1, 2. ¿Chuqui yom i yʌl cheʼ mi laj qʼuel Jehová?

ILI ora chumulonla tiʼ «yorajlel bʌbʌqʼuen tac bʌ», i muʼto caj i ñumen pʼojlel jiñi wocol cheʼ bʌ Jehová maxto i jisa jiñi jontolil yicʼot cheʼ muʼto caj i chʼʌm tilel ñʌchʼtʌlel ila ti Pañimil (2 Ti. 3:1). Jin chaʼan yom mi laj cʼajtiben lac bʌ: «¿Baqui woli laj qʼuel majlel?», yom i yʌl, ¿baqui mi lac sʌclan laj coltʌntel yicʼot lac tojʼesʌntel? Tajol ti jumpʼejl lac pusicʼal mi laj cʌl: «Ti Jehová». I jiñʌch ñumen wem bʌ i jacʼbal.

² ¿Chuqui yom i yʌl cheʼ mi laj qʼuel Jehová? I ¿bajcheʼ miʼ mejlel lac ñaʼtan mi yaʼʌch an lac wut tiʼ tojlel cheʼ bʌ mi lac ñusan wocol tac? Añix cabʌl ora ñumen, juntiquil tsaʼ bʌ i tsʼijbu jumpʼejl salmo tsiʼ yʌlʌ chaʼan ñuc i cʼʌjñibal cheʼ mi la cʌcʼ lac wut tiʼ tojlel Jehová chaʼan mi lac sʌclan laj coltʌntel cheʼ tiʼ yorajlel wocol (pejcan Salmo 123:1-4, TNM). * Iliyi tsiʼ laji  yicʼot muʼ bʌ i mel (chaʼlen) juntiquil mozo. Cheʼ bʌ tsiʼ yʌlʌ chaʼan jiñi mozo yaʼan i wut tiʼ cʼʌb jiñi i yum, mach cojach tsiʼ yʌcʼʌ ti ñaʼtʌntel chaʼan mi caj i yʌqʼuentel i bʌl i ñʌcʼ yicʼot i cʌntʌntel. Tsiʼ yʌcʼʌ ti ñaʼtʌntel jaʼel chaʼan tiʼ pejtelel ora yom miʼ qʼuel jiñi i yum chaʼan miʼ ñaʼtan chuqui yom i miʼ yʌqʼuen. Cheʼʌch ti lac tojlel jaʼel, yom mi lac tsajin jiñi i Tʼan Dios ti jujumpʼejl qʼuin chaʼan mi lac ñaʼtan chuqui yom Jehová yicʼot mi lac jacʼben i tʼan. Cojach bajcheʼ jiñi mi caj i coltañonla (Ef. 5:17).

3. ¿Chuqui miʼ mejlel i mʌctañonla chaʼan maʼañic mi laj qʼuel Jehová?

³ Anquese la cujil chaʼan ñuc i cʼʌjñibal cheʼ mi laj qʼuel Jehová tiʼ pejtelel ora, an i tajol miʼ mejlel ti yʌjñel lac pensar. Cheʼʌch tsaʼ ujti tiʼ tojlel juntiquil wem bʌ i yamiga Jesús i cʼabaʼ Marta. Tsiʼ yʌñʌ i pensar chaʼan tiʼ caj «cabʌl i yeʼtel» (Lc. 10:40-42). Mi cheʼʌch tsaʼ ujti tiʼ tojlel juntiquil xucʼul bʌ xʼixic cheʼ bʌ yaʼan yicʼot Jesús, mach yomic toj sajtel lac pusicʼal mi cheʼ mi la cujtel jaʼel. Jin chaʼan, ¿chuqui miʼ mejlel i yʌn lac pensar? Ti ili temaj mi caj laj qʼuel bajcheʼ miʼ mejlel i ticʼlañonla i melbal yambʌlob. Mi caj laj cʌn chuqui yom mi lac mel jaʼel chaʼan maʼañic mi lac tʌtsʼ lac wut ti Jehová.

4. ¿Chucoch miʼ yʌcʼ ti toj sajtel lac pusicʼal cheʼ Moisés maʼañic tsaʼ ochi yaʼ ti Lum tsaʼ bʌ wʌn Subentiyob?

