1. a) ¿Chuqui yom bʌ miʼ ñaʼtan jiñi xcolelob? b) ¿Chucoch mach yomic miʼ chaʼleñob bʌqʼuen? (Qʼuele jiñi foto tac).

MI XCOLELET, tajol a wujilʌch jaʼel chaʼan yomʌch maʼ ñaxan wen chajpan cheʼ bʌ an baqui a wom majlel. Jiñi laj cuxtʌlel lajalʌch bajcheʼ loqʼuel majlel ti xʌmbal, i cheʼ xcolelontola lajal bajcheʼ woli (choncol) lac wen chajpan baqui mi caj lac majlel. Tajol wocolʌch chaʼan mi lac wen chajpan. Juntiquil xcʼalʌl i cʼabaʼ Heather miʼ yʌl: «Mic bʌcʼñan cheʼ mic ñaʼtan chuqui mi caj c mel tij cuxtʌlel». Mi cheʼ maʼ wubin a bʌ jaʼel, cʼajtesan muʼ bʌ i yʌl Jehová: «Mach yomic maʼ lij a bʌ come a Dioson. Mi caj c wen pʼʌtʼesañet. Mi caj j coltañet» (Is. 41:10).

2. ¿Bajcheʼ a wujil chaʼan Jehová yomʌch maʼ taj a tijicñʌyel?

² Jehová miʼ subeñet chaʼan yom maʼ wen ñaʼtan chuqui mi caj a mel (chaʼlen) ti talto bʌ qʼuin (Ec. 12:1; Mt. 6:20). Yom chaʼan tijicñayet. Tsiquilʌch chaʼan cheʼʌch miʼ mulan cheʼ maʼ qʼuel, maʼ wubin yicʼot maʼ wen ñusan a bʌ ti chuqui tac utsʼatax bʌ melbil bʌ i chaʼan. Ñaʼtancu jaʼel, jiñʌch miʼ cʌntañonla yicʼot miʼ pʌsbeñonla bajcheʼ yom mi lac chumtʌl ti wen. Qʼuele chuqui miʼ yʌl tiʼ tojlel jiñi muʼ bʌ i tsʼaʼlebeñob i ticʼojel: «Tsaʼ laʼ yajca chuqui tac tsʼaʼlebil c chaʼan». I tsiʼ yʌlʌ: «Ñaʼtanla, tijicña mi caj i yubiñob c winicob, pero jatetla mi caj laʼ wubin quisin. Qʼuelela c winicob. Mi caj i chaʼleñob  cʼay chaʼan i tijicñʌyel i pusicʼal» (Is. 65:12-14). Cheʼ bʌ weñʌch chuqui mi lac yajcan lac mel, mi la cʌqʼuen i ñuclel Jehová (Pr. 27:11).

3. ¿Chuqui yom Jehová chaʼan maʼ mel?

³ ¿Chuqui yom Jehová chaʼan maʼ mel? Ñaʼtancu iliyi. Tsiʼ mele (pʌtʌ) jiñi añimal tac chaʼan miʼ tajob i tijicñʌyel ti chuqui miʼ cʼuxob yicʼot miʼ japob yicʼot chaʼan miʼ pʼojlelob. Pero muʼ bʌ i yʌqʼueñonla lac tijicñʌyel joñonla jiñʌch cheʼ mi laj cʌn yicʼot mi lac melben i yeʼtel (troñel) (Sal. 128:1; Mt. 5:3). Jiñi Biblia miʼ yʌl chaʼan jiñʌch jiñi «Dios muʼ bʌ i cʼuxbiñonla» yicʼot jiñi «tijicña bʌ Dios», yicʼot tsaʼ bʌ i mele wiñicob xʼixicob (quixtañujob) «tiʼ yejtal» (2 Co. 13:11; 1 Ti. 1:11; Gn. 1:27). Jin chaʼan, tijicña mi caʼ wajñel mi mucʼʌch a lajin Dios. Jiñi i Tʼan miʼ yʌl: «Ñumen tijicña jini muʼ bʌ i yʌcʼ majtañʌl bajcheʼ jini muʼ bʌ i chʼʌm i majtan» (Hch. 20:35). ¿Am baʼ wubi a bʌ bajcheʼ iliyi? Ili jiñʌch junchajp ñuc bʌ i cʼʌjñibal ti laj cuxtʌlel. Jehová yom chaʼan maʼ pʌs a cʼuxbiya tiʼ tojlel yicʼot tiʼ tojlel quixtañujob ti jiñi muʼ bʌ a yajcan a mel (pejcan Mateo 22:36-39).

