1. ¿Chuqui tac tsaʼ cʌñʌ cheʼ bʌ woliyetto ti estudio?

 ¿CʼAJAL baʼ chaʼan tsaʼ bʌ a cʌñʌ cheʼ bʌ woliyetto (choncoletto) ti estudio? Tajol toj sajtel a pusicʼal cheʼ bʌ tsaʼ cʌñʌ chuqui i cʼabaʼ Dios. O tajol tijicña tsaʼ wubi a bʌ cheʼ bʌ tsaʼ cʌñʌ chaʼan maʼañic mi caj lac pulel ti cʼajc chaʼan mi lac toj lac mul. I ñumen tijicñato tsaʼ wubi cheʼ bʌ tsaʼ cʌñʌ chaʼan jiñi chʌmeñoʼ bʌ mi caj i chaʼ chʼojyelob i mi caj lac mejlel ti ajñel la quicʼotob ti jumpʼejl Paraíso.

2. ¿Chuqui tac yambʌ tsaʼ caji a mel cheʼ bʌ tsaʼ teche a cʼuxbin Jehová? (Efesios 5:1, 2).

² Cheʼ bʌ woliyet (yʌquelet) ti estudio tsaʼ caji a ñumen cʼuxbin Jehová. I jiñi cʼuxbiya tsiʼ ñijcayet chaʼan maʼ mel cheʼ bajcheʼ woli a cʌn. Tsaʼ caji a chʼʌm ti ñuc jiñi principio tac ti chuqui muʼ bʌ a ñaʼtan a mel. Cheʼ jaʼel, come a wom a tijicñesʌben i pusicʼal Jehová tsaʼ caji a tojʼesan majlel jiñi a pensar yicʼot a melbal (chaʼlibal). I lajal bajcheʼ juntiquil alʌl yom bʌ i lajin i papá, jatet jaʼel tsaʼ caji a lajin Jehová (pejcan Efesios 5:1, 2).

3. ¿Chuqui yom mi laj cʼajtiben mi lac bʌ?

³ Laʼ laj cʼajtiben lac bʌ: «¿Muʼ ba c ñumen cʼuxbin Jehová ili ora? ¿Muʼ ba c ñumen cʼuxbin jiñi hermanojob cheʼ bajcheʼ miʼ mulan Jehová?». Mi tsaʼ laj qʼuele chaʼan jiñi laj cʼuxbiya mach  chʌn lajalix bajcheʼ ti ñaxan, mach la cubin lac chʼijyemlel. An hermanojob cheʼʌch bʌ tsaʼ ujtiyob ti jiñi ñaxam bʌ siglo. Pero Jesús maʼañic tsiʼ ñaʼta chaʼan maʼañix mi caj i chʌn tojʼañob, i yujil chaʼan joñonla mucʼʌch lac mejlel lac ñumen pʌs laj cʼuxbiya jaʼel (Apoc. 2:4, 7).

4. ¿Chuqui mi caj laj qʼuel ti ili estudio?

⁴ Ti ili estudio mi caj laj cʌn chuqui miʼ mejlel lac mel chaʼan mi lac ñumen cʼuxbin Jehová yicʼot jiñi yambʌlob. Cheʼ jiñi mi caj laj qʼuel baqui tac bʌ i wenlel cheʼ mi lac ñumen pʌs jiñi cʼuxbiya.

5, 6. a) ¿Chuqui tac ti wocol tsiʼ ñusa Pablo cheʼ bʌ tsiʼ melbe i yeʼtel Jehová? b) ¿Chuqui tsiʼ colta chaʼan miʼ bej melben i yeʼtel Jehová?

⁵ Jiñi apóstol Pablo tijicña tsiʼ ñusa cheʼ bʌ tsiʼ melbe i yeʼtel Jehová, pero tsaʼʌch i taja wocol tac. Tsiʼ chaʼle ñajt bʌ xʌmbal i yaʼ ti bij tsiʼ taja xujchʼob, tsiʼ taja wocol ti jaʼ, cheʼto jaʼel jiñi i contrajob tsiʼ ticʼlayob (2 Cor. 11:23-27). I an hermanojob mach bʌ añic tsiʼ wen qʼueleyob ti ñuc pejtelel tsaʼ bʌ i mele Pablo chaʼan miʼ lon coltañob (2 Cor. 10:10; Filip. 4:15).

