1. ¿Chucoch maʼ qʼuel ti ñuc jiñi Biblia?

 ¡MI LAC wen qʼuel ti ñuc cheʼ Jehová tsiʼ yʌqʼueyonla jiñi Biblia! Yaʼʌch baqui miʼ yʌqʼueñonla wem bʌ ticʼojel tac muʼ bʌ i coltañonla lac ñaʼtan bajcheʼ miʼ mejlel lac ñusan jiñi lac wocol tac. Cheʼ jaʼel, miʼ yʌqʼueñonla jumpʼejl utsʼatax bʌ lac pijtaya. I jiñi ñumen ñuc bʌ i cʼʌjñibal jiñʌch cheʼ miʼ coltañonla laj cʌn bajcheʼ yilal. Miʼ wen ñijcan lac pusicʼal cheʼ mi lac wen ñaʼtan jiñi utsʼatax bʌ melbal (chaʼlibal) tac am bʌ i chaʼan Jehová. Jiñi miʼ yʌqʼueñonla lac mulan lac lʌcʼtesan lac bʌ tiʼ tojlel yicʼot chaʼan mi lac sujtel tiʼ yamigo (Sal. 25:14).

2. ¿Chuqui tac melbil i chaʼan Jehová chaʼan miʼ mejlel laj cʌn?

² Jehová yom chaʼan jiñi lac piʼʌlob miʼ cʌñob. Ti wajali, an chuqui tac tsiʼ pʌsʌ, tsiʼ cʼʌñʌ ñajal tac i yicʼotto ángelob chaʼan miʼ mejlel laj cʌn (Nm. 12:6; Hech. 10:3, 4). Machic tsaʼ tsʼijbunti cʌytʌl pejtelel iliyi, maʼañic miʼ mejlel lac chaʼlen ti estudiar. Jin chaʼan, Jehová tiʼ sube chaʼtiqui uxtiquil wiñicob chaʼan miʼ tsʼijbuñob «ti jun» jiñi yom bʌ chaʼan mi lac ñaʼtan (Jer. 30:2). Miʼ mejlel lac ñop chaʼan jiñʌch tsiʼ yʌcʼʌ ti tsʼijbuntel ti wen jiñi información, come tsʼʌcʌlʌch chuqui miʼ mel (chaʼlen) Dios (Sal. 18:30).

3. ¿Chuqui tsiʼ mele Jehová chaʼan bej anto jiñi Biblia cʼʌlʌl ili ora? (Isaías 40:8).

 ³ (Pejcan Isaías 40:8). Jiñi Biblia cabʌlix jab caji i coltan i wiñicob Dios. Pero ¿bajcheʼ ujtem jiñi? Jiñi Biblia wajalix tsaʼ tsʼijbunti i jiñi tsaʼ tac bʌ cʼʌjñi mucʼʌch i yʌsiyel. I maʼañic mi jumpʼejlic jun originalto bʌ. Pero Jehová tsiʼ chʼʌmʌ tiʼ wenta chaʼan miʼ melbentel (pʌtbentel) i copiajlel. Xmulilobʌch jiñi tsaʼ bʌ i melbeyob i copiajlel pero tsaʼʌch i wen qʼueleyob cheʼ bʌ tsiʼ meleyob. Juntiquil experto tsiʼ yʌlʌ tiʼ tojlel jiñi Tsʼijbujel hebreo: «Miʼ mejlel la cʌl chaʼan maʼañic yambʌ libro ñoxix bʌ tsʼʌcʌl bʌ bajcheʼ jiñi Biblia». Anquese xmulilob jiñi tsaʼ bʌ i tsʼijbuyob i yujilʌch asiyel jiñi tsaʼ tac bʌ i cʼʌñʌyob, tsiquil chaʼan jiñi muʼ bʌ lac pejcan jiñʌch i ñaʼtʌbal Jehová.

4. ¿Chuqui mi caj laj qʼuel ti ili estudio?