4, 5. ¿Chucoch tijicña tsiʼ yubi i bʌ Jesús?

⁴ Jesucristo jiñʌch jiñi ñuc bʌ ejemplo chaʼañet. Cheʼ bʌ chut to, tsiʼ chaʼle alas yicʼot tsiʼ yubi i tijicñʌyel. Jiñi i Tʼan Dios miʼ yʌl chaʼan an i yorajlel chaʼan mi lac chaʼlen tseʼñal yicʼot chaʼan mi lac chaʼlen tijpʼel (Ec. 3:4). Pero Jesús tsaʼʌch i pejca jaʼel jiñi Tsʼijbujel, i cheʼʌch tsaʼ mejli i lʌcʼtesan i bʌ tiʼ Tat. Cheʼ bʌ 12 jaxto i jabilel, jiñi xcʌntesajob ti templo «tsaʼ toj sajtiyob i pusicʼal» chaʼan «i tʼan», come «cabʌl i ñaʼtʌbal» tiʼ chaʼan bʌ Dios (Lc. 2:42, 46, 47).

⁵ Cheʼ bʌ Jesús añix i jabilel, wen tijicña tsiʼ yubi come tsiʼ mele muʼ bʌ i mulan Dios. Jumpʼejl ejemplo, jiñi i Tat yom chaʼan miʼ suben «wen tʼan [jiñi] pʼumpuñoʼ bʌ» yicʼot «miʼ cʼoqʼuesʌbeñob i wut jini xpotsʼob» (Lc. 4:18). Jiñi salmo 40:8 miʼ yʌl bajcheʼ yubil tsiʼ yubi Jesús: «C Dios tijicña wolic mel chuqui a wom». Jesús tsiʼ wen mulaj i cʌntesan jiñi quixtañujob chaʼan cheʼʌch miʼ mejlel i cʌmbeñob i Tat (pejcan Lucas 10:21). An junsujtel tsiʼ cʌntesa juntiquil xʼixic chaʼan bajcheʼ yom miʼ chʼujutesan Dios. Cheʼ jiñi tiʼ sube jiñi xcʌntʼañob i chaʼan: «Jiñʌch c weʼel cheʼ mic mel chuqui yom c Tat tsaʼ bʌ i chocoyon tilel. Jiñʌch c weʼel cheʼ tsʼʌcʌl mic melben i yeʼtel» (Jn. 4:31-34). Wen tijicña tsiʼ yubi cheʼ tsiʼ pʌsʌ i cʼuxbiya ti Dios yicʼot tiʼ tojlel yambʌlob. Mi cheʼ maʼ mel jaʼel, miʼ mejlel a taj a tijicñʌyel.

6. ¿Chucoch weñʌch cheʼ maʼ suben juntiquil hermano añix bʌ i ñaʼtʌbal jiñi muʼ bʌ a ñaʼtan a mel?

⁶ Cabʌl hermanojob wen tijicña tsiʼ yubiyob cheʼ bʌ tsaʼ ochiyob bajcheʼ precursor cheʼ bʌ xcolelob to. ¿Ixcu cheʼ muqʼuic a subeñob muʼ bʌ a ñaʼtan a mel ti a cuxtʌlel? Proverbios 15:22 miʼ yʌl chaʼan wen miʼ loqʼuel chuqui mi lac ñaʼtan lac mel cheʼ mi laj cʼajtin laj coltʌntel ti yambʌlob. Jiñi hermanojob añobix bʌ i ñaʼtʌbal mi caj i subeñetob chaʼan cheʼ bʌ maʼ melben i yeʼtel Jehová tiʼ pejtelel ora cabʌl chuqui mi caj a cʌn muʼ bʌ i mejlel i coltañet ti a cuxtʌlel. Jesús cabʌl chuqui tsiʼ cʌñʌ tiʼ tojlel i Tat cheʼ bʌ yaʼto an ti panchan. Pero cabʌl to chuqui tsiʼ cʌñʌ cheʼ bʌ tsiʼ chaʼle subtʼan ila ti Pañimil. Jumpʼejl ejemplo, tsiʼ qʼuele chaʼan cheʼ bʌ jiñi wen tʼan miʼ cʼotel tiʼ pusicʼal quixtañujob yicʼot cheʼ xucʼul miʼ yajñel cheʼ miʼ ñusan wocol, mucʼʌch i yʌqʼuen i tijicñʌyel (pejcan Isaías 50:4; He. 5:8; 12:2). ¿Chucoch tijicña mi caj a wubin cheʼ bʌ maʼ melben i yeʼtel Jehová tiʼ pejtelel ora? Laʼ laj qʼuel.

