1-3. a) ¿Baqui ora miʼ ñaʼtʌntel chaʼan tsaʼ tsʼijbunti jiñi Salmo 147? b) ¿Chuqui miʼ mejlel laj cʌn cheʼ mi lac wen pejcan jiñi Salmo 147?

I TILELΛCH cheʼ mi lac wen qʼuel ti ñuc jiñi muʼ bʌ i melob chuqui wen o weñoʼ bʌ i melbal bajcheʼ juntiquil xñoptʼan. Pero yom bʌ mi lac ñumen acʼ ti ñuc jiñʌch Jehová. Cheʼʌch mi lac mel come miʼ mejlel laj qʼuelben i pʼʌtʌlel ti chuqui tac melbil i chaʼan yicʼot cheʼ tsiʼ pʌsbeyonla i cʼuxbiya cheʼ tsiʼ choco tilel i Yalobil ti laj caj.

² Tsaʼ bʌ i tsʼijbu jiñi Salmo 147 tsaʼʌch i ñaʼta i yʌqʼuen i ñuclel Jehová tiʼ pejtelel i pusicʼal. Cheʼ jaʼel, tsiʼ colta yambʌ wiñicob xʼixicob (quixtañujob) chaʼan miʼ yʌqʼueñob i ñuclel Jehová jaʼel (pejcan Salmo 147:1, 7, 12).

³ Mach la cujilic majqui tiʼ tsʼijbu ili salmo, pero miʼ mejlel lac ñaʼtan chaʼan tsaʼ chumle cheʼ bʌ Jehová tsiʼ locʼsa jiñi israelob yaʼ ti Babilonia i tsiʼ chaʼ pʌyʌyob sujtel ti Jerusalén (Sal. 147:2). Tiʼ sujm, tsaʼ bʌ i tsʼijbu ili salmo tsaʼʌch i yʌqʼue i ñuclel Jehová come tsiʼ chaʼ pʌyʌ majlel i tejclum tiʼ lumal chaʼan yaʼʌch miʼ chʼujutesañob. Pero añʌch yambʌ i sujmlel cheʼ tsiʼ yʌqʼue i ñuclel.  ¿Baqui tac bʌ? ¿Chucoch yomʌch mi la cʌl jaʼel «subula i ñuclel lac Yum»? (Sal. 104:35; 147:1).

4. ¿Bajcheʼ yubil tsiʼ yubiyob i bʌ jiñi israelob cheʼ Ciro tsiʼ coloyob, i chucoch?

⁴ Laʼ lac ñaʼtan bajcheʼ yubil tsiʼ yubiyob i bʌ jiñi israelob yaʼ ti Babilonia. Jiñi babiloniojob tsiʼ yʌcʼʌyob ti quisin i tsiʼ subeyob: «Cʼʌyibeñon lojon cʼay cheʼ bajcheʼ ti Sion». Pero jiñi israelob maʼañic tsiʼ jacʼʌyob come muʼ bʌ i yʌqʼueñob i tijicñʌyel jiñʌch Jerusalén, pero tsaʼix jisʌnti (Sal. 137:1-3, 6). Come lojweñob i pusicʼal yomob i tijicñesʌntel. Pero cheʼ bajcheʼ tsiʼ wʌn alʌ Jehová, jiñi rey chaʼan Persia i cʼabaʼ Ciro tsiʼ jisa jiñi Babilonia i tsiʼ colo jiñi israelob. Tsiʼ yʌlʌ tiʼ tojlel Jehová: «Tsiʼ subeyon chaʼan mic waʼchocoben i Templo yaʼ ti Jerusalén». Tsiʼ yʌlʌ jaʼel: «Cucula ti laʼ lumal pejteletla i chaʼañet bʌ la Dios. Laʼ majlic lac Yum laʼ wicʼot chaʼan utsʼat mi laʼ cʼotel» (2 Cr. 36:23). Pejtelel iliyi tsaʼʌch i ñuqʼuesʌbe i pusicʼal jiñi israelob cheʼ bʌ yaʼto añob ti Babilonia.

