CHEʼ bʌ jiñi barco wolix (choncolix) i yochel majlel tiʼ xʌcʼ jiñi mar yaʼ ti Belfast Lough, jiñi yaʼ bʌ majlelob tsaʼ caji i qʼuelob bajcheʼ woli (yʌquel) i loqʼuel tilel jiñi Qʼuin yaʼ ti yʌx paman jax bʌ bujtʌl tac. Ili jiñʌch cheʼ ti mayo i chaʼan 1910. Juntiquil yaʼ bʌ majlel yaʼ ti barco jiñʌch Charles Taze Russell, i joʼyajlelix woliʼ majlel yaʼ ti isla am bʌ ti Irlanda. Yaʼ baqui woliʼ cʼotel, yaʼʌch an jiñi chaʼpʼejl ñuqui barco woli bʌ i mejlel ti jiñi bʌ ora: Jiñi Olympic, yicʼot jiñi Titanic, chʼijiyem tic jax bʌ bajcheʼ tsaʼ jili. * Pero mach cojach jiñi, yaʼ baqui miʼ cʼotel ti cottʌl jiñi barco tac, yaʼan cheʼ bʌ 12 xpejcaya bibliajob woli bʌ i pijtañob jiñi hermano.

Cheʼ bʌ anto yom 20 jab miʼ cʼotel i yorajlel iliyi, jiñi hermano Russell loqʼuemix tac yaʼ ti Estados Unidos i ajñemix ti yan tac bʌ tejclum, come tsiʼ ñaʼta chaʼan yom miʼ pujquel tiʼ pejtelel pañimil (mulawil) jiñi wen tʼan. Baqui ñaxan tsajñi jiñʌch ti Irlanda, cheʼ ti julio i chaʼan 1891. Cheʼ yaʼ majlel yaʼ ti barco City of Chicago, tsiʼ qʼuele bajcheʼ yilal miʼ bʌjlel majlel jiñi qʼuin cheʼ cʼotelix mucʼ yaʼ ti Queenstown (ili ora cʌmbil bajcheʼ Cobh). Ti jim bʌ ora, tajol tsiʼ cʼajtesa chuqui albil i chaʼan jiñi i tatob chaʼan jiñi lum baqui chʼoyol tsaʼ loqʼuiyob. Cheʼ bʌ tsiʼ julaʼta ñumel jiñi tejclum yicʼot pejtelel jiñi teʼel, Russell yicʼot jiñi i piʼʌlob ti xʌmbal tsiʼ qʼueleyob chaʼan wen i yorajlelix jiñi cʼajbal.

Russell tsajñi wucyajl (7) ti Irlanda. Cheʼ bʌ cojaxto tsajñi ti ili país, cabʌl wiñicob xʼixicob (quixtañujob) tsiʼ mulʌbeyob i cʌntesa, i cheʼ bʌ chaʼ tsajñi tac ti wiʼil, ñumen cabʌlobto tsaʼ bʌ majli i ñʌchʼtañob. Cheʼ bʌ tsajñi tiʼ chaʼyajlel cheʼ ti mayo i chaʼan 1903, tsaʼ mejli jumpʼejl tempa bʌ yaʼ ti Belfast yicʼot Dublín, tsaʼix bʌ wʌn sujbi ti periódico tac. Russell tsiʼ yʌlʌ chaʼan jiñi tsaʼ bʌ cʼotiyob tsiʼ wen ñʌchʼtayob jiñi cʌntesa tsaʼ bʌ i taja ti tʼan chaʼan i ñopoñel Abrahán yicʼot jiñi bendición tac muʼ bʌ caj i taj jiñi quixtañujob ti talto bʌ qʼuin.

