1, 2. a) ¿Chuqui miʼ ñaʼtañob jiñi tatʌlob cheʼ jiñi i yalobilob miʼ yʌlob chaʼan yomobix chʼʌmjaʼ? b) ¿Chucoch miʼ cʼajtibentelob mi tsaʼix i yʌcʼʌyob i bʌ ti Jehová jiñi muʼ bʌ i cajelob ti chʼʌmjaʼ? (Qʼuele jiñi foto).

MARÍA yaʼix waʼal baqui an jiñi yambʌlob muʼ bʌ i cajelob ti chʼʌmjaʼ, jiñi i tatob yaʼʌch woli (choncol) i qʼuelob jaʼel. Cheʼ bʌ jiñi xʼacʼ discurso wolix (yʌquelix) i mel jiñi chaʼpʼejl cʼajtiya, ti cʼam bʌ tʼan tsiʼ jacʼʌ. Ti jumucʼ jach, ili alʌ xchʼoc 9 bʌ i jabilel tsaʼix i chʼʌmʌ jaʼ.

² Jiñi i tatob María wen tijicñayob cheʼ tsaʼix i ñaʼta i yʌcʼ i bʌ ti Jehová yicʼot chaʼan miʼ chʼʌmjaʼ. Pero jiñi i ñaʼ María an chuqui woliʼ cʼojoʼtan tilel. Miʼ chʌn cʼajtiben i bʌ: «¿Wen pecʼto ba i jabilel chaʼan miʼ chaʼlen chʼʌmjaʼ? ¿Mucʼʌch ba i chʼʌmben isujm chaʼan mach alas jach muʼ bʌ caj i mel (chaʼlen)? ¿Ñumen wen ba cheʼ muqʼuicto i pijtan?». Jiñʌch muʼ bʌ i ñaʼtañob cabʌl tatʌlob cheʼ jiñi i yalobilob miʼ yʌlob chaʼan yomobix chʼʌmjaʼ (Ec. 5:5). I tilelʌch bajcheʼ jiñi, come cheʼ mi la cʌcʼ lac bʌ yicʼot mi lac chʼʌmjaʼ jiñʌch ñumen ñuc bʌ i cʼʌjñibal mi lac mel bajcheʼ  xñoptʼan (qʼuele jiñi recuadro « ¿Tsaʼix baʼ wʌcʼʌ a bʌ ti Jehová?»).

3, 4. a) ¿Chuqui ti lajiya tsiʼ yʌcʼʌ Pedro chaʼan miʼ pʌs chaʼan ñuc i cʼʌjñibal jiñi chʼʌmjaʼ? b) ¿Chucoch miʼ mejlel lac lajeʼ jiñi chʼʌmjaʼ bajcheʼ jiñi arca tsaʼ bʌ i mele Noé?

³ Jiñi apóstol Pedro tsiʼ taja ti tʼan jiñi arca tsaʼ bʌ i mele (pʌtʌ) Noé: «Jiñʌch i yejtal bajcheʼ mi laj coltʌntel wʌle ti chʼʌm jaʼ» (pejcan 1 Pedro 3:20, 21). Jiñi arca tsiʼ yʌcʼʌ ti cʌjñel chaʼan Noé tsaʼʌch i yʌcʼʌ i bʌ ti melol chuqui yom Dios. Tsiʼ ñopo yicʼot tsiʼ mele chuqui tsiʼ yʌlʌ Jehová. Cheʼ bajcheʼ jiñi, temel yicʼot i familia tsiʼ tajayob i coltʌntel ti jiñi Butʼjaʼ. ¿Chuqui yom bʌ i pʌs jiñi Pedro?

