1. ¿Chucoch weñʌch cheʼ chajpʌbilonla chaʼan jumpʼejl wocol?

 CHEʼ chajpʌbilonla maʼañic chuqui mi caj lac chaʼlen. Laʼcu lac ñaʼtan yaʼ baqui miʼ yujtel jumpʼejl tsʌts bʌ wocol, mi jiñi lac piʼʌlob wen chajpʌbilob tajol maʼañic chuqui mi caj i chaʼleñob i muʼto caj i mejlel i coltañob yambʌlob. Cheʼ bajcheʼ miʼ yʌl jumpʼejl organización ti Europa, «cabʌl i wenlel cheʼ wen chajpʌbilonla».

2. ¿Chucoch yom mi lac chajpan lac bʌ chaʼan jiñi ñuc bʌ wocol? (Mateo 24:44).

² Jiñi «i yorajlel cabʌl wocol» o ñuc bʌ wocol, orajach mi caj i waʼ tejchel (Mat. 24:21). Pero mach tiʼ pejtelelic lac piʼʌlob toj sajtelob i pusicʼal mi caj i tajob come wajali Jesús tiʼ sube jiñi xcʌntʼañob i chaʼan chaʼan yom miʼ chajpañob i bʌ chaʼan jiñi qʼuin (pejcan Mateo 24:44). Mi mucʼʌch lac jacʼ tsaʼ bʌ i yʌlʌ mach wocolic mi caj la cubin cheʼ bʌ miʼ cʼotel jiñi qʼuin i mi caj i mejlel laj coltan yañoʼ bʌ (Luc. 21:36).

3. Chaʼan chajpʌbilonla baʼ ora miʼ tilel jiñi ñuc bʌ wocol, ¿chucoch yom mi laj cuch jiñi wocol tac, mi lac pʌs pʼuntaya yicʼot cʼuxbiya?

³ Chaʼan chajpʌbilonla chaʼan jiñi ñuc bʌ wocol yom an lac chaʼan uxpʼejl melbalʌl (chaʼlibal). Jiñi ñaxam bʌ jiñʌch cheʼ mi laj cuch wocol, iliyi mi caj i coltañonla chaʼan mi lac jacʼben i tʼan Jehová yicʼot mi lac ñop chaʼan mi caj i cʌntañonla. Ili mi caj i cʼʌjñibʌyel lac chaʼan cheʼ bʌ mi lac subentel chaʼan yomix mi lac suben jiñi lac piʼʌlob chaʼan mi caj i jisʌntelob i tajol cabʌlob mi caj i contrajiñoñobla (Apoc. 16:21). Yambʌ  yom bʌ an lac chaʼan jiñʌch jiñi pʼuntaya, come cheʼ bʌ jiñi hermanojob miʼ laj sʌtob chuqui añob i chaʼan mi caj laj coltañob chaʼan miʼ tajob i cʼʌjñibal bʌ i chaʼañob (Hab. 3:17, 18). I jiñi i yuxpʼejlel yom bʌ an lac chaʼan jiñʌch jiñi cʼuxbiya come cheʼ bʌ jiñi junmojt tejclum tac mi caj i contrajiñob i tejclum Jehová, tajol temel mi caj la cajñel la quicʼot yambʌ la quermañujob ti jumpʼejl alʌ otot (Ez. 38:10-12).

4. ¿Bajcheʼ la cujil chaʼan yom mi lac ñumen cuch wocol yicʼot mi lac ñumen pʌs lac pʼuntaya yicʼot laj cʼuxbiya?

⁴ Jiñi i Tʼan Dios miʼ yʌl chaʼan yom mi laj cuch wocol, mi lac pʌs pʼuntaya yicʼot cʼuxbiya. Lucas 21:19 miʼ yʌl: «Cheʼ mi laʼ cuch cʼʌlʌl tiʼ yujtibal, mi caj laʼ taj laʼ cuxtʌlel». Colosenses 3:12 miʼ yʌl: «Pʌsʌla jiñi ñuc bʌ pʼuntaya». I ti 1 Tesalonicenses 4:9, 10 miʼ yʌl: «Dios jiñʌch woli bʌ i pʌsbeñetla laʼ cʼuxbin laʼ bʌ. […] Pero mic subeñet lojon hermanojob, chaʼan muʼto laʼ ñumen pʌs». Jiñi xñoptʼañob tsaʼ bʌ tsʼijbubentiyob iliyi wolix (choncolix) i pʌsob ili uxpʼejl melbalʌl, pero yomixto miʼ ñumen pʌsob. Jiñʌch yom bʌ mi lac mel jaʼel. ¿Chuqui mi caj i coltañonla? Ti ili estudio mi caj laj qʼuel chuqui tsiʼ meleyob jiñi xñoptʼañob ti wajali i bajcheʼ miʼ mejlel lac lajiñob chaʼan cheʼ bajcheʼ jiñi chajpʌbilonla chaʼan jiñi ñuc bʌ wocol.

