1. ¿Chuquiyes jiñi wen ñuc bʌ aqʼuebilonla?

JEHOVÁ an chuqui wen ñuc bʌ aqʼuebil i chaʼañonla, mach bʌ añic tsiʼ yʌqʼue jiñi añimal tac: Jiñʌch laj conciencia. Adán yicʼot Eva tsaʼʌch aqʼuentiyob jaʼel iliyi. ¿Bajcheʼ la cujil? Come cheʼ tsiʼ ñusʌbeyob i tʼan Dios, tsaʼ caji i mujcuñob i bʌ. Ili yom i yʌl chaʼan jiñi i conciencia tsaʼ caji i ticʼlañob.

2. ¿Bajcheʼ lajal jiñi laj conciencia yicʼot jumpʼejl volante? (Qʼuele jiñi dibujo).

² Jiñi laj conciencia jiñʌch am bʌ ti lac tojlel muʼ bʌ i coltañonla laj cʌn chuqui wen yicʼot mach bʌ weñic, i miʼ tojʼesañonla ti laj cuxtʌlel. Mi mach wen cʌntesʌbilic jiñi laj conciencia lajal bajcheʼ mach bʌ weñic i volantejlel jumpʼejl barco. Mi tsaʼ cʼʌjñi jiñi barco cheʼ bʌ mach weñic i volantejlel, miʼ mejlel i yʌcʼ wocol. Jiñi icʼ yicʼot i pʼʌtʌlel jiñi mar miʼ mejlel i yʌqʼuen i jatsʼ i bʌ. Pero mi weñʌch jiñi volante miʼ coltan jiñi xñijca barco chaʼan wen jach miʼ tojʼesan majlel. Jiñi laj conciencia lajalʌch bajcheʼ jiñi volante. Jiñʌch am bʌ ti lac tojlel muʼ bʌ i subeñonla chuqui jiñi wem bʌ yicʼot mach bʌ weñic, miʼ mejlel i tojʼesañonla majlel ti wen o maʼañic, yaʼʌch cʌyʌl cheʼ bajcheʼ cʌntesʌbil.

3. ¿Chuqui miʼ mejlel ti ujtel mi mach cʌntesʌbilic laj conciencia?

 ³ Mi mach wen cʌntesʌbilic jiñi laj conciencia tajol maʼañic chuqui mi caj i subeñonla mi muqʼuic caj i subeñonla chaʼan maʼañic mi lac mel (chaʼlen) mach bʌ weñic. Muʼto i mejlel i subeñonla chaʼan «utsʼat [jiñi] jontolil» (Is. 5:20; 1 Ti. 4:1, 2). Jesús tiʼ sube jiñi xcʌntʼañob i chaʼan: «Mi caj i cʼotel i yorajlel cheʼ mi caj i lon ñaʼtañob utsʼat woliʼ melbeñob i yeʼtel Dios cheʼ miʼ tsʌnsañetla» (Jn. 16:2). Cheʼʌch tsiʼ ñaʼtayob jiñi tsaʼ bʌ i tsʌnsayob Esteban, i cheʼʌch miʼ ñaʼtañob jaʼel jiñi muʼ bʌ i lajibeñob i melbal (Hch. 6:8, 12; 7:54-60). Jiñi ñaxam bʌ miʼ yʌcʼob i bʌ ti ñopbalʌl an i chaʼleyob tsʌnsa o jatsʼ, i miʼ yʌlob chaʼan cheʼʌch woli (choncol) i melob chuqui yom Dios. Pero tiʼ sujm, woli (yʌquel) jach i ñusʌbeñob ti pʼis i mandar tac (Éx. 20:13). Wen tsiquil chaʼan jiñi i conciencia woliʼ lotiñob.

4. ¿Chuqui yom mi lac mel chaʼan maʼañic miʼ lotiñonla laj conciencia?

