1, 2. ¿Chuqui jiñi yom bʌ mi lac ñop? (Qʼuele jiñi dibujo).

CHEʼ bajcheʼ tsaʼ laj qʼuele ti yambʌ temaj, jiñi Diablo miʼ yʌl chaʼan Jehová maʼañic tiʼ wenta miʼ chaʼlen yumʌl, i chaʼan jiñi quixtañujob ñumen wen mi caj yajñelob cheʼ miʼ bajñel yumañob i bʌ. Pero ¿isujm ba jiñi? Laʼ lac ñaʼtan chaʼan jiñi yom bʌ i bajñel yumañob i bʌ mucʼʌch i chumtʌlob tiʼ pejtelel ora, ¿ñumen wem ba mi caj i yajñelob? ¿Ñumen tijicñayoʼ ba cheʼ miʼ chumtʌlob tiʼ pejtelel ora yicʼot cheʼ junyaj librejobic chaʼan miʼ melob (chaʼleñob) chuqui yomob?

² Jatet jach miʼ mejlel a jacʼ iliyi. Ti lac pejtelel yom mi lac wen ñaʼtan. Yom mi lac ñop chaʼan Jehová añʌch tiʼ wenta miʼ chaʼlen yumʌntel, chaʼan jiñʌch jiñi ñumen wem bʌ yicʼot yom mi la cʌqʼuen laj coltaya. Jiñi Biblia miʼ subeñonla chucoch mucʼʌch i mejlel lac ñop. Jumpʼejl ejemplo, laʼ laj qʼuel muʼ bʌ i yʌl chaʼan chucoch jiñʌch an tiʼ wenta miʼ chaʼlen yumʌntel.

3. ¿Chucoch cojach an tiʼ wenta Jehová chaʼan miʼ chaʼlen yumʌntel?

³ Cojach Jehová an tiʼ wenta chaʼan miʼ chaʼlen yumʌntel come jiñʌch jiñi Dios mach bʌ añic i pʼisol i pʼʌtʌlel yicʼot tsaʼ bʌ i Meleyonla (1 Cr. 29:11; Hch. 4:24). Jiñi apóstol Juan tsiʼ qʼuele ti jumpʼejl ñajal cheʼ bʌ jiñi 144 mil muʼ bʌ caj i chaʼleñob yumʌntel  yicʼot Cristo woli (choncol) i yʌlob: «Utsʼat c Yum lojon. Yom miʼ sujbel a ñuclel yicʼot a cʼuxbintel yicʼot a pʼʌtʌlel, come jatet tsaʼ mele pejtelel chuqui tac an. Tiʼ pejtelel tsaʼ mejli chaʼan cheʼʌch a wom. Tsaʼ laj aqʼue i cuxtʌlel» (Ap. 4:11). Tiʼ pejtelel chuqui an i melbalʌch Jehová, i jiñʌch an tiʼ wen chaʼan miʼ yumañonla yicʼot miʼ yuman jiñi ángelob.

4. ¿Chucoch mach weñic woli bʌ lac yajcan lac mel cheʼ mi laj contrajin Jehová?

⁴ Satanás maʼañic chuqui melbil i chaʼan, i maʼañic tiʼ wenta chaʼan miʼ yuman jiñi panchan yicʼot pañimil. Jiñi Satanás, Adán yicʼot Eva tsiʼ chanʼesayob i bʌ come tsiʼ contrajiyob bajcheʼ miʼ chaʼlen yumʌntel Jehová (Jer. 10:23). Isujmʌch chaʼan miʼ mejlel i yajcañob chuqui yomob i mel, i tiʼ caj jiñi tsiʼ cʌyʌyob Dios. Pero mach cheʼic yom tsiʼ meleyob. Mucʼʌch i mejlel lac yajcan chuqui la com lac mel ti jujumpʼejl qʼuin, pero mach yomic i yʌl chaʼan mi lac mejlel ti sujtel tiʼ contra jiñi tsaʼ bʌ i Meleyonla. Cheʼ mi la cʌcʼ lac bʌ tiʼ contra Jehová, mach weñic chuqui woli (yʌquel) lac yajcan lac mel. I cʼʌjñibalʌch cheʼ miʼ yumañonla Dios.

