1. ¿Chuqui tiʼ sube Jesús jiñi xcʌntʼañob i chaʼan chaʼan jala mi caj i tilel i jilibal pañimil, i chuqui ti ticʼojel tsiʼ yʌqʼueyob?

 CHEʼ bʌ an jachix yom chaʼpʼej uxpʼejl qʼuin chaʼan miʼ chʌmel Jesús, chʌntiquil xcʌntʼañob i chaʼan tsiʼ cʼajtibeyob chuqui mi caj i pʌs «chaʼan lʌcʼʌlix i yorajlel i jilibal pañimil» (Mat. 24:3). Tajol yom i ñaʼtañob bajcheʼ miʼ mejlel i cʌñob i jilibal i yorajlel jiñi judíojob. Jesús mach jiñic jach tsiʼ taja ti tʼan i jilibal i yorajlel jiñi judíojob, yicʼotʌch jaʼel «i yorajlel i jilibal pañimil». Cheʼ bʌ tsiʼ yʌlʌ jalaqui mi caj i tilel i jilibal ili pañimil (mulawil), tsiʼ yʌlʌ: «Maʼañic majqui yujil chuqui ti qʼuin o bajcheʼ hora, mi jiñicto jiñi ángelob yaʼ ti panchan, mi jiñicto i Yalobil Dios, cojach jiñi Tatʌl». Cheʼ jiñi tsiʼ yʌcʼʌ ili ticʼojel tac: «Yom chʌn cañal laʼ wut» yicʼot «Yom chʌn yʌxʌl laʼ wo» (Mar. 13:32-37).

2. ¿Chucoch yom chʌn yʌxʌlob i yo jiñi xñoptʼañob judíojoʼ bʌ?

² Jiñi xñoptʼañob judíojoʼ bʌ ti ñaxam bʌ siglo yom chʌn yʌxʌlob i yo chaʼan maʼañic miʼ jisʌntelob. Jesús tiʼ tsictesʌbeyob jiñi xcʌntʼañob i chaʼan chuqui yom miʼ qʼuelob chaʼan miʼ ñaʼtañob chaʼan lʌcʼʌlix i yorajlel i jilibal pañimil. Tiʼ subeyob: «Cheʼ bʌ mi laʼ qʼuel chaʼan Jerusalén joyol ti soldadojob,  ñaʼtanla chaʼan tsaʼix lʌcʼtiyi i jisʌntel». Ti jimbʌ ora yom miʼ putsʼelob majlel ti wits cheʼ bajcheʼ tiʼ subeyob (Luc. 21:20, 21). Jiñi tsaʼʌch bʌ i jacʼʌyob tsaʼ bʌ i yʌlʌ Jesús tsaʼ putsʼiyob majlel cheʼ bʌ jiñi romanojob maxto i jisayob Jerusalén, i maʼañic chuqui tsiʼ chaʼleyob.

3. ¿Chuqui mi caj laj qʼuel ti ili estudio?

³ Joñonla chumulonla tiʼ yorajlel i jilibal ili jontol bʌ pañimil. Jin chaʼan, cheʼ bajcheʼ jiñi ñaxam bʌ xñoptʼañob yom mi lac chʌn pʌs wem bʌ lac ñaʼtʌbal yicʼot yom yʌxʌl la co. Ti ili estudio mi caj laj qʼuel chuqui miʼ mejlel lac mel cheʼ bʌ woli (choncol) laj qʼuel chuqui tac woliʼ yujtel ti pañimil. Cheʼ jaʼel, mi caj laj qʼuel chuqui miʼ mejlel lac mel (chaʼlen) chaʼan mi laj cʌntan lac bʌ yicʼot mi laj cʼʌn ti wen jiñi tiempo cʌylemto bʌ.

4. ¿Chucoch yomʌch mi lac wen qʼuel jiñi woli tac bʌ i yujtel ti pañimil?