⁴ «Pejtelel wem bʌ yicʼot toj bʌ majtañʌl» tilem ti Jehová, i jiñi Biblia jumpʼejlʌch wen utsʼatax bʌ majtañʌl aqʼuebil bʌ i chaʼañonla (Sant. 1:17). Jumpʼejl majtañʌl miʼ yʌqʼueñonla laj cʌn bajcheʼ yilal jiñi tsaʼ bʌ i yʌqʼueyonla. Miʼ pʌsbeñonla miʼ cʌñʌyoñʌchla tiʼ sujm yicʼot mi yujil chuqui i cʼʌjñibal lac chaʼan. Cheʼʌch miʼ yujtel yicʼot jiñi Biblia. Cabʌl chuqui mi laj cʌn tiʼ tojlel Jehová cheʼ bʌ mi lac tsajin (wen qʼuel). Mi laj qʼuel chaʼan wen i cʌñʌyoñʌchla yicʼot yujil chuqui i cʼʌjñibal lac chaʼan. Ti ili estudio mi caj laj qʼuel uxpʼejl melbalʌl am bʌ i chaʼan Jehová muʼ bʌ lac taj laj qʼuel yaʼ ti Biblia: Jiñi i ñaʼtʌbal, i melol chuqui toj yicʼot jiñi i cʼuxbiya. Laʼ lac ñaxan al muʼ bʌ i yʌl jiñi Biblia chaʼan jiñi i ñaʼtʌbal Dios.

5. ¿Chuqui junchajp miʼ pʌs chaʼan jiñi Biblia i ñaʼtʌbalʌch Dios?

⁵ Jehová yujil chaʼan i cʼʌjñibal lac chaʼan jiñi i ticʼojel tac. Jin chaʼan, tsiʼ yʌqʼueyonla jiñi Biblia, baqui mi lac tajben i ñaʼtʌbal. Jiñi ticʼojel tac mucʼʌch i wen coltan lac piʼʌlob. Jiñi Biblia miʼ mejlel i qʼuextʌbeñob i cuxtʌlel. Cheʼ bʌ Moisés tiʼ tsʼijbu jiñi ñaxam bʌ libro tac am bʌ ti Biblia, tiʼ sube jiñi israelitajob: «Ili mandar tac mach toʼol tʼanic jach. Laʼ cuxtʌlelʌch» (Dt. 32:47). Jiñi muʼ bʌ i jacʼob muʼ bʌ i yʌl jiñi Tsʼijbujel mi caj i yubiñob i tijicñʌyel yicʼot wen mi caj i yajñelob (Sal. 1:2, 3). Anquese wajalix tsaʼ tsʼijbunti jiñi Biblia, bej añixto i pʼʌtʌlel chaʼan miʼ qʼuextʌben i cuxtʌlel lac piʼʌlob. Jumpʼejl ejemplo, yaʼ ti tema «Jiñi Biblia tsiʼ qʼuextʌbeyob i pensar», am bʌ ti jw.org, mi caj a taj cabʌl experiencia chaʼan tsaʼ bʌ i qʼuextayob i cuxtʌlel cheʼ bʌ tsiʼ jacʼʌyob jiñi ticʼojel tac am bʌ ti Biblia (1 Tes. 2:13).

6. ¿Chucoch mi la cʌl chaʼan maʼañic yambʌ libro bajcheʼ jiñi Biblia?

⁶ Maʼañic yambʌ libro bajcheʼ jiñi Biblia. ¿Chucoch? Come Jehová, jiñi tsaʼ bʌ i yʌcʼʌ ti mejlel Maʼañic i pʼisol i pʼʌtʌlel, cuxul tiʼ pejtelel ora i maʼañic i lajintel i ñaʼtʌbal. An cabʌl libro mucʼʌch bʌ i bej pejcan jiñi lac piʼʌlob anquese tsaʼix chʌmi jiñi tsaʼ bʌ i tsʼijbu. Pero jiñi ticʼojel tac am bʌ yaʼi maʼañix i cʼʌjñibal. Jiñi ticʼojel tac am bʌ yaʼ ti Biblia bej añʌch i cʼʌjñibal, coltʌbil i chaʼan lac piʼʌlob tiʼ pejtelel ora. Cheʼ bʌ mi lac pejcan ili chʼujul bʌ libro i mi lac wen ñaʼtan muʼ bʌ i yʌl, jiñi tsaʼ bʌ i mele miʼ cʼʌn jiñi chʼujul bʌ i yespíritu chaʼan miʼ coltañonla lac jacʼ (Sal. 119:27; Mal. 3:16; Heb. 4:12). Ñaʼtancu, jiñi tsaʼ bʌ i mele jiñi Biblia yomʌch i coltañet tiʼ pejtelel i pusicʼal. ¿Mach ba muqʼuic i coltañet iliyi chaʼan maʼ ñʌmtesan a bʌ a pejcan jiñi Biblia ti jujumpʼejl qʼuin?