⁴ Tiʼ sujm, Moisés tsaʼʌch i sʌcla i coltaya ti Jehová. Cheʼ jaʼel, «xucʼul jach tsaʼ ajni come woliʼ qʼuel yilal jini mach bʌ mejlic laj qʼuel» (pejcan Hebreos 11:24-27). Jiñi Biblia miʼ yʌl chaʼan «maʼanic yambʌ xʼaltʼan cheʼ bajcheʼ Moisés cʼʌlʌl wʌle, come lac Yum tsiʼ pejca tiʼ wut» (Dt. 34:10). Anquese wen lʌcʼʌl tsaʼ ajñi tiʼ tojlel Jehová, maʼañic tsaʼ mejli ti ochel yaʼ ti Lum tsaʼ bʌ wʌn Subentiyob (Nm. 20:12). ¿Chucoch?

5-7. a) ¿Chuqui ti wocol tsaʼ ujti cheʼ bʌ jiñi israelob tsaʼ loqʼuiyob yaʼ ti Egipto? b) ¿Chuqui tsiʼ mele Moisés?

⁵ Cheʼ bʌ jiñi israelob lʌcʼʌ chaʼpʼejlix uw i loqʼuelob yaʼ ti Egipto i muʼto caj i cʼotelob yaʼ ti wits Sinaí, tsaʼ ujti jumpʼejl tsʌts bʌ wocol. Jiñi israelob tsaʼ cajiyob ti michʼ tiʼ caj maʼañic jaʼ i tsaʼ cajiyob ti tʼan tiʼ contra Moisés. Jiñi wocol tsaʼ wen tsʌtsʼa i Moisés tsiʼ cʼajtibe ti wocol tʼan Jehová: «¿Chuqui yom mic melbeñob ili winicob xʼixicob? Yomob i julon ti xajlel» (Éx. 17:4). Jehová tiʼ sube chaʼan miʼ jatsʼ tiʼ teʼ jiñi xajlel (tun) am bʌ yaʼ ti Horeb, i cheʼ jiñi mi caj i loqʼuel cabʌl jaʼ. Jiñi relato miʼ bej al: «Cheʼʌch tsiʼ mele Moisés baʼ tsiʼ qʼueleyob jini xñoxob añoʼ bʌ ti Israel». Jiñi israelob tsiʼ japʌyob cheʼ bajcheʼ cʼamel yomob jiñi jaʼ i jiñi wocol tsaʼ lajmi (Éx. 17:5, 6).

⁶ Jiñi Biblia miʼ yʌl chaʼan Moisés tsiʼ yotsʌbe i cʼabaʼ jiñi lum bajcheʼ Masah, yom bʌ i yʌl «Yilʌbentel pusicʼal», yicʼot Meribá yom bʌ i yʌl «Leto». ¿Chucoch weñʌch cheʼ tsaʼ ochi i cʼabaʼ bajcheʼ jiñi? Come «tsiʼ chaʼleyob aʼleya jini israelob. Tsiʼ yilʌbeyob i pusicʼal lac Yum cheʼ bʌ tsiʼ yʌlʌyob: ¿Am ba lac Yum ti lac tojlel o tsaʼ ba cʌleyonla?» (Éx. 17:7).

⁷ ¿Bajcheʼ tsiʼ qʼuele Jehová jiñi tsaʼ bʌ ujti ti Meribá? Tsiʼ qʼuele chaʼan jiñʌch woli (choncol) i contrajintel yicʼot bajcheʼ woliʼ yumañob, i mach jin jach tiʼ contra Moisés (pejcan Salmo 95:8, 9). Wen tsiquil chaʼan mach weñic chuqui tsiʼ mele jiñi israelob. Pero Moisés weñʌch chuqui tsiʼ mele: Tsiʼ pejca Jehová i tsiʼ mele chuqui tiʼ sube.

8. ¿Chuqui tsaʼ ujti cheʼ bʌ jiñi israelob muqʼuix caj i loqʼuelob yaʼ tiʼ tiquiñal lum?

 ⁸ Cheʼ ñumeñix cheʼ bʌ 40 jab, cheʼ muqʼuix caj i loqʼuelob yaʼ tiʼ tiquiñal lum, tsaʼ ujti yambʌ wocol. Jiñi israelob añob ti jumpʼejl lum muʼ bʌ caj i subentel jaʼel ti Meribá. Pero ili lum yaʼʌch an tiʼ tʼejl Qadés, lʌcʼʌlix bʌ an ti jiñi Lum tsaʼ bʌ wʌn subentiyob. * Jiñi israelob tsaʼ chaʼ cajiyob ti michʼan tiʼ caj maʼañic jaʼ (Nm. 20:1-5). Pero Moisés yʌñʌlix chuqui tsiʼ mele.