⁶ Jiñi apóstol Pablo wen i cʌñʌ Jehová come miʼ pejcan jiñi Tsʼijbujel yicʼot cabʌl chuqui tsiʼ ñusa. Ili tsiʼ yʌqʼue i ñop chaʼan Jehová mucʼʌch i wen cʼuxbin, i jin chaʼan maʼañic tsiʼ cʌyʌ i melben i yeʼtel (Rom. 8:38, 39; Efes. 2:4, 5). Cheʼ jaʼel, Pablo tsaʼʌch i wen cʼuxbi Jehová. Tsiʼ pʌsʌ cheʼ bʌ tsiʼ chʌn cʼuxbi jiñi hermanojob yicʼot tsiʼ coltayob (Heb. 6:10).

7. ¿Chuqui mi caj i coltañonla chaʼan mi lac ñumen cʼuxbin Jehová?

⁷ Chaʼan mi lac ñumen cʼuxbin Jehová, yom mi lac wen pejcan jiñi Biblia. I cheʼ bʌ mi lac mel laʼ laj qʼuel chuqui miʼ pʌsbeñonla tiʼ tojlel Jehová. Laʼ laj cʼajtiben lac bʌ: «¿Bajcheʼ miʼ pʌsbeñon ili versículo tac chaʼan Jehová mucʼʌch i cʼuxbiñon? ¿Bajcheʼ miʼ coltañon chaʼan mij cʼuxbin jaʼel?».

8. ¿Bajcheʼ miʼ coltañonla jiñi oración chaʼan mi lac ñumen cʼuxbin Dios?

⁸ Yambʌ muʼ bʌ i coltañonla chaʼan mi lac ñumen cʼuxbin Jehová jiñʌch cheʼ mi lac pejcan ti oración ti jujumpʼejl qʼuin i mi lac suben bajcheʼ yubil mi la cubin (Sal. 25:4, 5). Jehová mucʼʌch caj i jacʼbeñonla (1 Juan 3:21, 22). Jiñʌch tsaʼ bʌ i qʼuele juntiquil hermana am bʌ ti Asia, miʼ yʌl: «Jiñi tsaʼ bʌ j cʌñʌ ti Biblia tsiʼ coltayon chaʼan mij cʼuxbin Jehová. Pero cheʼ bʌ tsaʼ j qʼuele bajcheʼ miʼ jacʼbeñon jiñi coración tac tsiʼ coltayon chaʼan mic ñumen cʼuxbin, i jiñʌch muʼ bʌ i ñijcañon chaʼan mic mel muʼ bʌ i mulan».

9. ¿Bajcheʼ la cujil chaʼan Timoteo tsaʼʌch i chaʼle wersa chaʼan miʼ ñumen cʼuxbin jiñi hermanojob?

⁹ Ti jiñi i chaʼyajlel i xʌmbal Pablo bajcheʼ misionero tsiʼ cʌñʌ Timoteo. Juntiquil xcolel muʼ bʌ i cʼuxbin Jehová yicʼot jiñi yambʌ lac piʼʌlob. Cheʼ ñumeñix chaʼpʼej uxpʼejl jab Pablo tiʼ sube jiñi añoʼ bʌ ti Filipos: «Maʼañic yambʌ cheʼ bʌ yilal bajcheʼ Timoteo, ti jumpʼejl bʌ i pusicʼal miʼ ñaʼtañetla» (Filip. 2:20). Pablo mach jiñic tsiʼ taja ti tʼan chaʼan Timoteo wen yujil ñusʌntel discurso o chaʼan wen chʼejl tiʼ chajpʌntel jiñi eʼtel tac. Tsaʼ bʌ i ñumen mulaj jiñʌch cheʼ miʼ wen cʼuxbin jiñi hermanojob. I miʼ mejlel lac ñaʼtan chaʼan jiñi congregación tac wen yomobix i qʼuelob Timoteo cheʼ bʌ miʼ yubiñob chaʼan mi caj i cʼotel i julaʼtañob (1 Cor. 4:17).

10. ¿Bajcheʼ tsiʼ pʌsʌyob i cʼuxbiya Anna yicʼot i ñoxiʼal?

