JIÑI xñoptʼañob ti ñaxam bʌ siglo tsiʼ chaʼleyob wersa i sʌclañob jiñi wiñicob xʼixicob (quixtañujob) chaʼan miʼ subeñob «jini wen tʼan chaʼan i yumʌntel Dios» (Mt. 24:14). An tsajñiyoʼ bʌ ti yambʌ país tac. Jumpʼejl ejemplo jiñʌch jiñi apóstol Pablo, tsajñi ti jiñi tejclum cʌmbil bʌ ili ora bajcheʼ Turquía i tsiʼ wen chaʼle subtʼan cheʼ tsaʼ ajñi bajcheʼ misionero. * Añix ñumen 2 mil jab i cheʼ ti 2014 tsaʼ ujti ñuc bʌ subtʼan yaʼ ti Turquía. ¿Majqui tsiʼ mele, i chucoch?

Yaʼ ti Turquía an ñumen ti 2,800 xsubtʼañob, pero an cheʼ bʌ 79 millón quixtañu. Ili yom i yʌl chaʼan ti 28 mil quixtañujob an juntiquil Testigo. Jin chaʼan, maxto wen cabʌlic quixtañu mejlemob ti subentel jiñi wen tʼan. Ili ñuc bʌ subtʼan tsaʼ mejli chaʼan ti tsʼitaʼ jach qʼuin miʼ mejlel i yubiñob jiñi wen tʼan yonlel quixtañu. Cheʼ tsaʼ mejli ili subtʼan, tsaʼ cʼoti 550 hermanojob tilemoʼ bʌ ti yambʌ país chaʼan miʼ tem chaʼleñob subtʼan yicʼot jiñi hermanojob chumuloʼ bʌ yaʼi. ¿Chuqui tsaʼ tajle cheʼ tsaʼ mejli iliyi?

Cabʌl quixtañujob tsaʼ subentiyob jiñi wen tʼan. Jumpʼejl congregación am bʌ ti Estambul tiʼ tsʼijbu: «Come jiñi quixtañujob tsiʼ qʼueleyob chaʼan woli (choncol) i wen cʼotelob i testigojob Jehová, tsaʼ caji i cʼajtibeñon lojon mi woli (yʌquel) i mejlel jumpʼejl colem tempa bʌ». Yaʼ ti Izmir, jumpʼejl congregación tiʼ tsʼijbu: «Juntiquil wiñic muʼ bʌ ti eʼtel (troñel) yaʼ baqui miʼ cottʌl taxi tsiʼ cʼajtibe juntiquil anciano: ‹¿Chuqui woli ti ujtel? ¿Tsaʼ ba ñumen pʼojli laʼ weʼtel?›». Jiñi quixtañujob tsaʼʌch toj sajtiyob i pusicʼal cheʼ tsiʼ qʼueleyob jiñi ñuc bʌ subtʼan woli bʌ i mejlel.

Jiñi hermanojob tilemoʼ bʌ ti yambʌ país tsiʼ wen mulayob jiñi subtʼan. Steffen, chʼoyol bʌ ti Dinamarca, tsiʼ yʌlʌ: «Ti jujumpʼejl qʼuin tsaʼ mejli c suben wen tʼan jiñi quixtañujob, tsaʼ c subeyob jiñi maxto bʌ añic i wis ubiyob i chaʼan bʌ Jehová. Tsaʼ cubi chaʼan woliyʌch cʌcʼ ti cʌjñel i cʼabaʼ Jehová». Juntiquil hermano chʼoyol bʌ ti Francia i cʼabaʼ Jean-David tiʼ tsʼijbu: «Ti jumpʼejl jach calle cabʌl ora mic chaʼlen lon subtʼan. ¡Wen utsʼatax! Cabʌlob maxto bʌ i cʌñʌyobic jiñi i testigojob Jehová. Ti jujumpʼejl otot, mic tech lon tʼan, mi lon c pʌs jumpʼejl video yicʼot mij cʌy lojon jun tac loqʼuem bʌ ti Biblia».

 Ti chaʼpʼejl semana jiñi 550 hermanojob tsiʼ cʌyʌyob cheʼ bʌ 60 mil jun tac loqʼuem bʌ ti Biblia. Cheʼ bajcheʼ mi laj qʼuel, cabʌl quixtañujob tsaʼ mejliyob ti subentel jiñi wen tʼan.

Tsiʼ ñumen tajayob i chʼejlel ti subtʼan. Jiñi ñuc bʌ subtʼan tsaʼʌch i colta jiñi hermanojob chumuloʼ bʌ yaʼi. Cabʌl tsaʼ caji i mulañob ochel bajcheʼ precursor. 82 hermanojob tsaʼ ochiyob bajcheʼ precursor regular cheʼ bʌ añix jumpʼejl jab i ñumel jiñi ñuc bʌ subtʼan.

