1, 2. a) Cheʼ bajcheʼ tsiʼ yʌlʌ Jesús, ¿chuqui mach bʌ yomic mi lac ñaʼtan? b) ¿Chucoch jiñi xcʌntʼañob tsiʼ bajñel cʌyʌyob Jesús? (Qʼuele jaʼel jiñi foto tac).

 «WEÑɅCH chuqui la com lac mel, pero cʼun jiñi lac bʌcʼtal» (Mat. 26:41b). Cheʼ bʌ Jesús tsiʼ yʌlʌ ili tʼan tac, tsiʼ pʌsʌ chaʼan yujil chaʼan xmulilonla yicʼot miʼ mejlel lac taj lac sajtemal, pero cheʼ jaʼel Jesús woli (choncol) i ticʼonla chaʼan maʼañic mi lac ñaʼtan chaʼan wen pʼʌtʌlonla i maʼañic baʼ ora mi caj lac mel mach bʌ weñic. Ti jimbʌ ora jiñi xcʌntʼañob i chaʼan tsaʼix i ñaxan alʌyob chaʼan maʼañic ba ora mi caj i bajñel cʌyob (Mat. 26:35). Weñʌch chuqui yomob i mel, pero maʼañic tsiʼ ñaʼtayob chaʼan cheʼ bʌ an chuqui tsʌts bʌ woli lac ñusan mi lac mejlel ti cʼunʼan i mi lac mel mach bʌ weñic. Jin chaʼan, Jesús tiʼ subeyob: «Yom chʌn yʌxʌl laʼ wo yicʼot chʌn chaʼlenla oración chaʼan maʼañic mi laʼ yajlel ti mulil» (Mat. 26:41a).

² ¿Chuqui tsiʼ meleyob jiñi xcʌntʼañob cheʼ bʌ tsaʼ chujqui Jesús? Tsiʼ bajñel cʌyʌyob anquese tsaʼix i lon alʌyob chaʼan maʼañic mi caj i melob jiñi. ¿I chucoch cheʼ tsaʼ ujti? Come mach chajpʌbilobic, mach yʌxʌlobic i yo tsaʼ ajñiyob (Mat. 26:56).

3. a) Mi xucʼul la com ajñel ti Jehová ¿chucoch mach yomic mi lac ñaʼtan chaʼan maʼañic baʼ ora mi caj lac yajlel ti mulil? b) ¿Chuqui mi caj laj qʼuel ti ili estudio?

³ Ti lac pejtelel xucʼul la com ajñel tiʼ tojlel Jehová i mach la comic chaʼan an chuqui miʼ ñajtʼesañonla tiʼ tojlel. Pero mach yomic mi la cʌl chaʼan maʼañic ba ora mi caj lac yajlel ti mulil come luʼ xmulilonla i miʼ mejlel ti tilel mach bʌ weñic ti lac pusicʼal (Rom. 5:12; 7:21-23). An chuqui miʼ mejlel ti ujtel  o miʼ waʼ pʌs i bʌ muʼ bʌ i mejlel i yʌcʼonla ti mulil. Jin chaʼan, mi la com chaʼan xucʼul mi la cajñel ti Jehová yicʼot tiʼ tojlel Jesús, yom mi lac jacʼ jiñi ticʼojel: Yom chʌn yʌxʌl la co. I jiñʌch muʼ bʌ caj laj qʼuel ti ili estudio. Ñaxan, mi caj laj qʼuel baqui tac yom mi laj cʌntan lac bʌ. Cheʼ jiñi, mi caj laj qʼuel bajcheʼ miʼ mejlel laj cʌntan lac bʌ. I ti wiʼil, chuqui yom mi lac mel chaʼan mi lac chʌn cʌntan lac bʌ.

LAʼ LAC ÑAʼTAN BAQUI BɅ LAJ CʼUNLEL I LAʼ LAJ CɅNTAN LAC BɅ

4, 5. ¿Chucoch yom mi laj cʌntan lac bʌ chaʼan maʼañic mi lac mel jiñi mulil tac mach bʌ wen tsʌtsic?

⁴ An mulil tac mach bʌ wen tsʌtsic, pero mucʼʌch i mejlel i ñajtʼesañonla tiʼ tojlel Jehová. Cheʼ jaʼel, miʼ mejlel i yʌcʼonla ti ñumen tsʌts bʌ mulil.