9. ¿Chuqui tiʼ sube Jehová jiñi Moisés chaʼan miʼ mel, pero chuqui tsiʼ mele? (Qʼuele jiñi foto am bʌ tiʼ tejchibal).

⁹ ¿Chuqui tsiʼ mele Moisés cheʼ bʌ woli (yʌquel) i chaʼ contrajintel? Tsiʼ chaʼ pejca Jehová chaʼan miʼ suben chuqui yom miʼ mel. Pero wʌle, Dios tiʼ sube chaʼan maʼañic miʼ jats jiñi xajlel. Tsaʼ subenti chaʼan miʼ chʼʌm i teʼ, miʼ tempan jiñi israelob i miʼ pejcan jiñi xajlel (Nm. 20:6-8). Pero Moisés maʼañic tsiʼ pejca jiñi xajlel. Tsaʼ wen michʼa i tsaʼ caji i subeñob jiñi yaʼ bʌ tempʌbilob: «Ubinla c tʼan wʌle, winicob cabʌl jax bʌ laʼ jontolil. Wʌle mi caj c locʼsʌbeñetla jaʼ ila ti colem xajlel». Cheʼ jiñi, chaʼyajl tsiʼ jatsʼʌ jiñi xajlel (Nm. 20:10, 11).

10. ¿Bajcheʼ tsiʼ qʼuele Jehová jiñi tsaʼ bʌ i mele Moisés?

¹⁰ Jehová tsaʼ wen michʼa yicʼot Moisés (Dt. 1:37; 3:26). ¿Chucoch? Tajol an cabʌl i sujmlel. Junchajp, tajol chaʼan maʼañic tsiʼ jacʼbe jiñi i mandar Jehová.

11. Cheʼ bʌ Moisés tsiʼ jatsʼʌ jiñi xajlel, ¿chucoch tajol jiñi israelob tsiʼ ñaʼtañob chaʼan mach tilemic ti Jehová jiñi milagro?

¹¹ Laʼ laj qʼuel yambʌ i sujmlel chucoch tajol Jehová tsaʼ michʼa yicʼot Moisés. Jiñi colem xajlel tac yaʼ ti ñaxam bʌ Meribá wen tsʌts tac. Anquese wen tsʌts miʼ jajtsʼel jiñi xajlel, maʼañic majqui miʼ mejlel i ñop chaʼan miʼ loqʼuel jaʼ yaʼi. Pero ti jiñi i chaʼpʼejlel Meribá wen yʌñʌl jiñi xajlel tac come joʼchʼontic, miʼ mejlel ti lʌmtʌl jaʼ tiʼ yebal i miʼ mejlel ti jajpel. Cheʼ bʌ Moisés tsiʼ jatsʼʌ jiñi xajlel i maʼañic tsiʼ pejca, tajol jiñi israelob tsiʼ ñaʼtayob chaʼan i tilelʌch cheʼ miʼ loqʼuel jaʼ ti jiñi xajlel tac i mach chaʼañic Jehová woliʼ mel jumpʼejl milagro. *

12. ¿Baqui bʌ yambʌ i sujmlel cheʼ Jehová tsaʼ michʼa tiʼ tojlel Moisés yicʼot Aarón?

¹² Tajol anto yambʌ chucoch tsaʼ michʼa Jehová yicʼot Moisés yicʼot Aarón. Laʼ laj qʼuel chuqui tiʼ sube Moisés jiñi israelob: «Wʌle mi caj c locʼsʌbeñetla jaʼ ila ti colem xajlel». Cheʼ bʌ tsaʼ yʌlʌ mic «locʼsʌbeñetla», miʼ mejlel i yʌcʼ ti ñaʼtʌntel Moisés yicʼot Aarón. Jiñi i tʼan tsiʼ pʌsʌ chaʼan maʼañic tsiʼ qʼuele ti ñuc Jehová, come jiñʌch tsaʼ bʌ i mele jiñi milagro. Ili cheʼʌch miʼ yʌcʼ ti ñaʼtʌntel muʼ bʌ i yʌl jiñi Salmo 106:32, 33, TNM: «Tsiʼ techbeyob i michʼajel ti jiñi jaʼ i chaʼan Meribá, i mach weñic tsaʼ ujti Moisés tiʼ cajob. Tsiʼ michʼesayob, i maʼañic tsiʼ cʌnta chuqui tsiʼ yʌlʌ» * (Nm. 27:14). Jiñi tsaʼ bʌ i mele Moisés maʼañic tsaʼ yʌqʼue i ñuclel Jehová. Tiʼ sube Moisés yicʼot Aarón: «Tsaʼ laʼ ñusʌbeyon c tʼan» (Nm. 20:24). Tiʼ sujm, tsiʼ meleyob wen tsʌts bʌ mulil.

