¿Wen pejcʌbilix baʼ chaʼan jiñi temaj tac maxto bʌ wen jalic loqʼuem ti Lac Tsictesʌbentel? Qʼuele mi mucʼʌch i mejlel a jacʼ ili cʼajtiya tac:

¿Chuqui yom miʼ melob jiñi superintendentejob i chaʼan circuito, jiñi ancianojob, o yambʌlob, cheʼ bʌ an chuqui miʼ subentelob tiʼ yorganización Dios?

Ti ora yom miʼ jacʼob. Miʼ mejlel i cʼajtibeñob i bʌ: «¿Muʼ ba c suben jiñi hermanojob chaʼan xucʼul yom miʼ yajñelob ti Jehová? ¿Ti ora ba mic jacʼ muʼ bʌ i yʌl i yorganización Dios?» (w16.11, i yopol 14).

¿Jalixqui tsaʼ ajñiyob tiʼ tojlel Babilonia jiñi isujm bʌ xñoptʼañob?

Jiñʌch cheʼ bʌ tsaʼ chʌmi jiñi cojix bʌ apóstol, cheʼ jiñi, an ñucoʼ bʌ i yeʼtel tsaʼ bʌ caji i tempañob i bʌ. Jiñi Iglesia yicʼot yumʌl tsaʼ caji i yʌcʼob ti cʌjñel jiñi mach bʌ isujmic ñopbalʌl, i tsiʼ ñopoyob i ñʌjchʼesan jiñi xñoptʼañob bombiloʼ bʌ lajaloʼ bʌ bajcheʼ jiñi trigo. Pero cheʼ maxto cʼoti jiñi jabil 1914, jiñi xñoptʼan bombiloʼ bʌ tsaʼ cajiyob ti loqʼuel ti jiñi mach bʌ isujmic ñopbalʌl (w16.11, i yopol 24 cʼʌlʌl ti 26).

¿Chuqui yom i yʌl jiñi tʼan «muʼ bʌ i chʌn jacʼ i tsucul pusicʼal» yicʼot «muʼ bʌ i chʌn jacʼ jini espíritu»? (Ro. 8:6)

Jiñi muʼ bʌ i chʌn jacʼ i tsucul pusicʼal yaʼ jax an i ñaʼtʌbal ti chuqui yom, i jin jach miʼ chʌcʌ al. Jiñi muʼ bʌ i chʌn jacʼ jiñi espíritu miʼ yʌcʼ i pensar tiʼ chaʼan bʌ Dios i miʼ chaʼlen wersa chaʼan miʼ ñaʼtan cheʼ bajcheʼ Dios. Miʼ yʌcʼ chaʼan jiñi chʼujul bʌ espíritu miʼ tojʼesʌben i pensar. Cheʼ mi lac chʌn jacʼ lac tsucul pusicʼal, yom i yʌl chʌmel. Cheʼ mi lac chʌn jacʼ jiñi espíritu, yom i yʌl cuxtʌlel yicʼot ñʌchʼtʌlel (w16.12, i yopol 11 cʼʌlʌl ti 14).

¿Chuqui miʼ mejlel lac mel chaʼan maʼañic mi laj cʌlʌx chaʼlen pensal?

Ñaxan mele jiñi ñumen i cʼʌjñibal bʌ, cʌñʌ chaʼan an jach baqui chilil maʼ cʼotel, aqʼuen i yorajlel cʼaj o ti jujumpʼejl qʼuin, wen ñaʼtan i melbal tac Jehová, yom chʌn tijicñayet, mele ejercicio yicʼot wen jach i yorajlel yom maʼ wʌyel (w16.12, i yopol 18 yicʼot 19).

¿Chucoch ñuc i cʼʌjñibal cheʼ mi lac pʌs lac pecʼlel?

Mi añʌch lac pecʼlel maʼañic mi caj laj cʌlʌx qʼuel lac bʌ ti ñuc yicʼot mi caj lac ñaʼtan chaʼan pʼisbil jach chuqui miʼ mejlel lac mel. Yom mi laj cʼajtesan chaʼan jiñi muʼ bʌ lac mel miʼ mejlel i ticʼlan yambʌlob (w17.01, i yopol 16).

¿Chuqui miʼ pʌs chaʼan Dios tsaʼʌch i tojʼesa majlel jiñi junmojt muʼ bʌ i pʌsob bij cheʼ ti ñaxam bʌ siglo cheʼ bajcheʼ woliʼ mel tiʼ tojlel jiñi Junmojt muʼ bʌ i pʌsob bij ili ora?

Jiñi chʼujul bʌ espíritu tsiʼ coltayob chaʼan miʼ chʼʌmbeñob isujm jiñi cʌntesʌntel tac am bʌ ti Biblia, tsiʼ tajayob i coltʌntel ti ángelob chaʼan jiñi subtʼan yicʼot tsiʼ chʼʌmʌyob ti ñuc i tojʼesʌntelob tiʼ Tʼan Dios. Cheʼʌch woliʼ yujtel jaʼel ili ora (w17.02, i yopol 24 cʼʌlʌl ti 26).

¿Chuqui tac miʼ coltañonla laj cʌcʼ ti ñuc jiñi i tojol mulil?

Jiñʌch cheʼ mi lac ñaʼtan majqui tsiʼ yʌcʼʌ, chucoch tsiʼ yʌcʌ, chuqui tsiʼ mele chaʼan miʼ yʌcʼ yicʼot bajcheʼ miʼ coltañonla. Ili chʌnchajp yom mi lac wen ñaʼtan (wp17.2, i yopol 4 yicʼot 5).

¿Muʼ baʼ i mejlel i qʼuextan i tʼan juntiquil xñoptʼan anquese tsaʼix i lon alʌ chuqui mi caj i mel?

Anquese yomʌch mi lac tsʼʌctesan lac tʼan, an i tajol yom mi lac chaʼ wen ñaʼtan. Cheʼ bʌ jiñi quixtañujob ti Nínive tsiʼ cʌyʌyob i mul, Dios tsiʼ yʌlʌ chaʼan maʼañix mi caj i jisan jiñi tejclum. Mi an chuqui miʼ qʼuextʌyel o an chuqui miʼ tsijib tsictesʌntel, tajol yom mi laj qʼuextan bajcheʼ mi lac ñaʼtan (w17.03, i yopol 13 yicʼot 14).

¿Chucoch mach yomic mi laj cʌl yambʌlob?

Come miʼ mejlel i ñumen pʼojlesan jiñi wocol, i ñumen tsʌts to bajcheʼ jiñi. Anquese isujm o mach isujmic woli bʌ la cʌl, mach yomic mi lac wis al muʼ bʌ i mejlel i low yañoʼ bʌ come maʼañic mi caj i tojʼesan jiñi wocol (w17.04, i yopol 19).