1. ¿Bajcheʼ cʼamel miʼ qʼuel ti ñuc laj cuxtʌlel Jehová?

 ÑAʼTANCU chaʼan juntiquil a wamigo miʼ majtan aqʼueñet jumpʼejl cuadro ñoxix bʌ wen lets bʌ i tojol. Jumpʼejlʌch cuadro wen lets bʌ i tojol anquese ñoxix, añix i manchajlel, tsijlemtiquix yicʼot tsaʼix tsʼitaʼ loqʼui i pinturajlel. ¿Mach ba muqʼuic caj a wen qʼuel ti ñuc yicʼot mi caj a cʌntan? Cheʼ jaʼel, Jehová an chuqui tsiʼ yʌqʼueyonla wen ñuc bʌ i cʼʌjñibal: Jiñʌch laj cuxtʌlel. Miʼ wen qʼuel ti ñuc come tsaʼto i yʌcʼʌ i Yalobil ti laj caj (Juan 3:16).

2. Cheʼ bajcheʼ miʼ pʌs 2 Corintios 7:1, ¿chuqui miʼ pijtan Jehová ti lac tojlel?

² Jehová jiñʌch muʼ bʌ i yʌqʼueñonla laj cuxtʌlel (Sal. 36:9). Jiñʌch tsaʼ bʌ i taja ti tʼan jiñi apóstol Pablo cheʼ bʌ tsiʼ yʌlʌ: «Tiʼ tojlelʌch an laj cuxtʌlel, mi lac ñijcan lac bʌ yicʼot wʌʼañonla» (Hech. 17:25, 28). Jin chaʼan, miʼ mejlel la cʌl chaʼan jiñi laj cuxtʌlel jumpʼejlʌch lac majtan tilem bʌ ti Dios. Miʼ yʌqʼueñonla chuqui i cʼʌjñibal lac chaʼan chaʼan cuxulonla (Hech. 14:15-17). Pero Jehová maʼañic mi caj i mel milagro tac chaʼan maʼañic mi lac chʌmel (sajtel). Miʼ pijtan chaʼan mi lac chaʼlen wersa laj cʌntan lac bʌ chaʼan lʌcʼʌl añonla tiʼ tojlel yicʼot chaʼan cʼocʼonla (pejcan 2 Corintios 7:1). ¿Chucoch yom mi laj cʌntan jiñi laj cuxtʌlel yicʼot chaʼan cʼocʼonla, i bajcheʼ miʼ mejlel lac mel (chaʼlen)?

3. ¿Chucoch la com laj cʌntan lac bʌ?

³ La com la cʌqʼuen Jehová jiñi ñumen wem bʌ ti lac tojlel, jin chaʼan la com laj cʌntan lac bʌ (Mar. 12:30). Maʼañic mi lac mel pejtelel chuqui miʼ mejlel i cʼamʼesañonla come la com la cʌcʼ lac «bʌcʼtal bajcheʼ cuxul bʌ majtañʌl, chʼujul bʌ yicʼot muʼ bʌ i mulan Dios» (Rom. 12:1). I sujmʌch chaʼan wersa mi  caj laj cʼamʼan anquese mi lac wen cʌntan lac bʌ. Pero mi lac chaʼlen wersa laj cʌntan lac bʌ come la com lac pʌsben Jehová chaʼan mi laj qʼuel ti ñuc jiñi laj cuxtʌlel tsaʼ bʌ i yʌqʼueyonla.

4. ¿Chuqui yom i mel tsiʼ yʌlʌ jiñi rey David?

⁴ Jiñi rey David tsiʼ wen qʼuele ti ñuc jiñi i cuxtʌlel tsaʼ bʌ i yʌqʼue Dios. Jin chaʼan tiʼ tsʼijbu: «Mi tsaʼ chʌmiyon, mi tsaʼ ocʼmi c bʌcʼtal, ¿chuqui to j cʼʌjñibal? ¿Mejl ba i sub a ñuclel jini tsʼubejn?» (Sal. 30:9). Tajol tsʼitaʼ jax yom chaʼan miʼ chʌmel cheʼ bʌ tiʼ tsʼijbu iliyi. Pero mach yomic chʌmel tsiʼ yʌlʌ chaʼan miʼ mejlel i bej aqʼuen i ñuclel Jehová. Tiʼ sujm jiñʌch la com bʌ jaʼel ti lac pejtelel.

5. ¿Chuqui miʼ mejlel lac mel anquese wen ñoxoñixla o cʼamonla?

