1, 2. ¿Chucoch miʼ mejlel la cʌl chaʼan lajalonla bajcheʼ jiñi chan bʌ edificio? (1 Corintios 15:58).

 TI 1978 tsaʼ mejli wen chan bʌ edificio yaʼ ti Tokio (Japón). Jiñi lac piʼʌlob tsiʼ cʼajtibeyob i bʌ mi maʼañic mi caj i yajlel cheʼ bʌ miʼ ñumel yujquel lum, i machʌch añic tsaʼ yajli cheʼ bʌ tsaʼ ñumi jumpʼejl. ¿Chucoch? Come wen bajcheʼ tsiʼ melbeyob i yebal, i miʼ mejlel la cʌl jaʼel chaʼan lajalonla bajcheʼ jiñi edificio. ¿Chucoch cheʼ mi la cʌl bajcheʼ jiñi?

² Jiñi muʼ bʌ i melben i yeʼtel (troñel) Jehová yom xucʼul, pero mach tsʌtsic miʼ mel i bʌ (pejcan 1 Corintios 15:58). Miʼ pʌs i xucʼtʌlel cheʼ bʌ miʼ jacʼben i mandar tac Jehová, pero pʼisbil jach come mach tsʌtsic miʼ mel i bʌ i mach ñumeñic ti pʼis chuqui miʼ ñaʼtan (Filip. 4:5). Ti ili estudio mi caj laj qʼuel baqui ora yom mi lac pʌs lac xucʼtʌlel. Cheʼ jaʼel, mi caj laj qʼuel joʼpʼejl yac muʼ bʌ i cʼʌn Satanás chaʼan miʼ ñop i yʌsañonla i chuqui yom mi lac mel chaʼan chʌn xucʼulonla.

3. ¿Chuqui ti mandar miʼ yʌqʼueñonla Jehová ti Hechos 15:28, 29?

³ Jehová jiñʌch jiñi ñuc bʌ juez, jin chaʼan jamʌ tsiquil miʼ yʌqʼuen mandar jiñi i wiñicob (Is. 33:22). Jiñi junmojt muʼ  bʌ i pʌsob bij ti ñaxam bʌ siglo tsiʼ yʌlʌ uxchajp baqui yom miʼ pʌsob i xucʼtʌlel jiñi xñoptʼañob: Chaʼan mach yomic mi lac chʼujutesan mach bʌ i sujmic dios, chaʼan yom chʼujul mi laj qʼuel jiñi chʼichʼ i chaʼan mach yomic mi lac yajlel ti tsʼiʼlel (pejcan Hechos 15:28, 29). ¿Chuqui yom mi lac mel chaʼan mi lac jacʼ ili uxchajp tsaʼix bʌ la cʌlʌ?

4. ¿Chuqui yom i yʌl cheʼ cojach Jehová yom mi lac chʼujutesan? (Apocalipsis 4:11).

⁴ Maʼañic mi lac chʼujutesan mach bʌ i sujmic dios, cojach Jehová. Jiñʌch tsaʼ bʌ subentiyob jiñi israelitajob ti wajali (Dt. 5:6-10). Cheʼ bʌ Satanás tiʼ sube Jesús chaʼan miʼ chʼujutesan, tsiʼ jacʼbe: «Chʼujutesan jiñi a Dios Jehová i jin jach yom maʼ melben i yeʼtel» (Mat. 4:8-10). Jin chaʼan, maʼañic mi lac chʼujutesan imagen tac mi muqʼuicto laj qʼuelob bajcheʼ dios jiñi lac piʼʌlob wen cʌmbiloʼ bʌ, bajcheʼ jiñi añoʼ bʌ i yeʼtel ti ñopbalʌl, políticojob, xʼalasob, xcʼayob o yambʌlob. Cojach mi lac chʼujutesan Jehová, tsaʼ bʌ i mele (pʌtʌ) pejtelel chuqui an (pejcan Apocalipsis 4:11).

5. ¿Chucoch chʼujul mi laj qʼuel jiñi chʼichʼ?