Jiñi hermanojob tsajñiyoʼ bʌ ti jiñi ñuc bʌ subtʼan miʼ yʌlob chuqui ti wenlel tsiʼ tajayob. Juntiquil hermana chʼoyol bʌ ti Alemania i cʼabaʼ Şirin tiʼ tsʼijbu: «Jiñi hermanojob ti Turquía mach wocolic miʼ yubiñob chaʼan mi chaʼleñob subtʼan baqui jach. Joñon wocol mi cubin come wen cujil bʌqʼuen. Pero jiñi ñuc bʌ subtʼan, jiñi hermanojob yicʼot jiñi oración tsaʼʌch i coltayon chaʼan miʼ mejlel c mel. ¡Tsaʼto mejliyon ti subtʼan yicʼot j cʌy tratado tac yaʼ ti metro! Wʌle, mach wen cujilix bʌqʼuen».

Johannes, juntiquil hermano chʼoyol bʌ ti Alemania, tsiʼ yʌlʌ: «Añʌch chuqui tac tsaʼ j cʌñʌ chaʼan mic weñʼesan jiñi c subtʼan. Jiñi hermanojob ti Turquía wen yomob i suben wen tʼan jiñi quixtañujob baqui jach miʼ tajob, yicʼot bajcheʼ jach ora mi chaʼleñob subtʼan. Tsaʼ c ñaʼta chaʼan cheʼʌch com c mel jaʼel cheʼ mic chaʼ sujtel ti Alemania. Ili ora, ñumen cabʌlix quixtañu mic subeñob jiñi wen tʼan».

Juntiquil hermana chʼoyol bʌ ti Francia i cʼabaʼ Zeynep tsiʼ yʌlʌ: «Ili ñuc bʌ subtʼan tsaʼʌch i wen aqʼueyon c wenlel. Tsiʼ coltayon c ñumen c taj c chʼejlel yicʼot c ñopoñel ti Jehová».

Jiñi hermanojob ñumen temel tsaʼ ajñiyob. Maʼañic miʼ wis ñajʌyel jiñi cʼuxbiya yicʼot cheʼ juntemel tsaʼ ajñiyob jiñi hermanojob anquese chʼoyolob ti yan tac bʌ país. Jean-David, tsaʼix bʌ lac taja ti tʼan, tsiʼ yʌlʌ: «Jiñi hermanojob tsiʼ wen pʌsʌyob i yutslel ti lon c tojlel. Cheʼʌch bajcheʼ juntiquil i yamigo o i familia tsiʼ qʼueleyoñob lojon. Tsiʼ yotsayon lon tiʼ yotot. Cujil chaʼan añʌch la quermañojob tiʼ pejtelel pañimil (mulawil) come pejcʌbil c chaʼan yaʼ ti jun tac. Wʌle tsaʼix c taja j qʼuel chaʼan isujmʌch. Tsaʼto c ñumen  c taja c tijicñʌyel cheʼ i testigojon Jehová. Mi cʌqʼuen wen wocolix i yʌlʌ chaʼan ili ñuc bʌ eʼtel aqʼuebil bʌ i chaʼañon».

Jiñi hermana Claire chʼoyol bʌ ti Francia tsiʼ yʌlʌ: «Tsaʼ sujtiyon lojon ti jumpʼejl familia, mach yʌlʌyic mi chʼoyolon lojon ti Alemania, Dinamarca, Francia o Turquía. Lajal bajcheʼ jiñi Dios tsiʼ junyajlel jisa jiñi muʼ bʌ i tʼoxonla».

Stéphanie, chʼoyol bʌ ti Francia, tsiʼ yʌlʌ jaʼel: «Jiñi ñuc bʌ subtʼan tsiʼ coltayon lon j qʼuel chaʼan jiñi laj cʼuxbiya ti Jehová jiñʌch muʼ bʌ i muchʼchocoñonla, mach jiñic laj cultura o lac tʼan».

Cabʌl hermanojob tsajñiyoʼ bʌ ti jiñi ñuc bʌ subtʼan tsaʼ caji i ñaʼtañob chaʼ sujtel yaʼ ti Turquía chaʼan miʼ chaʼleñob coltaya. An tsaʼix bʌ majliyob, i tijicña mi la cubin tiʼ tojlelob.

Jumpʼejl ejemplo, an jumpʼejl alʌ grupo baqui cojach an 25 xsubtʼañob. Ti cabʌl jab, juntiquil jach anciano tsaʼ ajñi. Pero cheʼ ti 2015, tsaʼ cʼoti 6 hermanojob chʼoyoloʼ bʌ ti Alemania yicʼot ti Países Bajos. ¡Wen tijicña tsiʼ yubiyob jiñi xsubtʼañob!

¿Bajcheʼ yubil miʼ yubin jiñi hermanojob añix bʌ ora i cajelob ti coltaya yaʼ ti Turquía? Isujm, an tacʌch wocol tajbilob i chaʼañob, pero tajbilob i chaʼan cabʌl bendición. Laʼ laj qʼuel chuqui miʼ yʌlob.

