1, 2. ¿Chucoch yom mi la cʌl bajcheʼ yom mi lac ñuqʼuesʌben i pusicʼal juntiquil tsaʼ bʌ chʌmi i cʌñʌ bʌ? (Qʼuele jiñi foto).

JUNTIQUIL hermana i cʼabaʼ Susi tsiʼ yʌlʌ: «Cheʼ bʌ tsaʼ chʌmi (sajti) lon calobil, lʌcʼʌ jumpʼejl jab tsaʼ c wen ubi lon c chʼijiyemlel». Yambʌ hermano miʼ yʌl chaʼan wen cʼux tsiʼ yubi cheʼ bʌ tsaʼ chʌmi i yijñam. Chʼijiyemtic jax cheʼ mi la cubin chaʼan cabʌl lac piʼʌlob cheʼ miʼ ñusañob bajcheʼ jiñi. Cabʌl hermanojob mach bʌ ñaʼtʌbilic i chaʼañob mi an i familiajob maʼan bʌ mi caj i taj i qʼuelob cheʼ bʌ miʼ tilel jiñi Armagedón. Mi jatet o a cʌñʌ bʌ tsaʼ chʌmi juntiquil tiʼ familia o i yamigo, tajol maʼ cʼajtiben a bʌ: «¿Bajcheʼ miʼ mejlelob ti coltʌntel jiñi woli (choncol) bʌ i ñusañob iliyi?».

² Tajol an la cubi miʼ yʌjlel chaʼan xucʼu xucʼul miʼ lajmel jiñi chʼijiyemlel. Pero ¿cheʼ ba miʼ yujtel tiʼ pejtelel ora? Juntiquil hermana i bajñel jach bʌ tsiʼ yʌlʌ: «Ñumen toj cheʼ mi la cʌl chaʼan muʼ bʌ i lajmesan lac chʼijiyemlel jiñʌch muʼ bʌ lac mel (chaʼlen) ti jujumpʼejl qʼuin». Jiñi lac chʼijiyemlel lajal bajcheʼ lac lojweñal: Mi wen jach bajcheʼ mi lac tsʼʌcan, wen jach mi caj i lajmel. Cheʼ jiñi, ¿bajcheʼ miʼ mejlel laj coltan juntiquil tsaʼ bʌ chʌmi i cʌñʌ bʌ?

3, 4. ¿Chucoch mi lac ñop chaʼan Jehová mucʼʌch i chʼʌmben isujm bajcheʼ yubil mi la cubin cheʼ an majqui miʼ chʌmel lac chaʼan?

³ Ñumen ñuc bʌ baqui mi lac taj i ñuqʼuesʌntel lac pusicʼal yaʼʌch ti Jehová, jiñi lac Tat wen yujil bʌ pʼuntaya (pejcan 2 Corintios 1:3, 4). Cojach Jehová miʼ mejlel i ñumen chʼʌmben isujm bajcheʼ yubil mi la cubin. Dios miʼ suben i wiñicob: «Joñon laʼ Yumon. Mic ñuqʼuesʌbeñetla laʼ pusicʼal» (Is. 51:12; Sal. 119:50, 52, 76).

⁴ Jiñi lac Tat «muʼ bʌ i pʼuntañonla» an chʌmen i chaʼan jaʼel jiñi cʼuxbibil bʌ i chaʼañob, bajcheʼ Abraham (Abrahán), Isaac, Jacob, Moisés yicʼot jiñi rey David (Nm. 12: 6-8; Mt. 22:31, 32; Hch. 13:22). Jiñi Biblia miʼ yʌl chaʼan Dios yomix miʼ cʼotel i yorajlel chaʼan miʼ chaʼ tejchesañob (Job 14:14, 15). Ti jimbʌ ora, tijicña mi caj i yajñelob yicʼot maʼañic mi caj i chʌn cʼamʼañob. Laʼ laj cʼajtesan chaʼan Dios tsiʼ qʼuele bajcheʼ tsaʼ chʌmi jiñi cʼuxbibil bʌ i Yalobil (Mt. 3:17). ¿Bajcheʼ cʼamel tsiʼ yubi i cʼuxel i pusicʼal Jehová? Maʼañic miʼ mejlel lac wen ñaʼtan (Jn. 5:20; 10:17).

