Isaías 60:1 miʼ yʌl: «Chʼojyenla c chaʼañoʼ bʌ. Pʌsʌla i cʼʌcʼal laʼ coltʌntel chaʼan miʼ qʼuelob pejtelel tejclum tac. Come wolix i pʌs i ñuclel lac Yum ti laʼ tojlel». Ili versículo woli (choncol) i taj ti tʼan Jerusalén o Sion, jiñi i capital Judá ti jimbʌ ora (Is. 60:14; 62:1, 2). Yaʼʌch baqui chucul pejtelel jiñi tejclum Israel. Tajol mi laj cʼajtiben lac bʌ, ¿jalix yicʼot bajcheʼ tsaʼ chʼojyi Jerusalén i tsaʼ caji i pʌs i cʼʌcʼal? ¿Am ba yambʌ bajcheʼ miʼ tsʼʌctiyel jiñi tʼan tsaʼ bʌ i yʌlʌ Isaías? Laʼ laj qʼuelben i jacʼbal.

¿Jalix yicʼot bajcheʼ tsaʼ chʼojyi Jerusalén i tsaʼ caji i pʌs i cʼʌcʼal? Jiñi judíojob tsaʼ ajñiyob ti Babilonia 70 jab. Ti jimbʌ ora, Jerusalén yicʼot jiñi templo jejmen, pero jiñi medojob yicʼot persajob tsiʼ contrajiyob Babilonia. Jiñi israelitajob tsaʼ chaʼ sujtiyob majlel ti Jerusalén chaʼan miʼ chaʼ chʼujutesañob Jehová (Esd. 1:1-4). I cheʼ ti jabil 537, junmojt judíojob loqʼuemoʼ bʌ ti jiñi 12 tribu tsaʼ chaʼ sujtiyob ti Jerusalén (Is. 60:4). Tsaʼ caji i chaʼ aqʼueñob i majtan Jehová, i melob qʼuiñijel yicʼot i chaʼ tojʼesañob jiñi templo (Esd. 3:1-4, 7-11; 6:16-22). Cheʼ bajcheʼ jiñi, Jehová tsiʼ chaʼ pʌsʌ i ñuclel ti Jerusalén. Cheʼ jaʼel, jiñi tejclum tsiʼ pʌsʌ i sʌclel tiʼ tojlel yambʌ tejclum tac mach bʌ i cʌñʌyobic Jehová.

Pero jiñi profecía tsaʼ bʌ i yʌlʌ Isaías maxto añic tsaʼ laj tsʼʌctiyi. Lʌcʼʌ tiʼ pejtelel jiñi israelitajob maʼañic tsaʼ caji i bej jacʼbeñob i tʼan Jehová (Neh. 13:27; Mal. 1:6-8; 2:13, 14; Mat. 15:7-9). Ti wiʼil, tsaʼto i yʌcʼʌyob i bʌ tiʼ contra jiñi Mesías (Mat. 27:1, 2). I cheʼ ti jabil 70, Jerusalén yicʼot jiñi templo tsaʼ chaʼ jisʌnti.

Jiñi tsaʼ bʌ ujti ti jabil 70 jiñʌch tsaʼ bʌ i wʌn alʌ Jehová (Dn. 9:24-27). Ili tsiquil miʼ pʌs chaʼan Jehová mach yomic chaʼan jiñi tejclum Jerusalén miʼ laj tsʼʌctesan jiñi profecía am bʌ ti capítulo 60 chaʼan Isaías.

¿Anto ba yambʌ bajcheʼ miʼ tsʼʌctiyel jiñi profecía muʼ bʌ i yʌl Isaías? Añʌch, jiñʌch tiʼ tojlel jiñi «Jerusalén am bʌ ti chan». ¿I chuqui jiñi Jerusalén am bʌ ti chan? Jiñʌch jumpʼejl parte i yorganización Dios am bʌ ti panchan baqui ochem jiñi ángelob. I jiñi apóstol Pablo tsiʼ yʌlʌ: «Jiñʌch lac ñaʼ» (Gál. 4:26). Jiñi i yalobilob jiñʌch Jesús yicʼot jiñi 144 mil ungidojob añoʼ bʌ i pijtaya ti panchan, i Pablo yaʼʌch ochem jaʼel. Jiñi ungidojob jiñobʌch jiñi «chʼujul bʌ tejclum», «jiñi Israel i chaʼan bʌ Dios» (1 Ped. 2:9; Gál. 6:16).

