1, 2. a) ¿Chuqui jiñi ñumen ñuc bʌ yom miʼ qʼuelob jiñi quixtañujob? b) ¿Chucoch añʌch i cʼʌjñibal cheʼ mi lac chʼʌmben isujm?

CABΛL wiñicob xʼixicob (quixtañujob) cojach miʼ ñumen qʼuelob ti ñuc jiñi taqʼuin. Jin chaʼan, miʼ chaʼleñob wersa i ñumen sʌclañob taqʼuin i chaʼan maʼañic miʼ sʌtob jiñi añix bʌ i chaʼañob. An yañoʼ bʌ muʼ bʌ i ñumen acʼob ti ñuc i familia, i cʼocʼlelob o jiñʌch chuqui yomob i taj tiʼ cuxtʌlel.

² Pero an ñumen ñuc to bʌ i cʼʌjñibal mach bʌ yomic miʼ wis ñajʌyel lac chaʼan: Jiñʌch chaʼan mi laj coltʌben i yumʌntel Jehová. Pero mi maʼañic mi laj cʌntan lac bʌ, cojach miʼ mejlel i cʼotel lac ñumen acʼ ti lac pusicʼal jiñi yom tac bʌ melol o lac wocol tac, i miʼ mejlel lac ñajʌtesan jiñi ñumen ñuc bʌ i cʼʌjñibal. Cheʼ jaʼel, cheʼ mi lac ñumen chʼʌmben isujm chaʼan yom mi laj qʼuel Jehová bajcheʼ yumʌl bʌ lac chaʼan, ñumen chajpʌbilonla chaʼan miʼ mejlel lac ñusan jiñi wocol tac muʼ bʌ lac taj ti jujumpʼejl qʼuin, i mi caj lac ñumen lʌcʼtiyel ti Jehová.

3. ¿Chuqui tsiʼ yʌlʌ Satanás chaʼan bajcheʼ miʼ chaʼlen yumʌntel Dios?

³ Satanás tsiʼ yʌlʌ chaʼan Jehová maʼañic tiʼ wenta miʼ chaʼlen yumʌl. Tsiʼ yʌlʌ chaʼan mach weñic bajcheʼ miʼ mel i yeʼtel  (troñel), chaʼan mach yomic chuqui wem bʌ ti lac tojlel i chaʼan ñumen tijicñayonla mi chaʼ joñonjachla mi lac yuman lac bʌ (Gn. 3:1-5). Tsiʼ yʌcʼʌ ti ñaʼtʌntel jaʼel chaʼan maʼañic majqui ñoj xucʼul tiʼ tojlel Dios, i chaʼan mi caj i cʌyob mi woli (choncol) i ñusañob cabʌl wocol (Job 2:4, 5). Jin chaʼan, Jehová woli (yʌquel) i yʌcʼ i yorajlel chaʼan miʼ wen ñaʼtʌntel chaʼan mi caj lac taj wocol mi maʼañic mi laj coltʌben i yumʌntel.

4. ¿Chucoch yomʌch miʼ tsictiyel i yumʌntel Dios?

⁴ Jehová wen yujil chaʼan mach isujmic tsaʼ bʌ i yʌlʌ Satanás. Pero ¿chucoch wolito i yʌcʼ ti ñumel ora i maʼañic miʼ tojʼesan jiñi wocol? Jiñi i jacʼbal yaʼʌch cʌyʌl tiʼ tojlel jiñi ángelob yicʼot quixtañujob (pejcan Salmo 83:18, TNM). Cabʌl tsaʼix bʌ i pʼajayob i yumʌntel Jehová, cheʼ bajcheʼ tsiʼ mele jiñi ñaxam bʌ wiñic yicʼot xʼixic. Tajol jiñʌch muʼ bʌ i yʌcʼ ti ñaʼtʌntel chaʼan isujmʌch tsaʼ bʌ i yʌlʌ jiñi Diablo. Come jiñi quixtañujob yicʼot jiñi ángelob maxto i wen ñaʼtayob bajcheʼ an i sujmlel, miʼ tejchel wocol ti tejclum tac, chaʼan i colorlel i pʌchʌlel quixtañujob, ti tribu tac, ti familia yicʼot yambʌ quixtañujob. Pero cheʼ bʌ miʼ tsictiyel jiñi i yumʌntel Jehová, tiʼ pejtelel ora mi caj lac chumtʌl ti jiñi yumʌntel, i jiñi pañimil (mulawil) mi caj i yajñel ti ñʌchʼtʌlel (Ef. 1:9, 10).

