1. ¿Chuqui miʼ yʌl jiñi Biblia chaʼan jiñi lac tojʼesʌntel?

¿CHUQUI miʼ tilel ti a jol cheʼ maʼ wubin jiñi tʼan tojʼesʌntel? Tajol maʼ ñaʼtan chaʼan jin cheʼ bʌ an majqui miʼ yʌʼlentel o miʼ jajtsʼel, pero mach cojic jach yom i yʌl jiñi. Jiñi Biblia miʼ yʌl chaʼan utsʼatʌch cheʼ mi lac tojʼesʌntel i an i tajol temel miʼ yʌjlel yicʼot jiñi cʌmbil bʌ lac chaʼan, lac ñaʼtʌbal, jiñi cʼuxbiya yicʼot cuxtʌlel (Pr. 1:2-7; 4:11-13). Cheʼ Dios miʼ tojʼesañonla miʼ pʌs chaʼan mucʼʌch i cʼuxbiñonla i yom chaʼan mi lac chumtʌl tiʼ pejtelel ora (He. 12:6). Isujmʌch, cheʼ bʌ Dios miʼ ticʼonla an i tajol añʌch chuqui miʼ mel jaʼel, pero maʼañic baʼ ora miʼ ñumel ti pʼis mi tsʌtsic chuqui miʼ mel. Cheʼ jaʼel, jiñi i sujmlel jiñi tʼan tojʼesʌntel miʼ ñumen taj i bʌ yicʼot jiñi laj cʌntesʌntel, cheʼ bajcheʼ jiñi muʼ bʌ i yʌqʼuen i yalobil juntiquil tatʌl.

2, 3. ¿Chuqui miʼ yochel ti jiñi lac tojʼesʌntel? (Qʼuele jiñi foto tac).

² Laʼ laj qʼuel jumpʼejl ejemplo. Juntiquil alʌ chʼiton i cʼabaʼ Carlos woli (choncol) ti alas pelota tiʼ mal i yotot. Jiñi i ñaʼ miʼ suben: «Alʌl, a wujilix chaʼan maʼañic maʼ mejlel ti alas ila ti mal come an chuqui miʼ mejlel a topʼ». Pero Carlos maʼañic miʼ jaqʼueʼ. Cheʼ jiñi, jiñi pelota miʼ taj i jatsʼ jumpʼejl ucʼum i miʼ tojpʼel. ¿Chuqui mi caj i mel jiñi i ñaʼ chaʼan miʼ tojʼesan? Añʌch chuqui yom miʼ suben  yicʼot i tumben. Yom miʼ tsictesʌben chucoch mach weñic tsaʼ bʌ i mele. Yom chaʼan jiñi i yalobil miʼ chʼʌmben isujm chaʼan weñʌch cheʼ miʼ jacʼben i tʼan i tat i ñaʼ i chaʼan mach ñumeñic ti pʼis chuqui woli (yʌquel) i cʼajtibentel yicʼot añʌch i cʼʌjñibal. Come jiñi ñaʼʌl yom i coltan i yalobil chaʼan miʼ cʌn, miʼ jumucʼ chilben jiñi i pelota. Anquese Carlos maʼañic miʼ mulan iliyi, mi caj i cʌn chaʼan añʌch i wocolel cheʼ miʼ ñusan tʼan.

³ Jiñi xñoptʼañonbʌla ochemonla «tiʼ yotot Dios» (1 Ti. 3:15). Jin chaʼan, mi laj qʼuel ti ñuc jiñi i mandar Jehová yicʼot cheʼ wen jach bajcheʼ miʼ tojʼesañonla cheʼ mi lac ñusʌben i tʼan. Cheʼ jaʼel, mi tsaʼ lac taja wocol tiʼ caj chuqui mi lac mel i mi lac tojʼesʌntel, miʼ cʼajtesʌbeñonla chaʼan ñucʌch i cʼʌjñibal mi lac jacʼben i tʼan Jehová (Gá. 6:7). Dios miʼ wen cʼuxbiñonla i mach yomic chaʼan mi lac taj wocol (1 P. 5:6, 7).

