1. ¿Chuqui ti wocol tsiʼ ñusayob jiñi xñoptʼañob ti ñaxam bʌ siglo?

CHEʼ woli (choncol) i ñumel majlel jiñi jabil 62 cʼʌlʌl ti 64, jiñi apóstol Pedro tiʼ tsʼijbube majlel jun jiñi xñumelob pam pujquemoʼ bʌ «ti Ponto, ti Galacia, ti Capadocia, ti Asia yicʼot ti Bitinia» (1 P. 1:1). Jiñi hermanojob mach junsujmic baqui chʼoyolob. I tiʼ pejtelelob yom miʼ ñuqʼuesʌbentelob i pusicʼal yicʼot miʼ coltʌntelob come Pedro tsiʼ yʌlʌ chaʼan wen añob i contrajintel i tsiʼ laja bajcheʼ «cʼajc». Cheʼ jaʼel, wen bʌbʌqʼuen ti jiñi bʌ ora. Pedro tiʼ tsʼijbu: «Lʌcʼʌlix i jilibal pejtelel chuqui tac an». Cheʼʌchi, bʌbʌqʼuen jax bajcheʼ tsaʼ jili jiñi judíojob, lujumpʼejl jab (10) tsaʼ ñumi chaʼan miʼ jisʌntelob. ¿Chuqui tsiʼ colta jiñi xñoptʼañob cheʼ wocol jax tsiʼ ñusañob ti jim bʌ ora? (1 P. 4:4, 7, 12).

2, 3. ¿Chucoch tsiʼ yʌlʌ jiñi Pedro chaʼan yom miʼ pʌyob i bʌ tiʼ yotot jiñi xñoptʼañob? (Qʼuele jiñi dibujo).

² Cheʼ jaʼel, Pedro tsiʼ yʌqʼueyob ili ticʼojel: «Pʌyʌla ochel laʼ piʼʌlob ti laʼ wotot» (1 P. 4:9, Jiñi tsijiʼ bʌ wen tʼañ chaʼañ estudio [TWT]). Cheʼ an majqui mi lac pʌy ti la cotot yom i yʌl chaʼan mi lac pʌs la cutslel yicʼot chaʼan mi laj cʼuxbin. Pero jiñi apóstol tsiʼ yʌlʌ chaʼan yom miʼ pʌyob tiʼ yotot jiñi i «piʼʌlob», yom i yʌl, jiñi i cʌñʌyobix bʌ yicʼot ñʌmʌlix bʌ yicʼotob.  ¿Bajcheʼ miʼ tajob i wenlel cheʼ miʼ jacʼob ili ticʼojel?

³ Miʼ coltañob chaʼan juntemel miʼ yajñelob. Laʼ cu lac ñaʼtan ti lac tojlel. Cheʼ bʌ juntiquil hermano tsiʼ pʌyʌyonla tiʼ yotot, cʼajal lac chaʼan chaʼan utsʼatʌch tsaʼ lac ñusa, ¿ñomach? I cheʼ bʌ joñonla tsaʼ lac pʌyʌ juntiquil hermano ti la cotot tsaʼ ñumen coli jiñi cʼuxbiya. Cheʼ mi lac pʌyob ti la cotot jiñi la quermañojob, miʼ cʼotel lac ñumen cʌñob. Cheʼ woli (yʌquel) i ñumen tsʌtsʼan majlel jiñi wocol tiʼ yorajlel jiñi Pedro, jiñi xñoptʼañob cʼʌñʌlʌch ñumen temel tsaʼ ajñiyob. Lajalʌch woli la cujtel jaʼel ti ili «cojix bʌ qʼuin tac» (2 Ti. 3:1).

4. ¿Chuqui tac ti cʼajtiya mi caj lac jacʼ ti ili temaj?

⁴ ¿Bajcheʼ tac miʼ mejlel lac pʌsben la cutslel jiñi yambʌlob? ¿Bajcheʼ miʼ mejlel lac mʌlben (jotben) jiñi muʼ bʌ i mʌctañonla chaʼan mi lac pʌy ti la cotot jiñi yambʌlob? I ¿chuqui mi caj i coltañonla chaʼan wen jach mi lac pʌs lac bʌ yaʼ baqui mi lac pʌjyel?

5. ¿Bajcheʼ miʼ mejlel lac pʌs la cutslel ti tempa bʌ tac?