13. ¿Chucoch weñʌch cheʼ Jehová tsaʼ yʌqʼue i toj i mul Moisés?

 ¹³ Moisés yicʼot Aarón jiñʌch añoʼ bʌ tiʼ wenta jiñi i tejclum Dios, jin chaʼan wen ñucobʌch i yeʼtel (troñel) (Lc. 12:48). Ti ñaxan, Jehová maʼañic tsaʼ yʌcʼʌyob ochel junmojt i pʼolbal jiñi Israelob yaʼ ti Canaán come tsiʼ ñusʌbeyob i tʼan (Nm. 14:26-30, 34). Jin chaʼan cheʼʌch yom miʼ melbentel Moisés jaʼel cheʼ tsiʼ ñusatʼan: Maʼañic miʼ caj i yochel yaʼ ti Lum tsaʼ bʌ wʌn Subentiyob.

14, 15. ¿Chucoch tsiʼ ñusatʼan Moisés?

¹⁴ ¿Chucoch tsiʼ ñusatʼan Moisés? Laʼ lac chaʼ qʼuel chuqui miʼ yʌl Salmo 106:32, 33, TNM: «Tsiʼ techbeyob i michʼajel ti jiñi jaʼ i chaʼan Meribá, i mach weñic tsaʼ ujti Moisés tiʼ cajob. Tsiʼ michʼesayob, i maʼañic tsiʼ cʌnta chuqui tsiʼ yʌlʌ». Anquese jiñʌch jiñi israelob tsaʼ bʌ i contrajiyob Jehová, tsaʼ bʌ i pʌsʌ i michʼajel jiñʌch Moisés. Maʼañic tsaʼ mejli i ticʼ i bʌ, jin chaʼan tsaʼ yotsa i bʌ ti wocol cheʼ maʼañic tsiʼ wʌn ñaʼta chuqui tsaʼ yʌlʌ.

¹⁵ Moisés tsaʼ yʌcʼʌ chaʼan miʼ yʌmben i pensar i melbal jiñi yambʌlob, i maʼañix tsiʼ qʼuele Jehová. Cheʼ bʌ tsaʼ ñaxan michʼayob jiñi israelob tiʼ caj jaʼ, Moisés weñʌch chuqui tsiʼ mele (Éx. 7:6). Pero wʌle tajol lujbeñix come añix cabʌl ora i cajel i cuchbeñob i ñusatʼan jiñi israelob. Tajol tsiʼ ñumen acʼʌ ti ñuc i michʼajel i mach jiñic chaʼan miʼ yʌqʼuen i ñuclel Jehová.

16. ¿Chucoch yom mi lac ñaʼtan tsaʼ bʌ i mele Moisés?

¹⁶ Mi juntiquil xucʼul bʌ xʼaltʼan bajcheʼ Moisés tsiʼ yʌñʌ i pensar yicʼot tsiʼ chaʼle mulil, mi lac mejlel ti ujtel jaʼel. Lajal bajcheʼ Moisés, lʌcʼʌlix yom chaʼan mi la cochel ti jiñi tsijiʼ bʌ pañimil wʌn albil bʌ i chaʼan Dios (2 P. 3:13). Mi juntiquilic yom i sʌt jiñi wen ñuc bʌ majtañʌl. Pero mi la comʌch lac taj, yom mi laj cʌcʼ lac wut ti Jehová yicʼot yom mi lac chaʼlen wersa lac mel chuqui yom (1 Jn. 2:17). ¿Chuqui mi laj cʌn ti jiñi mach bʌ weñic tsiʼ mele Moisés?

17. ¿Chuqui mi caj i coltañonla lac ticʼ lac bʌ cheʼ bʌ mi lac michʼan?

