1, 2. ¿Chuqui ti ejemplo miʼ coltañonla lac ñaʼtan bajcheʼ miʼ yubin i bʌ Jehová chaʼan jiñi lot tac albil bʌ tiʼ tojlel?

 ÑAʼTANCU chaʼan juntiquil a wamigo miʼ tech i yʌl mach bʌ weñic ti a tojlel i jiñi yambʌyob mucʼʌch i ñopob, i muʼto i pujquel jiñi tʼan. ¿Bajcheʼ yubil mi caj a wubin a bʌ? A wujil chaʼan mach i sujmic tsaʼ bʌ i yʌlʌ. ¿Mach ba chʼijyemic mi caj a wubin? Tajol mi caj a ñaʼtan bajcheʼ yilal mi caj i qʼueletob jiñi yambʌyob (Pr. 22:1).

² Ili miʼ pʌsbeñonla bajcheʼ tsiʼ yubi i bʌ Jehová cheʼ bʌ juntiquil i yalobil yaʼ ti panchan tsiʼ yʌlʌ mach bʌ i sujmic tiʼ tojlel i tsiʼ bibʼesʌbe i cʼabaʼ. Eva tsiʼ ñopo tsaʼ bʌ subenti i tsiʼ yʌcʼʌ i bʌ tiʼ contra Jehová. Tiʼ caj iliyi luʼ xmulilonla mi la quilan pañimil (lac chʼocʼan) yicʼot mi lac chʌmel (Gn. 3:1-6; Rom. 5:12). I jiñi lot tsaʼ bʌ i yʌlʌ Satanás tsiʼ teche cabʌl wocol wʌʼ ti pañimil, bajcheʼ chʌmel yicʼot guerra tac. Jehová mach tijicñayic miʼ yubin i bʌ cheʼ tsaʼ ajli jiñi lot tiʼ tojlel yicʼot cheʼ mi lac ñusan cabʌl wocol, pero mach yomic i yʌl chaʼan chʼijyem jach miʼ ñusan jujumpʼejl qʼuin come jiñi Biblia miʼ yʌl chaʼan jiñʌch jiñi «tijicña bʌ Dios» (1 Tim. 1:11).

3. ¿Chuqui miʼ mejlel lac mel joñonla?

³ Joñonla mi lac mejlel ti coltaya chaʼan miʼ pʌstʌl chaʼan mach i sujmic chuqui tsiʼ yʌlʌ Satanás tiʼ tojlel Jehová. ¿Bajcheʼ?  Jiñʌch cheʼ mi lac jacʼ muʼ bʌ i yʌl Salmo 135:1: «Subula i ñuclel lac Yum». ¿Bajcheʼ mi lac mel iliyi? Jiñʌch cheʼ wen chuqui mi la cʌl tiʼ tojlel Jehová, jiñi chʼujul bʌ i cʼabaʼ. ¿A womʌch baʼ mel? Laʼ laj qʼuel uxchajp muʼ bʌ caj i ñijcan lac pusicʼal chaʼan mi la cʌcʼ ti ñuc i cʼabaʼ Dios.

MI LAC TIJICÑESAN JEHOVÁ

4. Alʌ jumpʼejl ejemplo chaʼan maʼ tsictesan chucoch tijicña miʼ yubin Jehová cheʼ mi la cʌqʼuen i ñuclel (qʼuele jaʼel jiñi foto).

⁴ Jehová miʼ mulan cheʼ mi la cʌqʼuen i ñuclel (Sal. 119:108). Ili mach yomic i yʌl chaʼan jiñi Dios mach bʌ añic i pʼisol i pʼʌtʌlel i cʼʌjñibal i chaʼan cheʼ an chuqui mi lac mel chaʼan mi lac tijicñesʌben i pusicʼal, come mach lajalic bajcheʼ joñonla. Laʼcu lac ñaʼtan iliyi: Juntiquil alʌ xchʼoc miʼ majlel baqui an i papá, miʼ wol mecʼ i miʼ suben: «¡Papá, mic wen cʼuxbiñet!». Jiñi tatʌl wen tijicña miʼ yubin i bʌ, ¿chucoch? ¿Chaʼan baʼ miʼ yubin chaʼan maʼañic miʼ cʼuxbintel yicʼot maʼañic miʼ qʼuejlel ti ñuc? Maʼañic, tijicña miʼ yubin come miʼ mulan chaʼan cheʼʌch miʼ mel jiñi yalʌ chʼoc bajcheʼ jiñi. Yujil chaʼan cheʼ miʼ pʌs i cʼuxbiya yicʼot miʼ qʼuel ti ñuc muʼ bʌ i mel yambʌlob mi caj i coltan chaʼan chʌn tijicña cheʼ bʌ ñuquix. Cheʼʌch tiʼ tojlel Jehová jaʼel, jiñi ñumen wem bʌ tatʌl, tijicña miʼ yubin cheʼ mi la cʌqʼuen i ñuclel.