5. Cheʼ bajcheʼ miʼ yʌl jiñi Salmo 147:3, ¿bajcheʼ miʼ cʼʌn i pʼʌtʌlel Jehová?

⁵ Jehová tsaʼʌch i ñuqʼuesʌbe i pusicʼal ti jujuntiquil israelob, mach cojicach tsiʼ mele bajcheʼ i tejclum. Cheʼʌch miʼ mel jaʼel ili ora. Tsaʼ bʌ i tsʼijbu jiñi Salmo 147 miʼ yʌl tiʼ tojlel Dios: «Miʼ lajmesʌbeñob i chʼijiyemlel i pusicʼal. Miʼ lajmesʌbeñob i tsoy [o lojweñal]» (Sal. 147:3). Cheʼ bʌ cʼamonla o wen chʼijiyemonla, miʼ mejlel lac ñop chaʼan Jehová yom i tijicñesañonla yicʼot i tsʼʌcan i lojweñal lac pusicʼal (Sal. 34:18; Is. 57:15). Miʼ yʌqʼueñonla lac pʼʌtʌlel yicʼot lac ñaʼtʌbal chaʼan mi lac lʌtʼ baqui jach bʌ wocol (Stg. 1:5).

6. ¿Chuqui miʼ cʌntesañonla jiñi Salmo 147:4? (Qʼuele jiñi dibujo am bʌ tiʼ tejchibal).

⁶ Tsaʼ bʌ i tsʼijbu ili Salmo tsiʼ qʼuele jiñi panchan i tsiʼ yʌlʌ chaʼan Jehová «miʼ tsic jini ecʼ» yicʼot «miʼ yotsʌben i cʼabaʼ ti jujumpʼejl» (Sal. 147:4). ¿Chucoch tsaʼ caji i yʌl chaʼan jiñi ecʼ tac? Laʼ cu lac ñaʼtan: Mucʼʌch i mejlel i qʼuel jiñi ecʼ tac, pero mach yujilic jaypʼejl an. Ili ora, jiñi científicojob cabʌlix miʼ ñumen tajob i qʼuel. Miʼ yʌlob chaʼan ti lac galaxia an cabʌl millón ecʼ yicʼot chaʼan ti jiñi universo an cabʌl galaxia. Pero maʼañic miʼ mejlel i tsicob. Cojach jiñi tsaʼ bʌ i Meleyonla miʼ mejlel i ñaʼtan, i yujil chuqui tac i cʼabaʼ. Ili yom i yʌl chaʼan miʼ qʼuel ti ñuc jujumpʼejl ecʼ (1 Co. 15:41). ¿Chuqui miʼ cʌntesañonla iliyi? Chaʼan Dios wen yujil baqui añonla, bajcheʼ yubil mi la cubin lac bʌ yicʼot chuqui i cʼʌjñibal lac chaʼan tiʼ pejtelel ora, cheʼʌch bajcheʼ yujil baqui an jiñi ecʼ tac.

7, 8. a) ¿Chuqui jiñi muʼ bʌ i chʼʌmben isujm Jehová ti lac tojlel? b) ¿Chuqui ti ejemplo miʼ pʌs chaʼan Jehová mucʼʌch i chʼʌmben isujm bajcheʼ yubil mi la cubin?

⁷ Jehová miʼ chʼʌmben isujm jiñi wocol tac muʼ bʌ lac ñusan jujuntiquil i añʌch i pʼʌtʌlel chaʼan miʼ coltañonla (pejcan Salmo 147:5). An i tajol wen tsʌts jiñi lac wocol i mach lʌjtʼix lac chaʼan mi la cubin. Pero Dios yujil baqui jaxʌl miʼ mejlel lac lʌtʼ, i «yujil melbilonla ti tsʼubejn» (Sal. 103:14). Tiʼ caj xmulilonla, mach junsujtelic jach mi caj lac taj lac sajtemal. Ti lac pejtelel mi lac chaʼ ñaʼtan lac bʌ cheʼ mi la cʌl mach bʌ weñic, cheʼ miʼ tilel lecoj bʌ lac ñaʼtʌbal o cheʼ miʼ bixel tilel i tsʌytsʌyñiyel lac pusicʼal. Jehová mucʼʌch i wen chʼʌmben isujm anquese maʼañic ba ora miʼ taj ili wocol tac (Is. 40:28).