⁴ Cheʼ bʌ jiñi wiñicob xʼixicob (quixtañujob) tsiʼ qʼueleyob jiñi arca, wen yujilob chaʼan Noé tsaʼʌch i ñopo Dios. Cheʼʌch jaʼel ili ora, cheʼ bʌ miʼ qʼuejlel chaʼan juntiquil miʼ chaʼlen chʼʌmjaʼ, miʼ ñaʼtʌntel chaʼan juntiquilʌch xñoptʼan i chaʼan tsaʼix i yʌcʼʌ i bʌ ti Jehová come miʼ yʌcʼ i ñopoñel (chʼujbiya) ti Cristo tsaʼ bʌ chaʼ chʼojyi. Cheʼ bajcheʼ Noé, jiñi muʼ bʌ i yʌcʼob i bʌ ti Dios, miʼ jacʼbeñob i tʼan yicʼot miʼ melob jiñi eʼtel (troñel) tsaʼ bʌ i yʌqʼueyob. Jehová tsiʼ colta Noé ti jiñi Butʼjaʼ. Cheʼʌch mi caj i coltan jaʼel jiñi xucʼul bʌ i wiñicob chʼʌmbilix bʌ i chaʼañob jaʼ cheʼ bʌ miʼ tilel i jisʌntel ili jontol bʌ pañimil (mulawil) (Mr. 13:10; Ap. 7:9, 10). Jin chaʼan, ñuc i cʼʌjñibal cheʼ mi la cʌcʼ lac bʌ yicʼot mi lac chʼʌmjaʼ. Jiñi toʼol yom jach bʌ maʼañic miʼ chʼʌm jaʼ, miʼ mejlel i sʌt i pijtaya chaʼan miʼ chumtʌl tiʼ pejtelel ora.

5. ¿Chuqui mi caj laj qʼuel ti ili temaj?

⁵ Jiñi chʼʌmjaʼ wen ñucʌch i cʼʌjñibal, jin chaʼan an uxpʼejl cʼajtiya yom bʌ mi lac jacʼ. Ñaxam bʌ, ¿chuqui miʼ cʌntesañonla jiñi Biblia chaʼan jiñi chʼʌmjaʼ? I chaʼpʼejlel, ¿chuqui yom mi lac mel cheʼ muʼto caj lac chaʼlen chʼʌmjaʼ? I yuxpʼejlel, mi woli laj cʌntesan  chaʼan Biblia jiñi la calobilob o yambʌ quixtañu, ¿chucoch yom mi lac chʌn ñaʼtan chaʼan ñuc i cʼʌjñibal jiñi chʼʌmjaʼ?

6, 7. a) ¿Chuqui yom i yʌl jiñi chʼʌmjaʼ tsaʼ bʌ i yʌcʼʌ Juan? b) ¿Baqui bʌ jiñi chʼʌmjaʼ yambʌyix bʌ i sujmlel, i chucoch?

⁶ Yaʼ ti Biblia jiñi chʼʌmjaʼ yaʼʌch miʼ ñaxan ajlel baqui miʼ tajtʌl ti tʼan chaʼan Juan jiñi xʼacʼ Chʼʌmjaʼ (Mt. 3:1-6). Jiñi muʼ bʌ i majlelob baʼan Juan chaʼan miʼ yʌjqʼuelob ti chʼʌmjaʼ, chaʼañʌch miʼ pʌsob chaʼan miʼ cʌyob i mul cheʼ miʼ ñusañob ti pʼis i Mandar Moisés. Pero yom mi la cʌl jumpʼejl chʼʌmjaʼ tsaʼ bʌ i yʌcʼʌ Juan ñumen ñuc bʌ i cʼʌjñibal, mach bʌ lajalic bajcheʼ jiñi yan tac bʌ. Juan tsaʼ aqʼuenti ñuc bʌ i majtan chaʼan miʼ yʌcʼ ti chʼʌmjaʼ Jesús, jiñi i Yalobil Dios (Mt. 3:13-17). Jesús mach xmulilic, jin chaʼan maʼañic mulil yom bʌ miʼ cʌy (1 P. 2:22). Cheʼ bʌ tsiʼ chaʼle chʼʌmjaʼ, chaʼañʌch miʼ pʌs chaʼan chajpʌbilix chaʼan miʼ yʌcʼ i cuxtʌlel tiʼ melol chuqui yom Dios (He. 10:7).