⁵ Mi wen ñoxoñixla o cʼamonla, tajol maʼañix miʼ mejlel lac mel jiñi muʼ tac bʌ lac mel ti ñaxan, i tajol jiñi miʼ yʌqʼueñonla la cubin lac chʼijyemlel. Pero mach yomic i yʌl chaʼan yom mi laj cʌy lac cʌntan lac bʌ. ¿Chucoch? Come muʼto i mejlel lac bej aqʼuen i ñuclel Jehová cheʼ bajcheʼ tsiʼ mele jiñi rey David anquese wen ñoxoñixla o cʼamonla. ¡I tijicña mi la cubin cheʼ bʌ la cujil chaʼan jiñi lac Dios miʼ cʼuxbiñonla yicʼot miʼ qʼuelonla ti ñuc anquese xmulilonla! (Mat. 10:29-31). Tsiʼ yʌcʼʌ i tʼan chaʼan mi caj i chaʼ aqʼueñonla laj cuxtʌlel mi tsaʼ chʌmiyonla come i wentajonla (Job 14:14, 15). Cheʼ bajcheʼ mi laj qʼuel, mi cuxulontola, weñʌch cheʼ mi laj cʌntan laj cuxtʌlel.

6. ¿Chuqui miʼ pijtan Jehová ti lac tojlel cheʼ bʌ mi caj lac ñaʼtan chuqui mi caj laj cʼux lac jap yicʼot bajcheʼ cʼamel?

⁶ Jiñi Biblia mach jumpʼejlic libro chaʼan bʌ tsʼac mi muqʼuicto i yʌl chuqui tac yom mi laj cʼux, pero mucʼʌch i subeñonla bajcheʼ yilal miʼ qʼuel Jehová pejtelel iliyi. Jumpʼejl ejemplo, miʼ yʌqʼueñonla ili ticʼojel: «Cʌntan a bʌ ame a wubin wocol» (Ec. 11:10). Junchajp muʼ bʌ i mejlel i cʼamʼesañonla i jiñi Biblia miʼ yʌl chaʼan mach weñic jaʼel jiñʌch jiñi yʌcʼʌjel yicʼot jiñi woʼlel o cheʼ bʌ maʼañic mi lac ticʼ bajcheʼ cʼamel chuqui mi laj cʼux (Pr. 23:20). Jin chaʼan, Jehová miʼ pijtan chaʼan la cujil ticʼol lac bʌ cheʼ bʌ mi caj lac ñaʼtan chuqui mi caj laj cʼux yicʼot bajcheʼ cʼamel (1 Cor. 6:12; 9:25).

7. ¿Bajcheʼ miʼ mejlel lac jacʼ jiñi principio am bʌ ti Proverbios 2:11, (TNM) cheʼ bʌ mi lac ñaʼtan bajcheʼ mi caj laj cʌntan lac bʌ?

⁷ Mi la com lac mel muʼ bʌ i pʌs chaʼan mucʼʌch laj qʼuel ti ñuc jiñi laj cuxtʌlel tsaʼ bʌ i yʌqʼueyonla Dios, yom mi laj cʼʌn lac pensar (Sal. 119:99, 100; pejcan Proverbios 2:11, TNM). b Jumpʼejl ejemplo, yomʌch mi laj cʼʌn lac ñaʼtʌbal cheʼ bʌ mi caj lac ñaʼtan chuqui mi caj laj cʼux. Mi an chuqui mi lac wen mulan laj cʼux pero la cujil chaʼan miʼ ticʼlañonla, ñumen wen cheʼ bʌ maʼañic mi laj cʼux. Jiñi lac jol mi caj i subeñonla chaʼan yom wen mi lac wʌyel, mi lac chʌcʌ mel ejercicio, sʌconla joñonla yicʼot jiñi la cotot.

8. Cheʼ bajcheʼ miʼ yʌl jiñi Biblia, ¿bajcheʼ cʼamel miʼ qʼuel ti ñuc Jehová cheʼ bʌ añʌch chuqui mi lac mel chaʼan maʼañic mi lac taj wocol tac?

⁸ Jehová tsiʼ yʌqʼue mandar tac jiñi israelitajob chaʼan maʼañic miʼ tajob wocol tiʼ yotot yicʼot tiʼ yeʼtel (troñel) (Éx. 21:28, 29; Dt. 22:8). Mi juntiquil lac piʼʌl miʼ taj i tsʌnsan yambʌ anquese mach yilolic i chaʼan, mucʼʌch i tajben i wocolel jaʼel (Dt. 19:4, 5). I jiñi Mandar miʼ yʌl chaʼan yom miʼ toj i mul jiñi muʼ bʌ i tsʌnsan juntiquil alʌl maxto bʌ i yila pañimil (chʼocʼa) anquese mach yilolic i chaʼan (Éx.  21:22-25). Tsiquil miʼ pʌs jiñi Biblia chaʼan Jehová yom chaʼan añʌch chuqui mi lac mel chaʼan maʼañic mi lac taj wocol tac.