⁸ Tajol añʌch laj qʼuele bajcheʼ Jehová cʼʌmbil i chaʼan i pʼʌtʌlel chaʼan miʼ coltañonla lac lʌtʼ jiñi wocol tac (Is. 41:10, 13). Laʼ laj qʼuel tsaʼ bʌ ujti tiʼ tojlel juntiquil precursora i cʼabaʼ Kyoko. Cheʼ bʌ tsaʼ chojqui majlel ti subtʼan ti yambʌ tejclum,  tsiʼ wen ubi i chʼijiyemlel. ¿Bajcheʼ tsiʼ taja i qʼuel chaʼan Jehová mucʼʌch i i chʼʌmben isujm woli (choncol) bʌ i ñusan? Tiʼ tsijib congregación tsiʼ taja hermanojob tsaʼ bʌ i chʼʌmbeyob isujm woli (yʌquel) bʌ i ñusan. Tsiʼ yʌlʌ chaʼan lajal bajcheʼ Jehová woliʼ suben: «Mij cʼuxbiñet, mach chaʼañic jach precursorajet come quixicʼalet i tsaʼ wʌqʼueyon a cuxtʌlel. Com maʼ wubin a tijicñʌyel cheʼ c Testigojet». Ixcu jatet, ¿bajcheʼ an i pʌsbeyet Jehová chaʼan «maʼanic i pʼisol i ñaʼtʌbal»?

9, 10. ¿Chuqui jiñi ñaxam bʌ miʼ yʌqʼueñonla Jehová? Alʌ jumpʼejl ejemplo.

⁹ An i tajol mi lac wen cʼojoʼtan jiñi i cʼʌjñibal bʌ lac chaʼan, bajcheʼ jiñi i bʌl lac ñʌcʼ. Pero Jehová tsiʼ mele ili Lum chaʼan miʼ mejlel ti colel bʌlñʌcʼʌl tac chaʼan tiʼ pejtelel chuqui cuxul bʌ, yicʼot to jiñi «i yal xwachin cheʼ miʼ yucʼtan», cheʼ bajcheʼ miʼ yʌl Salmo 147:8, 9 (pejcan). Mi Jehová miʼ yʌqʼuen i bucʼbal jiñi xmateʼmut tac, miʼ mejlel lac ñop chaʼan mucʼʌch caj i yʌqʼueñonla chuqui i cʼʌjñibal lac chaʼan (Sal. 37:25).

