1, 2. a) Alʌ uxchajp wen letsem bʌ i tojol aqʼuebil i chaʼañonla Jehová. b) ¿Chuqui mi caj laj qʼuel ti ili temaj?

COJACH Dios ñumen cabʌl i chubʌʼan, i chaʼañʌch tiʼ pejtelel chuqui an (1 Cr. 29:11, 12). Cheʼ jaʼel, juntiquilʌch uts bʌ Tatʌl, jin chaʼan miʼ yʌqʼuen cabʌl chʼujul bʌ i chubʌʼan jiñi muʼ bʌ i wen qʼuelob ti ñuc. Mi caj lac taj ti tʼan uxchajp wen letsem bʌ i tojol: Jiñi i Yumʌntel Dios, jiñi subtʼan yicʼot jiñi i sujmlel tac am bʌ tiʼ Tʼan. ¿Mach ba muqʼuicʌch lac wen qʼuel ti ñuc jiñi? Pero mi mach tsajaloñicla, tajol maʼañix mi caj lac chʌn qʼuel ti ñuc. Chaʼan maʼañic mi la cujtel bajcheʼ jiñi, yom mi lac wen locʼsʌben i wenlel yicʼot mi lac weñʼesan laj cʼuxbiya tiʼ tojlel. Jesús tsiʼ yʌlʌ: «Baqui jach tempʌbil laʼ chubʌʼan yaʼ mi laʼ teñe acʼ laʼ pusicʼal» (Lc. 12:34).

² Mi caj laj qʼuel bajcheʼ miʼ mejlel laj cʌntan yicʼot lac pʼʌtʼesan laj cʼuxbiya yicʼot mi lac ñumen qʼuel ti ñuc jiñi Yumʌntel, lac subtʼan yicʼot jiñi i sujmlel. Laʼ lac wen ñaʼtan bajcheʼ tac miʼ mejlel lac ñumen pʼʌtʼesan laj cʼuxbiya ti ili wen letsem tac bʌ i tojol.

3. ¿Chuqui tsiʼ mele jiñi wiñic tsaʼ bʌ i taja jumpʼejl perla wen letsem bʌ i tojol? (Qʼuele jiñi dibujo am bʌ tiʼ tejchibal).

³ (Pejcan Mateo 13:45, 46). Jesús tsiʼ taja ti tʼan juntiquil wiñic woli (choncol) bʌ i mʌn ñumel perla tac. Juntiquil wiñic bajcheʼ iliyi, tajol cabʌlix perla mʌmbil i chaʼan o chombil i chaʼan. Pero ti jumpʼejl bʌ qʼuin, ili wiñic tsiʼ taja jumpʼejl wen i tʼojol jax bʌ tsaʼ bʌ i wen mulaj. Chaʼan miʼ mejlel i mʌn, tsiʼ choño tiʼ pejtelel chuqui an i chaʼan. Ili miʼ yʌqʼueñonla lac ñaʼtan chaʼan wen letsemʌch i tojol tsiʼ qʼuele.

4. Mi wen ñucʌch mi laj qʼuel jiñi i Yumʌntel Dios cheʼ bajcheʼ tsiʼ qʼuele jiñi perla jiñi wiñic, ¿chuqui mi caj lac mel?

⁴ ¿Chucoch yom mi la cʌcʼ ti ñuc jiñi tsaʼ bʌ i yʌlʌ Jesús? Jiñi i sujmlel chaʼan i Yumʌntel Dios lajalʌch bajcheʼ jiñi perla. Mi mucʼʌch laj qʼuel ti ñuc bajcheʼ jiñi wiñic tsiʼ qʼuele ti ñuc jiñi perla, ti jumpʼejl lac pusicʼal mi caj laj cʌy lac chubʌʼan chaʼan mi la cochel tiʼ wenta jiñi Yumʌntel (pejcan Marcos 10:28-30). Laʼ la cʌl chaʼtiquil tsaʼ bʌ i meleyob bajcheʼ jiñi.

5. ¿Chuqui tsiʼ mele Zaqueo chaʼan jiñi Yumʌntel?

