1, 2. ¿Chucoch tiʼ pejtelel ora an pʼumpʼuñoʼ bʌ ila ti pañimil?

ILI ora miʼ ticʼlañonla bajcheʼ woli (choncol) ti ujtel tiʼ caj taqʼuin. Jiñi xcolelob maʼañic miʼ tajob i yeʼtel (troñel). An cabʌl muʼ bʌ i majlelob ti yambʌ país baqui ñumen an taqʼuin. Anquese an país tac wen am bʌ i taqʼuin, añʌch pʼumpʼuñiyel jaʼel. Jiñi wen añoʼ bʌ i taqʼuin wolito (yʌquel to) i ñumen p’ojlelob i taqʼuin, i jiñi pʼumpʼuñoʼ bʌ ñumen pʼumpʼun woliʼ cʌytʌlob. Miʼ ñaʼtʌntel chaʼan ti jiñi wiñicob xʼixicob (quixtañujob) añoʼ bʌ tiʼ pejtelel pañimil (mulawil) cojach an 1% ñumen añoʼ bʌ i taqʼuin. Wocol ti ñaʼtʌntel mi junyajl cheʼʌch bajcheʼ ili woli bʌ i yʌjlel. Pero yonlelʌch quixtañu junyajl pʼumpʼuñoʼ bʌ, i an wen añoʼ bʌ i taqʼuin chaʼan miʼ mejlel i cʌybeñob i yalobilob yicʼot i butsob. Cheʼ bʌ Jesús tsiʼ qʼuele bajcheʼ iliyi, yicʼot i chʼijiyemlel tsiʼ yʌlʌ: «Come tiʼ pejtelel ora an jini pʼumpʼuñoʼ bʌ laʼ wicʼot» (Mr. 14:7). ¿Chucoch mach junlajalic bajcheʼ chumul jiñi quixtañujob?

² Jesús wen yujil chaʼan ili pañimil cojach miʼ mejlel ti qʼuextʌyel yicʼot jiñi i Yumʌntel Dios. Ti Apocalipsis 18:3 miʼ yʌl chaʼan bʌ jiñi «xchoñoñelob», ili yom i yʌl tiʼ pejtelel jiñi eʼtel chaʼan bʌ i tajol taqʼuin muʼ bʌ i yʌqʼueñonla lac ñajʌtesan Dios. Tiʼ pejtelel jiñi ochem bʌ chaʼan i tajol taqʼuin, chaʼan bʌ política yicʼot jiñi mach bʌ isujmic ñopbalʌl yaʼ ochem tiʼ pañimil Satanás. Jiñi i wiñicob Dios  maʼañic miʼ wis otsañob i bʌ tiʼ chaʼan bʌ política yicʼot ti mach bʌ isujmic ñopbalʌl. Pero tiʼ chaʼan bʌ i tajol taqʼuin wʌʼ tiʼ pañimil Satanás maʼañic miʼ mejlel lac junyajlel cʌy.

3. ¿Chuqui ti cʼajtiya tac mi caj i jajqʼuel?

³ Jiñi xñoptʼañonbʌla yom mi lac wen ñaʼtan bajcheʼ yilal mi caj laj qʼuel i chaʼan bʌ jiñi choñoñelʌl tac. Laʼ laj cʼajtiben lac bʌ: «¿Bajcheʼ miʼ mejlel j cʼʌn jiñi an tac bʌ c chaʼan chaʼan mic pʌs c xucʼtilel ti Dios? ¿Chuqui miʼ mejlel c mel chaʼan maʼañic mic wen lʌqʼueʼ c bʌ tiʼ chaʼan bʌ jiñi choñoñelʌl tac wʌʼ ti pañimil? ¿Baqui tac bʌ ejemplo miʼ pʌs chaʼan ti jumpʼejl lac pusicʼal mi lac ñop ti Dios?».

4, 5. a) ¿Chuqui tsaʼ ujti tiʼ tojlel jiñi xqʼuel eʼtel tsaʼ bʌ i yʌlʌ Jesús? b) ¿Baqui bʌ ticʼojel tsiʼ yʌqʼue Jesús jiñi xcʌntʼañob i chaʼan?