5. ¿Bajcheʼ miʼ mejlel laj coltʌben i yumʌntel Jehová?

⁵ Jiñi i yumʌntel Dios mi caj i qʼuejlel chaʼan tojʌch i jiñi i yumʌntel Satanás yicʼot wiñicob maʼañic i cʼʌjñibal, i mi caj i jisʌntel. Jiñi i yumʌntel Dios mi caj i mʌjlel i chaʼan tiʼ tojlel jiñi Mesías. Jiñi xucʼul bʌ miʼ yajñelob mi caj i mejlel i pʌsob chaʼan mucʼʌch i mejlelob ti ajñel tiʼ tojlel i yumʌntel Jehová ti jumpʼejlob i pusicʼal (Is. 45:23, 24). ¿Mach ba muqʼuicʌch lac mulan jeʼel cheʼ yaʼ ochemonla ti jiñi xuc’uloʼ bʌ i wiñic Dios? Chaʼan mi lac mejlel, yom mi laj cʼajtesan yicʼot mi lac chʼʌmben isujm chaʼan ñuc i cʼʌjñibal miʼ tsictiyel jiñi i lot Satanás.

6. ¿Bajcheʼ cʼamel i cʼʌjñibal cheʼ mi tsictiyel i yumʌntel Jehová?

⁶ Bajcheʼ tsaʼix laj qʼuele, ñumen ñuc i cʼʌjñibal tiʼ tojlel jiñi quixtañujob cheʼ miʼ tsictiyel i yumʌntel Jehová, i mach jiñic lac tijicñʌyel. ¿Yom ba i yʌl chaʼan maʼañic i cʼʌjñibal jiñi laj cuxtʌlel o chaʼan mach i wentajoñicla Jehová? Mach cheʼiqui. ¿Chucoch?

7, 8. ¿Chucoch ñuc i cʼʌjñibal cheʼ miʼ tsʼʌctesan i tʼan Jehová chaʼan miʼ tsictiyel jiñi i yumʌntel?

⁷ Jehová wen ñuc laj cʼʌjñibal miʼ qʼuelonla. Tsiʼ yʌcʼʌ i cuxtʌlel i Yalobil chaʼan miʼ coltañonla yicʼot mi lac taj laj cuxtʌlel maʼañic bʌ i jilibal come miʼ wen cʼuxbiñonla (Jn. 3:16; 1 Jn. 4:9). Cheʼ machic miʼ tsʼʌctesan i tʼan Jehová, Satanás miʼ mejlel i yʌl chaʼan juntiquilʌch xlot yicʼot mach bʌ tojic yumʌl come miʼ mʌctʌben chuqui wem bʌ jiñi quixtañujob. Jiñi i contrajob woliyoʼ bʌ ti wajleya miʼ mejlel i yʌlob jaʼel chaʼan isujmʌch i tʼañob, i miʼ chʌn alob: «¿Bacan tsiquil woliʼ chaʼ tilel cheʼ bajcheʼ tsiʼ yʌlʌ? Cʼʌlʌl cheʼ bʌ tsaʼ chʌmiyob lac ñojteʼel cʼʌlʌl wʌle, lajal woliʼ chʌn ajñel pejtelel chuqui tac an cheʼ bajcheʼ tiʼ cajibal pañimil» (2 P. 3:3, 4). Jin chaʼan, Jehová woliʼ wen qʼuel chaʼan jiñi xjacʼtʼañoʼ bʌ miʼ tajob i cuxtʌlel i cheʼʌch miʼ mejlel ti tsictiyel jiñi i yumʌntel (pejcan Isaías 55:10, 11). Cheʼ jaʼel, jiñi cʼuxbiya jiñʌch junchajp muʼ bʌ i yʌcʼ ti cʌjñel i yumʌntel Jehová. Jin chaʼan, miʼ mejlel lac ñop chaʼan tiʼ pejtelel ora mi caj i cʼuxbiñonla  yicʼot miʼ qʼuel ti ñuc jiñi xucʼuloʼ bʌ tiʼ tojlel (Éx. 34:6).