⁵ Cheʼ añonla ti tempa bʌ tac. Jehová yicʼot i yorganización miʼ pʌyonla ti tempa bʌ tac. I la com chaʼan pejtelel muʼ bʌ i tilelob tiʼ Yotlel Tempa bʌ tijicña miʼ yubiñob i bʌ (Ro. 15:7). Ili ñumen ñucto i cʼʌjñibal cheʼ an majqui cojaxto woliʼ tilel. Come Jehová jiñʌch tsaʼ bʌ i pʌyʌ tilel jaʼel, yom mi la cʌqʼuen i yubin i tijicñʌyel, mach yʌlʌlic majqui o bajcheʼ yilal i pislel (Stg. 2:1-4). Mi woli laj qʼuel chaʼan mi juntiquilic hermano woliʼ pejcan, ¿muʼ ba i mejlel lac suben chaʼan miʼ buchtʌl la quicʼot? Tiʼ sujm, cheʼ mi laj coltan i tsajcan majlel woli bʌ i ñusʌntel yaʼ ti tempa bʌ yicʼot i sʌclan jiñi texto tac tijicña mi caj i yubin. Ili jiñʌch junchajp bajcheʼ mi lac jacʼ ili ticʼojel: «Otsanla ti laʼ wotot jiñi muʼ bʌ i julaʼtañetla» (Ro. 12:13, TWT).

6. ¿Majqui yom mi lac ñumen pʌyob ti la cotot?

⁶ Cheʼ bʌ an majqui mi lac pʌy ti uchʼel. Ti wajali, jiñi xñoptʼañob ñʌmʌl i pʌyob ti uchʼel yambʌlob tiʼ yotot come yomob ajñel ti ñʌchʼʌl yicʼotob i miʼ sujtelob tiʼ yamigo (Gn. 18:1-8; Jue. 13:15; Lc. 24:28-30). Ixcu joñonla, ¿majqui yom mi lac ñumen pʌyob ti la cotot? Jiñʌch jiñi hermanojob ti laj congregación. Jiñobʌch jiñi ñumen lʌcʼʌloʼ bʌ la quicʼot. Yom an xucʼul bʌ la camigojob yicʼot wen añonla la quicʼotob, come cheʼ baʼ ora mi lac taj tsʌts bʌ wocol mi caj lac tem coltan lac bʌ. Cheʼ ti 2011, jiñi Junmojt muʼ bʌ i pʌsob bij tsiʼ qʼuextayob i yorajlel jiñi Estudio chaʼan Lac Tsictesʌbentel yaʼ ti Betel am bʌ ti Estados Unidos, tsaʼ caji ti ñusʌntel ti icʼan cheʼ ti 6:15 i mach chʌn las 6:45 jix. ¿Chucoch? Come cheʼ bajcheʼ jiñi, cheʼ miʼ yujtel jiñi tempa bʌ, jiñi betelitajob mi caj i mulañob jumucʼ cʌytʌl yicʼot yambʌ hermanojob. Cheʼʌch tsiʼ meleyob yan tac bʌ sucursal jaʼel. Cheʼ tsaʼ mejli ili, ñumen temel añob jiñi betelitajob.

7, 8. ¿Bajcheʼ miʼ mejlel lac pʌsbeñob la cutslel jiñi hermanojob muʼ bʌ i tilelob i ñusan discurso tiʼ Yotlel Tempa bʌ?

⁷ Cheʼ bʌ miʼ tilelob i yʌcʼ jumpʼejl discurso ti lac tempa bʌ yambʌ hermanojob ti yambʌ congregación, jiñi superintendente i chaʼan circuito, i an i tajol, juntiquil tilem bʌ ti Betel, jiñʌch wem bʌ i yorajlel chaʼan mi lac pʌsbeñob la cutslel (pejcan 3 Juan 5-8). Junchajp bajcheʼ miʼ mejlel lac pʌs, jin cheʼ mi lac pʌyob ti uchʼel o mi la cʌqʼueñob chuqui miʼ jap. Laʼ lac mel (chaʼlen) iliyi cheʼ an majqui miʼ tilel.

