1. ¿Chucoch miʼ mejlel i yʌl Jehová chaʼan pejtelel chuqui tac an i chaʼañʌch? (Qʼuele jiñi foto).

JEHOVÁ luʼ i chaʼan pejtelel chuqui tac an: «Jini panchan cʼʌlʌl tiʼ chanlel yicʼot pejtelel chuqui an ti pañimil yicʼot pejtelel muʼ bʌ laj qʼuel» (Dt. 10:14; Ap. 4:11). Come jiñʌch tsiʼ mele (pʌtʌ) wiñicob xʼixicob (quixtañujob), i chaʼañonla jaʼel (Sal. 100:3). Pero cʼʌlʌl ti wajali, Jehová an i yajca junmojt quixtañujob chaʼan miʼ yajñelob tiʼ tojlel.

2. ¿Baqui bʌ jiñi chaʼmojt quixtañujob muʼ bʌ i yʌl jiñi Biblia i chaʼañoʼ bʌ Jehová?

² Jumpʼejl ejemplo, ti jiñi Salmo 135 miʼ yʌl chaʼan jiñi xucʼul bʌ israelob ti wajali tsaʼ yajcʌntiyob chaʼan «miʼ yochelob tiʼ chaʼan bʌ» Dios (Sal. 135:4). Cheʼ jaʼel, jiñi libro i chaʼan Oseas tsiʼ wʌn alʌ chaʼan jiñi mach bʌ israelob mi caj i yochelob bajcheʼ i tejclum Jehová (Os. 2:23). Ili profecía tsaʼ tsʼʌctiyi cheʼ bʌ Dios tsiʼ teche i pʌyob ochel jiñi mach bʌ judíojob chaʼan miʼ tem chaʼleñob yumʌntel yicʼot Jesús ti panchan (Hch. 10:45; Ro. 9:23-26). Ili quixtañujob yajcʌbiloʼ bʌ ti espíritu miʼ subentelob bajcheʼ «chʼujul bʌ tejclumetla», i chaʼan bʌ Dios (1 P. 2:9, 10). I jiñi yonlel xucʼul bʌ xñoptʼañob ti ili ora woli bʌ i pijtañob chumtʌl ti ili Lum, Dios miʼ qʼuelob bajcheʼ i tejclum yicʼot ‹yajcʌbiloʼ bʌ i chaʼan› (Is. 65:22).

3. a) ¿Majqui ochemob bajcheʼ i yamigo Jehová ili ora? b) ¿Chuqui mi caj laj qʼuel ti ili temaj?

 ³ Ti ili ora, woli (choncol) bʌ i pijtañob chumtʌl ti panchan, mach bʌ cabʌlicob, yicʼot jiñi woli (yʌquel) bʌ i pijtañob chumtʌl ti ili Lum, jiñi ‹yambʌ tiñʌmeʼ›, junmujchʼ jach woliʼ melbeñob i yeʼtel (troñel) Jehová (Lc. 12:32; Jn. 10:16). Tiʼ sujm, la comʌch la cʌqʼuen i ñuclel Jehová come miʼ yʌcʼonla ochel bajcheʼ i yamigo. Ti ili temaj mi caj laj qʼuel junchajp bajcheʼ miʼ mejlel lac pʌs chaʼan mucʼʌch laj qʼuel ti ñuc jiñi tsaʼ bʌ i mele (chaʼle) Jehová ti lac tojlel.

4. a) ¿Bajcheʼ junchajp miʼ mejlel la cʌqʼuen wocolix i yʌlʌ Jehová cheʼ miʼ yʌcʼonla ochel tiʼ yamigo? b) ¿Bajcheʼ lʌcʼʌl lajal tsiʼ mele Jesús?

⁴ Junchajp bajcheʼ mi la cʌqʼuen wocolix i yʌlʌ Jehová jiñʌch cheʼ mi la cʌqʼuen laj cuxtʌlel. Cheʼ mi lac chʼʌm jaʼ, mi lac pʌsben yambʌlob chaʼan i chaʼañoñixla Jehová i chaʼan la comʌch lac jacʼben i tʼan (He. 12:9). Cheʼ bʌ Jesús tsiʼ chʼʌmʌ jaʼ lʌcʼʌ lajal cheʼ tsiʼ mele, i cheʼ bajcheʼ jiñi, cheʼʌch bajcheʼ woliʼ suben i Tat: «C Dios tijicña wolic mel chuqui a wom» (Sal. 40:7, 8). Tsiʼ yʌcʼʌ i bʌ ti cʌjñel chaʼan miʼ melben i yeʼtel Dios anquese cʼʌlʌl cheʼ tsiʼ yila pañimil (chʼocʼa) ochemix ti tejclum yajcʌbil bʌ i chaʼan Jehová.

