1. ¿Jala mi caj i luʼ majlelob ti panchan jiñi ungidojob wʌʼto bʌ añob ti Lum?

 TI WAJALI jiñi i testigojonbʌla Jehová mi laj cʼajtiben lac bʌ: «¿Jala mi caj i majlelob ti panchan jiñi ungidojob cʌylemobto bʌ?». Ti ñaxan tsaʼ ñaʼtʌnti chaʼan cheʼ bʌ tsaʼix ñumi Armagedón, tajol an wʌʼto bʌ mi caj i jumucʼ ajñelob ila ti Lum. Pero ti jiñi La Atalaya 15 chaʼan julio 2013, tsaʼ tsictesʌnti chaʼan pejtelel wʌʼto bʌ añob ti Lum mi caj i majlelob ti panchan cheʼ bʌ maxto tejchi jiñi Armagedón (Mat. 24:31).

2. ¿Chuqui tajol mi laj cʼajtiben lac bʌ? ¿I chuqui mi caj laj qʼuel ti ili estudio?

² Pero tajol mi laj cʼajtiben lac bʌ: Cheʼ bʌ miʼ tejchel jiñi i «yorajlel cabʌl wocol», ¿chuqui mi caj i chaʼleñob jiñi yambʌ tiñʌmeʼ tac woli (choncol) bʌ i melbeñob i yeʼtel Jehová? (Mat. 24:21; Juan 10:16). Tajol an muʼ bʌ i ñaʼtañob chaʼan lac bajñelix mi caj laj cʌytʌl i maʼañic mi caj lac ñaʼtan chuqui yom mi lac mel cheʼ bʌ maʼañix wʌʼañob jiñi ungidojob. Mi caj laj qʼuel chaʼpʼejl relato muʼ bʌ i mejlel i yʌqʼueñonla lac ñaʼtan bajcheʼ jiñi. Pero mi caj laj qʼuel jaʼel chaʼan an cabʌl chuqui miʼ pʌsbeñonla chaʼan mach yomic mi lac pensarin lac bʌ.

 JIÑI MAʼAÑIC BɅ MI CAJ I YUJTEL

3, 4. ¿Chuqui tajol miʼ ñaʼtañob chaʼtiqui uxtiquilob, i chucoch?

³ Tajol an muʼ bʌ i ñaʼtañob chaʼan jiñi hermanojob mi caj i cʌy i melbeñob i yeʼtel (troñel) Jehová cheʼ bʌ jiñi Junmojt muʼ bʌ i pʌsob bij mach wʌʼix añob ila ti Pañimil. ¿Chucoch? Mi caj laj qʼuel chaʼpʼejl relato muʼ bʌ i mejlel i yʌqʼueñob i ñaʼtan chaʼan cheʼ mi caj i yujtel. Jiñi ñaxam bʌ jiñʌch tsaʼ bʌ ujti tiʼ tojlel jiñi ñuc bʌ sacerdote Jehoiadá. Jehoiadá yicʼot i yijñam, Jehosabeat, tsiʼ cʌntayob juntiquil chʼiton i cʼabaʼ Jehoás i tsiʼ coltayob chaʼan miʼ sujtel ti wem bʌ rey. Jehoás chʌn lʌcʼʌl tsaʼ ajñi tiʼ tojlel Jehová cheʼ bʌ Jehoiadá cuxulto, pero cheʼ bʌ tsaʼ chʌmi, Jehoás tsaʼ caji i mel mach tac bʌ weñic. Jiñix tsaʼ caji i ñʌchʼtan jiñi yambʌ añoʼ bʌ i yeʼtel yaʼ ti Judá, i ti wiʼil tsiʼ cʌyʌ Jehová (2 Cr. 24:2, 15-19).

