ESTUDIO 25
CʼAY 7 Jehová jiñʌch c pʼʌtʌlel
Laʼ laj cʼajtesan chaʼan Jehová jiñʌch jiñi cuxul bʌ Dios
«Cuxul lac Yum» (SAL. 18:46).
TEMA
I wenlel cheʼ mi laj cʼajtesan chaʼan woli lac melben i yeʼtel jiñi cuxul bʌ Dios.
1. ¿Chuqui miʼ mejlel i coltañonla chaʼan mi lac bej melben i yeʼtel Jehová anquese cabʌl wocol?
JIÑI Biblia miʼ yʌl chaʼan ili ora wen wocol yicʼot bʌbʌqʼuen (2 Tim. 3:1). Ti lac pejtelel mi lac taj wocol tac, pero jiñi woli bʌ (choncol bʌ) lac melben i yeʼtel Jehová mi laj contrajintel yicʼot mi lac tsʼaʼlentel. Jin chaʼan, ¿chuqui miʼ mejlel i coltañonla chaʼan mi lac bej melben i yeʼtel Jehová? Ñuc i cʼʌjñibal cheʼ mi laj cʼajtesan chaʼan woli lac chʼujutesan jiñi cuxul bʌ Dios (Jer. 10:10; 2 Tim. 1:12).
2. ¿Bajcheʼ miʼ pʌs Jehová chaʼan cuxulʌch?
2 Jehová cuxulʌch, miʼ qʼuel cheʼ bʌ mi lac ñusan wocol i tiʼ pejtelel ora yom i coltañonla (2 Cr. 16:9; Sal. 23:4). Cheʼ mi laj cʼajtesan iliyi, miʼ yʌqʼueñonla lac pʼʌtʌlel chaʼan mi laj cuch jiñi wocol tac.
3. ¿Chucoch tsiʼ yʌlʌ David chaʼan cuxulʌch lac Yum?
3 David i cʌñʌ Jehová i tsiʼ ñopo tiʼ tojlel. Jin chaʼan, cheʼ bʌ jiñi rey Saúl woli (yʌquel) i sʌclan chaʼan miʼ tsʌnsan, David tsiʼ cʼajtibe i coltaya Jehová (Sal. 18:6). I cheʼ bʌ tsiʼ qʼuele chaʼan Jehová tsaʼʌch i jacʼbe i yoración yicʼot tsiʼ colta, tsiʼ yʌlʌ: «Cuxul lac Yum» (Sal. 18:46). ¿Chucoch cheʼ tsiʼ yʌlʌ bajcheʼ jiñi? Jumpʼejl libro miʼ yʌl chaʼan jiñi tsaʼ bʌ i yʌlʌ David miʼ pʌs chaʼan mucʼʌch i wen ñop chaʼan Jehová «juntiquilʌch Dios cuxul bʌ muʼ bʌ i chʌn coltan jiñi i wiñicob». David tsiʼ qʼuele bajcheʼ tsiʼ wen colta Jehová tiʼ cuxtʌlel, i jiñi tsiʼ colta chaʼan miʼ ñumen ñop chaʼan Jehová cuxulʌch yicʼot chaʼan miʼ bej melben i yeʼtel i miʼ yʌqʼuen i ñuclel (Sal. 18:28, 29, 49).
4. ¿Chucoch weñʌch cheʼ mi laj qʼuel Jehová bajcheʼ jiñi cuxul bʌ Dios?
4 Mi mucʼʌch lac ñop chaʼan Jehová jiñʌch jiñi cuxul bʌ Dios, mi caj i coltañonla chaʼan tijicña mi lac melben i yeʼtel (troñel). Mi caj i yʌqʼueñonla lac pʼʌtʌlel chaʼan mi lac lʌtʼ jiñi wocol tac yicʼot mi lac chaʼlen wersa lac melben i yeʼtel. Cheʼ jaʼel, mi caj lac mulan chaʼan chʌn lʌcʼʌl mi la cajñel tiʼ tojlel.