5. ¿Chuqui tsiʼ meleyob jiñi xñoptʼañob ti wajali chaʼan miʼ cuchob wocol?

⁵ Jiñi xñoptʼañob ti wajali tsaʼʌch i ñusayob cabʌl wocol tiʼ cuxtʌlel (Heb. 10:36). Tsiʼ tajayob i tsʼaʼlentel chaʼan tsiʼ melbeyob i yeʼtel (troñel) Jehová. Tsaʼ ticʼlʌntiyob tiʼ tojlel jiñi ñucoʼ bʌ i yeʼtel ti ñopbalʌl tac yicʼot tiʼ tojlel jiñi romanojob, i cheʼto jaʼel taʼ tsʼaʼlentiyob tiʼ familia (Mat. 10:21). I ti jimbʌ ora an apóstatajob tsaʼ bʌ i cʼʌñʌyob mach tac bʌ isujmic cʌntesa chaʼan miʼ ñop i tʼoxob jiñi congregación (Hech. 20:29, 30). Pero tsaʼʌch i cuchuyob pejtelel iliyi (Apoc. 2:3). ¿Bajcheʼ tsiʼ meleyob? Tsiʼ ñaʼtayob jiñi am bʌ i cuchuyob wocol jaʼel, cheʼ bajcheʼ Job (Sant. 5:10, 11). Tsiʼ cʼajtibeyob Jehová chaʼan miʼ yʌqʼueñob i pʼʌtʌlel (Hech. 4:29-31). Yicʼot tsiʼ chʌn cʼajtesayob jiñi majtan muʼ bʌ caj i yʌqʼuentelob mi mucʼʌch i cuchob (Hech. 5:41).

6. ¿Chuqui mi laj cʌn tiʼ tojlel Merita chaʼan bajcheʼ tsiʼ cuchu jiñi tsʼaʼlentel?

⁶ Joñonla jaʼel miʼ mejlel lac ñaʼtan jiñi am bʌ i cuchuyob wocol ili ora yicʼot ti wajali. Jiñʌch tsaʼ bʌ i mele Merita, juntiquil hermana chʼoyol bʌ ti Albania. Ili hermana wen wocolʌch tsiʼ ñusa come jiñi i familia tiʼ tsʼaʼle. Merita miʼ yʌl: «Tsaʼ wen cʼoti tic pusicʼal cheʼ bʌ tsaʼ c pejca tiʼ tojlel Job, wen wocolʌch tsiʼ ñusa. Pero anquese mach yujilic baqui woli (yʌquel) i tilel pejtelel jiñi wocol tsiʼ yʌlʌ ‹¡Chʌn xucʼul mi caj cajñel cʼʌlʌlto mic chʌmel!› (Job 27:5). Ili tsiʼ coltayon c ñaʼtan chaʼan jiñi wocol woli bʌ c ñusan maʼañic miʼ laj i bʌ bajcheʼ tsaʼ bʌ i ñusa Job, i joñon cujilʌch chucoch woli c ñusan pejtelel ili».

7. ¿Chuqui yom maʼ mel ili ora anquese maʼañic woli a ñusan jumpʼejl tsʌts bʌ wocol?

⁷ Yambʌ muʼ bʌ caj i coltañonla laj cuch wocol jiñʌch cheʼ mi lac chʌcʌ pejcan Jehová ti oración (Filip. 4:6; 1 Tes. 5:17). Tajol ili ora maʼañic woli lac ñusan jumpʼejl tsʌts bʌ wocol pero miʼ mejlel lac pejcan Jehová cheʼ baʼ ora mach tijicñayic mi la cubin o cheʼ bʌ wen woliyonla ti pensar. Mi ili ora mucʼʌch a cʼajtiben i coltaya Jehová mach yʌlʌyic chuqui woli a ñusan, yom i yʌl chaʼan cheʼʌch mi caj a mel cheʼ miʼ ñumen tsʌtsʼan jiñi wocol. Ti jumpʼejl a pusicʼal mi caj a ñop chaʼan Jehová yujil  bajcheʼ mi caj i coltañet yicʼot jala mi caj i mel (Sal. 27:1, 3).

