Chaʼan utsʼat miʼ qʼuelonla Jehová yom an lac ñopoñel. Pero jiñi Biblia miʼ yʌl chaʼan «mach tiʼ pejtelelobic añob i ñopoñel» (2 Tes. 3:2). Cheʼ bʌ jiñi apóstol Pablo tsiʼ yʌlʌ iliyi, jin woliʼ taj ti tʼan «jiñi jontol bʌ wiñicob yicʼot muʼ bʌ i ñumelob ti pʼis» tsaʼ bʌ i contrajiyob. Pero jiñi tsaʼ bʌ i yʌlʌ miʼ mejlel ti cʼʌjñel jaʼel chaʼan miʼ tajtʌl ti tʼan yambʌ lac piʼʌlob, bajcheʼ jiñi maʼañic bʌ miʼ ñopob chaʼan an juntiquil Dios tsaʼ bʌ i mele pejtelel chuqui an (Rom. 1:20). Cheʼ jaʼel, an muʼ bʌ i yʌlob chaʼan miʼ ñopob chaʼan añʌch juntiquil ñumen pʼʌtʌl bʌ bajcheʼ joñonla, pero jiñi mach jiñic i sujm bʌ ñopoñel.

Chaʼan utsʼat miʼ qʼuelonla Dios yom mi lac ñop chaʼan añʌch yicʼot chaʼan mi caj i yʌqʼuen i majtan jiñi mucʼʌch bʌ i wen ñopob (Heb. 11:6). Cheʼ jaʼel, jiñi ñopoñel jumpʼejlʌch melbalʌl muʼ bʌ i yʌcʼ jiñi espíritu. Mi la com lac taj jiñi chʼujul bʌ espíritu yom mi laj cʼajtiben Jehová ti oración (Luc. 11:9, 10, 13). Cheʼ jaʼel ñuc i cʼʌjñibal cheʼ mi lac pejcan jiñi Biblia, mi lac ñaʼtan chuqui miʼ yʌl i mi lac mel cheʼ bajcheʼ woli laj cʌn. Cheʼ bajcheʼ jiñi, jiñi chʼujul bʌ espíritu mi caj i mel i yeʼtel ti lac tojlel i mi caj i coltañonla lac taj jiñi i sujm bʌ ñopoñel.