1. ¿Chucoch yom mi lac jacʼ muʼ bʌ i subeñonla Jehová? Alʌ jumpʼejl ejemplo.

 ÑAʼTANCU chaʼan tsaʼ sajtiyet ti mateʼel, ¿chuqui mi caj a mel? A wujil chaʼan miʼ mejlel a taj wocol tac. Miʼ mejlel a taj lucum, bajlum o yan tac bʌ jontol (simaron) bʌ añimal. Cheʼ jaʼel, tajol maʼ yajlel i maʼ low a bʌ. ¿Mach ba tijicñayic mi caj a wubin cheʼ añic juntiquil wen i cʌñʌ bʌ jiñi bij i miʼ coltañet loqʼuel yaʼi? Miʼ mejlel la cʌl chaʼan ili pañimil (mulawil) lajal bajcheʼ jiñi mateʼel, an cabʌl wocol muʼ bʌ i mejlel i ñajtʼesañonla tiʼ tojlel Jehová. Pero an juntiquil muʼ bʌ i tojʼesañonla majlel chaʼan maʼañic mi lac taj jiñi wocol tac, jiñʌch Jehová. Jin mi caj i coltañonla chaʼan mi laj cʼotel ti jiñi tsijiʼ bʌ pañimil baqui mi caj lac chumtʌl tiʼ pejtelel ora.

2. ¿Bajcheʼ miʼ tojʼesañonla majlel Jehová?

² Jehová miʼ cʼʌn jiñi i Tʼan chaʼan miʼ tojʼesañonla majlel. Pero mach cojach jiñi, miʼ cʼʌn jaʼel wiñicob waʼchocobiloʼ bʌ i chaʼan bajcheʼ «jiñi xucʼul bʌ xyaj eʼtel» chaʼan miʼ yʌqʼueñonla chuqui i cʼʌjñibal bʌ lac chaʼan chaʼan pʼʌtʌlonla tiʼ tojlel Jehová i wen chuqui mi lac mel (Mat. 24:45). Cheʼ jaʼel miʼ cʼʌn jiñi superintendentejob chaʼan circuito yicʼot jiñi ancianojob chaʼan miʼ coltañoñobla yicʼot miʼ ticʼoñobla chaʼan mi lac ñusan majlel jiñi wocol tac. Mi la cʌqʼuen wocolix i yʌlʌ Jehová chaʼan bajcheʼ woli (choncol) i tojʼesañonla majlel ti ili cojix tac bʌ qʼuin wen wocol jax bʌ. Cheʼ bajcheʼ jiñi, chʌn lʌcʼʌl mi la cajñel tiʼ tojlel i mi lac bej chaʼlen xʌmbal ti jiñi bij chaʼan bʌ cuxtʌlel.

3. ¿Chuqui mi caj laj qʼuel ti ili estudio?

³ An i tajol wocol mi la cubin chaʼan mi lac jacʼ muʼ bʌ i subeñonla Jehová, ñumento cheʼ jin miʼ cʼʌn wiñicob chaʼan miʼ subeñonla chuqui yom mi lac mel. ¿Chucoch wocol mi la cubin? Tajol muʼ bʌ i subeñoñobla lac mel mach jiñic muʼ bʌ lac mulan. O tajol mi lac ñaʼtan chaʼan jiñi ticʼojel tac muʼ bʌ i yʌcʼob  mach jiñic jiñi ñumen wem bʌ o chaʼan mach i cʼʌjñibalic, i jin chaʼan mi lac ñaʼtan chaʼan mach tilemic ti Jehová. Ti jimbʌ ora yom mi lac ñumen ñop chaʼan jiñʌch Jehová woli bʌ (yʌquel bʌ) i tojʼesañonla majlel i chaʼan jiñi ñumen wem bʌ jiñʌch cheʼ mi lac jacʼben i tʼan. Jin chaʼan, ili estudio mi caj i taj ti tʼan ili uxchajp: 1) Bajcheʼ Jehová tsiʼ tojʼesa i tejclum ti wajali, 2) bajcheʼ woliʼ tojʼesan ili ora, i 3) baqui bʌ i wenlel cheʼ mi lac jacʼ chuqui miʼ subeñonla.

¿BAJCHEʼ TSIʼ TOJʼESA MAJLEL JEHOVÁ JIÑI ISRAELITAJOB?