JIÑI CUXUL BɅ DIOS MI CAJ I PʼɅTʼESAÑET
5. ¿Chuqui miʼ coltañonla chaʼan mi lac lʌtʼ jiñi wocol tac? (Filipenses 4:13).
5 Cheʼ mi laj cʼajtesan chaʼan Jehová cuxul yicʼot chaʼan yom i coltañonla, mi caj laj cuch baqui jach bʌ wocol. Jehová maʼañic i pʼisol i pʼʌtʌlel, jin chaʼan mi caj i yʌqʼueñonla lac pʼʌtʌlel. Maʼañic jumpʼejl wocol mach bʌ añic miʼ mejlel i tojʼesan (pejcan Filipenses 4:13). Miʼ mejlel lac ñop chaʼan mucʼʌch caj i mejlel laj cuch jiñi wocol tac. Cheʼ mi laj qʼuel chaʼan miʼ coltañonla ti jiñi wocol tac mach bʌ wen tsʌtsic miʼ pʌsbeñonla chaʼan mi caj i coltañonla jaʼel ti tsʌts tac bʌ wocol.
6. ¿Chuqui tsiʼ colta David chaʼan miʼ ñumen ñop ti Jehová?
6 Laʼ laj qʼuel chuqui tsiʼ colta David chaʼan miʼ ñumen ñop ti Jehová. Cheʼ bʌ xcolelto miʼ cʌntʌben i tʌñʌmeʼ i papá. Ti jumpʼejl bʌ qʼuin tiʼ tsʌnsa juncojt bajlum woli bʌ i chucben majlel i tʌñʌmeʼ, i ti yambʌ qʼuin tiʼ tsʌnsa juncojt oso. Chaʼan miʼ mel tsaʼʌch i pʌsʌ i chʼejlel, come tsiʼ yajñesa ili jontol bʌ (simaron bʌ) añimal tac chaʼan miʼ mejlel i coltan jiñi i tʌñʌmeʼ. Pero maʼañic tsiʼ qʼuele i bʌ ti ñuc chaʼan jiñi tsaʼ bʌ i mele, come yujil chaʼan Jehová tsiʼ yʌqʼue i chʼejlel (1 S. 17:34-37). I maʼañic tsaʼ wis ñajʌyi i chaʼan jiñi tsaʼ bʌ i ñusa, cheʼ tsaʼʌch i chʌn ñaʼta tsiʼ colta i ñumen ñop chaʼan Dios cuxulʌch i jiñʌch mi caj i coltan ti wiʼil bʌ qʼuin.
7. ¿Chuqui tsiʼ colta David chaʼan miʼ mejlel i contrajin Goliat?
7 Ti wiʼil, cheʼ bʌ David maxto añic 20 i jabilel, tsaʼ majli yaʼ baqui an jiñi soldadojob israelitajoʼ bʌ i tsiʼ qʼuele chaʼan laj woliyob ti bʌqʼuen tiʼ caj Goliat, come tiʼ subeyob: «Yom mi laʼ chocbeñon tilel juntiquil chaʼan miʼ contrajiñon» (1 S. 17:10, 11). Jiñi soldadojob woliyob ti bʌqʼuen come jin jach woliʼ ñaʼtañob chaʼan Goliat wen chan bʌ wiñic yicʼot chuqui tac woliʼ yʌl (1 S. 17:24, 25). Pero David mach cheʼic tsiʼ yubi i bʌ bajcheʼ jiñi, come tsiʼ ñaʼta chaʼan Goliat mach jiñic jach woli contrajin jiñi israelitajob, woliʼ contrajin jaʼel jiñi «soldadojob i chaʼan bʌ lac Yum» (1 S. 17:26). Jiñi i pensar yaʼʌch an ti Jehová. Tsaʼix i qʼuele bajcheʼ tsiʼ colta cheʼ bʌ tiʼ tsʌnsa jiñi bajlum yicʼot oso, i yujil chaʼan mucʼʌch caj i coltan jaʼel ti jiñi bʌ ora. I cheʼʌch tsaʼ ujti, tiʼ coltaya Jehová, David tiʼ tsʌnsa jiñi filisteo (1 S. 17:45-51).
