1, 2. ¿Bajcheʼ miʼ tijicñesañonla Jehová, i chuqui miʼ subeñonla tiʼ Tʼan?

JUNTIQUIL hermano i cʼabaʼ Eduardo tiʼ sube jiñi Stephen, juntiquil anciano añix bʌ i jabilel, chaʼan an chuqui woli (choncol) i cʼojoʼtan. Woli (yʌquel) i wen ñaʼtan muʼ bʌ i yʌl 1 Corintios 7:28 baqui miʼ yʌl chaʼan jiñi muʼ bʌ i ñujpuñelob «mi caj i yubiñob wocol». Come Stephen ñujpuñemix, Eduardo tsiʼ cʼajtibe chuquiyes jiñi «wocol» i bajcheʼ mi caj i ñusan cheʼ ti jumpʼejl bʌ qʼuin miʼ ñujpuñel. Pero Stephen tiʼ sube chaʼan miʼ ñaxan ñaʼtan tsaʼ bʌ i tsʼijbu jiñi apóstol Pablo, chaʼan Jehová jiñʌch «muʼ bʌ i ñuqʼuesan [o miʼ tijicñesan] lac pusicʼal ti pejtelel wocol» (2 Co. 1:3, 4).

² Tiʼ sujm, Jehová juntiquilʌch uts bʌ Tatʌl yicʼot miʼ ñuqʼuesan lac pusicʼal cheʼ bʌ an lac wocol. Tajol cʼajalʌch a chaʼan bajcheʼ tsiʼ cʼʌñʌ i Tʼan chaʼan miʼ wen coltañet yicʼot miʼ tojʼesañet. Miʼ mejlel lac ñop chaʼan Jehová yomʌch lac wenlel, cheʼ bajcheʼ tsiʼ mulaj tiʼ tojlel jiñi xñoptʼañob i chaʼan ti wajali (pejcan Jeremías 29:11, 12).

3. ¿Chuqui ti cʼajtiya miʼ cajel lac jacʼ?

 ³ Cheʼ la cujilʌch chucoch mi lac taj wocol ti lac ñujpuñel o ti lac familia, mach wen wocolic mi caj la cubin chaʼan miʼ mejlel lac ñusan. Jin chaʼan, ¿chuqui miʼ mejlel i yʌcʼ chaʼan mi lac taj jiñi «wocol» tsaʼ bʌ i yʌlʌ Pablo? ¿Baqui bʌ jiñi ejemplo tac tsaʼ bʌ ujti ti wajali yicʼot ili ora miʼ mejlel i tijicñesan lac pusicʼal? Cheʼ mi laj cʌmben i jacʼbal ili cʼajtiya tac, mi caj i coltañonla.

4, 5. Alʌ chuqui tac miʼ mejlel i yʌcʼ «wocol» ti jiñi ñujpuñel.

⁴ Cheʼ bʌ Dios tsiʼ yʌcʼʌ ti ñujpuñel jiñi ñaxam bʌ wiñic yicʼot xʼixic, tsiʼ yʌlʌ: «Jini chaʼan winicob miʼ cʌyob i tat i ñaʼ. Miʼ chʌn ajñelob yicʼot i yijñam. Jini chaʼtiquil miʼ yochelob ti juntiquil jach» (Gn. 2:24). Cheʼ mi lac ñujpuñel yicʼot mi lac tech bajñel chumtʌl miʼ mejlel ti pʼojlel wocol tac come xmulilonla (Ro. 3:23). Jiñi wiñic miʼ sujtel tiʼ jol jiñi i yijñam come Dios cheʼʌch waʼchocobil i chaʼan (1 Co. 11:3). Tajol añʌch wocol bʌ mi caj i yubiñob chaʼan miʼ chʼʌmob tiʼ wenta ili tsijib eʼtel (troñel). An xʼixicob jaʼel tajol ñumen wocol bʌ mi caj i yubiñob chaʼan miʼ melob cheʼ bajcheʼ miʼ yʌlob i ñoxiʼal. Cheʼ jaʼel, cheʼ jiñi tsijib xñujpuñelob wen ñocholob tiʼ familia, miʼ mejlel ti tejchel wocol.

