1, 2. a) ¿Chucoch la comʌch ajñel tiʼ tojlel Jehová? b) ¿Chuqui mi caj laj qʼuel ti ili temaj?

MAʼAÑIC majqui yambʌ ñumen pʼʌtʌl bʌ, cabʌl bʌ i ñaʼtʌbal yicʼot wen uts bʌ bajcheʼ Jehová. Jin chaʼan, lʌcʼʌl la com ajñel tiʼ tojlel yicʼot lac xucʼtʌlel (Sal. 96:4-6). Pero an xñoptʼañob tsaʼ bʌ i tʌtsʼʌyob i bʌ cheʼ bʌ yom miʼ yʌcʼob i bʌ tiʼ tojlel.

² Ti ili temaj mi caj laj qʼuel ejemplo tac tiʼ tojlel quixtañujob tsaʼ bʌ i lon alʌyob chaʼan añob tiʼ tojlel Jehová, pero tsiʼ meleyob (chaʼleyob) mach bʌ weñic. Ili relato tac miʼ chʼʌm tilel ñuc tac bʌ i cʼʌjñibal muʼ bʌ i mejlel i coltañonla chaʼan chʌn xucʼulonla ti Jehová.

3. ¿Chucoch Jehová tsiʼ wʌn tiqʼui Caín, i chuqui tiʼ sube?

³ Laʼ laj qʼuel chuqui tsaʼ ujti tiʼ tojlel Caín. Maʼañic tsiʼ ñaʼta i chʼujutesan mach bʌ isujmic dios, cojach Jehová. Pero Jehová mach utsʼatic tsiʼ qʼuelbe jiñi i chʼujutesaya, come an chuqui mach bʌ weñic tsiʼ qʼuelbe tiʼ pusicʼal (1 Jn. 3:12). Jin chaʼan tiʼ sube Caín: «Mi utsʼat chuqui maʼ mel utsʼat mi caj a qʼuejlel. Mi mach utsʼatic chuqui maʼ mel woliʼ chijtañet mulil. Wersa yom  i tajet mulil pero yom miʼ mʌjlel a chaʼan» (Gn. 4:6, 7). Ti yambʌ tʼan, Jehová woli (choncol) i suben chaʼan mi tsiʼ cʌyʌ jiñi mach bʌ utsʼatic i miʼ yʌcʼ i bʌ tiʼ tojlel, mucʼʌch caj i yʌcʼ i bʌ tiʼ tojlel jaʼel.

4. ¿Chuqui tsiʼ mele Caín cheʼ bʌ muʼto i mejlel i yʌcʼ i bʌ tiʼ tojlel Jehová?

⁴ Caín cojach mi caj i chaʼ qʼuejlel ti utsʼat tiʼ tojlel Jehová mi mucʼʌch i qʼuextan i pusicʼal. Pero maʼañic tsiʼ jacʼbe i ticʼojel. Jiñi mach bʌ weñic an ti pusicʼal tsiʼ yʌcʼʌ ti yajlel ti mulil (Stg. 1:14, 15). Cheʼ bʌ chʼitonto Caín, ¿tsaʼ ba i ñaʼta chaʼan ti jumpʼejl bʌ qʼuin mi caj i contrajin Jehová? Tajol maʼañic. Pero ti wiʼil tsiʼ chanʼesa i bʌ tiʼ tojlel Dios i tiʼ tsʌnsa i yijtsʼin.

5. ¿Chuqui tac miʼ mejlel i yʌcʼ chaʼan mach utsʼatix miʼ qʼuelonla Jehová?

⁵ Cheʼ bajcheʼ Caín, tajol juntiquil xñoptʼan miʼ yʌl chaʼan miʼ chʼujutesan Dios pero miʼ mel mach tac bʌ weñic (Jud. 11). Tajol miʼ wen chaʼlen subtʼan yicʼot miʼ majlel tiʼ pejtelel jiñi tempa bʌ tac, pero cheʼ jaʼel miʼ yotsan tiʼ ñaʼtʌbal jiñi tsʼiʼlel, i wen mulʌntel chubʌʼañʌl o jinto jiñi tsʼaʼleya tiʼ tojlel juntiquil hermano (1 Jn. 2:15-17; 3:15). Iliyi miʼ mejlel i yʌcʼ ti mulil. Tajol jiñi yambʌlob mach yujilobic chuqui mi lac ñaʼtan o mi lac mel, pero Jehová mucʼʌch i luʼ qʼuel i yujil mi tiʼ sujm añoñʌchla tiʼ tojlel o maʼañic (pejcan Jeremías 17:9, 10).