⁷ Cheʼ bʌ Jesús tsiʼ chaʼle subtʼan wʌʼ ti pañimil, jiñi xcʌntʼañob i chaʼan tsiʼ yʌcʼʌyob ti chʼʌmjaʼ yambʌ quixtañujob (Jn. 3:22; 4:1, 2). ¿Chuqui i cʼʌjñibal jiñi tsaʼ bʌ i meleyob? Lajalʌch bajcheʼ jiñi tsaʼ bʌ i mele Juan: Chaʼan jiñi quixtañujob miʼ pʌsob chaʼan tsaʼix i cʌyʌyob i mul tsaʼ bʌ i meleyob tiʼ contra jiñi Mandar. Pero, cheʼ bʌ Jesús tsaʼix chʌmi (sajti) yicʼot chaʼ chʼojyemix, jiñi muʼ bʌ i chʼʌmob jaʼ yicʼot miʼ sujtelob ti xcʌntʼan i chaʼan, yambʌyix i sujmlel chucoch miʼ melob.

8. a) ¿Chuqui ti mandar tsiʼ yʌqʼue Jesús jiñi xcʌntʼañob i chaʼan? b) ¿Chucoch yom miʼ chaʼleñob chʼʌmjaʼ jiñi xñoptʼañob?

⁸ Cheʼ ti jabil 33, cheʼ bʌ chaʼ chʼojyemix Jesús, tsiʼ pʌsbe i bʌ ñumen ti 500 wiñicob yicʼot xʼixicob, i tajol yicʼot tiʼ tojlel alpʼeñelob. Tajol jiñʌch cheʼ bʌ tsiʼ yʌlʌ: «Cucula cheʼ jini. Sutqʼuiñob ti xcʌntʼañob winicob xʼixicob tiʼ pejtelel pañimil. Aqʼuenla chʼʌmjaʼ tiʼ cʼabaʼ lac Tat, tiʼ cʼabaʼ i Yalobil, tiʼ cʼabaʼ Chʼujul bʌ Espíritu. Cʌntesanla chaʼan miʼ laj chʼujbiñob pejtelel chuqui tac tsaʼ c subeyetla» (Mt. 28:19, 20; 1 Co. 15:6). Jin chaʼan tajol yaʼʌch an cabʌl xcʌntʼañob i chaʼan Jesús cheʼ bʌ tsiʼ yʌlʌ chaʼan miʼ sutqʼuintel ti xcʌntʼan jiñi quixtañujob. Cheʼ jaʼel, tsiʼ yʌlʌ chaʼan jiñi yom bʌ i chʼʌmben i qʼuech chaʼan miʼ tsajcan majlel, yom miʼ chaʼlen chʼʌmjaʼ (Mt. 11:29, 30). Jiñi utsʼat bʌ yomob qʼuejlel ti Dios yomʌch miʼ qʼuelob ti ñuc jiñi eʼtel aqʼuebil bʌ Jesús chaʼan miʼ yʌcʼ ti tsʼʌctiyel chuqui ñaʼtʌbil i chaʼan Dios. Cheʼ jiñi miʼ mejlelob ti chʼʌmjaʼ. Jin jach jiñi chʼʌmjaʼ muʼ bʌ i qʼuel ti ñuc Dios. Jiñi Biblia cabʌl bajcheʼ miʼ pʌsbeñonla chaʼan jiñi xcʌntʼañob i chaʼan Cristo ti ñaxam bʌ siglo tsaʼʌch i chʼʌmbeyob isujm chuqui yom i yʌl jiñi chʼʌmjaʼ, i maʼañic tsaʼ wen jalʼayob tiʼ melol (Hch. 2:41; 9:18; 16:14, 15, 32, 33).

9, 10. ¿Chuqui miʼ pʌsbeñonla chaʼan chʼʌmjaʼ jiñi tsaʼ bʌ i mele jiñi wiñic chʼoyol bʌ ti Etiopía yicʼot jiñi apóstol Pablo?

⁹ (Pejcan Hechos 8:35, 36). Laʼ laj qʼuel tiʼ tojlel juntiquil wiñic chʼoyol bʌ ti Etiopía tsaʼ bʌ sujti ti judío. Ili wiñic tsajñi ti Jerusalén chaʼan miʼ chʼujutesan Dios i chaʼ sujtelix mucʼ tiʼ yotot. Juntiquil ángel tiʼ sube Felipe chaʼan miʼ suben jiñi «wen tʼan chaʼan Jesús». ¿Bajcheʼ tsiʼ jacʼʌ jiñi wiñic? Tsiʼ chʼʌmbe isujm chaʼan ñucʌch i cʼʌjñibal cheʼ miʼ qʼuel Jesús bajcheʼ i Yum. Jin chaʼan, ti orajach tsiʼ cʼajti chʼʌmjaʼ come yomʌch i mel muʼ bʌ i cʼajtin Jehová tiʼ tojlel jiñi xcʌntʼañob.