⁵ Mach junlajalic jiñi laj cʼunlel, jin chaʼan mach junlajalic muʼ bʌ i mejlel i yʌcʼonla ti mulil. Jumpʼejl ejemplo, tajol an woli bʌ (yʌquel bʌ) i chaʼleñob wersa chaʼan maʼañic miʼ chaʼleñob tsʼiʼlel. I an yambʌ wocol bʌ miʼ yubiñob chaʼan maʼañic miʼ chaʼleñob i bʌ ti masturbar o chaʼan maʼañic miʼ qʼuelob pornografía. I an woli bʌ i chaʼleñob wersa jaʼel chaʼan mach ti orajic miʼ michʼañob, chaʼan maʼañic miʼ qʼuelob i bʌ ti ñuc yicʼot chaʼan maʼañic miʼ bʌcʼñañob chuqui miʼ yʌlob yambʌlob. Jin chaʼan, Santiago tsiʼ yʌlʌ: «Jujuntiquil miʼ qʼuelbentel i pusicʼal cheʼ miʼ pʌjyel i miʼ chujquel ti chuqui bajñel yom i pusicʼal» (Sant. 1:14).

6. ¿Chuqui yom mi lac ñaʼtan?

⁶ ¿A wujil ba baqui bʌ a cʼunlel? Mach weñic mi tsaʼ lac ñaʼta chaʼan maʼañic laj cʼunlel, chaʼan wen pʼʌtʌl añonla ti Jehová, i chaʼan maʼañic baʼ ora mi caj lac yajlel (1 Juan 1:8). Cʼajtesan chaʼan Pablo tiʼ sube jiñi hermanojob añobix bʌ i ñaʼtʌbal chaʼan yom miʼ cʌntañob i bʌ jaʼel chaʼan maʼañic miʼ yajlelob ti mulil (Gál. 6:1). Jin chaʼan, yomʌch mi lac wen qʼuel lac bʌ i mi lac ñaʼtan baqui bʌ jiñi laj cʼunlel (2 Cor. 13:5).

7. ¿Baqui yom mi lac ñumen cʌntan lac bʌ? Acʼʌ jumpʼejl ejemplo.

⁷ Mi tsaʼix laj qʼuele baqui bʌ laj cʼunlel, ¿chuqui yom mi lac mel? ¡Yom mi lac ñumen cʌntan lac bʌ! Laʼcu lac ñaʼtan iliyi: Ti wajali, ¿baqui miʼ ñumen cʌntʌntel jumpʼejl tejclum? Jiñʌch ti puerta tac come yaʼʌch baqui miʼ mejlel ti ochel jiñi i contrajob. I cheʼʌch yom mi lac mel jaʼel, yom mi lac ñumen cʌntan lac bʌ baqui la cujil chaʼan an laj cʼunlel (1 Cor. 9:27).

 ¿CHUQUI YOM MI LAC MEL CHAʼAN MAʼAÑIC MI LAC YAJLEL TI MULIL?

8, 9. ¿Chuqui i wentʌlel tsiʼ mele jiñi chʼiton muʼ bʌ i yʌjlel ti capítulo 7 chaʼan Proverbios chaʼan maʼañic miʼ yajlel ti mulil? (Proverbios 7:8, 9, 13, 14, 21).

⁸ ¿Chuqui yom mi lac mel chaʼan maʼañic mi lac yajlel ti mulil? Laʼ laj qʼuel chuqui mi laj cʌn ti jiñi capítulo 7 chaʼan Proverbios. Yaʼi miʼ yʌjlel juntiquil chʼiton tsaʼ bʌ ochi yicʼot juntiquil xʼixic muʼ bʌ i chaʼlen tsʼiʼlel. Jiñi versículo 22 miʼ yʌl chaʼan cheʼ jach «miʼ bʌcʼ pʌjyel majlel». Pero jiñi yambʌ versículo tac miʼ pʌs chaʼan an tacʌch chuqui tsiʼ mele tsaʼ bʌ i pʌyʌ majlel ti mulil.

