Jiñi apóstol Pablo wen yʌxʌl i yo tsaʼ ajñi chaʼan maʼañic miʼ yajlel tiʼ yac tac Satanás, pero an yambʌ xñoptʼañob mach bʌ cheʼic tsaʼ ajñiyob. Ti Corinto an tsaʼ bʌ i ñaʼtayob chaʼan maʼañic chuqui mi caj i chaʼleñob come wen pʼʌtʌl i ñopoñel (chʼujbiya) tsiʼ ñaʼtayob (1 Co. 10:12). Jin chaʼan Pablo tiʼ subeyob: «Mic chaʼlen bʌqʼuen ame cajic ti sojquel laʼ ñaʼtʌbal chaʼan lot cheʼ bajcheʼ jini lucum tsiʼ loti Eva chaʼan mach chʌn xucʼuleticla yicʼot Cristo» (2 Co. 11:3).

Jiñi i tʼan Pablo miʼ cʌntesañonla chaʼan yom yʌxʌl laj co i maʼañic mi lac bajñel chʼʌm lac bʌ ti ñuc. Chaʼan maʼañic miʼ yʌsin lac pensar jiñi i lot Satanás, yom mi laj cʌn chaʼan añʌch i wocolel yicʼot yom mi laj cʌntan lac bʌ.

An muʼ tac bʌ i yʌjlel mach bʌ isujmic chaʼan miʼ lotintel jiñi wiñicob xʼixicob (quixtañujob), i cheʼ jiñi miʼ qʼuextañob chuqui miʼ ñaʼtan yicʼot chuqui miʼ melob (chaʼleñob). Cheʼ bajcheʼ miʼ yʌl jiñi libro Propaganda and Persuasion, jiñi tʼan mach bʌ i isujmic «mach i tojelic, miʼ ticʼlañonla yicʼot mach utsʼatic». Jiñi quixtañujob miʼ yʌlob chaʼan iliyi lajalʌch bajcheʼ «lot, mucʼ jach laj cʼʌjñel yicʼot yom i ñijcañob lac pensar».

¿Chucoch añʌch i wocolel ili lotintel tac? Come lajalʌch bajcheʼ jumpʼejl gas wen am bʌ i venenojlel, maʼañic bʌ miʼ mejlel laj qʼuel mi tsiquilic i yujtsʼil. Maʼañic mi la cubin cheʼ mi lac sicʼ i xucʼu xucʼul miʼ yʌsin laj conciencia. Vance Packard, chajpʌbil bʌ chaʼan miʼ  tsajiben i melbal quixtañujob, miʼ yʌl chaʼan miʼ yʌsiben i pensar cabʌl quixtañujob yicʼot miʼ ticʼlañonla, «ñumento miʼ mel i yeʼtel (troñel) ti lac tojlel bajcheʼ mach ñaʼtʌbilic lac ñaʼtan». Yambʌ wen yujil bʌ miʼ yʌl chaʼan jiñi wiñicob xʼixicob «an i wersa mulayob i mel mach bʌ lac meleyix yubil» come jiñi lotintel miʼ ñijcʌbeñob i pusicʼal. Iliyi an i yʌcʼʌ chaʼan jiñi quixtañujob miʼ jop tsʌnsañob i bʌ, miʼ yujtel guerra, miʼ tsʼaʼleñob i bʌ tiʼ caj mach lajalobic i colorlel i pʌchʌlel, i ñopbal yicʼot yan tac bʌ (Easily Led—A History of Propaganda).

Mi jiñi quixtañujob miʼ cʼʌñob lot tac chaʼan miʼ ticʼlañonla, ¿wocol ba mi caj i yubin Satanás chaʼan miʼ mel jaʼel? Cʼʌlʌ wajali an i wen tsajibe i melbal jiñi quixtañujob. Come jiñi pañimil (mulawil) an tiʼ cʼʌb, jin jach chuqui miʼ cʼʌn chaʼan miʼ puc jiñi lot (1 Jn. 5:19; Jn. 8:44). An i mʌcbe i pensar yonlel quixtañu, i cheʼ bajcheʼ miʼ yʌl jiñi Biblia woli (choncol) i «lotin pejtel winicob ti pañimil» (Ap. 12:9; 2 Co. 4:4). Pero ¿bajcheʼ miʼ mejlel laj coltan lac bʌ?