8. ¿Chuqui mi caj i coltañonla chaʼan mi lac ñumen ñop ti Jehová cheʼ bʌ wocol woli lac ñusan? (Qʼuele jaʼel jiñi foto).
8 Cheʼ bajcheʼ David, mi caj i mejlel a lʌtʼ jaʼel jiñi wocol tac cheʼ maʼ cʼajtesan chaʼan Dios cuxul i chajpʌbil chaʼan miʼ coltañet (Sal. 118:6). I cheʼ maʼ ñaʼtan chuqui tac an i mele Dios ti wajali, mi caj a ñumen ñop tiʼ tojlel. Miʼ mejlel a pejcan relato tac ti Biblia muʼ bʌ i pʌs bajcheʼ tsiʼ colta Dios i wiñicob ti wajali (Is. 37:15-17, 33-37). Cheʼ jaʼel, pejcan experiencia tac ti jw.org muʼ bʌ i pʌs bajcheʼ coltʌbil i chaʼan i wiñicob ili ora, i cʼajtesan chuqui tac an i mele ti a tojlel jaʼel. ¿Maʼañic baʼ chuqui cʌlʌx ñuc bʌ ujtem ti a tojlel baqui qʼuelbil a chaʼan bajcheʼ miʼ coltañet Jehová cheʼ bajcheʼ tsiʼ mele tiʼ tojlel David? Mach a wubin a chʼijyemlel. Jehová añʌch cabʌl chuqui an i mele ti a tojlel, an i pʌyʌyet chaʼan maʼ sujtel tiʼ yamigo (Juan 6:44). Cheʼ jaʼel, bej añet tiʼ sujmlel come jin woliʼ coltañet. Jin chaʼan, cʼajtiben chaʼan miʼ coltañet a cʼajtesan bajcheʼ jacʼbil i chaʼan a woración, bajcheʼ coltʌbil i chaʼañet cheʼ wen añet yicʼot cheʼ bʌ an chuqui woli a ñusan. Cheʼ maʼ wen ñaʼtan pejtelel chuqui an i mele ti a tojlel, mi caj a ñumen ñop chaʼan mucʼʌch caj i coltañet.
Mi mucʼʌch lac lʌtʼ jiñi wocol tac, miʼ mejlel lac tijicñesan Jehová i mi lac pʌs chaʼan Satanás juntiquil xlot. (Qʼuele jiñi párrafo 8 yicʼot 9).
9. ¿Chuqui yom mi lac ñaʼtan cheʼ woli lac ñusan wocol? (Proverbios 27:11).
9 Cheʼ la cujil chaʼan Jehová Dios cuxulʌch, miʼ coltañonla chaʼan mi lac ñaʼtan jiñi ñumen ñuc bʌ i cʼʌjñibal. Satanás tsiʼ yʌlʌ chaʼan mi caj laj cʌy Jehová cheʼ mi lac ñusan wocol tac (Job 1:10, 11; pejcan Proverbios 27:11). Jin chaʼan, mi mucʼʌch laj cuch jiñi wocol tac, mi caj lac tijicñesan Jehová. Mi xucʼulʌch mi lac chʌn ajñel, mi caj lac pʌs chaʼan mi laj cʼuxbin Jehová, i chaʼan Satanás juntiquil xlot. ¿Am ba laj contrajintel ti yumʌlob, wocol chaʼan taqʼuin, o jiñi lac piʼʌlob mach yomobic i ñʌchʼtan jiñi wen tʼan o yan tac bʌ wocol? Mi cheʼi, cʼajtesan chaʼan pejtelel jiñi miʼ mejlel i yʌcʼ chaʼan mi lac tijicñesan Jehová. Mach ñajʌyic a chaʼan chaʼan Jehová maʼañic mi caj i yʌcʼ chaʼan mi laj qʼuelbentel lac pusicʼal baʼ jaxʌl maʼañix miʼ mejlel lac lʌtʼ (1 Cor. 10:13). Mi caj i yʌqʼueñonla lac pʼʌtʌlel chaʼan mi lac lʌtʼ jiñi wocol.
