CHEʼ bʌ Jesús tsiʼ cʌntesa jiñi xʼaltʼañob chaʼan bajcheʼ yom miʼ subob jiñi wen tʼan, yujilix chaʼan mach tiʼ pejtelic quixtañujob wen mi caj i jacʼob (Lc. 10:3, 5, 6). Ti jiñi subtʼan, an tajol mi lac taj quixtañujob mach bʌ weñic miʼ jacʼob lac tʼan o yom bʌ i jatsʼoñobla. Isujmʌch, cheʼ mi lac taj quixtañujob muʼ bʌ i melob bajcheʼ iliyi, wocolʌch mi la cubin chaʼan mi lac bej pʌs lac pʼuntaya.

Jiñi quixtañu yujil bʌ pʼuntaya miʼ qʼuel jiñi woli bʌ i ñusan jiñi yambʌlob yicʼot bajcheʼ miʼ mejlel i coltan, i cheʼʌch miʼ mulan i mel tiʼ pusicʼal. Mi tsaʼ laj cʌyʌ lac pʌs lac pʼuntaya, maʼañix mi caj la cubin lac tijicñʌyel yicʼot lac taj lac wenlel ti subtʼan. Cheʼ jaʼel, mi woli lac chaʼlen wersa lac pʌs lac pʼuntaya mi cajel i coltañonla chaʼan bej an lac tijicñʌyel ti subtʼan. Lajal bajcheʼ mi la cotsʌben siʼ jiñi cʼajc chaʼan bej an i cʼʌcʼal (1 Ts. 5:19).

¿Bajcheʼ miʼ mejlel lac pʌs jiñi pʼuntaya, anquese an i tajol wocolʌch mi la cubin? Laʼ laj qʼuel uxpʼejl ejemplo muʼ bʌ i mejlel lac lajin: I chaʼan Jehová, Jesús yicʼot jiñi apóstol Pablo.

Añix cabʌl jab, Jehová an i cuchu cabʌl lot am bʌ albil tiʼ tojlel. Pero «miʼ [bej] cʼuxbin jini mach bʌ añobic i yutslel i pusicʼal yicʼot jini jontoloʼ bʌ» (Lc. 6:35). I miʼ pʌs cheʼ bʌ wolito i chʌn chaʼlen pijt. ‹Yom i coltan pejtelel wiñicob xʼixicob› (1 Ti. 2:3, 4). Anquese Jehová mi tsʼaʼlen jiñi jontolil, miʼ chʼʌm ti ñuc jiñi quixtañujob i mach yomic chaʼan mi juntiquilic miʼ sʌt i cuxtʌlel (2 P. 3:9).

Jehová yujil chaʼan Satanás an i mʌcbe i pensar jiñi quixtañujob mach bʌ xñoptʼañobic (2 Co. 4:3, 4). An cabʌlob cheʼ bʌ chutobto tsaʼ cajiyob ti subentel mach tac bʌ isujmic tiʼ tojlel Dios. Jin chaʼan, wocol miʼ ñopob jiñi i sujmlel am bʌ ti Biblia tiʼ caj bajcheʼ miʼ ñaʼtañob yicʼot bajcheʼ yubil miʼ yubiñob i bʌ. Pero Jehová yom i coltañob. ¿Bajcheʼ mi lac ñaʼtan?

Laʼ laj qʼuel jiñi tsaʼ bʌ ujti tiʼ tojlel jiñi nínivejob. Anquese jontolob, Jehová tiʼ sube jiñi Jonás: «¿Mach ba yomic mic pʼuntan Nínive jini colem tejclum? Yaʼ añob ñumen ti wʌccʼal ti mil winicob xʼixicob mach bʌ i cʌñʌyobic c tʼan. Lajalob bajcheʼ alʌlob mach bʌ anic miʼ ñaʼtañob baqui bʌ i ñoj mi baqui bʌ i tsʼej» (Jon. 4:11). Jehová tsiʼ ñaʼta chaʼan jiñi quixtañujob ti Nínive mach i wis cʌñʌyobic. Jin chaʼan, tsiʼ pʌsbeyob i pʼuntaya yicʼot tsiʼ choco majlel Jonás i subeñob jiñi woli bʌ i ñaʼtan i mel tiʼ tojlelob.