⁴ Jiñi yambʌ muʼ bʌ caj laj qʼuel miʼ taj ti tʼan chuqui tsaʼ ujti tiʼ tojlel jiñi xñoptʼañob tsaʼ bʌ chumleyob cheʼ bʌ jiñi apóstolob tsaʼix luʼ chʌmiyob. Jiñi cojix bʌ apóstol tsaʼ bʌ chʌmi jiñʌch Juan, pero cheʼ bʌ cuxulto tsiʼ colta cabʌl hermanojob chaʼan xucʼul miʼ yajñelob ti Jehová (3 Juan 4). I cheʼ bajcheʼ tsiʼ meleyob jiñi yambʌ apóstolob, tsiʼ chaʼle wersa chaʼan miʼ cʌntan jiñi congregación chaʼan maʼañic miʼ yochel jiñi cʌntesa tac mach bʌ i sujmic (1 Juan 2:18; 2 Tes. 2:7). Pero cheʼ bʌ tsaʼ chʌmi, jiñi mach bʌ i sujmic cʌntesa ti ora tsaʼ pujqui yaʼ ti congregación tac, lajal bajcheʼ jumpʼejl cʼamʌjel ora bʌ miʼ pujquel.

5. ¿Chuqui jiñi mach bʌ añic mi caj i yujtel?

⁵ ¿Cheʼ ba mi caj i yujtel tiʼ tojlel jiñi yambʌ tiñʌmeʼ tac cheʼ bʌ jiñi ungidojob miʼ majlelob ti panchan? ¿Muʼ ba caj i cʌyob Jehová cheʼ bajcheʼ tsiʼ mele Jehoás? ¿Muʼ ba caj i yochel jiñi mach bʌ i sujmic cʌntesa bajcheʼ tsaʼ ujti ti wajali? ¡Mach cheʼiqui! Anquese mach chʌn wʌʼix añob jiñi ungidojob, la cujil chaʼan jiñi yambʌ tiñʌmeʼ tac xucʼul mi caj i bej melbeñob i yeʼtel Jehová i wen mi caj i yajñelob. ¿Bajcheʼ la cujil?

TIʼ PEJTELEL ORA MI CAJ I CHʼUJUTESɅNTEL JEHOVÁ CHEʼ BAJCHEʼ MIʼ MULAN

6. ¿Baqui bʌ jiñi uxchajp muʼ bʌ caj laj qʼuel?

⁶ La cujil chaʼan Jehová tiʼ pejtelel ora mi caj i chʼujutesʌntel cheʼ bajcheʼ miʼ mulan. ¿Bajcheʼ la cujil? Come jiñi Biblia miʼ pʌsbeñonla chaʼan ili ora mach lajalix bajcheʼ tiʼ yorajlel jiñi israelitajob yicʼot cheʼ bʌ tsaʼix luʼ chʌmiyob jiñi apóstolob. Jin chaʼan, mi caj laj qʼuel ili uxchajp: 1) Jiñi tsaʼ bʌ ujti tiʼ yorajlel Israel, 2) cheʼ bʌ tsaʼix luʼ chʌmiyob jiñi apóstolob, yicʼot 3) woli bʌ i yujtel ili ora, muʼ bʌ i yʌl jiñi Biblia bajcheʼ «i yorajlel chaʼan miʼ tsijibtesʌntel pejtelel» chuqui an (Hech. 3:21).

7. ¿Chucoch mach yomic miʼ yubiñob i chʼijyemlel jiñi israelitajob xucʼuloʼ bʌ cheʼ bʌ tsiʼ qʼueleyob chaʼan jiñi tejclum yicʼot jiñi reyob woliʼ melob mach tac bʌ weñic?

⁷ Tiʼ yorajlel jiñi israelitajob. Cheʼ bʌ tsʼitaʼ jachix yom chaʼan miʼ chʌmel, Moisés tiʼ sube jiñi israelitajob: «Cujil cheʼ bʌ tsaʼix chʌmiyon mi caj laʼ bibʼesan laʼ bʌ tiʼ wut lac Yum. Mi caj laʼ ñusʌben i mandar lac Yum tsaʼ bʌ cʌqʼueyet» (Dt. 31:29). Cheʼ jaʼel tiʼ subeyob chaʼan mi maʼañic miʼ jacʼob tʼan mi caj i chujquelob i mi caj i pʌjyelob majlel ti yambʌ tejclum (Dt. 28:35, 36). ¿Cheʼʌch ba tsaʼ ujti? Cheʼʌchi. Ti wiʼil, cabʌl reyob tsiʼ ñusʌbeyob i tʼan Jehová i jiñi tejclum cheʼʌch tsiʼ mele jaʼel. Jin chaʼan, Jehová tsiʼ yʌqʼueyob i toj i mul i ti wiʼil tsaʼ jili jiñi reyob ti Israel (Ez. 21:25-27). Pero pejtelel iliyi tsiʼ colta jiñi israelitajob xucʼuloʼ bʌ ti Jehová, come cheʼ bʌ tsiʼ qʼueleyob chaʼan tsaʼʌch tsʼʌctiyi tsaʼ bʌ wʌn ajli tsiʼ yʌqʼueyob  i pʼʌtʌlel chaʼan miʼ bej melbeñob i yeʼtel Jehová (Is. 55:10, 11).