7. ¿Bajcheʼ tsiʼ teme i tejclum Dios jiñi Biblia ti wajali?

⁷ An yambʌ muʼ bʌ i pʌs chaʼan i ñaʼtʌbalʌch Dios am bʌ yaʼ ti Biblia, jiñʌch cheʼ miʼ coltan  jiñi i tejclum chaʼan chʌn temel miʼ yajñel. Cheʼ bʌ jiñi israelitajob tsaʼ ochiyob ti jiñi Lum tsaʼ bʌ wʌn subentiyob, mach junlajalic baqui tsaʼ majliyob ti chumtʌl. An tsaʼ bʌ sujtiyob ti xchuc chʌy, ti ganadero yicʼot ti xpacʼob. Jin chaʼan, jiñi israelitajob chumuloʼ bʌ ti yambʌ parte yaʼ ti país ti ora miʼ mejlel i ñajʌtesañob jiñi chumuloʼ bʌ ti yambʌ parte. Pero Jehová tsiʼ chʼʌmʌ tiʼ wenta chaʼan miʼ chʌn tempañob i bʌ chaʼan miʼ ñʌchʼtʌbeñob i Tʼan yicʼot miʼ ñumen cʌñob (Dt. 31:10-13; Neh. 8:2, 8, 18). Ñaʼtancu bajcheʼ yubil miʼ yubin juntiquil israelita cheʼ bʌ miʼ cʼotel ti Jerusalén i miʼ taj i bʌ yicʼot yonlel israelitajob tilemoʼ bʌ ti yan tac bʌ parte chaʼan miʼ chʼujutesañob Jehová. Cheʼ bajcheʼ iliyi, Jehová tsiʼ coltayob chaʼan temel miʼ yajñelob. Ti wiʼil, cheʼ ti ñaxam bʌ siglo, tsaʼ mejli jiñi congregación. Añob wiñicob xʼixicob (quixtañujob) mach bʌ lajalic bajcheʼ yilalob, bajcheʼ chumulob yicʼot jiñi i tʼañob. Pero temel tsiʼ melbeyob i yeʼtel (troñel) Jehová come miʼ cʼuxbiñob jiñi Tsʼijbujel. Jiñi tsaʼto bʌ cajiyob ti ochel yaʼ ti congregación tsaʼ mejli i chʼʌmbeñob i sujm jiñi i Tʼan Dios come jiñi yambʌ xñoptʼañob tiʼ tsictesʌbeyob yicʼot tsiʼ tempayob i bʌ (Hech. 2:42; 8:30, 31).

8. ¿Bajcheʼ woliʼ cʼʌn Jehová jiñi Biblia chaʼan temel miʼ yajñel jiñi i tejclum ili ora?

⁸ Ili ora, Jehová woli (choncol) i bej cʼʌn jiñi Biblia chaʼan miʼ cʌntesan i tejclum yicʼot chaʼan temel miʼ yajñelob. Yaʼʌch chucul pejtelel  jiñi chʼujul bʌ bʌlñʌcʼʌl muʼ bʌ la cʌqʼuentel. Jiñi i sujm bʌ xñoptʼañonla mi la cajñel ti tempa bʌ yicʼot ti colem tempa bʌ baqui mi lac pejcan jiñi Biblia, mi lac tsajin yicʼot mi lac ñumen cʌn muʼ bʌ i yʌl. Tsiquil chaʼan Jehová woli (yʌquel) i cʼʌn jiñi Biblia chaʼan jiñi i wiñicob «comol miʼ chʼujutesañoñob» (Sof. 3:9).

9. ¿Chuqui yom an lac chaʼan chaʼan mi lac chʼʌmben i sujm muʼ bʌ i yʌl jiñi Biblia? (Lucas 10:21).