5. ¿Chucoch miʼ mejlel lac ñop chaʼan tojʌch tiʼ pejtelel muʼ bʌ i ñaʼtan i mel Jehová?

⁵ Añʌch yambʌ junchajp chucoch Jehová añʌch tiʼ wenta miʼ chaʼlen yumʌntel: Toj miʼ mel i yeʼtel (troñel). Jehová miʼ yʌl: «I Yumon. Wolic pʌsben i yutslel c pusicʼal. Mic chaʼlen chuqui toj. Mic mel winicob xʼixicob ti toj ila ti pañimil. Come tijicñayon cheʼ bajcheʼ jini» (Jer. 9:24). Yaʼʌch chucul tiʼ tojlel pejtelel chuqui toj. Mach cʼʌñʌlic miʼ qʼuel chuqui mi caj i mel tiʼ mandar wiñicob chaʼan miʼ ñaʼtan chuqui jiñi toj bʌ. I jiñi ley tac melbil bʌ i chaʼan wiñicob yaʼʌch chucul tiʼ chaʼan bʌ Jehová. Jiñi Biblia miʼ yʌl: «Toj maʼ chaʼlen meloñel ti a yumʌntel come tojet». Jin chaʼan, miʼ mejlel lac ñop chaʼan tojʌch jiñi i mandar tac, jiñi principio yicʼot chuqui miʼ yajcan i mel (Sal. 89:14; 119:128). Pero Satanás, muʼ bʌ i yʌl chaʼan Jehová mach tojic bajcheʼ miʼ chaʼlen yumʌntel, maʼañic melbil chuqui tac toj ila ti pañimil (mulawil).

6. Alʌ junchajp chucoch Jehová añʌch tiʼ wenta miʼ chaʼlen yumʌntel

⁶ Añʌch yambʌ chucoch Jehová an tiʼ wenta miʼ chaʼlen yumʌntel, jiñʌch cheʼ wen an i ñaʼtʌbal chaʼan miʼ mejlel i cʌntan pejtel melbil bʌ i chaʼan. Jumpʼejl ejemplo, tsiʼ yʌqʼue i pʼʌtʌlel i Yalobil chaʼan miʼ mejlel i lajmesan cʼamʌjel tac mach bʌ añic miʼ mejlel i tsʼʌcan mi juntiquilic doctor (Mt. 4:23, 24; Mr. 5:25-29). Jiñi tsaʼ bʌ i mele Jesús mach jumpʼejlic milagro chaʼan Dios, come yujil bajcheʼ miʼ chaʼlen eʼtel jiñi lac bʌcʼtal i miʼ mejlel i tsʼʌcan. Cheʼ jaʼel, yujil bajcheʼ miʼ mejlel i chaʼ chʼojyesan jiñi chʌmeñoʼ bʌ (sajtemoʼ bʌ) i miʼ mejlel i lajmesan muʼ bʌ i yujtel tac, bajcheʼ jiñi icʼ jaʼal.

7. ¿Chucoch ñumen ñuc i ñaʼtʌbal Jehová bajcheʼ i chaʼan ili pañimil?

⁷ Jiñi quixtañujob am bʌ tiʼ cʼʌb Satanás miʼ chʌn sʌclañob bajcheʼ miʼ mejlel i jisañob jiñi wocol am bʌ ti pañimil. Cojach Jehová an i ñaʼtʌbal chaʼan bajcheʼ miʼ mejlel i yʌcʼ ñʌchʼtʌlel ila ti pañimil (Is. 2:3, 4; 54:13). Cheʼ miʼ lac ñumen cʌn jiñi i ñaʼtʌbal Dios, cheʼ mi caj la cubin bajcheʼ jiñi apóstol Pablo, tsiʼ yʌlʌ: «Wen cabʌl i yutslel i pusicʼal Dios. Maʼanic i pʼisol i ñaʼtʌbal yicʼot i pusicʼal. Mach mejlic laj cʌmben i ñaʼtʌbal. Mach mejlic lac chʼʌmben isujm jini muʼ bʌ i mel» (Ro. 11:33).