4. a) ¿Bajcheʼ yilal jiñi cʌntesa baʼ miʼ yʌcʼ i bendición Dios? b) ¿Chuqui mi caj laj qʼuel ti ili temaj?

⁴ Jiñi cʌntesa chucul bʌ ti principio tac miʼ mejlel i coltan la calobilob yicʼot muʼ bʌ la cʌqʼueñob estudio chaʼan miʼ sujtelob ti xcʌntʼan i chaʼan Cristo. Jiñi i Tʼan Dios jumpʼejlʌch eʼtijibʌl wen ñuc bʌ i cʼʌjñibal chaʼan jiñi cʌntesa i miʼ coltañonla «chaʼan mi lac mel chuqui toj». Miʼ mejlel laj cʼʌn laj coltan la calobilob yicʼot muʼ bʌ la cʌqʼueñob estudio chaʼan miʼ chʼʌmbeñob isujm yicʼot miʼ jacʼob pejtelel chuqui tsiʼ yʌlʌ Jesús (2 Ti. 3:16; Mt. 28:19, 20). Jehová miʼ qʼuel ti ñuc ili cʌntesa come miʼ chajpan jiñi muʼ bʌ la cʌqʼueñob estudio chaʼan miʼ sujtesañob ti xcʌntʼan i chaʼan Cristo yambʌ wiñicob xʼixicob (quixtañujob) (pejcan Tito 2:11-14). Wʌle, mi caj laj qʼuelben i jacʼbal ili uxpʼejl cʼajtiya wen ñuc bʌ i cʼʌjñibal: 1) ¿Chucoch jiñʌch bajcheʼ miʼ pʌsbeñonla i cʼuxbiya Dios cheʼ miʼ tojʼesañonla? 2) ¿Chuqui miʼ mejlel laj cʌn tiʼ tojlel jiñi quixtañujob tsaʼ bʌ tojʼesʌntiyob ti Dios? 3) ¿Bajcheʼ miʼ mejlel lac tsajcan Jehová yicʼot Jesús cheʼ mi la cʌcʼ ticʼojel?

5. ¿Bajcheʼ miʼ pʌs Jehová chaʼan miʼ cʼuxbiñonla cheʼ bʌ miʼ tojʼesañonla?

⁵ Jehová miʼ tojʼesañonla yicʼot miʼ cʌntesañonla come miʼ cʼuxbiñonla. Yom chaʼan mi lac sujtel tiʼ yamigo yicʼot mi lac chumtʌl tiʼ pejtelel ora (1 Jn. 4:16). Maʼañic baʼ ora miʼ pʼajonla o miʼ yʌl chaʼan maʼañix laj cʼʌjñibal (Pr. 12:18). Jehová miʼ qʼuelonla ti ñuc, come jin miʼ qʼuel wen tac bʌ lac melbal i maʼañic miʼ mʌctañonla chaʼan mi lac yajcan chuqui mi lac mel. ¿Cheʼ ba maʼ qʼuel jatet jiñi i cʌntesa Jehová am bʌ ti Biblia, ti lac jun tac, muʼ bʌ i yʌcʼob lac tat lac ñaʼ yicʼot ancianojob ti congregación? Cheʼ baʼ ora mach tsajalic lac chaʼan mi lac yajlel ti mulil, jiñi ancianojob miʼ ñop i tojʼesañoñobla yicʼot cʼuxbiya i wen jach bajcheʼ miʼ melob. Tiʼ sujm, jiñʌch woliʼ pʌsob i cʼuxbiya Jehová (Gá. 6:1).

6. Anquese juntiquil miʼ sʌt i yeʼtel ti congregación chaʼan tsaʼ tojʼesʌnti, ¿chucoch mi la cʌl chaʼan jiñʌch bajcheʼ miʼ pʌs i cʼuxbiya Dios?