Come yaʼ ti Irlanda an cabʌl tsaʼ bʌ i mulayob i cʌn i sujmlel, Russell chaʼ tsajñi tiʼ yuxyajlel cheʼ bʌ yaʼan ti Europa. Cheʼ bʌ tsaʼ cʼoti yaʼ ti Belfast, ti abril i chaʼan 1908, yaʼañob i pijtan joʼtiquil hermanojob cheʼ ti sʌcʼan. Ti jiñi jach bʌ qʼuin cheʼ ti icʼan, tsiʼ ñusa jumpʼejl discurso tsaʼix bʌ wʌn sujbi chaʼan miʼ cajel, i cʼabaʼ jiñʌch: «Jiñi i yumʌntel Satanás mi caj i jilel». Tsajñiyob cheʼ bʌ 300 quixtañujob yomobʌch bʌ i cʌn i sujmlel. An juntiquil tsaʼ bʌ caji i mel cabʌl cʼajtiya, i tsaʼʌch luʼ jacʼbenti yicʼot jiñi Biblia. Ti Dublín, an yambʌ wiñic ñumen jontol bʌ, i cʼabaʼ O’Connor, secretario bʌ i chaʼan jiñi Asociación Cristiana de Jóvenes (jiñi sigla ti inglés jiñʌch YMCA), tsiʼ ñopo i contrajin jiñi junmojt xPejcaya bibliajob cheʼ ñumen ti 1,000 yaʼ tempʌbilob ti jumpʼejl auditorio. ¿Chuqui tsaʼ ujti?

Laʼ cu lac ñaʼtan bajcheʼ yilal tajol tsaʼ bʌ ujti. Juntiquil wiñic tsaʼ bʌ i wen mulaj jiñi wen tʼan am bʌ ti Biblia miʼ majlel i ñʌchʼtan jiñi cʌntesa tsaʼ bʌ ajli yaʼ ti periódico The Irish Times. Cheʼ bʌ miʼ cʼotel, wen butʼulix i wocol jax miʼ taj i buchlib. Jiñi wiñic woliʼ wen ñʌchʼtan jiñi xcʌntesa, juntiquil sʌquix bʌ i jol yicʼot am bʌ i tsuctiʼ tiʼ xʌcʼtiʼ, lʌpbil i chaʼan pʌl bʌ i bujc iʼicʼ bʌ, i tile ñumel woli ti xʌmbal yicʼot miʼ ñijcan i cʼʌb cheʼ bʌ woli ti tʼan yaʼ ti plataforma. Utsʼatax miʼ  tech i tsictesan majlel bajcheʼ miʼ taj i bʌ jumpʼejl texto yicʼot yambʌ, i jiñi wiñic miʼ tech i ñumen chʼʌmben isujm muʼ bʌ i yʌl jiñi Biblia. Anquese maʼañic micrófono, ñajti tsiquil miʼ yubintel i tʼan jiñi xcʌntesa i jiñi tempʌbiloʼ bʌ jumpʼejl ora yicʼot ojlil miʼ wen ñʌchʼtañob. Cheʼ miʼ cʼotel i yorajlel chaʼan miʼ mejlel cʼajtiya tac, O’Connor yicʼot i yamigojob miʼ tech i wen melob cʼajtiya tac chaʼan miʼ ñop i pʌsob chaʼan mach isujmic woli bʌ i yʌl jiñi xcʌntesa, pero mucʼʌch i mejlel i coltan i bʌ yicʼot jiñi Biblia. Ti wiʼil, jiñi yaʼ bʌ tempʌbilob miʼ jatsʼob i cʼʌb chaʼan tijicñʌyel. Cheʼ bʌ miʼ ñʌjchʼel jiñi wocol, jiñi wiñic tsaʼ bʌ lac ñaxan alʌ miʼ majlel i ñumen cʼajtin i cʌntesʌntel yaʼ baʼan jiñi xcʌntesa. Cabʌlob cheʼʌch bʌ tsiʼ cʌñʌyob i sujmlel bajcheʼ jiñi.

Cheʼ ti mayo i chaʼan 1909, jiñi hermano Russell tsaʼ loqʼui ti Nueva York chaʼan miʼ chaʼ majlel ti Irlanda, jiñʌch i chʌnyajlel bʌ i julaʼ, tsaʼ majli ti jiñi barco i cʼabaʼ Mauretania. I wʌle, temel tsaʼ majli yicʼot jiñi hermano Huntsinger, jiñi wen yujil bʌ tsʼijb. Cheʼ bajcheʼ ili, miʼ mejlel i suben majlel yom bʌ miʼ tsʼijbun chaʼan jiñi temaj tac muʼ bʌ i loqʼuel yaʼ ti revista Lac Tsictesʌbentel cheʼ bʌ majlel mucʼob yaʼ ti océano. Rusell tsiʼ yʌcʼʌ jumpʼejl discurso yaʼ ti Belfast, baʼ tsiʼ tempa i bʌ 450 quixtañujob, i anto 100 maʼañic bʌ tsiʼ tajayob i buchlib come tsaʼ wen bujtʼi.