⁵ Zaqueo juntiquilʌch xchʼʌm tojoñel tsaʼ bʌ i wen taja i chubʌʼan come miʼ xujchʼiben i taqʼuin wiñicob xʼixicob (quixtañujob) (Lc. 19:1-9). Pero cheʼ bʌ tsiʼ yubi chaʼan Jesús woli (yʌquel) i tsictesan chaʼan i Yumʌntel Dios, tsiʼ qʼuele chaʼan jiñʌch wen letsem bʌ i tojol i ti orajach tsiʼ qʼuexta i melbal. Tsiʼ yʌlʌ: «Awilan, c Yum, mi caj cʌqʼueñob ojlil c chubʌʼan jini mach bʌ añobic i chubʌʼan. Mi tsaʼ c chilbe i chubʌʼan winic mi caj c chaʼ sutqʼuiben uxyajl i ñumel». Ti jumpʼejl i pusicʼal tsiʼ chaʼ sutqʼui tiʼ pejtelel tsaʼ bʌ i xujchʼi yicʼot tsiʼ cʌyʌ i wen mulan chubʌʼañʌl tac.

6. ¿Chuqui tsiʼ mele juntiquil xʼixic chaʼan jiñi Yumʌntel, i chucoch?

⁶ Juntiquil xʼixic cʌn chumul bʌ yicʼot yambʌ xʼixic, tsiʼ taja i yubin jiñi wen tʼan chaʼan Yumʌntel. Cheʼ jaʼel, an i yeʼtel (troñel) ti jumpʼejl organización muʼ bʌ i coltan jiñi muʼ bʌ i chaʼ wʌlʌc mulañob i bʌ. Pero cheʼ bʌ tsiʼ cʌñʌ muʼ bʌ i pʌs jiñi Biblia, tsiʼ qʼuele bajcheʼ cʼamel i cʼʌjñibal jiñi i sujmlel tac chaʼan bʌ i Yumʌntel Dios yicʼot chaʼan yom miʼ qʼuextan i melbal (1 Co. 6:9, 10). Jiñi i pusicʼal tsiʼ ñijca chaʼan miʼ cʌy jiñi organización baqui an yicʼot chaʼan miʼ cʌy jiñi yambʌ xʼixic. Tsiʼ chʼʌmʌ jaʼ cheʼ ti 2009, tsaʼ ñumi jumpʼejl jab i tsaʼ ochi bajcheʼ precursora regular. Jiñi i cʼuxbiya ti Jehová yicʼot tiʼ Yumʌntel tsaʼ ñumen pʼʌtʼa bajcheʼ jiñi i tsucul melbal (Mr. 12:29, 30).

7. Chaʼan maʼañic miʼ cʼunʼan laj cʼuxbiya tiʼ Yumʌntel Dios, ¿chuqui yom mi laj cʌntan ti lac tojlel?

⁷ Cabʌlonla an laj qʼuexta lac melbal chaʼan mi la cajñel tiʼ tojlel i Yumʌntel Dios (Ro. 12:2). Pero mach yaʼic jach jaxʌl yaʼi. Yom mi laj cʌntan lac bʌ chaʼan maʼañic chuqui miʼ cʼunʼesan laj cʼuxbiya ti jiñi Yumʌntel, mi jiñic to jiñi i mulʌntel chubʌʼañʌl yicʼot jiñi tsʼiʼlel (Pr. 4:23; Mt. 5:27-29). Añʌch chuqui yambʌ wen letsem bʌ i tojol aqʼuebil i chaʼañonla Jehová chaʼan miʼ coltañonla lac chʌn cʼuxbin tiʼ pejtelel lac pusicʼal jiñi i Yumʌntel.

8. a) ¿Chucoch tsiʼ yʌlʌ Pablo chaʼan jiñi lac subtʼan lajal bajcheʼ «cʼax letsem tac bʌ i tojol lotol bʌ ti ucʼum»? b) ¿Bajcheʼ tsiʼ pʌsʌ Pablo chaʼan tsaʼʌch i qʼuele ti ñuc jiñi subtʼan?