6. ¿Bajcheʼ miʼ coltañonla Jehová chaʼan mi lac mʌlben jiñi mulil?

⁶ Pero Jehová mach ti orajic miʼ ñaʼtan chaʼan maʼañix laj cʼʌjñibal. Cheʼ bʌ miʼ qʼuel chaʼan woli (yʌquel) lac ñajtʼesan lac bʌ tiʼ tojlel, miʼ subeñonla: «Chaʼ sutqʼuin laʼ bʌ baʼ añon [...]. Mi caj c ñusʌbeñet laʼ mul» (Mal. 3:7). Jehová yom chaʼan mi lac tsʼaʼlen jiñi jontolil, ñumento cheʼ bʌ woli lac chaʼlen wersa lac mʌlben (jotben) jiñi laj cʼunlel tac (Is. 55:7). Mi cheʼʌch mi lac mel, mucʼʌch caj i coltañonla yicʼot mi caj i yʌqʼueñonla lac pʼʌtʌlel chaʼan mi lac mʌlben jiñi mulil (Gn. 4:7).

7. ¿Chuqui tac mach bʌ weñic tsiʼ mele Salomón?

⁷ Cabʌl chuqui miʼ mejlel laj cʌn tiʼ tojlel jiñi rey Salomón. Cheʼ bʌ chʼitonto, tiʼ sʌcla i tojʼesʌntel ti Jehová i tsiʼ yʌqʼue cabʌl i ñaʼtʌbal, cheʼ jaʼel tsiʼ yʌqʼue tiʼ wenta chaʼan miʼ mel jiñi wen utsʼatax bʌ templo yaʼ ti Jerusalén. Pero Salomón tsiʼ jeme bajcheʼ an yicʼot Jehová (1 R. 3:12; 11:1, 2). Jiñi i Mandar Dios tsiʼ yʌlʌ chaʼan jiñi reyob mach yomic miʼ ñujpuñelob yicʼot cabʌl xʼixicob chaʼan maʼañic miʼ tʌtsʼob i pusicʼal ti Dios (Dt. 17:17). Pero Salomón maʼañic tsiʼ jacʼʌ i ti wiʼil tsaʼ ñujpuñi yicʼot 700 xʼixicob yicʼot tsiʼ pʌyʌ 300 i majan ijñam (1 R. 11:3). Cabʌl mach bʌ yaʼic chʼoyolob ti Israel i miʼ chʼujutesañob diosteʼ tac. Jin chaʼan, Salomón tsiʼ ñusa jiñi mandar chaʼan jiñi israelob mach yomic miʼ ñujpuñelob yicʼot xʼixicob chʼoyoloʼ bʌ ti yambʌ tejclum tac (Dt. 7:3, 4).

8. ¿Baqui jaxʌl tsiʼ ñusʌbe i tʼan Jehová jiñi Salomón?

⁸ Salomón cʼunteʼ cʼunteʼ tsiʼ sʌtʌ i cʼuxbiya tiʼ mandar tac Dios i tsiʼ mele mach bʌ weñic tac. Tsiʼ mele (pʌtʌ) jumpʼejl pulʌntib chaʼan jiñi dios Astoret yicʼot chaʼan jiñi dios Kemós. Yaʼʌch tsiʼ chaʼle mach bʌ isujmic chʼujutesaya yicʼot jiñi i yijñamob. Ili pulʌntib tac yaʼʌch tsiʼ mele ti jumpʼejl wits am bʌ tiʼ tojel Jerusalén, yaʼ baqui tsiʼ melbe i templo Jehová (1 R. 11:5-8; 2 R. 23:13). Tajol tsiʼ bajñel loti i bʌ i tsiʼ ñaʼta chaʼan mi mucʼʌch i bej aqʼuen i majtan Dios yaʼ ti templo mi caj i ñusʌbentel i mul.

9. ¿Chuqui ti wocol tac tsiʼ taja Salomón tiʼ caj i ñusatʼan ti Dios?