5, 6. ¿Bajcheʼ miʼ ñuqʼuesan lac pusicʼal Jehová?

⁵ Ti jumpʼejl lac pusicʼal miʼ mejlel lac ñop chaʼan Jehová mi caj i coltañonla. Mach yomic mi lac bʌcʼñan lac suben chuqui an ti lac pusicʼal yicʼot bajcheʼ yubil mi la cubin. Cheʼ la cujil chaʼan miʼ chʼʌmben isujm bajcheʼ yubil mi la cubin yicʼot cheʼ miʼ ñuqʼuesan lac pusicʼal, miʼ wen pʼʌtʼesañonla. Pero ¿bajcheʼ miʼ mel?

⁶ Junchajp jiñʌch cheʼ miʼ ñuqʼuesan lac pusicʼal ti jiñi «chʼujul bʌ Espíritu» (Hch. 9:31). Jesús tsiʼ yʌcʼʌ i tʼan chaʼan jiñi lac «Tat am bʌ ti panchan» mi caj i yʌqʼuen pʼʌtʌl bʌ i yespíritu «jini muʼ bʌ i cʼajtibeñob» (Lc. 11:13). Susi, tsaʼ bʌ la cʌlʌ ti ñaxan bʌ párrafo, miʼ yʌl: «Mic wen cʼajtiben lojon Jehová chaʼan miʼ pʼʌtʼesan lon c pusicʼal. Cheʼ jajayajl mi lon c mel, mi lon cubin bajcheʼ Dios miʼ yʌqʼuen i ñʌchʼtʌlel lon c pensar yicʼot lon c pusicʼal» (pejcan Filipenses 4:6, 7).

7, 8. ¿Chucoch mi lac ñop chaʼan Jesús mi caj i ñuqʼuesan lac pusicʼal?

⁷ Tsaʼ bʌ i mele yicʼot tsaʼ bʌ i yʌlʌ Jesús cheʼ bʌ tsajñi wʌʼ ti Pañimil (mulawil) tsiʼ yʌcʼʌ ti cʌñol bajcheʼ yilal i cʼuxbiya yicʼot i pʼuntaya Jehová, jiñi i Tat (Jn. 5:19). Dios tsiʼ choco tilel wʌʼ ti Pañimil chaʼan miʼ ñuqʼuesʌben i pusicʼal «jini chʼijiyemoʼ bʌ» yicʼot «pejtel woliyoʼ bʌ ti uqʼuel» (Is. 61:1, 2; Lc. 4:17-21). Jiñi wiñicob xʼixicob (quixtañujob) tsiʼ qʼueleyob chaʼan Jesús wen yujil pʼuntaya, miʼ chʼʌmben isujm lac wocol yicʼot miʼ mulan i coltañonla (He. 2:17).

⁸ Cheʼ bʌ xcolel to, tsiʼ yubi i chʼijiyemlel jaʼel cheʼ bʌ tsiʼ qʼuele tsaʼ bʌ chʌmiyob tiʼ familia yicʼot i yamigojob. Tajol an jaxto 20 i jabilel cheʼ bʌ José, jiñi i tat, tsaʼ chʌmi. * Come Jesús wen an i yutslel, wen wocolʌch tsiʼ ñusa come cʼux tsiʼ yubi jaʼel, pero ñumento cheʼ tsiʼ qʼuele bajcheʼ woli (yʌquel) i ñusan i ñaʼ yicʼot i yerañob.

9. ¿Bajcheʼ tsiʼ pʌsʌ i pʼuntaya Jesús cheʼ bʌ Lázaro tsaʼ chʌmi?