⁴ ¿Chuqui yom mi lac mel chaʼan maʼañic miʼ lotiñonla laj conciencia? Jiñi i mandar tac Dios yicʼot i principio tac am bʌ tiʼ Tʼan wen ñuc i cʼʌjñibal «ti cʌntesa chaʼan lac ticʼol, yicʼot chaʼan lac tojʼesʌntel, chaʼan mi lac mel chuqui toj» (2 Ti. 3:16). Jin chaʼan, mi la com chaʼan jiñi laj conciencia lajal miʼ yajñel bajcheʼ an i pensar Dios yicʼot wen miʼ tojʼesañonla, yom mi lac wen pejcan jiñi Biblia, mi lac wen ñaʼtan chuqui miʼ yʌl yicʼot mi la cʌcʼ ti ñuc. Laʼ laj qʼuel bajcheʼ miʼ coltañonla laj cʌntesan laj conciencia jiñi i mandar tac Dios yicʼot i principio tac.

5, 6. ¿Bajcheʼ miʼ coltañonla cheʼ mi lac jacʼben i mandar tac Dios?

⁵ Chaʼan mi laj qʼuelben i wenlel jiñi i mandar tac Dios, mach cojach yom mi lac pejcan o mi lac wen cʌn. Yom mi laj cʼuxbin yicʼot mi lac wen qʼuel ti ñuc. Jiñi i Tʼan Dios miʼ yʌl: «Tsʼaʼlenla jontolil. Cʼuxbinla chuqui utsʼat» (Am. 5:15). Junchajp muʼ bʌ i coltañonla jiñʌch cheʼ mi laj cʌn chuqui miʼ ñaʼtan Jehová. Laʼcu lac ñaʼtan chaʼan maʼañic mi lac mejlel ti wʌyel cheʼ ti acʼʌlel. Cheʼ jiñi, mi lac majlel ti doctor i miʼ subeñonla chuqui tac yom mi laj cʼux, chaʼan mi lac mel ejercicio yicʼot mi lac tsʼitaʼ qʼuextan bajcheʼ chumulonla. Cheʼ mi laj qʼuel chaʼan wolʌch i coltañonla jiñi tsaʼ bʌ i subeyonla lac mel, ¿mach ba muqʼuic caj laj qʼuel ti ñuc jiñi doctor yicʼot mi lac jacʼben i ticʼojel?

⁶ Cheʼʌch miʼ yujtel tiʼ tojlel jiñi tsaʼ bʌ i Meleyonla (Pʌtʌyonla), tsiʼ yʌqʼueyonla mandar tac muʼ bʌ i cʌntañonla chaʼan maʼañic mi lac tajben pejtelel i wocolel jiñi mulil yicʼot miʼ weñʼesan bajcheʼ chumulonla. Miʼ mejlel lac ñaʼtan pejtelel jiñi wenlel muʼ bʌ lac taj cheʼ mi lac jacʼ muʼ bʌ i yʌl jiñi Biblia chaʼan jiñi lot, xujchʼ, tsʼiʼlel, tsʌnsa, jatsʼ yicʼot i chaʼan tac bʌ xiba (pejcan Proverbios 6:16-19; Ap. 21:8). Cheʼ mi laj qʼuel bajcheʼ miʼ wen coltañonla cheʼ mi lac jacʼben i tʼan Jehová, mi lac ñumen cʼuxbin yicʼot mi laj qʼuel ti ñuc, i cheʼʌch mi la cubin jaʼel chaʼan i mandar tac.

7. ¿Bajcheʼ miʼ coltañonla cheʼ mi lac pejcan jiñi relato tac am bʌ ti Biblia yicʼot mi lac wen ñaʼtan?

