Pero Jehová yom chaʼan mi lac chʌn pijtan jinto miʼ cʼotel i yorajlel aqʼuebil bʌ i chaʼan. ¿Chucoch yom Jehová chaʼan mi lac chʌn pijtan? ¿I chuqui mi caj i coltañonla chaʼan mi lac chʌn pijtan yicʼot lac tijicñʌyel?

¿CHUCOCH YOM JEHOVÁ CHAʼAN MI LAC CHɅN PIJTAN?

Jiñi Biblia miʼ yʌl: «Lac Yum wolito i pijtañetla jinto mi laʼ sutqʼuin laʼ bʌ, chaʼan miʼ pʌsbeñetla i yutslel i pusicʼal. Yom i pʼuntañetla, come tojʌch lac Yum Dios. Tijicñayob pejtelel muʼ bʌ i pijtañob lac Yum» (Is. 30:18). Isaías tiʼ subeyob ili tʼan tac jiñi maʼañic bʌ tsiʼ jacʼʌyob tʼan (Is. 30:1). Pero tiʼ tojlel jiñi judíojob xucʼuloʼ bʌ, ili tʼan tac tsiʼ coltayob chaʼan miʼ tajob i pijtaya. Ili miʼ mejlel i coltañonla jaʼel ili ora.

Cheʼ jiñi, ¿chucoch yom mi lac chʌn pijtan? Come Jehová wolito (choncolto) i pʌs i pijt jaʼel. Yujilix jala mi caj i chʼʌm tilel i jilibal ili pañimil, woli (yʌquel) jax i pijtan chaʼan miʼ cʼotel i yorajlel (Mat. 24:36). Cheʼ bʌ miʼ cʼotel jiñi qʼuin, mi caj i pʌs chaʼan pejtelel chuqui an i yʌlʌ Satanás tiʼ tojlel Jehová yicʼot tiʼ tojlel i wiñicob mach i sujmic. Cheʼ jiñi, Satanás yicʼot pejtelel muʼ bʌ i coltañob mi caj i jisʌntelob, pero jiñi i wiñicoʼ bʌ Jehová mi caj i coltʌntelob.

Cheʼ wolito lac pijtan tajol Jehová maʼañic mi caj i jisan pejtelel lac wocol, pero miʼ subeñonla chaʼan mucʼʌch i mejlel la cubin lac tijicñʌyel. Isaías tsiʼ yʌlʌ chaʼan tijicña miʼ mejlel lac chʌn pijtan chaʼan miʼ tsʼʌctiyel jiñi albil bʌ i chaʼan Jehová (Is. 30:18). ¿Bajcheʼ? Laʼ laj qʼuel chʌnchajp muʼ bʌ mejlel i coltañonla.

MIʼ MEJLEL LA CUBIN LAC TIJICÑɅYEL CHEʼ WOLITO LAC PIJTAN

Ñaʼtan chuqui wem bʌ miʼ yujtel ti a tojlel. Jiñi rey David tsiʼ qʼuele cabʌl jontolil (Sal. 37:35). Pero tsiʼ yʌlʌ: «Ñʌchʼchocon a bʌ ti lac Yum. Pijtan lac Yum tiʼ xucʼtilel a pusicʼal. Mach a chaʼlen tsic pusicʼal cheʼ miʼ pʼojlel i chubʌʼan jini muʼ bʌ i mel jontolil» (Sal. 37:7). I cheʼʌch tsiʼ mele bajcheʼ iliyi. Tsiʼ wen ñaʼta tsaʼ bʌ i yʌlʌ Jehová chaʼan mi caj i coltan. Cheʼ jaʼel, tsiʼ ñaʼta pejtelel chuqui am bʌ i mele tiʼ tojlel (Sal. 40:5). Mi joñonla jaʼel mucʼʌch lac ñaʼtan jiñi wen tac bʌ miʼ yujtel ti lac tojlel, mach wocolic mi caj la cubin chaʼan mi lac chʌn pijtan.