⁶ Cheʼ an majqui miʼ tojʼesʌntel, an i tajol mach jasʌlic yom miʼ yʌqʼuentel ticʼojel. Mi an majqui miʼ chaʼlen tsʌts bʌ mulil, tajol miʼ sʌt i yeʼtel (troñel) yaʼ ti congregación. Anquese cheʼʌch miʼ yujtel, iliyi jiñʌch junchajp bajcheʼ miʼ pʌs i cʼuxbiya Jehová. Cheʼ miʼ sʌt i yeʼtel jiñi tsaʼ bʌ i chaʼle mulil miʼ mejlel i cʼotel i cʌn chaʼan yom miʼ ñumen aqʼuen i yorajlel i pejcan i Biblia, i wen ñaʼtan chuqui miʼ pejcan yicʼot i mel oración. Iliyi jiñʌch muʼ bʌ caj i coltan chaʼan pʼʌtʌl miʼ yajñel tiʼ tojlel Dios (Sal. 19:7). Ti wiʼil, tajol miʼ mejlel i chaʼ taj i yeʼtel ti congregación. Anquese juntiquil miʼ chaʼlentel ti expulsar, Jehová woliyʌch i pʌs i cʼuxbiya come miʼ cʌntan jiñi congregación (1 Co. 5:6, 7, 11). Cheʼ jaʼel, cheʼ bʌ juntiquil miʼ chaʼlentel ti expulsar tajol mi caj i ñaʼtan bajcheʼ  cʼamel i tsʌtslel jiñi i mul i miʼ coltan chaʼan miʼ chaʼ sujtel ti Jehová, come tiʼ pejtelel ora toj jiñi i cʌntesa Jehová (Hch. 3:19).

7. a) ¿Majqui jiñi Sebná? b) ¿Chuqui mach bʌ weñic tsaʼ caji i mel Sebná?

⁷ Chaʼan mi lac ñaʼtan chaʼan wen ñucʌch i cʼʌjñibal cheʼ miʼ tojʼesañonla Jehová, laʼ laj qʼuel chuqui tsiʼ mele tiʼ tojlel chaʼtiquil wiñicob: Jiñʌch Sebná, tsaʼ bʌ chumle tiʼ yorajlel Ezequías, yicʼot juntiquil hermano i cʼabaʼ Graham. Laʼ lac ñaxan al tiʼ tojlel Sebná. Tajol jiñʌch tsaʼ bʌ ajñi tiʼ wenta jiñi i yotot Ezequías, jin chaʼan wen ñuc i yeʼtel (Is. 22:15). Pero tsaʼ caji i chanʼesan i bʌ i tsiʼ bajñel sʌcla i ñuclel. Tsaʼto i yʌcʼʌ ti mejlel wen utsʼatax bʌ mucoñibʌl baqui miʼ mujquel yicʼot tsiʼ xʌñʌ ti utsʼatax bʌ carreta tac (Is. 22:16-18).

8. ¿Bajcheʼ tsaʼ tojʼesʌnti Sebná ti Jehová, i chuqui tsaʼ ujti?

⁸ Come Sebná tsiʼ bajñel sʌcla i ñuclel, Dios tsiʼ chilbe i yeʼtel i tsiʼ yʌqʼue tiʼ wenta Eliaquim (Is. 22:19-21). Ili tsaʼ ujti cheʼ bʌ jiñi rey ti Asiria i cʼabaʼ Senaquerib tsiʼ ñaʼta i jisan Jerusalén. Ti wiʼil, Senaquerib tsiʼ choco majlel ñuc bʌ xʼeʼtelob i chaʼan yicʼot cabʌl i soldadojob chaʼan miʼ yotsʌben i bʌqʼuen jiñi judíojob i jiñi Ezequías miʼ yʌcʼ i bʌ tiʼ tojlelob (2 R. 18:17-25). Ezequías tsiʼ choco majlel Eliaquim yicʼot yambʌ chaʼtiquil i wiñicob chaʼan miʼ pejcañob jiñi i wiñicob Senaquerib. Sebná jiñʌch juntiquil i wiñic Ezequías, añix bʌ bajcheʼ i secretario. Ili miʼ yʌcʼ ti ñaʼtʌntel chaʼan Sebná maʼañic tsiʼ loto tiʼ pusicʼal jiñi michʼajel yicʼot jiñi tsʼaʼleya, tsaʼʌch i pʌsʌ i pecʼlel come tsiʼ jacʼʌ jiñi yambʌ eʼtel mach bʌ ñumen ñuquic bajcheʼ an i chaʼan ti ñaxan. ¿Chuqui mi laj cʌn yicʼot iliyi? Mi caj laj qʼuel uxpʼejl.