8. ¿Chuqui maʼ ñumen mulan chaʼan bajcheʼ miʼ chaʼlen yumʌntel Dios?

⁸ Jiñi Biblia mach cojach miʼ pʌs chaʼan  Jehová añʌch tiʼ wenta miʼ chaʼlen yumʌntel. Miʼ tsictesan jaʼel chucoch ñumen wen i yumʌntel bajcheʼ jiñi yambʌlob. Junchajp jiñʌch cheʼ miʼ chaʼlen yumʌntel yicʼot cʼuxbiya. Mi lac wen mulan bajcheʼ miʼ chaʼlen yumʌntel. Juntiquilʌch Dios yujil bʌ pʼuntaya, uts bʌ, jal bʌ miʼ michʼan yicʼot xucʼul bʌ (Éx. 34:6). Miʼ qʼuel ti ñuc i wiñicob. Ñumen wen miʼ cʌntañonla. Mach cheʼic bajcheʼ miʼ yʌl Satanás, Jehová maʼañic miʼ chʌquiben chuqui wen tac bʌ jiñi xucʼuloʼ bʌ tiʼ tojlel. Tsaʼto i yʌcʼʌ jiñi cʼuxbibil bʌ i Yalobil chaʼan mi lac mejlel ti chumtʌl tiʼ pejtelel ora (pejcan Salmo 84:11 yicʼot Romanos 8:32).

9. ¿Bajcheʼ mi lac ñaʼtan chaʼan i wentajoñʌchla Dios ti jujuntiquil?

⁹ Jehová yom chaʼan jiñi i tejclum miʼ taj i wenlel, pero miʼ qʼuel ti ñuc ti jujuntiquil. Jumpʼejl ejemplo, laʼ lac ñaʼtan tsaʼ bʌ ujti cheʼ tiʼ yorajlel juezob yaʼ ti Israel. Cheʼ bʌ 300 jab, Jehová tsiʼ cʼʌñʌ juezob chaʼan miʼ coltan jiñi Israel tiʼ tojel i contrajob. Anquese miʼ wen ujtel guerra ti jiñi bʌ ora, tsiʼ qʼuele ti wen juntiquil xʼixic i cʼabaʼ Rut, mach bʌ israelic, come cabʌl chuqui tsiʼ mele chaʼan miʼ yajñel tiʼ tejclum Jehová. Jehová tsiʼ yʌqʼue i bendición cheʼ tsiʼ yʌqʼue i ñoxiʼal yicʼot i yalobil. Cheʼ jaʼel, cheʼ bʌ Rut miʼ chaʼ chʼojyel mi caj i ñaʼtan chaʼan jiñi i yalobil juntiquilʌch i ñojteʼel jiñi Mesías. Yicʼot mi caj i yubin chaʼan tsaʼ bʌ ujti tiʼ tojlel tsaʼ tsʼijbunti cʌytʌl yaʼ ti Biblia i cʌmbil bajcheʼ Rut. ¿Bajcheʼ yubil mi caj i yubin maʼ wʌl? (Rt. 4:13; Mt. 1:5, 16).

10. ¿Tsʌts ba miʼ mel i yeʼtel Jehová? Tsictesan.

¹⁰ Jehová mach jontolic bʌ yumʌl mi juntiquilic maʼañic bʌ miʼ chʼʌmben isujm. Jiñi quixtañujob añoʼ bʌ tiʼ tojlel, librejob yicʼot tijicñayob (2 Co. 3:17). David tsiʼ yʌlʌ tiʼ tojlel Jehová: «Cabʌlʌch i cʼuxbintel yicʼot i ñuclel tiʼ tojel i wut. I tʼojol jax jini chʼujul bʌ i yajñib baʼ miʼ pʌs i pʼʌtʌlel» (1 Cr. 16:7, 27). Etán, juntiquil tsaʼ bʌ i tsʼijbu jiñi salmo, tsiʼ yʌlʌ jaʼel: «Tijicñayob muʼ bʌ i yubiñob i tʼan trompeta, come miʼ yajñelob ti a sʌclel. Tijicña miʼ yubiñob ti jujumpʼejl qʼuin muʼ bʌ i cʌñob a cʼabaʼ. Miʼ ñucʼañob i pusicʼal chaʼan tojet» (Sal. 89:15, 16).