 Laʼ la cʌqʼuen i ñuclel Jehová tiʼ pejtelel ora. Miʼ ñaʼtʌntel chaʼan tsaʼ bʌ i tsʼijbu jiñi Salmo 71, jiñʌch David, yaʼi tiʼ sube Jehová: «Joñon mi caj c pijtañet tiʼ pejtelel ora. Ñumen mij cʼuxbiñet wʌle bajcheʼ ti yambʌ ora. Ñumento mi caj j cʼuxbiñet» (Sal. 71:14). ¿I chuqui tsiʼ mele cheʼ bʌ wolito i pijtan? Tsiʼ yʌqʼue i ñuclel Jehová cheʼ bʌ tsiʼ yʌcʼʌ ti cʌñol yicʼot tsiʼ cʼʌyibe cʼay tac (Sal. 71:16, 23). Jiñʌch muʼ bʌ i mejlel lac mel jaʼel, miʼ mejlel la cʌqʼuen i ñuclel Jehová ti subtʼan, cheʼ mi la cʌl la quicʼot la camigojob o lac familia chaʼan bʌ Jehová yicʼot cheʼ mi laj cʼʌyiben cʼay tac. Jin chaʼan, cheʼ bʌ mi lac chaʼlen cʼay yaʼ ti tempa bʌ, laʼ lac wen ñaʼtan chuqui miʼ yʌl jiñi i letrajlel tac. Jiñi mi caj i coltañonla chaʼan tijicña mi lac chʌn pijtan jinto cheʼ bʌ Jehová miʼ tsʼʌctesan albil bʌ i chaʼan.

Laʼ lac ñusan qʼuin la quicʼot jiñi hermanojob. Cheʼ bʌ David tsiʼ ñusa wocol, tiʼ sube Jehová: «Tiʼ tojlel a chaʼañoʼ bʌ mi caj c ñaʼtan a cʼabaʼ, come utsʼatet» (Sal. 52:9). Cheʼ bʌ David tsiʼ ñusa qʼuin yicʼot yambʌ israelitajob tsiʼ taja i tijicñʌyel. Joñonla jaʼel miʼ mejlel lac ñusan qʼuin la quicʼot jiñi hermanojob yaʼ ti tempa bʌ, ti subtʼan o cheʼ bʌ an chuqui tac yambʌ mi lac mel la quicʼotob (Rom. 1:11, 12).

Laʼ lac pʼʌtʼesan lac pijtaya ti Jehová. Salmo 62:5 miʼ yʌl: «Tiʼ ñʌchʼtilel c pusicʼal mi cʌqʼuen c bʌ Dios, come tilem ti Dios chuqui wolic pijtan». Wen ñucʌch i cʼʌjñibal cheʼ pʼʌtʌl jiñi lac pijtaya chaʼan maʼañic mi lac lujbʼan lac pijtan, ñumento mi wolix i jalʼan mi la cubin. Yomʌch mi lac wen ñop chaʼan Jehová mucʼʌch caj i tsʼʌctesan jiñi albil bʌ i chaʼan, mach yʌlʌyic bajcheʼ jalel yom mi lac pijtan. ¿Bajcheʼ miʼ mejlel lac pʼʌtʼesan jiñi lac pijtaya? Jiñʌch cheʼ mi lac pejcan i Tʼan Dios. Jumpʼejl ejemplo, laʼ laj qʼuel jiñi profecía tac tsaʼix bʌ tsʼʌctiyi, i laʼ laj qʼuel bajcheʼ miʼ taj i bʌ jumpʼejl texto yicʼot yambʌ i chuqui miʼ pʌsbeñonla tiʼ tojlel Jehová (Sal. 1:2, 3). Cheʼ jaʼel, laʼ lac chʌn cʼajtiben Jehová chaʼan miʼ coltañonla chaʼan lʌcʼʌl mi la cajñel tiʼ tojlel jinto miʼ tsʼʌctiyel pejtelel jiñi albil bʌ i chaʼan (Jud. 20, 21).

Cheʼ bajcheʼ jiñi rey David, miʼ mejlel lac ñop chaʼan Jehová woliʼ qʼuel jiñi muʼ bʌ i pijtañob tiʼ tojlel yicʼot chaʼan miʼ pʌsbeñob i cʼuxbiya (Sal. 33:18, 22). Jin chaʼan, chaʼan tijicña mi lac chʌn pijtan chaʼan miʼ tsʼʌctesan Jehová jiñi albil bʌ i chaʼan, laʼ lac ñaʼtan chuqui tac wem bʌ miʼ yujtel ti lac tojlel, laʼ la cʌqʼuen i ñuclel Dios, laʼ lac ñusan qʼuin la quicʼot jiñi hermanojob yicʼot laʼ lac chʌn pʼʌtʼesan jiñi lac pijtaya.