JIÑI CUXUL BɅ DIOS MI CAJ I YɅQʼUEÑONLA LAC MAJTAN
10. ¿Chuqui mi caj i mel Jehová tiʼ tojlel jiñi muʼ bʌ i chʼujutesañob?
10 Jehová miʼ yʌqʼuen i majtan jiñi muʼ bʌ i chʼujutesañob. Ili ora an lac tijicñʌyel yicʼot ñʌchʼtʌlel, i ti talto bʌ qʼuin mi caj lac chumtʌl tiʼ pejtelel ora (Heb. 11:6). La cujil chaʼan Jehová yomʌch i yʌqʼueñonla lac majtan i an i pʼʌtʌlel chaʼan miʼ mel. Ili miʼ ñijcañonla chaʼan mi lac chaʼlen wersa lac melben i yeʼtel, cheʼʌch bajcheʼ tsiʼ meleyob i wiñicob ti wajali. Laʼ laj qʼuel tiʼ tojlel Timoteo (Heb. 6:10-12).
11. ¿Chuqui tsiʼ colta Timoteo chaʼan miʼ chaʼlen tsʌts bʌ eʼtel ti congregación? (1 Timoteo 4:10).
11 (Pejcan 1 Timoteo 4:10). Timoteo tsiʼ wen ñopo chaʼan Jehová mucʼʌch caj i yʌqʼuen i majtan, jin chaʼan tsiʼ chaʼle tsʌts bʌ eʼtel tiʼ tojlel Jehová yicʼot yambʌlob. ¿Chuqui tsiʼ mele? Jiñi apóstol Pablo tiʼ sube chaʼan yom miʼ chaʼlen wersa chaʼan wem bʌ xcʌntesa yicʼot chaʼan wem bʌ ejemplo tiʼ tojlel jiñi xcolelob yicʼot jiñi añobix bʌ i jabilel. Tsaʼ aqʼuenti eʼtel tac mach bʌ cʼuñic ti melol, tsaʼ subenti chaʼan yom miʼ ticʼob yambʌlob (1 Tim. 4:11-16; 2 Tim. 4:1-5). Tajol an maʼañic bʌ tsiʼ qʼueleyob jiñi eʼtel tac tsaʼ bʌ i mele Timoteo o an maʼañic bʌ tsiʼ qʼueleyob ti ñuc. Pero yujil chaʼan Jehová wolʌch i qʼuel i mi caj i yʌqʼuen i majtan (Rom. 2:6, 7).
12. ¿Chuqui miʼ mejlel i coltan jiñi ancianojob chaʼan miʼ chaʼleñob tsʌts bʌ eʼtel ti congregación? (Qʼuele jaʼel jiñi foto).
12 Cheʼ bajcheʼ Timoteo, jiñi ancianojob yom miʼ ñopob chaʼan Jehová miʼ qʼuel chuqui miʼ melob, i miʼ chʼʌm ti ñuc. An ancianojob mach bʌ cojach miʼ cʌntañob jiñi congregación, miʼ chaʼleñob cʌntesa o subtʼan. An muʼ bʌ i chaʼleñob coltaya ti construcción o baqui miʼ yujtel jumpʼejl wocol. An muʼ bʌ i julaʼtañob jiñi hermanojob cʼamoʼ bʌ añoʼ bʌ ti hospital o ochemob ti jiñi Comité muʼ bʌ i pejcan doctorob. Yujilob chaʼan jiñi congregación mach i chaʼañic juntiquil wiñic, i chaʼañʌch Jehová. Jin chaʼan, ti jumpʼejlob i pusicʼal miʼ tsʼʌctesañob i yeʼtel i wen yujilob chaʼan Dios mi caj i yʌqʼueñob i majtan (Col. 3:23, 24).
