Jiñi xñoptʼañob miʼ mejlel i ñaʼtañob chuqui mi caj i melob (chaʼleñob) chaʼan miʼ cʌntañob o miʼ coltañob i bʌ. Pero yomʌch miʼ chʼʌmob ti ñuc jiñi principio tac am bʌ ti Biblia. Ili jiñʌch muʼ bʌ caj i coltañob i qʼuel chaʼan mach weñic cheʼ juntiquil xñoptʼan an i juloñib chaʼan miʼ coltan i bʌ. Laʼ laj qʼuel chuqui miʼ mejlel i coltañonla chaʼan wen chuqui mi lac yajcan lac mel.

Jehová chʼujul miʼ qʼuel laj cuxtʌlel. David yujil chaʼan Jehová jiñʌch muʼ bʌ i yʌqʼueñonla laj cuxtʌlel (Sal. 36:9). Cheʼ juntiquil xñoptʼan tsaʼix i wen ñaʼta chaʼan an chuqui mi caj i cʼʌn i cʌntan i bʌ o chaʼan miʼ cʌntan i chubʌʼan, yom wen tsajal chaʼan maʼañic miʼ low o miʼ tsʌnsan yambʌ quixtañu (Dt. 22:8; Sal. 51:14).

Tiʼ sujm, jin jach chuqui miʼ mejlel laj cʼʌn lac tsʌnsan juntiquil quixtañu. Pero cheʼ an jumpʼejl lac juloñib ñumen ora jach mi lac mejlel ti tsʌnsa, anquese mach yʌlolic lac chaʼan. * Cheʼ jaʼel, mi juntiquil ajxujchʼ woli (choncol) ti bʌqʼuen i miʼ qʼuel chaʼan jiñi yambʌ quixtañu an i juloñib, miʼ mejlel ti ñumen tsʌtsʼan jiñi wocol yicʼot miʼ yujtel tsʌnsa.

Ti jiñi acʼʌlel cheʼ bʌ muʼto caj i chʌmel, Jesús tiʼ sube jiñi xcʌntʼañob i chaʼan chaʼan miʼ sʌclañob jumpʼejl espada, pero mach chaʼañic miʼ cʼʌn i coltañob i bʌ (Lc. 22:36, 38). Tiʼ subeyob bajcheʼ jiñi come an chuqui ñuc bʌ i cʼʌjñibal mi caj i pʌsbeñob: Chaʼan mach yomic miʼ chaʼleñob jatsʼ, mi jiñic to cheʼ an cabʌl muʼ bʌ i contrajiñob (Lc. 22:52). Cheʼ bʌ Pedro tiʼ tsepbe i chiquin  i yaj eʼtel (troñel) jiñi ñuc bʌ xmotomaj, Jesús tiʼ sube: «Chaʼ otsan a machit tiʼ yotot». Ti wiʼil, tsiʼ cʌntesayob junchajp wen ñuc bʌ i cʼʌjñibal, jumpʼejl principio muʼ bʌ i coltañonla cʼʌlʌ ili ora: «Jini muʼ bʌ i chucob machit mi caj i jilelob ti machit» (Mt. 26:51, 52).

Cheʼ bajcheʼ miʼ yʌl Miqueas 4:3 (TNM) jiñi i wiñicob Dios miʼ «sujtesañob jiñi espada ti picob lum i jiñi lanza ti tsepob tsʼusub». Jiñi isujm bʌ xñoptʼañob cʌmbilob chaʼan añob i ñʌchʼtʌlel. Miʼ chʼʌmob ti ñuc jiñi ticʼojel tsaʼ bʌ i yʌcʼʌ jiñi apóstol Pablo: «Mach mi laʼ qʼuextan jontolil» yicʼot «ñʌchʼʌl mi laʼ wajñel yicʼot pejtelel winicob xʼixicob» (Ro. 12:17, 18). Pablo tsiʼ taja cabʌl wocol, junchajp jiñʌch tiʼ tojlel xujchʼob (2 Co. 11:26). Pero maʼañic tsiʼ ñusʌbe i Tʼan Dios chaʼan bajcheʼ yom miʼ cʌntan i bʌ. Tsiʼ ñopo Dios yicʼot muʼ bʌ i yʌl jiñi Tsʼijbujel come jiñʌch «ñumen an [bʌ] i cʼʌjñibal bajcheʼ eʼtijibʌl muʼ bʌ laj cʼʌn ti guerra» (Ec. 9:18).