¹⁰ Wʌle laʼ laj qʼuel tiʼ tojlel juntiquil wiñic tsaʼ bʌ i wen tsʼaʼle jiñi xñoptʼañob. Juntiquilʌch judío tsaʼ bʌ i yʌcʼʌ i bʌ ti Dios. Pero  jiñi judíojob tsaʼix cʌjyiyob ti Jehová tiʼ caj i ñusatʼañob. Ili wiñic cheʼʌch miʼ wen mel bajcheʼ an i costumbre jiñi judíojob. Pero Jesús tiʼ sube jiñi wen tʼan cʼʌlʌl yaʼ ti panchan. Ti wiʼil, ili wiñic tsiʼ jacʼʌ i coltʌntel tiʼ tojlel juntiquil xñoptʼan i cʼabaʼ Ananías, cheʼ jiñi «tsaʼ chʼojyi» i «tsiʼ chʼʌmʌ jaʼ» (Hch. 9:17, 18; Gá. 1:14). Ili judío tsaʼ cʼoti ti cʌjñel bajcheʼ jiñi apóstol Pablo. Miʼ mejlel laj qʼuel chaʼan jin jach tsiʼ chʼʌmʌ jaʼ cheʼ bʌ tsiʼ chʼʌmbe isujm chuqui ti eʼtel aqʼuebil Jesús chaʼan miʼ tsʼʌctiyel chuqui ñaʼtʌbil i chaʼan Dios (pejcan Hechos 22:12-16).

11. a) ¿Chuqui miʼ ñijcʌbeñob i pusicʼal chaʼan miʼ chʼʌmob jaʼ jiñi muʼ bʌ i yʌqʼuentelob estudio? b) ¿Bajcheʼ yubil mi la cubin lac bʌ cheʼ mi laj qʼuelob ti chʼʌmjaʼ jiñi muʼ bʌ i yʌcʼob i bʌ ti Jehová?

¹¹ Lʌcʼʌ lajal miʼ yujtel yicʼot jiñi woli bʌ la cʌqʼueñob estudio loqʼuem bʌ ti Biblia, anquese xcolelobto o añobix i jabilel. Jiñi añobʌch bʌ i ñopoñel yicʼot miʼ qʼuelob ti ñuc i sujmlel am bʌ ti Biblia yomobʌch i yʌcʼ i bʌ ti Jehová yicʼot i chaʼleñob chʼʌmjaʼ. Tiʼ pejtelel jiñi colem tempa bʌ tac, miʼ yʌjqʼuel jumpʼejl utsʼatax bʌ discurso tiʼ tojlel muʼ bʌ caj i chaʼleñob chʼʌmjaʼ. Cheʼ bʌ juntiquil muʼ bʌ i chʼʌm estudio miʼ chaʼlen chʼʌmjaʼ, wen tijicña mi la cubin lac bʌ. Tiʼ sujm, cheʼʌch jaʼel jiñi tatʌlob xñoptʼañoʼ bʌ, miʼ wen ubiñob i tijicñʌyel cheʼ miʼ qʼuelob ti chʼʌmjaʼ jiñi i yalobilob. Ti jiñi jabil chaʼan subtʼan 2017, ñumen ti 284 mil quixtañujob tsiʼ chaʼleyob chʼʌmjaʼ chaʼan miʼ pʌsob chaʼan tsaʼix i yʌcʼʌyob i bʌ ti Dios (Hch. 13:48). Tsiquil chaʼan tsaʼʌch i chʼʌmbeyob isujm chaʼan junchajp muʼ bʌ i cʼajtintel tiʼ tojlel xñoptʼañob jiñʌch jiñi chʼʌmjaʼ. Pero ¿chuqui tac tsiʼ meleyob chaʼan miʼ mejlelob i chʼʌmjaʼ?

12. ¿Chuqui yom miʼ mel juntiquil muʼ bʌ i chʼʌm estudio cheʼ maxto i chaʼle chʼʌmjaʼ?

