1. ¿Chucoch yom lajalonla bajcheʼ jiñi i teʼel coco? (Qʼuele jaʼel jiñi foto).

 ¿AM BA a qʼuele bajcheʼ yilal jiñi i teʼel coco cheʼ bʌ miʼ ñumel icʼ? Anquese yuquiña, maʼañic miʼ xujlel. Iliyi añʌch chuqui miʼ pʌsbeñonla, chaʼan joñonla jaʼel yom lajalonla bajcheʼ jiñi i teʼel coco. Chaʼan tijicña mi lac bej melben i yeʼtel (troñel) Jehová, mach tsʌtsic yom mi lac mel lac bʌ. ¿Bajcheʼ miʼ mejlel lac mel iliyi? Cheʼ bʌ an chuqui miʼ qʼuextʌyel ti laj cuxtʌlel yom pʼisbilon jachla, i cheʼ jaʼel, yom mi laj qʼuel ti ñuc muʼ bʌ i ñaʼtan yambʌlob.

2. ¿Baqui tac bʌ melbalʌl mi caj i coltañonla cheʼ bʌ an chuqui miʼ qʼuextʌyel ti laj cuxtʌlel, i chuqui mi caj laj qʼuel ti ili estudio?

² Pejtelel muʼ bʌ lac melben i yeʼtel Jehová, la com chaʼan mach tsʌtsic mi lac mel lac bʌ yicʼot chaʼan pʼisbilon jachla. Cheʼ jaʼel, la com lac pʌs la cutslel yicʼot lac pecʼlel. Jin chaʼan, ti ili estudio mi caj laj qʼuel bajcheʼ Jehová yicʼot Jesús miʼ pʌsob ili melbalʌl tac (chaʼlibal tac). Ti wiʼil, mi caj laj qʼuel bajcheʼ chaʼtiqui uxtiquil hermanojob tsiʼ coltayob cheʼ mach tsʌtsic tsiʼ meleyob i bʌ cheʼ bʌ an chuqui tsaʼ ujti tiʼ tojlelob yicʼot bajcheʼ miʼ mejlel lac lajiñob.

3. ¿Bajcheʼ la cujil chaʼan Jehová mach tsʌtsic miʼ mel i bʌ?

³ Jiñi Biblia miʼ yʌl chaʼan Jehová jiñʌch jiñi xajlel, come xucʼul i maʼañic miʼ qʼuextʌyel (Dt. 32:4). Pero jiñi mach yomic i yʌl chaʼan tsʌts miʼ mel i bʌ, ¿bajcheʼ la cujil? Come an  tacʌch chuqui an i qʼuexta chaʼan miʼ mejlel ti tsʼʌctiyel chuqui ñaʼtʌbilix bʌ i chaʼan. Joñonla miʼ mejlel lac lajin jaʼel, come melbilonla tiʼ yejtal. Jehová an i yʌqʼueyonla principio tac muʼ bʌ i coltañonla lac ñusan baqui jach bʌ wocol. Pejtelel am bʌ i mele yicʼot jiñi i principio tac miʼ pʌs chaʼan Jehová juntiquilʌch Dios xucʼul bʌ, pero cheʼ jaʼel, pʼisbil jach.

4. Alʌ jumpʼejl ejemplo muʼ bʌ i pʌs chaʼan Jehová mach tsʌtsic miʼ mel i bʌ (Levítico 5:7, 11).

⁴ Jiñi i mandar tac Jehová tojʌch, pero mach tsʌtsic. Laʼcu lac ñaʼtan cheʼ bʌ Jehová tiʼ sube jiñi israelitajob chaʼan yom miʼ yʌqʼueñob i majtan. Maʼañic tsiʼ wersa cʼajti chaʼan yom junlajal jiñi majtañʌl yom bʌ miʼ yʌcʼob jiñi pʼumpʼuñoʼ bʌ yicʼot jiñi ricojoʼ bʌ (pejcan Levítico 5:7, 11).