⁷ Chaʼan mi laj cʌn jiñi ñuc tac bʌ i cʼʌjñibal, mach cʼʌñʌlic mi lac ñaxan ñusan wocol tac tiʼ caj mi lac ñusʌben i tʼan Dios. Miʼ mejlel laj cʌn cheʼ bʌ mi lac pejcan yicʼot mi lac wen ñaʼtan muʼ bʌ i yʌl jiñi Biblia chaʼan jiñi tsaʼ bʌ i tajayob i sajtemal ti wajali. Proverbios 1:5 miʼ yʌl: «Jini weñoʼ bʌ i ñaʼtʌbal mi caj i yotsañob tiʼ pusicʼal i cʌntesʌntel». Ili cʌntesʌntel tilemʌch ti Dios i jiñʌch jiñi ñumen wen bʌ. Jumpʼejl ejemplo, laʼcu lac ñaʼtan jiñi wocol tsaʼ bʌ tili tiʼ tojlel David cheʼ bʌ tsiʼ ñusʌbe i tʼan Dios i tsiʼ chaʼle tsʼiʼlel yicʼot Bat-seba (2 S. 12:7-14). Cheʼ mi lac pejcan majlel tsaʼ bʌ ujti tiʼ tojlel, laʼ lac wen ñaʼtan ili  cʼajtiya tac: «¿Chuqui i wentʌlel tsiʼ mele jiñi David chaʼan maʼañic miʼ taj ili wocol? ¿Chuqui tsaʼ c mele cheʼ joñoñiqui? ¿Tsaʼ ba putsʼiyon loqʼuel bajcheʼ José o tsaʼ yajliyon ti mulil bajcheʼ David?» (Gn. 39:11-15). Cheʼ mi lac ñaʼtan baqui bʌ i wocolel jiñi mulil, ñumento mi caj lac tsʼaʼlen jiñi mach bʌ weñic.

8, 9. a) ¿Bajcheʼ miʼ coltañonla jiñi laj conciencia? b) ¿Chuqui miʼ mel ti laj conciencia jiñi principio tac?

⁸ Tajol ti lac pejtelelʌch mi lac tsʼaʼlen chuqui tac miʼ tsʼaʼlen Dios. Pero an wocol tac maʼañic bʌ miʼ jamʌ al jiñi Biblia chuqui yom mi lac mel. Jin chaʼan, ¿bajcheʼ miʼ mejlel lac ñaʼtan chuqui yom Jehová mi lac mel? Mi wen cʌntesʌbilʌch lac chaʼan jiñi laj conciencia, mi caj lac mel chuqui wen.

⁹ Jehová tsiʼ yʌcʼʌ principio tac muʼ bʌ i mejlel i tojʼesan laj conciencia come miʼ cʼuxbiñonla. Jiñʌch miʼ yʌl: «Joñon a Yumon, a Dioson muʼ bʌ j cʌntesañet chaʼan maʼ taj chuqui wen. Joñon mic tojʼesañet ti a bijlel baʼ yom maʼ chaʼlen xʌmbal» (Is. 48:17, 18). Cheʼ mi lac wen ñaʼtan jiñi principio tac am bʌ ti Biblia i mi la cʌcʼ ti ochel ti lac pusicʼal, woli lac weñʼesan yicʼot lac tojʼesan laj conciencia. Cheʼ bajcheʼ jiñi, miʼ coltañonla lac yajcan chuqui wen.

10. a) ¿Bajcheʼ miʼ coltañonla jiñi principio tac? b) ¿Bajcheʼ tsiʼ cʼʌñʌ Jesús?

¹⁰ Jiñi principio tac miʼ coltañonla chaʼan wen chuqui mi lac ñaʼtan o mi lac mel. Cheʼ mi laj cʌn bajcheʼ an jiñi principio tac miʼ coltañonla lac chʼʌmben isujm chuqui miʼ ñaʼtan Jehová i chucoch tsiʼ yʌcʼʌ mandar tac. Cheʼ bʌ Jesús tsajñi wʌʼ ti pañimil (mulawil), tsiʼ cʼʌñʌ principio tac chaʼan miʼ pʌsben jiñi xcʌntʼañob i chaʼan chaʼan añʌch i wocolel cheʼ bajcheʼ yilalonla o jiñi lac melbal tac. Tiʼ subeyob chaʼan cheʼ mi lac lot lac michʼajel miʼ mejlel i yʌcʼonla ti tech jatsʼ o tsʌnsa i chaʼan mi lac mejlel ti yajlel ti tsʼiʼlel mi mach weñic chuqui mi lac ñaʼtan (Mt. 5:21, 22, 27, 28). Cheʼ mi laj cʌy chaʼan miʼ tojʼesañonla majlel jiñi principio tac tilem bʌ ti Dios, weñʌch woli laj cʌntesan laj conciencia i pejtelel chuqui mi lac yajcan lac mel mi caj i yʌqʼuen i ñuclel Dios (1 Co. 10:31).