4, 5. ¿Bajcheʼ tsiʼ pʌsʌ Jehová chaʼan woliʼ cʼʌn Moisés chaʼan miʼ tojʼesan majlel jiñi israelitajob? (Qʼuele jiñi dibujo am bʌ tiʼ tejchibal).

⁴ Jehová tsiʼ waʼchoco Moisés chaʼan miʼ locʼsan jiñi israelitajob yaʼ ti Egipto i tsiʼ jamʌ pʌsbeyob chaʼan woliʼ cʼʌn Moisés chaʼan miʼ tojʼesañob majlel. Junchajp tsaʼ bʌ i pʌsbeyob chaʼan cheʼʌchi jiñʌch jiñi tocal tsaʼ bʌ i pʌsʌ i bʌ cheʼ ti qʼuiñil i jiñi cʼajc tsaʼ bʌ i pʌsʌ i bʌ cheʼ ti acʼʌlel (Éx. 13:21). Moisés tiʼ tsajca majlel jiñi tocal i tsaʼ cʼotiyob yaʼ ti Chʌchʌc bʌ mar. Ti wiʼil, jiñi egipciojob tsaʼ chaʼ majli i sʌclañob jiñi israelitajob i tajol ti jimbʌ ora jiñi israelitajob tsiʼ wen chaʼleyob bʌqʼuen come maʼañic baqui miʼ mejlelob ti putsʼel. Tajol tsiʼ ñaʼtayob chaʼan mach weñic cheʼ Moisés tsiʼ pʌyʌyob majlel yaʼi, pero mach cheʼiqui come jiñʌch Jehová tsaʼ bʌ i sube Moisés chaʼan yaʼ miʼ majlelob yaʼi (Éx. 14:2). Ti wiʼil, Jehová tsiʼ mele jumpʼejl ñuc bʌ milagro chaʼan miʼ coltañob (Éx. 14:26-28).

⁵ Moisés 40 jab tiʼ tsajca majlel jiñi tocal chaʼan miʼ tojʼesan majlel i tejclum Dios. a An i tajol jiñi tocal yaʼ miʼ yajñel tiʼ yotot Moisés i tiʼ pejtelelob miʼ mejlel i qʼuelob (Éx. 33:7, 9, 10). Cheʼ jaʼel, Jehová yaʼ miʼ chaʼlen tʼan yicʼot Moisés ti jiñi tocal chaʼan miʼ suben chuqui yom bʌ miʼ mel (Sal. 99:7). Jiñi israelitajob tsiquilʌch tsiʼ qʼueleyob chaʼan Jehová woliʼ cʼʌn Moisés chaʼan miʼ tojʼesañob majlel.

6. ¿Tsaʼ ba i jacʼbeyob i tʼan Jehová jiñi israelitajob? (Números 14:2, 10, 11).

⁶ Cabʌl israelitajob maʼañic tsiʼ chʼʌmʌyob ti ñuc pejtelel tsaʼ bʌ i pʌsʌ chaʼan Moisés jiñʌch jiñi yajcʌbil bʌ i chaʼan Jehová chaʼan miʼ tojʼesañob majlel (pejcan Números 14:2, 10, 11). Mach junsujtel jach tsiʼ ñusʌbeyob i tʼan Moisés, i jin chaʼan Jehová maʼañic tsiʼ yʌcʼʌyob ti ochel ti jiñi lum tsaʼ bʌ i wʌn subeyob (Nm. 14:30).

7. ¿Majquiyob jiñi tsaʼʌch bʌ i jacʼbeyob i tʼan Jehová? (Números 14:24; qʼuele jaʼel jiñi dibujo).

⁷ Pero añʌch israelitajob tsaʼ bʌ i jacʼbeyob i tʼan Jehová. Jumpʼejl ejemplo, Jehová tsiʼ yʌlʌ tiʼ tojlel Caleb: «Tsiʼ ñopoyon ti pejtelel i pusicʼal» (pejcan Números 14:24). Jin chaʼan, Jehová tsiʼ yʌqʼue i yajcan baqui yom chumtʌl yaʼ ti Canaán (Jos. 14:12-14). Cheʼ jaʼel, jiñi i pʼolbal jiñi israelitajob tsaʼ bʌ chʌmiyob yaʼ tiʼ tiquiñal lum tsaʼʌch i jacʼbeyob i tʼan Jehová. Jiñi Biblia miʼ yʌl chaʼan tsiʼ wen qʼueleyob ti ñuc Josué come jiñʌch tsaʼ bʌ i yajca Jehová chaʼan miʼ yochel bajcheʼ i qʼuexol Moisés (Jos. 4:14). Jin chaʼan Jehová tsiʼ yʌqʼueyob i bendición i tsiʼ yʌcʼʌyob ti ochel ti jiñi lum tsaʼ bʌ i wʌn subeyob (Jos. 21:43, 44).