⁸ Yom mi laj cʼajtesan chaʼan Jesús tsiʼ yʌlʌ chaʼan yom mi lac chaʼlen subtʼan yicʼot mi laj cʌntesan yambʌlob chaʼan i Yumʌntel Dios (Mt. 28:19, 20). Jiñi apóstol Pablo tsiʼ yʌlʌ chaʼan jiñi subtʼan wen ñuc i cʼʌjñibal, i tsiʼ laja bajcheʼ «cʼax  letsem tac bʌ i tojol lotol bʌ ti ucʼum» (2 Co. 4:7; 1 Ti. 1:12). Anquese xmulilonla, lajalonla bajcheʼ ucʼum melbil bʌ ti lum, jiñi wen tʼan miʼ mejlel i yʌqʼueñonla laj cuxtʌlel yicʼot i cuxtʌlel jiñi muʼ bʌ lac subeñob. Jin chaʼan, Pablo tsiʼ yʌlʌ: «Cheʼʌch mic mel chaʼan miʼ cʌñob jini wen tʼan, chaʼan mic taj c wenlel jaʼel ti jini wen tʼan quicʼot jini muʼ bʌ i ñopob» (1 Co. 9:23). Pablo tsiʼ wen qʼuele ti ñuc jiñi subtʼan, jin chaʼan tsiʼ wen chaʼle wersa chaʼan miʼ sujtesan ti xcʌntʼan jiñi quixtañujob (pejcan Romanos 1:14, 15 yicʼot 2 Timoteo 4:2). I cʼuxbiya ti jiñi wen tʼan tsiʼ colta i lʌtʼ jiñi tsʌts bʌ tsʼaʼlentel (1 Ts. 2:2). ¿Bajcheʼ miʼ mejlel lac pʌs cheʼ bʌ yilal laj cʼuxbiya jaʼel bajcheʼ jiñi?

9. Alʌ bajcheʼ tac miʼ mejlel lac pʌs chaʼan mi laj qʼuel ti ñuc jiñi subtʼan.

⁹ Pablo tiʼ subu jiñi wen tʼan ti bajcheʼ jach ora, i cheʼʌch tsiʼ pʌsʌ chaʼan miʼ qʼuel ti ñuc jiñi subtʼan. Joñonla bajcheʼ jach ora mucʼonla ti subtʼan jaʼel, jin jach baqui yicʼot ti jujumpʼejl otot, cheʼʌch bajcheʼ tsiʼ mele jiñi apóstolob yicʼot yambʌ xñoptʼañob ti ñaxam bʌ siglo (Hch. 5:42; 20:20). Laʼ lac sʌclan bajcheʼ miʼ mejlel lac suben cabʌl quixtañu jiñi wen tʼan. Jumpʼejl ejemplo, laʼ ochiconla ti precursor auxiliar o regular mi mucʼʌch lac mejlel, laʼ laj cʌn yambʌ tʼan o laʼ majliconla ti subtʼan ti yambʌ tejclum o país (Hch. 16:9, 10).

10. ¿Chuqui tac ti bendición tajbil i chaʼan Irene chaʼan tsiʼ chaʼle wersa ti subtʼan?

¹⁰ Laʼ lac ñaʼtan tiʼ tojlel Irene, juntiquil hermana i bajñel jaxto bʌ chʼoyol bʌ ti Estados Unidos tsaʼ bʌ i mulaj i suben wen tʼan jiñi quixtañujob chʼoyoloʼ bʌ ti Rusia. Cheʼ bʌ tsiʼ teche ti 1993, an jaxto 20 xsubtʼañob ti jiñi grupo am bʌ ti Nueva York. I cheʼ bʌ añix 20 jab i cajel ti coltaya ti jiñi grupo, tsiʼ yʌlʌ chaʼan maxto wen yujilic tʼan ti ruso. Pero Jehová añʌch i yʌqʼue i bendición jiñi Irene yicʼot yambʌ hermanojob chaʼañob i chʼejlel. Ili ora añix 6 congregación ti tʼan ruso yaʼ ti Nueva York. Tsaʼ bʌ i yʌqʼueyob estudio jiñi Irene, 15 tsaʼix bʌ i chʼʌmʌyob jaʼ, an añobix bʌ ti Betel, precursorob o ancianojob. Irene miʼ yʌl: «An i tajol mic ñaʼtan chuqui tac yambʌ tsaʼ mejli c mel, pero wen cujil chaʼan maʼañic yambʌ muʼ bʌ i ñumen aqʼueñon c tijicñʌyel». Tsiquil chaʼan Irene mucʼʌch i wen qʼuel ti ñuc jiñi subtʼan.

11. ¿Chuqui mi lac taj cheʼ mucʼʌch lac chʌn chaʼlen subtʼan anquese an lac tsʼaʼlentel?