¹⁰ Jiñi ñumen ñuc bʌ i cʼʌjñibal jiñʌch muʼ bʌ i yʌqʼueñonla Jehová chaʼan chʌn pʼʌtʌl lac ñopoñel. Miʼ yʌqʼueñonla jaʼel jiñi ñʌchʼtʌlel ‹maʼañic bʌ i pʼisol› (Fil. 4:6, 7). Laʼ lac ñaʼtan tsaʼ bʌ ujti tiʼ tojlel Mutsuo yicʼot i yijñam. Cheʼ tsaʼ ñumi jumpʼejl tsunami yaʼ ti Japón cheʼ ti 2011, tsiʼ qʼueleyob bajcheʼ tsaʼ coltʌntiyob ti Jehová. Maʼañic tsaʼ chʌmiyob (sajtiyob) come tsaʼ letsiyob tiʼ pam i yotot, pero lʌcʼʌ tiʼ pejtelel i chubʌʼañob tsaʼ jili. Tsiʼ ñusayob acʼʌlel ti jumpʼejl otot jejmeñix bʌ anquese wen an tsʌñal. Cheʼ ti sʌcʼan, tiʼ sʌclayob chuqui miʼ mejlel i coltañob tiʼ chaʼan bʌ Dios. Cojach tsiʼ tajayob jiñi Anuario de los testigos de Jehová 2006. Mutsuo orajach tsiʼ qʼuele jiñi temaj «Jiñi tsunami tac tsaʼ bʌ i ñumen jisa quixtañujob». Jiñi Anuario tsiʼ taja ti tʼan jiñi yujquel lum tsaʼ bʌ ujti yaʼ ti Sumatra ti 2004, i tsiʼ yʌcʼʌ ti tejchel cabʌl tsunami tsaʼ bʌ i jisa yonlel quixtañu, ñumento bajcheʼ jiñi ñaxan tac bʌ ujtem. Cheʼ bʌ Mutsuo yicʼot i yijñam woliʼ pejcañob jiñi experiencia tac, tsaʼ loqʼuiyob i yaʼlel i wut. Tsiʼ yubiyob chaʼan Dios woliʼ pʌsbeñob i cʼuxbiya yicʼot i chʼejlesañob cheʼ ñumen i cʼʌjñibal i chaʼañob. Cheʼ jaʼel, tsiʼ qʼuelbeyob i cʼuxbiya Jehová cheʼ bʌ jiñi hermanojob tsiʼ chʼʌmbeyob majlel pisil yicʼot i bʌl i ñʌcʼ. Pero tsaʼ bʌ i ñumen pʼʌtʼesayob jiñʌch cheʼ tsaʼ cʼotiyob hermanojob chocbiloʼ bʌ majlel tiʼ yorganización Dios chaʼan miʼ julaʼtañob i congregación. Mutsuo miʼ yʌl: «Tsaʼ cubi chaʼan Jehová woliyʌch i cʌntañon lojon. Tsiʼ wen ñuqʼuesʌbeyon lojon c pusicʼal». Cheʼ bajcheʼ mi laj qʼuel, Dios ñaxan miʼ yʌqʼueñonla i cʼʌjñibal bʌ lac chaʼan chaʼan pʼʌtʌl lac ñopoñel, cheʼ jiñi miʼ yʌqʼueñonla i cʼʌjñibal bʌ chaʼan lac bʌcʼtal.

11. ¿Chuqui yom mi lac mel chaʼan mi lac taj lac wenlel tiʼ coltaya Jehová?

¹¹ Jehová chʌn chajpʌbil chaʼan «miʼ pʼʌtʼesan jini utsoʼ bʌ» (Sal. 147:6a). Pero ¿chuqui yom mi lac mel chaʼan mi lac taj lac wenlel tiʼ coltaya Jehová? Yom utsʼat añonla la quicʼot. Jin chaʼan yom utsonla (Sof. 2:3). Jiñi utsoʼ bʌ woliʼ pijtañob chaʼan Jehová miʼ jisan jiñi jontolil yicʼot miʼ jisʌben i chʼijiyemlel jiñi añoʼ bʌ ti wocol. Jehová miʼ qʼuel ti wen jiñi utsoʼ bʌ.

12, 13. a) Mi la com i coltaya Dios, ¿chuqui yom mi lac mel? b) ¿Chuqui yom mi lac mel chaʼan utsʼat mi la cajñel tiʼ tojlel Jehová?

¹² Cheʼ jaʼel, Dios «miʼ jisʌbeñob i pʼʌtʌlel jini jontoloʼ bʌ» (Sal. 147:6b). Wen ñuc i  cʼʌjñibal mi lac ñaʼtan iliyi. Mi la com lac wenlel chaʼan jiñi xucʼul bʌ i cʼuxbiya Jehová i chaʼan maʼañic miʼ jisañonla, yom mi lac tsʼaʼlen muʼ bʌ i tsʼaʼlen (Sal. 97:10). Jumpʼejl ejemplo, yom mi lac tsʼaʼlen jiñi tsʼiʼlel. Ili yom i yʌl chaʼan yom mi lac choc tiʼ pejtelel muʼ bʌ i mejlel i pʌyonla majlel ti ili mulil, bajcheʼ jiñi pornografía (Sal. 119:37; Mt. 5:28). Tajol wocolʌch ti jacʼol iliyi, pero añʌch i wenlel, come mi caj lac tajben i bendición Jehová.