⁸ Juntiquil hermana chʼoyol bʌ ti Estados Unidos miʼ yʌl: «Ti cabʌl jab, jiñi c ñoxiʼal yicʼot joñon mi lon c pʌy ti otot jiñi hermanojob yicʼotob i yijñam cheʼ miʼ tilel i yʌcʼob discurso tac. Utsʼatax bajcheʼ mi lon c ñusan tiʼ pejtelel ora, mic wen ñusan lon c bʌ, i jiñi ñumen ñuc bʌ i cʼʌjñibal, jin cheʼ ñumen pʼʌtʌlon lojon tiʼ chaʼan bʌ Dios. Miʼ wen aqʼueñon lon c tijicñʌyel cheʼ mic pʌs lojon cutslel».

9, 10. a) ¿Majqui jal miʼ mejlelob ti cʌytʌl ti la cotot? b) ¿Muʼ ba i mejlel i pʌsob i yutslel jiñi mach bʌ wen colemobic i yotot? Acʼʌ jumpʼejl ejemplo.

⁹ Cheʼ jal miʼ yajñel juntiquil muʼ bʌ lac pʌy  ti la cotot. Ti wajali, jiñi wiñicob xʼixicob (quixtañujob) miʼ yʌcʼob ti cʌytʌl tiʼ yotot juntiquil i cʌñʌyobix bʌ muʼ bʌ i cʼotel ti julaʼ (Job 31:32; Flm. 22). Ili ora, yomʌch mi lac mel jaʼel. Jumpʼejl ejemplo, lʌcʼʌ tiʼ pejtelel ora jiñi superintendente i chaʼan circuito yom miʼ yʌqʼuentel jumpʼejl otot baʼ miʼ cʌytʌl cheʼ miʼ julaʼtan jiñi congregación. Cheʼ jaʼel, jiñi muʼ bʌ i yajñelob ti jumpʼejl cʌntesʌntel tiʼ chaʼan bʌ Dios yicʼot mucʼoʼ bʌ ti eʼtel tiʼ melol (pʌtol) i Yotlel Tempa bʌ tac yom miʼ yʌqʼuentelob baqui miʼ cʌytʌlob. Cheʼ miʼ yujtel wocol bajcheʼ icʼ jaʼal o yan tac bʌ, an familia tac yom bʌ miʼ yʌqʼuentelob baqui miʼ cʌytʌlob jinto miʼ chaʼ tojʼesʌbentelob i yotot. Mach yomic mi lac ñaʼtan chaʼan cojach jiñi wem bʌ o colemoʼ bʌ i yotot miʼ mejlel i pʌyob ti cʌytʌl jiñi hermanojob. Tajol añʌch i wen otsayob jiñi hermanojob tiʼ yotot. ¿Muʼ ba i mejlel lac subeñob cʌytʌl ti la cotot jaʼel anquese mach wen colemic?

¹⁰ Juntiquil hermano chʼoyol bʌ ti Corea del Sur cʼajalto i chaʼan cheʼ bʌ tsiʼ yotsa tiʼ yotot jiñi hermanojob tsajñiyoʼ bʌ ti jiñi cʌntesʌntel tac tiʼ chaʼan bʌ Dios. Tiʼ tsʼijbu: «Ti ñaxan mach wen comic cʌcʼob ti cʌytʌl jiñi hermanojob come tsijib ñujpuñemonto lon i mach wen colemic lon cotot. Pero wen utsʼatax tsaʼ cubi cheʼ yaʼañob ti cotot jiñi hermanojob. Tsaʼ lon j qʼuele chaʼan wen tijicña jiñi xñujpuñelob temel bʌ miʼ melbeñob i yeʼtel (troñel) Jehová yicʼot miʼ chaʼleñob wersa i ñumen tajob chuqui yomob tiʼ chaʼan bʌ Dios».

11. ¿Chucoch yom mi lac pʌsbeñob la cutslel jiñi hermanojob muʼ bʌ i cʼotelob yaʼ ti laj congregación?

¹¹ Cheʼ miʼ cʼotel yambʌ hermanojob ti laj congregación. Tajol an muʼ bʌ i cʼotelob ti chumtʌl yaʼ ti tejclum baʼañonla, o miʼ cʼotel i coltañob jiñi subtʼan o miʼ chojquelob cʼotel bajcheʼ precursor yaʼ ti laj congregación. Ti ñaxan, wocol mi caj i yubiñob come yom miʼ ñʌmʼañob ti tsijib tejclum, ti tsijib congregación, ti yambʌ cultura o yambʌ tʼan. Cheʼ mi lac pʌyob ti uchʼel yicʼot cheʼ mi lac pʌyob majlel ti xʌmbal mi caj i coltañob i taj i yamigojob i mach wocolic mi caj i ñʌmʼañob.