9-11. a) ¿Chuqui ñuc tac bʌ miʼ mejlel laj cʌn tiʼ tojlel Sebná? b) ¿Bajcheʼ yubil maʼ wubin cheʼ maʼ ñaʼtan bajcheʼ yilal tsiʼ mele Jehová tiʼ tojlel Sebná?

⁹ Ñaxam bʌ, cheʼ bʌ Sebná tiʼ sʌtʌ jiñi i yeʼtel, miʼ yʌqʼueñonla laj cʼajtesan chaʼan «chañʌch i pusicʼal jini muʼ bʌ caj ti toʼol jilel. Ñucʌch miʼ lon qʼuel i bʌ jini muʼ bʌ caj ti yajlel» (Pr. 16:18). Tajol an ti a wenta ñuc tac bʌ eʼtel yaʼ ti congregación i jiñi yambʌyob miʼ ñaʼtañob chaʼan ñucʌch a cʼʌjñibal. Mi cheʼ bajcheʼ jiñi, ¿muʼ ba caj a chaʼlen wersa chaʼan maʼ chʌn pʌs a pecʼlel? ¿Muʼ ba caj a wʌqʼuen i ñuclel Jehová chaʼan pejtelel chuqui a wujil melol o melbil bʌ a chaʼan? (1 Co. 4:7). Jiñi apóstol Pablo tiʼ tsʼijbu: «Mic subeñetla ti jujuntiquiletla: Mach a lon ñaʼtan ti a pusicʼal ñumen an a ñuclel bajcheʼ an. Tiʼ pʼisol jach bajcheʼ tsiʼ yʌqʼueyet a ñop Dios, ñaʼtan ti toj a ñuclel ti jujuntiquiletla» (Ro. 12:3).

 ¹⁰ I chaʼpʼejlel, cheʼ bʌ Jehová tsiʼ tojʼesa Sebná tajol tsiʼ yʌcʼʌ ti cʌjñel chaʼan yujil chaʼan mucʼʌch i mejlel i qʼuextan i bʌ (Pr. 3:11, 12). Ili jiñʌch jumpʼejl wem bʌ cʌntesʌntel chaʼan jiñi muʼ bʌ i sʌtob i yeʼtel ti congregación wʌle ora. Yom miʼ chaʼleñob wersa chaʼan ñumen wen miʼ melbeñob i yeʼtel Dios i miʼ qʼuelob bajcheʼ i cʼuxbintel ti Jehová jiñi i tojʼesʌntel, mach yomic miʼ michʼañob. La laj cʼajtesan: Mi añʌch lac pecʼlel, jiñi lac Tat mi caj i yʌqʼueñonla lac chobejtʌbal (pejcan 1 Pedro 5:6, 7). Cheʼʌch la com ajñel bajcheʼ cʼun jach bʌ ocʼol tiʼ cʼʌb Jehová i mi laj cʌy chaʼan miʼ weñʼesañonla tiʼ cʌntesa.

¹¹ I yuxpʼejlel, cheʼ bajcheʼ tsiʼ mele Jehová tiʼ tojlel Sebná, an chuqui wen ñuc bʌ miʼ mejlel i cʌñob jiñi tatʌlob yicʼot ancianojob ti congregación come añob i yeʼtel chaʼan miʼ chaʼleñob tojʼesaya. Anquese jiñi tojʼesʌntel tilem bʌ ti Jehová miʼ pʌs chaʼan miʼ tsʼaʼlen jiñi mulil, miʼ pʌsbeñonla jaʼel chaʼan maʼañic miʼ cʌy i cʼuxbin jiñi muʼ bʌ i chaʼlen mulil. Cheʼ jaʼel, Jehová miʼ qʼuel chuqui wen bʌ ti lac tojlel. Mi an majqui yom maʼ tojʼesan jaʼel, ¿cheʼ ba mi caj a mel bajcheʼ Jehová? (Jud. 22, 23).

