YAʼ ti Biblia an tʼan tac mach bʌ junsujtelic jach tsaʼ cʼʌjñi, ¿chucoch jiñi xtsʼijbaya bibliajob tsiʼ meleyob bajcheʼ jiñi? Laʼ laj qʼuel uxchajp tajol chucoch tsiʼ meleyob:

Jalix tsaʼ tsʼijbunti. Ti wajali, cabʌl israelitajob maʼañobic i chaʼan jumpʼejl tsʼijbujel. Jin chaʼan, cojach miʼ ñʌchʼtañob jiñi mandar cheʼ bʌ miʼ majlelob yaʼ ti tabernáculo yicʼot yaʼ ti templo (Dt. 31:10-12). Pero wocolʌch tsiʼ yubiyob come waʼalob jach yicʼot yonlel lac piʼʌlob (Neh. 8:2, 3, 7). Jin chaʼan, cheʼ bʌ miʼ chaʼ ajlel jiñi tʼan tac ñuc bʌ i cʼʌjñibal, miʼ coltañob chaʼan miʼ chaʼ cʼajtesañob i chaʼan miʼ jacʼob muʼ bʌ i yʌjlel. I ñumento cheʼ bʌ an chuqui miʼ tsictesʌntel chaʼan jiñi i mandar tac Jehová (Lv. 18:4-22; Dt. 5:1).

Bajcheʼ tsaʼ tsʼijbunti. Jiñi Biblia miʼ chʼʌm tilel cʼay tac, bajcheʼ jiñi libro chaʼan Salmos, Cantares yicʼot Lamentaciones. An parte tac muʼ bʌ i chaʼ ajlel ti jiñi cʼay tac. Ili miʼ coltan jiñi woli bʌ (choncol bʌ) i cʼʌyin chaʼan miʼ ñaʼtan chuqui woliʼ yʌjlel yicʼot chaʼan miʼ chaʼ cʼajtesan. Jumpʼejl ejemplo, jiñi Salmo 115:9-11 miʼ yʌl: «Jatetla, israelob, ñopola lac Yum. Jiñʌch laʼ pʼʌtʌlel, jiñʌch laʼ mʌctʌjib. Jatetla i yalobilet bʌ la Aarón, ñopola lac Yum. Jiñʌch laʼ waj coltaya, laʼ mʌctʌjibʌch. Jatetla muʼ bʌ laʼ bʌcʼñan lac Yum, ñopola lac Yum. Lac pʼʌtʌlelʌch, lac mʌctʌjibʌch». Cheʼ bʌ juntiquil israelita miʼ cʼʌyin ili cʼay, mach wocolic miʼ yubin chaʼan miʼ chaʼ cʼajtesan jiñi utsʼatax bʌ tʼan tac.

Chucoch tsaʼ tsʼijbunti. Jiñi tsaʼ bʌ i tsʼijbuyob jiñi Biblia, an i tajol tsiʼ chaʼ alʌyob jiñi tʼan tac come wen ñuc i cʼʌjñibal i yomob chaʼan tsiquil miʼ qʼuejlel. Jumpʼejl ejemplo, cheʼ bʌ Jehová tiʼ sube jiñi israelitajob chaʼan maʼañic miʼ cʼuxob chʼichʼ, tiʼ sube Moisés chaʼan yomʌch miʼ chaʼ ajlel chaʼyajl uxyajl chucoch woli (yʌquel) ti ajqʼuel jiñi mandar, come yom tsiquil miʼ qʼuejlel chaʼan chʼujulʌch jiñi chʼichʼ i yaʼʌch baqui cʌyʌl jiñi cuxtʌlel (Lv. 17:11, 14). Ti wiʼil, jiñi apóstolob yicʼot ancianojob ti Jerusalén tsiʼ chaʼ alʌyob chaʼan mach yomic mi laj cʼux jiñi chʼichʼ mi la com chaʼan utsʼat mi laj qʼuejlel ti Dios (Hech. 15:20, 29).

Anquese an tʼan tac mach bʌ junsujtel jach miʼ chaʼ ajlel yaʼ ti Biblia, mach yomic i yʌl chaʼan Jehová yom cheʼ junsujm jach chuqui mi lac suben ti oración. Jesús tsiʼ yʌlʌ: «Cheʼ bʌ maʼ chaʼlen oración, mach jin jach bʌ tʼan yom maʼ chʌcʌ al» (Mat. 6:7). Jesús tsiʼ yʌlʌ chuqui tac mucʼʌch bʌ i mejlel lac taj ti tʼan ti oración, utsʼat bʌ miʼ qʼuel Dios (Mat. 6:9-13). I anquese mach junsujmic jach chuqui yom mi lac chʌcʌ suben Jehová ti la coración, mucʼʌch i mejlel lac suben chuqui la com jiñʌch jaysujtel la com (Mat. 7:7-11).

¡Weñʌch cheʼ an tʼan tac mucʼʌch bʌ i chaʼ ajlel yaʼ ti Biblia! Jiñʌch junchajp muʼ bʌ i cʼʌn Jehová chaʼan miʼ cʌntesañonla chaʼan lac wenlel (Is. 48:17, 18).