ILI tʼan jiñʌch tsaʼ bʌ i sube jiñi rey David juntiquil xʼixic i cʼabaʼ Abigail. ¿Chucoch tsiʼ mele? ¿Chuqui mi laj cʌn tiʼ tojlel Abigail?

David tsiʼ cʌñʌ Abigail cheʼ bʌ woliʼ putsʼtan ñumel jiñi rey Saúl. I ñoxiʼal Abigail jiñʌch Nabal, juntiquil wiñic wen am bʌ i taqʼuin yicʼot cabʌl i tiñʌmeʼ ti jumpʼejl wits am bʌ ti Judá. David yicʼot i wiñicob tsiʼ wen cʌntʌbeyob i yʌlacʼ yicʼot i wiñicob jiñi Nabal. Cheʼ jiñi, David tsiʼ choco majlel i wiñicob tiʼ yotot Nabal chaʼan miʼ cʼajtiñob bʌlñʌcʼʌl, jiñʌch cheʼ bajcheʼ yom i yʌcʼ (1 S. 25:8, 15, 16). David mach toʼol cheʼic jach tsiʼ cʼajti chuqui yom, come tsaʼʌch i cʌntʌbe i chubʌʼan Nabal.

I cʼabaʼ Nabal yom i yʌl, «Maʼañic bʌ miʼ chʼʌmben Isujm» o «Tonto», i cheʼʌch tsiʼ pʌsʌ i bʌ. Mach weñic bajcheʼ tsiʼ jacʼbe i tʼan David. Jin chaʼan, David tsaʼ caji i chajpan i bʌ chaʼan miʼ majlel i tsʌnsan tiʼ caj bajcheʼ yilal tsiʼ jacʼʌ. Come Nabal maʼañic tsiʼ cʼʌñʌ i ñaʼtʌbal, tsaʼ ñaʼtʌnti chaʼan temel miʼ jisʌntel yicʼot añoʼ bʌ tiʼ yotot (1 S. 25:2-13, 21, 22).

Cheʼ bʌ Abigail tsiʼ yubi tsaʼ bʌ i ñaʼta i mel David, tsiʼ pʌsʌ i chʼejlel yicʼot tsiʼ yotsa i bʌ. Wen jach bajcheʼ tsaʼ cʼoti i pejcan David, i tsiʼ yʌqʼue i ñaʼtan chaʼan bajcheʼ an tiʼ tojlel Jehová. Cheʼ jaʼel, tsiʼ chʼʌmbe majlel cabʌl bʌlñʌcʼʌl jiñi rey bʌ miʼ cajel ti Israel yicʼot i wiñicob. Pero David tsiʼ cʌñʌ jaʼel chaʼan Dios tsiʼ cʼʌñʌ jiñi xʼixic chaʼan miʼ mʌctan tiʼ melol muʼ bʌ i tsʼaʼlen. Tsiʼ sube: «An cabʌl a pusicʼal [o ñaʼtʌbal]. Tsaʼ tili a lajmesan c michʼajel. Machic tsaʼ tiliyet, tsac chaʼle tsʌnsa» (1 S. 25:18, 19, 23-35).

Wen tsiquil chaʼan yom mi la cʌqʼuen wocolix i yʌlʌ jiñi yambʌlob, mach yomic lajalonla bajcheʼ Nabal. Cheʼ jaʼel, cheʼ mi laj qʼuel chaʼan an chuqui mach weñic miʼ caj ti mejlel, laʼ lac chaʼlen wersa chaʼan mi lac sʌclan bajcheʼ mi lac tojʼesan. Laʼ laj cʼajtiben Dios jaʼel tsaʼ bʌ i cʼajti jiñi tsaʼ bʌ i tsʼijbu ili salmo: «Aqʼueñon c ñaʼtʌbal chaʼan mic chʼʌmben isujm» (Sal. 119:66).

Tajol an muʼ bʌ caj i ñaʼtañob chaʼan wen tsajiloñʌchla ti chuqui mi lac mel. Anquese maʼañic miʼ yʌlob, tajol cheʼʌch miʼ ñaʼtañob bajcheʼ David cheʼ bʌ tsiʼ yʌlʌ: «An cabʌl a pusicʼal».