⁵ Cheʼ bʌ jiñi xʼixic miʼ suben i ñoxiʼal chaʼan cʌntʌbilix i chaʼan i yalobil, ñumento miʼ pʼojlel jiñi i cʼojol. Anquese tijicñayobʌch, mucʼʌch i cʼojoʼtañob chaʼan maʼañic miʼ cʼamʼan jiñi xʼixic yicʼot i yalobil cheʼ cʌntʌbilto i chaʼan. Ñumen oñix mi caj i jisañob taqʼuin. Pero mach cojic jach jiñi. Jiñi ñaʼʌl mi caj i ñumen ajñel yicʼot i yalobil. I jiñi tatʌl yom miʼ ñumen chaʼlen eʼtel jaʼel chaʼan miʼ yʌqʼuen i cʼʌjñibal bʌ i chaʼan i familia. Jin chaʼan, jiñi xñujpuñelob maʼañix mi caj i tem ñusañob cabʌl ora bajcheʼ ti ñaxan.

6-8. ¿Bajcheʼ yubil miʼ yubiñob jiñi xñujpuñel mach bʌ añic i yalobilob anquese lon yomobʌch?

⁶ Yambʌ wocol muʼ bʌ i mejlel i ñusañob jiñi xñujpuñelob jiñʌch cheʼ maʼañic miʼ mejlel i tajol i yalobil anquese lon yomob. Jiñi ñujpuñijel yicʼot i mulʌntel alʌl maʼañic miʼ jisan jiñi cʼojol tac, pero jumpʼejlʌch wocol jaʼel cheʼ maʼañobic i yalobil anquese yomobʌch. An xʼixicob muʼ bʌ i yubiñob i chʼijiyemlel cheʼ maʼañic miʼ mejlel ti tilel i yalobil (Pr. 13:12). Ti wajali, juntiquil xʼixic maʼañic i cʼʌjñibal mi maʼañic miʼ mejlel i taj i yalobil. Jiñi i yijñam Jacob, i cʼabaʼ Raquel, wen chʼijiyem tsiʼ yubi cheʼ maʼañic tsaʼ tili i yalobil, pero jiñi i chich añʌch i yalobilob (Gn. 30:1, 2). Ti país tac baqui jiñi wiñicob xʼixicob (quixtañujob) cabʌl i yalobilob, jiñi misionerojob cʼotemoʼ bʌ yaʼi miʼ cʼajtibentelob chucoch maʼañobic i yalobil. Anquese lon utsʼat bajcheʼ miʼ tsictesañob, an i tajol miʼ subentelob: «¡Mi caj lon c mel oración ti laʼ tojlel!».

⁷ Laʼ laj qʼuel tiʼ tojlel juntiquil hermana chʼoyol bʌ ti Inglaterra mach bʌ añic tsaʼ mejli i taj i yalobil anquese wen yomʌch. Cheʼ bʌ tsaʼ cʼoti i yorajlel chaʼan maʼañix miʼ mejlel i taj i yalobil, wen chʼijiyem tsiʼ yubi, come tsiʼ qʼuele chaʼan mach mejlix i taj i yalobil ti ili ora. Jin chaʼan, tsiʼ ñaʼta yicʼot i ñoxiʼal chaʼan miʼ pʌyob yambʌ alʌl. Pero jiñi hermana miʼ yʌl: «Wen chʼijiyem tsaʼ  cubi c bʌ. Cujil chaʼan mach lajalic cheʼ junyajl calobilʌch bajcheʼ cheʼ mucʼ jach c pʌy yambʌ alʌl».

⁸ Isujmʌch chaʼan jiñi Biblia miʼ yʌl chaʼan «mi caj i coltʌntelob xʼixicob chaʼan tiʼ yʌcʼol alʌlob ti pañimil» (1 Ti. 2:15). Pero ili mach yomic i yʌl chaʼan miʼ mejlel i taj i cuxtʌlel tiʼ caj jiñi, yom bʌ i yʌl jiñʌch cheʼ jiñi xʼixic am bʌ i yalobil yicʼot am bʌ tiʼ wenta i yotot tajol maʼañic mi caj i yotsan i bʌ ti wulwul tʼan yicʼot mach bʌ i wentajic (1 Ti. 5:13). Pero wersa mi caj i taj wocol tiʼ ñujpuñel yicʼot tiʼ familia.

9. ¿Chucoch jumpʼejlʌch tsʌts bʌ wocol cheʼ miʼ chʌmel jiñi lac piʼʌl?