⁴ (Pejcan Lucas 16:1-9). Jesús tsiʼ taja ti tʼan juntiquil xqʼuel eʼtel tsaʼ bʌ i mele mach bʌ weñic am bʌ chuqui miʼ yʌqʼueñonla lac ñaʼtan. Ili wiñic tsaʼ sujbi chaʼan tiʼ toʼol jisʌbe i chubʌʼan jiñi i yum, i tiʼ caj iliyi yom miʼ chilbentel i yeʼtel. * Jin chaʼan, «maña jax [o «wen yujil», cheʼ bajcheʼ miʼ yʌl Jini wen bʌ tʼan] bajcheʼ tsiʼ mele» i tiʼ sujtesa tiʼ yamigojob jiñi tsaʼ bʌ i ñaʼta chaʼan miʼ mejlelob i coltan mi tsaʼ chilbenti i yeʼtel. ¿Woli ba i suben Jesús jiñi xcʌntʼañob i chaʼan chaʼan cheʼ yom miʼ melob jaʼel mi yomob i taj chuqui yomob ila ti pañimil? Maʼañic. Tiʼ subeyob chaʼan iliyi cojach miʼ melob jiñi «i chaʼañoʼ bʌ pañimil», yom i yʌl, jiñi maʼañic bʌ miʼ melbeñob i yeʼtel Dios. Jesús tsiʼ yʌlʌ iliyi come an chuqui ñuc bʌ i cʼʌjñibal yom i pʌs.

⁵ Wocolʌch jiñi tsaʼ bʌ ujti tiʼ tojlel jiñi xqʼuel eʼtel. Jesús yujil chaʼan yonlel xcʌntʼañob i chaʼan wocol mi caj i ñusañob ila ti pañimil. Jin chaʼan tsiʼ yʌqʼueyob ili ticʼojel: «Cʼʌñʌ laʼ chubʌʼan ti pañimil chaʼan miʼ pʼojlelob laʼ cʌñʌyoʼ bʌ yaʼ ti panchan». Ili yom i yʌl chaʼan mi lac mejlel ti sujtel tiʼ yamigo Jehová yicʼot Jesús tiʼ coltaya jiñi am bʌ lac chaʼan wʌʼ ti pañimil. ¿Chucoch? Come cheʼ miʼ jilel jiñi an tac bʌ lac chaʼan, Jehová yicʼot Jesús, jiñi la camigojob, mi caj i pʌyoñobla ochel «tiʼ yotot tac mach bʌ anic miʼ jilel».

6. ¿Chucoch mach jiñic junchajp ñaʼtʌbil bʌ i chaʼan Dios jiñi choñoñelʌl tac?

⁶ Jiñi Biblia jamʌ tsiquil miʼ pʌs chaʼan jiñi choñoñelʌl tac mach ochemic ti jiñi ñaʼtʌbil bʌ i chaʼan Dios. ¿Chucoch? Come yaʼ ti pʌcʼʌbʌl Edén Jehová tsiʼ yʌqʼue tiʼ pejtelel chuqui yomob jiñi Adán yicʼot Eva (Gn. 2:15, 16). Cheʼ jaʼel, cheʼ bʌ Dios tsiʼ yʌqʼue chʼujul bʌ espíritu jiñi bombiloʼ bʌ o yajcʌbiloʼ bʌ cheʼ ti ñaxam bʌ siglo «maʼanic majqui tsiʼ yʌlʌ mi i bajñel chaʼañʌch i chubʌʼan. I tem chaʼañob jach pejtelel i chubʌʼan» (Hch. 4:32). Jiñi xʼaltʼan Isaías tsiʼ yʌlʌ chaʼan ti jumpʼejl bʌ qʼuin jiñi quixtañujob mi caj i tajob i tijicñʌyel chaʼan tiʼ pejtelel muʼ bʌ i colel ti Lum (Is. 25:6-9; 65:21, 22). Pero jiñi xcʌntʼañob i chaʼan Jesús tsaʼʌch i «wen ñaʼtayob» chuqui yom miʼ melob chaʼan miʼ tajob i cʼʌjñibal bʌ i chaʼañob ti jiñi «chubʌʼan ti pañimil», i tsiʼ chaʼleyob wersa chaʼan wen miʼ qʼuejlelob ti Dios.