¹¹ Mi mucʼʌch laj qʼuel ti ñuc lac subtʼan anquese mi lac tsʼaʼlentel, mi caj lac chʌn tsictesan cheʼ bajcheʼ tsiʼ mele Pablo (Hch. 14:19-22). Cheʼ ti 1930 cʼʌlʌl tiʼ tejchibal 1940, jiñi hermanojob ti Estados Unidos tsiʼ tajayob cabʌl i tsʼaʼlentel. Pero xucʼul tsaʼ chʌn ajñiyob bajcheʼ Pablo, i maʼañic tsiʼ cʌyʌyob subtʼan. Mach junsujtelic jach tsajñiyob ti melobʌjʌl chaʼan miʼ  coltañob i bʌ. Ti 1943, cheʼ bʌ tsaʼ mʌjli jumpʼejl meloñel yaʼ ti Ñuc bʌ Melobʌjʌl ti Estados Unidos, jiñi hermano Nathan Knorr tsiʼ yʌlʌ: «Iliyi tsaʼ mʌjli lac chaʼan ti laʼ coltaya. Cheʼ tsaʼic i cʌyʌyob subtʼan jiñi xsubtʼañob, maʼañic chuqui tsaʼ mejli ti tsictesʌntel yaʼ ti Ñuc bʌ Melobʌjʌl. Quermañojob, xsubtʼañetbʌla tiʼ pejtelel pañimil maʼañic bʌ mi laʼ cʌy laʼ bʌ, tsaʼix ñʌjchʼi jiñi lac tsʼaʼlentel chaʼañʌch laʼ coltaya. Jiñi i xucʼtʌlel i tejclum Jehová jiñʌch tsaʼ bʌ i chaʼle coltaya chaʼan miʼ mejlel lac mʌl». Ti yan tac bʌ tejclum jaʼel, jiñi hermanojob mʌlbilob i chaʼan jiñi meloñel tac tiʼ caj i xucʼtʌlelob. Tiʼ sujm, jiñi laj cʼuxbiya ti subtʼan miʼ mejlel i mʌlben jiñi tsʼaʼlentel.

12. ¿Chuqui la com lac mel?

¹² Mi mucʼʌch laj qʼuel bajcheʼ wen letsem bʌ i tojol jiñi eʼtel tsaʼ bʌ i yʌqʼueñonla Jehová, mach jasʌlic mi caj la cubin mi «cabʌl ora» woli laj cʌcʼ. Mi caj lac chaʼlen wersa chaʼan mi lac «sub jini wen tʼan chaʼan i yutslel i pusicʼal Dios» (Hch. 20:24; 2 Ti. 4:5). ¿Chuqui mi caj lac pʌs ti jiñi subtʼan? Laʼ laj qʼuel yambʌ letsem bʌ i tojol muʼ bʌ i yʌqʼueñonla Dios.

13, 14. a) ¿Baqui bʌ jiñi letsem tac bʌ i tojol tsiʼ taja ti tʼan Jesús yaʼ ti Mateo 13:52? b) ¿Chuqui miʼ mejlel lac mel chaʼan mi lac ñumen mulan laj cʌn?

¹³ Jiñi i sujmlel am bʌ i yʌqʼueyonla Jehová, jiñi Dios am bʌ yicʼot i sujmlel, jiñʌch i yuxpʼejlel muʼ bʌ caj lac taj ti tʼan (2 S. 7:28; Sal. 31:5). Juntiquilʌch Tatʌl am bʌ i yutslel muʼ bʌ i cʌntesan jiñi mucʼʌch bʌ i bʌcʼñañob. Cʼʌlʌl cheʼ tsaʼ laj cʌñʌ jiñi i sujmlel, chʌcʌ pejcʌbil lac chaʼan jiñi Biblia yicʼot jiñi jun tac, ajñemonla ti colem tempa bʌ yicʼot tempa bʌ tac chaʼan mi lac ñumen cʌn. Jin chaʼan, ili ora tempʌbilix lac chaʼan jiñi tsijiʼ bʌ yicʼot ñoxix tac bʌ i sujmlel letsem bʌ i tojol tsaʼ bʌ i yʌlʌ Jesús (Pejcan Mateo 13:52). Mi mucʼʌch lac sʌclan bajcheʼ wen letsem tac bʌ i tojol jiñi i sujmlel, Jehová mi caj i coltañonla chaʼan mi lac ñumen taj (pejcan Proverbios 2:4-7). ¿Bajcheʼ?