⁹ ¿Chuqui tsiʼ mele ili chʼiton? Ñaxan, acʼʌlel woli ti xʌmbal i yaʼ tsaʼ ñumi lʌcʼʌ baqui an i yotot ili xʼixic. Ti wiʼil, tiʼ xʌñʌ ochel tiʼ bijlel i yotot (pejcan Proverbios 7:8, 9). I yaʼi, cheʼ bʌ tsiʼ qʼuele jiñi xʼixic, i wentʌlel tsaʼ chaʼ sujti tiʼ pat. Pero mach cheʼic tsiʼ mele, tsaʼto i ñumen lʌcʼtesa i bʌ tiʼ tojlel i tsiʼ yʌcʼʌ i bʌ ti tsʼujtsʼuntel. Cheʼ jiñi, jiñi xʼixic tsaʼ caji i suben chaʼan tsaʼix i yʌqʼue i majtan Dios chaʼan miʼ yʌqʼuen i ñaʼtan chaʼan wem bʌ xʼixic, i jiñi chʼiton tsaʼʌch i ñʌchʼtʌbe i tʼan (pejcan Proverbios 7:13, 14, 21). Machic tsiʼ mele jiñi chʼiton bajcheʼ iliyi, maʼañic tsiʼ chaʼle mulil.

10. Cheʼ bajcheʼ tsaʼ ujti tiʼ tojlel jiñi chʼiton muʼ bʌ i yʌjlel ti Proverbios, ¿chuqui miʼ mejlel ti ujtel jaʼel ili ora?

¹⁰ Ili relato miʼ pʌs chaʼan majqui jach miʼ mejlel ti ujtel bajcheʼ jiñi chʼiton. Tajol an majqui miʼ chaʼlen mulil i miʼ yʌl chaʼan maʼañic miʼ ñaʼtan bajcheʼ tsaʼ ujti. Tajol miʼ yʌl: «Mach tsajalic c chaʼan, ti orajach tsaʼ laj ujti». Pero mi tsiʼ chaʼ wen ñaʼta, mi caj i qʼuel chaʼan an tacʌch chuqui tsiʼ mele tsaʼ bʌ i yʌcʼʌ ti mulil. Tajol tsaʼ caji i ñochtan jiñi mach bʌ weñobic i melbal (chaʼlibal), tsaʼ caji i qʼuel chuqui tac mach bʌ weñic o tsaʼ caji ti ochel baqui mach yomic miʼ yochel juntiquil xñoptʼan. Tajol tsiʼ cʌyʌ i mel oración yicʼot i pejcan jiñi Biblia, o tsiʼ cʌyʌ majlel ti tempa bʌ o ti subtʼan. Cheʼ bajcheʼ tsaʼ ujti tiʼ tojlel jiñi chʼiton muʼ bʌ i yʌjlel ti Proverbios, tsiquil chaʼan cheʼ an majqui miʼ chaʼlen mulil mach toʼol cheʼic jach miʼ yujtel.

11. Mi mach la comic lac chaʼlen mulil, ¿chuqui mach bʌ yomic mi lac mel?

¹¹ ¿Chuqui mi laj cʌn? Chaʼan mach cojach yom mi laj cʌntan lac bʌ chaʼan maʼañic mi lac chaʼlen mulil, mach yomic mi lac mel jaʼel muʼ bʌ i mejlel i yʌcʼonla ti mulil. Jiñʌch tsaʼ bʌ i yʌlʌ Salomón cheʼ bʌ tsaʼix i taja ti tʼan tsaʼ bʌ ujti tiʼ tojlel ili chʼiton. Tsiʼ yʌlʌ: «Mach a sʌt a bʌ tiʼ bijlel» (Pr. 7:25, TNM). I cheʼ jaʼel tsiʼ yʌcʼʌ ili yambʌ ticʼojel: «Ñajt yom maʼ ñusan jini xʼixic am bʌ i tsʼiʼlel. Mach a ñochtʌben i tiʼ i yotot» (Pr. 5:3, 8). Iliyi tsiquil miʼ pʌs chaʼan mi mach la comic lac chaʼlen mulil, mach yomic mi lac mel muʼ bʌ mejlel i pʌyonla ti mulil. a ¿Bajcheʼ miʼ mejlel laj cʌntan lac bʌ? Tajol an chuqui tac mach bʌ yomic mi caj lac mel anquese mach lecojic tiʼ tojlel juntiquil xñoptʼan, pero mi la cujil chaʼan miʼ mejlel i yʌsañonla maʼañic mi caj lac mel (Mat. 5:29, 30).