8. ¿Bajcheʼ tsiʼ tojʼesa majlel Jehová jiñi i tejclum cheʼ tiʼ yorajlel jiñi reyob? (Qʼuele jaʼel jiñi dibujo).

⁸ Ti wiʼil, Jehová tsiʼ waʼchoco juezob chaʼan miʼ tojʼesañob majlel jiñi tejclum. I tiʼ yorajlel jiñi reyob tsiʼ waʼchoco xʼaltʼañob chaʼan miʼ melob ili eʼtel (troñel). Jiñi reyob xucʼuloʼ bʌ  ti Dios tsaʼʌch i jacʼʌyob tsaʼ bʌ subentiyob. Jumpʼejl ejemplo, jiñi rey David wen tsiʼ jacʼʌ cheʼ bʌ jiñi xʼaltʼan Natán tsiʼ tiqʼui (2 S. 12:7, 13; 1 Cr. 17:3, 4). Cheʼ jaʼel, jiñi rey Jehosafat tsiʼ ñʌchʼta tsaʼ bʌ i sube jiñi xʼaltʼan Jahaziel i tsiʼ colta jaʼel jiñi chumuloʼ bʌ ti Judá chaʼan miʼ ñopob tiʼ tojlel jiñi xʼaltʼañob (2 Cr. 20:14, 15, 20). I cheʼ bʌ jiñi rey Ezequías wocol woliʼ ñusan tsiʼ cʼajtibe i coltaya jiñi xʼaltʼan Isaías (Is. 37:1-6). Tsiquil chaʼan Jehová tsiʼ cʼʌñʌ jiñi xʼaltʼañob chaʼan miʼ tojʼesan majlel i tejclum, i cheʼ bʌ jiñi reyob mucʼʌch i jacʼob miʼ cʌntʌntel yicʼot miʼ coltʌntel jiñi tejclum (2 Cr. 20:29, 30; 32:22). Pero tiʼ sujm cabʌl reyob yicʼot israelitajob maʼañic tsiʼ jacʼʌyob tʼan (Jer. 35:12-15).

¿BAJCHEʼ TSIʼ TOJʼESA MAJLEL JEHOVÁ JIÑI XÑOPTʼAÑOB TI ÑAXAM BɅ SIGLO?

9. ¿Bajcheʼ tsiʼ tojʼesa majlel Jehová jiñi xñoptʼañob ti ñaxam bʌ siglo? (Qʼuele jaʼel jiñi dibujo).

⁹ Jehová tsiʼ waʼchoco jiñi congregación ti ñaxam bʌ siglo, i chaʼan miʼ tojʼesan majlel jiñi i tejclum ti jimbʌ ora tsiʼ waʼchoco Jesús bajcheʼ i jol jiñi congregación (Efes. 5:23). Pero mach jiñic Jesús tsaʼ bʌ i pejca jujuntiquil xñoptʼan ti jimbʌ ora chaʼan miʼ suben chuqui yom miʼ mel. Tsiʼ cʼʌñʌ jiñi apóstolob yicʼot jiñi ancianojob ti Jerusalén chaʼan miʼ qʼuelob jiñi congregación tac (Hech. 15:1, 2). Cheʼ jaʼel, ti jujumpʼejl congregación tsaʼ waʼchoconti ancianojob chaʼan miʼ coltañob jiñi hermanojob (1 Tes. 5:12; Tito 1:5).

10. a) ¿Bajcheʼ tsiʼ jacʼʌyob jiñi tsaʼ bʌ subentiyob jiñi xñoptʼañob ti ñaxam bʌ siglo? (Hechos 15:30, 31). b) ¿Chucoch an maʼañic bʌ tsiʼ qʼueleyob ti ñuc jiñi waʼchocobiloʼ bʌ i chaʼan Jehová? (Qʼuele jiñi recuadro « ¿Chucoch an maʼañic bʌ miʼ qʼuelob ti ñuc jiñi waʼchocobiloʼ bʌ i chaʼan Jehová?»).

