʼ chʌn cʌnta i familia come ñucʌch i cʼʌjñibal chaʼan miʼ tsʼʌctiyel jiñi  ñaʼtʌbil bʌ i chaʼan Dios (Gn. 28:10-15). Tsiʼ pʌsʌ tiʼ tʼan yicʼot i melbal chaʼan mucʼʌch i qʼuel ti ñuc i mandar tac yicʼot muʼ bʌ i mulan Jehová. Jumpʼejl ejemplo, cheʼ bʌ tsiʼ ñaʼta chaʼan Esaú mi caj i contrajin, tsiʼ wen cʼajtibe i coltaya Dios. Tiʼ sube ti oración: «Jatet tsaʼ subeyon: ‹Isujm mi caj cʌqʼueñet chuqui utsʼat. Mi caj c pʼojlesan a walobilob cheʼ bajcheʼ jini jiʼ am bʌ ti colem ñajb mach bʌ mejlic ti tsicol›» (Gn. 32:6-12). Jacob jamʌ tsiquil tsiʼ pʌsʌ tiʼ cuxtʌlel chaʼan tsaʼʌch i wen ñopo jiñi tʼan tsaʼ bʌ i yʌcʼʌ Jehová tiʼ tojlel yicʼot tiʼ tojlel i ñojteʼelob.

11. ¿Chuqui miʼ pʌs chaʼan María juntiquilʌch xʼixic lajal bʌ i pensar bajcheʼ i chaʼan Dios?

¹¹ Wʌle laʼ laj qʼuel tiʼ tojlel María. ¿Chucoch Jehová tsiʼ yajca chaʼan miʼ sujtel tiʼ ñaʼ Jesús? Come juntiquilʌch xʼixic lajal bʌ i pensar bajcheʼ i chaʼan Jehová. La cujil iliyi come cheʼ bʌ María tsajñi i julaʼtan Zacarías yicʼot Elisabet tsiʼ yʌlʌ utsʼatax bʌ tʼan tac chaʼan miʼ yʌqʼuen i ñuclel Jehová (pejcan Lucas 1:46-55). Jiñi tsaʼ bʌ i yʌlʌ María miʼ pʌs chaʼan mucʼʌch i wen cʼuxbin i tʼan Dios yicʼot wen i cʌñʌyʌch jiñi Tsʼijbujel Hebreo (Gn. 30:13; 1 S. 2:1-10; Mal. 3:12). Cheʼ bʌ tsaʼ ñujpuñi yicʼot José, maʼañic tsiʼ piʼleyob i bʌ jinto tsiʼ yila pañimil (chʼocʼa) Jesús. Ili miʼ pʌs chaʼan tsaʼ bʌ i ñumen acʼʌyob ti ñuc jiñʌch chuqui yom Jehová, i mach jiñic chuqui bajñel yomob (Mt. 1:25). Cheʼ tsaʼ ñumi majlel jiñi jabil, María tsiʼ wen tsaji pejtelel chuqui tsiʼ mele yicʼot tsiʼ yʌlʌ Jesús. Cheʼ jaʼel, «tsiʼ mucu [o loto] tiʼ pusicʼal pejtelel tsaʼ bʌ ujti» (Lc. 2:51). Tsiʼ wen qʼuele ti ñuc wʌn albil bʌ i chaʼan Dios tiʼ tojlel jiñi Mesías. Wen cheʼ mi lac lajin tsaʼ bʌ i mele yicʼot mi lac ñaʼtan bajcheʼ mi lac ñaxan acʼ chuqui yom Dios.

12. a) ¿Bajcheʼ qui lajal Jesús yicʼot i Tat? b) ¿Bajcheʼ miʼ mejlel lac lajin Jesús? (Qʼuele jiñi dibujo am bʌ tiʼ tejchibal).

¹² Wʌle laʼ laj cʌl chaʼan Jesús. Cojach jiñi ñumen lajal bʌ i pensar bajcheʼ i chaʼan Jehová. Cheʼ bʌ tsaʼ chumle ila ti pañimil i tsiʼ chaʼle subtʼan, tsiʼ pʌsʌ chaʼan yomʌch i lajin i Tat, Jehová. Pejtelel chuqui tsiʼ ñaʼta, bajcheʼ yubil tsiʼ yubi i bʌ yicʼot tsaʼ bʌ i mele tsiʼ pʌsʌ chaʼan tsiʼ yʌcʼʌ i bʌ ti tojʼesʌntel tiʼ mandar tac Jehová (Jn. 8:29; 14:9; 15:10). Jumpʼejl ejemplo, miʼ mejlel lac lajin tsaʼ bʌ i yʌlʌ Isaías chaʼan i pʼuntaya Dios yicʼot jiñi tsaʼ bʌ i yʌlʌ Marcos chaʼan bajcheʼ yubil miʼ yubin i bʌ Jesús (pejcan Isaías 63:9; Marcos 6:34). ¿Cheʼ ba yilalonla bajcheʼ Jesús i mi lac pʌsbeñob lac pʼuntaya jiñi yomoʼ bʌ coltʌntel? ¿Yaʼ ba mi la cʌcʼ lac ñaʼtʌbal jaʼel yaʼ ti subtʼan yicʼot mi laj cʌntesan yambʌlob chaʼan jiñi wen tʼan? (Lc. 4:43). Mi cheʼʌch mi lac mel, mi lac pʌs chaʼan yaʼʌch an lac pensar tiʼ chaʼan bʌ Dios.