12. ¿Chuqui tsiʼ yʌlʌ Job, i bajcheʼ tsiʼ colta jiñi chaʼan maʼañic miʼ chaʼlen mulil? (Job 31:1).

¹² Chaʼan mi laj cʌntan lac bʌ miʼ mejlel lac lajin tsaʼ bʌ i mele Job. Tsiʼ yʌlʌ tiʼ pusicʼal chaʼan maʼañic baʼ ora mi caj i mulan yambʌ xʼixicob. Jin chaʼan, tsiʼ yʌlʌ: «Tsaʼix c mele trato yicʼot c wut» (pejcan Job 31:1). Job tsaʼʌch i tsʼʌctesa i tʼan i jiñi tsiʼ colta chaʼan maʼañic miʼ chaʼlen tsʼiʼlel. Jiñʌch muʼ bʌ i mejlel lac mel jaʼel, mi la cʌl ti lac pusicʼal chaʼan maʼañic baʼ ora mi caj lac mel muʼ bʌ mejlel i yʌcʼonla ti mulil.

13. ¿Chucoch yom tsajalonla chaʼan chuqui mi lac ñaʼtan? (Qʼuele jaʼel jiñi foto tac).

 ¹³ Cheʼ jaʼel, yom tsajalonla chaʼan chuqui mi lac ñaʼtan (Éx. 20:17). An muʼ bʌ i yʌlob chaʼan maʼañic i wocolel cheʼ mi lac tech lac ñaʼtan lac mel mach bʌ weñic, cojach maʼañic mi lac mel. Pero jiñi mach i sujmic. Cheʼ mi lac ñumen ñaʼtan lac mel mach bʌ weñic, ñumento mi caj lac mulan lac mel. Miʼ mejlel la cʌl chaʼan joñonla woli lac bajñel aqʼuen lac bʌ wocol. An i tajol miʼ mejlel ti tilel mach bʌ weñic lac pensar. ¿Chuqui yom mi lac mel? Ti ora yom mi lac choc loqʼuel i mi laj cotsan ti lac ñaʼtʌbal chuqui tac wen. Cheʼ mi lac choc loqʼuel jiñi mach bʌ weñic lac pensar maʼañic mi caj i colel chuqui mach bʌ weñic ti lac pusicʼal, i cheʼ bajcheʼ jiñi maʼañic mi caj lac chaʼlen mulil (Filip. 4:8; Col. 3:2; Sant. 1:13-15).

14. ¿Chuqui yambʌ mi caj i coltañonla chaʼan maʼañic mi lac yajlel ti mulil?

¹⁴ ¿Chuqui yambʌ mi caj i coltañonla chaʼan maʼañic mi lac yajlel ti mulil? Jin cheʼ mucʼʌch lac ñop chaʼan jiñi ñumen wem bʌ chaʼañonla jin cheʼ mi lac jacʼben i tʼan Jehová. An i tajol wocol mi caj la cubin chaʼan wen chuqui mi lac ñaʼtan o chaʼan mi lac mel muʼ bʌ i mulan Jehová, pero mi mucʼʌch lac chaʼlen wersa lac mel tijicña mi caj la cubin.

15. ¿Bajcheʼ miʼ coltañonla cheʼ mi laj cʼuxbin chuqui utsʼat?

¹⁵ Yom mi laj cʌn lac tsʼaʼlen chuqui mach bʌ weñic i mi laj cʼuxbin chuqui utsʼat (Amós 5:15). Mi mucʼʌch lac mel, mi caj i coltañonla chaʼan mi lac mulan lac mel chuqui wen i maʼañic mi lac mel muʼ bʌ i mejlel i yʌcʼonla ti mulil. I mach cojachi: Cheʼ bʌ an chuqui miʼ yujtel mach bʌ pijtʌbilic lac chaʼan maʼañic mi caj lac yajlel ti mulil come pʼʌtʌlonla.

