JUNTIQUIL Testigo i cʼabaʼ Don chʼoyol bʌ ti Canadá miʼ chaʼlen wersa i suben wen tʼan jiñi wiñicob xʼixicob (quixtañujob) chumuloʼ bʌ ti calle. Miʼ yʌl chuqui tsaʼ ujti tiʼ tojlel juntiquil: «Maʼañic cʌmbil c chaʼan yambʌ bajcheʼ Peter, jiñʌch jiñi ñumen bibiʼ bʌ qʼuelbil c chaʼan. Mach weñic miʼ jacʼ lac tʼan yicʼot miʼ sʌclan bajcheʼ yom chaʼan maʼañic mi lac pejcan. Maʼañic miʼ wis jacʼ i coltʌntel». Pero Don, 14 jab tsiʼ chʌn chaʼle wersa i pʌsben i yutslel.

Ti jumpʼejl bʌ qʼuin, Peter tsiʼ cʼajtibe jiñi Don: «¿Chucoch a wom a wen coltañon? Maʼañic majqui i wentajon. ¿Chucoch maʼañic maʼ cʌyon?». Ti wen jach bʌ tʼan, Don tsiʼ cʼʌñʌ uxpʼejl texto loqʼuem bʌ ti Biblia chaʼan miʼ cʼotel tiʼ pusicʼal. Ñaxan, tsiʼ cʼajtibe miʼ yujil chuqui i cʼabaʼ Dios, i tsiʼ yʌqʼue i pejcan muʼ bʌ i yʌl Salmo 83:18, TNM. Cheʼ jiñi, chaʼan miʼ mejlel i pʌsben chucoch yomʌch i coltan, tiʼ sube i pejcan Romanos 10:13, 14, baqui miʼ yʌl chaʼan «majqui jach miʼ pejcan lac Yum tiʼ cʼabaʼ miʼ taj i coltʌntel». Tiʼ yujtibal, Don tsiʼ pejca Mateo 9:36, baʼ miʼ yʌl: «Cheʼ bʌ tsiʼ qʼuele tempʌbilob winicob xʼixicob, tsaʼ bujtʼi i pusicʼal Jesús ti pʼuntaya, come tsiʼ qʼuele cʼuñob jax, pujquemob jax cheʼ bajcheʼ tiñʌmeʼ mach bʌ anic xcʌntaya i chaʼan». Cheʼ jiñi, tsiʼ cʼajtibe Peter chaʼan miʼ chaʼ pejcan. Cheʼ bʌ tsaʼ ujti i pejcan, tsaʼ loqʼui i yaʼlel i wut i tsiʼ cʼajti: «¿Yaʼ ba ochemon jaʼel ti jiñi tʌñʌmeʼ?».

Peter tsaʼ caji i qʼuextan majlel i bʌ. Tsiʼ chaʼle tsʼʌmel, tsiʼ wen setʼe i tsuctiʼ yicʼot tsiʼ lʌpʌ jiñi i pislel tsaʼ bʌ i yʌqʼue Don. Ti jimbʌ ora, tsiʼ chaʼle wersa chaʼan sʌc miʼ yajñel yicʼot miʼ cʌntan bajcheʼ yilal ti qʼuelol.

Peter miʼ tsʼijbun chuqui tac miʼ mel ti jujumpʼejl qʼuin. Jiñi ñaxan tac bʌ tiʼ tsʼijbu wen chʼijiyem jax yicʼot mach utsʼatic, pero jiñi cojix tac bʌ mach cheʼixi. Jumpʼejl miʼ yʌl: «Sajmʌl tsaʼ j cʌmbe i cʼabaʼ Dios, i muqʼuix i mejlel c pejcan Jehová ti oración. Wen utsʼatax cheʼ mi laj cʌmben i cʼabaʼ Dios. Don miʼ yʌl chaʼan Jehová miʼ mejlel ti sujtel ti camigo, i tiʼ pejtelel ora mi  caj i ñʌchʼtañon, mach yʌlʌlic jala mic pejcan o chuqui mic suben».

Jiñi cojix bʌ tiʼ tsʼijbu i chaʼañix jiñi i chich yicʼot i yijtsʼin. Miʼ yʌl:

«Wʌleʼli mach cʼocʼoñic mi cubin c bʌ. Wocol jax añon tiʼ caj c jabilel. Pero, mi cojax cuxulon wʌleʼli, cujil chaʼan mi caj c chaʼ qʼuel jiñi camigo [Don] yaʼ ti Paraíso. Mi woli (choncol) laʼ pejcan iliyi, chaʼan me tsaʼix chʌmiyon (sajtiyon). Mi tsaʼ laʼ taja laʼ qʼuel juntiquil wiñic wen qʼuexel bʌ bajcheʼ yilal yaʼ baqui woli (yʌquel) c mujquel, laʼ wocolic, pejcanla, yicʼot poj pejcanla jaʼel ili libro. * Yaʼi miʼ yʌl chaʼan yaʼ ti Paraíso mi caj c chaʼ qʼuel jiñi camigo, i ti jumpʼejl c pusicʼal mic ñop. Mic wen cʼuxbiñetla, laʼ weran, Peter».

Cheʼ bʌ Peter tsaʼix mujqui, jiñi i chich i cʼabaʼ Ummi, tsiʼ yʌlʌ: «Añix cheʼ bʌ chaʼpʼejl jab tsiʼ pejcayon jiñi j queran. Cojax to tsaʼ cubi chaʼan tijicña. Tsaʼto i chaʼle tseʼñal». Ummi tiʼ sube Don: «Mi caj c pejcan jiñi libro come wen ñuc i cʼʌjñibal mi jin tsaʼ bʌ i ñijcʌbe i pusicʼal j queran». Cheʼ jaʼel, tsiʼ jacʼʌ chaʼan miʼ cʼotel i yʌqʼuen estudio juntiquil hermana yicʼot jiñi libro ¿Chuqui miʼ cʌntesañonla tiʼ sujmlel jiñi Biblia?

Joñonla jaʼel mach jiñic jach yom mi laj qʼuel bajcheʼ yilal jiñi quixtañujob, yom mi lac pʌs isujm bʌ cʼuxbiya yicʼot mi lac chʌn ñop laj coltan majqui jach bʌ quixtañu (1 Ti. 2:3, 4). Mi cheʼʌch mi lac mel, tajol jiñi i sujmlel mi caj i cʼotelob tiʼ pusicʼal jiñi cheʼoʼ bʌ bajcheʼ Peter, jiñi pecʼoʼ bʌ i pusicʼal. Mucʼʌch lac ñop chaʼan jiñi Dios muʼ bʌ i qʼuel lac pusicʼal, mi caj i yʌcʼ ti colel jiñi i sujmlel tiʼ pusicʼal jiñi yom bʌ i lʌcʼtesañob i bʌ tiʼ tojlel (1 S. 16:7; Jn. 6:44).