7. ¿Baqui bʌ cʌntesa mi lac taj ti Lucas 16:10-13?

⁷ (Pejcan Lucas 16:10-13). Jiñi xqʼuel eʼtel tsaʼ bʌ i taja ti tʼan Jesús tiʼ sʌcla i yamigojob chaʼan jach i bajñel wenlel. Pero Jesús tiʼ sube jiñi xcʌntʼañob i chaʼan chaʼan mach yomic miʼ bajñel ñaʼtañob i bʌ cheʼ miʼ sʌclañob i yamigojob ti panchan. Jiñi yan tac bʌ versículo miʼ tsictesan chaʼan jiñʌch bajcheʼ mi laj cʼʌn lac «chubʌʼan ti pañimil» muʼ bʌ i yʌcʼ ti cʌñol mi xucʼuloñʌchla ti Dios o maʼañic.

8, 9. ¿Bajcheʼ woliʼ cʼʌñob i «chubʌʼan pañimil» ojlil hermanojob?

⁸ Cheʼ mi laj cʼʌn lac chubʌʼan chaʼan mi laj  coltan jiñi subtʼan tsaʼ bʌ i yʌlʌ Jesús jiñʌch junchajp bajcheʼ mi lac pʌs chaʼan xucʼulonla (Mt. 24:14). Laʼ laj qʼuel bajcheʼ miʼ melob ojlil hermanojob. Juntiquil alʌ xchʼoc ti India tsiʼ teche i tempan i taqʼuin ti jumpʼejl alʌ caja. Maʼañix tsaʼ chʌn caji i mʌn i yʌlas tac. Cheʼ bʌ tsaʼ bujtʼi jiñi i yalʌ caja, tsiʼ yʌcʼʌ tiʼ pejtelel i taqʼuin chaʼan miʼ bej coltʌntel jiñi subtʼan. Yambʌ hermano muʼ bʌ i pʌcʼ coco ti jiñi país, tsiʼ pʌsʌ chaʼan mucʼʌch i wen ñaʼtan jaʼel chuqui miʼ mel. Tsiʼ majtan acʼʌ coco ti jumpʼejl oficina chaʼan traducción ti tʼan malayálam. Jiñi hermano miʼ yʌl chaʼan ñumen wen miʼ yubin cheʼ miʼ yʌcʼ jiñi coco, i mach taqʼuiñic chaʼan miʼ mʌjñel. An hermanojob ti Grecia cheʼʌch bʌ miʼ melob jaʼel, miʼ yʌcʼob aceite locʼsʌbil bʌ ti olivoteʼ, queso yicʼot yan tac bʌ bʌlñʌcʼʌl yaʼ ti Betel.

⁹ Juntiquil hermano chʼoyol bʌ ti Sri Lanka pero mach bʌ yaʼix chumul, miʼ yʌcʼ i yotot yicʼot i lum am bʌ yaʼ tiʼ país chaʼan jiñi hermanojob miʼ melob tempa bʌ yicʼot colem tempa bʌ tac, yicʼot chaʼan yaʼ miʼ cʌytʌlob jiñi hermanojob muʼ bʌ i melbeñob i yeʼtel Jehová tiʼ pejtelel ora. Anquese miʼ cabʌl cʼʌn i taqʼuin chaʼan miʼ mel bajcheʼ jiñi, cheʼʌch miʼ coltan cabʌl hermanojob pʼumpʼuñoʼ bʌ. An baqui maʼañic miʼ mejlelob ti subtʼan, i jiñi hermanojob miʼ majñañob i yotot chaʼan miʼ tempañob i bʌ. Cheʼ bajcheʼ jiñi, cabʌl precursorob yicʼot xsubtʼañob mach bʌ wen añobic i taqʼuin mach cʼʌñʌlic miʼ tojob baqui miʼ tempañob i bʌ.

10. ¿Bajcheʼ miʼ coltañonla cheʼ mi lac pʌs la cutslel?