⁴ Yomʌch mi lac wen qʼuel bajcheʼ woli (yʌquel) i tsʼʌctesan profecía tac jiñi woli tac bʌ i yujtel. Jumpʼejl ejemplo, Jesús tsiʼ yʌlʌ chaʼan an chuqui tac mi caj i yujtel muʼ bʌ caj i coltañonla lac ñaʼtan chaʼan lʌcʼʌlix i jilibal i pañimil Satanás (Mat. 24:3-14). Jiñi apóstol Pedro tiʼ subeyonla jaʼel chaʼan yomʌch mi lac wen qʼuel bajcheʼ woliʼ tsʼʌctiyel jiñi profecía tac chaʼan bej pʼʌtʌl miʼ yajñel jiñi lac ñopoñel (2 Ped. 1:19-21). I jiñi cojix bʌ libro am bʌ ti Biblia miʼ tech i yʌl: «Junchajp tsaʼ bʌ i pʌsʌ Jesucristo, tsaʼ bʌ aqʼuenti ti Dios, chaʼan miʼ pʌsben jiñi xyaj eʼtelob i chaʼan chuqui mi caj i yujtel ti lʌcʼʌl» (Apoc. 1:1). Jin chaʼan, i tilelʌch cheʼ la com lac ñaʼtan jiñi woli tac bʌ i yujtel ti pañimil yicʼot bajcheʼ woliʼ tsʼʌctesan profecía tac. I tajol iliyi mi lac mulan la cʌl la quicʼot la quermañujob.

5. ¿Chuqui mach yomic mi lac mel cheʼ bʌ mi la cʌl jiñi profecía tac, i chuqui yom mi lac mel? (Qʼuele jaʼel jiñi foto tac).

⁵ Yomʌch mi laj cʌntan lac bʌ cheʼ bʌ mi lac taj ti tʼan chaʼan woliʼ tsʼʌctiyel jiñi profecía tac. ¿Chucoch? Come mach la comic la cʌl muʼ bʌ lac bajñel ñaʼtan mejl bʌ i tʼox jiñi congregación. Jumpʼejl ejemplo, tajol mi la cubin chaʼan jiñi yumʌlob an chuqui miʼ yʌlob chaʼan bajcheʼ mi caj i tojʼesañob jumpʼejl wocol yicʼot miʼ chʼʌmob tilel ñʌchʼtʌlel. Mach yomic mi lac ñaʼtan chaʼan woliʼ tsʼʌctesan muʼ bʌ i yʌl 1 Tesalonicenses 5:3, yomʌch mi lac chʌn qʼuel jiñi tsijib loqʼuem tac bʌ. Mi pejtelel muʼ bʌ la cʌl yaʼʌch chucul ti muʼ bʌ i yʌl jiñi i yorganización Jehová, mi caj laj coltan jiñi congregación chaʼan temel miʼ yajñel i junlajal chuqui miʼ ñaʼtañob (1 Cor. 1:10; 4:6).

6. ¿Chuqui mi laj cʌn ti 2 Pedro 3:11-13?

⁶ (Pejcan 2 Pedro 3:11-13). Jiñi apóstol Pedro miʼ coltañonla chaʼan mach ñumeñic ti pʼis bajcheʼ yom mi lac tsajin (wen qʼuel) jiñi profecía tac. Miʼ subeñonla chaʼan yom chʌn yʌxʌl la co cheʼ bʌ miʼ tilel i qʼuiñilel Jehová. ¿Chucoch? Mach chaʼañic la com lac ñaʼtan chuqui «ti qʼuin yicʼot bajcheʼ hora» mi caj i chʼʌm tilel Jehová jiñi Armagedón, chaʼañʌch la com laj cʼʌn ti wen jiñi lac tiempo cʌylemto bʌ chaʼan mi lac pʌs chʼujul tac bʌ lac melbal (chaʼlibal) yicʼot lac xucʼtʌlel ti Dios (Mat. 24:36; Luc. 12:40). Ili yom i yʌl chaʼan la com lac pʌs wem bʌ lac melbal yicʼot laj qʼuel chaʼan pejtelel woli bʌ lac mel tiʼ tojlel Jehová chaʼañʌch mi laj cʼuxbin. Chaʼan mi lac mel iliyi, yomʌch mi laj cʌntan lac bʌ.