8. ¿Chucoch mi la cʌl chaʼan cheʼ mi laj cuch jiñi wocol tac ili ora miʼ chajpañonla chaʼan jiñi talto bʌ qʼuin? Alʌ jiñi ejemplo chaʼan Mira (Santiago 1:2-4, qʼuele jaʼel jiñi foto).

⁸ Cheʼ mi laj cuch jiñi wocol tac ili ora mi caj i coltañonla chaʼan mi laj cuch ti jiñi ñuc bʌ wocol (Rom. 5:3). ¿Bajcheʼ la cujil chaʼan cheʼʌchi? Cabʌl hermanojob miʼ yʌlob chaʼan cheʼ miʼ cuchob jumpʼejl wocol miʼ pʼʌtʼesañob, come miʼ qʼuelob bajcheʼ miʼ coltʌntelob ti Jehová. Ili miʼ yʌqʼueñob i ñumen ñop chaʼan Jehová mucʼʌch caj i coltañob cheʼ bʌ miʼ ñusañob yambʌ wocol, i mucʼʌch i cuchob (pejcan Santiago 1:2-4). Jiñʌch muʼ bʌ i yʌl juntiquil hermana i cʼabaʼ Mira, precursora bʌ ti Albania. An i tajol miʼ ñaʼtan chaʼan maʼañic yambʌ cheʼto bʌ cʼamel i wocol bajcheʼ i chaʼan. Cheʼ bʌ miʼ tilel tiʼ jol jiñi, miʼ cʼajtesan bajcheʼ an i colta Jehová ti jiñi 20 jab ñumeñix bʌ, i miʼ suben i bʌ: «Yom xucʼul maʼ wajñel, mach lolomic pejtelel am bʌ a mele. Cʼajtesan bajcheʼ an i coltayet Jehová chaʼan maʼ cuch jiñi wocol tac». Jiñʌch yom bʌ maʼ mel jaʼel, cʼajtesan bajcheʼ an i coltayet Jehová. Miʼ mejlel a ñop chaʼan Jehová wolʌch i qʼuelet cheʼ bʌ maʼ cuch jumpʼejl wocol i mi caj i yʌqʼueñet i bendición (Mat. 5:10-12). Mi cheʼʌch maʼ mel mi caj i chajpañet chaʼan miʼ mejlel a cuch jiñi ñuc bʌ wocol.

9. ¿Bajcheʼ tsiʼ pʌsʌyob i pʼuntaya jiñi hermanojob añoʼ bʌ ti Antioquía de Siria?

⁹ Laʼ lac ñaʼtan tsaʼ bʌ ujti tiʼ tojlel jiñi xñoptʼañob ti Judea cheʼ bʌ tsaʼ ñumi wiʼñal. Cheʼ bʌ jiñi hermanojob añoʼ bʌ ti Antioquía de Siria tsiʼ yubiyob iliyi, tsiʼ pʼuntayob i añʌch chuqui tsiʼ meleyob: «Tsiʼ ñaʼtayob i chocbeñob majlel coltaya jiñi hermanojob chumuloʼ bʌ ti Judea, cheʼʌch bajcheʼ miʼ mejlelob ti jujuntiquil» (Hech. 11:27-30). Anquese jiñi hermanojob woli bʌ i ñusañob wocol ñajt añob, jiñi añoʼ bʌ ti Antioquía de Siria yomobʌch i coltañob (1 Juan 3:17, 18).

10. ¿Bajcheʼ miʼ mejlel lac pʌsbeñob lac pʼuntaya jiñi hermanojob muʼ bʌ i ñusañob jumpʼejl wocol? (Qʼuele jaʼel jiñi foto).