Jiñi cuxul bʌ Dios mi caj i yʌqʼueñet a majtan chaʼan jiñi tsʌts bʌ eʼtel maʼ mel ti congregación. (Qʼuele jiñi párrafo 12 yicʼot 13).
13. ¿Bajcheʼ yubil miʼ yubin Jehová cheʼ miʼ qʼuel chaʼan mi lac chaʼlen wersa lac melben i yeʼtel?
13 Mach ti lac pejtelelic mi lac mejlel ti sujtel ti anciano. Pero añʌch chuqui mi lac mejlel la cʌqʼuen Jehová. I miʼ wen qʼuel ti ñuc cheʼ mi la cʌqʼuen jiñi ñumen wem bʌ. Miʼ qʼuel ti ñuc cheʼ mi la cʌcʼ lac donación chaʼan jiñi obra mundial, anquese maʼañic jaypʼejl. Tijicña miʼ qʼuelonla cheʼ mi lac chaʼlen wersa lac chʼuy laj cʼʌb chaʼan mi la cʌcʼ laj comentario anquese an lac bʌqʼuen. I cheʼ bʌ an majqui miʼ melbeñonla mach bʌ weñic pero mi lac ñusʌben, tijicña miʼ yubin jaʼel. Jin chaʼan, mi maʼañic bajcheʼ cʼamel woli a mel tiʼ tojlel maʼ wubin, cʼajtesan chaʼan miʼ qʼuel ti ñuc woli bʌ a mel, miʼ cʼuxbiñet i mi caj i yʌqʼueñet a majtan (Luc. 21:1-4).
YOM CHɅN LɅCʼɅL AÑONLA TIʼ TOJLEL JIÑI CUXUL BɅ DIOS
14. ¿Chucoch cheʼ lʌcʼʌl añonla la quicʼot Jehová miʼ coltañonla chaʼan xucʼulonla tiʼ tojlel? (Qʼuele jaʼel jiñi foto).
14 Mi cuxulʌch mi laj qʼuel Jehová mach wocolic mi caj la cubin chaʼan xucʼulonla tiʼ tojlel. Jiñʌch tsaʼ bʌ ujti tiʼ tojlel José, maʼañic tsiʼ jacʼʌ i mel tsʼiʼlel come mach yomic i yʌqʼuen i chʼijyemlel Jehová (Gn. 39:9). Chaʼan cuxul mi laj qʼuel Jehová jaʼel, yom mi la cʌqʼuen i yorajlel chaʼan mi lac mel oración yicʼot mi lac pejcan jiñi Biblia. Cheʼ bajcheʼ jiñi mi caj lac ñumen lʌcʼtesan lac bʌ tiʼ tojlel, i mi ñumen lʌcʼʌlonla la quicʼot Jehová maʼañic mi caj lac mulan lac mel muʼ bʌ i yʌqʼuen i chʼijyemlel (Sant. 4:8).
Mi lʌcʼʌl añet a wicʼot jiñi cuxul bʌ Dios mi caj i coltañet chaʼan xucʼul maʼ wajñel. (Qʼuele jiñi párrafo 14 yicʼot 15).
15. ¿Chuqui miʼ pʌsbeñonla tsaʼ bʌ ujti tiʼ tojlel jiñi israelitajob yaʼ ti desierto? (Hebreos 3:12).
15 Jiñi muʼ bʌ i ñajʌyel i chaʼañob chaʼan Jehová cuxulʌch mach wocolic miʼ mejlel i ñajtʼesañob i bʌ tiʼ tojlel. Laʼcu lac ñaʼtan tsaʼ bʌ ujti tiʼ tojlel jiñi israelitajob cheʼ añob ti desierto. Yujilob chaʼan Jehová cuxulʌch, pero tsaʼ caji i ñaʼtañob chaʼan maʼañix mi caj i yʌqʼueñob i cʼʌjñibal bʌ i chaʼañob. Tsaʼto i yʌlʌyob: «¿Am ba lac Yum ti lac tojlel o tsaʼ ba cʌleyonla?» (Éx. 17:2, 7). Ti wiʼil, tsiʼ contrajiyob Dios. Joñonla mach cheʼic la com lac mel bajcheʼ jiñi (pejcan Hebreos 3:12).