12. ¿Chuqui ti experiencia miʼ pʌs chaʼan mach cʼʌñʌlic cabʌl chuqui mi lac chajpan chaʼan mi lac pʌyob ti la cotot jiñi hermanojob?

¹² Chaʼan mi lac pʌyob majlel ti la cotot, mach cʼʌñʌlic cabʌl chuqui mi lac mel (pejcan Lucas 10:41, 42). Juntiquil hermano miʼ yʌl chaʼan cheʼ bʌ tsiʼ teche eʼtel bajcheʼ misionero yicʼot i yijñam, xcolelobto i tsiʼ wen cʼajtesayob i yotot. Miʼ yʌl: «Ti jumpʼejl bʌ icʼan, jiñi quijñam tsaʼ caji i wen ubin i chʼijiyem, i maʼañic woliʼ mejlel j coltan. Pero cheʼ ti a la 7:30, tsiʼ jatsʼʌyob i tiʼ jiñi lon cotot. Jiñʌch juntiquil xʼixic woli bʌ ti estudio tsaʼ bʌ i chʼʌmʌ cʼotel uxpʼejl alaxax yicʼot yom i yʌqʼueñon lon cubin c tijicñʌyel cheʼ tsaʼ cʼotiyon lon yaʼi. Tsaʼ c sube lojon chaʼan miʼ yochel i tsaʼ cʌqʼue lon jumpʼejl vaso jaʼ. Cheʼ jiñi, tsaʼ c mele lon té yicʼot ticʌw bʌ chocolate. Ti jim bʌ ora maxto lon cujilic jiñi tʼan suajili, i jiñi xʼixic mach yujilic jiñi lon c tʼan. Pero, cʼʌlʌl ti jim bʌ ora, jiñi hermanojob ti jiñi país tsaʼ cajiyob ti sujtel ti lon camigo i ñumen tijicña tsaʼ lon cubi».

13. ¿Chucoch weñʌch cheʼ mi lac pʌyob ti la cotot jiñi yambʌlob?

¹³ ¿Wocol ba mi la cubin chaʼan mi lac pʌyob ti la cotot jiñi hermanojob? Mi cheʼʌchi, tajol wen sʌtbil lac chaʼan jiñi i yorajlel tac chaʼan mi lac tijicñesan lac bʌ yicʼot yambʌ hermanojob yicʼot lac taj wem bʌ la camigojob muʼ bʌ i jalʼan tiʼ pejtelel ora. Cheʼ mi lac pʌyob ti la cotot mach lac bajñelic mi caj la cubin lac bʌ. Jin chaʼan, ¿chucoch an i tajol an maʼañic bʌ miʼ pʌyob tiʼ yotot yambʌ hermanojob? Laʼ laj qʼuel chuqui tac miʼ mʌctañob.

14. Mi maʼañic i yorajlel lac chaʼan o lac pʼʌtʌlel mi la cubin chaʼan mi lac pʌyob o mi lac majlel baqui pʌybilonla, ¿chuqui miʼ mejlel lac mel?

¹⁴ Jiñi i yorajlel am bʌ lac chaʼan yicʼot lac pʼʌtʌlel. Jiñi i wiñiconbʌla Jehová cabʌl chuqui mi lac mel i wen cabʌl la queʼtel. Jin chaʼan, an mach bʌ añic i yorajlelob i chaʼan o i pʼʌtʌlel miʼ yubiñob chaʼan miʼ pʌyob yambʌlob yaʼ tiʼ yotot.  Mi cheʼ mi lac ñaʼtan bajcheʼ jiñi, tajol yom mi lac chaʼ qʼuel muʼ bʌ lac mel tac ti jujumpʼejl qʼuin. ¿Am ba chuqui miʼ mejlel laj qʼuextan chaʼan mi la cʌqʼuen i yorajlel yicʼot an lac pʼʌtʌlel chaʼan mi lac pʌyob ti la cotot jiñi hermanojob o mi lac majlel cheʼ miʼ pʌyoñobla? Jiñi Biblia miʼ yʌl chaʼan mach yomic miʼ ñajʌyel lac chaʼan lac pʌs la cutslel (He. 13:2). Mach lecojic cheʼ mi la cajñel la quicʼot la quermañojob. Jiñʌch ñumen wem bʌ. Tiʼ sujm, tajol yom pʼisbil jach mi la cʌqʼuen i yorajlel jiñi mach bʌ wen ñuquic i cʼʌjñibal.