¹⁰ Joñonla jaʼel miʼ mejlel lac pʌs lac pʼuntaya tiʼ tojlel jiñi woli bʌ i ñusañob wocol. Miʼ mejlel lac subeñob jiñi ancianojob chaʼan la com coltaya, miʼ mejlel la cʌcʼ lac donación o mi lac tajob ti oración jiñi woli bʌ i ñusañob jumpʼejl wocol (Pr. 17:17). b Jiñʌch tsaʼ bʌ ujti ti 2020, tiʼ petol pañimil tsaʼ mejli ñumen ti 950 Comité de Socorro chaʼan miʼ coltʌntel jiñi hermanojob ti jiñi pandemia chaʼan COVID-19. Ili hermanojob tsiʼ chʼʌmbeyob majlel chuqui i cʼʌjñibal i chaʼañob jiñi woli bʌ i ñusañob wocol, tsiʼ ñuqʼuesʌbeyob i pusicʼal yicʼot tsaʼto i tojʼesayob o tsiʼ meleyob i yotot jiñi hermanojob yicʼot i yotlel tac tempa bʌ. ¿Chuqui tsiʼ ñijcayob chaʼan miʼ melob pejtelel iliyi? Jiñʌch jiñi pʼuntaya. Mi lac wen aqʼueñob wocolix i yʌlʌ chaʼan pejtelel jiñi eʼtel muʼ bʌ i melob (qʼuele jaʼel muʼ bʌ i yʌl 2 Corintios 8:1-4).

11. ¿Bajcheʼ mi la cʌqʼuen i ñuclel Jehová cheʼ mi lac pʌs pʼuntaya?

¹¹ Jiñi lac piʼʌlob mucʼʌch i qʼuelob cheʼ mi lac pʌsben lac bʌ pʼuntaya. Laʼ laj qʼuel jumpʼejl ejemplo, cheʼ ti 2019, jiñi huracán Dorian tsiʼ jeme jumpʼejl i Yotlel tempa bʌ yaʼ ti Bahamas. Cheʼ bʌ woliʼ chaʼ mejlel, juntiquil contratista tsiʼ yʌlʌ chaʼan tsiʼ wen mulaj bajcheʼ miʼ coltañob i bʌ jiñi hermanojob, jin chaʼan tsiʼ yʌlʌ chaʼan yom i coltan jiñi organización, tsiʼ yʌcʼʌ material, eʼtijib tac yicʼot i wiñicob chaʼan miʼ chaʼleñob eʼtel. Cabʌl lac piʼʌlob  mach i cʌñʌyobic Jehová, pero mucʼʌch i qʼuelob chuqui mi lac mel. Jumpʼejlʌch wen ñuc bʌ lac majtan cheʼ la cujil chaʼan cheʼ bʌ mi lac pʌs pʼuntaya miʼ mejlel i coltan lac piʼʌlob chaʼan miʼ cʌñob jiñi Dios wen am bʌ i pʼuntaya (Efes. 2:4).

12. Cheʼ mi lac pʌs pʼuntaya ili ora, ¿bajcheʼ miʼ coltañonla chaʼan chajpʌbilonla chaʼan mi laj cuch jiñi ñuc bʌ wocol? (Apocalipsis 13:16, 17).

¹² ¿Chucoch ñuc i cʼʌjñibal cheʼ mi lac pʌs pʼuntaya ti jiñi ñuc bʌ wocol? Come jiñi Biblia miʼ yʌl chaʼan jiñi maʼañic bʌ miʼ coltañob jiñi yumʌlob ti pañimil mi caj i tajob wocol ili ora yicʼot ti talto bʌ qʼuin (pejcan Apocalipsis 13:16, 17). Tajol an hermanojob wocol bʌ mi caj i yubiñob chaʼan miʼ tajob chuqui i cʼʌjñibalob i chaʼan i yom mi laj coltañob. Cheʼ bʌ Jesús miʼ tilel ti meloñel, ¿mach ba la comic chaʼan woli lac pʌs pʼuntaya miʼ tajonla? Mi cheʼʌch mi lac mel mi caj i subeñonla: «Chʼʌmʌla jiñi Yumʌntel» (Mat. 25:34-40).

13. ¿Chuqui tsiʼ meleyob jiñi xñoptʼañob ti wajali chaʼan miʼ ñumen cʼuxbiñob i bʌ? (Romanos 15:7).