Jesús tsiʼ pʌsʌ junchajp muʼ bʌ i mejlel lac mel chaʼan maʼañic mi lac yajlel ti jiñi lotintel. Tsiʼ yʌlʌ: «Mi caj laʼ cʌn i sujmlel c tʼan. I sujmlel c tʼan mi caj i yʌqʼuetla ti colel» (Jn. 8:31, 32). Pero miʼ yʌlob chaʼan muʼ bʌ i ñaxan sajtel ti jumpʼejl guerra jiñʌch jiñi i sujmlel, come jiñi soldadojob miʼ lotiñob i contra. Jin chaʼan, juntiquil soldado yomʌch miʼ ñaʼtan baqui bʌ i sujmlel chaʼan maʼañic miʼ mejlel ti lotintel. Chaʼan jiñi laj contra maʼañic miʼ lotiñonla jaʼel, i cʼʌjñibalʌch lac chaʼan jiñi i sujmlel. Iliyi yaʼʌch mi lac taj yaʼ ti Biblia, chʼoyol bʌ ti Jehová. Yaʼʌch baqui mi lac taj laj coltʌntel chaʼan maʼañic mi lac yajlel tiʼ lot tac Satanás (2 Ti. 3:16, 17).

Satanás, jiñi xcʌntesa ti lot, wen yujilʌch iliyi. Jin chaʼan, miʼ cʼʌn am bʌ wʌʼ ti pañimil chaʼan jiñi quixtañujob maʼañic miʼ pejcañob jiñi Biblia. ¡Mach a wʌcʼ a bʌ ti lotintel! (Ef. 6:11). Yom mi lac chaʼlen wersa chaʼan ‹mi lac wen chʼʌmben isujm› bajcheʼ an jiñi i sujmlel (Ef. 3:18). Ñaʼtancu tsaʼ bʌ i yʌlʌ juntiquil maestro i cʼabaʼ Noam Chomsky: «Maʼañic majqui mi caj i yotsan ti lac jol jiñi i sujmlel bʌ. Yomʌch mi lac bajñel sʌclan». Jin chaʼan, jatet yom maʼ bajñel taj jiñi i sujmlel cheʼ bʌ ti jujumpʼejl qʼuin maʼ ‹wen qʼuel i Tsʼijbujel Dios› (Hch. 17:11).

 Yom maʼ cʼajtesan chaʼan Satanás mach yomic cheʼ mi lac wen chʼʌmben isujm yicʼot cheʼ mi lac wen ñaʼtan. ¿Chucoch? Come jumpʼejl libro miʼ yʌl chaʼan jiñi lot miʼ ñumen mel i yeʼtel ti lac tojlel cheʼ bʌ maʼañic mi lac wen cʼʌn lac ñaʼtʌbal (Media and Society in the Twentieth Century). Jin chaʼan, mach ti orajic yom maʼ chʼujbin pejtelel chuqui miʼ yʌjlel (Pr. 14:15). Cʼʌñʌ a ñaʼtʌbal aqʼuebil bʌ i chaʼañet Dios chaʼan maʼ ñop ti jumpʼejl a pusicʼal chaʼan añʌch a wicʼot i sujmlel (Pr. 2:10-15; Ro. 12:1, 2).

Jiñi soldadojob miʼ cʼʌñob jaʼel jiñi lot chaʼan miʼ cʼunʼesañob i contra. Tajol miʼ sʌclañob chaʼan jiñi i contrajob miʼ tech i letojiñob i bʌ o miʼ tʼoxob i bʌ. Juntiquil i yum soldadojob i chaʼan Alemania tsiʼ yʌlʌ chaʼan junchajp chucoch tsiʼ sʌtʌyob jiñi Primera Guerra Mundial jiñʌch chaʼan «tsiʼ bʌcʼñayob jiñi lotintel tsaʼ bʌ caji i yubiñob tiʼ tojlel i contrajob, lajal bajcheʼ jiñi lucum miʼ bʌcʼtesan juncojt xtʼul i maʼañic miʼ ñijcan i bʌ». Lʌcʼʌ lajal miʼ mel Satanás chaʼan miʼ tʼox jiñi congregación yicʼot miʼ jisañonla. Miʼ mejlel i tech wocol tiʼ tojlel hermanojob o miʼ cʌyob i yorganización Jehová jiñi cʼux bʌ miʼ yubiñob cheʼ an chuqui miʼ yujtel o ticʼlʌbil bʌ miʼ yubiñob i bʌ.