12-14. a) ¿Chuqui miʼ mel cabʌlob cheʼ bʌ miʼ tojʼesʌntelob ti Jehová? b) ¿Bajcheʼ tsiʼ taja i coltʌntel ti Biblia juntiquil hermano chaʼan miʼ qʼuextan i melbal, i chuqui i wenlel tsiʼ taja?

¹² Anquese chʼijiyemtic jax, an muʼ bʌ i tojʼesʌntelob ti Jehová, pero wen cʼux miʼ yubiñob tiʼ pusicʼal i miʼ ñajtʼesañob i bʌ tiʼ tojlel yicʼot miʼ cʌyob jiñi congregación (He. 3:12, 13). ¿Muʼ ba i mejlelob ti coltʌntel? Chaʼan miʼ mejlel lac ñaʼtan, laʼ laj qʼuel tsaʼ bʌ ujti tiʼ tojlel Graham. Tsaʼ chaʼlenti ti expulsar, pero ti wiʼil tsaʼʌch chaʼ sujti, i ti wiʼil tsaʼ chaʼ tsʌña. Cheʼ tsʼitaʼ ñumeñix jabil, tiʼ sube juntiquil anciano tsaʼ bʌ sujti tiʼ yamigo chaʼan miʼ yʌqʼuen estudio.

¹³ Jiñi anciano miʼ yʌl: «I wocol jiñi Graham jin cheʼ miʼ wen chanʼesan i bʌ. Miʼ jatsʼ ti tʼan jiñi ancianojob tsaʼ bʌ i yʌlʌyob chaʼan yom miʼ chaʼlentel ti expulsar. Jin chaʼan, tsaʼ c locʼsʌbe lon i yorajlel chaʼan mic chajpan lojon chuqui miʼ yʌl jiñi Biblia chaʼan jiñi chanʼesa bʌ yicʼot baqui tac bʌ i wocolel. Graham tsaʼ caji i qʼuel i bʌ ti jiñi Biblia, lajal bʌ bajcheʼ jumpʼejl espejo, i maʼañic tsiʼ mulaj chuqui tsiʼ taja i qʼuel tiʼ tojlel. Tsaʼʌch wen qʼuextʌyi. Tsiʼ cʌñʌ chaʼan jiñi chanʼesa bʌ lajalʌch bajcheʼ jumpʼejl «cucujl» tsaʼ bʌ i mʌcbe i wut yicʼot chaʼan baqui yoque an i wocol jiñʌch cheʼ miʼ mulan i jatsʼ ti tʼan yambʌlob. Ti orajach tsaʼ caji ti qʼuextʌyel. Ti bele ora tsaʼ caji ti majlel ti tempa bʌ tac, tsaʼ caji i wen pejcan i Biblia yicʼot i mel oración ti jujumpʼejl qʼuin. Cheʼ jaʼel, tsaʼ caji i chʼʌm tiʼ wenta jiñi i yeʼtel tiʼ chaʼan bʌ Dios bajcheʼ i jol i familia, i jiñi i yijñam yicʼot i yixicpʼeñalob wen tijicñayob» (Lc. 6:41, 42; Stg. 1:23-25).