11. ¿Bajcheʼ yʌñʌl jiñi laj conciencia yicʼot i chaʼan yambʌlob?

¹¹ ¿Yom ba i yʌl chaʼan junlajal chuqui yom mi lac yajcan ti lac pejtelel? Mach cheʼiqui. Tajol chaʼtiquil hermanojob wen cʌntesʌbilʌch i chaʼañob i conciencia, pero an chuqui mach bʌ lajalic miʼ ñaʼtañob. Laʼ lac ñaʼtan chaʼan jiñi lembal. Jiñi Biblia miʼ yʌl chaʼan mach yomic mi lac chaʼlen yʌcʼʌjel yicʼot cʌlʌx jap lembal, pero maʼañic chuqui miʼ yʌl cheʼ pʼisbil jach mi lac jap (Pr. 20:1; 1 Ti. 3:8). Pero cheʼ woli lac ñaʼtan lac jap lembal, ¿cojach ba yom mi la cʌcʼ ti ñuc chaʼan pʼisbil jach bajcheʼ yom mi lac jap? Mach cheʼiqui. Yom mi lac chʼʌm ti ñuc i conciencia jiñi yambʌ hermanojob, mach lac chaʼañic jach.

12. ¿Bajcheʼ yom miʼ coltañonla jiñi Romanos 14:21?

¹² Pablo tsiʼ cʌntesayonla cʌytʌl chaʼan yom mi lac chʼʌm ti ñuc i conciencia yambʌlob. Tsiʼ yʌlʌ: «Mach maʼ mel chuqui tac miʼ yʌsan ti mulil a wermano. [...] Utsʼat maʼ cʌy a cʼux weʼelʌl o mi vino o mi yan tac bʌ muʼ bʌ i jisʌben i xucʼtilel i pusicʼal» (Ro. 14:21). Mi juntiquil hermano maʼañic miʼ jap lembal chaʼan i conciencia, ti jumpʼejl lac pusicʼal mi caj laj cʌy jiñi lembal chaʼan maʼañic mi la cʌcʼ ti yajlel. An hermanojob maʼañix bʌ miʼ wis japob lembal ili ora come cheʼ maxto Testigojobic tsiʼ wen chaʼleyob jap lembal. Mach la comic chaʼan miʼ chaʼ yajlelob ti jiñi mulil i miʼ tajob tsʌts tac bʌ wocol (1 Co. 6:9, 10). Jin chaʼan, mi an juntiquil hermano maʼañic bʌ miʼ chʼʌm jiñi lembal cheʼ mi lac pʌsben, maʼañic mi caj lac wersa xicʼben mi añʌch laj cʼuxbiya.

13. ¿Chuqui tsiʼ mele Timoteo chaʼan miʼ coltan yambʌ quixtañujob i jacʼob jiñi wen tʼan?

 ¹³ Laʼ laj qʼuel tiʼ tojlel Timoteo. Cheʼ añix cheʼ bʌ 20 i jabilel, tsiʼ mele jiñi tsep pʌchʌlel, anquese wen cʼuxʌch tsiʼ yubi, tsaʼʌch i mele chaʼan maʼañic miʼ yʌcʼob ti yajlel jiñi judíojob muʼ bʌ i subeñob jiñi wen tʼan. Cheʼ bajcheʼ jiñi, tsiʼ laji jiñi apóstol Pablo (Hch. 16:3; 1 Co. 9:19-23). ¿Ixcu joñonla? ¿La comʌch ba lac mel chuqui tac yom melol tiʼ tojlel yambʌlob?