7. ¿Chucoch cabʌl xcolelob miʼ mulañob i cʌntesan yambʌlob?

⁷ Jesús tsiʼ yʌlʌ chaʼan yom mi lac sʌclan jiñi quixtañujob chaʼan mi lac subeñob i  sujmlel yicʼot mi lac sujtesañob ti xcʌntʼan (Mt. 28:19, 20). Mi cheʼʌch woli (yʌquel) a ñaʼtan a mel jaʼel, wen tijicña mi caj a wubin a bʌ yicʼot mi caj a wʌqʼuen i ñuclel Dios. Tiʼ sujm, mach ti orajic mi caj a cʌn ti wen, lajal bajcheʼ cheʼ an chuqui a wom a cʌn a mel. Qʼuele chuqui tsiʼ yʌlʌ juntiquil hermano i cʼabaʼ Timothy, tsaʼ bʌ ochi bajcheʼ precursor cheʼ bʌ xcolel to: «Mic mulan c melben i yeʼtel Jehová tiʼ pejtelel ora, come cheʼʌch mic pʌsben j cʼuxbiya. Ti ñaxan maʼañic tsaʼ mejli c tech jumpʼejl estudio. Pero ti wiʼil, cheʼ bʌ tsaʼ majliyon ti jumpʼejl tejclum, ti jumpʼejl uw, cabʌl majqui tsaʼ caji cʌqʼuen estudio. An juntiquil tsaʼ bʌ caji ti majlel ti tempa bʌ tac. Ti wiʼil tsajñiyon yaʼ ti Cʌntesʌntel loqʼuem bʌ ti Biblia chaʼan i Bajñel to bʌ Wiñicob, * i tsaʼ chojquiyon majlel ti yambʌ tejclum. Yaʼi tsaʼ cʼoti c tech chʌmpʼejl estudio. Mic wen mulan j cʌntesan jiñi quixtañujob come miʼ yʌqʼueñon j qʼuel bajcheʼ jiñi chʼujul bʌ espíritu miʼ qʼuextʌbeñob i melbal» (1 Ts. 2:19).

8. ¿Chuqui melbil i chaʼan cabʌl xcolelob chaʼan miʼ mejlel i cʌntesañob yambʌlob?

⁸ An xcolelob tsaʼix bʌ i cʌñʌyob yambʌ tʼan. Jacob, juntiquil hermano chʼoyol bʌ ti Norteamérica tiʼ tsʼijbu: «Cheʼ bʌ 7 jaxto c jabilel, cabʌl c piʼʌlob ti qʼueljun tilemob ti Vietnam. Tsaʼ c mulaj c subeñob i chaʼan bʌ Jehová, jin chaʼan tsaʼ caji j cʌmbeñob i tʼan. Tsiʼ coltayon cheʼ bʌ tsaʼ caji c lajeʼ jiñi Lac Tsictesʌbentel am bʌ ti inglés yicʼot am bʌ ti tʼan vietnamita. Tsaʼ c sʌcla camigojob jaʼel yaʼ ti congregación am bʌ ti tʼan vietnamita lʌcʼʌl bʌ an ti cotot. Tsaʼ ochiyon bajcheʼ precursor cheʼ bʌ 18 c jabilel. Ti wiʼil, tsajñiyon ti jiñi Cʌntesʌntel loqʼuem bʌ ti Biblia chaʼan i Bajñel to bʌ Wiñicob. Ili cʌntesʌntel tsiʼ chajpayon chaʼan jiñi eʼtel yom bʌ mic mel ti jiñi grupo am bʌ ti tʼan vietnamita yaʼ baqui woliyon ti eʼtel bajcheʼ precursor yicʼot anciano. Cabʌl toj sajtelob i pusicʼal cheʼ miʼ qʼuelob chaʼan tsaʼ j cʌmbeyob i tʼan. An muʼ bʌ i pʌyoñob tiʼ yotot, i yaʼ mic tech j cʌntesañob i chaʼan bʌ Biblia. An tsaʼix bʌ i chaʼleyob chʼʌmjaʼ» (laja yicʼot Hechos 2:7, 8).

9. ¿Chuqui miʼ cʌntesañonla cheʼ mi lac sutqʼuin ti xcʌntʼan yambʌlob?