¹⁴ Yomʌch mi lac pejcan jiñi Biblia yicʼot jiñi jun tac, i yom mi lac wen ñaʼtan. Cheʼʌch mi caj laj cʌn jiñi maxto bʌ cʌmbilic lac chaʼan i caj laj qʼuel bajcheʼ tsijib tac bʌ jaʼel (Jos. 1:8, 9; Sal. 1:2, 3). Jiñi ñaxam bʌ revista Lac Tsictesʌbentel tsaʼ bʌ loqʼui ti Inglés cheʼ ti julio i chaʼan 1879, tsiʼ yʌlʌ: «Jiñi i sujmlel lajalʌch bajcheʼ jumpʼejl ñich teʼ am bʌ tiʼ tiquiñal pañimil, joyol bʌ ti mateʼel yomix bʌ i tsʌnsan. Mi a wom a taj, yom chʌn yʌxʌl a wo, [...] chaʼan miʼ mejlel a chʼʌm, yom maʼ ñuctʌl a tucʼ. Mach jasʌlic yom mi a wubin mi tsaʼix a taja jumpʼejl. [...] Chʌn sʌclan yicʼot loto». Yom mi lac wen mulan lac ñumen cʌn jiñi i sujmlel am bʌ ti Biblia.

15. a) ¿Baqui tac bʌ jiñi i sujmlel miʼ mejlel laj cʌl bajcheʼ jiñi «oñiyix bʌ»? b) ¿Baqui bʌ jiñi ñumen ñuc bʌ chaʼañet?

¹⁵ Cheʼ mi lac tech lac pejcan jiñi lac Biblia, mi lac taj ñuc tac bʌ i sujmlel. Jiñʌch jiñi «oñiyix bʌ» miʼ mejlel laj cʌl come jintacʌch tsaʼ bʌ lac ñaxan cʌñʌ yicʼot tsaʼ la cʌcʼʌ ti ñuc. Jiñi tsaʼ bʌ laj cʌñʌ jiñʌch chaʼan Jehová tsiʼ meleyonla yicʼot an chuqui ñaʼtʌbil i chaʼan tiʼ tojlel quixtañujob. Tsaʼ laj cʌñʌ jaʼel chaʼan tsiʼ yʌcʼʌ ti chʌmel (sajtel) i Yalobil chaʼan miʼ locʼsañonla ti mulil yicʼot chʌmel come miʼ wen cʼuxbiñonla. Yicʼot tsaʼ pʌsbentiyonla chaʼan jiñi Yumʌntel mi caj i jisan jiñi wocol i tijicña mi lac mejlel ti chumtʌl ti pejtelel ora yicʼot ti ñʌchʼtʌlel (Jn. 3:16; Ap. 4:11; 21:3, 4).

16. ¿Chuqui yom mi lac mel cheʼ miʼ chaʼ wen tsictesʌntel jumpʼejl i sujmlel am bʌ ti Biblia?

¹⁶ An i tajol, yomʌch miʼ chaʼ wen tsictesʌntel  i sujmlel chaʼpʼej uxpʼejl profecía tac o muʼ bʌ i yʌl jiñi Biblia. Mi cheʼ bajcheʼ jiñi, yom mi la cʌqʼuen i yorajlel chaʼan mi lac wen qʼuel jiñi temaj yicʼot mi lac wen ñaʼtan (Hch. 17:11; 1 Ti. 4:15). Mach jasʌlic yom mi lac chʼʌmben isujm woli bʌ i tsijib tsictesʌntel, yom mi lac wen qʼuel jaʼel jiñi maʼañic bʌ woliʼ tajtʌl ti tʼan yicʼot chucoch woliʼ chaʼ wen tsictesʌntel. Mi cheʼʌch mi lac mel, jiñʌch yambʌ wen letsem bʌ i tojol mi caj laj qʼuel. ¿Chucoch yomʌch mi lac mel bajcheʼ iliyi?

17, 18. ¿Bajcheʼ miʼ coltañonla jiñi chʼujul bʌ espíritu?