14, 15. a) ¿Chuqui yom mi lac mel chaʼan mi lac taj laj colel bajcheʼ xñoptʼan? b) ¿Bajcheʼ miʼ taj i bʌ cheʼ añix laj colel yicʼot cheʼ mi lac pʌs jiñi cʼuxbiya?

¹⁴ Ti lac pejtelel yom mi lac ñaʼtan chaʼan muqʼuix laj cʌy jiñi ‹i tejchibal i cʌntesa› Cristo, yom mi lac bej taj majlel laj colel (He. 6:1). Pero iliyi mach cheʼic jach miʼ bajñel tilel, yom mi lac chʌn chaʼlen wersa chaʼan mi lac taj. Chaʼan mi lac taj laj colel bajcheʼ xñoptʼan, yom mi lac chʌn cʌn i chaʼan bʌ Jehová yicʼot mi lac bej taj lac pʼipʼlel. Jin chaʼan mi lac chʌcʌ subentel chaʼan ti bele ora yom mi lac pejcan lac Biblia (Sal. 1:1-3). ¿Jiñʌch ba a wom bʌ a mel? Cheʼ ti jujumpʼejl qʼuin mi lac pejcan lac Biblia, miʼ coltañonla lac ñumen chʼʌmben isujm i mandar yicʼot i principio tac Jehová.

¹⁵ Jiñi ñumen ñuc bʌ mandar chaʼañonla jiñʌch jiñi cʼuxbiya. Jesús tiʼ sube jiñi xcʌntʼañob i chaʼan: «Cheʼ jini, pejtelel winicob mi caj i ñaʼtañob xcʌntʼañetla c chaʼan cheʼ mi laʼ cʼuxbin laʼ bʌ» (Jn. 13:35). Juntiquil i majan eran Jesús i cʼabaʼ Santiago tsiʼ yʌlʌ chaʼan jiñʌch jiñi «cʼax ñuc bʌ mandar» (Stg. 2:8). I Pablo tsiʼ yʌlʌ: «Cheʼ mi lac chaʼlen cʼuxbiya tsʼʌcʌl mi lac jacʼ jini mandar» (Ro. 13:10). Wen tsiquil chucoch ñuc i cʼʌjñibal jiñi cʼuxbiya, come jiñi Biblia miʼ yʌl chaʼan Dios «cʼuxbiyajʌch» (1 Jn. 4:8). Tiʼ tojlel Jehová, jiñi cʼuxbiya mach jin jach bajcheʼ yubil mi la cubin, tsiquil ti chuqui mi lac mel. Juan tiʼ tsʼijbu: «Tsiʼ pʌsbeyonla i cʼuxbiya Dios cheʼ bʌ tsiʼ choco tilel ti pañimil cojach bʌ i Yalobil chaʼan mi lac taj laj cuxtʌlel ti Jesús» (1 Jn. 4:9). Cheʼ mi lac pʌs chaʼan mucʼʌch laj cʼuxbin Jehová yicʼot i Yalobil, jiñi hermanojob yicʼot yambʌ wiñicob xʼixicob (quixtañujob), woli lac pʌs chaʼan añix laj colel (Mt. 22:37-39).

16. ¿Chucoch ñumen an i cʼʌjñibal mi caj laj qʼuel jiñi principio tac cheʼ woli lac taj majlel laj colel?