5. ¿Chuqui mi lac pʌs cheʼ mi la cʌqʼuen i ñuclel Jehová?

⁵ Cheʼ mi la cʌqʼuen i ñuclel Jehová mi lac pʌs chaʼan mach i sujmic jumpʼejl lot tsaʼ bʌ i yʌlʌ Satanás ti lac tojlel. Tsiʼ yʌlʌ chaʼan mi tsaʼ aqʼuentiyonla jumpʼejl wocol mach xucʼulic mi caj la cajñel tiʼ tojlel Dios. Tsiʼ yʌlʌ chaʼan miʼ cʼʌjñibal mi laj cʌy lac melben i yeʼtel (troñel) Dios chaʼan maʼañic chuqui mi lac chaʼlen, jiñʌch muʼ bʌ caj lac mel (Job 1:9-11; 2:4). Pero Job tsiʼ pʌsʌ chaʼan mach i sujmic tsaʼ bʌ i yʌlʌ Satanás. ¿Ixcu joñonla? Ti jujuntiquil miʼ mejlel laj coltʌben i cʼabaʼ Jehová i mi lac tijicñesan cheʼ chʌn xucʼulonla tiʼ tojlel (Pr. 27:11).

6. ¿Bajcheʼ miʼ mejlel lac lajin David yicʼot jiñi levitajob? (Nehemías 9:5).

⁶ Jiñi muʼ bʌ i cʼuxbiñob Dios ti jumpʼejlob i pusicʼal yomob i ñuqʼuesʌbeñob i cʼabaʼ. Jiñi rey David tsiʼ yʌlʌ: «Laʼ c chʼujutesan c Yum ti pejtelel c pusicʼal. Laʼ c chʼujutesan jini chʼujul bʌ i cʼabaʼ ti pejtelel c pʼʌtʌlel» (Sal. 103:1). Cheʼ bʌ David tsiʼ yʌlʌ chaʼan yom i chʼujutesan i cʼabaʼ Dios, yom i yʌl chaʼan yom i yʌqʼuen i ñuclel Jehová. David yom i yʌl chuqui wem bʌ tiʼ tojlel Dios, jiñi utsʼatax bʌ i melbal tac yicʼot pejtelel chuqui  melbil (pʌtbil) bʌ i chaʼan. Yom chaʼan chʼujul miʼ qʼuejlel i cʼabaʼ Dios yicʼot miʼ qʼuejlel ti ñuc, i tsiʼ yʌlʌ chaʼan jiñʌch yom bʌ i mel ti jumpʼejl pusicʼal. Jiñi levitajob tsiʼ yʌqʼueyob i ñuclel Jehová jaʼel. Yicʼotob i pecʼlel tsiʼ yʌlʌyob chaʼan pejtelel chuqui miʼ yʌlob mach jasʌlic chaʼan miʼ mejlel i yʌqʼueñob i ñuclel i cʼabaʼ Dios cheʼ bajcheʼ yom (pejcan Nehemías 9:5). Miʼ mejlel lac ñaʼtan bajcheʼ cʼamel i tijicñʌyel Jehová cheʼ bʌ tsiʼ yubi jiñi tʼan tac.

7. ¿Bajcheʼ miʼ mejlel la cʌcʼ ti ñuc i cʼabaʼ Jehová ti lac subtʼan yicʼot ti laj cuxtʌlel?