11. Chaʼan mi lac ñop chaʼan cojach ñumen wen jiñi i yumʌntel Dios, ¿chuqui yom mi lac mel?

¹¹ Cheʼ mi lac wen ñaʼtʌben i yutslel Jehová, mi caj lac wen ñop chaʼan cojach ñumen wen jiñi i yumʌntel. Cheʼʌch mi caj la cubin lac bʌ bajcheʼ tsaʼ bʌ i tsʼijbu ili Salmo: «Utsʼat jumpʼejl qʼuin yaʼ ti mal a Templo. Mach utsʼatic jumpʼejl mil qʼuin ti jumpat» (Sal. 84:10). Maʼañic yambʌ muʼ bʌ i yʌcʼ tijicñʌyel. Jehová tsiʼ Meleyonla i jiñʌch yujil chuqui miʼ mejlel i yʌqʼueñonla lac tijicñʌyel, i mucʼʌch i yʌqʼueñonla tiʼ yutslel. Cheʼ an chuqui miʼ cʼajtibeñonla chaʼañʌch lac wenlel, i mucʼʌch i yʌqʼueñonla isujm bʌ tijicñʌyel cheʼ mucʼʌch lac jacʼben i tʼan anquese añʌch chuqui tsʌts bʌ yom mi lac mel (pejcan Isaías 48:17).

12. ¿Baqui bʌ i sujmlel cheʼ jin yom mi laj coltʌben i yumʌntel Jehová?

¹² Jiñi Biblia miʼ pʌs chaʼan cheʼ bʌ ujtemix jiñi mil jab i yumʌntel Cristo, an quixtañujob muʼ bʌ caj i contrajiñob i yumʌntel Jehová (Ap. 20:7, 8). ¿Chucoch? Come Satanás mi caj i chaʼ cojlel, mi caj i ñop chaʼan jiñi quixtañujob miʼ qʼuelob i bʌ ti ñuc chaʼan miʼ chaʼ lotiñob cheʼ bajcheʼ melbil i chaʼan ili ora. Tajol mi caj i yʌqʼuen i ñaʼtan jiñi quixtañujob chaʼan mach yʌlʌyic miʼ jacʼbeñob i tʼan Jehová chaʼan miʼ mejlelob ti chumtʌl tiʼ pejtelel ora. Pero iliyi, mach cheʼic miʼ cajel. Yom jach mi lac wen ñaʼtan mi machqui añic mi caj lac mulan jiñi lot muʼ bʌ caj i subeñonla. Cheʼ mucʼʌch laj cʼuxbin Jehová  yicʼot mi lac melben i yeʼtel come la cujil chaʼan uts yicʼot cojach yom bʌ miʼ chaʼlen yumʌntel ti panchan yicʼot ti pañimil, mi caj lac pʼajben i lot Satanás. Cojach mi caj lac mulan chumtʌl tiʼ tojlel i yumʌntel Dios, jiñi yom bʌ miʼ chaʼlen yumʌntel yicʼot am bʌ i cʼuxbiya.

13. ¿Bajcheʼ miʼ mejlel lac pʌs chaʼan woli la cʌqʼuen laj coltaya i yumʌntel Jehová?

¹³ Tsaʼix laj qʼuele chaʼan Jehová an tiʼ wenta miʼ chaʼlen yumʌntel, i jiñʌch ñumen wem bʌ yumʌl. Tiʼ sujm, cojach yom mi laj cʌqʼuen laj coltaya jiñi i yumʌntel. Ili mi la cʌqʼuen mi xucʼuloñʌchla yicʼot cheʼ mi lac chʌn melben i yeʼtel. Cheʼ jaʼel, yom mi lac mel cheʼ bajcheʼ miʼ mulan. Cheʼ bajcheʼ ili, mi lac pʌs chaʼan woli laj cʼuxbin bajcheʼ yilal miʼ chaʼlen yumʌntel i mach cojach woli la cʌqʼuen laj coltaya (pejcan Efesios 5:1, 2).