⁵ Chʼujul mi laj qʼuel jiñi chʼichʼ. ¿Chucoch? Come yaʼʌch an laj cuxtʌlel, i jiñi laj cuxtʌlel jumpʼejlʌch wen ñuc bʌ lac majtan tsaʼ bʌ i yʌqʼueñonla Jehová (Lv. 17:14). Cheʼ bʌ Jehová tsiʼ yʌlʌ chaʼan muqʼuix i mejlel ti cʼuxtʌl jiñi añimal tac, tsiʼ yʌlʌ jaʼel chaʼan mach yomic miʼ cʼuxbentel i chʼichʼel (Gn. 9:4). Jiñʌch tsaʼ bʌ subentiyob jaʼel jiñi israelitajob cheʼ bʌ tsaʼ aqʼuentiyob jiñi mandar tac (Lv. 17:10). Cheʼ ti ñaxam bʌ siglo, jiñi junmojt muʼ bʌ i pʌsob bij tsiʼ yʌlʌyob chaʼan miʼ ticʼob i bʌ chaʼan maʼañic miʼ cʼuxob jiñi chʼichʼ (Hech. 15:28, 29). I joñonla jaʼel yom mi lac chʼʌm ti ñuc ili mandar i mi laj cʌntan lac bʌ chaʼan maʼañic mi la cotsʌbentel chʼichʼ. b

6. ¿Chuqui mi caj i coltañonla chaʼan maʼañic mi lac yajlel ti tsʼiʼlel?

⁶ Yom mi lac chaʼlen wersa chaʼan maʼañic mi lac yajlel ti tsʼiʼlel (Heb. 13:4). Jiñi apóstol Pablo tsiʼ yʌcʼʌ ili ticʼojel: «Tsʌnsanla jiñi laʼ bʌcʼtal chaʼan maʼañic mi laʼ yajlel ti tsʼiʼlel». Ili tʼan tac miʼ yʌqʼueñonla laj qʼuel chaʼan ti ora yom mi lac locʼsan ti lac pensar jiñi mach tac bʌ weñic. Jumpʼejl ejemplo, maʼañic mi caj laj qʼuel o lac mel jiñi muʼ bʌ i techbeñonla leco bʌ lac pensar (Col. 3:5; Job 31:1). ¿Chuqui yom mi lac mel? Ti orajach yom mi lac putsʼtan come miʼ mejlel i ñajtʼesañonla ti Jehová.

7. ¿Chuqui yom mi lac mel, i chucoch?

⁷ Jehová yom chaʼan mi lac jacʼben i tʼan ti jumpʼejl lac pusicʼal (Rom. 6:17). Maʼañic miʼ mejlel laj qʼuextan i mandar tac i la cujil chaʼan lac wenlelʌch cheʼ mi lac jacʼ (Is. 48:17, 18; 1 Cor. 6:9, 10). I come la com lac tijicñesan Jehová cheʼʌch mi la cʌl bajcheʼ jiñi salmista: «Tsaʼix cʌcʼʌ c pusicʼal chaʼan mic jacʼbeñet a mandar ti pejtelel ora, cʼʌlʌl mic chʌmel» (Sal. 119:112). Pero Satanás mach yomic chaʼan xucʼulonla ti Jehová, jin chaʼan miʼ ñop i yʌsañonla. ¿Bajcheʼ miʼ mel?

8. ¿Bajcheʼ miʼ cʼʌn Satanás jiñi contrajintel?

⁸ Jiñi contrajintel. Satanás miʼ cʼʌn jiñi contrajintel chaʼan miʼ ñop i ñajtʼesañonla ti Jehová, tajol mi lac jajtsʼel o an chuqui tac yambʌ mi lac tumbentel (1 Ped. 5:8). Cheʼʌch tsaʼ ujti tiʼ tojlel jiñi xñoptʼañob ti wajali, tsaʼ chʼʌjquiyob, tsaʼ jajtsʼiyob i tsaʼto tsʌnsʌntiyob  (Hech. 5:27, 28, 40; 7:54-60). I cheʼʌch woli (choncol) i bej ujtel ili ora, cabʌl hermanojob ti Rusia yicʼot ti yan tac bʌ país woliʼ ticʼlʌntelob. I tiʼ petol pañimil cabʌl hermanojob añʌch bajcheʼ woli (yʌquel) i tajob i contrajintel.