¹³ Cheʼ ti ñaxam bʌ siglo, pejtelel lac piʼʌlob yujilob chaʼan jiñi xñoptʼañob miʼ cʼuxbiñob i bʌ, pero jiñi mach yomic i yʌl chaʼan mach wocolic tsiʼ yubiyob chaʼan miʼ pʌsbeñob i bʌ cʼuxbiya. Laʼ lac ñaʼtan jiñi añoʼ bʌ ti congregación ti Roma, mach junlajalic baqui tilemob. An judíojoʼ bʌ i cʌñʌyoʼ bʌ jiñi mandar, an chuculoʼ bʌ ti juntiquil i yum ti eʼtel, an librejoʼ bʌ, i cheʼ jaʼel an añoʼ bʌ xyaj eʼtelob i chaʼan. ¿Chuqui tsiʼ coltayob chaʼan iliyi maʼañic miʼ mʌctañob chaʼan miʼ ñumen cʼuxbiñob i bʌ? Jiñi apóstol Pablo tsiʼ yʌqʼueyob ili ticʼojel: «Yom utsʼat mi laʼ chʼʌm laʼ bʌ» (pejcan Romanos 15:7). ¿Chuqui yom i yʌl cheʼ utsʼat mi lac chʼʌm lac bʌ? Chaʼan cheʼ an majqui miʼ cʼotel ti la cotot, yom mi lac pʌsben la cutslel, mi la cotsan ti la cotot i mi lac ñop lac sujtesan ti la camigo. Jumpʼejl ejemplo, Pablo tiʼ sube Filemón bajcheʼ yom miʼ chʼʌm Onésimo cheʼ miʼ chaʼ cʼotel tiʼ yotot, come ti ñaxan tsaʼ putsʼi. Tiʼ sube: «Chʼʌmʌ ti wen» (Filem. 17). Priscila yicʼot Áquila ñumen yujilob bajcheʼ Apolos, pero ili maʼañic tsiʼ mʌctayob chaʼan miʼ pʌyob majlel jiñi Apolos (Hech. 18:26). Pejtelel ili xñoptʼañob mach junlajalobic, pero iliyi maʼañic tsiʼ mʌctayob chaʼan miʼ cʼuxbiñob i bʌ yicʼot miʼ chʼʌmob i bʌ ti wen.

14. ¿ Bajcheʼ tsiʼ pʌsʌyob i cʼuxbiya Anna yicʼot i ñoxiʼal?

¹⁴ Mi mucʼʌch lac chʼʌm ti wen jiñi la quermañujob yicʼot mi lac sujtesañob ti la camigo mach wocolic mi caj la cubin chaʼan mi lac pʌsbeñob laj cʼuxbiya, i jiñi hermanojob mi caj i cʼuxbiñoñobla jaʼel (2 Cor. 6:11-13). Jiñʌch tsaʼ bʌ ujti tiʼ tojlel Anna yicʼot i ñoxiʼal. Tsaʼ chojquiyob majlel bajcheʼ misionero ti África Occidental, cheʼ bʌ maxto wen jalic cʼotemob yaʼi, tsaʼ tejchi jiñi COVID-19, i maʼañix tsaʼ mejli i tempañob i bʌ yicʼot jiñi hermanojob ti congregación. ¿Chuqui tsiʼ meleyob? Tsaʼ caji i pejcañob jiñi hermanojob ti videollamada chaʼan miʼ subeñob chaʼan yom i ñumen cʌñob. Ili tsiʼ ñijcʌbeyob i pusicʼal jiñi hermanojob chaʼan miʼ pejcañob yicʼot miʼ chocbeñob majlel mensaje jiñi xñujpuñel. ¿Chuqui tsiʼ ñijca jiñi xñujpuñel chaʼan miʼ melob iliyi? Anna miʼ yʌl: «Mic wen cʼajtesan jiñi cʼuxbiya tsaʼ bʌ i pʌsʌyob jiñi hermanojob tic tojlel yicʼot tiʼ tojlel c familia cheʼ bʌ an wocol yicʼot cheʼ bʌ wen añon lon. Ili jiñʌch muʼ bʌ i ñijcañon chaʼan mic pʌs j cʼuxbiya jaʼel».

15. ¿Chuqui mi laj cʌn tiʼ tojlel Vanessa? (Qʼuele jaʼel jiñi foto).