⁹ Jesús tsiʼ wen pʌsʌ i pʼuntaya cheʼ bʌ woli ti subtʼan. Jumpʼejl ejemplo, cheʼ bʌ tsaʼ chʌmi Lázaro, wen yujil chaʼan mi caj i chaʼ cuxtesan. Pero cheʼ tsiʼ qʼuele chaʼan María yicʼot Marta woliyob ti uqʼuel, tsaʼ ñijcʌyi i pusicʼal i tsaʼ caji ti uqʼuel jaʼel (Jn. 11:33-36).

10. ¿Chucoch mi lac ñop chaʼan mucʼʌch i ñijcʌyel i pusicʼal Jesús cheʼ miʼ qʼuelonla ti wocol?

 ¹⁰ Cheʼ mi laj qʼuel tsaʼ bʌ i mele Jesús ti wajali, ¿bajcheʼ miʼ coltañonla? Jiñi Biblia miʼ yʌl: «Jesucristo junlajalʌch acʼbi yicʼot wʌle yicʼot tiʼ pejtelel ora» (He. 13:8). Jiñʌch «muʼ bʌ i yʌqʼueñonla laj cuxtʌlel» i yujil bajcheʼ yubil cheʼ an majqui mi lac sʌt. Jin chaʼan miʼ mejlel i coltan «jini woli bʌ i pʌjyelob ti mulil [o wocol]» (Hch. 3:15; He. 2:10, 18). Miʼ mejlel lac ñop chaʼan mucʼʌch i ñijcʌyel i pusicʼal cheʼ miʼ qʼuelonla ti wocol. Miʼ chʼʌmben isujm i cʼuxel lac pusicʼal i miʼ ñuqʼuesan tiʼ yorajlel (pejcan Hebreos 4:15, 16).

11. ¿Baqui tac bʌ versículo miʼ ñumen aqʼueñet a tijicñʌyel?

¹¹ Jiñi Biblia miʼ chʼʌm tilel yambʌ versículo tac muʼ bʌ i ñuqʼuesan lac pusicʼal, mach cojach tsaʼ bʌ ujti tiʼ tojlel Lázaro. Mach toj sajtelic lac pusicʼal chaʼan iliyi, come «jini tsʼijbubil bʌ ti wajali tsaʼ tsʼijbunti chaʼan mi laj cʌntesʌntel. I Tsʼijbujel Dios miʼ yʌqʼueñonla i xucʼtilel yicʼot i ñuqʼuesʌntel lac pusicʼal chaʼan mi lac pijtan jini tal to bʌ» (Ro. 15:4). ¿Am ba majqui chʌmen a chaʼan? Mi cheʼʌchi, mi caj i coltañet ili versículo tac:

• «Lʌcʼʌl an lac Yum baʼan chʼijiyemoʼ bʌ i pusicʼal. Miʼ coltan jini woli bʌ i melob i pusicʼal» (Sal. 34:18, 19).

• «Cheʼ woliyon ti tsic pusicʼal chaʼan cabʌl chuqui mic ñaʼtan, maʼ ñuqʼuesʌbeñon c pusicʼal» (Sal. 94:19).

• «Jini lac Yum Jesucristo, yicʼot Dios lac Tat tsaʼ bʌ i cʼuxbiyonla, jini tsaʼ bʌ i yʌqʼueyonla i ñuclel lac pusicʼal mach bʌ anic miʼ jilel yicʼot wen bʌ lac pijtaya tiʼ yutslel i pusicʼal, laʼ i ñuqʼuesʌbeñetla laʼ pusicʼal. Laʼ i xucʼchocoñetla» (2 Ts. 2:16, 17). *

12. ¿Baqui bʌ junchajp ñuc bʌ i cʼʌjñibal yom bʌ mi lac mel chaʼan mi lac ñuqʼuesʌben i pusicʼal yambʌlob?