⁹ Laʼ laj qʼuel chuqui yambʌ miʼ pʌs jiñi i ñaʼtʌbal Jehová. Tsiʼ chʼʌmʌ tiʼ wenta chaʼan an parte tac yaʼ ti Tsʼijbujel miʼ tsʼijbuntel chaʼan jin jach miʼ chʼʌmbeñob i sujm jiñi añoʼ bʌ i pecʼlel (pejcan Lucas 10:21). Jiñi Biblia miʼ pejcʌntel tiʼ petol Pañimil (mulawil). Juntiquil especialista tsiʼ yʌlʌ chaʼan «mach jin jach jiñi libro ñumen pejcʌbil bʌ, jiñʌch jaʼel jiñi ñumen qʼuelbil bʌ», ili yom i yʌl chaʼan jiñʌch jiñi ñumen tsajibil bʌ i chaʼañob. Pero jin jach jiñi añoʼ bʌ i pecʼlel miʼ mejlel i chʼʌmbeñob i sujm yicʼot i jacʼob muʼ bʌ i yʌl (2 Cor. 3:15, 16).

10. ¿Bajcheʼ yambʌ mi lac taj laj qʼuel i ñaʼtʌbal Jehová yaʼ ti Biblia?

¹⁰ Laʼ laj qʼuel bajcheʼ yambʌ miʼ tsictiyel i ñaʼtʌbal Jehová yaʼ ti Biblia. Mach cojach miʼ cʼʌn chaʼan miʼ cʌntesañonla bajcheʼ i tejclum, miʼ cʼʌn jaʼel chaʼan miʼ cʌntesañonla yicʼot miʼ ñuqʼuesan lac pusicʼal ti jujuntiquil. Cheʼ bʌ mi lac pejcan jiñi i Tʼan mi lac taj laj qʼuel chaʼan i wentajoñʌchla ti jujuntiquilonla (Is. 30:21). ¿Am ba lac pejca jumpʼejl texto lac chaʼañʌch bʌ tsaʼ la cubi cheʼ bʌ woli lac ñusan jumpʼejl wocol? Miʼ mejlel la cʌl chaʼan añʌch. Pero mi jiñi Biblia tsaʼ tsʼijbunti chaʼan jiñi yonlel lac piʼʌlob, ¿bajcheʼ an cheʼ mach jilemic i cʼʌjñibal jiñi muʼ bʌ i yʌl yicʼot miʼ coltañonla ti jujuntiquil? Come jiñi tsaʼ bʌ i yʌcʼʌ ti tsʼijbuntel jiñi Biblia jiñʌch jiñi ñumen am bʌ i ñaʼtʌbal (2 Tim. 3:16, 17).

11. ¿Bajcheʼ tsiʼ pʌsʌ Dios chaʼan junlajalʌch miʼ qʼuel lac piʼʌlob cheʼ bʌ tsaʼ tsʼijbunti jiñi Biblia?

¹¹ Yambʌ utsʼatax bʌ melbalʌl am bʌ i chaʼan Jehová jiñʌch cheʼ miʼ mulan i mel chuqui toj (Dt. 32:4). Wen utsʼatax iliyi come Jehová junlajal miʼ qʼuelonla jaʼel (Hech. 10:34, 35; Rom. 2:11). Cheʼʌch miʼ pʌs ti jiñi tʼan tac tsaʼ bʌ i yajca chaʼan miʼ tsʼijbuntel jiñi Biblia. Lʌcʼʌ tiʼ pejtelel jiñi ñaxam bʌ 39 libro tsaʼ mejli ti hebreo, jiñi tʼan yujil bʌ jiñi i tejclum Dios ti jimbʌ ora. Pero cheʼ tiʼ yorajlel jiñi ñaxam bʌ xñoptʼañob cabʌlob yujilobix bʌ griego. Jin chaʼan, lʌcʼʌ tiʼ pejtelel jiñi cojix bʌ 27 libro tsaʼ tsʼijbunti ti jiñi tʼan. Jehová tsiʼ mulaj chaʼan mach ti jumpʼejl jach tʼan miʼ tsʼijbuntel jiñi i Tʼan. Ili ora, añonla lʌcʼʌ 8 mil millón ila ti Lum i mach junlajalic jiñi tʼan la cujil bʌ. ¿Bajcheʼ miʼ mejlel laj cʌn Jehová ti lac pejtelel?

12. ¿Bajcheʼ tsʼʌctiyem Daniel 12:4 ti ili cojix bʌ qʼuin?