¡Mach a wʌcʼ a bʌ ti lotintel! Acʼʌ a bʌ ti tojʼesʌntel tiʼ Tʼan Dios. Jiñi Biblia miʼ yʌl chaʼan yom mi lac ñusʌben lac bʌ lac mul yicʼot ti orajach mi lac chaʼ utsʼesan lac bʌ chaʼan chʌn muchʼul mi la cajñel (Mt. 5:23, 24; Col. 3:13, 14). Cheʼ jaʼel, miʼ wʌn subeñonla chaʼan wen wocol mi tsaʼ lac ñajtʼesa lac bʌ ti congregación (Pr. 18:1). ¿Chucoch maʼañic maʼ wen qʼuel bajcheʼ yilal añet chaʼan maʼ ñaʼtan mi woliʼ ticʼlañet jiñi i lot Satanás? Jumpʼejl ejemplo, ñaʼtan cheʼ bʌ tsiʼ meleyob mach bʌ weñic ti a tojlel. Cʼajtiben a bʌ: «¿Chuqui tsaʼ c mele? ¿Tsaʼ ba c pʌsʌ i ñaʼtʌbal pañimil o i ñaʼtʌbal Dios?» (Gá. 5:16-26; Ef. 2:2, 3).

Mi juntiquil soldado maʼañix miʼ wen qʼuel ti ñuc jiñi waʼchocobil bʌ tiʼ tojlel, mach weñix miʼ cajel ti guerra. Jin chaʼan, jiñi xlotob miʼ ñop i cʼunʼesʌbeñob i xucʼtʌlel jiñi soldadojob tiʼ tojlel i yumob. Miʼ yʌlob tʼan tac bajcheʼ iliyi: «Mach yomic mi laʼ ñopben i tʼan jiñi laʼ yum» o «¡Mi caj i yʌqʼuetla ti chʌmel!» Jiñi xlotob miʼ cʼʌmben i sajtemal yambʌlob chaʼan  miʼ yʌcʼob ti ñaʼtʌntel chaʼan isujmʌch woli (yʌquel) bʌ i yʌlob. Cheʼʌch miʼ mel Satanás jaʼel. Ti bele ora miʼ ñop i cʼunʼesan lac xucʼtʌlel tiʼ tojlel jiñi waʼchocobiloʼ bʌ i chaʼan Jehová tiʼ tejclum.

¿Bajcheʼ miʼ mejlel a cʌntan a bʌ? Yom xucʼulet ti jumpʼejl a pusicʼal tiʼ tojlel i yorganización Jehová yicʼot jiñi waʼchobiloʼ bʌ i chaʼan, anquese mach tojobic. (1 Ts. 5:12, 13) Mach a wʌcʼ a bʌ ti lotintel tiʼ tojlel jiñi tsaʼ bʌ i cʌyʌyob i sujmlel o jiñi muʼ bʌ i contrajiñob i yorganización Dios, anquese poj isujmʌch yilal muʼ bʌ i yʌlob (2 Ts. 2:2; Tit. 1:10). Jacʼʌ jiñi ticʼojel tsaʼ bʌ aqʼuenti Timoteo: Chʌn ajñen ti jiñi i sujmlel tsaʼ bʌ a cʌñʌ i mach a ñajʌtesan (2 Ti. 3:14, 15). Cabʌl chuqui miʼ pʌsbeñonla chaʼan mucʼʌch i mejlel lac ñop tiʼ tojlel jiñi xucʼul bʌ xʼeʼtel, cʼʌmbil bʌ i chaʼan Jehová ti jiñi ñumeñix bʌ 100 jab chaʼan miʼ pʌsbeñonla i sujmlel (Mt. 24:45-47; He. 13:7, 17).

Cʼajtesan chaʼan an i tajol wen tsiquilʌch bajcheʼ miʼ ticʼlañonla Satanás. Miʼ cʼʌn jiñi bʌqʼuen, «iliyi jiñʌch jumpʼejl yac wajalix bʌ i cajel i cʼʌn» (Easily Led—A History of Propaganda). Jumpʼejl ejemplo, jiñi maestro ti Gran Bretaña i cʼabaʼ Philip Taylor miʼ yʌl chaʼan jiñi asiriojob tsiʼ cʼʌñʌyob jiñi bʌcʼtesaya yicʼot lotiya chaʼan miʼ mʌlbeñob (jotbeñob) i contra. Satanás mi caj i cʼʌn jaʼel jiñi i bʌcʼñʌntel wiñicob, laj contrajintel, jiñi chʌmel (sajtel) o yan tac bʌ chaʼan miʼ bʌcʼtesañonla yicʼot mi laj cʌy lac melben i yeʼtel Jehová (Is. 8:12; Jer. 42:11; He. 2:15).