7. ¿Chuqui yom mi lac mel chaʼan mi lac wen qʼuel lac bʌ? (Lucas 21:34).

⁷ Jesús tiʼ sube jiñi xcʌntʼañob i chaʼan chaʼan yom miʼ wen i qʼuelob i bʌ jaʼel, mach jiñic jach  jiñi woli tac bʌ i yujtel. Cheʼʌch mi lac taj laj qʼuel ti tsaʼ bʌ i yʌlʌ ti Lucas 21:34 (pejcan). Jesús tsiʼ yʌlʌ: «Wen qʼuele laʼ bʌ». ¿Chuqui yom i yʌl cheʼ mi lac wen qʼuel lac bʌ? Jiñʌch cheʼ bʌ mi lac wen qʼuel chuqui tac miʼ mejlel i ñajtʼesañonla ti Jehová yicʼot mi lac chaʼlen wersa chaʼan maʼañic mi lac mel. Cheʼ bajcheʼ jiñi, mi caj lac chʌn ajñel tiʼ cʼuxbiya Dios (Pr. 22:3; Jud. 20, 21).

8. ¿Chuqui ti ticʼojel tsiʼ yʌqʼue Pablo jiñi xñoptʼañob?

⁸ Jiñi apóstol Pablo tiʼ sube jiñi xñoptʼañob chaʼan yom miʼ wen qʼuelob i bʌ. Jumpʼejl ejemplo, tiʼ tsʼijbube jiñi xñoptʼañob añoʼ bʌ ti Éfeso: «Yom wen tsajaletla chaʼan mach cheʼeticla bajcheʼ jiñi tontojoʼ bʌ, cheʼ yometla bajcheʼ jiñi añoʼ bʌ i ñaʼtʌbal» (Efes. 5:15, 16). Satanás miʼ chaʼlen wersa chaʼan mi laj cʌy Jehová. Jin chaʼan, jiñi Biblia miʼ subeñonla chaʼan yom mi lac chʼʌmben i sujm «chuqui jiñi yom bʌ Jehová», i cheʼ bajcheʼ jiñi mi lac mʌlben (jotben) Satanás (Efes. 5:17).

9. ¿Bajcheʼ miʼ mejlel laj cʌn chuqui jiñi yom bʌ Jehová chaʼañonla?

⁹ Jiñi Biblia maʼañic miʼ luʼ al chuqui tac miʼ mejlel i ñajtʼesañonla ti Jehová. An i tajol an chuqui yom mi lac mel, pero jiñi Biblia maʼañic miʼ jamʌ al. Chaʼan wen chuqui mi lac yajcan lac mel, yom mi lac chʼʌmben i sujm «chuqui jiñi yom bʌ Jehová». I mi lac mel cheʼ bʌ mi lac tsajin jiñi i Tʼan Dios yicʼot mi lac wen ñaʼtan muʼ bʌ i yʌl. Cheʼ bʌ mi lac ñumen chʼʌmben i sujm chuqui yom bʌ Jehová i mi lac ñumen chaʼlen wersa chaʼan an lac chaʼan «i ñaʼtʌbal Cristo», mach wocolic mi caj la cubin chaʼan mi lac pʌs lac ñaʼtʌbal, anquese maʼañic miʼ jamʌ ajlel chuqui yom mi lac mel (1 Cor. 2:14-16). An yac tac mach bʌ wocolic mi lac taj laj qʼuel, pero an yan tac bʌ cheʼʌch bʌ.

10. ¿Chuqui tac jiñi mach bʌ yomic mi lac mel?

