TI MIÉRCOLES 18 chaʼan enero, 2023, tsaʼ sujbi chaʼan jiñi hermano Gage Fleegle yicʼot Jeffrey Winder tsaʼ ochiyob jaʼel ti jiñi Junmojt muʼ bʌ i pʌsob bij chaʼan i testigojob Jehová. Ili chaʼtiquil hermanojob wajalix i cajel i melbeñob i yeʼtel (troñel) Jehová.

Jiñi hermano Fleegle tsaʼ coli ti Pensilvania (Estados Unidos). I papá i mamá tsiʼ cʌntesayob, i cheʼ bʌ chʼitonto, jiñi i familia tsaʼ majli ti coltaya baqui ñumen yomto xsubtʼañob. Mach jalic tsaʼ ñumi i jiñi hermano tsiʼ chʼʌmʌ jaʼ ti 20 chaʼan noviembre ti 1988.

Jiñi i papá i mamá tsiʼ chʌn subeyob chaʼan ñumen wen cheʼ miʼ melben i yeʼtel Jehová. Jin chaʼan miʼ pʌyob tiʼ yotot jiñi superintendentejob chaʼan circuito yicʼot betelitajob, cheʼ bajcheʼ jiñi tsiʼ qʼuele chaʼan tijicñayob tiʼ melol i yeʼtel Jehová. I mach jalic tsaʼ ñumi, tsaʼ ochi ti precursor regular ti 1 chaʼan septiembre ti 1989. I cheʼ bʌ an jaxto chaʼpʼejl jab i yochel ti precursor tiʼ tsʼʌctesa yambʌ i meta am bʌ i ñaʼta cheʼ bʌ 12 jaxto i jabilel. Tsaʼ pʌjyi ti Betel yaʼ ti Brooklyn, ti octubre chaʼan 1991.

Tsiʼ chaʼle eʼtel 8 jab ti encuadernación, i cheʼ jiñi tsaʼ pʌjyi ti Departamento chaʼan Servicio. Ti jimbʌ ora tsaʼ ajñi ti jumpʼejl congregación ti ruso, i cheʼ ti 2006 tsaʼ ñujpuñi yicʼot Nadia, i yaʼʌch tsaʼ bej ajñiyob ti Betel. Tiʼ chaʼticlelob tsiʼ chaʼleyob coltaya ti portugués, i ñumen ti 10 jab ti español. Ti wiʼil, jiñi hermano Fleegle tsaʼ pʌjyi yaʼ ti Oficina chaʼan jiñi Comité chaʼan cʌntesa, i cheʼ jiñi yaʼ ti Oficina chaʼan jiñi comité chaʼan servicio. Ti marzo chaʼan 2022 tsaʼ waʼchoconti bajcheʼ Xcoltaya chaʼan jiñi comité chaʼan servicio chaʼan jiñi Junmojt muʼ bʌ i pʌsob bij.

 Jiñi hermano Winder tsaʼ coli ti Murrieta (California). I papá i mamá tsiʼ cʌntesayob jaʼel, i tsiʼ chʼʌmʌ jaʼ ti 29 chaʼan marzo ti 1986. An jaxto jumpʼejl uw tsiʼ chʼʌmʌ jaʼ cheʼ tsaʼ ochi ti precursor auxiliar, i maʼañic tsiʼ cʌyʌ come tsiʼ wen mulaj. Mach jalic tsaʼ ochi ti precursor regular, cheʼ ti 1 chaʼan octubre ti 1986.

Cheʼ bʌ chʼitonto, jiñi hermano Winder tsajñi i julaʼtan chaʼtiquil i yerañob añoʼ bʌ ti Betel. Jiñi tsiʼ ñijcʌbe i pusicʼal chaʼan cheʼ bʌ añix i jabilel miʼ majlel ti Betel jaʼel. Jin chaʼan, ti mayo ti 1990 tsaʼ pʌjyi yaʼ ti Betel ti Wallkill.

Tsaʼ ajñi ti cabʌl departamento, bajcheʼ ti limpieza, ti Departamento chaʼan jiñi hacienda yicʼot ti Oficina chaʼan Betel. Tsaʼ ñujpuñi yicʼot Angela ti 1997, i yaʼ tsaʼ bej cʌleyob ti Betel. Cheʼ ti 2014 tsaʼ chojquiyob majlel ti Warwick, jiñi hermano tsiʼ chaʼle coltaya yicʼot jiñi grupo chaʼan construcción yaʼ ti central mundial. Ti 2016 tsaʼ chaʼ majliyob ti Patterson, yaʼ ti Centro Educativo de la Watchtower, i tsiʼ chaʼle eʼtel ti Servicio chaʼan audio yic’ot video. Tsaʼ ñumi chʌmpʼejl jab, yaʼi jiñi hermano Winder tsaʼ ajñi yaʼ ti Oficina chaʼan jiñi comité chaʼan xʼeʼtelob. Ti marzo chaʼan 2022 tsaʼ waʼchoconti bajcheʼ Xcoltaya chaʼan jiñi comité chaʼan xʼeʼtelob chaʼan jiñi Junmojt muʼ bʌ i pʌsob bij.

Ili hermanojob lac majtañobʌch tilem bʌ ti Jehová (Efes. 4:8). Laʼ lac chʌn cʼajtiben Jehová chaʼan miʼ coltañob ti jiñi ñuc bʌ eʼtel woli bʌ i melob.