14. ¿Bajcheʼ miʼ mejlel i lajiñob Jehová jiñi ancianojob yicʼot i jol familiajob?

¹⁴ Jiñi Biblia miʼ pʌs chaʼan Jehová miʼ mel i yeʼtel yicʼot cʼuxbiya. Jin chaʼan, jiñi añoʼ bʌ i yeʼtel bajcheʼ i jol familia yicʼot ancianojob mach tsʌtsic mi caj i melob i yeʼtel mi mucʼʌch i cʼuxbiñob i yumʌntel Dios. Yomʌch miʼ lajiñob Jehová. Cheʼʌch tsiʼ mele jiñi Pablo, tsiʼ laji Dios yicʼot i Yalobil (1 Co. 11:1). Maʼañic tsiʼ yʌcʼʌ ti quisin mi tsaʼic i wersa xiqʼui jiñi yambʌlob chaʼan miʼ melob chuqui toj, yicʼot i yutslel tsiʼ coltayob (Ro. 12:1; Ef. 4:1; Flm. 8-10). Cheʼʌch miʼ mel Jehová. Jin chaʼan, cheʼʌch yom miʼ melob muʼ bʌ i cʼuxbiñob yicʼot miʼ coltʌbeñob i yumʌntel.

15. ¿Bajcheʼ mi lac pʌs chaʼan mucʼʌch lac mulan bajcheʼ miʼ chaʼlen yumʌntel Jehová?

¹⁵ ¿Bajcheʼ yambʌ miʼ mejlel laj coltʌben i yumʌntel Dios? Cheʼ mi lac jacʼben i tʼan jiñi waʼchocobiloʼ bʌ i chaʼan. Mi caj lac mel cheʼ bajcheʼ yom Jehová anquese maʼañic mi lac wen chʼʌmben isujm o maʼañic mi lac wen mulan jiñi tsaʼ bʌ i ñaʼtayob i mel.  Mach lajalic lac melbal bajcheʼ ili pañimil, pero yom mi lac mel ti utsʼat come cheʼʌch yom i yumʌntel Dios (Ef. 5:22, 23; 6:1-3; He. 13:17). Mi mucʼʌch lac jacʼ, mi caj lac taj lac wenlel come jiñʌch yom bʌ Jehová ti lac tojlel.

16. ¿Chuqui miʼ chʼʌmob ti ñuc cheʼ bʌ an chuqui miʼ yajcañob i mel jiñi muʼ bʌ i coltañob i yumʌntel Jehová?

¹⁶ Jiñi muʼ bʌ lac yajcan lac mel miʼ pʌs mi mucʼʌch laj coltan o maʼañic jiñi i yumʌntel Dios. Maʼañic miʼ subeñonla ti jujunchajp chuqui yom mi lac mel. Pero mucʼʌch i pʌsbeñonla chuqui miʼ ñaʼtan. Jumpʼejl ejemplo, maʼañic miʼ subeñonla baqui tac bʌ lac pislel yom mi lac lʌp (xoj) o maʼañic, pero mucʼʌch i subeñonla chaʼan yom wen jach mi lac lʌp lac pislel cheʼ bajcheʼ yom miʼ mel juntiquil xñoptʼan (1 T. 2:9, 10). Cheʼ jaʼel, Jehová mach yomic chaʼan mi la cʌcʼob ti yajlel o ti michʼan yambʌlob tiʼ caj chuqui mi lac yajcan lac mel (1 Co. 10:31-33). Mi lac pʌs chaʼan mucʼʌch laj coltan yicʼot mi laj cʼuxbin bajcheʼ miʼ chaʼlen yumʌntel cheʼ mucʼʌch lac chʼʌm ti ñuc chuqui miʼ ñaʼtan cheʼ an chuqui mi lac yajcan lac mel.

17, 18. Alʌ bajcheʼ tac miʼ mejlel i coltʌben i yumʌntel Jehová jiñi xñujpuñelob.