9. ¿Chuqui tac miʼ mejlel lac mel chaʼan maʼañic mi lac taj wocol? (Qʼuele jaʼel jiñi foto tac).

⁹ Añʌch chuqui tac mi lac mel chaʼan maʼañic mi lac taj wocol ti la cotot yicʼot ti la queʼtel chaʼan mi lac pʌs chaʼan mucʼʌch laj qʼuel ti ñuc jiñi laj cuxtʌlel tsaʼ bʌ i yʌqʼueyonla Dios. Jumpʼejl ejemplo, jiñi jay tac bʌ i yej, tsʼac tac o yan tac bʌ muʼ bʌ i mejlel i ticʼlañonla, maʼañic mi lac cʼajpan acʼ baqui miʼ mejlel i tajob jiñi alʌlob. I mi yom mi lac choc, mach baʼic jach mi lac choc. Cheʼ jaʼel, mi laj cʌntan lac bʌ ti jiñi cʼajc, ti chuqui tac ticʌw bʌ yicʼot jiñi herramienta tac muʼ bʌ laj cʼʌn ti eʼtel, i mach cheʼ jach mi laj cʌy. Cheʼ jaʼel, maʼañic mi lac ñijcan carro cheʼ bʌ japʌl lac chaʼan lembal, jumpʼejl tsʼac muʼ bʌ i ticʼlañonla o mach wen wʌyemoñicla, mi muqʼuicto laj cʼʌn lac celular.

10. ¿Chuqui miʼ mejlel lac mel cheʼ bʌ maxto tejchi yicʼot cheʼ bʌ wolix i ñumel jumpʼejl wocol baqui mi lac mejlel ti chʌmel?

¹⁰ I sujmʌch chaʼan an wocol tac maʼañic bʌ  miʼ mejlel lac mʌctan bajcheʼ jiñi icʼ jaʼal o yan tac bʌ, jiñi epidemia yicʼot jiñi jontolil. Pero añʌch chuqui miʼ mejlel lac mel chaʼan maʼañic chuqui mi lac chaʼlen, mi lac jacʼ cʌytʌl ti la cotot, mi lac jacʼ loqʼuel cheʼ bʌ mi lac subentel yicʼot yan tac bʌ muʼ bʌ i subeñonla jiñi añoʼ bʌ i yeʼtel (Rom. 13:1, 5-7). Cheʼ jaʼel, an wocol tac baqui mucʼʌch i mejlel lac wʌn chajpan lac bʌ, jin chaʼan weñʌch cheʼ bʌ mi lac jacʼ muʼ bʌ i subeñonla jiñi añoʼ bʌ i yeʼtel chaʼan chajpʌbilonla. Jumpʼejl ejemplo, tajol yom mi lac lot la caʼal yicʼot i bʌl lac ñʌcʼ maʼañic bʌ miʼ yʌsiyel yicʼot jumpʼejl botiquín chaʼan primeros auxilios.

11. ¿Chuqui yom mi lac mel mi an jumpʼejl cʼamʌjel?

¹¹ ¿I chuqui yom mi lac mel mi an jumpʼejl cʼamʌjel yaʼ baqui chumulonla? Yomʌch mi lac jacʼ muʼ bʌ i yʌlob jiñi añoʼ bʌ i yeʼtel, mi lac poc laj cʼʌb, maʼañic mi lac wen lʌcʼtesan lac bʌ tiʼ tojlel yambʌyob, mi laj cʼʌn cubreboca yicʼot mi la cajñel ti cuarentena. Mi mucʼʌch lac jacʼ pejtelel iliyi, mi caj lac pʌs chaʼan mucʼʌch laj qʼuel ti ñuc jiñi laj cuxtʌlel tsaʼ bʌ i yʌqʼueyonla Dios.

12. ¿Bajcheʼ miʼ coltañonla Proverbios 14:15 chaʼan maʼañic mi lac luʼ ñop chuqui miʼ yʌjlel?