⁸ Cheʼ mi la cʌcʼ ti ñuc i yumʌntel Jehová mach yomic i yʌl chaʼan maʼañic woli laj qʼuel ti ñuc laj cuxtʌlel o chaʼan maʼañic i cʼʌjñibal tiʼ tojlel Dios. Woli jach la cʌqʼuen i cʼʌjñibal ti jujunchajp cheʼ bajcheʼ yom mi lac mel. Ili yom mi lac wen chʼʌmben isujm chaʼan maʼañic miʼ wis ñajʌyel lac chaʼan baqui bʌ ñumen ñuc i cʼʌjñibal i mi lac chʌn aqʼuen laj coltaya i yumʌntel Jehová.

9. ¿Chuqui tsiʼ yʌlʌ Satanás tiʼ tojlel Job? (Qʼuele jiñi dibujo am bʌ tiʼ tejchibal).

⁹ Jiñi libro i chaʼan Job, wen tsiquil miʼ yʌl chaʼan ñuc i cʼʌjñibal cheʼ wen bajcheʼ mi lac ñaʼtan. Yaʼi miʼ tsictesan chaʼan Satanás tsiʼ yʌlʌ chaʼan mi tsiʼ wen taja wocol jiñi Job, mi caj i pʼaj Dios. Tiʼ sube Jehová chaʼan miʼ yʌqʼuen wocol jiñi Job. Pero Dios maʼañic tsiʼ mele, anquese tsiʼ cʌyʌ chaʼan Satanás miʼ yʌqʼuen wocol. Tiʼ sube: «Wolix cʌqʼueñet pejtel chuqui an i chaʼan Job. Luʼ an ti a pʼʌtʌlel» (pejcan Job 1:7-12). Job mach jalic tiʼ sʌtʌ pejtel chuqui an i chaʼan, i wiñicob yicʼot i yalobilob. Satanás tsaʼ mejli i yʌqʼuen i ñaʼtan chaʼan jiñʌch Dios woli bʌ i yʌqʼuen wocol (Job 1:13-19). Ti wiʼil, tsiʼ yʌqʼue tsʌts bʌ cʼamʌjel yicʼot wen biʼitic jax bʌ (Job 2:7). Chaʼan miʼ ñumen low, jiñi i yijñam yicʼot uxtiquil i yamigojoʼ bʌ tsiʼ yʌqʼueyob i chʼijiyemlel chaʼan tsaʼ bʌ i yʌlʌyob (Job 2:9; 3:11; 16:2).

10. a) ¿Bajcheʼ tsiʼ pʌsʌ i xucʼtʌlel ti Dios jiñi Job? b) ¿Chuqui mach bʌ weñic tsiʼ mele?

¹⁰ ¿Isujmʌch ba tsaʼ bʌ i yʌlʌ Satanás? Mach cheʼiqui, come Job maʼañic tsiʼ pʼaja Dios (Job 27:5). Pero tsaʼʌch jumucʼ ñajʌyi i chaʼan baqui bʌ ñumen ñuc i cʼʌjñibal. Tsaʼ caji i ñop i pʌs chaʼan maʼañic i mul yicʼot tsiʼ wersa cʼajti chaʼan miʼ tsictesʌbentel chucoch woliʼ ñusan wocol (Job 7:20; 13:24). Tajol mi lac ñaʼtan chaʼan i tilelʌch cheʼ tsiʼ mele bajcheʼ jiñi come woliʼ ñusan cabʌl wocol, pero Dios yomʌch miʼ ticʼ tsiʼ qʼuele. ¿Chuqui tiʼ sube?

11, 12. a) ¿Chuqui tsiʼ chʼʌmbe isujm Job tiʼ coltaya Jehová? b) ¿Bajcheʼ tsiʼ jacʼʌ Job?