⁹ Pero Dios mach cheʼic jach miʼ qʼuel jiñi mulil. Jiñi Biblia miʼ yʌl: «Lac Yum tsiʼ wen michʼle Salomón, come tsiʼ tʌtsʼʌ loqʼuel i bʌ baʼan lac Yum [...]. Chaʼyajl tsiʼ wʌn sube  chaʼan maʼanic miʼ chʼujutesan yambʌ diosob. Pero maʼanic tsiʼ jacʼʌ i ticʼol». Jin chaʼan, Dios maʼañix tsiʼ chʌn colta yicʼot mach utsʼatix tsiʼ qʼuele. Jiñi i yumʌntel Israel tsaʼ tʼoxle ti chaʼpʼejl, i jiñi i qʼuexolob Salomón maʼañix tsiʼ yumayob tiʼ pejtelel jiñi tejclum, cheʼ jaʼel cabʌl jab tsiʼ wen tajayob wocol (1 R. 11:9-13).

10. ¿Chuqui miʼ mejlel i yʌcʼ ti wocol bajcheʼ añonla la quicʼot Jehová?

¹⁰ Cheʼ bajcheʼ Salomón, junchajp muʼ bʌ i mejlel i ticʼlan bajcheʼ añonla la quicʼot Jehová jin cheʼ an la camigojob maʼañic bʌ miʼ ñaʼtañob o miʼ qʼuelob ti ñuc i mandar Jehová. Tajol yaʼʌch añob ti congregación, pero cʼuñob tiʼ chaʼan bʌ Jehová. Cheʼ jaʼel, jiñi maʼañic bʌ miʼ melbeñob i yeʼtel (troñel) Dios yaʼ ti lac familia, lac piʼʌlob ti chumtʌl, ti eʼtel o ti escuela. Tiʼ sujm, cheʼ jiñi la camigojob maʼañic miʼ qʼuelob ti ñuc jiñi i mandar tac Dios, xucʼu xucʼul miʼ mejlel i jemob bajcheʼ añonla la quicʼot Jehová.

11. ¿Chuqui miʼ mejlel i coltañonla lac ñaʼtan mi yom mi laj cʌy lac ñochtan juntiquil la camigo?

¹¹ (Pejcan 1 Corintios 15:33). Lʌcʼʌ tiʼ pejtelel wiñicob xʼixicob (quixtañujob) añob wem bʌ i melbal, i mach tiʼ pejtelelic jiñi mach bʌ Testigojob miʼ melob mach bʌ weñic. Mi an la camigojob bajcheʼ jiñi, ¿yom ba i yʌl chaʼan maʼañic miʼ mejlel i ticʼlañonla? Yom mi laj cʼajtiben lac bʌ mi mucʼʌch i coltañonla lac ñumen pʼʌtʼesan bajcheʼ añonla la quicʼot Jehová cheʼ yaʼan la quicʼotob. Laʼ lac ñaʼtan chuqui añob tiʼ pusicʼal. Jumpʼejl ejemplo, ¿jin jach ba miʼ yʌlob jiñi tsijib tac bʌ woliʼ loqʼuel, jiñi ñusaqʼuin tac, taqʼuin, computadora, teléfono tableta o yambʌ chubʌʼañʌl tac? ¿Muʼ ba i mulañob i jatsʼ tiʼ tʼan yambʌlob o i yʌlob bibiʼ tac bʌ alas tʼan? Jesús tsiʼ yʌcʼʌ ili ticʼojel: «Chuqui jach butʼul ti lac pusicʼal miʼ tsictiyel ti lac tʼan muʼ bʌ i loqʼuel ti la quej» (Mt. 12:34). Jin chaʼan, cheʼ bʌ jiñi la camigojob miʼ mejlel i yʌcʼ ti wocol bajcheʼ añonla la quicʼot Jehová, yom mi lac wen ñaʼtan chuqui yom mi caj lac mel i yom pʼisbil jach bajcheʼ cʼamel ora mi la cajñel la quicʼotob, o mi wersajʌch, laʼ laj cʌy lac ñochtañob (Pr. 13:20).

12. a) ¿Chuqui tsaʼ subentiyob jiñi israelob ti Jehová cheʼ maxto jali i loqʼuelob ti Egipto? b) ¿Bajcheʼ tsiʼ jacʼʌyob jiñi israelob cheʼ bʌ Jehová tiʼ subeyob chaʼan yom xucʼulob tiʼ tojlel?