¹² Jehová tsiʼ cʼʌñʌ jiñi xʼaltʼan Daniel chaʼan miʼ yʌcʼ i tʼan chaʼan tiʼ yorajlel jiñi i jilibal «mi caj i pʼojlel» jiñi i sujm bʌ ñaʼtʌbalʌl, ili yom i yʌl chaʼan yonlel lac piʼʌlob mi caj i chʼʌmbeñob i sujm muʼ bʌ i yʌl jiñi Biblia (pejcan Daniel 12:4). Junchajp am bʌ i colta chaʼan miʼ yujtel iliyi jiñʌch cheʼ tsaʼix chaʼlenti ti traducir, ti mejlel yicʼot ti pujquel jiñi Biblia yicʼot yambʌ jun tac. Jiñi Biblia jiñʌch jiñi libro ñumen traducido bʌ yicʼot pucbil bʌ. Cabʌl traducción tac muʼ bʌ i chojñel wen lets i tojol. Pero jiñi i tejclum Jehová ñumeñix ti 240 tʼan chaʼlebil i chaʼan ti traducir jiñi Biblia ti tsʼʌcʌl o ojlil jaxto, i majqui jach miʼ mejlel ti aqʼuentel jumpʼejl Biblia yicʼot mach tojbilic. ¿Chuqui tajbil? Yonlel lac piʼʌlob ti cabʌl tejclum woliʼ jacʼob «jiñi wen tʼan chaʼan bʌ Yumʌntel» cheʼ bʌ maxto tilemic i jilibal (Mat. 24:14). Jehová juntiquilʌch toj bʌ Dios i yom chaʼan  pejtelel jiñi lac piʼʌlob miʼ pejcañob jiñi Biblia chaʼan miʼ mejlel i cʌñob. ¿Chucoch miʼ mel jiñi? Come miʼ wen cʼuxbiñonla.

13. ¿Chucoch mi la cʌl chaʼan jiñi Biblia miʼ pʌs i cʼuxbiya Dios? (Juan 21:25).

¹³ Jiñi Biblia miʼ pʌs jaʼel jiñi ñumen ñuc bʌ melbalʌl am bʌ i chaʼan Dios: Jiñi cʼuxbiya (1 Juan 4:8). Laʼcu lac ñaʼtan chuqui tac tsiʼ yʌcʼʌ ti tsʼijbuntel Dios yaʼ ti Biblia. Miʼ subeñonla chuqui yom mi lac mel chaʼan mi lac sujtel tiʼ yamigo, chaʼan tijicña mi lac chumtʌl yicʼot chaʼan mi lac chumtʌl tiʼ pejtelel ora. Pero mach ñumeñic ti pʼis chuqui tsiʼ yʌcʼʌ ti tsʼijbuntel come miʼ wen cʼuxbiñonla (pejcan Juan 21:25).

14. ¿Bajcheʼ yambʌ miʼ pʌs i cʼuxbiya Dios jiñi Biblia?

¹⁴ Jehová miʼ pʌs jaʼel chaʼan miʼ cʼuxbiñonla ti bajcheʼ miʼ pejcañonla. Maʼañic miʼ yʌqʼueñonla jumpʼejl lista yaʼ ti Biblia chaʼan jujunchajp yom bʌ mi lac mel. Miʼ cʼʌn jiñi ujtem bʌ tiʼ tojlel yañoʼ bʌ, profecía tac yicʼot ticʼojel tac chaʼan miʼ coltañonla lac mel chuqui wem bʌ. Cheʼ bajcheʼ jiñi, jiñi Biblia miʼ coltañonla chaʼan mi laj cʼuxbin Dios yicʼot chaʼan mi lac jacʼben i tʼan ti jumpʼejl lac pusicʼal.

15. a) ¿Bajcheʼ miʼ pʌs jiñi Biblia chaʼan i wentajoñʌchla Jehová? b) ¿Chuqui woliʼ ñaʼtan jiñi xchʼoc, jiñi hermano yicʼot jiñi hermana añix bʌ i jabilel am bʌ yaʼ ti foto? (Gn. 39:1, 10-12; 2 R. 5:1-3; Luc. 2:25-38).

¹⁵ Jiñi Biblia miʼ pʌs chaʼan i wentajoñʌchla Jehová. La cujil iliyi come yaʼ tiʼ Tʼan an relato tac muʼ bʌ i pʌs bajcheʼ yubil tsiʼ yubiyob ti wajali. Miʼ mejlel lac chʼʌmben i sujm bajcheʼ yubil tsiʼ yubiyob come cheʼʌch tsiʼ yubiyob i bʌ bajcheʼ joñonla (Sant. 5:17). I cheʼ bʌ mi laj qʼuel bajcheʼ yilal tsiʼ mele Jehová tiʼ tojlelob,  mi lac ñumen cʌn chaʼan «wen yujil cʼuxbiya yicʼot pʼuntaya» (Sant. 5:11).