¹¹ Yaʼ capítulo 38 cʼʌlʌl ti 41 ti jiñi libro i chaʼan Job mi lac taj tsaʼ bʌ i yʌlʌ Jehová, pero maʼañic baqui miʼ yʌl chaʼan tiʼ tsictesʌbe chucoch woliʼ ñusan wocol. Mach jiñic ñuc bʌ i cʼʌjñibal tsiʼ qʼuele Jehová cheʼ yom miʼ tsictesan chucoch woli ti ujtel bajcheʼ jiñi. Jehová tsiʼ colta Job i chʼʌmben isujm chaʼan mach lajalobic come cojach jiñi ñumen ñuc bʌ. Tsiʼ colta i ñaʼtan chaʼan anto chuqui ñumen ñuc tac i cʼʌjñibal (pejcan Job 38:18-21). Cheʼ bajcheʼ ili, Job tsiʼ tojʼesa bajcheʼ miʼ ñaʼtan.

 ¹² ¿Wen tsʌts ba bajcheʼ tsiʼ pejca Job jiñi Jehová cheʼ ujtel jaxto i ñusan wocol? Maʼañic, Job mach cheʼic tsiʼ qʼuele jeʼel. Anquese tsiʼ wen ñusa wocol, tsaʼʌch i chʼʌmbe isujm. Tsaʼto i yʌlʌ: «Mic tsic c pusicʼal chaʼan c mul. Mij qʼuel c bʌ ti pecʼ. Mic buchtan lum. Mic mujlan c bʌ tiʼ tʌñil cʼajc». Tsaʼ bʌ i yʌlʌ Jehová, utsʼatʌch yicʼot tsiʼ tijicñesʌbe i pusicʼal Job (Job 42:1-6). Pero ti ñaxan, an juntiquil xcolel i cʼabaʼ Elihú tsajñi bʌ i ticʼ jaʼel (Job 32:5-10). Come Jehová tsiʼ qʼuele chaʼan utsʼatʌch bajcheʼ tsiʼ jacʼʌ, tsiʼ yʌlʌ chaʼan weñʌch miʼ qʼuel cheʼ xucʼul tsaʼ ajñi (Job 42:7, 8).

13. Anquese lajmeñix i wocol tac jiñi Job, ¿bajcheʼ tsiʼ chʌn colta tsaʼ bʌ i yʌlʌ Jehová?

¹³ Anquese Job tsaʼix lajmi i wocol, tsaʼ bʌ i yʌlʌ Jehová tsaʼto i chʌn colta. Anquese Jehová ñumento tsiʼ yʌqʼue i bendición bajcheʼ ti ñaxan, mach ti orajic tsiʼ waʼ taja tiʼ pejtelel. Tsaʼʌch jaliji chaʼan miʼ chaʼ taj «wuctiquil chʼiton bʌ i yalobil yicʼot uxtiquil xchʼoc bʌ i yalobil» (Job 42:12-14). Miʼ mejlel laj cʌl chaʼan Job tsiʼ wen cʼajtesa jiñi i yalobilob tsaʼ bʌ i sʌtʌ tiʼ mul Satanás. Tajol tsaʼ cʼoti i yorajlel chaʼan tsiʼ ñaʼta jiñi wocol tac tsaʼ bʌ i ñusa. Mi tsaʼʌch cʼoti i chʼʌmben isujm chucoch tsiʼ ñusa wocol, tajol tsiʼ bixe cʼajtibe i bʌ mi wersajʌch yom miʼ ñusan jiñi wocol tsaʼ bʌ aqʼuenti. Anquese cheʼ tsaʼ ujti o maʼañic, tsaʼʌch mejli i ñaʼtan tiʼ pejtelel tsaʼ bʌ i yʌlʌ Dios. Jiñʌch tsaʼ bʌ i colta chaʼan wen bajcheʼ miʼ ñaʼtan yicʼot miʼ yʌqʼuen i tijicñʌyel (Sal. 94:19).

14. ¿Chuqui miʼ mejlel laj cʌn tsaʼ bʌ ujti tiʼ tojlel Job?