¹² Cheʼ jaʼel, cabʌl chuqui miʼ mejlel laj cʌn ti jiñi tsaʼ bʌ ujti tiʼ tojlel jiñi israelob cheʼ bʌ maxto jali i loqʼuelob ti Egipto. Cheʼ bʌ tsaʼ cʼotiyob yaʼ ti wits Sinaí, Jehová tsiʼ mele milagro tac chaʼan miʼ pʌs i bʌ: Tsiʼ pʌsʌ iʼicʼ bʌ tocal, chajc, butsʼ, i tsaʼ caji i sub i bʌ lajal bʌ bajcheʼ trompeta (Éx. 19:16-19). Yaʼi Jehová tiʼ sube jiñi israelob «Cujil michʼajel cheʼ maʼanic j cʼuxbintel». Cheʼ jaʼel, tiʼ subeyob chaʼan xucʼul mi caj i yajñel tiʼ tojlel jiñi muʼ bʌ i cʼuxbiñob yicʼot miʼ jacʼbeñob i mandar tac (pejcan Éxodo 20:1-6). Woliʼ yʌqʼuen i ñaʼtañob chaʼan mi mucʼʌch i yʌcʼob i bʌ tiʼ tojlel, Jehová mucʼʌch caj i yajñel tiʼ tojlelob jaʼel. Cheʼ yaʼic añonla jaʼel, ¿bajcheʼ yilal tsaʼ lac jacʼʌ ili tʼan? Tajol cheʼʌch bajcheʼ jiñi israelob. Jiñi Biblia miʼ yʌl chaʼan «tiʼ pejtelelob tsiʼ jacʼʌyob ti jumpʼejl i pusicʼal: ‹Mux c mel lojon tiʼ pejtelel cheʼ bajcheʼ tsiʼ yʌlʌ lac Yum›» (Éx. 24:3). Pero mach jalic tsaʼ ñumi i mach pijtʌbilic i chaʼañob bajcheʼ tsaʼ ajqʼui ti wocol jiñi i ñopoñelob (chʼujbiyajob).

13. ¿Chuqui tsiʼ yʌcʼʌ ti wocol i xucʼtʌlelob jiñi israelob?

¹³ Cheʼ bʌ Jiñi israelob tsiʼ qʼueleyob jiñi iʼicʼ bʌ tocal, jiñi chajc yicʼot yan tac bʌ bajcheʼ tsiʼ pʌsʌ i pʼʌtʌlel Dios tsiʼ chaʼleyob bʌqʼuen. Jin chaʼan, tiʼ subeyob Moisés chaʼan jin miʼ majlel i pejcan Jehová (Éx. 20:18-21). Moisés tsaʼ letsi majlel yaʼ ti wits Sinaí i wen jal tsaʼ ajñi yaʼi. Come jiñi waʼchocobiloʼ bʌ tiʼ tojlel mach yaʼic an yicʼotob, ¿cʌybilobix ba yaʼ tiʼ tiquiñal lum? Lajal bajcheʼ jiñi i ñopoñelob yaʼʌch chucul tiʼ tojlel Moisés. Jin chaʼan, tsaʼ lujbʼa i pijtañob i tiʼ subeyob Aarón: «Com lojon maʼ melbeñon lojon c dios, muʼ bʌ mejlel ti majlel ti ñaxan tic tojlel lojon, come Moisés jini winic tsaʼ bʌ i locʼsayonla tiʼ lumal Egipto, mach la cujilic chuqui tsiʼ chaʼle» (Éx. 32:1, 2).

14. a) ¿Bajcheʼ tsiʼ lotiyob i bʌ jiñi israelob? b) ¿Bajcheʼ tsiʼ qʼuele Jehová?

¹⁴ Jiñi israelob yujilob chaʼan jiñi i chʼujutesʌntel diosteʼ tac jumpʼejlʌch tsʌts bʌ mulil tiʼ tojlel Jehová (Éx. 20:3-5). Pero mach jalic tsaʼ ñumi, tsaʼ caji i chʼujutesañob jiñi alʌ tat wacax melbil bʌ ti oro. Yujilob chaʼan woliʼ ñusʌbeñob i tʼan Dios, pero tsiʼ bajñel lotiyob i bʌ i tsiʼ ñaʼtayob chaʼan bej añobto tiʼ tojlel Jehová. Aarón tsaʼto i yʌlʌ jaʼel chaʼan «jiñʌch i qʼuinilel lac Yum». Pero Jehová maʼañic tsiʼ mulaj. Tiʼ sube Moisés chaʼan jiñi israelob tsaʼix asiyiyob yicʼot tsiʼ tʌtsʼʌyob i bʌ ti jiñi bij tsaʼ bʌ subentiyob chaʼan yom miʼ majlelob. Jehová tsaʼ wen michʼa yicʼotob, i tsaʼto i ñaʼta i junyajl jisañob (Éx. 32:5-10).