¹² Cheʼ bʌ miʼ yujtel jumpʼejl wocol, jiñi la camigojob, laj cʌñʌyoʼ bʌ o jiñi noticia tac mach tsʼʌcʌlic chuqui tac miʼ yʌlob o mach i sujmic. Mach yomic mi lac ñop pejtelel chuqui mi la cubin, yom bʌ mi lac ñop jiñʌch jiñi muʼ bʌ i yʌlob jiñi yumʌlob o jiñi doctorob i sujm bʌ chuqui miʼ yʌlob (pejcan Proverbios 14:15). Cheʼ jaʼel, yomʌch mi lac jacʼ muʼ bʌ i yʌl jiñi Junmojt muʼ bʌ i pʌsob bij yicʼot jiñi sucursal tac chaʼan jiñi tempa bʌ yicʼot jiñi subtʼan come miʼ chaʼleñob wersa chaʼan i sujm chuqui miʼ subeñoñobla (Heb. 13:17). Cheʼ bʌ mucʼʌch lac jacʼ muʼ bʌ lac subentel, mi laj cʌntan lac bʌ yicʼot mi laj cʌntan yañoʼ bʌ, i tajol ñumen wen chuqui mi caj i yʌjlel tiʼ tojlel jiñi i testigojob Jehová (1 Ped. 2:12).

13. ¿Bajcheʼ mi lac pʌs chaʼan mi laj qʼuel ti ñuc jiñi laj cuxtʌlel cheʼ bʌ mi lac taj wocol chaʼan bʌ chʼichʼ?

¹³ Jiñi i testigojonbʌla Jehová mi lac wen cʌjñel come mi laj qʼuel ti chʼujul jiñi chʼichʼ. Mi lac jacʼ muʼ bʌ i yʌl Jehová chaʼan jiñi chʼichʼ cheʼ bʌ maʼañic mi lac jacʼ lac chʼʌm anquese mi lac subentel ti doctor (Hech. 15:28, 29). Pero jiñi mach yomic i yʌl chaʼan la com chʌmel. Mi lac wen qʼuel ti ñuc jiñi laj cuxtʌlel tsaʼ bʌ i yʌqʼueyonla Dios. Jin chaʼan, mi lac sʌclan wem bʌ doctorob mach bʌ añic miʼ cʼʌñob chʼichʼ chaʼan miʼ tsʼʌcañonla.

14. ¿Chuqui miʼ mejlel lac mel chaʼan maʼañic mi lac taj jumpʼejl wocol baqui mi lac melbentel jumpʼejl operación?

¹⁴ Mi mucʼʌch lac jacʼ jiñi ticʼojel tac tsaʼ bʌ ajli ti ili estudio tajol mach cʼʌñʌlic mi lac melbentel jumpʼejl operación o mi la cʌqʼuentel yambʌ tratamiento. Pero ¿ixcu mi yom mi lac melbentel jumpʼejl operación? Mi tsaʼʌch laj cʌnta lac bʌ ti ñaxan mach jalic mi caj lac lajmel. Cheʼ jaʼel, mi mucʼʌch lac chaʼlen wersa chaʼan mi laj cʌntan chuqui tac an ti la cotot yicʼot yaʼ baqui mi lac chaʼlen eʼtel chaʼan maʼañic mi lac taj wocol yicʼot chaʼan mi lac jacʼ muʼ bʌ i yʌl jiñi añoʼ bʌ i yeʼtel, tajol maʼañic mi caj lac taj jumpʼejl accidente i maʼañic mi lac melbentel jumpʼejl operación.

15. a) ¿Chucoch wen ñuc i cʼʌjñibal mi lac chʌn cuch yicʼot mi lac tsijibtesan jiñi lac jun baqui mi la cʌl chaʼan maʼañic mi lac chʼʌm chʼichʼ? (Qʼuele jaʼel jiñi foto tac). b) Cheʼ bajcheʼ miʼ pʌs jiñi video, ¿chuqui miʼ mejlel lac mel chaʼan weñʌch chuqui mi lac yajcan chaʼan bʌ jiñi chʼichʼ?