15. ¿Chucoch miʼ mejlel lac ñaʼtan chaʼan maʼañic miʼ mejlel lac pʌy ti la cotot jiñi yambʌlob?

¹⁵ Cheʼ bajcheʼ mi laj qʼuel lac bʌ. ¿Am ba lac ñaʼta lac pʌy ti la cotot yambʌlob pero mach mejloñicla mi la cubin? Tajol mi lac bʌcʼñan chaʼan maʼañic mi lac taj lac tʼan cheʼ yaʼañob i miʼ cʼojyelob. O mach wen cabʌlic lac taqʼuin i mi lac ñaʼtan chaʼan mach mejlic la cʌqʼueñob cheʼ bajcheʼ miʼ mel yambʌ la quermañojob. Pero yom mi laj cʼajtesan chaʼan mach yʌlʌyic wen utsʼatax la cotot. Jiñi ñuc bʌ i cʼʌjñibal jin cheʼ sʌcʌch yicʼot wen tojʼesʌbil, i chaʼan miʼ yubiñob i tijicñʌyel jiñi muʼ bʌ lac pʌyob ti la cotot.

16, 17. ¿Chuqui mi caj i coltañonla cheʼ mi laj cʼojoʼtan lac pʌy yambʌlob ti la cotot?

¹⁶ Mach joñonic jach la mi laj cʼojoʼtan cheʼ mi lac pʌy hermanojob ti la cotot. Juntiquil anciano yaʼ ti Gran Bretaña miʼ yʌl: «Cheʼ woli lac chajpan chaʼan miʼ cʼotelob jiñi tsaʼ bʌ lac pʌyʌyob ti la cotot miʼ tsʼitaʼ aqʼueñonla bʌqʼuen. Pero, cheʼ bajcheʼ miʼ yujtel ti baqui jach bʌ eʼtel i chaʼan bʌ Jehová, ñumen ñuc jiñi wenlel yicʼot tijicñʌyel muʼ bʌ lac taj bajcheʼ jiñi laj cʼojol. Wen tijicña ñusʌbil c chaʼan quicʼot jiñi hermanojob cheʼ mic tem jap lojon café i mic chaʼlen lon tʼan». Laʼ laj cʼajtesan chaʼan yom mi laj qʼuelob ti ñuc jiñi muʼ bʌ lac pʌyob ti la cotot (Fil. 2:4). Cabʌl quixtañu miʼ mulan i yʌl chaʼan bʌ i cuxtʌlel. I chaʼan miʼ mejlel lac ñʌchʼtañob ti wen, yom mi la jumucʼ ajñel la quicʼotob. Yambʌ anciano miʼ yʌl: «Mic ñumen chʼʌmben isujm jiñi hermanojob cheʼ miʼ tilelob ti cotot, i cabʌl chuqui mij cʌn tiʼ tojlelob, ñumento cheʼ bajcheʼ tsiʼ cʌñʌyob jiñi i sujmlel». Cheʼ mi laj qʼuelob ti ñuc jiñi muʼ bʌ lac pʌyob ti la cotot, wen tijicña mi caj lac ñusan.