¹² Jiñi am bʌ chʌmeñob i chaʼan miʼ mejlel i tajob i coltʌntel yaʼ ti congregación (pejcan 1 Tesalonicenses 5:11). ¿Bajcheʼ miʼ mejlel lac pʼʌtʼesan yicʼot lac ñuqʼuesʌben i pusicʼal jiñi chʼijiyemoʼ bʌ? (Pr. 17:22). Yom mi laj cʼajtesan chaʼan «an i yorajlel mi lac ñʌjchʼel» yicʼot chaʼan mi «lac chaʼlen tʼan» (Ec. 3:7). Laʼ laj qʼuel muʼ bʌ i yʌl chaʼtiquil hermanajob. Juntiquil i bajñel jach bʌ i cʼabaʼ Dalene miʼ yʌl: «Jiñi chʼijiyemoʼ bʌ miʼ mulan i yʌlob bajcheʼ yubil miʼ yubiñob yicʼot chuqui miʼ ñaʼtañob. Jin chaʼan, yom mi lac wen ñʌchʼtañob». I yʌscun jiñi hermana Junia tiʼ tsʌnsa i bʌ, jiñi hermana miʼ yʌl: «Tajol maʼañic mi lac wen chʼʌmben isujm bajcheʼ yubil miʼ yubin jiñi muʼ bʌ i chʌmel i chaʼan, pero ñuc i cʼʌjñibal cheʼ mi lac pʌs chaʼan la comʌch lac ñaʼtan bajcheʼ yubil miʼ yubiñob».

13. ¿Chuqui yom mi laj cʼajtesan?

¹³ Pero yom mi laj cʼajtesan chaʼan mach junlajalic mi lac pʌs bajcheʼ yilal mi la cubin lac bʌ. An i tajol, cojach jiñi lojwem bʌ i pusicʼal yujil bajcheʼ miʼ yubin i bʌ, i tajol wocol miʼ yubin chaʼan miʼ tsictesan. Jiñʌch muʼ bʌ i taj ti tʼan jiñi Biblia baqui miʼ yʌl: «Lac bajñel jach mi laj cʌn i wocol lac pusicʼal. Cheʼ jaʼel i tijicñʌyel lac pusicʼal, mach mejlic i cʌn yambʌ» (Pr. 14:10). Anquese an i tajol mucʼʌch i yʌl bajcheʼ miʼ yubin i bʌ jiñi  quixtañu, tajol jiñi yambʌlob maʼañic miʼ wen chʼʌmbeñob isujm.

14. ¿Chuqui tac yambʌ miʼ mejlel lac mel chaʼan mi lac ñuqʼuesʌben i pusicʼal jiñi chʼijiyemoʼ bʌ?

¹⁴ Tajol wocolʌch mi lac ñaʼtan chuqui yom mi lac suben jiñi lojweñoʼ bʌ i pusicʼal. Pero jiñi Biblia miʼ yʌl chaʼan «i tʼan jini weñoʼ bʌ i pusicʼal i wentajʌch tsʼac muʼ bʌ i lajmesañonla» (Pr. 12:18). Cabʌl hermanojob an i ñaʼtayob chuqui miʼ mejlel i yʌlob cheʼ miʼ pejcañob jiñi folleto Cuando muere un ser querido. * Pero wen ñuc i cʼʌjñibal cheʼ mi lac jacʼ ili ticʼojel: «Chaʼlenla uqʼuel yicʼot jini muʼ bʌ i chaʼleñob uqʼuel» (Ro. 12:15). Gaby, juntiquil hermana i bajñel jax bʌ, miʼ yʌl: «Cheʼ mic chaʼlen uqʼuel jiñʌch bajcheʼ mic pʌs bajcheʼ yubil mi cubin c bʌ. Jin chaʼan, miʼ ñuqʼuesan c pusicʼal cheʼ miʼ chaʼleñob uqʼuel yicʼoton jiñi camigojob. Mach c bajñelic mi cubin c bʌ ti jiñi bʌ ora».

15. Mi wocol mi la cubin chaʼan mi lac suben wem bʌ tʼan yambʌlob, ¿chuqui miʼ mejlel lac mel chaʼan mi lac ñuqʼuesʌbeñob i pusicʼal? (Qʼuele jaʼel jiñi recuadro « Tʼan tac muʼ bʌ i ñuqʼuesʌben i pusicʼal yambʌlob»).