¹³ Chaʼan maʼañic mi lac yajlel ti ili mulil, yom mi laj cʼajtiben i coltaya Jehová. Maʼañic miʼ mulan cheʼ mi lac sʌclan laj coltʌntel tiʼ «chʼejlel caballo» o tiʼ «chʼejlel winic». Ili yom i yʌl chaʼan Jehová maʼañic mi caj i qʼuelonla ti utsʼat cheʼ mi lac bajñel chʼʌm lac bʌ ti ñuc o mi lac sʌclan laj coltʌntel ti yambʌ quixtañu (Sal. 147:10). Yom bʌ mi lac mel, jiñʌch cheʼ mi laj cʼajtiben i coltaya Jehová. Mach lajalic bajcheʼ jiñi xticʼojelob ila ti pañimil (mulawil), come maʼañic ba ora miʼ lujbʼan i ñʌchʼtañonla. Ti Salmo 147:11 miʼ yʌl: «Tijicña lac Yum chaʼan jini muʼ bʌ i cʼuxbiñob, muʼ bʌ i xucʼchocoñob i pusicʼal tiʼ yutslel i tʼan» o xucʼul bʌ i cʼuxbiya. Jin chaʼan, miʼ mejlel lac ñop chaʼan mi caj i chʌn coltañonla lac choc loqʼuel mach bʌ weñic miʼ tilel ti lac pusicʼal come mucʼʌch i cʼuxbiñonla.

14. ¿Chuqui tsiʼ yʌqʼue i tijicñʌyel tsaʼ bʌ i tsʼijbu ili Salmo?

¹⁴ Jehová miʼ subeñonla chucoch miʼ mejlel lac ñop chaʼan mucʼʌch caj i coltan i wiñicob cheʼ yomob i coltʌntel. Cheʼ bʌ tsiʼ taja ti tʼan Jehová jiñi tsaʼ bʌ i tsʼijbu Salmo 147, jiñʌch woliʼ ñaʼtan cheʼ bʌ jiñi israelob tsaʼ chaʼ sujtiyob majlel ti Jerusalén: «Come tsaʼix i tsʌtsʼesa laʼ puertajlel. Tsaʼix i yʌqʼueyob i wenlel laʼ walobilob añoʼ bʌ ti laʼ tojlel. Miʼ yʌcʼ ti lajmel guerra yaʼ ti laʼ lumal» (Sal. 147:13, 14). Tijicña tsiʼ yubi cheʼ tsiʼ ñaʼta chaʼan Dios mi caj i ñumen pʼʌtʼesʌben i puertajlel Jerusalén chaʼan miʼ cʌntan i wiñicob.

15-17. a) ¿Bajcheʼ yubil miʼ mejlel la cubin lac bʌ, pero bajcheʼ miʼ cʼʌn Jehová jiñi i Tʼan chaʼan miʼ coltañonla? b) Alʌ jumpʼejl ejemplo muʼ bʌ i pʌs chaʼan Jehová orajach miʼ coltañonla tiʼ Tʼan.

¹⁵ Tajol mi lac ñusan tsʌts tac bʌ wocol muʼ bʌ i mejlel i yʌcʼonla ti cʌlʌx pensal. Pero Jehová miʼ mejlel i yʌqʼueñonla lac ñaʼtʌbal. Jiñi tsaʼ bʌ i tsʼijbu ili Salmo tsiʼ yʌlʌ chaʼan Dios «miʼ choc tilel i mandar ti pañimil. Ti ora jach miʼ ñumel majlel [«tilel», TNM] i tʼan». Tsiʼ yʌlʌ jaʼel chaʼan «miʼ yʌcʼ i ñaʼal tsʌñal i mos lum», «miʼ pam puc cheʼ bajcheʼ mi lac puc i tiñil cʼajc» yicʼot «miʼ choc jubel tuñijaʼ», cheʼ jiñi tsiʼ cʼajti: «¿Majqui miʼ mejlel i cuchben i tsʌñʌlel?». Ti wiʼil, tsiʼ yʌlʌ chaʼan cheʼ bʌ Jehová «miʼ yʌcʼ i tʼan, miʼ yulmʌl» (Sal. 147:15-18). ¿Chuqui miʼ mejlel laj cʌn chaʼan tac iliyi? Mi laj cʌn chaʼan Dios miʼ mejlel i ticʼ jiñi i ñaʼal tsʌñal yicʼot tuñijaʼ come wen i cʌñʌ yicʼot maʼañic i pʼisol i pʼʌtʌlel. Jin chaʼan, miʼ mejlel i coltañonla lac lʌtʼ baqui jach bʌ wocol.