¹⁴ Jiñi anciano miʼ bej al: «Ti jumpʼejl bʌ qʼuin, Graham tsiʼ wen ñijca c pusicʼal cheʼ bʌ tiʼ subeyon: ‹Añix cabʌl jab cʌmbil c chaʼan i sujmlel, i añix ochemon bajcheʼ precursor. Pero cojaxto wʌleʼli miʼ mejlel cʌl tiʼ sujm chaʼan mij cʼuxbin Jehová›. Mach cabʌlic ora tsaʼ ñumi cheʼ tsaʼ caji ti subentel chaʼan miʼ ñusan jiñi micrófono tac ti tempa bʌ, i tsaʼʌch i wen qʼuele ti ñuc jiñi eʼtel. Tiʼ tojlel tsaʼ j cʌñʌ chaʼan cheʼ juntiquil miʼ peqʼuesan i bʌ tiʼ tojlel Jehová i miʼ jacʼ i tojʼesʌntel, miʼ taj cabʌl bendición».

15. ¿Chuqui yom mi lac mel chaʼan jiñi yambʌlob miʼ jacʼob cheʼ mi lac tojʼesañob?

¹⁵ Chaʼan wen bʌ xcʌntesajonla, ñaxan yom mi la cʌcʼ lac bʌ ti cʌntesʌntel (1 Ti. 4:15, 16). Cheʼ jaʼel, mi Jehová miʼ cʼʌñet chaʼan maʼ tojʼesan yambʌlob, yom an a pecʼlel yicʼot maʼ wʌcʼ a bʌ ti cʌntesʌntel ti Jehová.  Cheʼ bʌ maʼ qʼuejlel chaʼan peqʼuetʌch, mi caj i qʼueletob ti ñuc i ñumen wen mi caj i jacʼob a ticʼojel. Laʼ laj qʼuel tiʼ tojlel Jesús.

16. ¿Chuqui miʼ mejlel laj cʌn cheʼ bajcheʼ tsiʼ chaʼle cʌntesa Jesús yicʼot tsiʼ tojʼesa yambʌlob?

¹⁶ Jesús tiʼ pejtelel ora tsiʼ jacʼbe i tʼan i Tat, anquese an baʼ wocolʌch tsiʼ yubi (Mt. 26:39). Wen yujil chaʼan jiñi i ñaʼtʌbal yicʼot i cʌntesa chʼoyolʌch ti Dios (Jn. 5:19, 30). Juntiquilʌch uts bʌ xcʌntesa yicʼot am bʌ i pʼuntaya, come tsiʼ pʌsʌ i pecʼlel yicʼot tsiʼ jacʼʌ tʼan, jin chaʼan jiñi quixtañujob tiʼ tsajcayob (pejcan Mateo 11:29). Pejtelel chuqui tsiʼ yʌlʌ tsiʼ ñuqʼuesʌbe i pusicʼal jiñi chʼijiyemoʼ bʌ yicʼot cʼuñoʼ bʌ bajcheʼ xujlem teʼ o i ñich jumpʼejl candil wolix bʌ i yʌjpel i cʼʌcʼal (Mt. 12:20). Jesús mach ti orajic tsaʼ michʼa, mi jiñicto cheʼ bʌ tsiʼ ñopo i chanʼesañob i bʌ jiñi apóstolob i chaʼan. Wen jach bajcheʼ tsiʼ tojʼesayob (Mr. 9:33-37; Lc. 22:24-27).

17. ¿Chuqui yom miʼ melob jiñi ancianojob chaʼan wen miʼ cʌntañob jiñi congregación?

¹⁷ Jiñi ancianojob cheʼʌch yom miʼ melob bajcheʼ Jesús cheʼ miʼ cʼʌñob jiñi Biblia chaʼan miʼ yʌcʼob cʌntesa. Cheʼ bajcheʼ jiñi, miʼ pʌsob chaʼan yomobʌch chaʼan Jehová yicʼot Jesús miʼ cʌntesañob. Jiñi apóstol Pedro tiʼ tsʼijbu: «Cʌntanla i tiñʌmeʼ Dios añoʼ bʌ ti laʼ wenta. Mach chaʼanic xicʼbebiletla, pero ti pejtelel laʼ pusicʼal cheʼ bajcheʼ yom Dios. Mach chaʼanic ganar, pero chaʼan cheʼ yom laʼ pusicʼal. Mach yomic mi laʼ chañʼesan laʼ bʌ tiʼ tojlel jini tiñʌmeʼ añoʼ bʌ ti laʼ wenta. Pʌsbeñob ti laʼ melbal bajcheʼ yom miʼ melob» (1 P. 5:2-4). Cheʼ bʌ jiñi ancianojob ti jumpʼejl i pusicʼal miʼ jacʼob muʼ bʌ i yʌl Jehová yicʼot Cristo, i jol jiñi congregación, miʼ tajob i wenlel i cheʼ jaʼel jiñi hermanojob (Is. 32:1, 2, 17, 18).