16. ¿Chuqui miʼ pʌsbeñonla tiʼ tojlel Jehová jiñi relato tac chaʼan jiñi tsaʼ bʌ i tajayob i sajtemal? (Isaías 55:7).

¹⁶ Yaʼ ti Biblia mi lac taj bajcheʼ yambʌ miʼ pʌsbeñonla i cʼuxbiya Jehová. Miʼ subeñonla chaʼan maʼañic mi caj i cʌyonla cheʼ bʌ mi lac taj lac sajtemal. Jiñi israelitajob tsiʼ chʌn chaʼleyob mulil tiʼ tojlel Dios, pero Jehová tsiʼ ñusʌbeyob cheʼ bʌ tsiʼ chaʼ ñaʼtayob i bʌ tiʼ sujm (pejcan Isaías 55:7). Jiñi xñoptʼañob ti ñaxam bʌ siglo yujilob jaʼel chaʼan Jehová mucʼʌch i wen cʼuxbiñob. Jumpʼejl ejemplo, tsiʼ ñijcʌbe i pusicʼal jiñi apóstol Pablo chaʼan miʼ coltan jiñi xñoptʼañob chaʼan miʼ ñusʌbeñob i mul yicʼot miʼ tijicñesañob juntiquil tsaʼ bʌ i chaʼle tsʼiʼlel i tsiʼ chaʼ ñaʼta i bʌ (1 Cor. 5:1-5; 2 Cor. 2:6, 7). Wen utsʼatax cheʼ mi lac ñaʼtan chaʼan Jehová maʼañic tsiʼ cʌyʌ i wiñicob cheʼ bʌ tsiʼ tajayob i sajtemal. Yicʼot i cʼuxbiya tsiʼ coltayob, tsiʼ tojʼesayob i tiʼ subeyob chaʼan miʼ chaʼ sutqʼuiñob i bʌ tiʼ tojlel. Miʼ yʌcʼ i tʼan chaʼan ili ora cheʼʌch mi caj i mel jaʼel tiʼ tojlel jiñi muʼ bʌ i chaʼlen mulil i miʼ chaʼ ñaʼtan i bʌ (Sant. 4:8-10).

17. ¿Chucoch jumpʼejlʌch wen utsʼatax bʌ lac majtan jiñi Biblia?

¹⁷ Jehová tsiʼ yʌqʼueyonla wen utsʼatax bʌ lac majtan. ¿Chucoch wen utsʼatax jiñi i Tʼan? Come cheʼ bajcheʼ tsaʼix laj cʌñʌ, miʼ pʌsbeñonla chaʼan Dios tojʌch, an i ñaʼtʌbal yicʼot miʼ wen cʼuxbiñonla. Cheʼ jaʼel, miʼ pʌs chaʼan Jehová yom chaʼan mi laj cʌn yicʼot mi lac sujtel tiʼ yamigo.

18. ¿Bajcheʼ mi lac pʌs chaʼan mi laj qʼuel ti ñuc jiñi Biblia?

¹⁸ Mach yomic mi lac ñaʼtan chaʼan maʼañic i cʼʌjñibal jiñi i Tʼan Dios. Jumpʼejlʌch «wem bʌ [...] majtañʌl» tsaʼ bʌ i yʌqʼueyonla Jehová (Sant. 1:17). Jin chaʼan, laʼ lac pʌsben tiʼ pejtelel ora chaʼan mucʼʌch laj qʼuel ti ñuc ili majtañʌl. Mi lac mel iliyi cheʼ bʌ mi lac pejcʌben i Tʼan yicʼot mi lac wen ñaʼtan muʼ bʌ i yʌl cheʼ bʌ tsaʼix lac ñaxan mele oración. Miʼ mejlel lac ñop chaʼan Jehová, jiñi tsaʼ bʌ i yʌcʼʌ ti mejlel jiñi Biblia, mi caj i yʌqʼueñonla i bendición cheʼ mi lac chaʼlen wersa i mi caj laj «cʌn Dios» (Pr. 2:5).