5. Alʌ bajcheʼ an i pʌsʌ Jehová i pecʼlel yicʼot i pʼuntaya.

⁵ Jehová mach tsʌtsic miʼ mel i bʌ come an i pecʼlel yicʼot yujil pʼuntaya. Laʼ laj qʼuel jumpʼejl ejemplo bajcheʼ tsiʼ pʌsʌ i pecʼlel. Cheʼ bʌ tsiʼ yʌlʌ chaʼan mi caj i jisan Sodoma, tsiʼ ñaxan choco ti subentel Lot chaʼan miʼ putsʼelob majlel yaʼ ti wits tac. Pero maʼañic tsiʼ jacʼʌ, i tsiʼ cʼajti majlel ti Zóar. ¿Chuqui tsiʼ yʌlʌ Jehová? ¿Tsaʼ ba i wersa xiqʼui majlel yaʼ baqui tsaʼix i ñaxan alʌ? Maʼañic. Tsiʼ mele cheʼ bajcheʼ tsiʼ cʼajti Lot, anquese lon ñaʼtʌbilix i chaʼan chaʼan mi caj i jisan jaʼel ili tejclum (Gn. 19:18-22). Jehová tsiʼ pʌsʌ i pʼuntaya jaʼel cheʼ bʌ tsiʼ yʌlʌ chaʼan mi caj i jisʌntel Nínive, tsiʼ choco majlel Jonás chaʼan miʼ subeñob jiñi chumuloʼ bʌ yaʼi chaʼan mi caj i jisʌntelob. Pero jiñi ninivitajob tsaʼʌch i chaʼ ñaʼtayob i bʌ, jin chaʼan Jehová maʼañix tsiʼ jisa jiñi tejclum (Jon. 3:1, 10; 4:10, 11).

6. ¿Bajcheʼ tsiʼ pʌsʌ Jesús chaʼan mach tsʌtsic miʼ mel i bʌ?

⁶ Jesús lajal bajcheʼ i Tat, cheʼ bʌ tsajñi wʌʼ ti lum mach tsʌtsic tsiʼ mele i bʌ. Anquese tsaʼ chojqui tilel chaʼan miʼ coltan jiñi israelitajoʼ bʌ, jumpʼejl bʌ qʼuin tsiʼ colta juntiquil xʼixic mach bʌ israelitajic. Ili xʼixic tsiʼ cʼajtibe Jesús chaʼan miʼ tsʼʌcʌben i yixicʼal am bʌ i xibʌjlel, i Jesús tsaʼʌch i pʼunta yicʼot tsiʼ colta (Mat. 15:21-28). Laʼ la cʌl yambʌ ejemplo. Cheʼ bʌ Jesús tsaʼix i teche i subtʼan, tsiʼ yʌlʌ: «Mi an muʼ bʌ i jamʌ al tiʼ wut lac piʼʌlob chaʼan mach i cʌñʌyoñic, joñon jaʼel mi caj cʌl [...] chaʼan mach j cʌñʌyic». Pero ¿chuqui tsiʼ mele cheʼ bʌ Pedro uxyajl tsiʼ yʌlʌ chaʼan mach i cʌñʌyic? ¿Tsaʼ ba i ñusʌbe o maʼañic? Tsaʼʌch. Come Jesús yujil chaʼan Pedro tsaʼʌch i chaʼ ñaʼta i bʌ i chaʼan juntiquilʌch xucʼul bʌ wiñic. Jin chaʼan, cheʼ bʌ tsaʼix chaʼ chʼojyi, tsiʼ chaʼ pʌsbe i bʌ Pedro, i tajol tiʼ sube chaʼan miʼ cʼuxbin yicʼot chaʼan tsaʼix i ñusʌbe i mul (Luc. 24:33, 34).