¹⁶ Jiñi mandar tac jamʌ tsiquil baqui yom  miʼ yʌjqʼuel ti ñuc, pero jiñi principio tac mach junchajpic jach baqui miʼ mejlel ti cʼʌjñibʌyel. Jin chaʼan, cheʼ mi lac ñumen taj majlel laj colel mi laj qʼuel chaʼan wen ñucʌch i cʼʌjñibal jiñi principio tac. Miʼ mejlel la cʌl chaʼan lajal bajcheʼ juntiquil alob. Cheʼ bʌ chutto maʼañic miʼ chʼʌmben isujm chuqui ti wocol miʼ mejlel i taj cheʼ miʼ tsajcan mach bʌ weñobic i melbal i jamʌ tsiquil chuqui yom miʼ subentel tiʼ tatob (1 Co. 15:33). Pero cheʼ wolix i colel majlel xucʼu xucʼul miʼ tech i chʼʌmben isujm cheʼ bajcheʼ an jiñi principio tac am bʌ ti Biblia yicʼot wen miʼ yajcan i yamigojob (pejcan 1 Corintios 13:11; 14:20). Cheʼʌch miʼ yujtel ti lac tojlel jaʼel cheʼ mi lac wen ñaʼtan jiñi principio tac, jiñi laj conciencia mi caj i tojʼan majlel cheʼ bajcheʼ i pensar Dios i miʼ mejlel lac ñop chaʼan ñumen wen mi caj i tojʼesañonla majlel.

17. ¿Chucoch miʼ mejlel la cʌl chaʼan tsʼʌcʌl an lac chaʼan muʼ bʌ i coltañonla lac yajcan chuqui wen?

¹⁷ Tsʼʌcʌl an lac chaʼan muʼ bʌ i coltañonla lac yajcan chuqui miʼ mulan Jehová. ¿Chucoch mi la cʌl iliyi? Come jiñi mandar tac yicʼot principio tac am bʌ yaʼ ti Biblia miʼ coltañonla chaʼan chajpʌbilonla «tiʼ pejtelel chuqui wen» yicʼot ‹chaʼan utsʼat mi lac mel la queʼtel tiʼ pejtelel› (2 Ti. 3:16, 17). Pero yom mi lac chaʼlen wersa mi la com lac chʼʌmben isujm «chuqui yom lac Yum» (Ef. 5:17). Yom mi laj cʼʌn ti wen jiñi eʼtijibʌl tac aqʼuebilonbʌla, bajcheʼ jiñi Índice de las publicaciones Watch Tower, jiñi Coltʌntel chaʼan estudio i chaʼan i testigojob Jehová, jiñi programa Watchtower Library, jiñi BIBLIOTECA TI INTERNET Watchtower yicʼot jiñi aplicación JW Library. Pejtelel iliyi mi caj i coltañonla cheʼ mi lac chajpan lac bʌ ti lac bajñelil yicʼot ti lac familia.

18. ¿Baqui bʌ i wenlel cheʼ mucʼʌch lac chʼʌm ti ñuc i mandar yicʼot i principio tac Jehová?

¹⁸ Mi mucʼʌch laj qʼuel ti ñuc jiñi i mandar tac Jehová yicʼot i principio tac, mi caj lac taj cabʌl lac wenlel. Salmo 119:97-100 miʼ yʌl: «Cabʌl mij cʼuxbin a tʼan. Mic chʌn ñaʼtan cʼʌlʌl miʼ sʌcʼan cʼʌlʌl miʼ yicʼan. Ñumen an c ñaʼtʌbal bajcheʼ j contrajob, come joñon mic chʌn ñaʼtan a mandar tiʼ pejtelel ora. Ñumen cabʌl mic chʼʌmben isujm bajcheʼ pejtel muʼ bʌ i cʌntesañoñob, come mi cotsan tic pusicʼal jini tsaʼ bʌ a wʌlʌ. Tsʼitaʼ jach miʼ chʼʌmbeñob isujm jini ñoxobix bʌ, pero cabʌl mic chʼʌmben isujm chaʼan tiʼ jacʼol a tʼan». Cheʼ mi la cʌqʼuen i yorajlel chaʼan mi lac wen ñaʼtan i mandar tac Dios yicʼot i principio tac, mi caj i coltañonla lac ñumen taj lac ñaʼtʌbal yicʼot i pʼipʼlel lac pensar. I cheʼ mucʼʌch lac chaʼlen wersa chaʼan mi laj cʌntesan laj conciencia cheʼ bajcheʼ yom, mi caj lac taj «laj colel [bajcheʼ] Cristo» (Ef. 4:13).