¹⁰ Mach yomic mi lac chaʼlen coquetear, laj cʌlʌx chaʼlen uchʼel, laj cʼʌn tʼan tac muʼ bʌ i low yambʌlob yicʼot laj qʼuel programa tac am bʌ i chaʼan jontolil o pornografía (Sal. 101:3). Jiñi laj contra, jiñi Diablo, woliʼ chʌn sʌclan bajcheʼ miʼ mejlel i ñajtʼesañonla ti Jehová (1 Ped. 5:8). Mi maʼañic mi laj cʌntan lac bʌ, miʼ mejlel i yotsan ti lac jol o ti lac pusicʼal jiñi i tsʌytsʌyñiyel lac pusicʼal, lot, i mulʌntel chuqui tac an, tsʼaʼleya, chañʼesa bʌ yicʼot michʼajel (Gál. 5:19-21). Tajol ti ñaxan maxto cʌlʌxic. Pero mi maʼañic mi lac choc loqʼuel ti ora, mi caj i bej colel jinto miʼ junyajl ticʼlañonla (Sant. 1:14, 15).

11. ¿Baqui bʌ junchajp wocol mach wen tsiquilic, i chuqui yom mi lac mel?

¹¹ Laʼcu lac ñaʼtan ili wocol: Jiñi mach bʌ weñic lac piʼʌlob. Laʼcu lac ñaʼtan chaʼan an juntiquil lac piʼʌl ti eʼtel (troñel) mach bʌ Testigojic. La com chaʼan wen chuqui miʼ ñaʼtan tiʼ tojlel jiñi i testigojob Jehová, jin chaʼan utsonla la quicʼot. Tajol ti ñaxan mucʼ jach lac bixel chaʼlen uchʼel la quicʼot, pero ti wiʼil mi lac ñʌmʼan. An i tajol miʼ yʌl chaʼan tac bʌ tsʼiʼlel. Ti ñaxan maʼañic mi lac mulan i maʼañic chuqui mi lac suben. Pero ti wiʼil mach lecojix mi la cubin come tsaʼix ñʌmʼayonla. Tajol cheʼ bʌ tsaʼix ujti la queʼtel, miʼ subeñonla chaʼan an chuqui yom miʼ majlel lac jap, i mucʼʌch lac jacʼ. Cheʼ jiñi, muqʼuix lac toyben jiñi i pensar. ¿Jaypʼejl tiempo mi caj i ñumel chaʼan mi lac tech lac mel lac bʌ bajcheʼ jiñi lac piʼʌl ti eʼtel? I sujmʌch chaʼan jiñi xñoptʼañonbʌla utsonla yicʼot mi laj qʼuelob ti ñuc yañoʼ bʌ. Pero mach ñajayic lac chaʼan chaʼan jiñi lac piʼʌlob muʼ bʌ lac ñochtañob añʌch chuqui tac mi caj i yʌqʼueñoñobla lac mel (1 Cor. 15:33). Mi mucʼʌch lac mel tsaʼ bʌ i yʌlʌ Jesús yicʼot mi lac wen qʼuel lac bʌ, maʼañic mi caj lac wen ñusan cabʌl tiempo la quicʼotob jiñi maʼañic bʌ miʼ qʼuelob ti ñuc jiñi i mandar tac  Jehová (2 Cor. 6:15). Mi caj laj qʼuel jiñi wocol i maʼañic mi caj lac mel.

12. ¿Chuqui yom miʼ melob jiñi xcʌntʼañob i chaʼan Jesús cʼʌlʌlto miʼ tilel i yorajlel i jilibal ili pañimil?

¹² ¿Am ba chuqui yom miʼ melob jiñi xcʌntʼañob i chaʼan Jesús cʼʌlʌlto miʼ tilel i yorajlel i jilibal ili pañimil? Añʌch, Jesús tsiʼ yʌqʼueyob jumpʼejl eʼtel. Tiʼ subeyob chaʼan miʼ subob jiñi wen tʼan «ti Jerusalén, tiʼ petol Judea yicʼot ti Samaria, i cʼʌlʌlto ti ñajt bʌ pañimil» (Hech. 1:6-8). Jumpʼejlʌch ñuc bʌ eʼtel yom miʼ melob. Pero mi mucʼʌch i chaʼleñob wersa, mi caj i cʼʌñob ti wen jiñi i tiempo.