⁹ Cabʌl chuqui mi laj cʌn cheʼ mi lac sutqʼuin ti xcʌntʼan yambʌlob. Mi lac sujtel ti wem bʌ xʼeʼtel, mi laj cʌn bajcheʼ yom mi lac chaʼlen tʼan, mi lac taj lac chʼejlel yicʼot wen jach bajcheʼ mi laj qʼuel yambʌlob (Pr. 21:5; 2 Ti. 2:24). Pero ili eʼtel mucʼʌch i yʌqʼueñonla lac tijicñʌyel come miʼ coltañonla lac ñumen cʌn muʼ bʌ i yʌl jiñi Biblia chaʼan ñopol bʌ lac chaʼan. Cheʼ jaʼel, mi laj cʌn eʼtel la quicʼot Jehová (1 Co. 3:9).

10. ¿Chucoch maʼ mejlel a wubin a tijicñʌyel ti a subtʼan anquese maʼañic majqui miʼ wen ñʌchʼtan jiñi wen tʼan yaʼ baʼ chumulet?

¹⁰ ¿Ixcu mi chumulet baqui maʼañic majqui miʼ wen mulan i ñʌchʼtan jiñi wen tʼan? Mucʼʌch a mejlel a taj a tijicñʌyel jaʼel. ¿Chucoch? Come ti lac pejtelel yaʼ ti congregación mi lac tem chaʼlen eʼtel chaʼan mi lac taj jiñi quixtañujob utsoʼ bʌ i pusicʼal. Anquese juntiquil jach hermano miʼ taj muʼ bʌ i jacʼ jiñi i sujmlel, junlajal woli lac mel jiñi eʼtel yicʼot mi lac taj lac tijicñʌyel. Jumpʼejl ejemplo, juntiquil hermano i cʼabaʼ Brandon tsiʼ chaʼle eʼtel 9 jab bajcheʼ precursor ti jumpʼejl tejclum baʼ maʼañic miʼ wen ñʌchʼtañob jiñi wen tʼan. Brandon miʼ yʌl: «Mic mulan c sub jiñi wen tʼan come jiñʌch yom bʌ Jehová chaʼan mi lac mel. Tsaʼ ochiyon bajcheʼ precursor cheʼ bʌ tsaʼ loqʼuiyon ti escuela. Mic wen mulan j coltan jiñi xcolelob ti congregación yicʼot mic mulan j qʼuel bajcheʼ miʼ colelob tiʼ sujmlel. Tsajñiyon ti jiñi Cʌntesʌntel loqʼuem bʌ ti Biblia chaʼan i Bajñel to bʌ Wiñicob i tsaʼ chojquiyon majlel bajcheʼ precursor ti yambʌ tejclum. Isujm maʼañic majqui coltʌbil c chaʼan chaʼan miʼ chʼʌmob jaʼ, pero yambʌ hermanojob añʌch i meleyob. Tijicñayon cheʼ tsaʼ c yajca c melben i yeʼtel Jehová  tiʼ pejtelel ora chaʼan mic sutqʼuin ti xcʌntʼan jiñi quixtañujob» (Ec. 11:6).

11. ¿Baqui tac bʌ eʼtel miʼ mel cabʌl xcolelob?

¹¹ An cabʌl bajcheʼ miʼ mejlel lac ñumen melben i yeʼtel Jehová. Jumpʼejl ejemplo, an cabʌl xcolelob woliyoʼ bʌ ti eʼtel chaʼan i melol i Yotlel Tempa bʌ, come cabʌl to yom miʼ mejlel. Ili jiñʌch jumpʼejl chʼujul bʌ eʼtel muʼ bʌ i yʌqʼuen i ñuclel Dios yicʼot miʼ yʌqʼueñet a tijicñʌyel. Cheʼ bajcheʼ ti yan tac bʌ eʼtel i chaʼan bʌ Dios, miʼ yʌcʼ tijicñʌyel cheʼ bʌ an la quicʼot la quermañojob. Cabʌl chuqui miʼ mejlel a cʌn cheʼ maʼ chaʼlen eʼtel tiʼ melol otot tac baqui miʼ chʼujutesʌntel Dios: Maʼ sujtel ti wem bʌ xʼeʼtel, tsajalet ti chuqui maʼ mel yicʼot maʼ cʌn eʼtel a wicʼot yambʌlob.

12. ¿Chuqui tac miʼ mejlel a mel cheʼ maʼ wochel bajcheʼ precursor?

