Tiʼ sujm, ili ora mi juntiquilic quixtañu miʼ mejlel i yʌl bajcheʼ mero yilal jiñi apóstol Pablo. Jiñi muʼ bʌ i pʌstʌl yaʼ ti lon c jun tac dibujo tac jach muʼ bʌ i mejlel, i mach chuculic tiʼ chaʼan bʌ jiñi arqueología.

Pero añʌch baqui miʼ tsʼitaʼ ajlel chaʼan bajcheʼ yilal jiñi Pablo. Jumpʼejl ejemplo, ti ili revista, tsaʼ bʌ loqʼui cheʼ ti 1 i chaʼan marzo, 1902, tsiʼ yʌlʌ chaʼan jiñi libro Hechos de Pablo y Tecla, tsaʼ bʌ mejli cheʼ ti jabil 150, tajol jiñʌch jiñi ñumen wem bʌ chuqui miʼ tsictesan tiʼ tojlel Pablo: «Juntiquil pecʼ bʌ wiñic, maʼañic i tsutsel i jol, mero xotol i yoc, wen chʼejl, mero lʌtsʼʌl an jiñi i tsutsel i pam i wut yicʼot tsʼitaʼ colem i ñiʼ».

Jumpʼejl diccionario miʼ tsictesan chaʼan tajol isujmʌch chuqui tac miʼ yʌl jiñi libro Hechos de Pablo y Tecla chaʼan bʌ ti wajali (The Oxford Dictionary of the Christian Church [melbil bʌ ti 1997]). Ili libro tsaʼ wen qʼuejli ti ñuc cheʼ ñumeñix cabʌl siglo tsaʼ tsʼijbunti, cheʼʌch miʼ cʼotel ti ñaʼtʌntel come tsaʼ mejli 80 tsʼijbujel ti griego yicʼot tsaʼ mejli ti yan tac bʌ tʼan. Jin chaʼan, jiñi i dibujolel Pablo muʼ bʌ i loqʼuel yaʼ ti lon c jun tac, mucʼʌch i taj i bʌ yicʼot jiñi yan tac bʌ jun melbil bʌ wajali muʼ bʌ i yʌl tiʼ tojlel.

Pero yom mi laj cʼajtesan chaʼan mach jiñic ñumen ñuc i cʼʌjñibal mi lac ñaʼtan bajcheʼ yilal jiñi Pablo. Cheʼ bʌ tsiʼ chaʼle subtʼan, an tsaʼ bʌ i wajleyob i tsiʼ yʌlʌyob: «Mach pʼʌtʌlic Pablo ti lac tojlel. Mach chʼejlic muʼ ti tʼan» (2 Co. 10:10). Pero mach yom miʼ ñajʌyel lac chaʼan chaʼan tsaʼ sujti ti xñoptʼan come Jesús tsiʼ pʌsbe i bʌ. Miʼ mejlel lac ñaʼtan jaʼel pejtelel chuqui tsiʼ taja cheʼ tsaʼ ‹yajcʌnti› chaʼan miʼ sub i cʼabaʼ Jesús «tiʼ tojlel gentilob» (Hch. 9:3-5, 15; 22:6-8). Yom mi lac ñaʼtan jaʼel bajcheʼ cʼamel miʼ coltañonla jiñi libro tac am bʌ ti Biblia, tsaʼ bʌ i tsʼijbu tiʼ coltaya jiñi chʼujul bʌ espíritu.

Pablo maʼañic tsiʼ wis alʌ chaʼan bajcheʼ yilal mi tsaʼicto i qʼuele i bʌ ti ñuc chaʼan pejtel chuqui tsiʼ mele cheʼ maxto xñoptʼañic (Hch. 26:4, 5; Fil. 3:4-6). Tsiʼ yʌlʌ: «Mach lajalic c ñuclel yicʼot yañoʼ bʌ apóstolob. Mach utsʼatonic cheʼ bʌ tsaʼ pʌjyiyon ti apóstol» (1 Co. 15:9). Ti wiʼil, tiʼ tsʼijbu: «Anquese mach ñuconic cheʼ bajcheʼ yañoʼ bʌ i chaʼañoʼ bʌ Dios, tsaʼ aqʼuentiyon queʼtel chaʼan mic subeñob gentilob jini wen tʼan yicʼot i yutslel Cristo, chaʼan miʼ cʌñob i ñuclel Cristo mach bʌ luʼ cʌmbilic lac chaʼan» (Ef. 3:8). Tiʼ sujm, jiñi wen tʼan tsaʼ bʌ i subu ñumel Pablo jiñʌch ñumen ñuc bʌ i cʼʌjñibal, i mach jiñic cheʼ bajcheʼ yilal.