5, 6. a) ¿Bajcheʼ tsiʼ yubi i bʌ Jehová cheʼ bʌ tsiʼ chʼʌmʌ jaʼ Jesús? b) Acʼʌ jumpʼejl ejemplo baʼ miʼ pʌs bajcheʼ yubil miʼ yubin i bʌ Jehová cheʼ mi la cʌcʼ lac bʌ tiʼ tojlel

⁵ ¿Bajcheʼ tsiʼ yubi i bʌ Jehová cheʼ bʌ Jesús tsiʼ chʼʌmʌ jaʼ? Jiñi Biblia miʼ yʌl: «Cheʼ bʌ tsaʼix i chʼʌmʌ jaʼ Jesús tsaʼ loqʼui ti jaʼ. Awilan, tsaʼ cajli panchan. Tsiʼ qʼuele i yEspíritu Dios woliʼ jubel tilel cheʼ bajcheʼ xʼujcuts. Tsaʼ tʼuchle ti Jesús. Awilan, tsaʼ loqʼui tilel tʼan ti panchan. Tsiʼ yʌlʌ: Jiñʌch Calobil muʼ bʌ j cʼuxbin. Wen utsʼat mij qʼuel» (Mt. 3:16, 17). Wen tijicña Jehová cheʼ bʌ tsiʼ qʼuele jiñi i Yalobil chaʼan ti jumpʼejl i pusicʼal tsiʼ yʌcʼʌ i bʌ chaʼan miʼ melben i yeʼtel. Cheʼ jaʼel, miʼ wen ubin i tijicñʌyel Jehová cheʼ bʌ mi la cʌcʼ lac bʌ tiʼ tojlel i miʼ yʌqʼueñonla i bendición (Sal. 149:4).

⁶ Laʼ laj qʼuel jumpʼejl ejemplo muʼ bʌ i coltañonla lac ñaʼtan ti wen chaʼan bajcheʼ yubil miʼ yubin i bʌ Jehová cheʼ bʌ mi la cʌcʼ lac bʌ tiʼ tojlel. Laʼcu lac ñaʼtan juntiquil tatʌl muʼ bʌ i yʌqʼuen caxlan waj i yalʌ chʼoc, pero jiñi alʌ xchʼoc miʼ xutʼ jiñi caxlan waj i miʼ yʌqʼuen i tat, ¿mach ba i chaʼañic jiñi tatʌl jiñi caxlan waj tsaʼ bʌ i yʌqʼue i yalʌ chʼoc? ¿Chucoch jiñi alʌ xchʼoc tsiʼ chaʼ aqʼue i tat jiñi caxlan waj miʼ chaʼañʌch ti ñaxan? Juntiquil tatʌl yujil bʌ i cʼuxbiya maʼañic miʼ cʼajtiben i bʌ jiñi. Cheʼ lajal jaʼel, wen tijicña miʼ yubin i bʌ Jehová cheʼ bʌ mi lac yajcan la cʌcʼ lac bʌ tiʼ tojlel (Éx. 34:14).

7. ¿Bajcheʼ miʼ coltañonla Malaquías lac ñaʼtan chaʼan bajcheʼ miʼ qʼuel Jehová jiñi muʼ bʌ i melbeñob i yeʼtel ti jumpʼejlob i pusicʼal?

⁷ (Pejcan Malaquías 3:16). Jiñi maxto bʌ i yʌcʼʌyob i bʌ ti Jehová yicʼot i chʼʌmʌyob jaʼ yom miʼ wen ñaʼtañob baqui bʌ i wenlel cheʼ mucʼʌch i melob iliyi. Isujmʌch chaʼan i chaʼañoñʌchla Jehová cʼʌlʌl cheʼ wolito laj colel majlel tiʼ ñʌcʼ lac ñaʼ. Pero laʼcu lac ñaʼtan bajcheʼ cʼamel miʼ yubin i tijicñʌyel cheʼ mi lac pʌs chaʼan jiñʌch lac Rey i chaʼan la comʌch la cʌcʼ lac bʌ tiʼ tojlel yicʼot lac mel chuqui yom (Pr. 23:15). Cheʼ jaʼel, Jehová miʼ cʌn jiñi muʼ bʌ i melben i yeʼtel ti jumpʼejl i pusicʼal i miʼ tsʼijbuben i cʼabaʼ yaʼ tiʼ «juñilel lac ñaʼtʌntel».