¹⁴ Jiñi tsaʼ bʌ ujti tiʼ tojlel Job miʼ mejlel i tijicñesan lac pusicʼal yicʼot chaʼan wen jach bajcheʼ yom mi lac ñaʼtan. Jehová tsiʼ yʌcʼʌ ti tsʼijbuntel «chaʼan mi laj cʌntesʌntel. I Tsʼijbujel Dios miʼ yʌqʼueñonla i xucʼtilel yicʼot i ñuqʼuesʌntel lac pusicʼal chaʼan mi lac pijtan jini tal to bʌ» (Ro. 15:4). Junchajp wen ñuc bʌ mi laj cʌn jin cheʼ mach jiñic yom mi laj cʌlʌx acʼ ti lac ñaʼtʌbal muʼ bʌ i yujtel ti lac tojlel, i miʼ ñajʌyel lac chaʼan jiñi ñumen ñuc bʌ i cʼʌjñibal: I coltʌntel i yumʌntel Jehová. Yom mi laj cʼajtesan chaʼan mi xucʼuloñʌchla bajcheʼ Job cheʼ mi lac ñusan tsʌts bʌ wocol tac, wolʌch la cʌcʼ laj coltaya tiʼ yumʌntel Dios.

15. Mi xucʼuloñʌchla cheʼ mi lac ñusan wocol, ¿chuqui mi lac taj?

¹⁵ ¿Chucoch miʼ pʼʌtʼesañonla cheʼ mi lac ñaʼtan chaʼan ñucʌch i cʼʌjñibal cheʼ xucʼulonla? Come miʼ cʼajtesʌbeñonla chaʼan mach lolomic jach mi la cubin wocol. Jiñi lac wocol tac mach yomic i yʌl chaʼan Dios michʼ yicʼotonla. Miʼ mejlel lac pʌs chaʼan la comʌch miʼ yumañonla Jehová (Pr. 27:11). Mi mucʼʌch laj cuch jiñi wocol  tac, utsʼat mi caj i qʼuelonla Jehová yicʼot ñumen pʼʌtʌl mi caj i yajñel lac pijtaya (pejcan Romanos 5:3-5). Tsaʼ bʌ ujti tiʼ tojlel Job miʼ pʌs chaʼan «uts i pusicʼal lac Yum. Wen yujil pʼuntaya» (Stg. 5:11). Miʼ mejlel lac ñop chaʼan Jehová mi caj i yʌqʼuen i majtan jiñi muʼ bʌ i coltʌbeñob i yumʌntel. Cheʼ la cujil iliyi miʼ coltañonla laj cuch ti lac xucʼtʌlel yicʼot lac tijicñʌyel jiñi wocol tac (Col. 1:11).

16. ¿Chucoch ñuc i cʼʌjñibal cheʼ mi lac chʌn cʼajtesan chaʼan yom mi laj coltʌben i yumʌntel Jehová?

¹⁶ An i tajol, wocolʌch mi laj cʼajtesan chaʼan yom mi laj coltan jiñi i yumʌntel Jehová, ñumento cheʼ maʼañix i loqʼuib lac wocol tac mi la cubin. An i tajol, mi lac ñumen acʼ ti ñuc lac wocol anquese mach wen ñuc taquic. Jin chaʼan, yomʌch mi lac chʌcʌ cʼajtesan cheʼ bʌ woli lac ñusan wocol chaʼan yom mi laj coltʌben i yumʌntel Jehová.

17. ¿Chucoch miʼ coltañonla chaʼan maʼañic miʼ ñajʌyel lac chaʼan jiñi ñumen ñuc bʌ i cʼʌjñibal cheʼ mi lac chʌn mel jiñi eʼtel aqʼuebil bʌ i chaʼañonla Jehová?