16. ¿Baqui bʌ i wenlel cheʼ mi lac mel muʼ bʌ i coltañonla lac ñumen cʼuxbin Jehová? (Qʼuele jaʼel jiñi foto tac).

¹⁶ ¿Bajcheʼ miʼ mejlel laj cʌn laj cʼuxbin chuqui utsʼat? Yom mi lac chaʼlen wersa lac mel muʼ bʌ i coltañonla lac ñumen cʼuxbin Jehová. Junchajp jiñʌch jiñi tempa bʌ yicʼot subtʼan, miʼ coltañonla chaʼan mi lac mulan  lac mel chuqui utsʼat bʌ tiʼ wut Jehová i maʼañic mi lac yajlel ti mulil (Mat. 28:19, 20; Heb. 10:24, 25). Yambʌ muʼ bʌ caj i coltañonla chaʼan mi laj cʼuxbin chuqui utsʼat i mi lac tsʼaʼlen jiñi mach bʌ weñic, jiñʌch cheʼ mi lac pejcan jiñi i Tʼan Dios, mi lac wen chʼʌmben i sujm yicʼot mi lac wen ñaʼtan muʼ bʌ i yʌl (Jos. 1:8; Sal. 1:2, 3; 119:97, 101). Cheʼ jaʼel, Jesús tsiʼ yʌcʼʌ ili ticʼojel: «Chʌn chaʼlenla oración chaʼan maʼañic mi laʼ yajlel ti mulil» (Mat. 26:41). Cheʼ bʌ mi la cʌqʼuen i yorajlel chaʼan mi lac pejcan Jehová ti oración, mi la cʌcʼ chaʼan miʼ coltañonla i cheʼ bajcheʼ jiñi mi caj lac ñumen mulan lac mel muʼ bʌ i yʌqʼuen i tijicñʌyel (Sant. 4:8).

MACH LAJ CɅY LAJ CɅNTAN LAC BɅ

17. ¿Chuqui jiñi wocol bʌ tsiʼ yubi Pedro chaʼan miʼ mʌlben?

¹⁷ An laj cʼunlel tac mach bʌ wocolic mi caj lac mʌlben, pero tajol añʌch wocol bʌ mi caj la cubin. Jiñʌch tsaʼ bʌ ujti tiʼ tojlel Pedro, come tsiʼ bʌcʼña wiñicob, tsiʼ yʌlʌ chaʼan mach i cʌñʌyic Jesús (Mat. 26:69-75). Ti wiʼil, tsaʼix i mʌlbe i bʌqʼuen yilal, come cheʼ bʌ tsaʼ pʌjyi majlel ti Sanedrín yicʼot i chʼejlel tsiʼ colta i bʌ (Hech. 5:27-29). Pero tsaʼ ñumi chaʼpʼej uxpʼejl jab, i tsiʼ cʌyʌ i cʼux i waj yicʼot jiñi mach bʌ judíojobic come tsiʼ bʌcʼña jiñi hermanojob judíojoʼ bʌ (Gál. 2:11, 12). Ili tsiʼ pʌsʌ chaʼan maxto i mʌlbe jiñi i cʼunlel. I mach la cujilic mi tsaʼʌch junyajl mejli i mʌlben.

18. Anquese mi lac ñaʼtan chaʼan tsaʼix lac mʌlbe jumpʼejl laj cʼunlel, ¿chucoch yom mi lac chʌn cʌntan lac bʌ?

¹⁸ Cheʼʌch miʼ mejlel ti ujtel jaʼel ti lac tojlel, tajol mi lac ñaʼtan chaʼan an jumpʼejl laj cʼunlel tsaʼix bʌ lac mʌlbe, pero yom mi lac chaʼlen wersa chaʼan maʼañic miʼ chaʼ mʌlbeñonla. Jiñʌch tsaʼ bʌ ujti tiʼ tojlel juntiquil hermano, miʼ yʌl: «Añix 10 jab maʼañic qʼuelbil c chaʼan pornografía, i tsaʼ c ñaʼta chaʼan tsaʼix c mʌlbe. Pero jiñi j cʼunlel yaʼixto añi, lajal bajcheʼ jontol bʌ (simaron bʌ) añimal woli jach bʌ i pijtan chaʼan miʼ yʌnsañon». Jiñi hermano tsaʼʌch i chaʼle wersa, i tsaʼ cʼoti i qʼuel chaʼan ti jujumpʼejl qʼuin yom miʼ cʌntan i bʌ chaʼan maʼañic miʼ chaʼ qʼuel pornografía, i tajol jiñʌch muʼ bʌ caj i mel tiʼ pejtelel ora. Cheʼ jaʼel, jiñi i yijñam yicʼot jiñi ancianojob an i coltayob chaʼan miʼ cʌntan i bʌ.