13. ¿Chucoch yomʌch mi laj cʼʌn ti wen jiñi lac tiempo? (Colosenses 4:5).

¹³ (Pejcan Colosenses 4:5). Chaʼan mi lac wen qʼuel lac bʌ, yomʌch mi lac wen qʼuel bajcheʼ mi laj cʼʌn lac tiempo. Cheʼ bajcheʼ miʼ yʌl Eclesiastés 9:11, 12, ti lac pejtelel miʼ mejlel i bʌcʼ tajonla wocol. Muʼto lac mejlel ti waʼ chʌmel (sajtel).

14, 15. ¿Bajcheʼ miʼ mejlel laj cʼʌn ti wen jiñi lac tiempo? (Hebreos 6:11, 12, qʼuele jaʼel jiñi foto).

¹⁴ Chaʼan mi laj cʼʌn ti wen jiñi lac tiempo yomʌch mi lac mel chuqui yom Jehová yicʼot mi lac ñumen lʌcʼtesan lac bʌ tiʼ tojlel (Juan 14:21). Yom mi lac jacʼ ili ticʼojel am bʌ ti Biblia: «Yom chʌn xucʼuletla, yom junsujm jach bajcheʼ  añetla yicʼot yom mi laʼ wen chaʼlen eʼtel tiʼ chaʼan bʌ lac Yum tiʼ pejtelel ora» (1 Cor. 15:58). Mach yʌlʌlic mi tsaʼ chʌmiyonla o mi tsaʼ tili i jilibal ili pañimil, maʼañic mi caj la cubin lac chʼijyemlel chaʼan maʼañic tsaʼ lac ñumen melbe i yeʼtel Jehová (Mat. 24:13; Rom. 14:8).

¹⁵ Cheʼ bajcheʼ tsiʼ yʌlʌ Jesús, ili ora wolʌch i bej coltan jiñi xcʌntʼañob i chaʼan chaʼan miʼ subob jiñi wen tʼan tiʼ petol pañimil. Woliʼ cʼʌn jiñi i yorganización Jehová chaʼan miʼ pʌsbeñonla bajcheʼ yom mi lac chaʼlen subtʼan i miʼ yʌqʼueñonla jiñi la queʼtijib tac chaʼan mi lac mel (Mat. 28:18-20). An jach ti lac wenta lac chaʼlen subtʼan chaʼan wen mi lac chaʼlen cʌntesa yicʼot chaʼan chʌn yʌxʌl la co cheʼ bʌ wolito lac pijtan chaʼan Jehová miʼ jisan ili pañimil. Chʌn pʼʌtʌl mi caj i yajñel jiñi lac pijtaya «cʼʌlʌl tiʼ yujtibal» mi mucʼʌch lac jacʼ muʼ bʌ i yʌl Hebreos 6:11, 12 (pejcan).

16. ¿Chuqui la com lac mel?

¹⁶ Jehová yujilix jalaqui mi caj i jisan ili i pañimil Satanás. Cheʼ bʌ miʼ cʼotel jiñi qʼuin mi caj i tsʼʌctiyel jiñi profecía tac muʼ bʌ lac taj ti Biblia. Jiñi i qʼuiñilel Jehová «mi caj i bʌcʼ tilel cheʼ tiʼ yorajlel» anquese an i tajol woliʼ jalʼan mi la cubin (Hab. 2:3). Jin chaʼan, la com lac mel muʼ bʌ i yʌl Miqueas 7:7: «Joñon mi caj c chʌn qʼuel ti ñuc lac Yum. Mi caj c chʌn pijtan j coltʌntel ti Dios».