¹⁰ Joñonla jaʼel mi lac sʌclan bajcheʼ mi laj  coltan jiñi hermanojob (Heb. 13:16). ¿Cʼajal ba laʼ chaʼan Anna, tsaʼ bʌ la cʌlʌ ti yambʌ estudio? Yaʼ baqui chumulob tsaʼ ñumi tsʌts bʌ jaʼal, jin chaʼan Anna yicʼot i ñoxiʼal tsaʼ majli i julaʼtañob jumpʼejl familia. Tsiʼ qʼueleyob chaʼan tsaʼ jejmi i yotot, i maʼañic sʌc bʌ i pislelob. Anna miʼ yʌl tsaʼ bʌ i meleyob: «Tsaʼ c chʼʌmʌ lojon majlel jiñi i pislelob chaʼan mi lon c wutsʼ, tsaʼ lon c chaʼle ti planchar i cheʼ jiñi tsaʼ majli lon c chaʼ cʌy. Jiñi tsaʼ bʌ lon c mele mach cʌlʌx wocolic ti melol, pero tsiʼ coltayon lojon chaʼan mi lon c sujtel ti ñumen wem bʌ lon camigo lon c bʌ». Jiñi cʼuxbiya jiñʌch tsaʼ bʌ i colta Anna yicʼot i ñoxiʼal chaʼan miʼ coltan ili hermanojob (1 Juan 3:17, 18).

11. a) ¿Bajcheʼ yubil miʼ yubin yañoʼ bʌ cheʼ mi lac pʌsbeñob cʼuxbiya? b) Cheʼ bajcheʼ miʼ yʌl Proverbios 19:17, ¿chuqui mi caj i mel Jehová mi mucʼʌch lac pʌs cʼuxbiya?

¹¹ Cheʼ mi lac pʌs laj cʼuxbiya yicʼot la cutslel tiʼ tojlel yambʌlob woli lac lajin Jehová. Anquese tajol maʼañic mi caj i cʼotel la cubin, jiñi muʼ bʌ lac mel mach toʼol cheʼic jach miʼ ñumel mucʼʌch i coltan yambʌlob. Jiñi hermana tsaʼ bʌ la cʌlʌ ti párrafo 8 cʼajal i chaʼan bajcheʼ tsaʼ wen coltʌnti, miʼ yʌl: «Cʼajal c chaʼan bajcheʼ tsiʼ wen coltayoñob jiñi hermanajob, tsiʼ wen pʌsbeyoñob i cʼuxbiya, tsiʼ pʌyʌyoñob ti subtʼan, tsiʼ pʌyʌyoñob majlel ti cʼux waj i ti wiʼil miʼ majlel i chaʼ cʌyoñob ti cotot. Cujil chaʼan tsaʼʌch i chaʼleyob wersa chaʼan miʼ melob pejtelel iliyi, pero tsiʼ meleyob yicʼotob i tijicñʌyel i ti jumpʼejlob i pusicʼal». Tajol mach tiʼ pejtelelobic mi caj i mejlel i subeñoñobla chaʼan miʼ qʼuelob ti ñuc jiñi tsaʼ bʌ lac mele tiʼ tojlelob. Jiñʌch muʼ bʌ i yʌl jiñi hermana: «Mic mulan cheʼ añic chuqui miʼ mejlel c mel tiʼ tojlelob pejtelel jiñi tsaʼ bʌ i coltayoñob, pero maʼañic mic mejlel come mach luʼ cujilic baqui chumulob. Pero Jehová yujilʌch baqui añob i mij cʼajtiben chaʼan laʼ i yʌqʼueñob i bendición». Miʼ mejlel lac ñop chaʼan Jehová mucʼʌch i qʼuel ti ñuc jaʼel pejtelel muʼ bʌ  lac mel anquese tajol mach wen ñuquic mi lac ñaʼtan, lajal bajcheʼ an i bet miʼ yubin yicʼotonla i yom i chaʼ sutqʼuibeñonla (pejcan Proverbios 19:17).

12. ¿Bajcheʼ miʼ mejlel i pʌsob i cʼuxbiya jiñi hermanojob? (Qʼuele jaʼel jiñi foto tac).