⁷ Cheʼ ti jumpʼejl lac pusicʼal mi lac suben yañoʼ bʌ chaʼan bʌ Jehová woli (choncol) la cʌqʼuen i ñuclel jaʼel. Cheʼ mi lac chaʼlen subtʼan la com chaʼan jiñi lac piʼʌlob miʼ cʼotel i wen cʼuxbiñob Jehová cheʼ bajcheʼ joñonla (Sant. 4:8). Jin chaʼan mi lac mulan lac pʌsbeñob jiñi utsʼatax bʌ i melbal tac (chaʼlibal tac), bajcheʼ i cʼuxbiya, cheʼ toj chuqui tac miʼ mel, chaʼan wen an i ñaʼtʌbal yicʼot i pʼʌtʌlel. Yambʌ bajcheʼ mi la cʌqʼuen i ñuclel Jehová jiñʌch cheʼ mi lac chaʼlen wersa lac lajin i melbal (Efes. 5:1). Cheʼ bʌ mi lac mel tajol an muʼ bʌ caj i taj i qʼueloñobla bajcheʼ yilalonla i miʼ cʼajtibeñob i bʌ chucoch cheʼ yilalonla bajcheʼ jiñi (Mat. 5:14-16). Tajol ti jumpʼejl bʌ qʼuin miʼ mejlel lac tsictesʌbeñob. Ti wiʼil, an lac piʼʌlob muʼ bʌ i mulañob i lʌcʼtesañob i bʌ ti Jehová. Cheʼ mi lac mel bajcheʼ iliyi mi la cʌqʼuen i ñuclel Jehová yicʼot mi lac tijicñesʌben i pusicʼal (1 Tim. 2:3, 4).

MI LAC TIJICÑESAN JESÚS

8. ¿Bajcheʼ tsiʼ pʌsʌ Jesús chaʼan yom i yʌcʼ ti ñuc i cʼabaʼ Jehová?

⁸ Maʼañic yambʌ wen i cʌñʌ bʌ Jehová cheʼ bajcheʼ Jesús (Mat. 11:27). Jesús miʼ cʼuxbin jiñi i Tat i tsiʼ pʌsbeyonla cʌytʌl chuqui yom i yʌl cheʼ mi la cʌcʼ ti ñuc i cʼabaʼ Jehová (Juan 14:31). Cheʼ jumpʼejl jax acʼʌlel yom chaʼan miʼ chʌmel, ti jiñi oración tsaʼ bʌ i mele tiʼ sube Jehová: «Tsaʼ cʌqʼueyob i cʌn a cʼabaʼ» (Juan 17:26). ¿Bajcheʼ tsiʼ mele?

9. ¿Chuqui ti lajiya tsiʼ cʼʌñʌ Jesús chaʼan miʼ pʌs bajcheʼ yilal Jehová?

⁹ Jiñi judíojob yujilobix chuqui i cʼabaʼ Dios, jin chaʼan Jesús mach cojach tsiʼ yʌlʌ jiñi i cʼabaʼ Dios, tiʼ tsictesa bajcheʼ yilal (Juan 1:17, 18). Jumpʼejl ejemplo, yaʼ ti Tsʼijbujel Hebreo miʼ yʌjlel chaʼan Jehová wen yujil pʼuntaya (Éx. 34:5-7). Pero Jesús tsiʼ jamʌ pʌsʌ bajcheʼ yilal jiñi i pʼuntaya Jehová cheʼ bʌ tsiʼ yʌlʌ jiñi lajiya chaʼan juntiquil chʼiton tsaʼ bʌ loqʼui majlel tiʼ yotot. Pero cheʼ bʌ tsiʼ chaʼ ñaʼta i bʌ i tsaʼ chaʼ sujti majlel tiʼ yotot, jiñi i papá ñajtto tsiʼ taja i qʼuel i ajñel tsaʼ majli i tajeʼ, tsiʼ wol meqʼue i tsiʼ ñusʌbe i mul. Ili wen tsiquil miʼ pʌs bajcheʼ yilal i pʼuntaya Jehová (Luc. 15:11-32). Tiʼ sujm, Jesús tsiʼ colta lac piʼʌlob chaʼan miʼ chʼʌmbeñob i sujm bajcheʼ mero yilal Jehová.

10. a) ¿Bajcheʼ la cujil chaʼan Jesús tsaʼʌch i cʼʌñʌ i cʼabaʼ i Tat i chaʼan yomʌch chaʼan jiñi yambʌyob miʼ cʼʌñob jaʼel? (Marcos 5:19; qʼuele jaʼel jiñi dibujo). b) ¿Chuqui yom Jesús chaʼan mi lac mel jaʼel?

