Jiñi xpejcaya juñob miʼ cʼajtibeñob i bʌ
¿Bajcheʼ miʼ chʼʌmbentel i sujm muʼ bʌ i yʌl Salmo 12:7?
Ti Salmo 12:1-4 David tsiʼ yʌlʌ chaʼan maʼañix mi juntiquilic wiñic xucʼul bʌ. Cheʼ jiñi, ti versículo 5 cʼʌlʌl 7 miʼ bej al:
«Lac Yum woli ti tʼan: Woliʼ ticʼlʌntelob jini
pʼumpʼuñoʼ bʌ.
Woliyob ti wocol jini mach bʌ añobic i chubʌʼan.
Jini chaʼan mux caj c tech meloñel.
Mi caj cʌcʼ jini ticʼlʌbiloʼ bʌ baʼ xucʼul miʼ
yajñelob cheʼ bajcheʼ yomob i pusicʼal, cheʼen.
Sʌcʌch i tʼan lac Yum.
Cheʼ yilal bajcheʼ tsucul taqʼuin tsaʼ bʌ puli
wucyajl ti cʼajc.
C Yum, jatet mi caj a cʌntan a chaʼañoʼ bʌ tiʼ tojlel
jontoloʼ bʌ ti pejtelel ora».
Jiñi versículo 5 miʼ pʌs chaʼan Jehová mi caj i coltan jiñi woli bʌ i ticʼlʌntelob.
Jiñi versículo 6 miʼ yʌl: «Sʌcʌch i tʼan lac Yum. Cheʼ yilal bajcheʼ tsucul taqʼuin tsaʼ bʌ puli wucyajl ti cʼajc». I joñonla mi lac ñop chaʼan i sujmʌch ili tʼan (Sal. 18:30; 119:140).
An traducción tac chaʼan jiñi Biblia baqui jiñi Salmo 12:7 cojach miʼ yʌl: «Mi caj a cʌntan». An muʼ bʌ i ñaʼtañob chaʼan ili versículo yom i yʌl chaʼan Dios mi caj i cʌntan i Tʼan, come jiñi versículo 6 ujtel i yʌl jiñi i Tʼan lac Yum. La cujil chaʼan Dios añʌch i cʌnta i Tʼan cheʼ bʌ an tsaʼ bʌ i ñopoyob i jisan (Is. 40:8; 1 Ped. 1:25).
Pero la cujil chaʼan Jehová mucʼʌch i cʌntan jaʼel jiñi ticʼlʌbiloʼ bʌ, muʼ bʌ i yʌjlelob yaʼ ti versículo 5. Añix i mele i mucʼʌch caj i bej mel (Job 36:15; Sal. 6:4; 31:1, 2; 54:7; 145:20).
Cheʼ jiñi, ¿bajcheʼ mi lac chʼʌmben i sujm muʼ bʌ i yʌl jiñi versículo 7?
Cheʼ mi lac ñumen tsajin jiñi salmo, tsiquil miʼ pʌs chaʼan jiñʌch lac piʼʌlob muʼ bʌ i taj ti tʼan.
Ti Salmo 12:1 yicʼot 2, David tsiʼ yʌlʌ chaʼan jiñi lac piʼʌlob ti jimbʌ ora mach xucʼulobix i wen yujilob lot, tiʼ caj jiñi, David yicʼot jiñi yambʌyob tsiʼ tajayob wocol. Cheʼ jiñi, jiñi versículo 3 miʼ yʌl chaʼan Jehová mi caj i jisan jiñi yujiloʼ bʌ lot. Jiñi Salmo 12 miʼ pʌsbeñonla chaʼan Jehová mi caj i coltan jiñi i wiñicob come jiñi i Tʼan sʌcʌch.
Jiñi versículo 7 miʼ yʌl chaʼan Jehová mi caj i cʌntan jiñi woli bʌ (choncol bʌ) i ñusañob wocol tiʼ caj jiñi jontoloʼ bʌ.
Cheʼ jiñi, ¿chucoch an muʼ bʌ i chaʼleñob ti traducir jiñi versículo 7 bajcheʼ «mi caj a cʌntan»? Come yaʼʌch tsiʼ chucuyob i bʌ ti jiñi copia tac chaʼan jiñi Tsʼijbujel hebreo. Pero ti jiñi Septuaginta griega tsaʼ chaʼlenti ti traducir bajcheʼ «jin mi caj i cʌntañonla», ilayi woli (yʌquel) i tajtʌl ti tʼan jiñi xucʼuloʼ bʌ tsaʼ bʌ ticʼlʌntiyob yicʼot tsaʼ bʌ i ñusayob wocol, jiñʌch muʼ bʌ caj i cʌntʌntelob tiʼ tojlel jiñi jontoloʼ bʌ (mañajoʼ bʌ) (Sal. 12:7, 8). Ti jumpʼejl traducción ti arameo, jiñi versículo 7 miʼ yʌl: «Jatet c Yum mi caj a cʌntan jiñi tojoʼ bʌ, mi caj a cʌntañob tiʼ tojlel ili jontoloʼ bʌ tiʼ pejtelel ora». Pejtelel tsaʼix bʌ laj qʼuele miʼ pʌs chaʼan jiñi Salmo 12:7 mach jiñic woliʼ taj ti tʼan jiñi i tʼan Dios.
Jin chaʼan, ili versículo miʼ tijicñesʌben i pusicʼal jiñi xucʼuloʼ bʌ come Dios mi caj i coltañob.