7. Cheʼ bajcheʼ miʼ yʌl Filipenses 4:5, ¿bajcheʼ yilal la com chaʼan mi laj qʼuejlel?

⁷ Tsaʼix laj qʼuele chaʼan Jehová yicʼot Jesús mach tsʌtsobic. ¿Ixcu joñonla? Jehová yom chaʼan mi lac lajiñob (pejcan Filipenses 4:5). Jin chaʼan, wen cheʼ mi laj cʼajtiben  lac bʌ bajcheʼ yilal miʼ qʼueloñobla yañoʼ bʌ: ¿Muʼ ba c wersa al chaʼan cheʼ yom miʼ mejlel cheʼ bajcheʼ mi cʌl? ¿Muʼ ba c tsʌtsʼesan c bʌ tic tʼan? ¿O cʌmbilon chaʼan mic ñʌchʼtan yambʌlob yicʼot mic chʼʌm ti ñuc muʼ bʌ i yʌlob? Mi mucʼʌch lac lajiñob Jehová yicʼot Jesús mi caj lac chaʼlen wersa chaʼan mach tsʌtsoñicla. Jin chaʼan, wʌle mi caj la cʌl chaʼchajp baqui mach cheʼic yomonla bajcheʼ ili: Cheʼ bʌ an chuqui miʼ qʼuextʌyel ti laj cuxtʌlel yicʼot cheʼ mach lajalic mi lac ñaʼtan bajcheʼ yambʌlob.

8. ¿Chuqui miʼ mejlel i coltañonla chaʼan pʼisbilon jachla cheʼ an chuqui miʼ qʼuextʌyel ti laj cuxtʌlel? (Qʼuele jaʼel jiñi nota).

⁸ Cabʌl chuqui miʼ mejlel ti qʼuextʌyel ti laj cuxtʌlel, tajol mi laj cʼamʼan, miʼ tejchel wocol yaʼ baqui chumulonla o wocol chaʼan mi lac taj taqʼuin, ti jimbʌ ora yom pʼisbilonla, mach yomic tsʌtsonla (Ec. 9:11; 1 Cor. 7:31). Cheʼ jaʼel, tajol miʼ qʼuextʌyel jiñi asignación am bʌ lac chaʼan ti jiñi organización. ¿Chuqui miʼ mejlel i coltañonla? Yom mi lac ñaʼtan chaʼan mach chʌn lajalix añonla bajcheʼ ti ñaxan. Cheʼ jaʼel, yom mi lac ñaʼtan chuqui miʼ mejlel lac mel, mi lac ñop lac ñaʼtan chuqui wem bʌ yicʼot mi laj qʼuel chuqui miʼ mejlel lac mel tiʼ tojlel yañoʼ bʌ. b Laʼ laj qʼuel bajcheʼ an i colta iliyi chaʼtiqui uxtiquil hermanojob.

9. ¿Chuqui tsiʼ mele jumpʼejl xñujpuñel chaʼan miʼ mejlel i ñusañob jiñi wocol mach bʌ pijtʌbilic i chaʼañob?