¹⁰ ¿I bajcheʼ yilal tsiʼ jacʼʌyob jiñi xñoptʼañob jiñi tsaʼ bʌ subentiyob? Lʌcʼʌ tiʼ pejtelelob wen jach bajcheʼ tsiʼ jacʼʌyob. Jiñi Biblia miʼ yʌl chaʼan «tijicña tsiʼ yubiyob i bʌ chaʼan jiñi tʼan tac muʼ bʌ i yʌqʼueñob i chʼejlel» (pejcan Hechos 15:30, 31). Pero ¿bajcheʼ an i tojʼesa majlel Jehová jiñi i tejclum ili ora?

¿BAJCHEʼ MIʼ TOJʼESAÑONLA MAJLEL JEHOVÁ ILI ORA?

11. ¿Bajcheʼ an i tojʼesa majlel Jehová jiñi i tejclum ili ora? Alʌ jumpʼejl ejemplo.

¹¹ Ti ili ora, Jehová woliʼ tojʼesan majlel i tejclum, miʼ cʼʌn jiñi Biblia yicʼot miʼ mel tiʼ  tojlel Jesús, i jol jiñi congregación. ¿Chuqui miʼ pʌsbeñonla chaʼan Jehová woliʼ bej cʼʌn wiñicob chaʼan miʼ coltan i tejclum? Laʼ lac ñaʼtan tsaʼ bʌ ujti ti jabil 1870. Charles Russell yicʼot jiñi muʼ bʌ i coltañob tsiʼ chʼʌmbeyob i sujm chaʼan ti 1914 an chuqui wen ñuc bʌ mi caj i yujtel (Dn. 4:25, 26). ¿Bajcheʼ tsiʼ ñaʼtayob? Tsiʼ wen tsajiyob (wen qʼueleyob) jiñi profecía tac am bʌ ti Biblia. I tsiquil chaʼan Jehová jiñʌch tsiʼ tojʼesayob yicʼot i yespíritu chaʼan miʼ chʼʌmbeñob i sujm. Jiñi tsaʼ bʌ ujti ti 1914 tsiʼ pʌsʌ chaʼan jiñi i Yumʌntel Dios tsiʼ teche i mel i yeʼtel come ti jiñi jabil tsaʼ tejchi jiñi Primera Guerra Mundial i tsaʼ caji cʼamʌjel, yujquel lum yicʼot wiʼñal (Luc. 21:10, 11). Iliyi tsiʼ jamʌ pʌsʌ chaʼan Jehová woliʼ cʼʌn wiñicob ili ora chaʼan miʼ coltan i tejclum.

12, 13. ¿Chuqui tsaʼ mejli cheʼ woli jiñi Segunda Guerra Mundial chaʼan miʼ ñumen sujbel jiñi wen tʼan yicʼot miʼ chajpʌntel jiñi hermanojob?

¹² Laʼ lac ñaʼtan jaʼel tsaʼ bʌ ujti cheʼ bʌ woli jiñi Segunda Guerra Mundial. Jiñi hermanojob añoʼ bʌ tiʼ wenta jiñi central mundial tsiʼ pejcayob muʼ bʌ i yʌl Apocalipsis 17:8 i tsiʼ chʼʌmbeyob i sujm chaʼan maʼañic mi caj i tilel Armagedón cheʼ miʼ yujtel jiñi Segunda Guerra Mundial. Tsiʼ ñaʼtayob chaʼan miʼ cajel ñʌchʼtʌlel i mi caj i ñumen sujbel jiñi wen tʼan. Jin chaʼan, jiñi organización tsiʼ mele jiñi Colegio Superior Bíblico de la Watchtower de Galaad, b chaʼan miʼ chajpan jiñi misionerojob chaʼan miʼ majlelob ti subtʼan tiʼ petol pañimil. I cheʼ bʌ woli jiñi guerra tsiʼ choco majlel cabʌl hermanojob ti yan tac bʌ país chaʼan miʼ subob jiñi wen tʼan. Cheʼ jaʼel, tsiʼ mele jiñi Curso en el Ministerio Teocrático c chaʼan miʼ coltan jiñi hermanojob chaʼan miʼ sujtelob ti ñumen wem bʌ xcʌntesa. Jiñi tsaʼ bʌ mejli ti jimbʌ ora maʼañic i sujmlel yilal, pero pejtelel iliyi tsiʼ chajpa i wiñicob Dios chaʼan jiñi eʼtel muʼ bʌ caj i tilel.