⁹ Cheʼ mi lac ñaʼtan jiñi wocol muʼ bʌ i taj jumpʼejl xñujpuñel, an jumpʼejl mach bʌ añic mi lac wen ñaʼtan: Jiñʌch cheʼ miʼ chʌmel (sajtel) i piʼʌl. Jiñi muʼ bʌ i ñusañob iliyi, tajol maʼañic baʼ ora tsiʼ ñaʼta mi cheʼ mi caj i yujtel. Jiñi xñoptʼañob miʼ ñopob yicʼot i xucʼtʌlel jiñi tsaʼ bʌ i yʌlʌ Jesús chaʼan jiñi chaʼ chʼojyel, jumpʼejlʌch pijtaya muʼ bʌ i tijicñesan jiñi i bajñelix bʌ (Jn. 5:28, 29). Ili jiñʌch yambʌ bajcheʼ miʼ pʌsbeñonla i yutslel jiñi lac Tat Jehová cheʼ miʼ tijicñesañonla yicʼot miʼ coltañonla tiʼ Tʼan cheʼ woli lac ñusan tsʌts bʌ wocol. Laʼ laj qʼuel bajcheʼ Dios an i tijicñesʌbe i pusicʼal yicʼot i colta jiñi xñoptʼañob i chaʼan.

10. ¿Chuqui tsiʼ tijicñesa Ana? (Qʼuele jiñi dibujo am bʌ tiʼ tejchibal).

¹⁰ Jiñi cʼuxbibil bʌ i yijñam Elcana (Elqaná) i cʼabaʼ Ana, tsiʼ ñusa tsʌts bʌ wocol come maʼañic miʼ mejlel i taj i yalobil, pero Penina (Peniná), jiñi yambʌ i yijñam Elcana, añʌch i yalobilob (pejcan 1 Samuel 1:4-7). Ti jujumpʼejl jab, Ana tsiʼ lʌtʼʌ i wajlentel tiʼ tojlel Penina, i tsaʼʌch i wen taja i chʼijiyemlel. ¿Chuqui tsiʼ tijicñesa? Jiñi Biblia miʼ yʌl chaʼan tsiʼ wen ‹pejca lac Yum› ti oración chaʼan miʼ suben i wocol. Tsiʼ pijta chaʼan Dios miʼ jacʼben i yoración. I maʼañic tsiʼ chan pʌsʌ jiñi «i chʼijiyemlel i pusicʼal» (1 S. 1:12, 17, 18). Tsiʼ ñopo chaʼan Jehová mi caj i yʌqʼuen juntiquil i yalobil o chaʼan mucʼʌch caj i coltan.

11. ¿Bajcheʼ miʼ tijicñesañonla jiñi oración?

¹¹ Muʼto caj lac chʌn ubin wocol come xmulilonla yicʼot chumulonla tiʼ pañimil (mulawil) Satanás (1 Jn. 5:19). Pero la cujil chaʼan añʌch laj coltaya ti Dios, «muʼ bʌ i ñuqʼuesan lac pusicʼal tiʼ pejtelel wocol». Mi mucʼʌch lac pejcan Dios tiʼ pejtelel lac pusicʼal bajcheʼ tsiʼ mele Ana mucʼʌch caj i coltañonla cheʼ mi lac ñusan wocol tac. Cheʼ bajcheʼ tsiʼ mele Ana, mach jasʌlic cheʼ mi lac suben lac wocol, yomʌch mi lac suben bajcheʼ yubil mi la cubin lac bʌ yicʼot tiʼ pejtelel lac pusicʼal mi laj cʼajtiben ti wocol tʼan chaʼan miʼ coltañonla (Fil. 4:6, 7).

12. ¿Chuqui tsiʼ colta i taj i tijicñʌyel jiñi Ana?