15, 16. ¿Bajcheʼ tsiʼ pʌsʌ Moisés yicʼot Aarón chaʼan añobʌch tiʼ tojlel Jehová? (Qʼuele jiñi dibujo am bʌ tiʼ tejchibal).

¹⁵ Come Jehová wen yujil pʼuntaya, maʼañic tsiʼ luʼ jisa jiñi israelob. Tsiʼ yʌcʼʌ chaʼan jiñi xucʼuloʼ bʌ miʼ junyajl acʼob i bʌ tiʼ tojlel (Éx. 32:14). Cheʼ bʌ Moisés tsiʼ qʼuele chaʼan wen woliyob ti son, ti cʼay yicʼot ti oñel yaʼ baqui an jiñi alʌ tat wacax melbil bʌ ti oro, tsiʼ topʼo jinto tsaʼ sujti ti tsʼubejn. Cheʼ jiñi tsiʼ yʌlʌ: «¿Majqui an tiʼ tojlel lac Yum? Laʼ tilic baʼ añon». Jin chaʼan, «tsaʼ tiliyob baʼan Moisés pejtelel levíjob» (Éx. 32:17-20, 26).

¹⁶ Anquese Aarón jiñʌch tsiʼ mele jiñi alʌ tat wacax, tsaʼʌch i chaʼ ñaʼta i bʌ i tsiʼ yʌcʼʌ i bʌ tiʼ tojlel Jehová yicʼot jiñi levíjob. Ili xucʼul bʌ wiñicob mach tsaʼic jach i yʌcʼʌyob i bʌ tiʼ tojlel Dios, tsiʼ tʌtsʼʌyob i bʌ baʼan jiñi israelob mach bʌ xucʼulic tsaʼ ajñiyob. Weñʌch tsaʼ bʌ i yajcayob i mel, come ti jimbʌ qʼuin yonlel israelob tsaʼ chʌmiyob (sajtiyob) tiʼ caj tsiʼ chʼujutesayob jiñi diosteʼ. Pero jiñi tsaʼ bʌ i yʌcʼʌyob i bʌ ti Jehová tsaʼ  aqʼuentiyob jiñi tʼan chaʼan mi caj i tajob i chobejtʌbal (Éx. 32:27-29).

17. ¿Chuqui miʼ pʌsbeñonla tsaʼ bʌ i yʌlʌ Pablo chaʼan tsaʼ bʌ ujti yicʼot jiñi alʌ tat wacax melbil bʌ ti oro?

¹⁷ Jiñi apóstol Pablo tsiʼ taja ti tʼan tsaʼ bʌ ujti yicʼot jiñi alʌ tat wacax melbil bʌ ti oro i tsiʼ yʌcʼʌ ili ticʼojel: «Cheʼʌch tsaʼ ujti chaʼan lac ticʼol chaʼan maʼanic mi lac [...] chʼujutesan diosteʼ tac cheʼ bajcheʼ yañoʼ bʌ». Cheʼ jiñi, tsiʼ yʌlʌ chaʼan ili ejemplo tac tsaʼ tsʼijbunti cʌytʌl chaʼan «lac ticʼol joñonla cuxulonto bʌ la ti ili ora cheʼ lʌcʼʌlix i jilibal», i tsiʼ yʌlʌ: «Jini chaʼan jini muʼ bʌ i qʼuel i bʌ ti xucʼul, laʼ i cʌntan i bʌ ame yajlic» (1 Co. 10:6, 7, 11, 12). Cheʼ bajcheʼ tsiʼ yʌlʌ Pablo, jinto jiñi muʼ bʌ i chʼujutesañob Dios miʼ mejlel i melob mach tac bʌ weñic. Jiñi muʼ bʌ i melob mach bʌ weñic tajol miʼ ñaʼtañob chaʼan bej i yamigojobto Jehová. Pero anquese juntiquil quixtañu yom sujtel tiʼ yamigo Dios o miʼ yʌl chaʼan xucʼulʌch tiʼ tojlel, mach yomic i yʌl chaʼan utsʼatʌch miʼ qʼuejlel ti Dios (1 Co. 10:1-5).

18. ¿Chuqui tac miʼ mejlel i ñajtʼesañonla ti Jehová, i baqui bʌ i wocolel mi lac taj?