¹³ Tsiquil mi laj qʼuel chaʼan Jehová tsiʼ tojʼesa majlel i tejclum ti jimbʌ ora wen wocol bʌ. Cʼʌlʌl bajcheʼ tsaʼ ujti jiñi Segunda Guerra Mundial cʼʌlʌl ili ora, jiñi i testigojob Jehová an mejlemob ti subtʼan ti cabʌl tejclum. Jin chaʼan, yonlel lac piʼʌlob an i cʌñʌyob Jehová i woliʼ sujbel jiñi wen tʼan tiʼ pejtelel pañimil.

14. ¿Chucoch miʼ mejlel lac ñop muʼ bʌ i yʌl jiñi organización yicʼot jiñi ancianojob? (Apocalipsis 2:1; qʼuele jaʼel jiñi foto).

 ¹⁴ Ili ora, jiñi añoʼ bʌ ti jiñi Junmojt muʼ bʌ i pʌsob bij miʼ chʌn sʌclañob i coltaya Cristo. Miʼ chaʼleñob wersa chaʼan pejtelel chuqui miʼ yʌlob cheʼʌch bajcheʼ miʼ mulan Jehová yicʼot Jesús. I miʼ cʼʌñob jiñi superintendentejob chaʼan circuito yicʼot jiñi ancianojob chaʼan miʼ subeñob jiñi congregación tac jiñi yom bʌ miʼ mejlel. d La cujil chaʼan pejtelel jiñi ancianojob waʼchocobiloʼ bʌ añob ti «ñoj bʌ i cʼʌb» Jesús (pejcan Apocalipsis 2:1). An i tajol mi caj i tajob i sajtemal come xmulilob, cheʼʌch bajcheʼ tsaʼ ujti tiʼ tojlel Moisés, Josué yicʼot jiñi apóstolob (Nm. 20:12; Jos. 9:14, 15; Rom. 3:23). Pero la cujil chaʼan Jesús woliʼ tojʼesan jiñi xucʼul bʌ xyaj eʼtel yicʼot jiñi ancianojob, i mi caj i bej mel «cʼʌlʌl cheʼ tiʼ yorajlel i jilibal pañimil» (Mat. 28:20). Miʼ mejlel lac ñop chaʼan Jesús woliʼ tojʼesañonla majlel tiʼ tojlel ili hermanojob.

I WENLEL CHEʼ MI LAC CHɅN JACʼ MUʼ BɅ I SUBEÑONLA JEHOVÁ

15, 16. ¿Chuqui mi laj cʌn tiʼ tojlel jiñi muʼ bʌ i yʌcʼob chaʼan Jehová miʼ tojʼesañob majlel?

¹⁵ Cheʼ mi lac chʌn jacʼ muʼ bʌ i subeñonla Jehová añʌch cabʌl i wenlel. Jiñʌch muʼ bʌ i pʌsbeñonla tsaʼ bʌ ujti tiʼ tojlel Andy yicʼot Robyn. Tsiʼ jacʼʌyob muʼ bʌ i yʌl jiñi Biblia chaʼan mach cʼʌñʌlic cabʌl chuqui añob i chaʼan (Heb. 13:5). Cheʼ bajcheʼ jiñi tsaʼ mejli i chaʼleñob coltaya ti construcción. Jiñi hermana Robyn miʼ yʌl: «An chumleyon lon ti otot tac mach bʌ colemic, i an i tajol maʼañic baqui mi lon c chajpan chuqui mi lon j cʼux. Cheʼ jaʼel mic wen mulan c locʼsan foto tac, pero tsaʼ c choño jiñi j cámara yicʼot yan tac bʌ muʼ bʌ j cʼʌn ti locʼ foto. Wen chʼijyemʌch tsaʼ cubi c bʌ, pero tsaʼ cʌlʌ chaʼan mi caj c lajin Sara, maʼañic bʌ tsiʼ chʌn ñaʼta jiñi tsaʼ tac bʌ i cʌyʌ» (Heb. 11:15). ¿I bajcheʼ miʼ yubiñob i bʌ? Robyn miʼ bej al: «Wen tijicñayon lon come woli lon cʌqʼuen Jehová jiñi ñumen wem bʌ. Cheʼ mi lon c melben i yeʼtel miʼ coltañon lon c ñaʼtan bajcheʼ yilal miʼ cajel yaʼ ti tsijiʼ bʌ pañimil». Andy miʼ yʌl jaʼel: «Maʼañic yambʌ eʼtel muʼ bʌ i ñumen aqʼueñonla lac tijicñʌyel».