¹² ¿Bajcheʼ miʼ mejlel i pʌsob i cʼuxbiya jiñi hermanojob? Jiñʌch cheʼ miʼ chaʼleñob coltaya. Juntiquil xcolel i cʼabaʼ Jordan tsiʼ cʼajtibe juntiquil anciano chuqui yom miʼ mel chaʼan miʼ ñumen coltan jiñi hermanojob. Jiñi anciano tiʼ sube chaʼan weñʌch woli bʌ i mel yicʼot chuqui yomto bʌ miʼ ñumen weñʼesan. Tiʼ sube chaʼan yom seb miʼ cʼotel ti tempa bʌ, chaʼan miʼ chaʼlen ti saludar jiñi hermanojob, chaʼan miʼ yʌcʼ i comentario, chaʼan miʼ loqʼuel ti subtʼan yicʼot i grupo i miʼ sʌclan bajcheʼ tac yambʌ miʼ mejlel i coltan jiñi hermanojob. Cheʼ bʌ tsiʼ jacʼʌ ili tsaʼ bʌ subenti mach tsaʼic jach i colta chaʼan miʼ ñumen taj i yeʼtel yaʼ ti congregación, tsiʼ colta jaʼel chaʼan miʼ ñumen pʌs i cʼuxbiya tiʼ tojlel jiñi hermanojob. I tsiʼ cʌñʌ chaʼan cheʼ bʌ an majqui miʼ waʼchocontel bajcheʼ siervo ministerial, mach yomic i yʌl chaʼan muʼto caj i tech i coltan jiñi hermanojob, wolix i mel tilel i yom jach miʼ bej mel (1 Tim. 3:8-10, 13).

13. ¿Chuqui tsiʼ colta Christian chaʼan miʼ chaʼ waʼchocontel bajcheʼ anciano?

¹³ ¿Tsaʼ ba ajñiyet bajcheʼ anciano o siervo ministerial wajali? Miʼ mejlel a ñop chaʼan Jehová maʼañic ñajʌyem i chaʼan jiñi tsaʼ bʌ a mele yicʼot jiñi a cʼuxbiya tsaʼ bʌ a pʌsʌ (1 Cor. 15:58). I mucʼʌch i bej qʼuel jiñi muʼ bʌ a mel. Laʼ laj qʼuel tsaʼ bʌ ujti tiʼ tojlel juntiquil hermano i cʼabaʼ Christian. Wen chʼijyem tsiʼ yubi cheʼ mach chʌn ancianojix, pero tsaʼʌch i chaʼle wersa. Miʼ yʌl: «Anquese mach chʌn ancianojoñix tsaʼʌch c bej chaʼle wersa c pʌsben j cʼuxbiya Jehová». Ti wiʼil tsaʼ chaʼ waʼchoconti bajcheʼ anciano. Christian miʼ bej al: «Wolito c ñaʼtan mi yomixto mic chaʼ jacʼ.  Pero tsaʼ c ñaʼta chaʼan Jehová wolito i pʌsbeñon i cʼuxbiya, jin chaʼan wolito i yʌcʼ chaʼan mic chaʼ mel queʼtel bajcheʼ anciano. Tsaʼʌch c jacʼʌ come mij cʼuxbin Jehová yicʼot jiñi hermanojob».

14. ¿Chuqui mi laj cʌn tiʼ tojlel Elena?

¹⁴ Joñonla jaʼel mucʼʌch lac pʌsben laj cʼuxbiya jiñi mach bʌ Testigojobic (Mat. 22:37-39). Elena, juntiquil hermana chʼoyol bʌ ti república de Georgia, miʼ yʌl: «Ti ñaxan mic loqʼuel ti subtʼan chaʼan j cʼuxbiya ti Jehová, mach chaʼañic mij cʼuxbin jiñi lac piʼʌlob. Pero cheʼ tsaʼ caji ti ñumen colel majlel jiñi j cʼuxbiya ti Jehová tsaʼ caji j cʼuxbin jiñi lac piʼʌlob. Tsaʼ caji c ñop c ñaʼtan chuqui ti wocol woliʼ ñusañob yicʼot chuqui ti tema miʼ mejlel i coltañob» (Rom. 10:13-15).

15, 16. ¿Baqui tac bʌ jiñi wenlel muʼ bʌ lac taj cheʼ miʼ lac pʌsben cʼuxbiya yambʌlob? (Qʼuele jiñi foto tac).