8, 9. ¿Chuqui miʼ cʼajtin Jehová tiʼ tojlel jiñi tsʼijbubiloʼ bʌ i cʼabaʼ ti jiñi i «juñilel lac ñaʼtʌntel»?

⁸ Chaʼan Jehová miʼ tsʼijbun laj cʼabaʼ  yaʼ tiʼ «juñilel lac ñaʼtʌntel» añʌch chuqui yom mi lac mel. Malaquías tsaʼ yʌlʌ chaʼan yom mi lac bʌcʼñan Dios yicʼot yom mi lac wen ñaʼtʌben i cʼabaʼ. Mi an chuqui mi lac chʼujutesan o juntiquil quixtañu i mach jiñic Jehová, mi caj i yʌp laj cʼabaʼ ti jiñi i juñilel lac ñaʼtʌntel (Éx. 32:33; Sal. 69:28).

⁹ Jin chaʼan, cheʼ bʌ mi la cʌcʼ lac bʌ ti Jehová mach cojic jach yom i yʌl chaʼan mi lac mel chuqui yom i mi lac chʼʌm jaʼ. Junyaj jach tsaʼ la cʌcʼʌ lac bʌ tiʼ tojlel i tsaʼ lac chʼʌmʌ jaʼ. Cheʼ mi la cʌcʼ lac bʌ ti Jehová i cheʼ i wiñiconla yom i yʌl chaʼan mi caj lac pʌs ti jujumpʼejl qʼuin chaʼan mucʼʌch lac jacʼben i tʼan (1 P. 4:1, 2).

10. ¿Chucoch mach lajalic ti qʼuelol juntiquil muʼ bʌ i melben i yeʼtel Jehová yicʼot mach bʌ añic?

¹⁰ Ti jiñi yambʌ temaj tsaʼ laj qʼuele chaʼan Caín, Salomón yicʼot jiñi israelob. Tsiʼ lon alʌyob chaʼan mucʼʌch i chʼujutesayob Dios, pero mach ti jumpʼejlobic i pusicʼal. Ili ejemplo tac miʼ pʌs chaʼan jiñi i chaʼañoʼ bʌ Jehová yomʌch miʼ coltañob chuqui toj bʌ i miʼ tsʼaʼleñob jiñi jontolil (Ro. 12:9). Cheʼ bʌ Malaquías tsaʼ ujti i yʌl jiñi i «juñilel lac ñaʼtʌntel», Jehová tsiʼ taja ti tʼan chaʼan «mach lajalic miʼ yujtel jini toj bʌ yicʼot jini mach bʌ tojic tiʼ yorajlel meloñel. Mi caj laʼ qʼuel majqui wen chumul, jini muʼ bʌ i melben i yeʼtel Dios o mi jini mach bʌ anic miʼ mel» (Mal. 3:18).

11. ¿Chucoch yomʌch miʼ qʼuel yambʌlob chaʼan tsaʼix la cʌcʼʌ lac bʌ ti Jehová?

¹¹ Yambʌ bajcheʼ mi la cʌqʼuen wocolix i yʌlʌ Jehová cheʼ tsiʼ yajcayonla bajcheʼ i wiñic jiñʌch cheʼ mi lac pʌsben yambʌlob laj colel tiʼ chaʼan bʌ Dios (1 Ti. 4:15; Mt. 5:16). Laʼ laj cʼajtiben lac bʌ: «¿Muʼ ba i qʼuel yambʌlob chaʼan xucʼuloñʌch ti Dios? ¿Muʼ ba c sʌclʌben i yorajlel chaʼan miʼ cʌcʼ c bʌ ti cʌjñel bajcheʼ i testigo Jehová?». Dios mi cajel i taj i chʼijiyemlel cheʼ bʌ jiñi yajcʌbiloʼ bʌ i chaʼan miʼ yʌqʼueñob i ñaʼtan yambʌlob chaʼan mach Testigojobic. (Sal. 119:46; pejcan Marcos 8:38).

12, 13. ¿Chucoch an Testigojob wocol bʌ ti ñaʼtʌntel mi i wiñicobʌch Dios?

