1, 2. ¿Majqui Sadoc? (1 Crónicas 12:22, 26-28).

 ÑAʼTANCU iliyi, ñumen ti 340 mil wiñicob tsiʼ tempayob i bʌ chaʼan miʼ sujtesañob David ti rey. Añix uxpʼejl qʼuin yaʼañob, i yaʼ ti wits Hebrón ñajti tsiquil woliyob (choncolob) ti tʼan pejtelel jiñi wiñicob, woliyob ti cʼay yicʼot ti tseʼñal (1 Cr. 12:39). Yaʼ baqui tempʌbilob yaʼan juntiquil chʼiton wiñic i cʼabaʼ Sadoc. Tajol maʼañic majqui tsiʼ wen taja i qʼuel, pero Jehová tsaʼʌch i qʼuele i tsiʼ mulaj chaʼan mi lac ñaʼtan chaʼan yaʼʌch an jaʼel ti jimbʌ ora (pejcan 1 Crónicas 12:22, 26-28). Pero ¿majqui Sadoc?

² Sadoc juntiquilʌch sacerdote tsaʼ bʌ i comol chaʼle eʼtel (troñel) yicʼot jiñi ñumen ñuc bʌ sacerdote Abiatar. Cheʼ jaʼel, wen an i ñaʼtʌbal i miʼ mejlel i ñaʼtan chuqui yom Jehová, come yicʼotʌch i coltaya Dios (2 S. 15:27). Jiñi wiñicob xʼixicob miʼ majlel i cʼajtibeñob ticʼojel tac. Cheʼ jaʼel, juntiquilʌch wiñic wen chʼejl bʌ. I jiñʌch muʼ bʌ caj laj taj ti tʼan ti ili estudio.

3. a) ¿Chucoch yom mi lac pʌs lac chʼejlel? b) ¿Chuqui mi caj laj qʼuel ti ili estudio?

³ Satanás woli (yʌquel) i ñumen contrajin i tejclum Dios ti ili cojix bʌ qʼuin (1 Ped. 5:8). Jin chaʼan, yom mi lac pʌs lac chʼejlel jinto miʼ cʼotel i yorajlel chaʼan Jehová miʼ jisan Satanás yicʼot jiñi jontol bʌ i pañimil (Sal. 31:24). Laʼ laj qʼuel uxchajp  bajcheʼ miʼ mejlel lac pʌs lac chʼejlel cheʼ bajcheʼ Sadoc.

COLTAN I YUMɅNTEL DIOS

4. ¿Chucoch yomʌch an lac chʼejlel chaʼan mi laj coltan jiñi i Yumʌntel Dios? (Qʼuele jaʼel jiñi foto).

⁴ Jiñi i wiñiconbʌla Jehová ti jumpʼejl lac pusicʼal mi laj coltan jiñi i Yumʌntel, pero chaʼan mi lac mel yomʌch an lac chʼejlel (Mat. 6:33). ¿Chucoch? Yom an lac chʼejlel chaʼan mi lac jacʼben i mandar Jehová ti ili jontol bʌ pañimil (mulawil) yicʼot mi lac sub jiñi wen tʼan (1 Tes. 2:2). Jiñi lac piʼʌlob cabʌl jax chuqui miʼ yʌlob chaʼan tac bʌ política i tajol wocol mi la cubin chaʼan maʼañic mi la cotsan lac bʌ (Juan 18:36). Cheʼ jaʼel, cabʌl hermanojob wocol miʼ yubiñob chaʼan miʼ tajob taqʼuin, an muʼ bʌ i ticʼlʌntelob o miʼ yotsʌntelob ti cárcel come maʼañic miʼ yotsañob i bʌ ti política o chaʼan maʼañic miʼ majlelob ti guerra.

5. ¿Chucoch yomʌch an i chʼejlel Sadoc chaʼan miʼ coltan David?

⁵ Sadoc mach cheʼ jach tsaʼ majli i qʼuel chaʼan miʼ yotsʌntel David bajcheʼ rey. Chajpʌbil tsaʼ majli chaʼan jiñi guerra (1 Cr. 12:38). Yom i coltan David yicʼot jiñi tejclum tiʼ tojlel i contrajob. Anquese tajol maxto wen añic loqʼuen ti guerra, wen añʌch i chʼejlel.

6. ¿Chucoch Sadoc tsiʼ mulaj i lajin David? (Salmo 138:3).