Cheʼ bajcheʼ tsaʼ la cʌlʌ tiʼ tejchibal, cheʼ bʌ tsajñi tiʼ joʼyajlel, lʌcʼʌl lajalʌch tsaʼ ujti bajcheʼ jiñi yambʌ. Cheʼ bʌ Russell tsaʼ ujti i yʌcʼ jumpʼejl discurso yaʼ ti Dublín, juntiquil teólogo cʌn tsajñi bʌ yicʼot jiñi O’Connor tsaʼ pʌsbenti ti Biblia pejtelel i jacʼbal i cʼajtiya. I jiñi yaʼ bʌ tempʌbilob wen tijicña tsiʼ yubiyob. Cheʼ tiʼ yijcʼʌlal, jiñi hermano Russell yicʼot i piʼʌlob tsaʼ cʼʌjquiyob ti jumpʼejl barco chaʼan correo i tsaʼ majliyob ti Liverpool, i yaʼi, tsaʼ cʼʌjquiyob ti jiñi barco Lusitania chaʼan miʼ chaʼ sujtelob ti Nueva York. *

Ti 1911, cheʼ cojix chaʼyajl tsajñi ti Irlanda, Russell tsiʼ yʌcʼʌ jiñi discurso tsaʼix bʌ wʌn tsictesʌnti. Ti jiñi jabil, cheʼ ti abril, jiñi 20 xpejcaya bibliajob tsiʼ tempayob 2,000 quixtañujob yaʼ ti Belfast, tsiʼ ñʌchʼtayob jiñi discurso tsaʼ bʌ i tsictesa mi chʌn anto bajcheʼ cuxulonla cheʼ tsaʼix chʌmiyonla. O’Connor chaʼ tsajñi ti Dublín yicʼot yambʌ ñuc bʌ i yeʼtel (troñel) ti ñopbalʌl i tsiʼ chaʼ meleyob cabʌl cʼajtiya. I jiñi yaʼ bʌ tempʌbilob tsiʼ wen mulayob bajcheʼ tsaʼ tsictesʌnti i jacʼbal yicʼot jiñi Biblia. Ti wiʼil, cheʼ bʌ ti octubre o noviembre ti jiñi jach bʌ jabil, Russell tsajñi ti yan tac bʌ tejclum, i cabʌlob tsajñi bʌ i ñʌchʼtañob. O’Connor yicʼot yambʌ 100 i wiñicob tsajñi i chaʼ ñopob i jem jiñi tempa bʌ yaʼ ti Dublín, pero jiñi yaʼ bʌ tempʌbilob tsiʼ coltayob jiñi hermano.

Anquese ti jim bʌ ora jiñi am bʌ tiʼ wenta chaʼan miʼ yʌcʼ discurso tac jiñʌch jiñi hermano Russell, tsiʼ yʌlʌ chaʼan «maʼañic majqui ñumen ñuc i cʼʌjñibal» come jiñi «eʼtel i chaʼañʌch Dios, mach i chaʼañic juntiquil wiñic». Jiñi discurso tac tsaʼ bʌ wen pujqui jiñʌch tsaʼ bʌ i yʌqʼue i tejchibal jiñi tempa bʌ chaʼan jiñi Discurso loqʼuem bʌ ti Biblia i miʼ yʌcʼ chaʼan miʼ mejlel ti tsictesʌntel jiñi i sujmlel tac am bʌ ti Biblia. Cheʼʌch tsaʼ mejli ti loqʼuel cabʌl congregación ti yan tac bʌ tejclum, i jiñi i sujmlel tsaʼ ñumen pujqui ti Irlanda. (Jiñi lotbil bʌ yaʼ ti Gran Bretaña).