¹⁰ Ili ejemplo tac miʼ pʌs chaʼan jiñi i wiñicob Dios xucʼulobʌch ti chuqui «tsʼitaʼ» jach bʌ, ili yom i yʌl, chaʼan jin bajcheʼ miʼ cʼʌñob jiñi chubʌʼañʌl tac come ñumen ñuc jiñʌch i chaʼan bʌ Dios (Lc. 16:10). ¿Bajcheʼ yilal miʼ qʼuelob ili hermanojob muʼ bʌ i melob chaʼan miʼ sujtelob tiʼ yamigo Jehová? Yujilob chaʼan junchajp bajcheʼ miʼ mejlel i tajob isujm bʌ chubʌʼañʌl jiñʌch cheʼ miʼ tʼoxob i chubʌʼan (Lc. 16:11). Juntiquil hermana ñʌmʌl bʌ i yʌcʼ i taqʼuin chaʼan miʼ mejlel jiñi eʼtel chaʼan bʌ jiñi Yumʌntel miʼ yʌl chaʼan tajbil i chaʼan jumpʼejl ñuc bʌ bendición. Miʼ yʌl: «Cheʼ mic ñumen acʼ chuqui an c chaʼan, ñumen utson tiʼ tojlel yambʌlob cheʼ an chuqui mach weñic miʼ melbeñoñob, mach ti orajic mic michʼan, mach ti orajic mic taj c chʼijiyemlel yicʼot mic jacʼ jiñi c ticʼol». Yambʌ hermanojob miʼ yʌlob chaʼan coltʌbil i chaʼañob tiʼ chaʼan bʌ Dios cheʼ miʼ yʌcʼob chuqui añob i chaʼan (Sal. 112:5; Pr. 22:9).

11. a) ¿Chucoch jiñʌch junchajp bajcheʼ mi lac pʌs chaʼan la cujil woli bʌ lac mel cheʼ mi la cʌcʼ am bʌ lac chaʼan? b) ¿Chuqui woliʼ yujtel tiʼ tejclum Dios ili ora? (Qʼuele jiñi foto am bʌ tiʼ tejchibal).

¹¹ Yambʌ bajcheʼ mi lac pʌs chaʼan la cujil bajcheʼ woli laj cʼʌn lac chubʌʼan jiñʌch cheʼ mi laj cʼʌn laj coltan yambʌlob. An hermanojob añoʼ bʌ i taqʼuin pero maʼañic miʼ mejlel i ñumen melbeñob i yeʼtel Jehová o maʼañic miʼ mejlelob ti majlel ti yambʌ país. Pero cheʼ miʼ yʌcʼob i taqʼuin mucʼʌch i tajob i tijicñʌyel cheʼ miʼ ñaʼtañob chaʼan woliʼ coltañob yambʌ hermanojob tiʼ melol i yeʼtel Jehová (Pr. 19:17). Jiñi taqʼuin muʼ bʌ la cʌcʼ miʼ chaʼlen coltaya chaʼan miʼ mejlel yicʼot miʼ pujquel jiñi jun tac loqʼuem bʌ ti Biblia, i mi laj coltan jiñi subtʼan yaʼ baqui yom i cʌñob jiñi wen tʼan jiñi pʼumpʼuñoʼ bʌ. Ti wajali, ti país tac bajcheʼ Congo, Madagascar yicʼot Ruanda, jiñi hermanojob miʼ ñaʼtañob mi jin miʼ mʌmbeñob  i bʌl i ñʌcʼ i familia o miʼ mʌñob jumpʼejl Biblia, come chaʼan miʼ mʌñob jumpʼejl Biblia yom miʼ chaʼleñob eʼtel jumpʼejl semana o jumpʼejl uw. Pero cheʼ cabʌl hermanojob miʼ yʌcʼob i taqʼuin «junlajal» miʼ coltañob i bʌ. Cheʼ bajcheʼ ili, jiñi i yorganización Jehová an i mele Biblia ti yan tac bʌ tʼan yicʼot an i pucbe jiñi familia tac yicʼot jiñi woli bʌ i cʌntesʌntelob chaʼan miʼ cʌñob Dios (pejcan 2 Corintios 8:13-15). Jiñi muʼ bʌ i yʌcʼob yicʼot muʼ bʌ i tajob miʼ mejlelob ti sujtel tiʼ yamigo Jehová.

12. ¿Bajcheʼ tsiʼ pʌsʌ Abraham chaʼan mucʼʌch i ñop Dios?