⁶ ¿Baqui tsiʼ taja i chʼejlel Sadoc? Miʼ mejlel la cʌl chaʼan tsaʼʌch i colta jiñi wem bʌ ejemplo tiʼ tojlel yambʌ wiñicob tsaʼ bʌ i wen pʌsʌyob i chʼejlel. Juntiquil jiñʌch David. Tsiʼ wen pʌsʌ i chʼejlel cheʼ miʼ majlel ti guerra yicʼot jiñi i soldadojob i pejtelel jiñi israelitajob yomob i yotsan ti rey (1 Cr. 11:1, 2). Tsaʼʌch i ñopo chaʼan Jehová mi caj i coltan, i cheʼ bʌ woliʼ sʌclʌntel tiʼ contrajob tsiʼ cʼajtibe i coltaya Jehová (Sal. 28:7; pejcan Salmo 138:3). Sadoc tsiʼ qʼuele jaʼel jiñi wem bʌ ejemplo  tiʼ tojlel yambʌ wiñicob bajcheʼ Jehoiadá yicʼot jiñi i yalobil, Benaya, yicʼot tiʼ tojlel jiñi 22 wiñicob ñucoʼ bʌ i yeʼtel tsaʼ bʌ i coltayob David (1 Cr. 11:22-25; 12:26-28). Tiʼ pejtelelob yomob i coltan David chaʼan miʼ yochel ti rey.

7. a) ¿Majquiyob wem bʌ ejemplojob chaʼañonla ili ora? b) ¿Chuqui mi laj cʌn tiʼ tojlel jiñi hermano Nsilu?

⁷ Mi caj i yʌqʼueñet a pʼʌtʌlel yicʼot a chʼejlel cheʼ maʼ qʼuel bajcheʼ jiñi i wiñicob Jehová an i coltʌbeyob jiñi i Yumʌntel. Juntiquil jiñʌch Jesucristo, jiñi lac Rey, maʼañic tsiʼ wis otsa i bʌ ti política (Mat. 4:8-11; Juan 6:14, 15). Tiʼ pejtelel ora tiʼ sʌclʌbe i coltaya Jehová. Cheʼ jaʼel, cabʌl xcolelob ili ora maʼañic miʼ jacʼob ochel ti soldado o chaʼan miʼ yotsañob i bʌ ti chaʼan tac bʌ política. ¿Ixcu cheʼ muqʼuic a qʼuel jiñi experiencia tac yaʼ ti jw.org? a

COLTAN JIÑI HERMANOJOB

8. ¿Baqui ora yom miʼ pʌsob i chʼejlel jiñi ancianojob chaʼan miʼ coltañob jiñi hermanojob?

⁸ Mi lac mulan laj coltan jiñi hermanojob (2 Cor. 8:4). Pero chaʼan mi lac mel, an i tajol yomʌch mi lac pʌs lac chʼejlel. Jumpʼejl ejemplo, cheʼ an baqui miʼ yujtel guerra jiñi ancianojob yujilob chaʼan jiñi hermanojob yom miʼ ñuqʼuesʌbentelob i pusicʼal yicʼot yom miʼ coltʌntelob. Tajol yom miʼ yʌqʼuentelob jiñi Biblia, jiñi publicación tac yicʼot yambʌ chuqui tac i cʼʌjñibal i chaʼañob. I anquese tajol bʌbʌqʼueñʌch chaʼan miʼ melob, pero jiñi ancianojob mucʼʌch i melob come miʼ cʼuxbiñob jiñi hermanojob (Juan 15:12, 13). Cheʼ bajcheʼ jiñi miʼ pʌsob i chʼejlel cheʼ bajcheʼ Sadoc.