⁹ Mi lac ñaʼtan chaʼan mach chʌn lajalix añonla bajcheʼ ti ñaxan. Jiñʌch tsaʼ bʌ i mele Emanuele yicʼot Francesca, jumpʼejl xñujpuñel misionerojoʼ bʌ. Tsaʼ chojquiyob majlel ti yambʌ país, tsaʼ caji i cʌñob jiñi tʼan yicʼot tsaʼ caji i cʌñob jiñi hermanojob ti congregación. Pero tsaʼ tejchi jiñi pandemia chaʼan COVID-19 i maʼañix tsaʼ mejli i ñochtañob. Cheʼ jaʼel, jiñi i mamá Francesca tsaʼ chʌmi, i anquese wen yom majlel i qʼuel i familia maʼañic tsaʼ mejli tiʼ caj jiñi pandemia. ¿Chuqui tsiʼ colta i lʌtʼ jiñi wocol? Emanuele yicʼot Francesca tsiʼ cʼajtibeyob Jehová i ñaʼtʌbal chaʼan miʼ mejlelob i ñusan jiñi wocol, i Jehová tsaʼʌch i coltayob. Jumpʼejl ejemplo, tsiʼ wen coltayob tsaʼ bʌ i yʌlʌ juntiquil hermano tsaʼ bʌ loqʼui ti jumpʼejl video: «Cheʼ bʌ ora mi lac ñʌmtesan lac bʌ cheʼ bʌ an chuqui miʼ qʼuextʌyel, ñumen ora mi caj lac chaʼ ubin lac tijicñʌyel, i mach wocolic mi caj la cubin chaʼan mi laj qʼuelben i wenlel». c Cheʼ jaʼel, tsiʼ chaʼleyob wersa i ñumen weñʼesañob bajcheʼ miʼ chaʼleñob subtʼan ti teléfono, i tsaʼto i tajayob jumpʼejl estudio. Yambʌ, tsiʼ jacʼʌyob jiñi coltʌntel tsaʼ bʌ i yʌqʼueyob jiñi hermanojob, bajcheʼ tsaʼ bʌ i mele juntiquil hermana wen uts bʌ. Jujumpʼejl qʼuin tsiʼ chocbeyob majlel jumpʼejl texto ti jumpʼejl mensaje, i jumpʼejl jab tsiʼ mele bajcheʼ ili. ¿Chuqui mi laj cʌn? Chaʼan mi mucʼʌch lac ñaʼtan chaʼan mach chʌn lajalix añonla bajcheʼ ti ñaxan mi caj lac sʌclan chuqui miʼ mejlel lac mel, i jiñi mi caj i coltañonla chaʼan tijicñayonla.

10. ¿Chuqui tsiʼ mele juntiquil hermana cheʼ bʌ an chuqui tsaʼ qʼuextʌyi tiʼ cuxtʌlel?

¹⁰ Laʼ lac ñaʼtan chuqui miʼ mejlel lac mel yicʼot chuqui wem bʌ. Jiñʌch tsaʼ bʌ i mele Christina, chumul bʌ ti Japón. Cheʼ bʌ jiñi i congregación inglés tsaʼ jili, tsaʼ cʼaxi ti yambʌ congregación am bʌ ti japonés. Anquese wocolʌch tsiʼ yubi chaʼan miʼ cʌn jiñi tʼan, maʼañic tsiʼ ñaʼta chaʼan ñumen wen bajcheʼ  an ti ñaxan. ¿Chuqui tsiʼ mele? Tsaʼ caji i chaʼlen wersa i cʌn jiñi tʼan yicʼot tsiʼ chaʼle wersa subtʼan. Tsiʼ cʼajtibe juntiquil i piʼʌl ti eʼtel chaʼan miʼ cʌntesan, i tsiʼ cʼʌñʌyob jiñi Biblia yicʼot jiñi libro Ubin a tijicñʌyel. ¿I chuqui tsaʼ ujti? Jiñi xʼixic tsaʼ caji i mulan i cʌn jiñi woli bʌ (choncol bʌ) i qʼuel yaʼ ti libro i tsiʼ teche estudio. Cheʼ jaʼel, Christina tsiʼ ñumen cʌñʌ japonés. ¿Chuqui mi laj cʌn? Mi mach yaʼic mi lac chʌn acʼ lac ñaʼtʌbal ti bajcheʼ añonla ti ñaxan i mi laj qʼuel muʼ bʌ i mejlel lac mel, miʼ mejlel ti ujtel mach bʌ pijtʌbilic lac chaʼan.

11. ¿Chuqui tsiʼ mele jumpʼejl xñujpuñel cheʼ bʌ tsiʼ ñusayob wocol chaʼan taqʼuin?