¹² Yambʌ bajcheʼ mi lac mejlel ti sujtel tiʼ yamigo Jehová jiñʌch cheʼ maʼañic mi lac wen otsan lac bʌ ti jiñi choñoñelʌl tac am bʌ wʌʼ ti pañimil chaʼan mi lac sʌclan jiñi wen ñuc bʌ i cʼʌjñibal. Cheʼʌch tsiʼ mele Abraham (Abrahán), juntiquil wiñic wen am bʌ i ñopoñel (chʼujbiya) tsaʼ bʌ chumle ti wajali. Tsiʼ jacʼbe i tʼan Jehová come yom sujtel tiʼ yamigo, tsiʼ cʌyʌ i tejclum yaʼ baqui wen chumul i tsaʼ majli ti chumtʌl ti pisil bʌ otot (He. 11:8-10). Abraham yujil chaʼan jiñi isujm bʌ chubʌʼañʌl tilemʌch ti Jehová. Jin chaʼan, maʼañic tsaʼ caji i ñumen tempan i chubʌʼan tac come cheʼic tsiʼ mele maʼañic tsiʼ pʌsʌ i ñopoñel (Gn. 14:22, 23). Cheʼ ñumeñix ora, Jesús tiʼ sube juntiquil wiñic wen am bʌ i taqʼuin chaʼan yom miʼ pʌs i ñopoñel jaʼel, tiʼ sube: «Mi a wom tsʼʌcʌl bʌ i yutslel a pusicʼal, cucu, choño a chubʌʼan. Aqʼuen jini mach bʌ añobic i chubʌʼan. Cheʼ jini mi caj a taj cabʌl a chubʌʼan ti panchan. Laʼ tsajcañon» (Mt. 19:21). Jiñi wiñic mach cheʼic tsiʼ mele bajcheʼ Abraham, pero añʌch yambʌlob am bʌ i pʌsʌyob i ñopoñel ti Jehová.

13. a) ¿Chuqui tsiʼ sube Pablo jiñi Timoteo? b) ¿Bajcheʼ miʼ mejlel lac jacʼ jaʼel ili principio?

¹³ Yambʌ tsaʼ bʌ i pʌsʌ i ñopoñel jiñʌch Timoteo. Pablo tsiʼ sube bajcheʼ «xucʼul bʌ soldado i chaʼan Jesucristo», ti wiʼil, tsiʼ chaʼ sube: «Jini soldado woli bʌ ti guerra, maʼanic miʼ mel i yeʼtel tiʼ yotot come woliʼ melben i yeʼtel jini tsaʼ bʌ i yotsa ti soldado» (2 Ti. 2:3, 4). Ili ora, jiñi xcʌntʼañob i chaʼan Jesús miʼ chaʼleñob wersa chaʼan miʼ jacʼob ili principio. Ñumen ti 1 millón muʼ bʌ i melbeñob i yeʼtel Jehová tiʼ pejtelel ora. Jiñi xñoptʼañob maʼañic miʼ wen qʼuelob ti ñuc jiñi muʼ bʌ i sujbel tac yicʼot am bʌ ti pañimil, yicʼot miʼ cʼajtesañob chaʼan «jini xbeta taqʼuin miʼ yochel ti toʼol eʼtel yaʼ baʼ tsiʼ beta taqʼuin» (Pr. 22:7). Satanás yom chaʼan mi lac jisan lac pʼʌtʌlel yicʼot mi lac wen aqʼuen i yorajlel jiñi choñoñelʌl tac. An muʼ bʌ i yotsañob i bet chaʼan miʼ melob i yotot, miʼ mʌñob i carro, miʼ majlelob ti universidad o miʼ melob utsʼatax bʌ i ñujpuñel. Mi mach tsajaloñicla ti jiñi muʼ bʌ lac ñaʼtan lac mel, chʌn an lac bet mi caj la cajñel. Mi mucʼʌch lac pʌs chaʼan la cujilʌch chuqui mi lac mel, maʼañic mi caj lac wen tempan lac chubʌʼan, lac wen jisan taqʼuin o lac wen otsan lac bʌ ti bet. Cheʼ bajcheʼ jiñi, libre mi caj lac melben i yeʼtel Dios, i mach jiñic mi caj lac mel chuqui an ti pañimil (1 Ti. 6:10).