¹⁵ Mi maʼañic mi lac taj lac tʼan mi la cubin, miʼ mejlel lac tsʼijbubeñob ti alʌ jun, ti correo electrónico, ti jumpʼejl mensaje o jumpʼejl carta jiñi la com bʌ lac subeñob. Miʼ mejlel lac pejcʌbeñob jumpʼejl versículo muʼ bʌ i yʌcʼ tijicñʌyel, mi lac tajbeñob ti tʼan wem bʌ tsiʼ mele jiñi tsaʼ bʌ chʌmi o jumpʼejl tʼan muʼ bʌ lac wen mulan. Junia miʼ yʌl: «Maʼañic mic taj c tʼan chaʼan mi cʌl bajcheʼ cʼamel miʼ coltañon cheʼ mic tsʼijbubentel ti jumpʼejl jun tʼan tac muʼ bʌ i yʌqʼueñon c tijicñʌyel o cheʼ miʼ pʌyon tiʼ yotot juntiquil hermana. Miʼ yʌqʼueñon j cʼajtesan chaʼan añʌch hermanojob muʼ bʌ cʼuxbiñoñob yicʼot miʼ cʌntañoñob».

16. ¿Bajcheʼ yambʌ miʼ mejlel lac pʼʌtʼesʌben i pusicʼal yambʌlob?

 ¹⁶ Ñuc i cʼʌjñibal jaʼel cheʼ mi lac tajob ti oración yicʼot cheʼ mi lac comol mel la quicʼotob. Isujmʌch, tajol wocolʌch chaʼan mi lac mel oración cheʼ bʌ añob to ti jiñi wocol. Miʼ mejlel ti loqʼuel la cuqʼuel o miʼ mʌjquel lac tʼan. Pero cheʼ mi lac mel oración loqʼuem bʌ ti lac pusicʼal miʼ mejlel i yʌqʼueñob i ñʌchʼtʌlel. Dalene, tsaʼ bʌ lac taja ti tʼan ti párrafo 12, miʼ yʌl: «Cheʼ bʌ jiñi hermanajob miʼ tilelob i julaʼtañon an i tajol mic subeñob i mel jumpʼejl oración. Wocol miʼ loqʼuelob i tʼan cheʼ wolito i techob i mel. Pero xucʼu xucʼul miʼ pʼʌtʼañob majlel i tʼan i wen utsʼatax miʼ melob jiñi oración. Cheʼ pʼʌtʌlob i ñopoñel (chʼujbiya), i cʼuxbiya yicʼot cheʼ miʼ qʼuelob ti ñuc yambʌlob miʼ pʼʌtʼesan c ñopoñel jaʼel».

17-19. ¿Chucoch yom mi lac chʌn ñuqʼuesʌben i pusicʼal la quermañojob?

¹⁷ Come mach junlajalonla, an orajach bʌ miʼ ñumel i cʼuxelob i pusicʼal i an mach bʌ cheʼiqui. Jin chaʼan, mach cojach yom mi laj coltañob cheʼ bʌ ujtel jaxto i ñumel jiñi wocol cheʼ bajcheʼ miʼ mel yambʌlob tiʼ familia o i yamigojob. Yom mi lac bej coltañob jaʼel anquese ñumeñix cabʌl uw, cheʼ bʌ jiñi yambʌlob tsaʼix ñajʌyi i chaʼañob. Proverbios 17:17 miʼ yʌl: «Mi isujm miʼ cʼuxbiñonla laj cʌñʌ bʌ maʼanic miʼ cʌy i cʼuxbiñonla tiʼ pejtelel ora. Junlajalʌch bajcheʼ lac piʼʌl baʼ ora woli la cubin wocol». Jiñʌch bajcheʼ jale ora yom mi laj coltan jiñi am bʌ majqui tsaʼ chʌmi i chaʼan, cheʼʌch yom mi lac mel (pejcan 1 Tesalonicenses 3:7).