Cheʼ bajcheʼ Jehová, joñonla jaʼel mi laj qʼuelob ti ñuc jiñi quixtañujob. Miʼ mejlel lac lajin mi mucʼʌch lac mulan laj coltañob jiñi muʼ bʌ i ñʌchʼtañoñobla, anquese maʼañic mi caj i yajñelob tiʼ sujmlel yilal.

Cheʼ bʌ jiñi quixtañujob ti subtʼan mach weñic mi jacʼob lac tʼan, mach lac ñaʼtan chaʼan  mach yomobic jiñi i sujmlel i laʼ laj cʼajtiben lac bʌ chucoch cheʼ mi jacʼob bajcheʼ jiñi. An qʼuiñil mach yomob i yubin muʼ bʌ i yʌl jiñi Biblia tiʼ caj jiñi quixtañujob muʼ bʌ i yʌlob chaʼan xñoptʼañob, pero mach bʌ weñobic i melbal. Yambʌlob, tajol an subentiyob lot tac tiʼ tojlel jiñi lac ñopbal. O tajol añob i bʌqʼuen chaʼan miʼ wajlentelob tiʼ piʼʌlob ti chumtʌl yicʼot tiʼ familia mi tsiʼ ñʌchʼtayob lac tʼan.

An quixtañujob ñusʌbil bʌ i chaʼañob tsʌts tac bʌ wocol i tajol maʼañic miʼ mejlel i ñajʌtesañob, jin chaʼan mach weñic miʼ jacʼob lac tʼan. Juntiquil misionera i cʼabaʼ Kim miʼ yʌl: «Ti jumpʼejl lumal baqui mi lon c chaʼlen subtʼan, jiñi quixtañujob tsiʼ ñusayob jumpʼejl guerra baqui tsiʼ luʼ sʌtʌyob chuqui añob i chaʼan. Maʼañobic i pijtaya chaʼan ti talto bʌ qʼuin. Miʼ ñaʼtañob chaʼan maʼañix chuqui miʼ mejlel i melob yicʼot maʼañic miʼ ñopob muʼ bʌ i subentelob. Ti bele ora, mi lon c taj quixtañujob mach bʌ yomobic i cʌñob i sujmlel. Ti jumpʼejl bʌ qʼuin tsaʼ contrajintiyon cheʼ bʌ woliyon ti subtʼan».

¿Chuqui miʼ mel Kim chaʼan miʼ bej pʌs jiñi i pʼuntaya? Miʼ yʌl: «Cheʼ bʌ jiñi quixtañujob mach weñic miʼ jacʼob c tʼan, mic chaʼlen wersa j cʼajtesan jiñi tʼan tac muʼ bʌ i yʌl Proverbios 19:11: ‹Jini wen bʌ i pusicʼal mach orajic miʼ michʼan›. Cheʼ mic chʼʌm ti ñuc jiñi am bʌ i ñusayob ili quixtañujob miʼ coltañon chaʼan mic pʼuntañob. Cheʼ jaʼel, mach tiʼ pejtelelob mach weñic miʼ jacʼob lac tʼan. An lon taja wen tac bʌ revisita jaʼel».

Miʼ mejlel laj cʼajtiben lac bʌ jaʼel chaʼan bajcheʼqui yilal mi caj lac jacʼ jiñi wen tʼan cheʼ joñoñicla tsaʼ lac ñusa jiñi wocol tac tsaʼ bʌ ujti tiʼ tojlelob. Jumpʼejl ejemplo, miʼ ñumen ti junyajlel ti subentiyonla mach tac bʌ isujmic chaʼan i testigojob Jehová, tajol mach weñic mi caj lac jacʼbeñob jaʼel i la com chaʼan mi lac pʌsbentel jiñi pʼuntaya. Cheʼ mi laj cʼajtesan jiñi i mandar Jesús chaʼan yom mi lac mel tiʼ tojlel yambʌlob chuqui la com miʼ melob ti lac tojlel jaʼel, mi caj i coltañonla lac chʼʌmben isujm bajcheʼ miʼ yubiñob i bʌ, anquese wocolʌch mi la cubin (Mt. 7:12).