14. ¿Chuqui yom mi lac ñaʼtan lac mel? Alʌ chuqui an i mele yambʌ hermanojob.

¹⁴ Mi mach la com chaʼan cabʌl lac chubʌʼan, yom mi la cʌcʼ ti ñaxan jiñi ñumen ñuc bʌ i cʼʌjñibal. Jumpʼejl xñujpuñel añob i choñoñel baqui miʼ wen tajob taqʼuin. Pero tsiʼ ñaʼtayob chaʼan yom i chaʼ melbeñob i yeʼtel Jehová tiʼ pejtelel ora. Jin chaʼan, tsiʼ choñoyob i choñoñel, i lancha yicʼot yan tac bʌ. Tsiʼ yʌcʼʌyob i bʌ chaʼan miʼ chaʼleñob coltaya tiʼ melol jiñi tsijib central mundial (Warwick, Nueva York). Tsiʼ tajayob i tijicñʌyel come tsaʼ mejliyob ti tem eʼtel yicʼot i yixicʼal yicʼot i ñijʼal yaʼ ti Betel. Cheʼ jaʼel, jiñi hermano tsaʼ bʌ i choño i choñoñel tsaʼ mejli ti eʼtel cabʌl semana yicʼot i tat i ñaʼ. Juntiquil precursora regular chumul bʌ ti Colorado (Estados Unidos) tsaʼ caji ti eʼtel chaʼpʼejl uxpʼejl qʼuin ti jumpʼejl banco. Jiñi i yumob wen tijicñayob chaʼan jiñi i yeʼtel,  jin chaʼan, tiʼ subeyob chaʼan miʼ chaʼlen eʼtel tiʼ pejtelel ora yicʼot chaʼan ñumen lets mi caj i tojtʌl. Pero maʼañic tsiʼ jacʼʌ come jiñi mi caj i mʌctan tiʼ subtʼan. Ili chaʼpʼejl ejemplo miʼ pʌs chaʼan jiñi i wiñicob Jehová miʼ cʼʌñob i chubʌʼan tiʼ melol i yeʼtel Jehová. Mi ñaxan mi la cʌcʼ jiñi i Yumʌntel Dios, mi caj lac pʌs chaʼan mucʼʌch laj qʼuel ti ñuc cheʼ i yamigojonla Jehová yicʼot chaʼan jiñi isujm bʌ chubʌʼañʌl tac ñumen ñuc bajcheʼ i chaʼan bʌ ili pañimil.

15. ¿Chuqui jiñi muʼ bʌ i ñumen aqʼueñonla lac tijicñʌyel?

¹⁵ Cheʼ bʌ an majqui wen cabʌl i chubʌʼan mach yomic i yʌl chaʼan Dios woliʼ wen aqʼuen i bendición. Jehová miʼ yʌqʼuen i bendición jiñi «wen bʌ i melbal» (pejcan 1 Timoteo 6:17-19). Laʼ laj qʼuel tsaʼ bʌ ujti tiʼ tojlel juntiquil hermana i cʼabaʼ Lucia chʼoyol bʌ ti Italia. * Cheʼ bʌ tsiʼ yubi chaʼan jiñi hermanojob ti Albania yomob coltʌntel ti subtʼan, tsiʼ wen ñopo Jehová i ti jiñi jabil 1993 tsaʼ majli ti chumtʌl yaʼi, anquese mach wen cabʌlic i chubʌʼan. Tsiʼ cʌñʌ jiñi tʼan albanés i cʼʌlʌ wʌle an i colta ñumen ti 60 quixtañu chaʼan miʼ chʼʌmob jaʼ. Isujmʌch chaʼan mach lajalic miʼ yujtel yaʼ baqui mi lac chaʼlen subtʼan. Pero tiʼ pejtelel chuqui mi lac mel chaʼan mi laj coltan yambʌlob chaʼan miʼ tajob jiñi bij muʼ bʌ i pʌyonla majlel ti laj cuxtʌlel jiñʌch ñumen ñuc bʌ chaʼañonla yicʼot i chaʼañob (Mt. 6:20).