¹² Jiñi woli bʌ i yʌqʼuentel estudio yom miʼ ñaxan cʌn i sujmlel chaʼan Dios, chuqui ñaʼtʌbil i chaʼan yicʼot chuqui an i mele chaʼan miʼ coltañonla (1 Ti. 2:3-6). Pejtelel chuqui miʼ cʌn mi caj i yʌcʼ ti colel i ñopoñel, i jiñi i ñopoñel mi caj i coltan i cʌy pejtelel mach bʌ añic miʼ mulan Jehová yicʼot miʼ jacʼ jiñi toj bʌ principio tac am bʌ ti Biblia (Hch. 3:19). Tiʼ sujm, Dios maʼañic miʼ chʼʌm juntiquil tsaʼix bʌ i yʌcʼʌ i bʌ tiʼ tojlel mi muʼto i chʌn mel mach bʌ weñic (1 Co. 6:9, 10). Pero jiñi muʼ bʌ i chʼʌm estudio mach cojic jach yom miʼ jacʼben i mandar tac Dios. Cheʼ jaʼel, yomʌch miʼ majlel ti tempa bʌ tac, miʼ chaʼlen subtʼan yicʼot ti bele ora miʼ chaʼlen cʌntesa. Jesús tsiʼ yʌlʌ chaʼan ili eʼtel jiñʌch mi caj i mel jiñi xcʌntʼañob i chaʼan (Hch. 1:8). Mi tsaʼix i mele tac iliyi, jiñi quixtañu miʼ mejlel i bajñel pejcan Jehová ti oración chaʼan miʼ yʌcʼ i bʌ tiʼ tojlel, cheʼ jiñi, miʼ chaʼlen chʼʌmjaʼ tiʼ wut yambʌlob.

13. Cheʼ woli la cʌcʼ estudio loqʼuem bʌ ti Biblia, ¿chucoch yom cʼajal lac chaʼan chaʼan yom miʼ chaʼleñob chʼʌmjaʼ jiñi yomoʼ bʌ sujtel ti xcʌntʼan?

¹³ Cheʼ wolito laj coltan la calobilob yicʼot jiñi woliyoʼ bʌ ti estudio, yom chʌn cʼajal lac chaʼan chaʼan yomʌch miʼ chaʼleñob chʼʌmjaʼ chaʼan miʼ sujtelob ti xcʌntʼan i chaʼan Cristo. Jin chaʼan, mi caj lac wen sʌclʌben i yorajlel chaʼan mi lac subeñob chucoch ñucʌch i cʼʌjñibal cheʼ mi la cʌcʼ lac bʌ ti Dios yicʼot mi lac chaʼlen chʼʌmjaʼ. Tiʼ sujm, la com chaʼan miʼ colelob tiʼ chaʼan bʌ Dios yicʼot miʼ cʼotelob ti chʼʌmjaʼ.

14. ¿Chucoch maʼañic majqui mi lac xicʼ ti chʼʌmjaʼ?

¹⁴ Maʼañic majqui yom miʼ xicʼ ti chʼʌmjaʼ jiñi woli bʌ ti estudio, mi jiñic tatʌlob, xcʌntesajob, o yambʌ hermano ti congregación. Jehová mach cheʼic miʼ mel (1 Jn. 4:8). Cheʼ mi laj cʌntesañob, yom mi la  cʌqʼueñob i ñaʼtan chaʼan ñuc i cʼʌjñibal cheʼ miʼ sujtelob tiʼ yamigo Dios. Muʼ bʌ caj i ñijcañob chaʼan miʼ chaʼleñob chʼʌmjaʼ jin mi mucʼʌch i cʼuxbiñob jiñi i sujmlel yicʼot mi yomobʌch i mel pejtelel bajcheʼ yilal yom juntiquil xñoptʼan (2 Co. 5:14, 15).

15, 16. a) ¿Muʼ ba i yʌjlel jaypʼejl yom lac jabilel chaʼan mi lac mejlel ti chʼʌmjaʼ? Tsictesan. b) Anquese jiñi woli bʌ ti estudio tsaʼix i chʼʌmʌ jaʼ ti yambʌ ñopbalʌl, ¿chucoch yomʌch miʼ chaʼlen chʼʌmjaʼ bajcheʼ i testigo Jehová?