¹² Mi wen chʼijiyemonla tiʼ caj maʼañic la calobil o tsaʼ chʌmi lac piʼʌl, mucʼʌch i mejlel lac taj i tijicñesʌntel lac pusicʼal. Laʼ laj cʼajtesan jiñi Ana, juntiquil xʼaltʼan tsaʼ bʌ chumle tiʼ yorajlel Jesús. Cheʼ an jaxto 7 jab i ñujpuñel tsaʼ chʌmi i piʼʌl, i jiñi Biblia maʼañic miʼ yʌl mi an i yalobil. Cheʼ añix 84 i jabilel, «maʼanic tsiʼ wis cʌyʌ i bʌ ti Templo baʼ tsiʼ melbe i yeʼtel Dios ti qʼuiñil yicʼot ti acʼʌlel yicʼot chʼajb yicʼot oración» (Lc. 2:37).  Tsaʼ bʌ i yʌqʼue i tijicñʌyel Ana jiñʌch cheʼ tsiʼ chʌn chʼujutesa Jehová.

13. Alʌ jumpʼejl ejemplo chaʼan bajcheʼ mi lac taj lac tijicñesʌntel ti la camigojob cheʼ maʼañic mi lac taj ti lac familia.

¹³ Cheʼ jaʼel, jiñi la camigojob ti congregación miʼ mejlel i tijicñesañonla (Pr. 18:24). Laʼ laj qʼuel jumpʼejl ejemplo. Paula wen chʼijiyem tsiʼ yubi cheʼ jiñi i ñaʼ tsiʼ cʌyʌ Jehová. Wen wocolʌch tsiʼ yubi. Pero ti wiʼil, juntiquil precursora i cʼabaʼ Ann yaʼ tiʼ congregación, tsiʼ wen qʼuele ti ñuc yicʼot tsiʼ pʌsbe i cʼuxbiya. Paula miʼ yʌl: «Anquese mach c familiajic jiñi Ann, tsaʼʌch i wen coltayon come tsiʼ pʌsbeyon i cʼuxbiya yicʼot i yutslel». Miʼ chaʼ al: «Iliyi tsiʼ coltayon chaʼan mic chʌn melben i yeʼtel Jehová». Paula wen tijicña tsiʼ yubi cheʼ bʌ jiñi i ñaʼ tsaʼ chaʼ ochi bajcheʼ Testigo. Tijicñayʌch tsiʼ yubi jeʼel jiñi Ann come tsiʼ colta chaʼan Paula maʼañic miʼ cʌy i melben i yeʼtel Jehová.

14. ¿Bajcheʼ mi lac taj lac wenlel cheʼ mi lac tijicñesan yambʌlob?

¹⁴ Cheʼ mucʼʌch laj qʼuel ti ñuc jiñi yambʌlob yicʼot mi lac pʌsbeñob la cutslel, mi lac locʼ jiñi lac tsucul ñaʼtʌbal. Cabʌl hermanajob, ñujpuñemoʼ bʌ o maʼañic, yujilob chaʼan miʼ wen acʼ tijicñʌyel jiñi subtʼan. Cheʼ miʼ chʌn melbeñob i yeʼtel Jehová chaʼañʌch yomob i yʌqʼuen i ñuclel. An muʼto bʌ i yʌlob chaʼan jiñi subtʼan miʼ cʼoqʼuesañob.  Jiñi congregación muchʼul miʼ yajñel cheʼ junlajal mi laj qʼuelob ti ñuc la quermañojob yicʼot yambʌ quixtañujob (Fil. 2:4). Jiñʌch tsaʼ bʌ i mele jiñi apóstol Pablo. Tsiʼ cʌnta jiñi hermanojob ti Tesalónica cheʼ bajcheʼ miʼ mel juntiquil ñaʼʌl i tsiʼ tijicñesañob bajcheʼ juntiquil tatʌl (pejcan 1 Tesalonicenses 2:7, 11, 12).

15. ¿Majqui añob tiʼ wenta miʼ cʌntesan jiñi alobob?

¹⁵ Wen ñuc i cʼʌjñibal cheʼ mi lac ñaʼtan jeʼel bajcheʼ miʼ mejlel la cʌqʼueñob i tijicñʌyel jumpʼejl familia o chaʼan mi laj coltañob. An i tajol, jiñi hermanojob maxto bʌ jalic ochemob ti congregación miʼ cʼajtiñob coltʌntel tiʼ tojlel jiñi ñumen añobix bʌ i ñaʼtʌbal chaʼan miʼ mejlel i cʌntesañob i yalobil o miʼ chaʼleñob estudio yicʼotob. Jiñi Chʼujul bʌ Tsʼijbujel miʼ yʌl chaʼan añobʌch tiʼ wenta jiñi tatʌlob chaʼan miʼ cʌntesañob i yalobil (Pr. 23:22; Ef. 6:1-4). Anquese an i tajol cʼʌñʌlʌch miʼ coltʌntelob, jiñobʌch chʌn an tiʼ wenta i yalobilob. Jin chaʼan, i cʼʌjñibalʌch cheʼ miʼ chʌcʌ chaʼleñob tʼan yicʼot i yalobilob.