9. ¿Chucoch yomʌch yʌxʌl la co chaʼan jiñi yan tac bʌ i yac Satanás? Acʼʌ jumpʼejl ejemplo.

⁹ Yac tac mach bʌ wen tsiquilic. Satanás mach cojach miʼ cʼʌn jiñi contrajintel, an tacʌch yambʌ muʼ bʌ i cʼʌn chaʼan miʼ ticʼlañonla (Efes. 6:11). Laʼ laj qʼuel jumpʼejl ejemplo. Laʼ lac ñaʼtan tiʼ tojlel Bob, cheʼ bʌ yaʼan ti hospital chaʼan miʼ melbentel jumpʼejl operación tsiʼ wʌn sube jiñi doctorob chaʼan maʼañic mi caj i chʼʌm chʼichʼ, i jiñi doctor tsiʼ yʌlʌ chaʼan maʼañic i wocolel. Pero cheʼ bʌ an jax yom jumpʼejl acʼʌlel chaʼan miʼ melbentel jiñi operación, tsaʼ tili yambʌ doctor i tiʼ sube chaʼan yaʼ mi caj i yajñel yicʼot jiñi chʼichʼ mi tsaʼ ujti jumpʼejl wocol. Tsiʼ ñaʼta chaʼan mucʼʌch caj i jacʼ i chʼʌm come mach yaʼix an i familia. Pero Bob tsiʼ yʌlʌ chaʼan mach yʌlʌyic chuqui miʼ yujtel mach yomic chaʼan miʼ yotsʌbentel chʼichʼ.

10. ¿Chucoch mach yomic mi lac ñop muʼ bʌ i ñaʼtañob jiñi lac piʼʌlob? (1 Corintios 3:19, 20).

¹⁰ I ñaʼtʌbal ili pañimil. Jiñi lac piʼʌlob miʼ yʌlob chaʼan miʼ mejlel lac mel chuqui jach la com, mi cheʼ tsaʼ caji lac ñaʼtan jaʼel mi caj lac ñusan ti pʼis jiñi i mandar tac Jehová (pejcan 1 Corintios 3:19, 20). Jiñʌch tsaʼ bʌ ujti ti Pérgamo yicʼot Tiatira. An xñoptʼañob lajalix bʌ tsaʼ caji i ñaʼtañob bajcheʼ jiñi lac piʼʌlob muʼ bʌ i chʼujutesañob melbil tac jach bʌ Dios yicʼot muʼ bʌ i melob tsʼiʼlel. Jin chaʼan, Jesús tsiʼ tiqʼui jiñi congregación tac come mach lecojix woliʼ qʼuelob jiñi tsʼiʼlel (Apoc. 2:14, 20). Cheʼʌch woliʼ yujtel ili ora, tajol jiñi lac familia o laj cʌñʌyoʼ bʌ miʼ subeñoñobla chaʼan maʼañic i wocolel cheʼ mi lac mel chuqui jach la com anquese mi lac ñusʌben ti pʼis i mandar tac Jehová, come miʼ ñaʼtañob chaʼan maʼañix i cʼʌjñibal muʼ bʌ i yʌl jiñi Biblia.

11. ¿Chuqui jiñi mach bʌ yomic mi lac mel?

¹¹ An i tajol mi la cʌqʼuentel instrucción tac mach bʌ wen tsiquilic mi la cubin i la comto chaʼan mi lac ñumen tsictesʌbentel. Pero jiñi Biblia miʼ yʌl chaʼan cojach yom mi lac mel jiñi tsʼijbubil bʌ (1 Cor. 4:6). Wajali, cheʼ tiʼ yorajlel Jesús, jiñi ñucoʼ bʌ i yeʼtel ti jiñi ñopbalʌl tac tsiʼ bajñel acʼʌyob i mandar i jiñi lac piʼʌlob ñumen wocol tsiʼ yubiyob chaʼan miʼ jacʼob (Mat. 23:4). Pero Jehová jamʌ tsiquil chuqui tac miʼ subeñonla tiʼ Tʼan yicʼot tiʼ tojlel i yorganización. Jin chaʼan, maʼañic mi la cʌl chuqui mi lac bajñel ñaʼtan mach bʌ chuculic ti Biblia (Pr. 3:5-7).