¹⁵ Cheʼ bʌ mi lac pʌsben laj cʼuxbiya jiñi hermanojob mach jiñobic jach muʼ bʌ i tajob i wenlel. Jiñi tsaʼ bʌ ujti tiʼ tojlel Paolo yicʼot i yijñam miʼ pʌsbeñonla chaʼan cheʼʌchi. Cheʼ bʌ maʼañix tsaʼ mejliyonla ti subtʼan tiʼ caj jiñi pandemia chaʼan COVID-19, Paolo yicʼot i yijñam tsiʼ coltayob cabʌl hermanajob añobix bʌ i jabilel chaʼan miʼ mejlel i cʼʌñob ti subtʼan jiñi i celular o i tableta. Juntiquil hermana tsaʼ bʌ i coltayob wocolʌch tsiʼ yubi chaʼan miʼ cʌn, pero ti wiʼil tsaʼʌch mejli i mel i tsiʼ chaʼle ti invitar jiñi i familia. Cheʼ ti yorajlel jiñi Conmemoración, 60 tsiʼ chaʼleyob i bʌ ti conectar.  Tsiquil chaʼan mach cojach jiñi hermana tsiʼ taja i wenlel chaʼan tsaʼ bʌ i meleyob Paolo yicʼot yijñam. Ti wiʼil, jiñi hermana tiʼ tsʼijbube majlel jiñi Paolo: «Wocolix laʼ wʌlʌ chaʼan tsaʼ laʼ coltayon lojon i tsaʼ laʼ wen pʌsbeyon lojon laʼ wutslel, tsiquil chaʼan Jehová mucʼʌch i wen cʼuxbiñon lojon».

¹⁶ Jiñi tsaʼ bʌ ujti tiʼ tojlel Paolo, tsiʼ pʌsbe chaʼan jiñi ñumen ñuc bʌ i cʼʌjñibal jiñʌch jiñi cʼuxbiya, mach jiñic chuqui tac la cujil melol. Paolo miʼ yʌl: «Tsaʼ ajñiyon bajcheʼ superintendente chaʼan circuito. Pero mic ñaʼtan chaʼan tajol jiñi hermanojob mach cʼajalix i chaʼañob pejtelel jiñi discurso tsaʼ bʌ c ñusa, pero mi cʌl cʼajalʌch i chaʼañob jiñi tsaʼ bʌ c mele tiʼ tojlelob chaʼan mij coltañob».

17. ¿Majqui yambʌ miʼ taj i wenlel cheʼ bʌ mi laj pʌs cʼuxbiya?

¹⁷ Cheʼ mi lac pʌsben laj cʼuxbiya yambʌlob mucʼʌch lac taj lac wenlel jaʼel. Jiñʌch tsaʼ bʌ ujti tiʼ tojlel Jonathan am bʌ ti Nueva Zelanda. Cheʼ ti sábado tsiʼ qʼuele juntiquil precursor i bajñel bʌ woli ti subtʼan cheʼ ti xinqʼuiñil, cheʼ bʌ wen an ticwal. Jonathan tsiʼ pʼunta i tsiʼ yʌlʌ chaʼan ti jujumpʼejl sábado mi caj i loqʼuel ti subtʼan yicʼot, pero maʼañic tsiʼ ñaʼta chaʼan iliyi mi caj i chaʼ coltan jaʼel. Jonathan miʼ yʌl: «Ti jimbʌ ora maʼañic mic mulan subtʼan. Pero cheʼ bʌ tsaʼ j qʼuele bajcheʼ miʼ chaʼlen cʌntesa jiñi precursor i chaʼan mucʼʌch i ñusan i bʌ, tsaʼ caji c mulan jiñi subtʼan. I cheʼ jaʼel tsaʼ c taja juntiquil wem bʌ camigo tsaʼ bʌ i coltayon chaʼan mic lʌcʼtesan c bʌ ti Jehová yicʼot mic ñusan c bʌ ti subtʼan».

18. ¿Chuqui yom Jehová chaʼan mi lac mel?

¹⁸ Jehová yom chaʼan mi lac ñumen pʌs laj cʼuxbiya tiʼ tojlel yicʼot tiʼ tojlel yañoʼ bʌ. I chaʼan miʼ mejlel lac mel tsaʼ laj cʌñʌ chaʼan yom mi lac pejcan jiñi Biblia, mi lac wen ñaʼtan muʼ bʌ i yʌl yicʼot mi lac mel oración ti jujumpʼejl qʼuin. Cheʼ jaʼel, chaʼan mi lac pʌsben cʼuxbiya jiñi hermanojob yom mi lac ñaʼtan chuqui tac mi mejlel lac mel tiʼ tojlelob. Cheʼ bajcheʼ ili, ñumen lʌcʼʌl mi caj la cubin lac bʌ ti Jehová yicʼot tiʼ tojlel la quermañujob. Cheʼ jaʼel, ¡tijicña mi caj la cajñel la quicʼot tiʼ pejtelel ora!