¹⁰ ¿Yom ba Jesús chaʼan jiñi yambʌ lac piʼʌlob miʼ cʼʌñob i cʼabaʼ i Tat? Cheʼʌchi. Tajol ti jimbʌ ora an wiñicob wen chʼujul bʌ miʼ qʼuelbeñob i cʼabaʼ Dios i jin chaʼan mach weñic miʼ qʼuelob cheʼ miʼ yʌjlel. Pero Jesús tsaʼʌch i yʌcʼʌ ti ñuc jiñi i cʼabaʼ i Tat i maʼañic tsiʼ chʼʌmʌ ti ñuc chuqui miʼ ñaʼtan jiñi wiñicob. Ti jumpʼejl bʌ qʼuin tiʼ tsʼʌca juntiquil wiñic am bʌ i xibʌjlel. Jiñi lac piʼʌlob tsiʼ chaʼleyob bʌqʼuen i tiʼ subeyob Jesús chaʼan miʼ loqʼuel majlel yaʼi (Mar. 5:16, 17). Pero Jesús yom chaʼan miʼ cʌmbeñob i cʼabaʼ Jehová. Jin  chaʼan tiʼ sube jiñi wiñic tsaʼ bʌ i tsʼʌca chaʼan yom miʼ tsictesʌben yambʌyob chuqui tsiʼ mele Jehová, mach jiñic tsaʼ bʌ i mele Jesús (pejcan Marcos 5:19). Jesús, jiñi lac Rey, yom chaʼan mi la cʌcʼ ti cʌjñel jiñi i cʼabaʼ Jehová i cheʼ bʌ mi lac mel bajcheʼ jiñi mi lac tijicñesan (Mat. 24:14; 28:19, 20).

11. ¿Chuqui tiʼ sube Jesús chaʼan miʼ cʼajtiñob ti oración jiñi xcʌntʼañob i chaʼan? Cheʼ bajcheʼ miʼ yʌl Ezequiel 36:23, ¿chucoch wen ñucʌch i cʼʌjñibal?

¹¹ Jesús yujil chuqui yom Jehová: Chaʼan miʼ sʌqʼuesʌntel i cʼabaʼ ti jiñi lot tac albil bʌ tiʼ tojlel. Jin chaʼan tiʼ sube jiñi xcʌntʼañob i chaʼan chaʼan miʼ cʼajtiñob ti oración: «C Tat lojon añet bʌ ti panchan, laʼ sʌqʼuesʌntic a cʼabaʼ» (Mat. 6:9). Yujil chaʼan maʼañic yambʌ ñumen ñuc bʌ i cʼʌjñibal, cojach chaʼan miʼ sʌqʼuesʌntel i cʼabaʼ Dios (pejcan Ezequiel 36:23). I maʼañic yambʌ bajcheʼ Jesús am bʌ i ñumen chaʼle wersa chaʼan miʼ mejlel iliyi. Pero cheʼ bʌ tsiʼ chucuyob tsaʼ jopʼbenti i mul chaʼan woli (yʌquel) i pʼaj i cʼabaʼ Dios, i Jesús wen yujil chaʼan iliyi jiñʌch wen tsʌts bʌ mulil. Jin chaʼan, cheʼ bʌ muʼto caj i chujquel, wen chʼijyem woliʼ yubin i bʌ come yujil chaʼan mi caj i jopʼbentel i mul yicʼot mi caj i tsʌnsʌntel tiʼ caj. Tajol jin cha’an wen woli ti pensar cheʼ bʌ lʌcʼʌlix mi caj i tsʌnsʌntel (Luc. 22:41-44).

12. ¿Chuqui tsiʼ mele Jesús chaʼan miʼ sʌqʼuesʌben i cʼabaʼ i Tat?