12. ¿Chuqui miʼ cʼʌn Satanás chaʼan miʼ puc lot tac?

¹² Ñaʼtʌbalʌl tac mach bʌ i sujmic. Satanás miʼ cʼʌn jiñi «ñaʼtʌbalʌl tac mach bʌ i sujmic i maʼañic bʌ i cʼʌjñibal» yicʼot jiñi «ñuc bʌ i cʼʌjñibal i chaʼan jiñi pañimil» chaʼan miʼ lotiñonla yicʼot miʼ tʼoxonla (Col. 2:8). Jumpʼejl ejemplo, cheʼ ti ñaxam bʌ siglo Satanás tsiʼ cʼʌñʌ i ñaʼtʌbal jiñi lac piʼʌlob, jiñi i bajñel cʌntesa jiñi judíojob yicʼot cheʼ an muʼ bʌ i ñaʼtañob chaʼan yomto miʼ bej jajqʼuel jiñi mandar tac. Pero pejtelel iliyi mach i sujmic i tsaʼ jach i ñajtʼesayob ti Jehová. Ili ora Satanás miʼ cʼʌn jiñi televisión yicʼot jiñi internet chaʼan miʼ puc jiñi lot tac yicʼot miʼ tech tʼan tiʼ contra jiñi organización, i jiñʌch tsaʼ bʌ ujti ti jiñi pandemia chaʼan COVID-19. c Jiñi tsaʼ bʌ i ñopoyob ili lot tac tsiʼ tajayob wocol, pero jiñi maʼañic bʌ tsiʼ ñopoyob i tsaʼʌch i cʌntayob i bʌ mach cheʼic tsaʼ ujtiyob (Mat. 24:45).

13. ¿Chucoch yomʌch mi laj cʌntan lac bʌ chaʼan maʼañic chuqui miʼ chilbeñonla lac tiempo?

 ¹³ Muʼ bʌ i chilbeñonla lac tiempo. Mach yomic miʼ ñajʌyel lac chaʼan «jiñi ñumen ñuc bʌ i cʼʌjñibal» (Filip. 1:9, 10). Ti jujumpʼejl qʼuin an cabʌl chuqui mi lac mel muʼ bʌ i mejlel i chilbeñonla lac tiempo, bajcheʼ jiñi cʼux waj, ñusaqʼuin yicʼot jiñi eʼtel, i tajol maʼañix mi caj lac mel jiñi ñumen ñuc tac bʌ i cʼʌjñibal (Luc. 21:34, 35). Cheʼ jaʼel, jiñi lac piʼʌlob miʼ wen ñusañob qʼuin i yʌlob chuqui tac miʼ yujtel ti pañimil (mulawil) o chaʼan tac bʌ política. Joñonla mach yomic mi lac tech la cotsan lac bʌ yaʼi o mi lac tech lac ñaʼtan ti lac pusicʼal. Satanás miʼ cʼʌn ili joʼchajp tsaʼ bʌ laj qʼuele chaʼan mach xucʼulic mi la cajñel. Jin chaʼan laʼ laj qʼuel chuqui mi caj i coltañonla.

14. ¿Chuqui miʼ mejlel i coltañonla chaʼan xucʼul mi la cajñel ti Jehová?