¹⁸ Cheʼ bajcheʼ tsaʼix laj qʼuele, jiñi israelob tsaʼ lujbʼa i pijtañob cheʼ bʌ Moisés tsaʼ jalʼa yaʼ ti wits Sinaí. Cheʼ jaʼel, jiñi xñoptʼañonbʌla miʼ mejlel ti jilel jiñi lac pijt come jiñi i qʼuiñilel Jehová yicʼot jiñi tsijiʼ bʌ pañimil (mulawil) wolito i wen jalʼan yilal. Tajol wen jalto yom mi laj cubin chaʼan miʼ tsʼʌctiyel jiñi albil tac bʌ o chaʼan cʌlʌx utsʼatix i maʼañic miʼ mejlel lac ñop chaʼan isujmʌch. Mi mach tsajiloñicla, jin jax mi caj laj cʌcʼ ti ñuc chuqui bajñel la com i mach jiñic muʼ bʌ i mulan Jehová. Tiʼ wiʼil, miʼ mejlel lac tʌtsʼ lac bʌ ti Dios yicʼot lac meleʼ tac mach añic tsaʼ lac wis ñaʼta chaʼan mi lac mel.

19. ¿Chuqui jiñi wen ñuc bʌ i cʼʌjñibal yom bʌ mi laj cʼajtesan, i chucoch?

¹⁹ Mach yomic mi lac ñajʌtesan chaʼan Jehová yom mi lac luʼ jacʼben i tʼan yicʼot chaʼan cojach mi lac chʼujutesan (Éx. 20:5). Mi maʼañic mi lac mel muʼ bʌ i mulan Jehová, woli lac mel chuqui yom Satanás, i cojach mi caj i yʌqʼueñonla wocol. Jin chaʼan, Pablo miʼ cʼajtesʌbeñonla: «Mach mejlic mi laʼ jap tiʼ vaso lac Yum mi woli laʼ jap tiʼ vaso xibajob. Mach mejlic laʼ cʼux waj ‹tiʼ mesa lac Yum› mi woli laʼ cʼux waj tiʼ mesa xibajob» (1 Co. 10:21).

20. ¿Bajcheʼ miʼ mejlel i coltañonla Jehová anquese mi lac taj lac sajtemal?

²⁰ Jiñi ejemplo tac am bʌ ti Biblia chaʼan Caín, Salomón yicʼot jiñi israelob an chuqui lajal bʌ an i chaʼan wen ñuc bʌ i cʼʌjñibal. Tiʼ pejtelelob tsaʼ aqʼuentiyob i yorajlel chaʼan miʼ cʌyob i mul i miʼ qʼuextañob i melbal (Hch. 3:19). Tsiquil chaʼan Jehová mach ti orajic miʼ choc jiñi muʼ bʌ i taj i sajtemal. Laʼ laj cʼajtesan chaʼan tsiʼ ñusʌbe i mul Aarón. Ili ora, Jehová miʼ wʌn ticʼonla cheʼ miʼ cʼʌn ejemplo tac am bʌ ti Biblia, jiñi lac jun tac yicʼot jiñi uts bʌ ticʼojel muʼ bʌ i yʌqʼueñonla juntiquil hermano. Cheʼ bʌ mucʼʌch lac jacʼ jiñi i ticʼojel, miʼ mejlel lac ñop chaʼan Jehová mi caj i pʌsbeñonla i yutslel i pusicʼal.

21. ¿Chuqui yom mi lac mel cheʼ bʌ miʼ ñojpel jiñi lac xucʼtʌlel ti Jehová?

²¹ Jiñi i yutslel i pusicʼal Jehová añʌch junchajp i sujmlel (2 Co. 6:1). Miʼ yʌqʼueñonla i yorajlel «chaʼan mi laj cʌy pejtelel chuqui mach tojic, yicʼot i colosojlel lac pusicʼal yicʼot i chaʼan bʌ pañimil» (pejcan Tito 2:11-14). Cheʼ bʌ wʌʼto chumulonla ti ili pañimil, cabʌl chuqui mi caj lac ñusan muʼ bʌ caj i yʌcʼ ti wocol jiñi lac chʼujutesaya ti Jehová. Laʼ lac chaʼlen wersa chaʼan chʌn chajpʌbilonla chaʼan xucʼul mi laj cajñel tiʼ tojlel Jehová, come jiñʌch jiñi yom bʌ mi lac bʌcʼñan, yom bʌ mi lac melben i yeʼtel yicʼot baqui yom mi lac chuc lac bʌ (Dt. 10:20).