¹⁷ Jesús tsiʼ pʌsʌ chaʼan jiñi i yespíritu Dios miʼ coltañonla laj cʼajtesan jiñi cʌmbilix lac chaʼan (Jn. 14:25, 26). ¿Bajcheʼ miʼ taj i coltʌntel ti jiñi espíritu juntiquil xcʌntesa? Laʼ tsaʼ bʌ ujti tiʼ tojlel Peter ti 1970, cheʼ an jaxto 19 i jabilel yicʼot ochel jaxto mucʼ ti Betel yaʼ ti Gran Bretaña. Ti jumpʼejl bʌ qʼuin cheʼ woli ti subtʼan tsaʼ loqʼui juntiquil wiñic am bʌ i tsuctiʼ. Peter tsiʼ cʼajtibe mi yom i ñaʼtan muʼ bʌ i yʌl jiñi Biblia. Pero jiñi wiñic toj sajtel i pusicʼal cheʼ bʌ ya juntiquil xcolel tsaʼ cʼoti i suben chaʼan miʼ cʌntesan chaʼan bʌ jiñi Biblia come jiñʌch juntiquil xcʌntesa i chaʼan judíojob. Chaʼan miʼ qʼuel mi jiñi xcolel yujilʌch, tsiʼ cʼajtibe: «Subeñon cu, ¿a wujil chuqui ti tʼan tsaʼ tsʼijbunti jiñi libro i chaʼan Daniel?». Peter tsiʼ jacʼʌ chaʼan an tsaʼ bʌ tsʼijbunti ti arameo. Miʼ yʌl: «Jiñi wiñic toj sajtel i pusicʼal cheʼ tsiʼ qʼuele chaʼan cujilʌch i jacʼbal, pero ñumento tsaʼ toj sajti c pusicʼal joñon. ¿Bajcheʼ tsaʼ c ñaʼta? Cheʼ bʌ tsajñiyon ti cotot tsaʼ j qʼuele jiñi revista La Atalaya yicʼot ¡Despertad! maxto bʌ wen jalic loqʼuem, i tsaʼ c taja jumpʼejl temaj baʼ miʼ tsictesan chaʼan ti arameo * tsaʼ tsʼijbunti jiñi libro i chaʼan Daniel». Jiñi chʼujul bʌ espíritu miʼ yʌqʼueñonla laj cʼajtesan chuqui pejcʌbilix lac chaʼan yicʼot muʼ bʌ laj qʼuel bajcheʼ wen letsem bʌ i tojol (Lc. 12:11, 12; 21:13-15).

¹⁸ Mi mucʼʌch lac wen qʼuel ti ñuc jiñi i sujmlel cʌmbil bʌ lac chaʼan ti Jehová, mi caj i ñijcʌyel lac pusicʼal chaʼan mi lac ñumen cʌn jiñi i sujmlel, jiñi ñoxix tac bʌ yicʼot tsijib tac bʌ. Jiñi cʌmbil bʌ lac chaʼan ti Dios mi caj lac ñumen qʼuel ti ñuc, i cheʼ bajcheʼ iliyi, mi caj lac ñumen ñaʼtan bajcheʼ yom mi laj cʌntesan yambʌlob.

19. ¿Chucoch yom mi laj cʌntan jiñi am bʌ lac taja ti chaʼan bʌ Dios?

¹⁹ Satanás yicʼot ili pañimil (mulawil) woliʼ chʌn ñop i cʼunʼesan o i jisan jiñi cʼuxbiya am bʌ lac chaʼan ti jiñi letsem tac bʌ i tojol tsaʼ la cʌlʌ. Mi maʼañic mi laj cʌntan lac bʌ, ti orajach miʼ mejlel lac mulan lac sʌclan cabʌl taqʼuin o chaʼan wen utsʼat chumulonla yicʼot cabʌl lac chubʌʼan. Jiñi apóstol Juan wen tsiquil tsiʼ yʌlʌ chaʼan ili pañimil yicʼot chuqui an wʌʼ ti pañimil ñumel jach mucʼ (1 Jn. 2:15-17). Jin chaʼan, yom mi lac chaʼlen wersa chaʼan chʌn añʌch laj cʼuxbiya ti chaʼan bʌ Dios.

20. ¿Chuqui a wom a mel jatet chaʼan maʼ cʌntan a chubʌʼan ti chaʼan bʌ Dios?

²⁰ Ti jumpʼejl a pusicʼal yom maʼ cʌy chuqui jach miʼ mejlel i cʼunʼesan a cʼuxbiya tiʼ Yumʌntel Dios. Chʌn chaʼlen subtʼan yicʼot a chʼejlel yicʼot wen qʼuele ti ñuc jiñi subtʼan. Ti bele ora yom maʼ sʌclan i sujmlel tac am bʌ ti Biblia. Cheʼʌch mi caj a tempan a chubʌʼan ti panchan, «baʼ maʼanic miʼ yochelob xujchʼ, baʼ maʼanic miʼ jisan motsoʼ». Come Jesús tsiʼ yʌlʌ: «Baqui jach tempʌbil laʼ chubʌʼan yaʼ mi laʼ teñe acʼ laʼ pusicʼal» (Lc. 12:33, 34).