 ¹² Chʼijiyem ti alol, pero an Testigojob muʼ bʌ i lajibeñob i ‹ñaʼtʌbal ili pañimil›, jin chaʼan lʌcʼʌ lajalob yicʼot jiñi maʼañic bʌ miʼ melbeñob i yeʼtel Dios (1 Co. 2:12). Muʼ bʌ i ñaʼtañob bajcheʼ jiñi, i bajñel wenlelob jach miʼ sʌclañob (Ef. 2:3). Jumpʼejl ejemplo, anquese añix ajqʼui cabʌl ticʼojel, an muʼ bʌ i xojob i pislel yicʼot miʼ chʼʌlob i bʌ cheʼ bajcheʼ ili pañimil. Miʼ lʌpob tsʌts bʌ i pislel yicʼot mach bʌ weñic ti qʼuelob, cheʼto jaʼel cheʼ bʌ miʼ majlelob ti tempa bʌ. An yambʌlob mach bʌ weñic miʼ tsepob i jol o miʼ xibañob (1 Ti. 2:9, 10). Jin chaʼan, cheʼ bʌ yaʼan yicʼot yambʌ quixtañujob, wocol ti cʌñol mi xñoptʼañob (Stg. 4:4).

¹³ An testigojob muʼ bʌ i pʌsob chaʼan maxto añic i cʌyʌyob i melbal ili pañimil. Jumpʼejl ejemplo, cheʼ bʌ miʼ majlelob ti qʼuiñijel miʼ chaʼleñob son yicʼot miʼ melob mach bʌ yomic miʼ mel juntiquil xñoptʼan. Miʼ letsañob foto tac yicʼot tʼan tac mach bʌ weñic ti jumpʼejl página chaʼan bʌ Internet. Tajol maxto aqʼuentiyob ticʼojel yaʼ ti congregación chaʼan tsiʼ meleyob tsʌts bʌ mulil, pero miʼ ticʼlañob jiñi muʼ bʌ i chaʼleñob wersa chaʼan miʼ pʌsob toj bʌ i melbal (pejcan 1 Pedro 2:11, 12).

14. ¿Chuqui yom mi lac mel chaʼan mi laj cʌntan bajcheʼ añonla la quicʼot Jehová?

¹⁴ Ili pañimil miʼ pʌs chaʼan weñʌch jiñi «i colosojlel lac pusicʼal yicʼot i tsʼiʼlel lac wut, yicʼot i chañʼesʌntel lac bʌ» (1 Jn. 2:16). Pero joñonla i chaʼañoñʌchla Jehová, jin chaʼan miʼ subeñonla chaʼan yom mi lac tsʼaʼlen «pejtelel chuqui mach tojic, yicʼot i colosojlel lac pusicʼal yicʼot i chaʼan bʌ pañimil chaʼan mi lac wen ñaʼtan chuqui yom, chaʼan toj mi la cajñel ti ili ora cheʼ bajcheʼ i chaʼañoʼ bʌ Dios» (Tit. 2:12). Pejtelel chuqui mi lac mel, bajcheʼ mucʼonla ti tʼan, laj cʼux yicʼot lac jap, jiñi lac pislel yicʼot bajcheʼ mi lac chʼʌl lac bʌ, bajcheʼ mucʼonla ti eʼtel, yom miʼ yʌqʼuen i ñaʼtan jiñi yambʌlob chaʼan cojach mi lac chʼujutesan Jehová (pejcan 1 Corintios 10:31, 32).

15. ¿Chucoch yom mi lac pʌsben la cutslel yicʼot mi laj cʼuxbin la quermañojob?

¹⁵ Cheʼ ñuc mi laj qʼuel chaʼan i yamigojonla Jehová mi lac pʌs ti chuqui mi lac mel tiʼ tojlel la quermañojob. I yamigojobʌch Dios jaʼel. Mi mucʼʌch laj cʼajtesan iliyi, tiʼ pejtelel ora mi caj lac pʌsbeñob la cutslel yicʼot mi caj laj cʼuxbiñob (1 Ts. 5:15). Jesús tiʼ sube jiñi xcʌntʼañob i chaʼan: «Pejtelel winicob mi caj i ñaʼtañob xcʌntʼañetla c chaʼan cheʼ mi laʼ cʼuxbin laʼ bʌ» (Jn. 13:35).

16. ¿Chuqui mi laj cʌn yaʼ tiʼ Mandar Moisés chaʼan bajcheʼ Jehová miʼ cʼuxbin i tejclum?