¹⁶ ¿Baqui bʌ yambʌ i wenlel cheʼ mi lac chʌn jacʼ chuqui miʼ subeñonla Jehová? Laʼ laj qʼuel tsaʼ bʌ ujti tiʼ tojlel juntiquil hermana i cʼabaʼ Marcia. Cheʼ bʌ tsaʼ loqʼui ti escuela tsiʼ  ñaʼta chaʼan mi caj i yochel bajcheʼ precursora, cheʼʌch bajcheʼ an subentiyonla lac mel (Mat. 6:33; Rom. 12:11). Marcia miʼ yʌl: «Tsaʼ subentiyon chaʼan mi caj cʌqʼuentel jumpʼejl beca chʌmpʼejl jab ti jumpʼejl universidad. Pero joñon com c ñumen melben i yeʼtel Jehová, jin chaʼan tsaʼ j cʌñʌ yambʌ eʼtel chaʼan miʼ mejlel c taj taqʼuin i cajñel bajcheʼ precursora. Weñʌch tsaʼ bʌ c mele. Ili ora precursorajon i an calʌ eʼtel, i mic mejlel ti coltaya ti Betel bajcheʼ voluntaria externa yicʼot an c taja yambʌ bendición tac tiʼ melol i yeʼtel Jehová».

17. ¿Bajcheʼ tac yambʌ miʼ coltañonla cheʼ mi lac jacʼ muʼ bʌ i subeñonla Jehová? (Isaías 48:17, 18).

¹⁷ Jiñi i yorganización Jehová miʼ yʌqʼueñonla ticʼojel muʼ bʌ i coltañonla chaʼan maʼañic mi lac yajlel ti cʌlʌx sʌclʌntel chubʌʼañʌl yicʼot chaʼan maʼañic mi lac mel mach tac bʌ weñic. I weñʌch cheʼ bʌ mi lac jacʼ come maʼañic mi lac taj wocol i cheʼ jaʼel tijicñayonla (1 Tim. 6:9, 10). Cheʼ bajcheʼ jiñi miʼ mejlel la cʌcʼ lac pusicʼal tiʼ melol i yeʼtel Jehová, i jiñʌch muʼ bʌ i ñumen aqʼueñonla lac tijicñʌyel yicʼot lac ñʌchʼtʌlel (pejcan Isaías 48:17, 18).

18. ¿Chucoch a wom a jacʼ chuqui miʼ subeñet Jehová tiʼ pejtelel ora?

¹⁸ Jehová mi caj i bej cʼʌn jiñi wiñicob waʼchocobiloʼ bʌ i chaʼan chaʼan miʼ tojʼesan majlel i tejclum cheʼ bʌ wolix jiñi ñuc bʌ wocol yicʼot ti jiñi Mil jab i Yumʌntel Cristo (Sal. 45:16). ¿Muʼ ba caj lac chʌn jacʼ ti jumpʼejl lac pusicʼal chuqui mi lac subentel anquese mach jiñic muʼ bʌ lac ñumen mulan? Mi ti ili ora mucʼʌch lac jacʼ tʼan mach wocolic mi caj la cubin ti talto bʌ qʼuin. Mi la com lac chʌn jacʼ bajcheʼ miʼ tojʼesañonla majlel Jehová yomʌch mi lac jacʼ chuqui miʼ subeñoñobla jiñi waʼchocobiloʼ bʌ i chaʼan (Is. 32:1, 2; Heb. 13:17). An cabʌl chuqui miʼ pʌsbeñonla chaʼan jiñʌch Jehová woli bʌ i tojʼesañonla majlel, chaʼan woliʼ coltañonla chaʼan maʼañic mi lac taj wocol i chaʼan mi caj i coltañonla chaʼan mi laj cʼotel yaʼ ti tsijiʼ bʌ pañimil baqui mi caj lac chumtʌl tiʼ pejtelel ora.