16. ¿Chucoch wocol miʼ mejlel la cubin chaʼan mi lac ñop ti Jehová?
16 Jiñi lac piʼʌlob ili ora miʼ yʌlob chaʼan maʼañic Dios, i jiñi maʼañic bʌ miʼ melbeñob i yeʼtel utsʼat chumulob yilal. Tiʼ caj iliyi tajol wocol mi la cubin chaʼan chʌn lʌcʼʌl mi la cajñel la quicʼot Jehová yicʼot chaʼan mi lac bej ñop tiʼ tojlel. Tajol maʼañic mi caj la cʌl chaʼan maʼañic Dios, pero tajol mi lac ñaʼtan chaʼan maʼañic mi caj i coltañonla. Lʌcʼʌ cheʼʌch tsaʼ ujti tsaʼ bʌ i tsʼijbu jiñi Salmo 73. Cheʼ tsiʼ qʼuele chaʼan tijicña chumulob jiñi muʼ bʌ i ñusʌbeñob i mandar Jehová, tsiʼ cʼajtibe i bʌ mi añixto i cʼʌjñibal cheʼ miʼ melben i yeʼtel (Sal. 73:11-13).
17. ¿Chuqui mi caj i coltañonla chaʼan chʌn lʌcʼʌl mi la cajñel tiʼ tojlel Jehová?
17 Cheʼ bʌ jiñi salmista tsiʼ ñaʼta chuqui mi caj i chaʼleñob jiñi muʼ bʌ i ñajtʼesañob i bʌ ti Jehová, tsiʼ colta chaʼan miʼ chaʼ tojʼesan i pensar (Sal. 73:18, 19, 27). Cheʼ jaʼel, tsiʼ ñaʼta pejtelel tajbil bʌ i chaʼan cheʼ woliʼ melben i yeʼtel Jehová (Sal. 73:24). Joñonla jaʼel, cheʼ mi lac ñaʼtan pejtelel jiñi bendición am bʌ i yʌqʼueyonla Jehová i mi lac ñaʼtan bajcheʼ yilal añonla cheʼ machic mi lac melben i yeʼtel, mi caj i coltañonla chaʼan chʌn xucʼulonla tiʼ tojlel i mi la cʌl bajcheʼ jiñi salmista: «Pero joñon mic taj c wenlel cheʼ mic ñochtan Dios» (Sal. 73:28).
18. ¿Chucoch mach yomic mi lac chaʼlen bʌqʼuen?
18 Miʼ mejlel lac lʌtʼ baqui jach bʌ wocol mi lac taj ti ili cojix bʌ qʼuin, come xyaj eʼtelonla i chaʼan juntiquil cuxul bʌ Dios yicʼot i sujm bʌ (1 Tes. 1:9). Jehová mucʼʌch i ñaʼtañonla i tiʼ pejtelel ora yom i coltañonla, cheʼʌch tsiʼ mele tiʼ tojlel i wiñicob wajali i cheʼʌch mi caj i bej mel ili ora. La cujil chaʼan tsʼitaʼ jax yom miʼ tejchel jiñi ñuc bʌ wocol maʼañic bʌ baʼ ujtem, pero mach lac bajñelic (Is. 41:10). «Jin chaʼan ti jumpʼejl lac pusicʼal miʼ mejlel la cʌl: ‹Jehová jiñʌch caj coltaya. Maʼañic mi caj c chaʼlen bʌqʼuen›» (Heb. 13:5, 6).
CʼAY 3 Dios miʼ yʌcʼ pʼʌtʌlel, chʼujbiya yicʼot pijtaya