¹¹ Laʼ lac ñaʼtan muʼ bʌ mejlel lac mel tiʼ tojlel yañoʼ bʌ. Jiñʌch tsaʼ bʌ i mele jumpʼejl xñujpuñel chumuloʼ bʌ ti jumpʼejl país baqui mach librejobic chaʼan miʼ melbeñob i yeʼtel Jehová. Tsaʼ caji wocol yaʼ baqui chumulob, tiʼ sʌtʌyob i yeʼtel i maʼañobix i taqʼuin tsaʼ cʌleyob. ¿Chuqui tsiʼ meleyob? Tsiʼ qʼueleyob chaʼan mach cʼʌñʌlic cabʌl chuqui añob i chaʼan i tsaʼ ñumen cajiyob ti subtʼan (Hech. 20:35). Come maʼañic chuqui miʼ cʌlʌx melob, tsaʼ caji i yʌcʼob tiʼ ñaʼtʌbal chaʼan miʼ ñumen coltañob yañoʼ bʌ, ili tsiʼ coltayob chaʼan maʼañic miʼ wen ñaʼtañob jiñi wocol. ¿Chuqui mi laj cʌn? Chaʼan cheʼ bʌ an chuqui miʼ qʼuextʌyel ti laj cuxtʌlel, yom cʼajal lac chaʼan chaʼan wen ñuc i cʼʌjñibal cheʼ mi laj coltan yañoʼ bʌ, i junchajp bajcheʼ mi lac mel jiñʌch cheʼ maʼañic mi laj cʌy jiñi subtʼan.

12. ¿Bajcheʼ miʼ mejlel i coltañonla jiñi ejemplo chaʼan Pablo ti lac subtʼan?

¹² Mach yomic tsʌtsonla jaʼel ti lac subtʼan, ¿chucoch? Come mach junlajalobic jiñi lac piʼʌlob, qʼuexel bajcheʼ yilalob yicʼot chuqui miʼ ñopob. Jiñʌch tsaʼ bʌ i mele Pablo, chaʼan miʼ tsʼʌctesan jiñi i yeʼtel bajcheʼ apóstol yicʼot miʼ cʼotel tiʼ pusicʼal lac piʼʌlob tsiʼ mele pejtelel chuqui miʼ mejlel i mel. ¿Chucoch? Come mach junlajalobic jiñi lac piʼʌlob tsaʼ bʌ i subeyob wen tʼan, an judíojoʼ bʌ, griegojoʼ bʌ, cʌntesʌbiloʼ bʌ, pʼumpʼuñoʼ bʌ, ñucoʼ bʌ i yeʼtel yicʼot reyob (Rom. 11:13; 1 Cor. 9:19-23). ¿Chuqui mi laj cʌn? Chaʼan yom mi lac ñaʼtan chuqui i cʼʌjñibal i chaʼañob jiñi lac piʼʌlob yicʼot muʼ bʌ i mejlel i coltañob, i jiñʌch la com bʌ lac subeñob cheʼ mi lac chaʼlen subtʼan. Cheʼ bajcheʼ jiñi, ñumen wen mi caj lac ñusan i mi caj laj qʼuelben i wenlel.

13. ¿Baqui bʌ i wenlel cheʼ mi laj qʼuel ti ñuc muʼ bʌ i ñaʼtan yambʌlob? (1 Corintios 8:9).