¹⁷ Muʼ bʌ i mejlel i coltañonla chaʼan maʼañic miʼ ñajʌyel chuqui ñumen ñuc i cʼʌjñibal jiñʌch cheʼ mi lac chʌn mel jiñi eʼtel aqʼuebil bʌ i chaʼañonla Jehová. Laʼ laj qʼuel jumpʼejl ejemplo. Juntiquil hermana i cʼabaʼ Renee tsaʼ bejqʼui i chʼichʼel tiʼ sicojc, ti bele ora miʼ taj cʼux jol yicʼot an i chaʼan cáncer. Cheʼ bʌ miʼ majlel yaʼ ti Doctor, miʼ suben wen tʼan jiñi mucʼoʼ bʌ ti eʼtel, jiñi yambʌ xcʼamʌjelob yicʼot jiñi muʼ bʌ i cʼotelob ti julaʼ. Ti jumpʼejl bʌ qʼuin, cheʼ bʌ tsaʼ subenti cʌytʌl chaʼpʼejl semana yicʼot ojlil yaʼ ti hospital, tsiʼ chaʼle subtʼan 80 ora. Maʼañic tsaʼ ñajʌyi i chaʼan jiñi i yumʌntel Jehová, mi jiñic to cheʼ colelix i chʌmel (sajtel). Jiñʌch tsaʼ bʌ i yʌqʼue i tijicñʌyel i pusicʼal.

18. ¿Chuqui miʼ mejlel ti ujtel cheʼ mi laj coltʌben i yumʌntel Jehová, cheʼ bajcheʼ tsaʼ ujti tiʼ tojlel juntiquil hermana?

¹⁸ Ti jujumpʼejl qʼuin mi lac taj alʌ wocol tac, pero jiñi lac ñaʼtʌbal yaʼʌch la com an tiʼ yumʌntel Jehová. Jennifer tsiʼ ñusa uxpʼejl qʼuin ti jumpʼejl aeropuerto cheʼ bʌ sujtelix muc tiʼ yotot, come tiʼ pejtelel jiñi avión maʼañic tsaʼ mejli ti loqʼuel. Tajol tsaʼ mejli i tech i wen ñaʼtan i bʌ o i pʼuntan i bʌ cheʼ i bajñel jach yicʼot boʼoyemix tsiʼ yubi. Pero mach cheʼic tsiʼ mele. Tsiʼ cʼajti i coltaya ti Jehová chaʼan miʼ mejlel i cʌntesan jiñi yambʌ quixtañujob lujbeñobix bʌ. ¿Chuqui tsaʼ ujti? Tiʼ sube wen tʼan cabʌl quixtañu yicʼot tsiʼ cʌybeñob jun tac. Jennifer miʼ yʌl: «Anquese wocolʌch tsaʼ cubi, Jehová tsaʼʌch i yʌqʼueyon i bendición yicʼot tsiʼ coltayon chaʼan mi cʌcʼ ti ñuc i cʼabaʼ». Maʼañic tsaʼ wis ñajʌyi i chaʼan jiñi ñumen ñuc bʌ i cʼʌjñibal.

19. ¿Chuqui woliʼ mel i tejclum Jehová chaʼan jiñi i yumʌntel?

¹⁹ Jiñi i tejclum Jehová woliʼ chʌn aqʼuen i coltaya jiñi i yumʌntel Dios come miʼ chʼʌmben isujm chaʼan wen ñuc i cʼʌjñibal. I jiñʌch junchajp maʼañic bʌ miʼ mel jiñi mach bʌ isujmic ñopbalʌl. Ti jujuntiquilonla yom mi lac wen qʼuel mi cheʼʌch woli lac mel jaʼel come woli laj coltan jiñi isujm bʌ chʼujutesaya.

20. ¿Bajcheʼ yilal miʼ qʼuel Jehová cheʼ mi laj coltʌben i yumʌntel?

²⁰ Miʼ mejlel lac ñop chaʼan Jehová miʼ wen qʼuel ti ñuc cheʼ mucʼʌch laj cuch jiñi wocol tac yicʼot xucʼul mi lac melben i yeʼtel chaʼan mi laj coltʌben i yumʌntel (Sal. 18:25). Yaʼ ti yambʌ temaj mi caj laj qʼuel chucoch cojach yom mi la cʌqʼuen laj coltaya i yumʌntel Jehová yicʼot bajcheʼ miʼ mejlel lac mel.