¹⁸ Yom mi laj cʼajtesan chaʼan bajcheʼ jach ora miʼ chaʼ tilel jiñi chʼijiyemlel. Tajol ti jumpʼejl qʼuin ñuc bʌ i cʼʌjñibal i chaʼan, jumpʼejl cʼay, jumpʼejl foto, cheʼ an chuqui woliʼ mel o miʼ taj i yujtsʼin, miʼ taj i yubin o cheʼ an chuqui i yorajlel woliʼ tejchel ti jiñi jab. Juntiquil i bajñel jax bʌ miʼ cʌytʌl tajol wen wocol miʼ yubin cheʼ an chuqui yom i comol mel yicʼot i piʼʌl, tajol cheʼ bʌ miʼ majlel ti colem tempa bʌ o tiʼ Cʼajtesʌntel i chʌmel Jesús. Juntiquil hermano i bajñel jax bʌ miʼ yʌl: «Tsaʼ c wʌn ñaʼta chaʼan chʼijiyem mi caj cubin cheʼ mach quicʼotix quijñam mi caj j cʼajtesan cheʼ baqui ora tsaʼ ñujpuñiyon lon, i cheʼʌch tsaʼ ujti. Pero chaʼan mach c bajñelic mi cubin c bʌ cabʌl hermanojob tsaʼ caji i chajpañob alʌ uchʼel yicʼot wen bʌ camigojob».

¹⁹ Yom mi laj cʼajtesan jaʼel chaʼan juntiquil lojwem bʌ i pusicʼal mach cojach yom coltʌntel ti jumpʼejl qʼuin ñuc bʌ i cʼʌjñibal. Junia miʼ yʌl: «Cheʼ bʌ jiñi hermanojob miʼ coltañetob i yaʼañob a wicʼot anquese mach jumpʼejlic ñuc bʌ qʼuin, añʌch i wenlel. Wen ñuc i cʼʌjñibal bajcheʼ jiñi yicʼot miʼ tijicñesan lac pusicʼal». Maʼañic miʼ mejlel lac junyajlel jisʌbeñob i chʼijiyemlel jiñi am bʌ chʌmeñob i chaʼan. Pero cabʌlʌch chuqui miʼ mejlel lac mel chaʼan mi lac ñuqʼuesʌbeñob i pusicʼal (1 Jn. 3:18). Gaby miʼ chaʼ cʼajtesan: «Mic wen aqʼuen wocolix i yʌlʌ Jehová come yicʼot i cʼuxbiya tsiʼ coltayon jiñi ancianojob i maʼañic tiʼ bajñel cʌyʌyoñob cheʼ wen wocol wolic ñusan. Tiʼ pejtelel ora tsiʼ yʌqʼueyoñob cubin chaʼan meqʼuel i chaʼañon Jehová».

20. ¿Chucoch miʼ ñuqʼuesan lac pusicʼal jiñi albil bʌ i chaʼan Jehová?

²⁰ Mucʼʌch i pʼʌtʼesañonla cheʼ la cujil chaʼan Jehová, jiñi Dios muʼ bʌ i ñuqʼuesan lac pusicʼal, mi caj i jisan jiñi chʼijiyemlel cheʼ bʌ pejtelel «jini añoʼ bʌ ti mucoñibʌl» miʼ yubibeñob i tʼan Cristo i miʼ chaʼ chʼojyelob (Jn. 5:28, 29). Dios acʼbil i chaʼan i tʼan chaʼan «mi caj i junyajlel jisan jini [...] chʌmel» yicʼot «mi caj i sujcubeñonla i yaʼlel lac wut» (Is. 25:8). Cheʼ bʌ miʼ cʼotel jiñi qʼuin, maʼañix mi caj lac chaʼlen uqʼuel yicʼot «jini muʼ bʌ i chaʼleñob uqʼuel», jiñi wiñicob xʼixicob tijicña mi caj i yajñelob «yicʼot jini tijicñayoʼ bʌ» (Ro. 12:15).