16. ¿Chuqui yom mi laj cʼajtesan cheʼ bʌ an tatʌlob muʼ bʌ i subeñoñobla chaʼan mi laj coltʌbeñob i yalobil?

¹⁶ Mi juntiquil tatʌl miʼ subeñonla chaʼan mi la cʌqʼuen estudio i yalobil, yom mi laj cʼajtesan chaʼan mach yomic i yʌl chaʼan woli lac chʼʌm ti lac wenta. Tajol an majqui miʼ subeñonla jaʼel chaʼan mi la cʌqʼuen estudio i yalobil juntiquil tatʌl mach bʌ añic tiʼ sujmlel. Mi cheʼ bajcheʼ jiñi, yom mi laj cʼajtesan chaʼan maʼañic woli lac sujtel tiʼ tat o i ñaʼ jiñi xcolel. Wen cheʼ yaʼ mi la cʌqʼuen estudio tiʼ yotot cheʼ bʌ yaʼan jiñi tatʌl o juntiquil hermano añix bʌ i ñaʼtʌbal, o yaʼ baqui miʼ taj i qʼueloñobla. Cheʼ bajcheʼ jiñi maʼañic mi caj i tejchel tʼan. Tajol ti wiʼil, jiñi tatʌlob miʼ chʼʌmob tiʼ wenta i cʌntesan i yalobilob cheʼ bajcheʼ albil i chaʼan Jehová.

17. ¿Bajcheʼ miʼ mejlel i yʌcʼob tijicñʌyel jiñi xcolelob?

¹⁷ Jiñi xcolelob muʼ bʌ i cʼuxbiñob Jehová yicʼot miʼ jacʼbeñob i tʼan, miʼ yʌqʼueñob i tijicñʌyel i tat cheʼ miʼ qʼuelob ti ñuc, miʼ coltañob ti taqʼuin o yan tac bʌ yicʼot miʼ coltañob chaʼan wen miʼ yajñelob tiʼ chaʼan bʌ Jehová. Lamec, juntiquil i pʼolbal Set, tsaʼ chumle cheʼ bʌ maxto tili jiñi Butʼjaʼ i tsiʼ chʼujutesa Jehová. Tsiʼ wʌn alʌ tiʼ tojlel Noé, jiñi i yalobil: «Jini mi caj i ñuqʼuesan lac pusicʼal chaʼan la queʼtel, come wocol jax mi lac chaʼlen eʼtel chaʼan ili lum tsaʼ bʌ i puchʼu lac Yum». Ili tʼan tsaʼ tsʼʌctiyi cheʼ bʌ Dios tsiʼ jisa jiñi jontolil (Gn. 5:29; 8:21). Ili ora, jiñi xcolelob muʼ bʌ i yajñelob ti isujm bʌ chʼujutesaya miʼ mejlel i tijicñesañob i familia. Miʼ mejlel i coltañob i lʌtʼ jiñi wocol tac yicʼot chaʼan cuxul miʼ yajñelob cheʼ miʼ tilel i jilibal, ñumen ñuc to bʌ miʼ cajel bajcheʼ jiñi Butʼjaʼ.

18. ¿Chuqui mi caj i coltañonla lac lʌtʼ anquese an wocol tac?

¹⁸ Ili ora, yonlel quixtañu miʼ tajob i tijicñʌyel cheʼ miʼ melob jiñi oración, miʼ wen ñaʼtañob jiñi ejemplo tac am bʌ ti Biblia yicʼot miʼ sujtelob tiʼ yamigo yambʌ xñoptʼañob (pejcan Salmo 145:18, 19). La cujil chaʼan cojach Jehová miʼ mejlel i tijicñesañonla tiʼ pejtelel ora, i mucʼʌch caj i coltañonla lac lʌtʼ baqui jach bʌ wocol mi lac taj ili ora yicʼot ti talto bʌ qʼuin.