Juntiquil hermano ñujpuñem bʌ i cʼabaʼ Federico, cheʼ bʌ 40 i jabilel, chʼoyol bʌ ti España, miʼ yʌl: «Cheʼ maʼañic cabʌl chuqui an c chaʼan libre mi cubin c bʌ i miʼ mejlel c ñumen acʼ c ñaʼtʌbal ti jiñi ñumen ñuc bʌ i cʼʌjñibal». ¿Wem ba miʼ yʌl cheʼ muqʼuic lac mel ili eʼtel? Miʼ chaʼ al: «¡Wen cu! Cheʼ maʼ majlel a coltan jiñi quixtañujob ti yambʌ país chaʼan miʼ cʌñob Jehová, jiñʌch woli a cʌyben ti a wenta a cuxtʌlel. I ñumen tsiquil maʼ qʼuel bajcheʼ miʼ cʌntañet».

Juntiquil hermano ñujpuñem bʌ i cʼabaʼ Rudy, añix bʌ 60 i jabilel yicʼot chʼoyol bʌ ti Países Bajos, miʼ yʌl: «Wen tijicña mi cubin lon cheʼ woliyon lojon ti subtʼan yaʼ baqui ñumen yom coltʌntel yicʼot cheʼ cabʌl  quixtañu maʼañic bʌ ubibil i chaʼañob jiñi wen tʼan, woli j coltan lojon i cʌn. Miʼ wen aqʼueñon lojon c tijicñʌyel cheʼ utsʼatax miʼ jacʼob i sujmlel».

Juntiquil hermano ñujpuñem bʌ i cʼabaʼ Sascha pʼis ñumeñix bʌ ti 40 i jabilel, chʼoyol bʌ ti Alemania, miʼ yʌl: «Cheʼ jajayajl mic loqʼuel ti subtʼan, mic taj quixtañujob maʼañic bʌ ubibil i chaʼañob jiñi wen tʼan. Wen tijicña mi cubin cheʼ miʼ mejlel j coltañob i cʌn Jehová».

Juntiquil hermana i cʼabaʼ Atsuko chʼoyol bʌ ti Japón ñujpuñemix bʌ yicʼot añix bʌ 35 i jabilel miʼ yʌl: «Ti ñaxan, wen comix chaʼan ti ora miʼ tilel jiñi Armagedón. Pero cheʼ bʌ tsaʼ majliyon ti Turquía, tsaʼ qʼuextʌyi c ñaʼtʌbal i mi cʌqʼuen wocolix i yʌlʌ Jehová cheʼ wolito ti pijt. Cheʼ mic ñumen qʼuel bajcheʼ woliʼ tojʼesan majlel Jehová jiñi eʼtel, com c ñumen lʌcʼtesan c bʌ tiʼ tojlel».

Alisa, jiñʌch juntiquil hermana chʼoyol bʌ ti Rusia pʼis ñumeñix bʌ ti 30 i jabilel, miʼ yʌl: «Cheʼ woli c melben i yeʼtel Jehová ti yambʌ tejclum an i coltayon j qʼuel chaʼan añʌch i yutslel i pusicʼal». (Sal. 34:8). Miʼ chaʼ al: «Jehová mach c Tatic jach, juntiquilʌch Camigo wen lʌcʼʌl bʌ an tic tojlel muʼ bʌ i mejlel c ñumen cʌn tiʼ pejtelel ora. Wen cabʌl jax c tijicñʌyel, utsʼatax ñusʌbil c chaʼan yicʼot tajbil c chaʼan bendición tac».

Wocolix i yʌlʌ jiñi ñuc bʌ subtʼan tsaʼ bʌ ujti ti Turquía, yonlel quixtañu tsaʼix i yubiyob jiñi wen tʼan chaʼan i Yumʌntel Dios. Pero cabʌl to baqui yom miʼ yujtel jiñi subtʼan. Jiñi hermanojob tsaʼ bʌ majliyob yaʼ ti Turquía ti jujumpʼejl qʼuin miʼ tajob quixtañujob maxto bʌ añic baʼ i yubiyob jiñi wen tʼan. ¿Muʼ ba a mulan majlel baqui yom to cabʌl xsubtʼañob? Mi cheʼʌchi, cʼajtesan muʼ bʌ i yʌl Juan 4:35: «Letsan laʼ wut, qʼuelela jini cholel. Come tiquinix. Cʼajolix yom». ¿Muʼ ba a mejlel ti majlel yaʼ baqui jiñi quixtañujob wen yomob i cʌn jiñi wen tʼan? Mi cheʼʌchi, chaʼlen wersa chaʼan maʼ mejlel ti majlel. Chʌn ñopo chaʼan mi caj a taj cabʌl bendición mi mucʼʌch a chaʼlen subtʼan «cʼʌlʌl ti ñajt bʌ pañimil» (Hch. 1:8).