8. ¿Chucoch maʼañic miʼ toj sajtel lac pusicʼal chaʼan tsaʼ jejmi jiñi congregación cheʼ bʌ tsaʼ laj chʌmiyob jiñi apóstolob?

⁸ Cheʼ bʌ tsaʼix luʼ chʌmiyob jiñi apóstolob. Cheʼ bʌ tsaʼ ujti iliyi jiñi congregación tsaʼ jejmi, i maʼañic miʼ toj sajtel lac pusicʼal chaʼan iliyi, ¿chucoch? Come Jesús tsiʼ yʌlʌ chaʼan mi caj i yochel cʌntesa tac mach bʌ i sujmic (Mat. 7:21-23; 13:24-30, 36-43). Cheʼ jaʼel cheʼ bʌ cuxulobto jiñi apóstol Pablo, Pedro yicʼot Juan tsiʼ yʌlʌyob chaʼan ti jimbʌ ora wolix (yʌquelix) i yochel jiñi mach bʌ i sujmic cʌntesa (2 Tes. 2:3, 7; 2 Ped. 2:1; 1 Juan 2:18). Ti wiʼil, cheʼ bʌ tsaʼ chʌmi jiñi cojix bʌ apóstol, jiñi tsaʼ bʌ i cʌyʌyob i sujmlel tsaʼ cʌleyob tiʼ cʼʌb jiñi Ñuc bʌ Babilonia. Jiñi tsaʼ bʌ i yʌlʌ Jesús tsaʼʌch tsʼʌctiyi.

9. ¿Chucoch mach lajalic ili ora bajcheʼ tiʼ yorajlel jiñi israelitajob yicʼot cheʼ tsaʼix laj chʌmiyob jiñi apóstolob?

⁹ «I yorajlel chaʼan miʼ tsijibtesʌntel pejtelel» chuqui an. Ili ora mach wis lajalic bajcheʼ tiʼ yorajlel jiñi israelitajob mi jiñic cheʼ bʌ tsaʼ laj chʌmi jiñi apóstolob i tsaʼ pam pujqui jiñi mach bʌ i sujmic cʌntesa tac. La cujil chaʼan chumulonla «ti jiñi cojix tac bʌ qʼuin» (2 Tim. 3:1). Pero jiñi Biblia miʼ pʌsbeñonla jaʼel chaʼan cheʼ bʌ tsaʼ tejchi jiñi cojix tac bʌ qʼuin, tsaʼ tejchi jaʼel jiñi i yorajlel i tsijibtesʌntel pejtelel chuqui an, iliyi ñumen ñucto i cʼʌjñibal i mi caj i ñumen jalʼan (Hech. 3:21). Tsaʼ tejchi ti 1914 i mi caj i yujtel cheʼ bʌ pejtelel lac piʼʌlob junyajl tojobix i miʼ sujtel ti jumpʼejl paraíso ili Pañimil. ¿I chuqui tsiʼ mele Jehová ti 1914? Tsiʼ waʼchoco Jesús bajcheʼ rey yaʼ ti panchan, i Jesús yaʼʌch tilem tiʼ pʼolbal jiñi rey David. I mach cojach jiñi, ti wiʼil, Jehová tsiʼ colta jiñi i wiñicob chaʼan miʼ chaʼ chʼujutesañob cheʼ bajcheʼ miʼ mulan (Is. 2:2-4; Ez. 11:17-20). Pero ¿muʼ ba caj i chaʼ bibʼesʌntel jiñi i chʼujutesʌntel Jehová?

10. a) ¿Chuqui miʼ yʌl jiñi Biblia chaʼan i chʼujutesʌntel Jehová ili ora? (Isaías 54:17). b) ¿Chucoch miʼ tijicñesañonla muʼ bʌ i yʌl Isaías?