¿Bajcheʼ tsaʼ chʼojyi jiñi Jerusalén am bʌ ti chan i tsiʼ pʌsʌ i sʌclel? Jiñʌch tiʼ coltaya jiñi ungidojob añoʼ bʌ ila ti Pañimil. Laʼ laj qʼuel chuqui tsiʼ ñusayob.

Jiñi ungidojob yom miʼ chʼojyelob come tsaʼ ajñiyob baqui icʼyochʼan. Cheʼ bʌ tsaʼ chʌmi jiñi cojix bʌ apóstol tsaʼ ochi jiñi mach bʌ i sujmic cʌntesa i tsaʼ pam pujqui (Mat. 13:37-43). Tsaʼ ajñiyob tiʼ pʼʌtʌlel jiñi Ñuc bʌ Babilonia, i yaʼʌch tsaʼ bej ajñiyob jinto tsaʼ cʼoti «i yorajlel i jilibal pañimil», tsaʼ bʌ tejchi ti 1914 (Mat. 13:39, 40). Mach jalic tsaʼ ñumi, i cheʼ ti 1919 tsaʼ loqʼuiyob yaʼ ti Ñuc bʌ Babilonia i orajach tsaʼ chaʼ caji i pʌsob i sʌclel. ¿Bajcheʼ? Tsaʼ caji i wen subob jiñi wen tʼan. Cʼʌlʌl ti jimbʌ ora, yonlel lac piʼʌlob tsaʼ ochiyob ti jiñi sʌc bʌ chʼujutesaya, yaʼ ochem jaʼel i colobal  jiñi ungidojob muʼ bʌ caj i yochelob bajcheʼ «yumʌlob» muʼ bʌ i yʌl Isaías 60:3 (Apoc. 5:9, 10). a

Ti talto bʌ qʼuin, mi caj i ñumen tsictiyel i ñuclel Jehová tiʼ tojlel jiñi ungidojob. Cheʼ bʌ miʼ chʌmelob (sajtelob) miʼ yochelob ti «jiñi Tsijiʼ bʌ Jerusalén», ili jiñʌch jiñi i novia Cristo, jiñi 144 mil reyob yicʼot sacerdotejob (Apoc. 14:1; 21:1, 2, 24; 22:3-5).

Jiñi Tsijiʼ bʌ Jerusalén mi caj i chaʼlen coltaya chaʼan miʼ tsʼʌctiyel jiñi profecía am bʌ ti Isaías 60:1 (laja Isaías 60:1, 3, 5, 11, 19, 20 yicʼot Apocalipsis 21:2, 9-11, 22-26). Ti wajali, jiñi tejclum Israel yaʼʌch chucul ti Jerusalén come yaʼʌch tsaʼ ajñiyob jiñi reyob, jin chaʼan jiñi Tsijiʼ bʌ Jerusalén yicʼot Cristo jiñobʌch muʼ bʌ caj i chaʼleñob yumʌntel. ¿I chucoch miʼ yʌjlel chaʼan «jiñi Tsijiʼ bʌ Jerusalén, woliʼ jubel tilel ti panchan, cʼʌlʌl yaʼ baqui an Dios»? Come mi caj i coltañob jiñi añoʼ bʌ ila ti Pañimil. Jiñi Biblia miʼ yʌl chaʼan jiñi lac piʼʌlob xucʼuloʼ bʌ añoʼ bʌ tiʼ pejtelel pañimil, «mi caj i chaʼleñob xʌmbal tiʼ coltaya i sʌclel» jiñi Tsijiʼ bʌ Jerusalén, i mi caj i loqʼuelob ti mulil yicʼot ti chʌmel (Apoc. 21:3, 4, 24). Cheʼ bajcheʼ jiñi, mi caj i «tsijibtesʌntel pejtelel jiñi tsaʼ bʌ i wʌn alʌ Dios», tsaʼ bʌ i yʌlʌ tiʼ tojlel Isaías yicʼot tiʼ tojlel yambʌ xʼaltʼañob (Hech. 3:21). Ili tsaʼ tejchi cheʼ bʌ Cristo tsaʼ ochi ti Rey i mi caj i yujtel cheʼ bʌ miʼ tsʼʌctiyel mil jab i Yumʌntel.