TI LAC pejtelel tijicña mi lac mulan ajñel. Pero ti ili cojix bʌ qʼuin wen wocol jax mi lac ñusan (2 Ti. 3:1). Cabʌl chuqui miʼ mejlel i chilbeñonla lac tijicñʌyel, bajcheʼ jiñi toʼol ticʼlʌntel, cʼamʌjel, cheʼ maʼañic eʼtel (troñel) o miʼ chʌmel (sajtel) juntiquil ti lac familia. Jinto jiñi i wiñicob Dios miʼ mejlel i sʌtob i tijicñʌyel tiʼ caj jiñi chʼijiyemlel. Mi cheʼʌch woli (choncol) la cujtel, ¿bajcheʼ miʼ mejlel lac chaʼ tajeʼ?

Chaʼan mi lac jacʼ ili cʼajtiya, yom mi lac ñaxan ñaʼtan chuquiyes tiʼ sujmlel jiñi tijicñʌyel i bajcheʼ an wiñicob xʼixicob (quixtañujob) maʼañic bʌ sʌtbil i chaʼañob anquese an wocol tac. Cheʼ jiñi, mi caj laj qʼuel chuqui yom mi lac mel (chaʼlen) chaʼan maʼañic miʼ jilel, i muʼto i ñumen pʼojlel.

Mach lajalic cheʼ tijicñayonla yicʼot cheʼ tseʼecñayonla. Laʼ laj cʌl ili lajiya. Juntiquil xyʌcʼʌjel (xqʼuixñijel) tajol miʼ wen chaʼlen tseʼñal. Pero cheʼ tsaʼix ñumi i chaʼan, mach tseʼecñayix i miʼ cʼajtesan chaʼan cabʌl i wocol. Jumucʼ jach poj wen tsiʼ yubi i bʌ. Mach jiñic isujm bʌ tijicñʌyel (Pr. 14:13).

Jiñi tijicñʌyel wen yʌñʌlʌch. Jiñʌch muʼ bʌ la cubin ti lac pusicʼal cheʼ an chuqui an lac chaʼan o an chuqui wen bʌ woli (yʌquel) lac pijtan. Yom i yʌl chaʼan tijicñayonla anquese wen woli lac ñusan o maʼañic (1 Ts. 1:6). Tajol juntiquil quixtañu mach weñic bajcheʼ woliʼ ñusan, pero maʼañic miʼ sʌt i tijicñʌyel. Jumpʼejl ejemplo, jiñi apóstolob tsaʼ jajtsʼiyob chaʼan tiʼ chaʼleyob tʼan tiʼ tojlel Cristo, pero jiñi Biblia miʼ yʌl chaʼan «cheʼ bʌ tsaʼix loqʼuiyob tiʼ tojlel añoʼ bʌ i yeʼtel, tijicñayob jax i pusicʼal, come Dios tsiʼ yʌqʼueyob i xucʼtilel i pusicʼal chaʼan miʼ ñusañob i tsʼaʼlentel tiʼ cʼabaʼ Jesús» (Hch. 5:41).Tiʼ sujm, mach jiñic tijicñayob chaʼan tsaʼ jajtsʼiyob, chaʼañʌch xucʼul tsaʼ ajñiyob ti Dios.

Maʼañic majch toj tijicñayix miʼ yilan pañimil (chʼocʼan) o cheʼ jach miʼ waʼ tajeʼ. ¿Chucoch? Come jiñi isujm bʌ tijicñʌyel jiñʌch i wut muʼ bʌ i yʌcʼ jiñi chʼujul bʌ i yespíritu Dios. Ili espíritu miʼ coltañonla lac taj ‹tsijiʼ bʌ lac pusicʼal›, i yaʼʌch ochem jiñi tijicñʌyel (Ef. 4:24; Gá. 5:22, TNM). I cheʼ an lac tijicñʌyel, miʼ coltañonla chaʼan wen jach mi lac ñusan lac wocol tac.

Cheʼ bʌ Jehová tsiʼ mele (pʌtʌ) ili Lum, tsiʼ mulaj chaʼan luʼ wen miʼ yajñel, mach chaʼañic miʼ yujtel jiñi mach bʌ weñic. Melelʌch, jiñi quixtañujob ili ora miʼ melob mach bʌ weñic, pero Jehová maʼan sʌtbil i chaʼan i tijicñʌyel. Jiñi i Tʼan Dios miʼ yʌl: «An pʼʌtʌlel yicʼot tijicñʌyel yaʼ baqui chumul» (1 Cr. 16:27, TNM). Cheʼ miʼ qʼuel chaʼan jiñi i wiñicob miʼ melob chuqui wen, tijicña miʼ yubin (Pr. 27:11).