¹⁷ Laʼ laj qʼuel bajcheʼ jiñi xñujpuñelob miʼ mejlel i coltʌbeñob i yumʌntel Dios. An lamital xñujpuñelob muʼ bʌ i yʌlob chaʼan jiñi ñujpuñel wen wocol, mach cheʼic bajcheʼ tsiʼ lon ñaʼtayob i an muʼto bʌ i wiʼil ñaʼtañob i bʌ. ¿Chuqui miʼ mejlel i melob? Miʼ mejlel i ñaʼtañob bajcheʼ tsaʼ ajñi Dios yicʼot Israel. Jehová tsiʼ laja i bʌ bajcheʼ i ñoxiʼal Israel (Is. 54:5; 62:4). Tsaʼʌch i wen taja wocol ili «ñujpuñel». Pero Jehová maʼañic tsiʼ waʼ cʌyʌ ti ora. Mach junsujtelic jach tsiʼ ñusʌbe i mul jiñi israelob yicʼot xucʼul tsaʼ ajñi ti jiñi trato tsaʼ bʌ i mele yicʼotob (pejcan Salmo 106:43-45). Miʼ lʌcʼtesañonla tiʼ tojlel Jehová jiñi xucʼul bʌ i cʼuxbiya, ¿ñomach?

¹⁸ Jiñi xñoptʼañob ñujpuñemoʼ bʌ muʼ bʌ i cʼuxbiñob Jehová mucʼʌch i ñop i lajiñob. Mi mach chuculic ti Biblia, mach yomic miʼ ñop i jisañob i ñujpuñel cheʼ bʌ añob i wocol. Yujilob chaʼan jiñʌch Jehová tsaʼ bʌ i temeyob yicʼot yom miʼ tem ajñelob tiʼ pejtelel ora. Jiñi Chʼujul bʌ Tsʼijbujel miʼ yʌl chaʼan mi an tsaʼ bʌ i mele tsʼiʼlel miʼ mejlel i chaʼlen i bʌ ti divorciar i miʼ chaʼ mejlel ti ñujpuñel (Mt. 19:5, 6, 9). Cheʼ miʼ chaʼleñob wersa chaʼan wen miʼ yajñelob tiʼ ñujpuñel, woliʼ coltʌbeñob i yumʌntel Jehová.

19. ¿Chuqui yom mi lac mel cheʼ mi lac taj lac sajtemal?

¹⁹ An i tajol mi caj la cʌqʼuen i chʼijiyemlel Jehová come xmulilonla. Jehová yujilʌch jiñi, jin chaʼan tsiʼ choco tilel i Yalobil chaʼan miʼ yʌcʼ i cuxtʌlel ti laj caj come miʼ cʼuxbiñonla. Cheʼ mi lac taj lac sajtemal yomʌch mi laj cʼajtiben Jehová chaʼan miʼ ñusʌbeñonla (1 Jn. 2:1, 2). Mach yomic mi lac chʌn cʼajtesan jiñi lac sajtemal, yom mi laj qʼuel chuqui miʼ mejlel laj cʌn ti jiñi mach bʌ weñic tsaʼ lac mele. Mi chʌn lʌcʼʌl mi la cajñel ti Dios, mi caj i ñusʌbeñonla yicʼot mi caj i coltañonla chaʼan mi lac chaʼ ajñel ti wen yicʼot mi lac ñusan jiñi wocol tac muʼ bʌ caj i tilel (Sal. 103:3).

20. ¿Chucoch yomʌch mi laj coltʌben i yumʌntel Jehová?

²⁰ Jehová mi caj i yuman pejtelel jiñi quixtañujob yaʼ ti tsijiʼ bʌ pañimil, i ti lac pejtelel mi caj laj cʌn toj bʌ i bijlel (Is. 11:9). Pero ili ora cabʌlix chuqui woli laj cʌn. Wen lʌcʼʌlix jiñi qʼuin cheʼ bʌ maʼañix majqui mi caj i yʌl chaʼan Jehová maʼañic tiʼ wenta miʼ chaʼlen yumʌntel. I yorajlelix chaʼan mi laj coltʌben i yumʌntel cheʼ mi lac jacʼben i tʼan, xucʼul mi lac melben i yeʼtel yicʼot mi lac chaʼlen wersa lac lajin tiʼ pejtelel chuqui mi lac mel.