¹³ Mi mach tsʌtsoñicla mach wocolic mi caj la cubin chaʼan mi laj qʼuel ti ñuc muʼ bʌ i ñaʼtan yambʌlob. Jumpʼejl ejemplo, an hermanajob muʼ bʌ i mulan i boñob i bʌ, pero an yambʌlob maʼañic bʌ. Cheʼ jaʼel, an hermanojob mach bʌ lecojic miʼ qʼuelob cheʼ mi lac tsʼitaʼ jap lembal, pero an maʼañic bʌ miʼ wis japob. I ti lac pejtelel la com laj cʌntan lac bʌ chaʼan cʼocʼ mi la cajñel, pero mach junlajalic bajcheʼ mi lac mel. Mi tsaʼ caji lac wersa xicʼ yambʌlob chaʼan cheʼ miʼ melob bajcheʼ mi lac ñaʼtan miʼ mejlel lac tech wocol yicʼot lac tʼox jiñi congregación. ¡Pero mach jiñic la com bʌ jiñi! (Pejcan 1 Corintios 8:9; 10:23, 24). Mi mucʼʌch lac chʼʌm ti ñuc jiñi principio tac am bʌ ti Biblia, pʼisbilon jachla yicʼot mi caj lac sʌclan jiñi ñʌchʼtʌlel. Laʼ laj qʼuel chaʼchajp bajcheʼ miʼ mejlel lac mel.

14. ¿Chuqui tac ti principio miʼ mejlel i coltañonla lac ñaʼtan bajcheʼ yilal yom mi lac xoj lac pislel yicʼot mi lac chʼʌl lac bʌ?

¹⁴ Lac pislel yicʼot bajcheʼ yilal mi lac chʼʌl lac bʌ. Jehová maʼañic tsiʼ jamʌ alʌ bajcheʼ yilal yom mi lac xoj lac pislel yicʼot mi lac  chʼʌl lac bʌ. Pero tsaʼʌch i yʌqʼueyonla principio tac muʼ bʌ i coltañonla lac ñaʼtan bajcheʼ yom mi lac mel. La com chaʼan tiʼ pejtelel ora mi la cʌqʼuen i ñuclel Jehová. Yom pʼisbilon jachla yicʼot mi laj cʼʌn ti wen lac ñaʼtʌbal chaʼan wen jach bajcheʼ mi lac xoj lac pislel yicʼot mi lac chʼʌl lac bʌ (1 Tim. 2:9, 10; 1 Ped. 3:3). Mach la comic chaʼan jin miʼ ñumen qʼuejlel bajcheʼ yilal lac pislel. Ili jiñʌch muʼ bʌ i coltañob jaʼel jiñi ancianojob chaʼan maʼañic miʼ yʌlob muʼ bʌ i bajñel ñaʼtañob. Laʼcu lac ñaʼtan tsaʼ bʌ ujti ti jumpʼejl congregación. An xcolelob wen pecʼ bʌ tsaʼ caji i yʌcʼob ti setʼol i jol i maʼañic miʼ xibañob cheʼ bʌ miʼ majlelob ti tempa bʌ. Jiñi ancianojob yomob i coltañob come cheʼix woli (yʌquel) i melob bajcheʼ yambʌ lac piʼʌlob, pero maʼañic miʼ ñaʼtañob bajcheʼ yom miʼ melob. Jin chaʼan, jiñi superintendente chaʼan circuito tsiʼ yʌlʌ chuqui miʼ mejlelob ti subentel: «Mi tsaʼqui cʼʌjquiyet ti plataforma i jiñi hermanojob jin jach mi ñumen qʼuelob bajcheʼ yilal xibʌbil a jol, ¿mach ba yomic i yʌl jiñi chaʼan yom maʼ weñʼesan bajcheʼ yilal maʼ xoj a pislel o maʼ chʼʌl a bʌ?». Ili tsaʼʌch i colta jiñi xcolelob i maʼañic tsaʼ jamʌ subentiyob chuqui yom miʼ melob. d

15. ¿Baqui bʌ mandar yicʼot principio tac miʼ mejlel i coltañonla cheʼ bʌ woli lac ñaʼtan bajcheʼ mi caj laj cʌntan lac bʌ chaʼan cʼocʼ mi la cajñel? (Romanos 14:5).