¹⁴ Laʼ lac ñaʼtan chucoch tsaʼ la cʌcʼʌ lac bʌ ti Jehová yicʼot tsaʼ lac chʼʌmʌ jaʼ. Tsaʼ mele iliyi chaʼañʌch a wom a chʼujutesan Jehová. Cʼajtesan chuqui tsiʼ coltayet a ñop chaʼan jiñi woli bʌ a cʌn jiñʌch i sujmlel. Tsaʼ cʼoti a cʌn Jehová, tsaʼ caji a qʼuel ti ñuc i tsaʼ cʼoti a cʼuxbin. Cheʼ jaʼel, tsaʼ pʼʌtʼa jiñi a ñopoñel i jiñʌch tsaʼ bʌ i coltayet a chaʼ ñaʼtan a bʌ. Tsaʼ cʌyʌ a mel muʼ bʌ i tsʼaʼlen Jehová i tsaʼ caji a mel chuqui miʼ mulan, i wen tijicña tsaʼ wubi a bʌ come a wujil chaʼan tsaʼix i ñusʌbeyet a mul (Sal. 32:1, 2). Cheʼ jaʼel, tsaʼ cajiyet ti majlel ti tempa bʌ yicʼot ti subtʼan. Ili ora, chʼʌmbilix a chaʼan jaʼ i woli a chaʼlen xʌmbal ti jiñi bij chaʼan bʌ cuxtʌlel (Mat. 7:13, 14).

15. ¿Bajcheʼ miʼ coltañonla cheʼ mi lac pejcan i Tʼan Dios yicʼot mi lac wen ñaʼtan muʼ bʌ i yʌl?

¹⁵ Yom mi lac pejcan i Tʼan Dios i mi lac wen ñaʼtan muʼ bʌ i yʌl. Juntejc teʼ tam bʌ ochem i wiʼ ti lum maʼañic mi caj i yajlel. Joñonla jaʼel cheʼ yomonla bajcheʼ jiñi teʼ, chaʼan xucʼul mi la cajñel yom pʼʌtʌl lac ñopoñel. Cheʼ bʌ miʼ ñumen colel majlel jiñi teʼ jiñi i wiʼ miʼ ñumen ochel majlel ti lum. I cheʼʌch joñonla jaʼel, cheʼ bʌ mi lac pejcan jiñi Biblia yicʼot mi  lac wen ñaʼtan muʼ bʌ i yʌl miʼ ñumen pʼʌtʼan lac ñopoñel, mi lac ñumen ñop Jehová i mi lac ñop chaʼan jiñi i cʌntesa tac jiñʌch ñumen wem bʌ (Col. 2:6, 7). Laʼ lac wen ñaʼtan bajcheʼ jiñi i wiñicob Dios ti wajali tsiʼ tajayob i wenlel cheʼ tsiʼ jacʼʌyob tsaʼ bʌ subentiyob. Laʼcu lac ñaʼtan tiʼ tojlel Ezequiel, Jehová tsiʼ yʌqʼue i qʼuel bajcheʼ juntiquil ángel woliʼ pʼis jiñi templo. Jiñi tsaʼ bʌ i qʼuele tsiʼ wen pʼʌtʼesʌbe i ñopoñel. Pero mach cojach jiñi, miʼ pʌsbeñonla jaʼel bajcheʼ yom mi lac chʼujutesan Jehová ili ora (Ez. 40:1-4; 43:10-12). d Cheʼ mi la cʌqʼuen i yorajlel chaʼan mi lac tsajin (wen qʼuel) yicʼot mi lac wen ñaʼtan jiñi tema tac am bʌ ti Biblia wocol bʌ ti chʼʌmbentel i sujm mucʼʌch caj i wen coltañonla.

16. ¿Bajcheʼ tsiʼ colta Bob jiñi i xucʼtʌlel i pusicʼal? (Salmo 112:7).

¹⁶ Yom xucʼul lac pusicʼal. Jiñi rey David tsiʼ yʌlʌ chaʼan tiʼ pejtelel ora mi caj i cʼuxbin Jehová. Ti jumpʼejl cʼay tiʼ sube: «C Dios, wen xucʼul c pusicʼal» (Sal. 57:7). Joñonla jaʼel la com lac ñop Jehová ti jumpʼejl lac pusicʼal (pejcan Salmo 112:7). Jiñʌch tsaʼ bʌ i mele Bob. Cheʼ bʌ jiñi yambʌ doctor tsaʼ tili i suben chaʼan mi caj i chajpañob i bʌ yicʼot jiñi chʼichʼ ame añic chuqui miʼ yujtel, Bob tsiʼ jacʼʌ: «Mi tsaʼ j qʼuele chaʼan muqʼuix caj laʼ wotsʌbeñon chʼichʼ yilal, ti ora mi caj c loqʼuel». I miʼ bej al: «Maʼañic tsaʼ c bʌcʼña, mach yʌlʌyic chuqui miʼ yujtel».