¹⁰ (Pejcan Isaías 54:17). Ili profecía miʼ yʌl: «Maʼanic mi junchajpic eʼtijibʌl chaʼan guerra muʼ bʌ mejlel i jisañet». Ili versículo woliʼ tsʼʌctiyel ili ora. I cheʼ jaʼel woliʼ tsʼʌctiyel ili tʼan tac: «Mi caj j cʌntesan pejtel a walobilob. Mi caj cʌqʼueñob i ñʌchʼtʌlel i pusicʼal mach bʌ yujilic jilel. Mi caj a wʌqʼuentel toj bʌ a pusicʼal, chaʼan xucʼul maʼ wajñel. […] Mach a chaʼlen bʌqʼuen. Tsaʼix lajmi bʌbʌqʼuen bʌ. Maʼanix mi caj i chʌn tajet» (Is. 54:13, 14). Mi jiñicto Satanás «i dios ili pañimil»  mi caj i mejlel i waʼchocon jiñi subtʼan (2 Cor. 4:4). Jiñi i chʼujutesʌntel Jehová maʼañic baʼ ora mi caj i bibʼesʌntel. Maʼañic mi junchajpic eʼtijib muʼ bʌ caj i mejlel i jisañonla.

MUCʼɅCH BɅ CAJ I YUJTEL

11. ¿Bajcheʼ la cujil chaʼan maʼañic mi caj lac bajñel cʌjyel cheʼ bʌ jiñi ungidojob tsaʼix laj majliyob ti panchan?

¹¹ ¿Chuqui jiñi mucʼʌch bʌ caj i yujtel cheʼ bʌ miʼ laj pʌjyelob majlel ti panchan jiñi ungidojob? Laʼ laj cʼajtesan majqui jiñi Xcʌnta tiñʌmeʼ lac chaʼan yicʼot i jol jiñi congregación, jiñʌch Jesucristo. I Jesús tsiʼ yʌlʌ: «Juntiquil jach jiñi Xpʌs bij, jiñʌch Cristo» (Mat. 23:10). Jiñi lac Rey maʼañic baʼ ora mi caj i cʌy i cʌntañonla, jin chaʼan, maʼañic chuqui mi caj lac bʌcʼñan. I sujmʌch, machʌch la cujilic chuqui mi caj i mel chaʼan miʼ coltan i tejclum Dios ti jimbʌ ora, pero an ejemplo tac yaʼ ti Biblia muʼ bʌ i coltañonla chaʼan maʼañic mi lac chaʼlen bʌqʼuen. La laj qʼuel.

12. a) ¿Bajcheʼ tsiʼ cʌnta Jehová jiñi i tejclum cheʼ bʌ tsaʼ chʌmi Moisés? b) ¿I bajcheʼ tsiʼ mele cheʼ bʌ Elías tsaʼ majli ti yambʌ tejclum? (Qʼuele jaʼel jiñi dibujo).

¹² Moisés tsaʼ chʌmi cheʼ bʌ jiñi israelitajob maxto ochemobic ti jiñi Lum tsaʼ bʌ wʌn subentiyob. ¿Chuqui tsaʼ ujti tiʼ tojlel jiñi i tejclum Dios? ¿I bajñel jach ba tsaʼ cʌleyob? Maʼañic, come Jehová tsaʼ ajñi yicʼotob cheʼ xucʼulobʌch jaʼel. Jumpʼejl ejemplo, Jehová tiʼ sube Moisés chaʼan Josué mi caj i chʼʌm tiʼ wenta jiñi tejclum, i wolix i cʌntesan ti jimbʌ ora (Éx. 33:11; Dt. 34:9). Cheʼ jaʼel, an cabʌl wiñicob añobix bʌ i ñaʼtʌbal tsaʼ bʌ aqʼuentiyob tiʼ wenta ti mojt ti mojt israelitajob: Ti mil, ti cien, ti cincuenta yicʼot ti diez (Dt. 1:15). Ili miʼ pʌs chaʼan jiñi i tejclum Dios ti jimbʌ ora wen cʌntʌbil. Yambʌ ejemplo jiñʌch chaʼan bʌ Elías. Cabʌl jab tsiʼ colta jiñi israelitajob chaʼan miʼ chʼujutesañob Jehová. Pero, ti jumpʼejl bʌ qʼuin, Jehová tsiʼ choco majlel ti Judá (2 R. 2:1; 2 Cr. 21:12). ¿I bajñel ba tsaʼ cʌleyob jiñi 10 tribu ti Israel? Maʼañic, come Elías chajpʌbilix i chaʼan Eliseo. Cheʼ jaʼel, an yambʌ xʼaltʼañob chajpʌbiloʼ bʌ chaʼan miʼ coltañob i tejclum Dios (2 R. 2:7). Ili miʼ pʌs chaʼan Jehová tsaʼʌch i tsʼʌctesa i tʼan i tsiʼ bej cʌnta i wiñicob come tiʼ pejtelel ora an majqui tsiʼ chʼʌmʌ tiʼ wenta jiñi i tejclum.