19. ¿Chuqui yom mi lac mel mi an jumpʼejl laj cʼunlel maʼañic bʌ woliʼ mejlel lac mʌlben?

 ¹⁹ Mi an jumpʼejl laj cʼunlel maʼañic bʌ woliʼ mejlel lac mʌlben, ¿chuqui yom mi lac mel chaʼan maʼañic miʼ yʌcʼonla ti mulil? Laʼ lac jacʼ jiñi ticʼojel tsaʼ bʌ i yʌcʼʌ Jesús: Yom chʌn yʌxʌl la co. Anquese mi lac ñaʼtan chaʼan wolʌch i mejlel lac ticʼ lac bʌ, yomʌch mi lac bej cʌntan lac bʌ chaʼan maʼañic mi lac mel muʼ bʌ mejlel i yʌcʼonla ti mulil (1 Cor. 10:12). I mach laj cʌy lac mel jiñi añʌch bʌ i coltayonla mi la cubin. Proverbios 28:14 miʼ yʌl: «Tijicñayob muʼ bʌ i bʌcʼñañob lac Yum ti pejtelel ora» (2 Ped. 3:14).

¿BAQUI BɅ I WENLEL CHEʼ MI LAC CHɅN CɅNTAN LAC BɅ?

20, 21. a) ¿Baqui bʌ i wenlel cheʼ mi lac chʌn cʌntan lac bʌ? b) Mi mucʼʌch laj cʌntan lac bʌ chaʼan maʼañic mi lac yajlel ti mulil, ¿chuqui mi caj i mel Jehová? (2 Corintios 4:7).

²⁰ Añʌch i wenlel cheʼ mi lac chʌn cʌntan lac bʌ i maʼañic mi lac yajlel ti mulil. Jiñi tijicñʌyel muʼ bʌ la cubin cheʼ bʌ mi lac jacʼben i tʼan Jehová maʼañic miʼ lajeʼ i bʌ yicʼot jiñi muʼ bʌ lac poj jumucʼ ubin cheʼ mi lac chaʼlen mulil (Heb. 11:25; Sal. 19:8). Jehová tsiʼ meleyonla chaʼan mi lac jacʼben i tʼan (Gn. 1:27). Mi mucʼʌch lac mel chuqui miʼ mulan tijicña mi caj la cubin lac bʌ i mi caj lac mejlel ti chumtʌl tiʼ pejtelel ora (1 Tim. 6:12; 2 Tim. 1:3; Jud. 20, 21).

²¹ I sujmʌch chaʼan «cʼun jiñi lac bʌcʼtal», pero jiñi mach yomic i yʌl chaʼan maʼañix chuqui miʼ mejlel lac mel. Jehová yaʼʌch an chaʼan miʼ coltañonla (pejcan 2 Corintios 4:7). Jiñi Biblia miʼ yʌl chaʼan an lac chaʼan jiñi pʼʌtʌlel mach bʌ añic i chaʼan yambʌ lac piʼʌlob. Ili pʼʌtʌlel tilemʌch ti Dios, pero mach yomic i yʌl chaʼan maʼañix chuqui mi caj lac mel, yom mi lac chaʼlen wersa ti jujumpʼejl qʼuin chaʼan maʼañic mi lac yajlel ti mulil. Mi mucʼʌch lac mel iliyi, miʼ mejlel lac ñop chaʼan Jehová mi caj i jacʼ la coración i mi caj i yʌqʼueñonla jiñi pʼʌtʌlel anto bʌ yom lac chaʼan (1 Cor. 10:13). Tiʼ coltaya Jehová mi caj i mejlel lac chʌn cʌntan lac bʌ i maʼañic mi caj lac yajlel ti mulil.