¹⁷ Juntiquil precursora muʼ bʌ i yʌcʼ i yotot chaʼan yaʼ miʼ jijlel jiñi muʼ bʌ i yajñelob ti cʌntesʌntel tac tiʼ chaʼan bʌ Dios, tsiʼ yʌlʌ: «Ti ñaxan, mic wen cʼojoʼtan, come mach wen utsʼatic jiñi cotot i cʼʌmbilix jiñi an tac bʌ c chaʼan. Pero tsiʼ tijicñesa c pusicʼal i yijñam juntiquil muʼ bʌ i yʌc jiñi cʌntesa. Tiʼ subeyon chaʼan cheʼ bʌ miʼ julaʼtañob congregación tac bajcheʼ superintendente i chaʼan circuito, ñumen tijicñayob cheʼ jiñi semana tac miʼ ñusañob yicʼot juntiquil pʼʌtʌl bʌ tiʼ chaʼan bʌ Dios anquese mach cabʌlic i chubʌʼan, pero miʼ yʌcʼ i bʌ tiʼ melol i yeʼtel Jehová cheʼ bajcheʼ miʼ melob jaʼel. Ili tsiʼ cʼajtesʌbeyon muʼ bʌ i subeñon lon c mamá cheʼ alʌlonto lon: ‹Pimel jach miʼ cʼuxob jini muʼ bʌ i cʼuxbiñob i bʌ›» (Pr. 15:17). Jin chaʼan, mach yomic mi laj cʌlʌx cʼojoʼtan lac bʌ, come jiñi ñumen ñuc bʌ i cʼʌjñibal jiñʌch cheʼ mi lac pʌsbeñob cʼuxbiya jiñi tsaʼ bʌ lac pʌyʌyob.

18, 19. Cheʼ mi lac pʌyob yambʌlob ti la cotot, ¿bajcheʼ miʼ coltañonla chaʼan wen mi la cajñel yicʼotob?

¹⁸ Cheʼ bajcheʼ yilal mi laj qʼuel yambʌlob. ¿Am ba juntiquil ti laj congregación mach bʌ la comic lac wen qʼuel? Tajol mach la comic lac pʌy ti la cotot juntiquil hermano maʼañic bʌ mi lac mulan bajcheʼ yilal o am bʌ chuqui tsiʼ mele ti wajali maʼañic bʌ miʼ ñajʌyel lac chaʼan. Pero mi maʼañic chuqui mi lac mel chaʼan mi lac tojʼesan jiñi, cʼʌlʌl cheʼʌch miʼ cajel.

¹⁹ Jiñi Biblia miʼ yʌl chaʼan cheʼ mi lac pʌy ti la cotot jiñi yambʌlob mi caj i coltañonla chaʼan wen mi la cajñel yicʼotob, cheʼto jaʼel jiñi laj contrajob (pejcan Proverbios 25:21, 22). Cheʼ an majqui mi lac pʌy ti la cotot, mi caj i yʌqʼueñonla lac ñajʌtesan jiñi wocol am bʌ la quicʼot, i juntemel mi caj la cajñel. Cheʼ jaʼel, tajol mi caj lac tech laj qʼuel jiñi wen tac bʌ i melbal tsaʼ bʌ i qʼuele Jehová cheʼ tsiʼ lʌcʼtesa tiʼ sujmlel (Jn. 6:44). Cheʼ jiñʌch cʼuxbiya muʼ bʌ i ñijcañonla chaʼan mi lac pʌy ti la cotot juntiquil hermano mach bʌ  pijtʌbilic i chaʼan, tajol miʼ caj ti weñʼan bajcheʼ yilal mi laj qʼuel lac bʌ. ¿Bajcheʼ miʼ mejlel lac ñaʼtan mi jiñi isujm bʌ cʼuxbiya jiñʌch muʼ bʌ i ñijcañonla lac mel iliyi? Junchajp jiñʌch cheʼ mi lac jacʼ jiñi ticʼojel am bʌ ti Filipenses 2:3, baʼ miʼ yʌl chaʼan yom pecʼonla yicʼot mi laj qʼuelob ti ñuc jiñi yambʌlob. Tiʼ sujm, pejtelel jiñi hermanojob an chuqui ñumen an i chaʼañob bajcheʼ joñonla, tajol ti ñopoñel (chʼujbiya), ti lʌtʼol wocol, chʼejlel o yambʌ wen tac bʌ melbalʌl. Cheʼ mi lac sʌclan chuqui jiñi ñumen ñuc bʌ tiʼ tojlel juntiquil hermano, mi caj lac ñumen cʼuxbin i mach wocolic mi caj la cubin chaʼan mi lac pʌy ti la cotot.