Mi lac ñumen qʼuel ti ñuc laj cuxtʌlel i mach jiñic chubʌʼañʌl tac. La cujil chaʼan jiñi laj cuxtʌlel mach yaʼic cʌyʌl ti lac chubʌʼan (Lc. 12:15). Mi tsiʼ mʌctayonla juntiquil xujchʼ am bʌ i juloñib, wen jach bajcheʼ yom mi lac jacʼben. Mi maʼañic miʼ cʌyonla, yom wen tsajilonla yicʼot mi lac jacʼ i ticʼojel Jesús: «Jini muʼ bʌ i chilbeñet a chaqueta laʼ i chʼʌm a bujc jaʼel». Ili yom i yʌl chaʼan yom mi la cʌcʼ chuqui jach mi laj cʼajtibentel (Mt. 5:39, 40; Lc. 6:29). * Pero yom wen tsajilonla. Tajol maʼañic mi caj lac taj jiñi wocol mi maʼañic mi lac pʌs ñumel chuqui tac an lac chaʼan yicʼot mi mucʼʌch la cʌcʼ ti cʌñol chaʼan i testigojonla Jehová i maʼañic mi lac sʌclan wocol yicʼot yambʌlob (Pr. 18:10; 1 Jn. 2:16).

Mi lac chʼʌm ti ñuc i conciencia yambʌlob (Ro. 14:21). Mi yaʼ ti congregación miʼ cʼotel ti ñaʼtʌntel chaʼan an juntiquil hermano am bʌ i juloñib, tajol miʼ mejlel ti tejchel wocol yicʼot yambʌ hermanojob. Jiñi laj cʼuxbiya tiʼ tojlel la quermañojob mi caj i coltañonla chaʼan mi laj qʼuelob ti ñuc i mach jiñic jach chuqui bajñel la com, anquese añʌch muʼ bʌ i mejlel lac mel mach bʌ ticʼbilic ti yumʌlob (1 Co. 10:32, 33; 13:4, 5).

Mi lac chaʼlen wersa chaʼan mi lac pʌs wem bʌ lac melbal (2 Co. 4:2; 1 P. 5:2, 3). Laʼ lac ñaʼtan chaʼan juntiquil xñoptʼan an i juloñib chaʼan mi coltan i bʌ tiʼ tojlel yambʌlob. Mi tsaʼix aqʼuenti ticʼojel chaʼan yom miʼ cʌy pero mi maʼañic miʼ jacʼ, mach tojic i melbal miʼ qʼuejlel. Jin chaʼan, maʼañic mi caj i yʌqʼuentel ñuc tac bʌ eʼtel ti congregación. Cheʼʌch miʼ yujtel jaʼel tiʼ tojlel juntiquil xñoptʼan muʼ bʌ i cʼʌn juloñib tiʼ yeʼtel. Ñumen wen cheʼ jiñi hermano miʼ sʌclan yambʌ i yeʼtel. *

Ti tsʼitaʼ jach bʌ tʼan, ti jujuntiquil yom mi lac ñaʼtan bajcheʼ mi caj laj cʌntan lac bʌ yicʼot lac familia, bajcheʼ mi caj laj cʌntan lac chubʌʼan yicʼot chuqui ti eʼtel mi caj lac mel. Pero yom mi lac chʼʌm ti ñuc jiñi principio tac am bʌ ti Biblia, come yaʼʌch mi laj cʌmben i ñaʼtʌbal yicʼot i cʼuxbiya Dios. Jiñi xñoptʼañob tsaʼix bʌ i tajayob i colel tiʼ chaʼan bʌ Dios miʼ qʼuelob ti ñuc jiñi principio tac i miʼ ñaʼtañob chaʼan maʼañic mi caj i cʼʌñob juloñib chaʼan miʼ cʌntañob i bʌ. Yujilob chaʼan maʼañic chuqui mi caj i bʌcʼñañob tiʼ pejtelel ora mi mucʼʌch i qʼuelob ti ñuc jiñi principio tac am bʌ ti Biblia yicʼot mi mucʼʌch i xucʼchocoñob i pusicʼal ti Dios (Sal. 97:10; Pr. 1:33; 2:6, 7).