13. ¿Chuqui miʼ pʌsbeñonla Hebreos 13:5b? (Qʼuele jaʼel jiñi foto tac).

¹³ ¿Chuqui mi caj i yujtel maʼ wʌl cheʼ bʌ jiñi ungidojob muqʼuix i luʼ majlelob ti panchan?  Jiñi Biblia jamʌ tsiquil miʼ yʌl chaʼan Jehová maʼañic baʼ ora mi caj i bajñel cʌy i wiñicob (pejcan Hebreos 13:5b). Cheʼ bajcheʼ tsaʼ ujti tiʼ tojlel Moisés yicʼot Elías, jiñi añoʼ bʌ ti jiñi Junmojt muʼ bʌ i pʌsob bij yujilob chaʼan ñuc i cʼʌjñibal miʼ cʌntesan yañoʼ bʌ. I jiñʌch am bʌ i meleyob tilel, an i chajpayob yambʌ hermanojob chaʼan miʼ qʼuelob jiñi eʼtel. Jumpʼejl ejemplo, an i meleyob escuela tac chaʼan miʼ chajpʌntel jiñi ancianojob, jiñi añoʼ bʌ bajcheʼ superintendente chaʼan circuito, jiñi ochemoʼ bʌ ti jiñi Comité chaʼan sucursal, superintendentejob ti Betel yicʼot yan tac bʌ. Cheʼ jaʼel, an i chajpayob tilel jiñi hermanojob ochemoʼ bʌ ili ora bajcheʼ xcoltayajob ti jujumpʼejl comité chaʼan miʼ melob cabʌl eʼtel, i weñʌch an i meleyob. Tiʼ sujm wen chajpʌbilobʌch chaʼan miʼ cʌntañob jiñi i tiñʌmeʼ Cristo.

14. ¿Chuqui miʼ pʌsbeñonla pejtelel tsaʼix bʌ laj qʼuele?

¹⁴ Pejtelel iliyi miʼ pʌsbeñonla jiñi wen ñuc bʌ i cʼʌjñibal ti ili estudio: Cheʼ bʌ jiñi yajcʌbiloʼ bʌ muqʼuix i laj majlelob ti panchan i tsʼitaʼ jachix yom chaʼan miʼ tejchel jiñi Armagedón, jiñi i tejclum Dios mi caj i bej melben i yeʼtel Jehová ila ti Pañimil. Jesús jiñʌch lac Rey, jin chaʼan maʼañic chuqui mi caj i mʌctañonla chaʼan mi lac bej chʼujutesan Jehová. I sujmʌch chaʼan ti jimbʌ ora Gog de Magog, junmojt tejclum tac, mi caj i contrajiñoñobla. Pero maʼañic mi caj i mejlel, i mach jalic mi caj i mel, Jehová mi caj i coltañonla (Ez. 38:18-20). Jiñi apóstol Juan tsiʼ qʼuele ti jumpʼejl ñajal chaʼan «yonlel lac piʼʌlob» woliʼ loqʼuelob «ti jiñi cabʌl wocol», ili miʼ pʌs chaʼan jiñi i tejclum Jehová maʼañic chuqui mi caj i chaʼlen (Apoc. 7:9, 14).

15, 16. Cheʼ bajcheʼ miʼ yʌl Apocalipsis 17:14, ¿chuqui mi caj i melob jiñi muʼ bʌ caj i majlelob ti panchan cheʼ bʌ tsaʼix tejchi Armagedón, i chucoch miʼ tijicñesañonla jiñi?

