¿Wen pejcʌbilix baʼ chaʼan jiñi temaj tac maxto bʌ wen jalic loqʼuem ti Lac Tsictesʌbentel? Qʼuele mi mucʼʌch i mejlel a jacʼ ili cʼajtiya tac:

¿Chuqui chʌnchajp miʼ mejlel i coltañonla chaʼan ñumen wen mi lac chaʼlen cʼay?

Toj yom mi la cajñel cheʼ mi laj chuc laj cʼʌyoñib, yom mi lac wen jap icʼ, yom mi lac jam ti wen lac tiʼ yicʼot yom tsʌts mi lac chaʼlen cʼay. Cheʼ jiñi, pʼʌtʌl mi caj i loqʼuel laj cʼay (w17.11, i yopol 5).

¿Chuqui mi laj cʌn chaʼan baqui an jiñi tejclum tac chaʼan putsʼijib ti Israel yicʼot chaʼan bajcheʼ yilal i bijlel tac?

An 6 tejclum chaʼan bʌ putsʼijib tsaʼ bʌ ajqʼui tiʼ pejtelel jiñi país, i wen cʌntʌbil jiñi i bijlel tac. Wocolix i yʌlʌ jiñi, orajach yicʼot mach wocolic miʼ taj juntiquil wiñic jiñi putsʼijib (w17.11, i yopol 14).

¿Chucoch jiñi i tojol mulil jiñʌch ñumen ñuc bʌ majtañʌl?

Miʼ yʌqʼueñonla chuqui mi lac mulan chaʼan mi lac chumtʌl tiʼ pejtelel ora yicʼot miʼ yʌqʼueñonla chuqui i cʼʌjñibal chaʼan mi lac loqʼuel tiʼ pʼʌtʌlel mulil yicʼot chʌmel. Come Dios miʼ cʼuxbin i pʼolbalob Adán, tsiʼ yʌcʼʌ Jesús cheʼ bʌ xmulilontola (wp17.6, i yopol 6 yicʼot 7).

¿Chucoch mi la cʌl chaʼan jiñi Salmo 118:22 miʼ taj ti tʼan i chaʼ tejchel Jesús?

Tiʼ tsʼaʼleyob Jesús, jiñi Mesías, i tiʼ tsʌnsayob. Yom miʼ chaʼ chʼojyel chaʼan miʼ sujtel «ti [ñaxam bʌ i] xujc otot» (w17.12, i yopol 9 yicʼot 10).

¿Yom ba ascuñʌl juntiquil chaʼan miʼ mejlel ti sujtel tiʼ ñojteʼel jiñi Mesías?

An i tajol, jiñi ascuñʌlob jiñʌch muʼ bʌ i sujtelob tiʼ ñojteʼel Jesús, pero mach cheʼic tiʼ pejtelel ora. Jiñi judíojob yujilob chaʼan cheʼʌchi i tsiʼ chʼʌmʌyob ti ñuc. Jumpʼejl ejemplo, tsiʼ cʌñʌyob chaʼan Cristo mi caj i tilel tiʼ pʼolbal David, jiñi i xut bʌ i yalobil Jesé (w17.12, i yopol 14 yicʼot 15).

¿Chuqui ti principio tac mi lac taj ti Biblia chaʼan jiñi cʼocʼlel?

Jiñi Mandar tsaʼ yʌlʌ chaʼan parte baqui yom miʼ yajñel jiñi cʼamoʼ bʌ, yom miʼ pocob i cʼʌb cheʼ miʼ tʌlob chʼujlelʌl. Yom miʼ mucob i taʼ yicʼot yom miʼ tsepbentel i pʌchʌlel juntiquil alʌl an jaxto bʌ 8 qʼuin tsaʼ yila pañimil chaʼan wen miʼ tiquin (wp18.1, i yopol 7).

¿Chucoch weñʌch cheʼ mi lac bajñel cʼuxbin lac bʌ?

Yom mi laj cʼuxbin jiñi yambʌlob cheʼ bajcheʼ mi lac bajñel cʼuxbin lac bʌ (Mr. 12:31). Jiñi ñoxiʼalʌlob «yom miʼ cʼuxbiñob i yijñam [...] cheʼ bajcheʼ miʼ bajñel cʼuxbiñob i bʌcʼtal» (Ef. 5:28). Pero cheʼ mi lac bajñel cʼuxbin lac bʌ, an tajol miʼ mejlel ti ñumel ti pʼis (w18.01, i yopol 23).

¿Chuqui miʼ mejlel lac mel chaʼan mi lac bej colel tiʼ chaʼan bʌ Dios?

Yom mi lac wen pejcʌben i Tʼan Dios, mi lac wen ñaʼtan muʼ bʌ i yʌl yicʼot mi lac mel cheʼ bajcheʼ mi laj cʌn majlel. Yom mi la cʌcʼ chaʼan jiñi chʼujul bʌ espíritu miʼ tojʼesan lac ñaʼtʌbal i laʼ lac jacʼ yicʼot la cʌqʼueñob wocolix i yʌlʌ yambʌlob chaʼan i coltayajob (w18.02, i yopol 26).

¿Chucoch mach yomic mi laj cʼʌn jiñi astrología yicʼot adivinación chaʼan mi laj cʌn jiñi talto bʌ qʼuin?

An cabʌl chucoch, pero jiñi ñumen ñuc bʌ i sujmlel jiñʌch cheʼ jiñi Biblia miʼ tsʼaʼlen (wp18.2, i yopol 4 yicʼot 5).

Mi tsaʼix lac jacʼʌ baʼ woli lac pʌjyel, ¿chuqui yom mi lac mel?

Mi tsaʼix lac jacʼʌ baqui woli lac pʌjyel, yom mi lac chaʼlen wersa chaʼan mi lac tsʼʌctesan lac tʼan (Sal. 15:4). Mach yomic mi laj qʼuextan lac tʼan tiʼ caj mach bʌ añic i cʼʌjñibal. Tajol jiñi tsaʼ bʌ i pʌyʌyonla tsiʼ chaʼle wersa chaʼan miʼ wen chajpan jiñi bʌlñʌcʼʌl (w18.03, i yopol 18).

¿Chuqui miʼ mejlel i cʌñob tiʼ tojlel Timoteo jiñi waʼchocobiloʼ bʌ tiʼ yeʼtel?

Timoteo tiʼ sʌcla bajcheʼ miʼ mejlel i coltan yambʌlob yicʼot tsiʼ yʌcʼʌ ti ñaxan i chaʼan bʌ Jehová. Tsiʼ chaʼle tsʌts bʌ eʼtel yicʼot tsiʼ mele cheʼ bajcheʼ tsiʼ cʌñʌ. Tsiʼ bej chajpa i bʌ tiʼ chaʼan bʌ Dios yicʼot tsiʼ ñopo jiñi coltaya muʼ bʌ i yʌcʼ i yespíritu Jehová. Tiʼ pejtelel jiñi hermanojob miʼ mejlel i tsajcʌbeñob i melbal, mach cojach jiñi ancianojob (w18.04, i yopol 13 yicʼot 14).