¹² Jesús tsaʼ wen ticʼlʌnti, tsiʼ pʼajayob (ñiqʼuisubeyob) yicʼot tsaʼ jopʼbenti i mul. Tsiʼ cuchu pejtelel iliyi come yom i sʌqʼuesʌben i cʼabaʼ i Tat. Maʼañic chuqui tsiʼ bʌcʼña come yujil chaʼan maʼañic tsiʼ mele mach bʌ weñic (Heb. 12:2). Cheʼ jaʼel, yujil chaʼan jiñʌch Satanás woli bʌ i contrajin come yom chaʼan Jesús mach xucʼulic miʼ yajñel tiʼ tojlel Jehová (Luc. 22:2-4; 23:33, 34). Pero maʼañic tsaʼ mejli, Jesús tsiʼ jamʌ pʌsʌ chaʼan Satanás juntiquilʌch xlot i chaʼan i wiñicob Jehová xucʼul miʼ mejlelob ti ajñel anquese miʼ ñusañob tsʌts tac bʌ wocol.

13. ¿Chuqui yom mi lac mel chaʼan mi lac tijicñesan jiñi lac Rey?

¹³ ¿A wom ba a tijicñesan Jesucristo, jiñi a Rey? Mach a cʌy a wʌqʼuen i ñuclel Jehová i coltan yambʌlob chaʼan miʼ qʼuelob bajcheʼ yilal bʌ Dios, cheʼ bajcheʼ jiñi woli a lajin Jesús (1 Ped. 2:21). I cheʼ bajcheʼ Jesús, mi caj a tijicñesan Jehová i mi caj a pʌs chaʼan  Satanás juntiquil jachix xlot mach bʌ la comic laj qʼuel.

MI LAJ COLTAN YAMBɅYOB CHAʼAN MIʼ TAJOB I CUXTɅLEL

14, 15. ¿Chuqui miʼ yujtel cheʼ mi laj coltan yambʌyob chaʼan miʼ cʌñob Jehová?

¹⁴ Cheʼ mi la cʌcʼ ti ñuc i cʼabaʼ Jehová mi laj coltan yañoʼ bʌ chaʼan miʼ tajob i cuxtʌlel. ¿Chucoch mi la cʌl bajcheʼ ili? Come Satanás tsiʼ mʌcbeyob i ñaʼtʌbal jiñi mach bʌ xñoptʼañobic (2 Cor. 4:4). Jin chaʼan cabʌl lac piʼʌlob miʼ ñaʼtañob chaʼan maʼañic Dios, chaʼan ñajt an ti lac tojlel, chaʼan mach i wentajoñicla, chaʼan jontol (simaron) i miʼ yʌqʼuen i toj i mul jiñi muʼ bʌ i melob mach bʌ weñic. Pejtelel iliyi mucʼ jach i bibʼesʌben i cʼabaʼ Jehová i jin chaʼan maʼañic majqui yom i lʌcʼtesan i bʌ tiʼ tojlel. Pero, cheʼ mi lac chaʼlen subtʼan i mi lac suben lac piʼʌlob majqui Dios i bajcheʼ yilal, mi lac pʌs chaʼan jiñi muʼ bʌ i yʌl Satanás mach i sujmic i mi la cʌcʼ ti ñuc jiñi i cʼabaʼ Jehová.

¹⁵ Jiñi Biblia wen an i pʼʌtʌlel. Cheʼ mi lac pʌsben lac piʼʌlob majqui Jehová yicʼot bajcheʼ yilal, utsʼatax chuqui miʼ yujtel, miʼ cʌñob chaʼan pejtelel muʼ bʌ i yʌl Satanás mach i sujmic i miʼ cʼotel i qʼuelob jiñi utsʼatax bʌ i melbal tac Jehová. Cheʼ miʼ cʌñob chaʼan Jehová maʼañic i pʼisol i pʼʌtʌlel miʼ toj sajtelob i pusicʼal (Is. 40:26). Cheʼ jaʼel miʼ ñumen ñopob tiʼ tojlel cheʼ miʼ cʌñob chaʼan toj pejtelel chuqui miʼ mel (Dt. 32:4). Miʼ toj sajtelob i pusicʼal cheʼ miʼ qʼuelob chaʼan cʌlʌxix i ñaʼtʌbal (Is. 55:9; Rom. 11:33). I tijicña miʼ yubiñob jaʼel cheʼ bʌ miʼ cʼotel i qʼuelob chaʼan Jehová cʼuxbiyajʌch (1 Juan 4:8). Cheʼ bʌ miʼ ñumen lʌcʼtesañob i bʌ tiʼ tojlel, miʼ ñumen ñopob chaʼan mucʼʌch i mejlelob ti chumtʌl tiʼ pejtelel ora yicʼot chaʼan miʼ mejlelob ti sujtel tiʼ yalobilob Dios. An lac chaʼan utsʼatax bʌ eʼtel, jiñʌch cheʼ mi laj coltan yambʌyob chaʼan miʼ lʌcʼtesañob i bʌ ti Jehová, i cheʼ mi lac mel woli lac chaʼlen eʼtel la quicʼot (1 Cor. 3:5, 9).