13, 14. a) ¿Chuqui mi laj cʌn tiʼ tojlelob jiñi mejlem bʌ i lajiñob Cristo? b) Alʌ jumpʼejl experiencia.

¹³ Ili ora cabʌlob ñumen weñix bʌ miʼ mejlel i lajibeñob i melbal Cristo. Ili hermanojob miʼ chaʼleñob subtʼan tiʼ chʼejlel, miʼ pʌsbeñob i yutslel yicʼot pʼuntaya yambʌ hermanojob, i an wen tac bʌ i melbalob. Miʼ chaʼleñob wersa, cheʼ bajcheʼ joñonla, chaʼan maʼañic miʼ sʌtob jiñi wen tac bʌ i melbalob tiʼ caj jiñi mulil. Juntiquil hermana i cʼabaʼ Rachel chʼoyol bʌ ti Brasil miʼ yʌl: «Ti ñaxan, mic wen mulan c pislel cheʼ bajcheʼ yilal miʼ xojob añoʼ bʌ ti pañimil. Jin chaʼan, mach wen utsʼatic bajcheʼ tac yilal muʼ bʌ c xoj. Pero cheʼ tsaʼ j cʌñʌ i sujmlel, tsaʼ j cʌñʌ chaʼan yom mic chaʼlen wersa chaʼan lajal mic chaʼlen pensar bajcheʼ Dios. Wocolʌch tsaʼ cubi chaʼan mij qʼuextan c bʌ, pero ñumen tijicñayon i tsac tajbe i sujmlel j cuxtʌlel».

¹⁴ Tsaʼ bʌ i ñusa jiñi hermana Reylene chʼoyol bʌ ti Filipinas wen qʼuexelʌch. Anquese Testigojix, tsiʼ yʌcʼʌ i pensar chaʼan miʼ chaʼlen qʼuel jun ti universidad i miʼ taj wen bʌ i yeʼtel (troñel) chaʼan utsʼat miʼ chumtʌl. Miʼ yʌleʼ: «Tsaʼ caji c tʌtsʼ c pensar ti jiñi  com bʌ c taj tsaʼ c ñaʼta tiʼ chaʼan bʌ Dios. Pero orajach tsaʼ caji j qʼuel chaʼan anto chuqui yom c chaʼan, ñumen ñuc bʌ i cʼʌjñibal bajcheʼ queʼtel. I tsaʼ caji c chaʼ acʼ ti ñaxan i melol i yeʼtel Jehová». Cʼʌlʌl cheʼ jiñi, Reylene tsaʼ sujti ti wen bʌ ejemplo lac chaʼan come tsiʼ ñopo muʼ bʌ i yʌl Dios yaʼ ti Mateo 6:33, 34, i miʼ yʌl chaʼan ti jumpʼejl i pusicʼal miʼ ñop chaʼan Jehová mi caj i cʌntan. Tajol yaʼ ti laj congregación an hermanojob cheʼ bʌ ujtemob jaʼel bajcheʼ jiñi. ¿Mach ba la comʌch lac tsajcañob jaʼel cheʼ mi laj qʼuel bajcheʼ woli (yʌquel) i lajiñob Cristo? (1 Co. 11:1; 2 Ts. 3:7).

15, 16. a) ¿Chuqui yom mi lac mel chaʼan mi lac lajin Cristo? b) ¿Bajcheʼ miʼ mejlel laj cʌn bajcheʼ miʼ chaʼlen pensar Jesús?

¹⁵ ¿Bajcheʼ miʼ mejlel lac lajin Cristo? Jiñi Biblia miʼ subeñonla ti 1 Corintios 2:16 chaʼan yom an lac chaʼan «i ñaʼtʌbal Cristo». Ti Romanos 15:5 miʼ yʌl chaʼan yom lajal mi lac tem chaʼlen «pensar bajcheʼ Cristo Jesús». Jin chaʼan, mi la com lac lajin Cristo yom mi laj cʌn bajcheʼ yilal, chuqui miʼ ñaʼtan yicʼot bajcheʼ yilal i melbal. Tsaʼ bʌ i ñumen acʼʌ ti ñuc jiñʌch bajcheʼ an yicʼot Dios. Cheʼ mi lac lajin Jesús mi lac ñumen lʌcʼtiyel tiʼ tojlel Jehová. Jin chaʼan, wen ñuc i cʼʌjñibal cheʼ lajal mi laj cʌn lac chaʼlen pensar bajcheʼ Jesús.