¹² Juntiquil hermano i cʼabaʼ Kevin miʼ yʌl: «Cheʼ bʌ chuton to, tsaʼ c ñaʼta c melben i yeʼtel Jehová tiʼ pejtelel ora. Tsaʼ ochiyon bajcheʼ precursor cheʼ bʌ 19 c jabilel. Chaʼan mic taj i cʼʌjñibal bʌ c chaʼan, tsaʼ c chaʼle eʼtel yicʼot juntiquil hermano muʼ bʌ i mel otot tac. Tsaʼ j cʌñʌ cotsʌben i jol otot, cotsan ventana yicʼot puerta. Ti wiʼil, chaʼpʼejl jab tsaʼ c chaʼle eʼtel tiʼ chaʼ melol i Yotlel Tempa bʌ yicʼot i yotot hermanojob cheʼ bʌ tsaʼ ñumi icʼ jaʼal. Cheʼ bʌ tsaʼ cubi chaʼan yom miʼ mejlel cabʌl i Yotlel Tempa bʌ ti Sudáfrica, tsaʼ c butʼu c solicitud, i tsaʼʌch pʌjyiyon. Mic jalijel chaʼpʼejl uxpʼejl semana baqui miʼ mejlel jumpʼejl i Yotlel Tempa bʌ yaʼ ti África, cheʼ jiñi mic majlel ti yambʌ. Jiñi muʼ bʌ lon c mel ili eʼtel añon lojon bajcheʼ jumpʼejl familia. Juntemel añon lojon, mic pejcan lon Biblia yicʼot temel mic chaʼlen lon eʼtel. Ti jujumpʼejl semana mic mulan subtʼan jaʼel quicʼot jiñi hermanojob yaʼ bʌ chumulob ti jiñi tejclum. Tsaʼ bʌ c ñaʼta cheʼ bʌ chuton to añʌch i wen aqʼueyon c tijicñʌyel».

13. ¿Chucoch miʼ yubin i tijicñʌyel jiñi xcolelob cheʼ añob ti Betel?

 ¹³ Cabʌl tsaʼ bʌ mejliyob ti ochel bajcheʼ precursor wʌle añobix ti Betel. Wen tijicñajax jiñi eʼtel ti Betel, come tiʼ pejtelel muʼ bʌ i mejlel i chaʼañʌch Jehová. Cheʼ jaʼel, jiñi familia Betel junlajal miʼ chʼʌmob jiñi chʼujul bʌ bʌlñʌcʼʌl. Juntiquil hermano i cʼabaʼ Dustin am bʌ ti Betel, miʼ yʌl: «Cheʼ bʌ 9 jaxto c jabilel, tsaʼ cʌlʌ chaʼan mi caj c melben i yeʼtel Jehová tiʼ pejtelel ora. Cheʼ bʌ tsaʼ loqʼuiyon ti escuela tsaʼ ochiyon bajcheʼ precursor. Tsaʼ ñumi jumpʼejl jab yicʼot ojlil i tsaʼ pʌjyiyon ti Betel. Tsaʼ c ñopo j cʼʌn jiñi prensa yicʼot computadora tac. Muʼ bʌ c wen mulan ti Betel jiñʌch cheʼ miʼ cubin lojon bajcheʼ an jiñi subtʼan tiʼ pejtelel pañimil (mulawil). Mic wen mulan ajñel ti Betel come jiñi eʼtel muʼ bʌ i mejlel miʼ coltan cabʌl quixtañu chaʼan miʼ sujtelob tiʼ yamigo Jehová».

14. ¿Bajcheʼ miʼ mejlel a chajpan a bʌ chaʼan maʼ melben i yeʼtel Dios tiʼ pejtelel ora?

¹⁴ ¿Bajcheʼ miʼ mejlel a chajpan a bʌ chaʼan maʼ melben i yeʼtel Dios tiʼ pejtelel ora? Ñuc i cʼʌjñibal cheʼ maʼ taj majlel wen tac bʌ a melbal tiʼ wut Dios. Jiñʌch muʼ bʌ caj i coltañet a melben i yeʼtel Jehová ti utsʼat. Jin chaʼan, pejcan ti bele ora jiñi Biblia, wen ñaʼtan muʼ bʌ i yʌl yicʼot acʼʌ a comentario ti tempa bʌ tac chaʼan tsiquilʌch a ñopoñel (chʼujbiya) ti Jehová. Miʼ mejlel a taj a ñaʼtʌbal yicʼot a weñʼesan a subtʼan cheʼ añet to ti escuela. Pʌsben yambʌlob chaʼan mucʼʌch a qʼuelob ti ñuc cheʼ maʼ cʼajtibeñob ti wen jach bʌ tʼan chuqui miʼ ñaʼtañob yicʼot cheʼ maʼ ñʌchʼtañob. Cheʼ jaʼel, maʼ mejlel a chaʼlen coltaya chaʼan sʌc miʼ yajñel i Yotlel Tempa bʌ. Jehová miʼ mulan i cʼʌn jiñi añoʼ bʌ i pecʼlel yicʼot muʼ bʌ i mulañob coltaya (pejcan Salmo 110:3; Hch. 6:1-3). Jiñi apóstol Pablo tsiʼ sube Timoteo chaʼan miʼ yochel bajcheʼ misionero come jiñi hermanojob «utsʼat tsiʼ tajayob ti tʼan» (Hch. 16:1-5).