9. Cheʼ bajcheʼ miʼ yʌl 2 Samuel 15:27-29, ¿chuqui tsaʼ subenti i mel Sadoc? (Qʼuele jaʼel jiñi dibujo).

⁹ David an ti wocol, jiñi i yalobil yom i tsʌnsan come jin yom cʌytʌl bajcheʼ rey (2 S. 15:12, 13). Jin chaʼan David tsaʼ putsʼi loqʼuel  ti Jerusalén. I tiʼ sube i wiñicob: «Conla ti putsʼel. Mi maʼanic mi lac majlel ti ora, mux caj i tilel Absalón chaʼan miʼ laj jisañonla» (2 S. 15:14). Cheʼ bʌ tsaʼix loqʼui, tsiʼ qʼuele chaʼan añʌch majqui yom miʼ cʌytʌl yaʼ ti tejclum chaʼan miʼ sub chuqui woliʼ ñaʼtan i mel Absalón. Jin chaʼan, tsiʼ chaʼ choco majlel Sadoc yicʼot yambʌ sacerdotejob chaʼan miʼ yubiñob chuqui woliʼ yujtel (pejcan 2 Samuel 15:27-29). Pero yomʌch wen tsajalob chaʼan miʼ tsʼʌctesañob jiñi eʼtel tsaʼ bʌ aqʼuentiyob come Absalón wen jontol i jin jach miʼ bajñel ñaʼtan i bʌ. ¡Ñaʼtancu chuqui tsaʼ melbenti Sadoc yicʼot jiñi sacerdotejob cheʼ tsaʼic ubinti chaʼan woliʼ coltañob jiñi rey David!

10. ¿Chuqui tsiʼ mele Sadoc yicʼot jiñi yambʌ i piʼʌlob chaʼan miʼ coltañob David?

¹⁰ David tsiʼ chajpa chuqui mi caj i mel i tsiʼ cʼajtibe i coltaya Sadoc yicʼot Husái, yambʌ i yamigo (2 S. 15:32-37). Husái tsiʼ poj pʌsʌ chaʼan yom i coltan Absalón i tiʼ sube chuqui miʼ mejlel i mel chaʼan miʼ mʌlben (jotben) David. Ti wiʼil, Husái tiʼ sube Sadoc yicʼot Abiatar muʼ bʌ caj i mel Absalón (2 S. 17:8-16). Cheʼ jiñi tsiʼ choco ti subentel David muʼ bʌ caj i yujtel i cheʼ bajcheʼ jiñi tsaʼ mejli i wʌn chajpan i bʌ (2 S. 17:17). Tiʼ coltaya Jehová, Sadoc yicʼot jiñi yambʌ sacerdotejob tsiʼ coltayob David chaʼan maʼañic miʼ tsʌnsʌntel (2 S. 17:21, 22).

11. Mi tsaʼ subentiyonla laj coltan jiñi hermanojob, ¿bajcheʼ miʼ mejlel lac pʌs lac chʼejlel bajcheʼ Sadoc?

¹¹ Mi tsaʼ subentiyonla chaʼan mi laj coltan jiñi hermanojob baqui bʌbʌqʼuen chuqui woliʼ yujtel, ¿bajcheʼ miʼ mejlel lac pʌs lac chʼejlel bajcheʼ Sadoc? 1) Laʼ lac jacʼ muʼ bʌ lac subentel. Wen ñuc i cʼʌjñibal cheʼ mi lac jacʼ muʼ bʌ lac subentel chaʼan chʌn temel mi la cajñel. Jin chaʼan, cheʼ an chuqui miʼ subeñonla jiñi sucursal yomʌch mi lac jacʼ (Heb. 13:17). Jiñi ancianojob yom miʼ chʌcʌ  qʼuelob jiñi instrucción tac chaʼan bajcheʼ yom chajpʌbilonla mi tsaʼ ujti jumpʼejl wocol (1 Cor. 14:33, 40). 2) Yom chʼejlonla, pero tsajalonla (Pr. 22:3). Laʼ laj cʼʌn lac ñaʼtʌbal chaʼan maʼañic mi lac mel muʼ bʌ mejlel i ñumen acʼonla ti wocol. 3) Laʼ lac ñop ti Jehová. Jehová miʼ pensariñonla i mach yomic chaʼan an chuqui mi lac chaʼlen. Miʼ mejlel i coltañonla lac ñaʼtan bajcheʼ yom mi laj coltan jiñi hermanojob.

12, 13. ¿Chuqui mi laj cʌn tiʼ tojlel Víktor yicʼot Vitali? (Qʼuele jaʼel jiñi foto).