¹⁷ Laʼ lac ticʼ lac bʌ cheʼ mi lac michʼan. An i tajol jin jach bʌ wocol mi lac chʌn ñusan. Pero jiñi Biblia miʼ yʌqʼueñonla ili ticʼojel: «Mach yomic mi lac lujban tiʼ melol chuqui utsʼat, come tal i yorajlel mi caj lac chaʼlen cʼajbal mi maʼanic miʼ lujban lac pusicʼal» (Gá. 6:9; 2 Ts. 3:13). Cheʼ bʌ mi lac michʼan o mi lac taj jumpʼejl wocol la quicʼot juntiquil lac piʼʌl, ¿muʼ ba caj lac ticʼ lac bʌ yicʼot chuqui mi la cʌl? (Pr. 10:19; 17:27; Mt. 5:22). Mi an majqui miʼ michʼesañonla, laʼ laj cʌyben tiʼ wenta Jehová chaʼan jin miʼ pʌs i michʼajel (pejcan Romanos 12:17-21). Ili mi lac mel cheʼ yaʼʌch mi la cʌcʼ lac wut tiʼ tojlel Dios yicʼot mi mucʼʌch lac pijtan chaʼan jin miʼ mel chuqui i cʼʌjñibal bʌ miʼ qʼuel. Mi mach cheʼic mi lac mel yicʼot la com lac bajñel pʌs lac michʼajel, cheʼʌch bajcheʼ maʼañic woli laj qʼuel ti ñuc Jehová.

18. ¿Chuqui yom mi laj cʼajtesan chaʼan jiñi muʼ bʌ lac subentel?

¹⁸ Laʼ lac jacʼ chuqui tsijib tac bʌ mi lac subentel. Cheʼ bʌ Jehová miʼ yʌqʼueñonla tsijib tac tʼan tiʼ yorganización, ti orajach yom mi lac jacʼ. Maʼañic mi caj lac chʌn mel cheʼ bajcheʼ la cujil ti wajali (He. 13:17). Cheʼ jaʼel, yom mi lac chaʼlen wersa chaʼan maʼañic mi lac ñumel ti pʼis «cheʼ bajcheʼ tsʼijbubil» (1 Co. 4:6). Mi cheʼʌch mi lac  mel jiñi, mi lac pʌs chaʼan yaʼʌch an lac wut tiʼ tojlel Jehová.

19. ¿Chuqui miʼ mejlel lac mel chaʼan maʼañic miʼ ticʼlan bajcheʼ añonla la quicʼot Jehová i sajtemal yambʌlob?

¹⁹ Mach la cʌcʼ chaʼan miʼ ticʼlan bajcheʼ añonla la quicʼot Jehová i sajtemal yambʌlob. Mi yaʼʌch an lac wut tiʼ tojlel Jehová, maʼañic mi caj la cʌcʼ chaʼan miʼ michʼesañonla i melbal yambʌlob o miʼ yʌqʼueñonla lac mel muʼ bʌ i jem bajcheʼ añonla la quicʼot Jehová. Ili yom miʼ wen cʼajtesañob jiñi añoʼ bʌ i yeʼtel tiʼ yorganización Dios, cheʼ bajcheʼ Moisés. Isujmʌch, ti jujuntiquilonla yom mi lac chaʼlen wersa chaʼan mi lac jacʼben i tʼan Jehová chaʼan mi lac taj laj coltʌntel. Pero yom mi laj cʼajtesan chaʼan mach ñumeñic ti pʼis bajcheʼ miʼ melonla Jehová (Fil. 2:12). Mi ñumen an la queʼtel tiʼ chaʼan bʌ Dios, yom mi lac ñumen pʌs wem bʌ lac melbal (Lc. 12:48). Mi mucʼʌch laj cʼuxbin Jehová tiʼ sujm, maʼañic chuqui mi caj i tʌtsʼonla tiʼ cʼuxbiya (Sal. 119:165; Ro. 8:37-39).

20. ¿Chuqui yom mi lac mel?

²⁰ Ti ili wocol tac bʌ qʼuin, laʼ la cʌcʼ lac wut tiʼ tojlel jiñi yaʼ bʌ an i buchlib ti panchan chaʼan mi laj cʌn chuqui yom. Mach la cʌcʼ chaʼan miʼ jejmel bajcheʼ añonla la quicʼot Dios tiʼ caj i melbal yambʌlob. Yom miʼ cʌytʌl ti lac jol yicʼot lac pusicʼal tsaʼ bʌ ujti tiʼ tojlel Moisés. Laʼ la cʌcʼ lac wut tiʼ tojlel «Jehová jiñi lac Dios. Jinto cheʼ miʼ coltañonla», i mach la cʌcʼ chaʼan miʼ yʌsiñonla i sajtemal yambʌlob (Sal. 123:1, 2, TNM).