20. Mi tsaʼʌch lac jacʼʌ baʼ woli lac pʌjyel, ¿chuqui yom mi lac mel, i chucoch?

²⁰ David tsiʼ cʼajtibe Jehová bajcheʼ yilal i melbal jiñi muʼ bʌ i pʌyob tiʼ yotot (Sal. 15:1). Junchajp jiñʌch cheʼ miʼ tsʼʌctesan i tʼan anquese mach weñic miʼ yubin (Sal. 15:4). Pero mi tsaʼix lac jacʼʌ jiñi woli bʌ lac subentel, mach yomic mi laj qʼuextan lac tʼan tiʼ caj mach bʌ añic i cʼʌjñibal. Mi tsaʼ lac mele bajcheʼ jiñi, pejtelel chuqui miʼ mel jiñi tsaʼ bʌ i pʌyʌyonla, maʼañix i cʼʌjñibal (Mt. 5:37). An muʼ bʌ i lon jacʼob i pʌyol pero ti wiʼil miʼ qʼuextañob i tʼan cheʼ an ñumen wem bʌ baʼ miʼ pʌjyelob. Pero jiñi, maʼañic miʼ pʌs chaʼan miʼ qʼuel ti ñuc yicʼot maʼañic miʼ pʌs cʼuxbiya. Yomʌch mi lac jacʼ cheʼ an baʼ mi lac pʌjyel yicʼot mi la cʌqʼuen wocolix i yʌlʌ tiʼ pejtelel lac pusicʼal jiñi hermanojob (Lc. 10:7). I mi an chuqui tiʼ caj junyajl maʼañic mi lac mejlel ti majlel, ti ora yom mi lac suben jiñi tsaʼ bʌ i pʌyʌyonla. Cheʼ bajcheʼ jiñi, woli lac pʌs laj cʼuxbiya yicʼot wolʌch laj qʼuel ti ñuc.

21. ¿Chuqui ti costumbre tac yom miʼ chʼʌmob ti ñuc jiñi pʌybiloʼ bʌ ti yambʌ otot?

²¹ Cheʼ jeʼel, yom mi lac chʼʌm ti ñuc jiñi costumbre tac. An cultura tac baʼ mach lecojic mi maʼañic maʼ ñaxan sub a bʌ chaʼan mi caj a cʼotel tiʼ yotot juntiquil quixtañu, i an yan tac bʌ baqui yomʌch maʼ ñaxan sub a bʌ. An tejclum tac baqui jiñi muʼ bʌ i pʌy tiʼ yotot yambʌlob miʼ yʌqʼuen jiñi ñumen wem bʌ bʌlñʌcʼʌl, i an yambʌlob baqui junlajal miʼ cʼuxob chuqui miʼ chajpʌntel. An yambʌ baqui yom miʼ tsʼitaʼ chʼʌm majlel uchʼibʌl jaʼel jiñi pʌybil bʌ, i an baqui mach wersajic. Ti yambʌ tejclum tac, jiñi quixtañujob miʼ pijtañob chaʼan mach ti orajic mi lac jacʼ majlel cheʼ miʼ pʌyoñobla tiʼ yotot, jinto yom mi lac jacʼ tiʼ chaʼyajlel o i yuxyajlel, pero an baqui mach weñic ti qʼuelol iliyi. Pero laʼ lac chaʼlen wersa chaʼan mi la cʌqʼueñob i yubin i tijicñʌyel jiñi tsaʼ bʌ i pʌyʌyonla tiʼ yotot.

22. ¿Chucoch ñucʌch i cʼʌjñibal mi lac pʌyob ti la cotot jiñi yambʌ hermanojob?

²² Ili ora mi laj qʼuel chaʼan isujmʌch i tʼan jiñi Pedro: «Lʌcʼʌlix i jilibal pejtelel chuqui tac an» (1 P. 4:7). Lʌcʼʌlix mi caj lac ñusan jiñi ñuc bʌ wocol. Cheʼ miʼ ñumen tsʌtsʼan majlel jiñi wocol, ñuc i cʼʌjñibal cheʼ mi lac wen cʼuxbin lac bʌ. Ñucʌch i cʼʌjñibal cheʼ mi lac jacʼ ili ticʼojel tsaʼ bʌ i yʌcʼʌ jiñi apóstol Pedro: «Pʌyʌla ochel laʼ piʼʌlob ti laʼ wotot» (1 P. 4:9, TWT). Tiʼ sujm, ili ora yicʼot yaʼ ti talto bʌ qʼuin ñucʌch i cʼʌjñibal cheʼ mi lac pʌy ti la cotot jiñi yambʌlob i mi lac taj lac tijicñʌyel.