¿Bajcheʼ miʼ mejlel lac lajiben i melbal Jehová? Jiñʌch cheʼ maʼañic mi laj cʌlʌx pensalin chuqui mach weñic miʼ loqʼuel. Mach yomic mi lac sʌt lac tijicñʌyel, laʼ laj qʼuel ti ñuc am bʌ lac chaʼan waʼli  i laʼ lac pijtan chaʼan miʼ tojʼan jiñi mach bʌ weñic miʼ loqʼuel. *

Yaʼ ti Biblia, mi lac taj cabʌl ejemplo chaʼan i wiñicob Dios maʼañic bʌ tiʼ sʌtʌyob i tijicñʌyel ti jiñi tsʌts tac bʌ wocol. Juntiquil jiñʌch Abrahán. Tsiʼ ñusa wocol tac tiʼ caj yambʌ quixtañujob yicʼot yan tac bʌ tsaʼ bʌ i yʌcʼʌ ti wocol i cuxtʌlel (Gn. 12:10-20; 14:8-16; 16:4, 5; 20:1-18; 21:8, 9). Pero maʼañic tsiʼ wis sʌtʌ i tijicñʌyel. ¿Chucoch? Come tiʼ pejtelel ora tsiʼ yʌcʼʌ i ñaʼtʌbal tiʼ pijtaya chaʼan miʼ chumtʌl ti jiñi tsijiʼ bʌ pañimil (mulawil) muʼ bʌ caj i yuman jiñi Mesías (Gn. 22:15-18; He. 11:10). Jesús tsiʼ yʌlʌ: «Tijicña laʼ tat Abraham [Abrahán] cheʼ bʌ tsiʼ ñaʼta j qʼuiñilel ti pañimil. Abraham tsiʼ chʼʌmbe isujm. Tijicña tsiʼ yubi» (Jn. 8:56). Joñonla miʼ mejlel lac lajiben i melbal Abrahán cheʼ mi lac wen ñaʼtan yicʼot lac tijicñʌyel pejtelel jiñi wen tac bʌ mi caj lac taj ti talto bʌ qʼuin (Ro. 8:21).

Lajal bajcheʼ Abrahán, jiñi apóstol Pablo yicʼot Silas tsiʼ yʌcʼʌyob i ñaʼtʌbal ti albil bʌ i chaʼan Dios. Come wen pʼʌtʌlobʌch i ñopoñel (chʼujbiya), maʼañic tiʼ sʌtʌyob i tijicñʌyel cheʼ añob ti tsʌts bʌ wocol. Ti jumpʼejl bʌ qʼuin, tsaʼ wen jajtsʼiyob ti teʼ i tsaʼ otsʌntiyob ti cárcel. Jiñi Biblia miʼ yʌl chaʼan cheʼ «ti ojlil acʼʌlel woliʼ pejcañob Dios Pablo yicʼot Silas. Woliʼ cʼʌyiñob Dios» (Hch. 16:23-25). Mach cojach tsiʼ tajayob i pʼʌtʌlel tiʼ pijtaya, tijicña tsiʼ yubiyob i bʌ come woliʼ ñusañob wocol tiʼ caj Cristo. Mi la com lac lajibeñob i melbal, yom mi lac chʌn ñaʼtʌben i wenlel muʼ bʌ lac taj cheʼ mi lac melben i yeʼtel Dios yicʼot lac ñopoñel (Fil. 1:12-14).