¹⁵ Bajcheʼ mi laj cʌntan lac bʌ chaʼan cʼocʼonla. Jujuntiquil yom miʼ ñaʼtan bajcheʼ mi caj i cʌntan i bʌ chaʼan cʼocʼ miʼ yajñel (Gál. 6:5). Pero cheʼ woli lac ñaʼtan lac chʼʌm jumpʼejl tratamiento yom mi lac chʼʌm ti ñuc muʼ bʌ i yʌl jiñi Biblia chaʼan jiñi chʼichʼ yicʼot chaʼan maʼañic mi laj cʼʌn espiritismo, o chuqui jach ochem tiʼ chaʼan bʌ xibajob (Hech. 15:20; Gál. 5:19, 20). Come mach junlajalic bajcheʼ mi lac mulan lac tsʼʌcan lac bʌ, an  doctor jach bʌ miʼ cʼʌñob i yambʌ miʼ sʌclañob yan tac bʌ tratamiento o tsʼac tac. Jujuntiquil an ti lac wenta mi lac ñaʼtan iliyi, i maʼañic mi caj lac suben yambʌ hermano mi wen o mach weñic jiñi woli bʌ i chʼʌm. Laʼ laj cʼajtesan iliyi: Cojach jiñi i Yumʌntel Dios mi caj i jisan jiñi cʼamʌjel tac (Is. 33:24). Jujuntiquil yom miʼ wen qʼuel mi jiñi bajcheʼ woliʼ cʌntan i bʌ jiñʌch ñumen wem bʌ (pejcan Romanos 14:5). Yambʌ, maʼañic mi caj lac subeñob mi wen o mach weñic woli bʌ i melob, i maʼañic mi caj lac mel muʼ bʌ i yʌcʼob ti yajlel (Rom. 14:13). I mi caj laj qʼuel ti ñuc muʼ bʌ i ñaʼtan i mel jujuntiquil come mi laj cʼuxbin lac bʌ yicʼot la com chaʼan temel mi la cajñel yaʼ ti congregación (Rom. 14:15, 19, 20). Mi cʼajal lac chaʼan iliyi, tijicña mi caj la cajñel la quicʼot jiñi hermanojob yicʼot an ñʌchʼtʌlel yaʼ ti congregación.

16. ¿Bajcheʼ miʼ mejlel i pʌsob jiñi ancianojob chaʼan pʼisbilob jach? (Qʼuele jaʼel jiñi foto tac).

¹⁶ Jiñi ancianojob yom miʼ pʌsob wem bʌ ejemplo yicʼot yom pʼisbilob jach, maʼañic miʼ tsʌtsʼesañob i bʌ tiʼ tʼan (1 Tim. 3:2, 3). Juntiquil anciano maʼañic mi caj i ñaʼtan chaʼan tiʼ pejtelel ora cheʼ yom miʼ mejlel bajcheʼ miʼ yʌl, chaʼan jach ñumen añix i jabilel bajcheʼ yambʌlob. Yujil chaʼan jiñi chʼujul bʌ espíritu majqui jach miʼ mejlel i cʼʌn ti jiñi ancianojob chaʼan miʼ ñaʼtʌntel chuqui yom bʌ miʼ mejlel. I mi maʼañic miʼ ñusan ti pʼis jumpʼejl principio am bʌ ti Biblia, jiñi yambʌ ancianojob mi caj i melob bajcheʼ tsaʼ ajli anquese mach lajalic bajcheʼ miʼ ñaʼtañob.

17. ¿Chuqui ti bendición mi caj lac taj mi mach tsʌtsoñicla?

¹⁷ Mi mach tsʌtsoñicla mi lac taj cabʌl bendición. Jumpʼejl ejemplo, wen mi caj la cajñel la quicʼot jiñi hermanojob yicʼot an ñʌchʼtʌlel ti congregación. I anquese mach junlajalic bajcheʼ yilalonla, tijicñayonla, i jiñʌch ñumen ñuc bʌ i cʼʌjñibal come woli lac lajin Jehová, juntiquil Dios mach bʌ tsʌtsic.