Jiñi apóstol Pablo tsiʼ pʌsʌ i pʼuntaya tiʼ tojlel i contrajob. ¿Chucoch? Come tsiʼ cʼajtesa bajcheʼ yilal i melbal wajali. Tsiʼ yʌlʌ: «Ti yambʌ ora tsac chaʼle pʼajoñel yicʼot ticʼlaya yicʼot tsʼaʼleya. Tsaʼ pʼuntʌntiyon come tsac mele c tontojlel cheʼ maxto anic tsac ñopo Cristo» (1 Ti. 1:13). Tsiʼ ñaʼta chaʼan Jehová yicʼot Jesús tsiʼ pʌsbeyob ñuc bʌ i pʼuntaya. Cheʼ bʌ tsiʼ chaʼle subtʼan, tajol tsiʼ taja i qʼuel i bʌ ti jiñi quixtañujob chaʼan cheʼʌch yilal tsiʼ mele jaʼel ti ñaxan.

An tajol, Pablo tsiʼ taja quixtañujob wen tsʌts bʌ miʼ ñopob jiñi mach bʌ isujmic. ¿Chuqui tsiʼ mele? Hechos 17:16 miʼ yʌl chaʼan ti  jumpʼejl bʌ qʼuin cheʼ yaʼan ti Atenas, ‹tsiʼ wen ubi i chʼijiyemlel i pusicʼal, come tsiʼ qʼuele butʼul jiñi tejclum ti diosteʼ›. Pero jiñi mach bʌ weñic tsiʼ yubi tsiʼ colta chaʼan miʼ chaʼlen wem bʌ subtʼan (Hch. 17:22, 23). Tsiʼ qʼuexta bajcheʼ miʼ chaʼlen subtʼan chaʼan miʼ mejlel i tajob i coltʌntel jiñi quixtañujob tilemoʼ bʌ ti yan tac bʌ parte (1 Co. 9:20-23).

Cheʼ bʌ mi lac taj jiñi mach bʌ weñic miʼ jacʼob lac tʼan o ñopol bʌ i chaʼan mach bʌ isujmic, miʼ mejlel lac mel bajcheʼ Pablo. Laʼ laj cʼʌn chuqui la cujil bʌ tiʼ tojlel jiñi quixtañujob chaʼan mi laj coltañob i cʌn «jini Wen Tʼan, chaʼan miʼ tajob [...] i coltʌntel» (Is. 52:7). Jumpʼejl ejemplo, juntiquil hermana i cʼabaʼ Dorothy miʼ yʌl: «Cabʌl quixtañujob baʼ mi lon c chaʼlen subtʼan, an cʌntesʌntiyob chaʼan Dios tsʌts mi yʌqʼueñonla lac toj lac mul. Ti ñaxan, mic subeñob chaʼan weñʌch cheʼ miʼ ñopob Dios i cheʼ jiñi mij cʌntesañob chuqui miʼ yʌl jiñi Biblia chaʼan i cʼuxbiya Dios yicʼot jiñi pijtaya ti talto bʌ qʼuin».

Yom mi lac pensalin jaʼel bajcheʼ miʼ mejlel lac ñuqʼuesʌbeñob i pusicʼal jiñi muʼ bʌ lac piʼleñob ti subtʼan. Jessica miʼ yʌl: «Mi juntiquil mach weñic miʼ jacʼbentel i tʼan, mic chaʼlen wersa chaʼan maʼañic mic chʌn pensalin. Mij qʼuextan c tʼan i mic tech cʌl chuqui wem bʌ. Jumpʼejl ejemplo, mi cʌl chaʼan jiñi subtʼan miʼ yʌqʼueñonla lac tijicñʌyel anquese an mach bʌ weñic miʼ jacʼob lac tʼan».

Jehová miʼ cʌn jiñi wocol tac muʼ bʌ lac ñusan ti subtʼan, i miʼ taj i tijicñʌyel cheʼ mi lac pʌs lac pʼuntaya cheʼ bajcheʼ miʼ pʌs jaʼel (Lc. 6:36). Tiʼ sujm, Jehová mach tiʼ pejtelel ora mi caj i pʌs i pʼuntaya. Miʼ mejlel lac ñop chaʼan yujilix jala mi caj i chʼʌm tilel i jilibal jiñi mach bʌ weñic. Pero cheʼ bʌ anto i yorajlel, yom mi lac chʌn chaʼlen subtʼan (2 Ti. 4:2). Jin chaʼan, laʼ lac bej chaʼlen subtʼan yicʼot lac tijicñʌyel i laʼ lac pʌsben lac pʼuntaya pejtelel quixtañujob.