15. ¿Bajcheʼ miʼ mejlel a chajpan a bʌ chaʼan maʼ taj i cʼʌjñibal bʌ a chaʼan?

¹⁵ Jiñi muʼ bʌ i melbeñob i yeʼtel Jehová tiʼ pejtelel ora yomʌch miʼ chaʼleñob eʼtel chaʼan chuqui i cʼʌjñibal i chaʼañob (Hch. 18:2, 3). Tajol miʼ mejlel a chʼʌm jumpʼejl curso chaʼan maʼ cʌn jumpʼejl eʼtel muʼ bʌ i mejlel a mel yaʼ baqui chumulet mach bʌ cabʌlic ora yom maʼ wʌqʼuen. Cʼajtiben yambʌ precursorob yaʼ bʌ añob ti a circuito yicʼot jiñi superintendente i chaʼan circuito chuqui ti eʼtel miʼ mejlel a mel. Cheʼ bajcheʼ miʼ yʌl jiñi Biblia, «acʼʌ tiʼ wenta lac Yum chuqui a wom a mel. Cheʼ jini mux i jolontesan chuqui maʼ ñaʼtan a mel» (Pr. 16:3; 20:18).

16. ¿Bajcheʼ miʼ mejlel i chajpañet cheʼ maʼ melben i yeʼtel Jehová tiʼ pejtelel ora cheʼ bʌ xcolelet to?

¹⁶ Miʼ mejlel a ñop chaʼan Jehová yom chaʼan tijicñayet ti talto bʌ qʼuin (pejcan 1 Timoteo 6:18, 19). Cheʼ maʼ melben i yeʼtel Jehová tiʼ pejtelel ora, maʼ ñusan qʼuin a wicʼot yambʌ hermanojob cheʼʌch bʌ woliʼ melob jaʼel. Ili mi caj i coltañet chaʼan maʼ ñumen taj a colel bajcheʼ xñoptʼan. Cabʌl qʼuelbil i chaʼañob bajcheʼ miʼ coltañob tiʼ ñujpuñel cheʼ tsiʼ melbeyob i yeʼtel Jehová cheʼ bʌ xcolelob to. An precursorob muʼ bʌ i ñujpuñelob, i maʼañic miʼ cʌyob i yeʼtel bajcheʼ precursor (Ro. 16:3, 4).

17, 18. ¿Bajcheʼ miʼ taj i bʌ jiñi muʼ bʌ lac ñaʼtan lac mel yicʼot jiñi lac pusicʼal?

¹⁷ Jiñi muʼ bʌ lac ñaʼtan lac mel miʼ yʌcʼ ti cʌñol chuqui an ti lac pusicʼal. Jiñi Salmo 20:4 miʼ yʌl tiʼ tojlel Jehová: «Laʼ i yʌqʼueñet Dios chuqui yom a pusicʼal. Laʼ i tsʼʌctesan pejtel woli bʌ a ñaʼtan a mel». Wen ñaʼtan chuqui mi caj a mel ti a cuxtʌlel, chuqui woli bʌ i mel Dios ili ora yicʼot chuqui miʼ mejlel a mel tiʼ tojlel. Cheʼ jiñi, acʼʌ ti a pusicʼal chaʼan maʼ mel muʼ bʌ i mulan Jehová.

¹⁸ Mi caj a wen taj a tijicñʌyel cheʼ maʼ melben i yeʼtel Jehová come woli a cʼʌn a cuxtʌlel chaʼan maʼ wʌqʼuen i ñuclel. Cheʼʌchi, «yom tijicñayet ti lac Yum. Mi caj i yʌqʼueñet chuqui yom a pusicʼal» (Sal. 37:4).