Ili ora jaʼel cabʌl wem bʌ ejemplo tiʼ tojlel hermanojob chʌn tijicñayoʼ bʌ anquese an wocol tac. Jumpʼejl ejemplo, cheʼ ti noviembre i chaʼan 2013, jiñi tsʌts bʌ icʼ jaʼal i cʼabaʼ Haiyan tiʼ jisʌbe i yotot ñumen ti mil familia Testigojoʼ bʌ yaʼ ti Filipinas. Jiñʌch tsaʼ bʌ ujti tiʼ tojlel jiñi hermano George, chumul bʌ ti Tacloban. Tsiʼ yʌlʌ: «Anquese wocolʌch, tijicñayobʌch jiñi hermanojob. Maʼañic mic taj bajcheʼ yom mi cʌl bajcheʼ cʼamel lon c tijicñʌyel». Cheʼ mi lac wen ñaʼtan tiʼ pejtelel melbil bʌ i chaʼan Jehová ti lac tojlel i mi la cʌqʼuen wocolix i yʌlʌ, maʼañic mi lac sʌt lac tijicñʌyel anquese an wocol tac. ¿Chuqui tac yambʌ aqʼuebil i chaʼañonla chaʼan tijicñayonla?

Ñuc bʌ i sujmlel cheʼ yom tijicñayonla jin cheʼ lʌcʼʌl añonla la quicʼot Jehová. Laj cʌñʌ jiñi Yumʌl bʌ ti panchan yicʼot pañimil. Jiñʌch lac Tat, lac Dios yicʼot la Camigo (Sal. 71:17, 18).

Yambʌ chucoch yom mi la cubin lac tijicñʌyel jiñʌch cheʼ cuxulonla i miʼ mejlel lac ñusan lac bʌ ti wen (Ec. 3:12, 13). Cheʼ jaʼel, la cujil chuqui yom bʌ i mel Jehová yicʼot chuqui yom ti lac tojlel, come jiñʌch tsaʼ bʌ i lʌcʼtesayonla baʼan (Col. 1:9, 10). Cheʼ bajcheʼ jiñi, tsaʼ cʼoti lac tajben i sujmlel laj cuxtʌlel i wen la cujilix chuqui la com lac taj. Pero yonlel quixtañujob maxto i tajbeyob i sujmlel i cuxtʌlel. Pablo tiʼ tsictesa iliyi cheʼ bʌ tsiʼ yʌlʌ: «‹Jini mach bʌ qʼuelbilic tiʼ wut winicob, jini mach bʌ ubibilic tiʼ chiquin winicob, jini mach bʌ anic tsiʼ ñaʼtayob winicob tiʼ pusicʼal, jiñʌch tsaʼ bʌ i chajpa Dios chaʼan miʼ yʌqʼueñob jini muʼ bʌ i cʼuxbiñob Dios›. Dios tsiʼ laj tsictesʌbeyonla tiʼ pʼʌtʌlel jini Espíritu» (1 Co. 2:9, 10). Cheʼ mi lac chʼʌmben isujm muʼ bʌ i mulan Dios yicʼot ñaʼtʌbil bʌ i chaʼan i mel, jiñʌch yambʌ chucoch yom tijicñayonla.

Laʼ laj qʼuel chuqui tac yambʌ melbil i chaʼan Jehová tiʼ tojlel i tejclum. Tsiʼ yʌcʼʌ i cʼʌjñibal bʌ chaʼan mi lac taj i ñusʌntel lac mul (1 Jn. 2:12). Cheʼ jaʼel, chaʼan i pʼuntaya an i yʌqʼueñonla jiñi pijtaya chaʼan mi lac chumtʌl ti jumpʼejl tsijiʼ bʌ pañimil wen lʌcʼʌlix bʌ (Ro. 12:12). Pero ili ora, miʼ yʌqʼueñonla jumpʼejl utsʼatax bʌ i tejclum baʼ mi lac mejlel lac chʼujutesan (Sal. 133:1). Cheʼ jaʼel, jiñi Biblia miʼ subeñonla chaʼan Jehová woliʼ cʌntan i tejclum tiʼ contra Satanás yicʼot i xibajob (Sal. 91:11). Mi caj lac ñumen ubin lac tijicñʌyel cheʼ mi lac wen ñaʼtan pejtelel ili i bendición tac Dios (Fil. 4:4).