17. ¿Chuqui mi laj cʌn tiʼ tojlel Bob? (Qʼuele jaʼel jiñi foto tac).

¹⁷ Bob maʼañic tsiʼ pijta chaʼan jinto cheʼ yaʼix an ti hospital miʼ ñaʼtan chuqui yom miʼ mel. Come xucʼul yom ajñel ti Jehová tsiʼ wʌn chajpa i bʌ. ¿Chuqui tsiʼ colta? Ñaxam bʌ, jiñʌch cheʼ yom i tijicñesan Jehová. Cheʼ jaʼel, tsiʼ pejca muʼ bʌ i yʌl jiñi Biblia yicʼot lac jun tac chaʼan bajcheʼ yilal yom mi laj qʼuel jiñi chʼichʼ. I yambʌ, yujil chaʼan Jehová mi caj i yʌqʼuen i bendición mi mucʼʌch i jacʼben i tʼan. Joñonla jaʼel xucʼul mi lac mejlel ti ajñel mach yʌlʌyic chuqui ti wocol mi lac ñusan.

18. ¿Chuqui mi laj cʌn tiʼ tojlel Barac? (Qʼuele jiñi dibujo am bʌ tiʼ tejchibal).

 ¹⁸ Laʼ lac wen ñop Jehová. Jiñʌch tsaʼ bʌ i mele Barac, tsiʼ jacʼʌ tsaʼ bʌ i sube Jehová i weñʌch tsaʼ loqʼui tsaʼ bʌ i mele. Jehová tiʼ sube chaʼan miʼ majlel i contrajiñob Sísara, pero jiñi israelitajob maʼañic chuqui miʼ cʼʌñob ti guerra i Sísara yicʼot jiñi cananeojob wen chajpʌbilob (Jue. 5:8). Cheʼ bʌ Barac yicʼot i wiñicob yaʼix añob ti jiñi wits Tabor, Débora tiʼ subeyob chaʼan miʼ jubelob majlel yaʼ ti joctʌl, i tsaʼʌch i jacʼʌ anquese yaʼi mach i mʌlʌyobic (jotoyobic) yilal, ¿chucoch? Come Sísara an i chaʼan 900 carreta chaʼan guerra i mach wocolic miʼ mejlel i mʌlob. Pero mach cheʼic tsaʼ ujti, come Jehová tsiʼ choco tilel jaʼal i yaʼ tsaʼ cʌyle ti ocʼol jiñi carreta tac (Jue. 4:1-7, 10, 13-16). I cheʼʌch mi caj i yujtel ti lac tojlel jaʼel, Jehová mi caj i coltañonla mi mucʼʌch lac ñop tiʼ tojlel yicʼot mi mucʼʌch lac jacʼ muʼ bʌ i subeñonla tiʼ yorganización (Dt. 31:6).

19. ¿Chucoch a wom a chʌn pʌs a xucʼtʌlel?

¹⁹ Cheʼ bʌ wʌʼto añonla ti ili pañimil yomto mi lac chaʼlen wersa chaʼan xucʼul mi la cajñel (1 Tim. 6:11, 12; 2 Ped. 3:17). Mach laj cʌy chaʼan jiñi joʼpʼejl i yac Satanás miʼ yʌsañonla (Efes. 4:14). Laʼ lac chʌn cʼuxbin Jehová yicʼot laʼ lac jacʼben i tʼan. Cheʼ jaʼel, yom pʼisbilon jachla ti chuqui mi lac mel. Jehová yicʼot Jesús jiñobʌch wem bʌ ejemplo chaʼan iliyi, maʼañic miʼ ñumelob ti pʼis. Ti yambʌ estudio mi caj laj qʼuel bajcheʼ miʼ mejlel lac lajiñob.