¹⁵ Yaʼ ti congregación mach junlajalic bajcheʼ yilalonla, chuqui tac ñusʌbil lac chaʼan o bajcheʼ tsaʼ coliyonla. Jin chaʼan, ¿chuqui mi  caj i coltañonla chaʼan mi laj cʼuxbin pejtelel la quermañujob? Jiñʌch cheʼ mi laj qʼuel jiñi wen tac bʌ i melbalob. Juntiquil hermana i cʼabaʼ Vanessa, chumul bʌ ti Nueva Zelanda, wocol tsiʼ yubi chaʼan wen miʼ qʼuel chaʼtiqui uxtiquil hermanojob yaʼ ti congregación come maʼañic miʼ wen mulan bajcheʼ yilalob. Pero anquese cheʼ bajcheʼ jiñi, tsiʼ ñaʼta i ñumen ñusan tiempo yicʼotob. Jiñi tsiʼ colta chaʼan miʼ qʼuel jiñi wen tac bʌ i melbal am bʌ i chaʼan ili hermanojob. Vanessa miʼ yʌl: «Cheʼ bʌ tsiʼ waʼchocoyob bajcheʼ superintendente chaʼan circuito jiñi c ñoxiʼal tsaʼ c ñumen cʌñʌ lojon cabʌl hermanojob, i mach junlajalic bajcheʼ yilalob. Wʌle muqʼuix c mulan jiñi, come tsiquil chaʼan Jehová miʼ mulan cheʼ jiñi i wiñicob mach junlajalobic». Cheʼ jiñi, ¿chuqui miʼ mejlel lac mel chaʼan mi lac pʌs laj cʼuxbiya tiʼ tojlel la quermañujob? Yomʌch mi lac chaʼlen wersa laj qʼuelob cheʼ bajcheʼ miʼ qʼuelob Jehová (2 Cor. 8:24).

16. ¿Chucoch ñuc i cʼʌjñibal jiñi cʼuxbiya cheʼ bʌ añoñixla ti jiñi ñuc bʌ wocol? (Qʼuele jaʼel jiñi foto).

¹⁶ La cujil chaʼan Jehová mi caj i cʌntañonla cheʼ bʌ añoñixla ti jiñi ñuc bʌ wocol. Pero ñuc i cʼʌjñibal cheʼ mi laj cʼuxbin jiñi la quermañujob, ¿chucoch? Laʼcu lac ñaʼtan chuqui tiʼ sube jiñi i tejclum wajali cheʼ bʌ jiñi babiloniojob mi caj i contrajiñob. Tiʼ subeyob: «Ñupʼbenla i tiʼ tac laʼ wotot. Yom mi laʼ poj mujcun laʼ bʌ jinto miʼ lajmel i michʼajel la Yum» (Is. 26:20). Tajol jiñʌch yom bʌ mi caj lac mel jaʼel. Tajol jiñi otot muʼ bʌ i yʌl ili versículo jiñʌch jiñi congregación tac. Jin chaʼan, mi la com chaʼan Jehová miʼ coltañonla, yom wen temelonla la quicʼot la quermañujob. Mach yom jach mi lac ñusʌbeñob i mul, yom mi laj cʼuxbiñob tiʼ sujm. Mi maʼañic mi laj cʼuxbin lac bʌ, tajol maʼañic mi caj lac ñumel ti jiñi ñuc bʌ wocol.

17. ¿Bajcheʼ mi caj i coltañonla ti jiñi ñuc bʌ wocol cheʼ mi lac chajpan lac bʌ ili ora?

¹⁷ Jiñi i qʼuiñilel Jehová wen wocolʌch miʼ cajel (Sof. 1:14, 15). I jinto jaʼel jiñi i wiñiconbʌla Jehová wocolʌch mi caj lac ñusan, pero mi mucʼʌch lac chajpan lac bʌ maʼañic mi caj lac chaʼlen bʌqʼuen i mi caj i mejlel laj coltan yañoʼ bʌ. Cheʼ mi laj cuch wocol tac ili ora, mi caj i coltañonla chaʼan cheʼʌch mi lac mel ti talto bʌ qʼuin. Jiñi pʼuntaya mi caj i ñijcañonla chaʼan mi laj coltan jiñi hermanojob, i jiñi laj cʼuxbiya mi caj i coltañonla chaʼan chʌn temel mi la cajñel. Jehová mi caj i yʌqʼueñonla wen ñuc bʌ bendición, mi caj lac chumtʌl tiʼ pejtelel ora ti jumpʼejl pañimil baʼ maʼañix wocol (Is. 65:17).