¹² Laʼ laj qʼuel tsaʼ bʌ ujti tiʼ tojlel Víktor yicʼot Vitali, chaʼtiquil ancianojob tsaʼ bʌ i coltayob jiñi hermanojob ti Ucrania. Víktor miʼ yʌl: «Mic tempan lon ñumel despensa i ti bele ora mi cubin lojon xjulbʌlob lʌcʼʌl yaʼ baqui añon lon. Ti jumpʼejl bʌ qʼuin, juntiquil hermano tsiʼ yʌcʼʌ despensa, cheʼ bajcheʼ jiñi cabʌl hermanojob tsiʼ tajayob i cʼʌjñibal bʌ i chaʼañob. Cheʼ bʌ woli c letsan lojon ti carro jiñi despensa tsaʼ yajli jumpʼejl bomba pero maʼañic tsaʼ tojmi, cheʼ jach 20 metro i ñajtlel baqui tsaʼ yajli. Ti jimbʌ qʼuin tsaʼ c wen cʼajtibe Jehová chaʼan miʼ yʌqʼueñon c chʼejlel chaʼan maʼañic mij cʌy j coltan jiñi hermanojob».

¹³ Vitali miʼ yʌl: «Tsaʼʌch c wen pʌsʌ c chʼejlel. Jiñi ñaxam bʌ viaje tsaʼ c mele, tsaʼ jalʼa 12 hora. I cheʼ yaʼ c majlel ti bij tsaʼ c wen pejca Jehová ti oración». Vitali tsaʼʌch i pʌsʌ i chʼejlel, pero cheʼ jaʼel tsajalʌch, miʼ bej al: «Tsaʼ c wen cʼajtibe Jehová chaʼan miʼ yʌqʼueñon c ñaʼtʌbal yicʼot c pecʼlel. Yaʼ jach tsaʼ ñumiyon majlel baqui albil i chaʼan jiñi yumʌlob. Tsaʼ c ñumen ñopo ti Jehová cheʼ tsaʼ j qʼuele chaʼan pejtelel jiñi hermanojob juntemel tsiʼ chaʼleyob eʼtel. Mi mʌcʌl jiñi bij baqui mi lon c ñumel, jiñi hermanojob miʼ jamob, miʼ tempañob jiñi despensa yicʼot miʼ letsañob ti carro, i joñon quicʼot Víktor mi cʌqʼuentel lon chuqui mi lon j cʼux yicʼot baqui mij cʼaj lon j co».

YOM CHɅN XUCʼULET TI JEHOVÁ

14. ¿Bajcheʼ yubil mi la cubin cheʼ bʌ juntiquil muʼ bʌ laj cʼuxbin miʼ cʌy Jehová?

¹⁴ Mi juntiquil ti lac familia o juntiquil la camigo miʼ cʌy Jehová wen cʼux mi la cubin (Sal. 78:40; Pr. 24:10). I ñumen cʼuxto mi la cubin mi lʌcʼʌl tsaʼ ajñi la quicʼot. Mi jatet an a ñusa bajcheʼ iliyi, jiñi ejemplo chaʼan Sadoc miʼ mejlel i wen coltañet.

15. ¿Chucoch yomʌch miʼ pʌs i chʼejlel Sadoc chaʼan xucʼul miʼ yajñel ti Jehová? (1 Reyes 1:5-8).

¹⁵ Cheʼ bʌ David wen ñoxix i tsʼitaʼ jax yom chaʼan miʼ chʌmel (sajtel), jiñi i yalobil, Adonías, tsiʼ ñopo i chilben i yumʌntel, anquese Jehová yom chaʼan jiñʌch Salomón muʼ bʌ i yochel bajcheʼ rey (1 Cr. 22:9, 10). Sadoc chʌn xucʼul tsaʼ ajñi ti Jehová, pero jiñi i yamigo Abiatar mach cheʼic tsiʼ mele, tsiʼ colta Adonías (pejcan 1 Reyes 1:5-8). Ñaʼtancu bajcheʼ yubil tsiʼ yubi i bʌ Sadoc. Ñumen ti 40 jab temel tsiʼ chaʼleyob eʼtel bajcheʼ sacerdote (2 S. 8:17). Tsiʼ tem chaʼleyob eʼtel chaʼan miʼ cʌntañob «jini Arca i chaʼan bʌ lac Yum» (2 S. 15:29). Tsiʼ coltayob David i cabʌl chuqui tsiʼ ñusayob cheʼ bʌ woliʼ comol melbeñob i yeʼtel Jehová (2 S. 19:11-14).

16. ¿Chuqui tsiʼ colta Sadoc chaʼan xucʼul miʼ yajñel ti Jehová?