¿Mejl ba la cʌcʼ ti colel jiñi lac tijicñʌyel? Jesús tsiʼ yʌlʌ: «Jini tʼan tsaʼ c subeyetla chaʼan miʼ yajñel ti laʼ pusicʼal i tijicñʌyel c pusicʼal, chaʼan miʼ tsʼʌctiyel i tijicñʌyel laʼ pusicʼal» (Jn. 15:11). Ili tʼan tac miʼ pʌsbeñonla chaʼan mucʼʌch lac mejlel lac ñumen ubin lac tijicñʌyel. Jiñi tijicñʌyel lajalʌch bajcheʼ cʼajc. Mi la com chaʼan jiñi cʼajc mi chʌn lejmel, yom mi lac bej otsʌben i siʼil. Lajalʌch jaʼel, mi la com lac ñumen taj lac tijicñʌyel, yom mi lac sʌclʌben i yespíritu Dios. Jin chaʼan, yom mi lac chʌn cʼajtiben i yespíritu Jehová yicʼot mi lac wen ñaʼtan muʼ bʌ i yʌl jiñi Biblia, tsaʼ bʌ tsʼijbunti tiʼ coltaya jiñi chʼujul bʌ espíritu (Sal. 1:1, 2; Lc. 11:13).

Cheʼ mi la cʌcʼ lac ñaʼtʌbal tiʼ melol muʼ bʌ i mulan Jehová, jiñʌch yambʌ bajcheʼ miʼ mejlel lac ñumen taj lac tijicñʌyel (Sal. 35:27; 112:1). ¿Chucoch mi la cʌl iliyi? Come Jehová tsiʼ meleyonla chaʼan mi lac mel chuqui yom. Jiñi Biblia miʼ subeñonla: «Bʌcʼñan Dios, jacʼben i mandar, come jiñʌch muʼ bʌ i wersa cʼajtibeñet» (Ec. 12:13). Jin chaʼan, mi la cʌl chaʼan mi lac taj lac tijicñʌyel cheʼ mi lac melben i yeʼtel Jehová. *

Cheʼ tijicñayonla, mach cojic jach wen mi caj la cubin lac bʌ, mucʼʌch caj lac taj yan tac bʌ i wenlel. Jumpʼejl ejemplo, cheʼ tijicña mi lac melben i yeʼtel Jehová anquese an wocol tac, mucʼʌch lac tijicñesan (Dt. 16:15; 1 Ts. 5:16-18). Jiñi isujm bʌ tijicñʌyel miʼ ñijcañonla lac ñumen acʼ lac bʌ tiʼ melol jiñi eʼtel tac chaʼan bʌ i Yumʌntel Dios i maʼañic mi lac sʌclan cabʌl chubʌʼañʌl (Mt. 13:44). Jiñi wenlel tac muʼ bʌ lac taj chaʼan pejtelel muʼ bʌ lac mel, mi caj i ñumen aqʼueñonla lac tijicñʌyel, wen mi la cubin lac bʌ yicʼot mi la cʌqʼuen i tijicñʌyel yambʌlob (Hch. 20:35; Fil. 1:3-5).

Cheʼ jaʼel, mi mucʼʌch lac ñumen acʼ ti pʼojlel lac tijicñʌyel, miʼ mejlel i coltañonla chaʼan laj cʼocʼlel. Jiñi Biblia miʼ yʌl: «I tijicñʌyel lac pusicʼal i wentajʌch wen bʌ tsʼac» (Pr. 17:22). Juntiquil doctor yaʼ ti Universidad am bʌ ti Nebraska (Estados Unidos) lajal chuqui tsiʼ yʌlʌ cheʼ bajcheʼ an yaʼ ti Biblia. Tsiʼ yʌlʌ: «Mi tijicña chumulet ili ora, tajol cʼocʼ mi caj a ñusan ti talto bʌ qʼuin».

Cheʼ bajcheʼ tsaʼix laj qʼuele, anquese wen wocol jax bajcheʼ chumulonla, mucʼʌch i mejlel lac taj isujm bʌ tijicñʌyel. Pero i cʼʌjñibalʌch mi lac chʌn mel oración chaʼan mi lac taj jiñi chʼujul bʌ espíritu, mi lac pejcan jiñi Biblia yicʼot mi lac wen ñaʼtan. Cheʼ jaʼel, mi la com lac ñumen taj lac tijicñʌyel, yom mi lac wen ñaʼtan jiñi bendición tac tajbil bʌ lac chaʼan, mi lac lajiben i ñopoñel jiñi yambʌ i wiñicob Dios yicʼot mi lac chaʼlen wersa lac mel chuqui yom Jehová. Cheʼ bajcheʼ jiñi, miʼ mejlel la cubin bajcheʼ miʼ tsʼʌctiyel ti lac tojlel jiñi Salmo 64:10: «Tijicña mi caj i yubiñob jini tojoʼ bʌ muʼ bʌ i ñopob lac yum».