18. a) ¿Chuqui miʼ suben Jehová jiñi tatʌlob? b) ¿Bajcheʼ miʼ coltan Jehová jiñi tatʌlob chaʼan miʼ tsʼʌctesañob i yeʼtel?

¹⁸ ¿Chuqui miʼ mejlel la cʌl chaʼan jiñi cʌntesa ti familia? Jehová miʼ subeñob jiñi i jol familia: «Mach yomic mi laʼ techbeñob i michʼajel laʼ walobilob. Juʼsʌbeñob i pusicʼal cheʼ woliyob ti colel. Cʌntesañob ti lac Yum» (Ef. 6:4). Ili wen ñucʌch i cʼʌjñibal. Ti Proverbios 19:18 miʼ pʌs chaʼan mi jiñi tatʌlob maʼañic miʼ cʌntesañob i yalobil, jiñobʌch an tiʼ wenta jiñi i cuxtʌlel i yalobilob. Jehová mi caj i chaʼlen meloñel tiʼ tojlel jiñi tatʌlob (1 S. 3:12-14). Pero Jehová miʼ yʌqʼuen i ñaʼtʌbal yicʼot i pʼʌtʌlel jiñi tatʌlob muʼ bʌ i cʼajtibeñob i coltaya i miʼ yʌcʼob i bʌ ti cʌntesʌntel tiʼ Tʼan yicʼot ti chʼujul bʌ i yespíritu (pejcan Santiago 1:5).

19, 20. a) ¿Chuqui tac ti bendición mi caj lac taj cheʼ mucʼʌch lac jacʼ lac tojʼesʌntel ti Jehová? b) ¿Chuqui mi caj laj qʼuel yaʼ ti yambʌ temaj?

¹⁹ Cheʼ mi lac jacʼ jiñi i cʌntesa Jehová yicʼot mi lac tojʼesan yambʌlob cheʼ bajcheʼ miʼ mel yicʼot Jesús, mi lac taj cabʌl bendición. An ñʌchʼtʌlel ti lac familia yicʼot ti congregación. Juntemel mi laj cʼuxbin lac bʌ, mi laj qʼuel lac bʌ ti ñuc yicʼot utsʼat mi lac chumtʌl, jintacʌch tʼoxol bendición muʼ bʌ caj lac taj ti talto bʌ qʼuin (Sal. 72:7). Cheʼ miʼ tojʼesañonla Jehová miʼ chajpañonla chaʼan tiʼ pejtelel ora ñʌchʼʌl yicʼot juntemel mi lac chumtʌl bajcheʼ jumpʼejl familia am bʌ tiʼ wenta (pejcan Isaías 11:9). Mi mucʼʌch laj cʼajtesan iliyi, ba ora miʼ tojʼesañonla Jehová cheʼʌch mi caj laj qʼuel bajcheʼ yom: Jiñʌch bajcheʼ miʼ pʌsbeñonla i cʼuxbiya.

²⁰ Yaʼ ti yambʌ temaj, mi caj lac ñumen cʌn chaʼan jiñi tojʼesʌntel yicʼot cʌntesʌntel muʼ bʌ i yʌjqʼuel ti familia yicʼot ti congregación. Cheʼ jaʼel, mi caj laj qʼuel bajcheʼ miʼ mejlel laj cʌntesan lac bʌ yicʼot chaʼan maʼañic mi lac taj jiñi ñumen cʼux bʌ bajcheʼ jiñi tojʼesʌntel muʼ bʌ lac mejlel ti aqʼuentel.