¹⁵ Pero tajol an muʼ bʌ i cʼajtibeñob i bʌ: ¿I chuqui mi caj i melob jiñi ungidojob cheʼ bʌ yaʼix luʼ añob ti panchan? Jiñi Biblia miʼ tsictesan chaʼan jiñi yumʌlob ti pañimil «mi caj i contrajiñob jiñi Tiñʌmeʼ», pero maʼañic mi caj i mʌlob. ¿Chucoch? Come cheʼ bajcheʼ miʼ yʌl jiñi Biblia: «Jiñi pʌybiloʼ bʌ, jiñi yajcʌbiloʼ  bʌ yicʼot jiñi xucʼuloʼ bʌ», ili yom i yʌl jiñi ungidojob, mi caj i coltañob Jesús (pejcan Apocalipsis 17:14). Ili miʼ pʌsbeñonla chaʼan cheʼ bʌ jiñi ungidojob yaʼix luʼ añob ti panchan mi caj i chaʼleñob guerra yicʼotob jiñi i contrajob Dios, ili jiñʌch jiñi ñaxam bʌ muʼ bʌ caj i melob. ¡Wen utsʼatax iliyi! ¿Chucoch? Come ti ñaxan an ungidojob tsaʼ bʌ i mulayob jatsʼ i tsaʼto bʌ ajñiyob bajcheʼ soldado. Pero tsiʼ cʌñʌyob i sujmlel i tsiʼ cʌyʌyob pejtelel jiñi (Gál. 5:22; 2 Tes. 3:16). Pero cheʼ bʌ yaʼix añob ti panchan, temel yicʼot Cristo yicʼot jiñi ángelob mi caj i chaʼleñob guerra yicʼot jiñi i contrajob Dios.

¹⁶ Laʼ lac ñaʼtan iliyi, ti jiñi ungidojob añoʼ bʌ ili ora an mach bʌ cabʌlobix i pʼʌtʌlel come wen ñoxobix. Pero cheʼ bʌ yaʼix añob ti panchan mi caj i sujtelob ti wen pʼʌtʌl bʌ espíritujob i temel mi caj i chaʼleñob guerra yicʼot Jesucristo, jiñi pʼʌtʌl bʌ Rey. I cheʼ bʌ tsaʼix ñumi jiñi Armagedón, temel yicʼot Jesucristo mi caj i coltañob pejtelel jiñi wiñicob xʼixicob chaʼan tojob miʼ sujtelob. Tiʼ sujm, cheʼ bʌ yaʼix añob ti panchan ñumento mi caj i mejlel i coltañoñobla.

17. ¿Bajcheʼ la cujil chaʼan jiñi i wiñicob Dios cuxul mi caj i ñumelob ti Armagedón?

¹⁷ ¿Ochemet ba ti jiñi yambʌ tiñʌmeʼ tac muʼ bʌ caj i chumtʌlob ila ti Pañimil? Mi cheʼʌchi, ¿chuqui yom maʼ mel cheʼ bʌ miʼ tejchel jiñi Armagedón? Cojach iliyi: Maʼ ñop chaʼan Jehová mi caj i coltañet yicʼot maʼ jacʼ tʼan. Tajol mi caj lac subentel lac mel cheʼ bajcheʼ miʼ yʌl Isaías 26:20: «Sujtenla, c piʼʌlob. Ñupʼbenla i tiʼ tac laʼ wotot. Yom mi laʼ poj mujcun laʼ bʌ jinto miʼ lajmel i michʼajel lac Yum». Wen tijicña mi la cubin cheʼ la cujil chaʼan jiñi i wiñicob Dios ila ti Lum yicʼot yaʼ ti panchan maʼañic chuqui mi caj i chaʼleñob. Cheʼ bajcheʼ jiñi apóstol Pablo, la cujil chaʼan maʼañic chuqui «mi caj i mejlel i tʌtsʼonla tiʼ cʼuxbiya Dios» mi jiñicto «yumʌlob, mi jiñicto jiñi an tac bʌ ili ora o muʼto bʌ caj i tilel» (Rom. 8:38, 39). Mach a ñajʌtesan: Jehová miʼ cʼuxbiñet i maʼañic baʼ ora mi caj i bajñel cʌyet.