¹⁶ Ili ora, Jehová miʼ tojʼesañonla yicʼot i Tʼan, jiñi Biblia. Miʼ mejlel la cʌl chaʼan «ti ora jach miʼ ñumel majlel [«tilel», TNM] i tʼan» come miʼ yʌqʼueñonla jiñi i cʼʌjñibal bʌ lac chaʼan chaʼan miʼ tojʼesañonla. Laʼ cu lac ñaʼtan jiñi wenlel tac tajbil bʌ lac chaʼan cheʼ mi lac pejcan jiñi Biblia, jiñi jun tac muʼ bʌ i yʌqʼueñonla jiñi «xucʼul bʌ xʼeʼtel am bʌ cabʌl i ñaʼtʌbal», jiñi canal JW Broadcasting, jiñi página www.pr418.com/ctu, jiñi ancianojob yicʼot yambʌ la quermañojob (Mt. 24:45). ¿Mach ba isujmic chaʼan «ti ora jach» miʼ coltañonla Jehová, cheʼ bajcheʼ miʼ yʌl jiñi Salmo?

¹⁷ Juntiquil hermana i cʼabaʼ Simone maʼañic i cʼʌjñibal tsiʼ ñaʼta i bʌ yicʼot chaʼan Dios maʼañic mi caj i qʼuel ti wen.  Pero tsiʼ chʌn cʼajtibe i coltaya Jehová. Tsiʼ chaʼle wersa i chʌn pejcan i Biblia. ¿Am ba i yubibe i pʼʌtʌlel jiñi i Tʼan Dios? Simone miʼ yʌl: «Tiʼ pejtelel ora an cubibe i pʼʌtʌlel yicʼot i coltaya Jehová, mach yʌlʌlic chuqui ti wocol wolic ñusan». Ili an i colta chaʼan wen jach chuqui miʼ chʌn ñaʼtan.

18. Ixcu jatet, ¿chucoch tsaʼʌch i yʌqʼueyet Dios jumpʼejl ñuc bʌ a majtan maʼ wubin, i chucoch yomʌch maʼ wʌqʼuen i ñuclel?

¹⁸ Tsaʼ bʌ i tsʼijbu ili salmo yujil chaʼan jiñi israelob tsaʼ aqʼuentiyob ñuc bʌ i majtan, come Dios tsiʼ yajca chaʼan jiñob jach miʼ yʌqʼueñob «i tʼan» yicʼot i «mandar» (pejcan Salmo 147:19, 20). Joñonla yom tijicñayonla jaʼel come Jehová tsiʼ yajcayonla chaʼan mi la cʌcʼ ti cʌñol i cʼabaʼ. Tsaʼ laj cʌñʌ jiñi Dios, i miʼ tojʼesañonla tiʼ Tʼan. Cheʼ bajcheʼ iliyi, mi lac mejlel ti sujtel tiʼ yamigo. Jin chaʼan mi lac wen aqʼuen wocolix i yʌlʌ. Cheʼ bajcheʼ tsaʼ bʌ i tsʼijbu jiñi Salmo 147, cabʌlʌch chucoch yom mi lac cʌl «subula i ñuclel» Jehová yicʼot mi laj coltan yambʌlob chaʼan cheʼ miʼ melob jaʼel.