¹⁵ ¿Jaypʼejl yom an i jabilel juntiquil chaʼan miʼ mejlel ti chʼʌmjaʼ? Maʼañic jumpʼejl i tsicol come mach junlajalic miʼ colelob majlel tiʼ chaʼan bʌ Dios. An wen xcolelobto bʌ miʼ chʼʌmob jaʼ, i chʌn xucʼul miʼ melbeñob i yeʼtel Jehová. An yambʌlob ñoxobix bʌ miʼ cʌñob i sujmlel, anto ñumeñix bʌ ti 100 i jabilelob, i jinto bʌ ora miʼ chʼʌmbeñob isujm chaʼan yom miʼ chaʼleñob chʼʌmjaʼ.

¹⁶ Jiñi tsijib xcʌntʼañob yomʌch miʼ chaʼleñob chʼʌmjaʼ anquese chʼʌmbilix i chaʼañob jaʼ ti yambʌ ñopbalʌl. Jehová cojach miʼ qʼuel ti ñuc jiñi chʼʌmjaʼ cheʼ jiñi quixtañu tsaʼix cʼoti i cʌn tiʼ sujmlel chuqui yom Dios. Jiñʌch tsaʼ bʌ ujti tiʼ tojlel juntiquil xʼixic lʌcʼʌlix bʌ 80 i jabilel. Come wen chʼʌmbilix i chaʼan jaʼ ti yambʌ ñopbalʌl tac, tsiʼ cʼajtibe jiñi hermana muʼ bʌ i yʌqʼuen estudio mi cʼʌñʌlto miʼ chaʼ meleʼ. Jiñi hermana tsiʼ pʌsbe texto tac am bʌ ti Biblia. Jiñi xʼixic tsaʼʌch i chʼʌmbe isujm muʼ bʌ i yʌl jiñi Biblia chaʼan jiñi chʼʌmjaʼ i mach jalic tsiʼ chʼʌmʌ jaʼ (pejcan Hechos 19:3-5).

17. ¿Chuqui yom miʼ wen ñaʼtan juntiquil cheʼ baʼ ora miʼ chʼʌm jaʼ?

¹⁷ Cheʼ baʼ ora miʼ chaʼlen chʼʌmjaʼ juntiquil, jiñʌch jumpʼejl qʼuin wen tijicña bʌ. Pero i yorajlelʌch jaʼel chaʼan miʼ wen ñaʼtan bajcheʼ cʼamel yom mi caj i chaʼlen wersa chaʼan miʼ tsʼʌctesan tsaʼ bʌ i yʌlʌ cheʼ tsiʼ yʌcʼʌ i bʌ ti Dios. Jiñi xcʌntʼañob i chaʼan Jesús maʼañix miʼ ‹sʌclañob i bajñel wenlel› come yomix miʼ ‹ñuqʼuesañob Cristo tsaʼ bʌ chʌmi chaʼañob› (2 Co. 5:15; Mt. 16:24).

18. ¿Chuqui mi caj laj qʼuel yaʼ ti yambʌ temaj?

¹⁸ Ti ili temaj, tsaʼix laj qʼuele chaʼan mach alas jach mi la com sujtel ti isujm bʌ xñoptʼan. Jiñʌch tiʼ caj cheʼ jiñi i ñaʼ María tsiʼ melbe i bʌ jiñi cʼajtiya tac tsaʼix bʌ la cʌlʌ ti ñaxan. Mi jatet an a walobilob, tajol an a cʼajtibe a bʌ: «¿Chajpʌbilix ba chaʼan miʼ chʼʌm jaʼ jiñi calobil? ¿Cabʌlix ba chuqui yujil chaʼan bʌ Jehová chaʼan miʼ yʌcʼ i bʌ tiʼ tojlel? ¿Yom ba miʼ ñaxan wen chaʼlen qʼueljun yicʼot miʼ sʌclan wem bʌ i yeʼtel? ¿Ixcu mi tsiʼ mele tsʌts bʌ mulil cheʼ tsaʼix i chʼʌmʌ jaʼ?». Ili cʼajtiya tac mi caj i jajqʼuel ti yambʌ temaj. Cheʼ jaʼel, mi caj laj qʼuel bajcheʼ jiñi tatʌlob pʼisbil jach yom miʼ qʼuelob jiñi chʼʌmjaʼ.