¹⁶ Laʼ laj qʼuel jumpʼejl ejemplo chaʼan bajcheʼ yom mi laj qʼuel lac bʌ ti congregación. Jiñi an tac bʌ tiʼ templo Jehová cojach tsaʼ ajqʼui chaʼan miʼ mejlel jiñi sʌc bʌ chʼujutesaya. Yaʼ tiʼ Mandar Moisés ti jujunchajp tsiʼ yʌlʌ bajcheʼ yom miʼ cʌntʌntel, i chaʼan yom miʼ tsʌnsʌntel jiñi muʼ bʌ i ñusañob jiñi mandar tac (Nm. 1:50, 51). Mi cheʼʌch tsiʼ cʌnta Jehová chuqui tac miʼ cʼʌjñel yaʼ ti templo chaʼan miʼ chʼujutesʌntel, ñumento mi caj i cʌntan jiñi xucʼul bʌ i wiñicob tsaʼ bʌ i yʌcʼʌyob i bʌ tiʼ tojlel. Ti jumpʼejl bʌ qʼuin, tiʼ sube jiñi i tejclum: «Jini muʼ bʌ i ticʼlañetla miʼ ticʼlan Dios jaʼel» (Zac. 2:8).

17. ¿Chuqui tac miʼ qʼuel Jehová ti lac tojlel?

¹⁷ Malaquías tsiʼ yʌlʌ chaʼan Jehová miʼ qʼuel i miʼ yubin cheʼ jiñi i wiñicob miʼ pejcañob i bʌ (Mal. 3:16). Tiʼ sujm, Dios «miʼ cʌn i chaʼañoʼ bʌ» (2 Ti. 2:19). Miʼ wen chʼʌm ti ñuc pejtelel chuqui mi la cʌl yicʼot lac mel (He. 4:13). Cheʼ maʼañic mi lac pʌsben la cutslel la quermañojob, Jehová mucʼʌch i qʼuel. Pero miʼ mejlel lac ñop jaʼel chaʼan mucʼʌch i qʼuel ti ñuc cheʼ mi lac ñusʌben lac bʌ lac mul yicʼot mi lac pʌy ti la cotot jiñi yambʌlob i mi lac tʼoxben lac bʌ chuqui an lac chaʼan (He. 13:16; 1 P. 4:8, 9).

18. ¿Bajcheʼ mi lac pʌsben Jehová chaʼan mucʼʌch laj qʼuel ti ñuc cheʼ añonla tiʼ tejclum?

¹⁸ La com lac pʌs ti jumpʼejl lac pusicʼal chaʼan mi laj qʼuel ti ñuc Jehová cheʼ tsiʼ yotsayonla tiʼ tejclum. La cujil chaʼan jiñi ñumen wem bʌ tsaʼ bʌ lac yajca, jiñʌch cheʼ tsaʼ la cʌcʼʌ lac bʌ tiʼ tojlel Jehová. Anquese chumulonla yicʼot ‹jiñi mach bʌ tojobic i pusicʼal yicʼot jiñi sojquemob jax bʌ›, la com chaʼan jiñi quixtañujob miʼ qʼuelob chaʼan ‹toj mi la cajñel ti jumpʼejl lac pusicʼal›, i ‹miʼ tsictiyel lac sʌclel tiʼ tojlelob› (Fil. 2:15). Mi lac tsʼaʼlen jiñi jontolil (Stg. 4:7). Mi laj cʼuxbiñob yicʼot mi laj qʼuelob ti ñuc la quermañojob come mi laj cʌn chaʼan i chaʼañobʌch Jehová jaʼel (Ro. 12:10).

19. ¿Chuqui ti majtan mi caj i yʌqʼuen Jehová jiñi i chaʼañoʼ bʌ?

¹⁹ Jiñi Biblia miʼ subeñonla: «Lac Yum maʼanic mi caj i choc i chaʼañoʼ bʌ» (Sal. 94:14). Mach yʌlʌyic chuqui miʼ yujtel, ili tʼan mucʼʌch i tsʼʌctiyel. Mi jiñicto jiñi chʌmel (sajtel) miʼ mejlel i mʌctan chaʼan miʼ cʼuxbiñonla Dios (Ro. 8:38, 39). «Mi cuxulonla, cuxulonla chaʼan miʼ qʼuejlel ti ñuc lac Yum. Mi woli lac chʌmel, woli lac chʌmel chaʼan miʼ qʼuejlel ti ñuc lac Yum. Jini chaʼan mi cuxulonla, o mi woli lac chʌmel, i chaʼañonla lac Yum» (Ro. 14:8). La comix chaʼan miʼ cʼotel i yorajlel cheʼ bʌ Jehová mi caj i chaʼ aqʼuen i cuxtʌlel jiñi xucʼul bʌ i yamigojob tsaʼix bʌ chʌmiyob (Mt. 22:32). Ili ora cabʌl bendición an lac taja jaʼel. Cheʼ bajcheʼ miʼ yʌl jiñi Biblia, «tijicñayob muʼ bʌ i yumañob Dios, tijicñayob jini yajcʌbiloʼ bʌ muʼ bʌ i yochelob tiʼ chaʼan Dios» (Sal. 33:12).