¹⁶ Sadoc chʌn xucʼul tsaʼ ajñi ti Jehová anquese Abiatar tsiʼ mele mach bʌ weñic, i jin chaʼan David yujil chaʼan miʼ mejlel i ñop tiʼ tojlel Sadoc. Cheʼ bʌ tsaʼ subenti David jiñi woli bʌ i ñaʼtan i mel Adonías, tsaʼ majli i pejcan Sadoc, Natán yicʼot Benaya chaʼan miʼ waʼchocoñob Salomón ti rey (1 R. 1:32-34). Tsaʼ bʌ i colta Sadoc chaʼan xucʼul miʼ yajñel jiñʌch i yejemplo yambʌ i wiñicob Jehová xucʼul  bʌ tsaʼ ajñiyob i tsaʼ bʌ i coltayob David jaʼel, cheʼ bajcheʼ Natán (1 R. 1:38, 39). Cheʼ bʌ Salomón tsaʼ waʼchoconti bajcheʼ rey, Sadoc tsaʼ ochi bajcheʼ jiñi ñumen ñuc bʌ sacerdote tiʼ qʼuexol Abiatar (1 R. 2:35).

17. ¿Bajcheʼ miʼ mejlel a lajin Sadoc mi juntiquil muʼ bʌ a wen cʼuxbin miʼ cʌy Jehová?

¹⁷ ¿Bajcheʼ miʼ mejlel a lajin Sadoc? Mi juntiquil muʼ bʌ a wen cʼuxbin miʼ cʌy Jehová, pʌsʌ chaʼan xucʼul mi caj a wajñel ti Jehová (Jos. 24:15). Jiñi mi caj i yʌqʼueñet a pʼʌtʌlel yicʼot a chʼejlel. Pejcan ti oración i mach a ñajtʼesan a bʌ tiʼ tojlel jiñi hermanojob. Jehová miʼ qʼuel ti ñuc jiñi a xucʼtʌlel i mi caj i yʌqʼueñet a majtan (2 S. 22:26).

18. ¿Chuqui maʼ cʌn tiʼ tojlel Marco yicʼot Sidse?

¹⁸ Laʼ laj qʼuel tsaʼ bʌ ujti tiʼ tojlel Marco yicʼot Sidse. Añob chaʼtiquil i yixicʼal, i cheʼ bʌ tsaʼ coliyob tsiʼ cʌyʌyob i sujmlel. Marco miʼ yʌl: «Cʼʌlʌl cheʼ bʌ miʼ yilan pañimil (chʼocʼan) a walobilob, muqʼuix a wen cʼuxbiñob. A wom a wen cʌntañob chaʼan maʼañic chuqui miʼ wis chaʼleñob. Jin chaʼan, cheʼ bʌ miʼ cʌyob Jehová, wen chʼijyem maʼ wubin a bʌ. Pero Jehová maʼañic wis cʌybil i chaʼañon lon. Come cheʼ bʌ joñon wen chʼijyem mi cubin c bʌ Sidse miʼ coltañon, i cheʼ bʌ Sidse wen chʼijyem miʼ yubin i bʌ joñon mij coltan». Jiñi i yijñam miʼ yʌl: «An mejli lon c lʌtʼ come Jehová miʼ yʌqʼueñon lon c pʼʌtʌlel. Wen chʼijyem mi cubin c bʌ come mic ñaʼtan chaʼan tic mul jiñi quixicʼalob tsiʼ cʌyʌyob i sujmlel. Jin chaʼan tsaʼ c sube Jehová bajcheʼ mi cubin c bʌ, mach jalic tsaʼ ñumi juntiquil hermana añix bʌ ora maʼañic qʼuelbil c chaʼan tsaʼ tili baqui añon, tsiʼ yʌcʼʌ i cʼʌb tij quejlab i tiʼ subeyon: ‹Sidse, cʼajtesan chaʼan mach a mulic›. Tiʼ coltaya Jehová woli c bej melben i yeʼtel yicʼot c tijicñʌyel».

19. ¿Chuqui yom bʌ maʼ mel?

¹⁹ Jehová yom chaʼan ti lac pejtelel chʼejlonla bajcheʼ Sadoc (2 Tim. 1:7). Yom chaʼan mi lac ñop tiʼ tojlel, mach jiñic ti lac bajñel pʼʌtʌlel. Jin chaʼan, cheʼ bʌ miʼ tilel jumpʼejl wocol ti lac tojlel baqui yom mi lac pʌs lac chʼejlel, laʼ lac sʌclan Jehová. Miʼ mejlel lac ñop chaʼan mi caj i coltañonla chaʼan chʼejlonla bajcheʼ Sadoc (1 Ped. 5:10).