16. a) ¿Chuqui mi caj i yujtel yicʼot jiñi choñoñelʌl cheʼ ti talto bʌ qʼuin? b) Come la cujil chuqui mi caj i chaʼlen jiñi chubʌʼañʌl ti pañimil ¿chuqui yom mi lac mel?

¹⁶ Jesús maʼañic tsiʼ yʌlʌ chaʼan jiñi «chubʌʼan ti pañimil» miʼ mejlel ti jilel, tsiʼ yʌlʌ chaʼan mucʼʌch caj ti jilel (Lc. 16:9). Ili ora an banco tac tsaʼix bʌ ñumi i cʼʌjñibal yicʼot woli i sʌjlel majlel jiñi taqʼuin, pero mach wis lajalic bajcheʼ jiñi muʼto bʌ i caj ti ujtel. Mi caj i junyajl jilel i pañimil Satanás, cheʼ bajcheʼ jiñi choñoñelʌl, jiñi política yicʼot jiñi mach bʌ isujmic ñopbalʌl. Jiñi xʼaltʼan Ezequiel yicʼot Sofonías tsiʼ wʌn alʌyob chaʼan jiñi oro yicʼot plata mi caj i jilel i cʼʌjñibal, anquese ili ora jiñʌch muʼ bʌ i wen cʼʌjñel ti jiñi choñoñelʌl (Ez. 7:19; Sof. 1:18). ¿Bajcheʼ yubil mi caj la cubin mi tsaʼ chʌmiyonla (sajtiyonla) pero jin jach tsaʼ lac ñumen acʼʌ ti ñuc jiñi chubʌʼañʌl ti pañimil i mach jiñic jiñi isujm bʌ chubʌʼañʌl? Tajol cheʼ mi caj la cubin lac bʌ bajcheʼ jiñi muʼ bʌ i wen chaʼlen eʼtel chaʼan miʼ taj cabʌl taqʼuin pero ti wiʼil miʼ qʼuel chaʼan maʼañic i cʼʌjñibal (Pr. 18:11). Jiñi chubʌʼañʌl ti pañimil mucʼʌch caj i jilel. Jin chaʼan, laʼ laj cʼʌn jiñi am bʌ lac chaʼan chaʼan mi lac taj wem bʌ la camigojob ti panchan. Mi caj lac ñumen lʌcʼtiyel ti Jehová mi mucʼʌch laj coltʌben i Yumʌntel.

17, 18. ¿Chuqui mi caj i taj jiñi i yamigojob Dios?

¹⁷ Cheʼ bʌ añoñixla tiʼ Yumʌntel Dios, maʼañix majqui mi caj i toj i chumlib, doctorob, tsʼac, o chaʼan miʼ chaʼ qʼuexob taqʼuin. Mi caj i pʼojlel jiñi bʌlñʌcʼʌl mach bʌ tojbilic. Jiñi i familia Jehová am bʌ wʌʼ ti Pañimil mi caj i yubiñob i tijicñʌyel chaʼan tiʼ pejtelel chuqui cʼuxbil bʌ miʼ caj ti colel. Maʼañic mi caj lac tempan oro, plata mi jiñic to jiñi utsʼatax bʌ xajlel (tun) tac, mucʼ jach caj laj cʼʌn bajcheʼ lac chʼʌjlibʌl. Ti lac pejtelel mi caj laj cʼʌn wen tac bʌ teʼ, xajlel yicʼot fierro chaʼan mi lac mel wen utsʼatax bʌ la cotot. I jiñi la camigojob mi caj i coltañoñobla, pero mach chaʼañic yomob i tojol. Tiʼ pejtelel muʼ bʌ i colel ila ti Lum mi caj lac tʼoxben lac bʌ.

¹⁸ Ili tsaʼ bʌ la cʌlʌ jiñʌch muʼ bʌ caj lac taj mi mucʼʌch lac sʌclan la camigojob ti panchan, pero anto yan tac bʌ. Jiñi i wiñicob Jehová mi caj i yubiñob i tijicñʌyel cheʼ miʼ yubiñob Jesús i yʌl: «Laʼ cu la, ochemet bʌ la tiʼ yutslel c Tat. Chʼʌmʌ laʼ yumʌntel chajpʌbebiletla cʼʌlʌl tiʼ cajibal pañimil» (Mt. 25:34).