¿Muʼ ba caj a cʌy chaʼan miʼ cʼunʼesañet jiñi i lot tac Satanás o maʼ chaʼlen mulil tiʼ tojlel Jehová? Jesús tsiʼ yʌlʌ: «Mach mi laʼ bʌcʼñan jini muʼ bʌ i tsʌnsan laʼ bʌcʼtal pero ti wiʼil maʼanix chuqui mi mejlel i tumbeñetla» (Lc. 12:4). Mach a ñaʼtan chaʼan Jehová maʼañic mi caj i cʌntañet, chaʼan maʼañic mi caj i yʌqʼueñet ‹jini ñuc bʌ a pʼʌtʌlel› yicʼot a coltʌntel chaʼan maʼañic maʼ chaʼlen bʌqʼuen yicʼot chaʼan chʌn xucʼul maʼ wajñel (2 Co. 4:7-9; 1 P. 3:14).

Isujmʌch, an i tajol maʼ chaʼlen bʌqʼuen. Pero cʼajtesan tsaʼ bʌ i sube Jehová jiñi Josué: «Yom maʼ pʼʌtʼesan a bʌ. Yom chʼejlet. Mach a chaʼlen bʌqʼuen. Mach yomic maʼ lujbʼan. Come lac Yum Dios mi caj i yajñel a wicʼot baqui jach maʼ majlel» (Jos. 1:9). Cheʼ mach tijicñayic a pusicʼal maʼ wubin, pejcan Jehová ti oración yicʼot suben tiʼ pejtelel chuqui maʼ ñaʼtan. Miʼ mejlel a ñop chaʼan jiñi ñʌchʼtʌlel «chʼoyol bʌ ti Dios» mi caj i cʌntan a pusicʼal yicʼot a ñaʼtʌbal chaʼan maʼañic maʼ chʼujbiben i lot Satanás (Fil. 4:6, 7, 13).

¿Cʼajal baʼ chaʼan chuqui tsiʼ yʌlʌ rabsaqué tiʼ contra i tejclum Dios? Lʌcʼʌ lajal tsiʼ yʌlʌ bajcheʼ iliyi: «Maʼañic chuqui mi caj i coltañetla tiʼ tojlel Asiria. Mi jiñic to laʼ Dios Jehová mi caj i coltañetla». I tsiʼ chaʼ alʌ: «Jiñʌch laʼ Dios tsaʼ bʌ i chocoyon tilel chaʼan mic jisañetla». Jehová tsiʼ pʼʌtʼesa jiñi rey ti Judá cheʼ tsiʼ sube: «Mach a chaʼlen bʌqʼuen chaʼan jini tʼan tsaʼ bʌ a wubi cheʼ bʌ tsiʼ pʼajayoñob jini chʼoyoloʼ bʌ ti Asiria» (2 R. 18:22-25; 19:6). Ti wiʼil, tsiʼ choco cʼotel juntiquil ángel tsaʼ bʌ i jisa 185 mil soldado chʼoyoloʼ bʌ Asiria ti jumpʼejl acʼʌlel (2 R. 19:35).

¿Qʼuelbil baʼ chaʼan jumpʼejl película baqui an juntiquil quixtañu maʼañic bʌ miʼ ñaʼtan mi woli jach ti lotintel? ¿A womix baʼ suben tsaʼ wubi: «¡Mach a mel, woli jach a lotintel!»? Ñaʼtancu jaʼel jiñi ángelob, woliʼ qʼueloñobla yicʼot woliʼ subeñoñobla: «¡Mach a wʌcʼ a bʌ ti lotintel ti Satanás!».

Mach a jacʼ chuqui miʼ yʌl Satanás (Pr. 26:24, 25). Ubin chuqui miʼ yʌl Jehová yicʼot chʼujbiben i tʼan tiʼ pejtelel ora (Pr. 3:5-7). Jacʼʌ muʼ bʌ i subeñet: «Yom pʼipʼ a pusicʼal calobil. Ñuqʼuesʌbeñon c pusicʼal» (Pr. 27:11). Mi cheʼʌch maʼ mel maʼañic chuqui mi caj i chaʼlen a pensar yicʼot maʼañic mi caj a yajlel ti lotintel.