¹⁵ Yambʌ bajcheʼ mi lac pʌs chaʼan mucʼʌch laj qʼuel ti ñuc jiñi laj cuxtʌlel jiñʌch cheʼ bʌ mi lac butʼ yicʼot mi laj cuch tiʼ pejtelel ora jiñi lac  jun baqui mi la cʌl chaʼan mach la comic chʼichʼ. c Iliyi miʼ coltañonla la cʌl jiñi tsaʼix bʌ lac ñaʼta chaʼan jiñi chʼichʼ yicʼot yambʌ tratamiento tac. ¿Tsijibʌch ba jiñi a chaʼan? Mach a putun pijtan chaʼan maʼ butʼ o chaʼan maʼ tsijibtesan. Mi mucʼʌch lac wʌn tsʼijbun chuqui jiñi la com bʌ miʼ mejlel, maʼañic mi caj lac sʌt tiempo lac tsictesʌben jiñi doctorob i ti ora mi caj i qʼueloñobla. Cheʼ jaʼel, mi caj i coltañonla chaʼan maʼañic mi la cʌqʼuentel tsʼac muʼ bʌ i mejlel i ticʼlañonla. d

16. ¿Chuqui miʼ mejlel a mel mi mach a wujilic bajcheʼ yom maʼ butʼ jiñi a tarjeta DPA?

¹⁶ Ti lac pejtelel miʼ mejlel lac taj accidente o mi laj cʼamʼan mach yʌlʌyic mi maxto ñoxoñicla o mach cʼamoñicla (Ec. 9:11). Jin chaʼan, weñʌch cheʼ bʌ tiʼ pejtelel ora an a chaʼan jiñi a DPA. Pero ¿chuqui miʼ mejlel a mel mi mach a wujilic bajcheʼ yom maʼ butʼ? Mach a pensarin. Jiñi ancianojob ti a congregación yujilob bajcheʼ miʼ mejlel i coltañetob. Pero maʼañobic tiʼ wenta miʼ subeñetob chuqui yom maʼ mel come añix ti a wenta jiñi (Gál. 6:4, 5). Pero miʼ mejlel i coltañetob a ñaʼtan chuqui miʼ mejlel a mel yicʼot chaʼan maʼ tsʼijbun.

17. ¿Bajcheʼ miʼ mejlel lac pʌs chaʼan maʼañic mi lac tsʌtsʼesan lac bʌ cheʼ bʌ mi la cʌl bajcheʼ mi caj laj cʌntan lac bʌ?

¹⁷ Cabʌl chuqui tac mi lac mel yaʼ bʌ cʌyʌl ti chuqui miʼ subeñonla jiñi laj conciencia cʌntesʌbil bʌ ti Biblia (Hech. 24:16; 1 Tim. 3:9). Cheʼ bʌ woli (choncol) lac ñaʼtan chuqui mi lac mel yicʼot mi lac taj ti tʼan la quicʼot yambʌlob, yom mi laj cʼajtesan muʼ bʌ i yʌl Filipenses 4:5: «Laʼ i cʌñob tiʼ pejtelelob chaʼan jatetla maʼañic mi laʼ tsʌtsʼesan laʼ bʌ ti laʼ tʼan». Miʼ mejlel lac pʌs iliyi cheʼ bʌ mach ñumeñic ti pʼis bajcheʼ mi laj cʌntan lac bʌ i maʼañic mi lac xicʼob yañoʼ bʌ chaʼan cheʼ miʼ ñaʼtañob bajcheʼ joñonla. Mi laj cʼuxbiñob yicʼot mi laj qʼuelob ti ñuc la quermañujob anquese mach lajalic chuqui mi lac yajcan lac mel (Rom. 14:10-12).

18. ¿Bajcheʼ miʼ mejlel lac pʌs chaʼan mucʼʌch laj qʼuel ti ñuc jiñi laj cuxtʌlel?

¹⁸ Cheʼ bajcheʼ tsaʼ la cʌlʌ tiʼ tejchibal, Jehová jiñʌch muʼ bʌ i yʌqʼueñonla laj cuxtʌlel. Miʼ mejlel lac pʌsben chaʼan mucʼʌch laj qʼuel ti ñuc cheʼ bʌ mi laj cʌntan jiñi laj cuxtʌlel tsaʼ bʌ i yʌqʼueyonla i mi la cʌqʼuen ñumen wem bʌ ti lac tojlel (Apoc. 4:11). Ili ora mi laj cʼamʼan yicʼot an wocol tac, pero mach jiñic yom bʌ Jehová chaʼañonla ti ñaxan. Tiʼ coltaya, tsʼitaʼ jax yom chaʼan mi lac chumtʌl ti tsijiʼ bʌ pañimil (mulawil) baqui maʼañix miʼ cajel cʼamʌjel yicʼot chʌmel (Apoc. 21:4). Pero ili ora laʼ laj qʼuel ti ñuc jiñi laj cuxtʌlel i laʼ laj cʼʌn chaʼan mi lac melben i yeʼtel jiñi tsaʼ bʌ i yʌqʼueyonla: Jiñi lac Tat Jehová.