16. ¿Bajcheʼ miʼ mejlel i coltañonla cheʼ mi laj cʌn i cʼabaʼ Dios? Alʌ jumpʼejl ejemplo.

¹⁶ Cheʼ bʌ mi lac tech lac pejcan juntiquil  lac piʼʌl, tajol jiñi ñaxam bʌ mi lac pʌsben jiñʌch i cʼabaʼ Dios. Cheʼ bʌ juntiquil yomʌch i cʌn i sujmlel jasʌl miʼ yubin jiñi chaʼan miʼ tech i chaʼlen wersa i miʼ lʌcʼtesan i bʌ ti Jehová. Jiñʌch tsaʼ bʌ ujti tiʼ tojlel Alía a, an i ñopbal tsaʼ coli, pero pejtelel tsaʼ bʌ pʌsbenti mach chuculic ti Biblia. Mach tijicñayic yaʼ baqui an i mach lʌcʼʌlic tsiʼ yubi i bʌ tiʼ tojlel Dios. Pero cheʼ tsaʼ caji ti estudio yicʼot jiñi Testigojob tsaʼ cʼoti i qʼuel chaʼan ti cabʌl Biblia tsaʼix i locʼsʌbeyob i cʼabaʼ Dios i cojach tsiʼ cʌyʌyob lac Yum. I toj sajtel i pusicʼal cheʼ bʌ tsiʼ cʌñʌ chaʼan i cʼabaʼ Dios jiñʌch Jehová. Ti jimbʌ ora tsaʼ caji i qʼuel bajcheʼ i yamigo, i tsaʼto i yʌlʌ: «¡Jiñi camigo añʌch i cʼabaʼ!». Ili ora tijicña miʼ yubin cheʼ i cʌñʌ Jehová. Yambʌ ejemplo, Steve xñijca música i jiñi i familia judíojob. Pero maʼañic tsiʼ mulaj ochel ti jumpʼejl ñopbalʌl come tsiʼ qʼuele chaʼan tiʼ pejtelel miʼ melob mach bʌ weñic. Cheʼ bʌ tsaʼ chʌmi i mamá, juntiquil i yamigo woli bʌ i yʌqʼuentel estudio tsiʼ pʌyʌ chaʼan miʼ yubin chuqui woliʼ subentel. Cheʼ tsiʼ cʌmbe i cʼabaʼ Dios tsaʼ wen cʼoti tiʼ pusicʼal. Miʼ yʌl: «Maʼañic baʼ c wis ubi jiñi i cʼabaʼ Dios. Ti jimbʌ ora tsaʼ cʼoti j qʼuel chaʼan tiʼ sujm añʌch Dios i miʼ mejlel ti sujtel ti camigo».

17. ¿Chucoch a wom a chʌn ñuqʼuesʌben i cʼabaʼ Jehová? (Qʼuele jaʼel jiñi foto).

¹⁷ Cheʼ bʌ woliyonla ti subtʼan o ti cʌntesa laʼ lac tsictesan majqui Dios yicʼot bajcheʼ yilal. Cheʼ bajcheʼ iliyi mi caj lac ñuqʼuesʌben i cʼabaʼ. Jin chaʼan chʌn coltan yambʌyob chaʼan miʼ cʌñob Jehová. Mi cheʼʌch maʼ mel mi caj a coltañob chaʼan miʼ tajob i cuxtʌlel, mi caj a lajin Jesucristo, i ñumen ñuc bʌ, mi caj a tijicñesan Jehová, jiñi lac Tat am bʌ ti panchan. Ti lac pejtelel laʼ la cʌl bajcheʼ miʼ yʌl jiñi Salmo 145:2: «Mi caj c sub i ñuclel a cʼabaʼ ti pejtelel ora».