¹⁶ ¿Chuqui mi caj i coltañonla chaʼan mi lac mejlel? Jiñi xcʌntʼañob i chaʼan Jesús tsiʼ qʼueleyob cheʼ bʌ tsiʼ mele milagro tac, cheʼ tsiʼ chaʼle cʌntesa, bajcheʼ yilal tiʼ tojlel yambʌ quixtañujob yicʼot cheʼ tsiʼ yʌcʼʌ ti ñuc jiñi principio tac. Tsiʼ yʌlʌyob: «Tsaj qʼuele lojon pejtelel chuqui tsiʼ mele Jesús» (Hch. 10:39). Isujm, maʼañix miʼ mejlel laj qʼuel Jesús. Pero Jehová tsiʼ yʌcʼʌ jiñi relato tac am bʌ ti Mateo, Marcos, Lucas yicʼot Juan chaʼan miʼ cʼotel lac ñaʼtan bajcheʼ yilal i melbal. Cheʼ mucʼʌch lac pejcan yicʼot mi lac wen ñaʼtan muʼ bʌ i yʌl, miʼ mejlel lac wen cʌn bajcheʼ miʼ chaʼlen pensar Jesús. Cheʼʌch mi caj i mejlel lac jacʼ ili ticʼojel tac: «Tsajcanla majlel» yicʼot «yom chajpʌbil laʼ pusicʼal chaʼan mi laʼ ñusan wocol jaʼel» (1 P. 2:21; 4:1).

17. ¿Chucoch miʼ coltañonla cheʼ mi lac chaʼlen pensar bajcheʼ Jesús?

¹⁷ ¿Chucoch miʼ coltañonla cheʼ lajal mi lac chaʼlen pensar bajcheʼ Jesús? Chaʼan mi lac ñaʼtan, laʼ la cʌl jumpʼejl lajiya. Cheʼ wen chuqui tac mi laj cʼux, miʼ yʌqʼueñonla laj cʼocʼlel. Cheʼʌch miʼ yujtel cheʼ lajal mi la cʌcʼ lac pensar bajcheʼ i chaʼan Cristo, mi lac ñumen pʼʌtʼan tiʼ chaʼan bʌ Dios. Cheʼ bajcheʼ jiñi, xucʼu xucʼul miʼ cʼotel lac ñaʼtan chuqui miʼ mel Cristo cheʼ jiñic yom bʌ miʼ yajcan chuqui miʼ mel. Iliyi miʼ coltañonla chaʼan mi lac yajcan muʼ bʌ i yʌqʼuen i ñʌchʼtʌlel laj conciencia yicʼot wem bʌ miʼ qʼuel Dios. Tiʼ sujm, ili jiñʌch ñuc bʌ i sujmlel cheʼ yom mi lac jacʼ ili ticʼojel: «Ajñenla ti utsʼat cheʼ bajcheʼ i cuxtʌlel lac Yum Jesucristo» (Ro. 13:14, Jiñi tsijiʼ bʌ wen tʼañ chaʼañ estudio).

18. ¿Chuqui tsaʼ laj cʌñʌ ti ili temaj chaʼan juntiquil lajal bʌ i pensar bajcheʼ i chaʼan Dios?

¹⁸ Ti ili temaj, tsaʼix tsictesʌnti chuqui yom i yʌl cheʼ juntiquil lajal i pensar bajcheʼ i chaʼan Dios. Tsaʼix laj qʼuele jaʼel chuqui miʼ cʌntesañonla tiʼ tojlel jiñi lajal bʌ tsiʼ yʌcʼʌyob i pensar bajcheʼ i chaʼan Dios. Tsaʼ laj cʌñʌ jaʼel bajcheʼ miʼ coltañonla chaʼan ñumen lajal mi lac chaʼlen pensar bajcheʼ Dios cheʼ an lac chaʼan «i ñaʼtʌbal Cristo». Pero anto chuqui tac yom mi lac bej cʌn chaʼan ili temaj, bajcheʼ tac iliyi: ¿Bajcheʼ miʼ mejlel lac ñaʼtan mi pʼʌtʌloñʌchla tiʼ chaʼan bʌ Dios? ¿Chuqui tac yambʌ miʼ mejlel lac mel chaʼan mi lac ñumen pʼʌtʼan tiʼ chaʼan bʌ Dios? Yicʼot, ¿baqui bʌ lac wenlel mi caj lac taj cheʼ pʼʌtʌlonla tiʼ chaʼan bʌ Dios? Jiñi yambʌ temaj mi caj i jacʼ ili cʼajtiya tac.